106. ALDIZKARIA - 2023ko maiatzaren 22a

1. NAFARROAKO FORU KOMUNITATEA

1.1. XEDAPEN OROKORRAK

1.1.3. Foru Aginduak

118E/2023 FORU AGINDUA, maiatzaren 17koa, Landa Garapeneko eta Ingurumeneko kontseilariak emana, zeinaren bidez aldatzen baita 222/2016 Foru Agindua, ekainaren 16koa, Landa Garapeneko, Ingurumeneko eta Toki Administrazioko kontseilariak emana, sua lurzoru urbanizaezinean nola erabili arautzen duena, baso suteak prebenitzeko.

ZIOEN AZALPENA

Nafarroako Oihan Ondarea Babestu eta Garatzeari buruzko abenduaren 31ko 13/1990 Foru Legeak (otsailaren 21eko 3/2007 Foru Legeak aldatua) 37. artikuluan ezartzen duenez, Foru Komunitateko Administrazioaren eskumena da baso suteen prebentziorako eta suteen kontra borrokatzeko neurriak planifikatu, koordinatu eta betearaztea.

Agindu horrek, 4. puntuan, Baso Administrazioari ahalmena ematen dio mendietan eta mugakide diren eremuetan suterako arriskua eragin dezaketen jarduerak mugatzeko, eremu horietatik iragatea barne.

Estatuan, baso suteen arloan presako neurriak hartzen dituen abuztuaren 1eko 15/2022 Errege Lege-dekretuak Mendiei buruzko azaroaren 21eko 43/2003 Legearen artikulu batzuk aldatzen ditu, baso suteen arloko hiru eremuei dagokienez, hots, prebentzioari, zaintzari eta itzaltzeari buruz, halako moduz ezen, Meteorologiako Estatu Agentziaren informazio meteorologikoaren arabera, sute arrisku oso handia edo muturrekoa dakarten egoera meteorologiko jakin batzuetan, debeku eta muga komun batzuk ezartzen baitira autonomia erkidego guztietarako. Horietako batzuetan salbuespenak egiten ahal dira administrazio autonomikoko organo eskudunak emandako berariazko baimenen bidez, eta beste batzuetan erabileraren erregulazio bereziak ezartzen ahal dira autonomia erkidego horren lurralde eremuaren barnean.

Era berean, eta hondakinen kudeaketak klima-aldaketan dituen ondorioak minimizatzeko, 2022ko apirilean indarrean sartu zen Ekonomia zirkularra bultzatzeko eta hondakinei eta lurzoru kutsatuei buruzko apirilaren 8ko 7/2022 Legea. Lege horren 27. artikulua hondakinak ezabatzeari buruzkoa da, eta hirugarren apartatuan berariaz aipatzen du debekatua dagoela nekazaritza edo basogintza ingurunean sortutako landare hondakinak erretzea, salbu eta arrazoi fitosanitarioengatik ezin zaionean beste tratamendu bat eman edo baso suteak prebenitzeko denean.

Aipatu legearen 27. artikulu hori aldatu egin zen Nekazaritza Politika Erkidea kudeatzeko sistema arautzen duen abenduaren 23ko 30/2022 Legearen bidez; hala, arau horretatik salbuetsita gelditzen dira nekazaritzako ustiategi txikiak eta mikroustiategiak.

Aintzat hartuta Batzordearen 2014ko ekainaren 25eko 702/1014 (EB) Erregelamendua, nekazaritza eta basogintza sektoreetarako eta landa eremuetarako laguntza kategoria batzuk barne merkatuarekin bateragarritzat jotzen dituena Europar Batasunaren Funtzionamenduari buruzko Tratatuaren 107. eta 108. artikuluak aplikatuz, I. eranskineko 2. artikuluaren arabera, nekazaritzako ustiategi txikitzat eta mikroustiategitzat jotzen dira 50 langile baino gutxiago dituzten enpresak, urteko negozio-bolumena edo urteko balantzea 10 milioi eurotik beherakoa dutenak.

Arau esparru hori kontuan hartuta, eta 2022ko udan Nafarroan gertatu ziren suteen ondorioz, Foru Komunitatearen azalera osoaren %1,5 erretzeaz gainera babes zibilaren arloan larrialdi handia eragin baitzuten, beharrezkotzat jotzen da berriz ere berrikustea ekainaren 16ko 222/2016 Foru Agindua, sua lurzoru urbanizaezinean nola erabili arautzen duena, baso sutearen agertoki berrietara eta, orobat, Estatuan indarrean dagoen araudi berrira egokitzeko, bai hondakinen kudeaketari dagokionez, bai baso suteei dagokienez.

Azaldutakoarekin bat, eta Nafarroako Gobernuari eta Lehendakariari buruzko abenduaren 3ko 14/2004 Foru Legearen 41.1.g) artikuluak ematen dizkidan eskudantziak erabiliz,

AGINTZEN DUT:

Artikulu bakarra.–Aldatzea Landa Garapeneko, Ingurumeneko eta Toki Administrazioko kontseilariak ekainaren 16an eman 222/2016 Foru Agindua, sua lurzoru urbanizaezinean nola erabili arautzen duena, baso suteak prebenitzeko.

Bat.–1. artikuluaren bigarren paragrafoa aldatzen da, eta honela idatzita geldituko da:

"Foru agindu honen ondorioetarako, lurzoru urbanizaezina izanen dira uztailaren 26ko 1/2017 Legegintzako Foru Dekretuaren bidez onetsitako Lurraldearen Antolamenduari eta Hirigintzari buruzko Foru Legearen Testu Bateginaren 92. artikuluan jasota dauden inguruabarretako bat duten lurrak".

Bi.–2. artikuluari bigarren paragrafo bat gehitzen zaio eta, hala, artikulua bi apartatutan banatuta eta honela idatzita geldituko da:

"1. Europako Parlamentuaren eta Kontseiluaren 2021eko abenduaren 2ko 2021/2115 (EB) Erregelamenduaren 73. artikuluarekin bat etorriz, erregelamendu hori baita arauak ezartzen dituena Europar Batasuneko estatuek, Nekazaritza Politika Erkidearen esparruan (NPEaren plan estrategikoak), egin beharreko plan estrategikoetarako laguntzari buruz –Nekazaritza Bermatzeko Europako Funtsaren (NBEUF) eta Landa Garapenerako Europako Nekazaritza Funtsaren (LGENF) kargura finantzatzen da–, eta 1305/2013 (EB) eta 1307/2013 (EB) erregelamenduak indargabetzen dituena, eta, halaber, aintzat hartuta Nafarroako baso sistemak eta haien banaketa espaziala, espazioak eta espezieak, baso suteen erregai-ereduak, maiztasuna eta birulentzia eta lurraldearen erabilerak, Nafarroako Foru Komunitateko baso lur guztiak eta haien eremu mugakideak baso suteen arrisku ertaineko eremu deklaratzen dira.

2. Babes zibilaren ikuspegitik, eta aintzat hartuta baso suteen arriskuaren analisia eta baso suteek izaten ahal dituzten ondorioak, baso suteen fenomenoak uki ditzakeen elementu kalteberen arabera (pertsonak, ondasunak eta ingurumena), Nafarroako Foru Komunitateko Baso-suteetarako Babes Zibileko Larrialdi Plan Bereziak (INFONA 2022) ezartzen ditu, batetik, arrisku handiko udalerri batzuk, nahitaez egin beharra dutenak baso suteen arriskuari erantzuteko udal jarduketa plana, eta, bestetik, beste udalerri batzuk non, dituzten kalteberatasun balioengatik, gomendagarria den gisa horretako tokiko planak egitea".

Hiru.–4. artikulua aldatzen da, eta honela idatzita geldituko da:

"4. artikulua. Aldi klimatikoak eta arrisku maila.

1. Urte naturalean klimatologia aldatzen denez, foru agindu honen ondorioetarako, ondoko aldi klimatiko hauek ezartzen dira:

a) Udakoa: ekainaren 1etik irailaren 30era.

b) Negukoa: azaroaren 1etik apirilaren 30era.

c) Urteko gainerakoa: maiatza eta urria.

Urtero, baldintza meteorologikoetan edo interes orokorreko beste inguruabar batzuetan oinarrituta, gorago ezarritako data horiek aldatzen ahalko dira, ingurumen arloko departamentu eskuduneko titularrak onetsitako administrazio egintza baten bidez.

2. Nafarroan, baso suteen arrisku indizea Meteorologiako Estatu Agentziak (AEMET) ezarritakoa izanen da. Indize hori AEMETen web-orri ofizialean zein Nafarroako Gobernuaren atarian (www.nafarroa.eus) kontsultatzen ahalko da".

Lau.–5. artikuluaren 1. apartatuko b) eta d) letrak eta 2. apartatua aldatzen dira, eta honela idatzita geldituko dira:

"b) Nekazaritza edo basogintza ingurunean sortutako hondakinak erretzea, salbu eta arrazoi fitosanitarioengatik ezin zaionean beste tratamendu bat eman edo baso suteak prebenitzeko denean".

"d) Uztondoak erretzea, bai lehorreko lurretan bai ureztalurretan, salbu eta mahastizaintzaren eta ardogintzaren sektoreari laguntzeko zenbait programaren ondoriozko ordainketak, landa garapenerako urteko primak edo zuzeneko ordainketak jasotzen dituzten onuradunek bete beharreko baldintzazkotasun arauetan deskribatutako arrazoi fitosanitarioengatik".

2. Salbuespenez eta beti modu justifikatuan, suaren erabilera baimendu daiteke baldintza jakin batzuetan, foru agindu honen hurrengo kapituluetan xedatzen denaren arabera".

Bost.–6. artikulua aldatzen da, eta honela idatzita geldituko da:

"6. artikulua. Salbuespenezko erreketak nekazaritza lurretan.

1. Salbuespenez, nekazaritza lurretan sua erabiltzea baimentzen ahalko da, artikulu honetan xedatutako moduan eta baldintzekin, eta halakoetan nahitaez bete beharko dira foru agindu honen 14. artikuluak sua erabiltzeko ezartzen dituen baldintzak.

2. Udako aldian, ez da inoiz salbuespenezko erreketarik baimenduko nekazaritza lurretan, honako hauetarako:

a) Landare hondarrak, inausketen hondarrak edo beste hondar batzuk erretzea nekazaritzako lehorreko lurretan.

b) Ureztatzeko nekazaritza azpiegituren mantentze-lanak.

c) Hurrengo apartatuetan jasota ez dagoen landaredia.

3. Uztondoak erretzea.

3.1. Uztondoak erretzeko salbuespenezko baimena soilik arrazoi fitosanitarioengatik ematen ahalko da, foru agindu honen 1. eranskinean jasotako egutegia betez, eta honako baldintza hauek betetzen direnean:

a) Erreketa ez dadila eskatu ekainaren 1etik irailaren 15era bitarteko aldirako.

b) Ez daitezela izan 5 hektarea baino gehiagoko hedadura duten baso, zuhaizti, sasitza, larre edo belardi naturalen barnean kokatutako nekazaritza lurrak.

c) Erreketa ez dadila egin 5 hektarea baino gehiagoko hedadura duten baso, zuhaizti, sasitza, larre edo belardi naturalen ondoan dauden nekazaritza lurretan, 100 metro zabaleko zerrenda batean.

3.2. Hona hemen baimenerako prozedura:

3.2.1. Nekazaritzako ustiategi txikiak edo mikroustiategiak.

a) Aurretiazko komunikazioa aurkeztu beharko zaio Baso Administrazioari, abuztuaren 30a baino lehen, egun hori barne. Bertan, honako hauek adieraziko dira: ekintzaren arduradunaren izena, deiturak, posta-helbidea, helbide elektronikoa, NANa eta telefonoa; esparru, lurzati, poligono eta udalerrien zerrenda (uneko urteko SIGPAC datuak); eta nekazaritzako ustiategi txikia edo mikroustiategia den ala ez.

b) Aurretiazko komunikazioari erantsita, afekzio fitosanitarioei buruzko aldeko txosten teknikoa aurkeztuko da, nekazaritza arloan eskumena duen organoak emana edo baliozkotua, dagokion baimen eskaerarekin batera. Ez da beharrezkoa izanen txosten hori eranstea, baldin eta nekazaritza arloan eskumenak dituen zuzendaritza nagusiak berariaz eta publikoki adierazi badu Nafarroako nekazaritza lurretan afekzio fitosanitario orokortuak daudela.

3.2.2. Nekazaritzako ustiategi txiki edo mikroustiategi ez diren ustiategiak:

a) Eskaera bat aurkeztu beharko zaio Baso Administrazioari, abuztuaren 30a baino lehen, egun hori barne. Bertan, honako hauek adieraziko dira: ekintzaren arduradunaren izena, deiturak, posta-helbidea, helbide elektronikoa, NANa eta telefonoa; esparru, lurzati, poligono eta udalerrien zerrenda (uneko urteko SIGPAC datuak); eta nekazaritzako ustiategi txikia edo mikroustiategia den ala ez.

b) Eskaerari erantsita, afekzio fitosanitarioei buruzko aldeko txosten teknikoa aurkeztuko da, nekazaritza arloan eskumena duen organoak emana edo baliozkotua, dagokion baimen eskaerarekin batera. Ez da beharrezkoa izanen txosten hori eranstea, baldin eta nekazaritza arloan eskumenak dituen zuzendaritza nagusiak berariaz eta publikoki adierazi badu Nafarroako nekazaritza lurretan afekzio fitosanitario orokortuak daudela.

Hilabeteko epea igarotzen bada baimenari buruzko ebazpenik eman gabe, administrazioaren isiltasunez ezetsitzat joko da eskaera.

4. Landare hondarrak, inausketen hondarrak edo beste hondar batzuk, uztondoez bestelakoak, erretzea.

4.1. Interesduna nekazaritzako ustiategi txiki edo mikroustiategi bat bada, ez da baimenik beharko honako kasu hauetan:

a) Ureztalurretan udako alditik kanpo (neguan arroza eta artoa ere bai).

b) 5 hektarea baino gutxiagoko baso, zuhaizti edo sasitza batetik 100 metro baino gehiagora egin behar badira erreketak.

Sustatzailea ez bada nekazaritzako ustiategi txiki edo mikroustiategi bat, baimena beharko du, artikulu honetako 4.2.b) apartatuan jasotako prozeduraren arabera.

4.2. Honako hau izanen da baimenen prozedura 5 hektarea edo gehiagoko baso, zuhaizti edo sasitza batetik 100 metro baino gutxiagora erreketak egiteko:

a) Nekazaritzako ustiategi txikiek edo mikroustiategiek sustatutako ekintzen kasuan: erreketaren sustatzaileak erantzukizunpeko adierazpen bat bete eta sinatu beharko du, eta kasuan kasuko eskualdeko basozainei helarazi, hura egin baino 15 egun natural lehenago gutxienez.

b) Sustatzailea ez bada nekazaritzako ustiategi txiki edo mikroustiategi bat: erreketaren sustatzaileak erreketarako baimena eskatu beharko dio Baso Administrazioari, hura egin baino 15 egun natural lehenago gutxienez. Aipatutako epea igarotzen bada baimenari buruzko ebazpenik eman gabe, administrazioaren isiltasunez ezetsitzat joko da eskaera.

5. Ureztatzeko nekazaritza azpiegituretako erreketak.

5.1. Hormigoizko erretenetako ertzak eta kutxak erretzea, 5 hektarea edo gehiagoko baso, zuhaizti edo sasitza batetik 100 metro baino gutxiagora badaude: erreketaren sustatzaileak erantzukizunpeko adierazpen bat bete eta sinatu beharko du, eta kasuan kasuko eskualdeko basozainei helarazi, hura egin baino 15 egun natural lehenago gutxienez. Gisa horretako baso, zuhaizti edo sasitzetatik 100 metro baino gehiagora badaude, ez dago aipatu tramitea egin beharrik.

5.2. Erretenetan eta isurbideetan landareak erretzea: ureztatzaile elkarteak edo ukitutako azpiegiturak kudeatzen dituen pertsonak erreketarako baimena eskatu beharko dio Baso Administrazioari, hura egin baino 15 egun natural lehenago gutxienez. Aipatutako epea igarota, administrazioaren isiltasunez ezetsitzat joko da eskaera.

5.3. Erretenetan pilatutako landare hilak erretzea: erreketaren sustatzaileak erantzukizunpeko adierazpen bat bete eta sinatu beharko du, eta kasuan kasuko eskualdeko basozainei helarazi, hura egin baino 15 egun natural lehenago gutxienez.

6. Aurreko apartatuetan xedatutakoak ez ditu deusetan ukatzen, hurrengo artikuluko 2. apartatuko a), b), c) eta d) letretan jasotako kasuetako bat gertatzen denean, nekazaritza lurretan ematen ahal diren baimenak.

Sei.–7. artikulua aldatzen da, eta honela idatzita geldituko da:

"7. artikulua. Salbuespenezko erreketak baso lurretan.

1. Salbuespenez, baso lurretan sua erabiltzea baimentzen ahalko da, artikulu honetan xedatutako moduan eta baldintzekin, eta halakoetan nahitaez bete beharko dira foru agindu honen 14. artikuluak sua erabiltzeko ezartzen dituen baldintzak.

2. Urte osoan, baso lurretan sua erabiltzeko baimena ematen ahalko da salbuespenez, kasu hauetan:

a) Baso suteak prebenitu eta itzaltzeko lanetan, langile kualifikatuek egiten dituztenean, Baso Administrazioak gainbegiratuta.

b) Landare osasunarengatik, urtarrilaren 21eko 58/2005 Errege Dekretuak berrogeialdipeko izurri deklaratutako eta/edo baso sistemetarako kaltegarriak diren organismoak erauzi edo kontrolatzeko jarduketetan.

c) Baso suteak prebenitu edo itzaltzeari buruzko prestakuntza jardueretan, administrazio publikoek edo erakunde ofizialek antolatzen dituztenean.

d) Iparraldeko eremuan kokatuta eta Nafarroako Gazteriaren Institutuak baimenduak dauden kanpaleku finko ez ibiltarietan, Nafarroako Foru Komunitatean atari zabalean gazteekin egiten diren jarduerak arautzen dituen abuztuaren 22ko 107/2005 Foru Dekretuarekin bat.

e) Makaldietako hondarrak erretzea. Artikulu honetako 4. apartatuko c) letran jasotako kasuetan, ez da baimenik beharko.

f) Sasiak erretzea larreak edo habitatak hobetzeko. Udako aldian eskatzen badira, justifikatu egin beharko dira arrazoiak.

3. Aurrekoaz gain, erreketak udako alditik kanpo egitekoak baldin badira, sua erabiltzeko baimena ematen ahalko da salbuespenez, kasu hauetan:

a) Sasiak erretzea ereindako belardietan.

b) Moztutako landareen hondarrak erretzea, alorren mugen, hormen, borden eta antzekoen mantentze-lanetatik datozenean, erretzen direnean piletan metatuta, bakartuta eta su har dezakeen basotik bereizita, egiten baldin bada 5 hektarea edo gehiagoko baso, zuhaizti edo sasitza batetik 100 metro baino gutxiagora.

c) Larreak hobetzeko erreketak. Orokorrean, ez da larreak hobetzeko erreketak egiteko baimenik emanen, azken aldiz erre zirenetik gutxienez 5 urte iragan ez badira.

d) Basoko hondarrak ezabatzeko erreketak.

4. Gorago xedatutakoa deusetan ukatu gabe, udako alditik kanpo, nekazaritzako ustiategi txikiek eta mikroustiategiek ez dute baimenik beharko erreketak egiteko, kasu hauetan:

a) Sasiak erretzea ereindako belardietan, egiten baldin bada 5 hektarea baino gutxiagoko baso, zuhaizti edo sasitza batetik 100 metro baino gehiagora.

b) Moztutako landareen hondarrak erretzea, alorren mugen, hormen, borden eta antzekoen mantentze-lanetatik datozenean, erretzen direnean piletan metatuta, bakartuta eta su har dezakeen basotik bereizita, egiten baldin bada 5 hektarea baino gutxiagoko baso, zuhaizti edo sasitza batetik 100 metro baino gehiagora.

c) Makaldietako hondarrak erretzea, ez direnean mugakideak ibarbaso naturalekin edo ibai ibilguekin.

5. Orokorrean, hau izanen da salbuespenezko baimenerako prozedura: erreketaren sustatzaileak baimena eskatu beharko dio Baso Administrazioari, hura egin baino 15 egun natural lehenago gutxienez. Eskaeran honako hauek adieraziko dira: ekintzaren arduradunaren identifikazioa eta, orobat, ekintzaren deskribapena eta kokapena. Ekintzak ofizioz sustatzen ahal dituzte Nafarroako Foru Komunitateko Administrazioaren unitateek. Epea igarota, administrazioaren isiltasunez ezetsitzat joko da eskaera.

6. Honako hau izanen da baimenen prozedura makaldietako hondarrak erretzeko, mugakideak direnean ibarbaso naturalekin edo ibai ibilguekin, eta 3. apartatuko a) eta b) letretako erreketarako, egiten badira 5 hektarea edo gehiagoko baso, zuhaizti edo sasitza batetik 100 metro baino gutxiagora:

a) Nekazaritzako ustiategi txikiek edo mikroustiategiek sustatutako ekintzen kasuan: erreketaren sustatzaileak erantzukizunpeko adierazpen bat bete eta sinatu beharko du, eta kasuan kasuko eskualdeko basozainei helarazi, hura egin baino 15 egun natural lehenago gutxienez.

b) Ekintzen sustatzailea ez bada nekazaritzako ustiategi txiki edo mikroustiategi bat: erreketaren sustatzaileak erreketarako baimena eskatu beharko dio Baso Administrazioari, hura egin baino 15 egun natural lehenago gutxienez. Epea igarota, administrazioaren isiltasunez ezetsitzat joko da eskaera.

7. Basoko hondarrak erretzeko, eskaera bat aurkeztu beharko da urriaren 1etik otsailaren 1era bitartean, foru agindu honen 3. eranskineko ereduaren arabera. Eskaeran honako hauek adieraziko dira:

a) Ekintzaren arduradunaren identifikazioa eta, orobat, ekintzaren deskribapena eta kokapena.

b) Katastroko planoaren fotokopia, erre nahi den finka modu zehatzean identifikatuta.

c) Pertsona fisikoek herri-lurretan sustatzen badituzte, toki erakundearen oniritzia izan beharko dute.

7.1. Eskaera aurkeztu ondoren, basozainek arrisku maila (1,2,3) esleituko diote eskatutako erreketen eremu bakoitzari, Ingurumeneko zuzendari nagusiaren otsailaren 23ko 7/2021 Ebazpenean xedatutakoaren arabera.

Arrisku maila esleitu ondotik, hau izanen da prozedura:

7.1.1. Arrisku maila (1) edo (2) bada:

a) Nekazaritzako ustiategi txikiek edo mikroustiategiek sustatutako ekintzak: aldez aurretik, erreketaren sustatzaileak erantzukizunpeko adierazpen bat bete eta sinatu beharko du, eta kasuan kasuko eskualdeko basozainei helarazi.

b) Nekazaritzako ustiategi txiki edo mikroustiategi ez diren sustatzaileek sustatutako ekintzak: Baso Administrazioak baimendu beharko du erreketa. Bertan zehaztuko da zer jarraibide eta baldintza jotzen diren beharrezkotzat erreketak ez ekartzeko nahi ez den ondorio kaltegarririk.

7.1.2. Arrisku maila (3) bada: Baso Administrazioak baimendu beharko du erreketa, aurreko azpiapartatuko b) letran ezarritakoaren arabera.

7.2. Basoko hondarrak ezabatzeko erreketak egiten ahalko dira baimena ematen denetik apirilaren 30era bitarte. Ezin izan bada erreketa egin, berriz eskatu beharko du hurrengo kanpainetan. Halakoetan, aski izanen da Baso Administrazioari jakinaraztea, baimendutako erreketaren espediente zenbakia adieraziz.

7.3. Baimenak emanen dira hirugarrenen eskubideak edo beste baimen batzuk deusetan ukatu gabe.

8. Larreak hobetzeko erreketak baimentzeko prozedura izanen da 7. apartatuan basoko hondarrak erretzeari buruz azaltzen denaren berdina, eskaera aldiari, gauzatzeko epeari eta beste baimen batzuei dagokienez. Orobat, prozedura honi jarraitu beharko zaio arrisku mailaren arabera:

a) Arrisku maila (1) edo (2) bada: aldez aurretik, erreketaren sustatzaileak erantzukizunpeko adierazpen bat bete eta sinatu beharko du, eta kasuan kasuko eskualdeko basozainei helarazi.

b) Arrisku maila (3) bada: Baso Administrazioak baimendu beharko du erreketa, aurreko 7.1.1 apartatuko b) letran ezarritakoaren arabera.

Zazpi.–7 bis artikulua gehitzen da:

"7 bis artikulua. Salbuespenezko erreketen baimenak etetea.

1. Nekazaritza eta baso lurretako salbuespenezko erreketen baimenak eten eginen dira aldi batez, baso suteen arrisku indizea oso handia edo muturrekoa denean Meteorologiako Estatu Agentziaren informazio meteorologikoaren arabera.

2. Era berean, salbuespenezko erreketen baimenak eteten ahalko dira, ingurumenaren arloan eskumena duen zuzendari nagusiaren ebazpen bidez, babestutako espezieak egoteagatik, baso suteen arriskuagatik edo ingurumeneko beste balio batzuengatik".

Zortzi.–8. artikulua aldatzen da, eta honela idatzita geldituko da:

"8. artikulua. Barbakoak eta beroa edo sua sortzen duten beste tresna batzuk.

1. Baso suteen arrisku indizea oso handia edo muturrekoa denean Meteorologiako Estatu Agentziaren informazio meteorologikoaren arabera, debeku izanen da sua piztea toki irekietan, mota guztietakoetan, eta debeku horrek lurzoru urbanizaezin guztiari eraginen dio. Debeku horretan sartzen dira komunikazio bideetako atsedenguneak, bai eta josteta eremuak eta kanpalekuak ere, horretarako egokitutako eremuak barne. Halaber, debeku horretan sartzen da beste edozein toki irekitan sua egitea, aisialdiko baratzeetan, kasu.

Oro har xedatutakoaz gain, arrisku maila oso handiko edo muturreko egoera horretatik kanpo, eta aipatu kokalekuetan, hurrengo apartatuetan jasotakoa beteko da.

2. Udako aldian:

a) Nafarroako hegoaldean, kanpin kategoriako hotel-establezimenduetatik kanpo, debeku da toki irekietan sua aisialdirako erabiltzea, baita horretarako egokitutako lekuetan ere, hots, barbakoetan edo kanpoko beste edozein instalaziotan eta komunikazio bideen ondoko atsedenguneetan. Debeku horretan sartzen dira beroa edo sua sortzen duten tresna guztiak, hala nola kanpin-gasak, etab. Kanpin kategoriako hotel-establezimenduetan, sua aisialdirako erabiltzen ahalko da, baldin eta horretarako egokitutako eremu bat badute, eta han sua itzaltzeko ekipoak badaude (ura, urezko oinarridun aparrezko su-itzalgailuak, etab.).

b) Nafarroa iparraldeko eremuan, toki irekietan sua aisialdirako erabiltzen ahal da, baina soilik horretarako egokitutako lekuetan, hots, barbakoetan edo kanpoko beste edozein instalaziotan eta komunikazio bideen ondoko atsedenguneetan.

3. Udako alditik kanpo, baimenduta dago sua aisialdirako erabiltzea horretarako egokitutako tokietan, mantentze egoera onean baldin badaude, baina beharrezko neurri guztiak hartu beharko dira sute arriskurik ez izateko.

Bederatzi.–9. artikulua aldatzen da, eta honela idatzita geldituko da:

"9. artikulua. Material piroteknikoa, suzko tresnak edo globoak.

1. Debeku da material piroteknikoa, globoak edo faroltxo hegalariak eta, halaber, sua duten edo su har dezaketen beste elementu hegalari batzuk erabiltzea, profesionalek maneiatu ezean.

2. Baso suteen arrisku indizea oso handia edo muturrekoa denean Meteorologiako Estatu Agentziaren informazio meteorologikoaren arabera, debeku da honako hauetan material piroteknikoa sartzea edo erabiltzea:

a) Lurzoru urbanizaezin guztian.

b) Hiri lurzoruan edo lurzoru urbanizagarrian, jaurtiketa puntua 400 metro baino gutxiagora dagoenean zuhaitz, zuhaixka, sasi edo belarkiz estalitako lurretatik (larreak edo belardiak eta laborantzaren berezko landaredia dutenak barne, besteak beste).

Ondorio horietarako, material piroteknikoaz gain, debeku horretan sartuko dira globo edo faroltxo hegalariak eta sua duten edo sute bat eragin dezaketen beste elementu hegalari batzuk.

Arrisku maila oso handiko edo muturreko egoera horretatik kanpo, eta aipatu kokalekuetan, hurrengo apartatuetan xedatutakoa beteko da.

3. Ikuskizun piroteknikoak edo artikulu honetan azaltzen diren beste elementu batzuekin ikuskizunak sustatzen dituzten entitate eta pertsonek, lurzoruaren sailkapena edozein izanik ere, jaurtiketa puntua 400 metro baino gutxiagora baldin badago zuhaitz, zuhaixka, sasi edo belarkiz estalitako lurretatik (larreak edo belardiak eta laborantzaren berezko landaredia dutenak barne, besteak beste), SOS Nafarroa-112ri jakinarazi behar diote, gutxienez astebete lehenago, zer egunetan eta non eginen den jarduera hori. Nahitaezko neurri hauek ezartzen dira, ikuskizuna egiten den bitartean bete beharrekoak:

a) Edozein su edo su-aztarna ikusiz gero, SOS Nafarroa 112ri eman beharko zaio abisua ahalik lasterrena.

b) Jarduera egiten den lekuan, entitate antolatzaileak gutxienez hiru pertsona izanen ditu su jotzekoekin, edo sua itzaltzeko beste tresna batzuekin, eta sua itzaltzeko bizkar-zorroekin.

4. Era horretako ikuskizunak bertan behera uzten ahalko dira, ingurumenaren arloan eskumena duen zuzendari nagusiaren ebazpen bidez, kontrako baldintza meteorologikoak aintzat hartuta.

Hamar.–10. artikulua aldatzen da, eta honela idatzita geldituko da:

"10. artikulua. Ibilgailu motordunak mendiko pistetan eta bestelako landabideetan eta makinak eta ekipoak lurzoru urbanizaezinean.

1. Oro har, debeku da ibilgailu motordunak mendiko pistetan eta bestelako landabideetan ibiltzea baso suteen arrisku indizea muturrekoa denean Meteorologiako Estatu Agentziaren informazio meteorologikoaren arabera, salbuespen hauekin:

a) Administrazio publikoetako edozeinen ibilgailu ofizialak.

b) Administrazio publikoei egiten zaizkien kontratu-prestazioetarako ibilgailuak, baso pistetatik eta bestelako landabideetatik zirkulatu beharra dutenak.

c) Ur eta hondakinen mankomunitateen ibilgailuak.

d) Obra zibileko eta azpiegituretako eraikuntza- edo mantentze-lanetan erabiltzen diren ibilgailuak, lan horiek legez baimenduta badaude.

e) Nor bere jabetzara sartu ahal izateko dabiltzan ibilgailuak.

f) Ehizaren eta arrantzaren arauzko jardunean erabiltzen diren ibilgailuak.

g) Onddo barrutietako kide edo bazkideek erabiltzen dituzten ibilgailuak, ziza eta onddo denboraldian. Horretarako, barrutiaren titularrak emandako egiaztagiria izan beharko dute.

h) Turismoaren arloan, merkataritza jardueren arauzko jardunean erabiltzen diren ibilgailuak.

i) Baimenduta dauden ikuskizun publiko eta josteta jardueretan laguntzen duten ibilgailuak. Horren barnean sartzen dira Nafarroako Kirolaren eta Gazteriaren Institutuak antolatutako eta baimendutako kanpaldietan laguntzen dutenak.

j) Bainatzeko egokitutako eremuetara doazen erabiltzaileen ibilgailuak, horretarako propio egokitutako aparkalekuetaraino, betiere dagokion sasoian eta Nafarroako Foru Komunitateko bainurako eremuen zentsu ofizialaren arabera.

k) Aparkatzeko egokitutako eremuen erabiltzaileen ibilgailuak.

l) Nekazaritzako, abeltzaintzako, basogintzako, meatzaritzako edo harrobietako lanetan eta obra zibileko eta azpiegituretako lanetan erabiltzen diren ibilgailuak.

2. Aurreko apartatuan jasotako kasu guztietan, aldean eraman beharko dute telefono mugikorra eta sua itzaltzeko urezko ekipo eramangarri bat (urezko su-itzalgailu bat, gutxienez 9 litroko edukierakoa, edo sulfatagailu edo motxila itzaltzaile bat, gutxienez 15 litroko edukierakoa). Edozein su edo su-aztarna ikusiz gero, ibilgailuen erabiltzaileek 112-SOS Nafarroari abisu eman beharko diote berehala.

Gainera, aipatutako ibilgailuak landarerik gabeko lekuetan bakarrik aparkatzen ahalko dira, zirkulazioa oztopatu gabe.

3. Baso suteen arrisku indizea oso handia edo muturrekoa denean Meteorologiako Estatu Agentziaren informazio meteorologikoaren arabera, debeku da makinak eta ekipoak erabiltzea mendietan eta mendien inguruko 400 metroko zerrenda batean kokatutako landa eremuetan, makina edo ekipo horien funtzionamenduak deflagrazioa, txinpartak edo deskarga elektrikoak sor baditzake.

Nafarroako Gobernuaren erabaki bidez, era horretako makineria baliatzen duten jarduera eta erabilerak baimentzen ahalko dira. Gobernuaren erabaki horretan ezarriko dira, halaber, behar diren prebentzio neurriak, kasuan kasuko jardueraren eta makina eta ekipoen arabera, muturreko tenperatura maximoen abisu mailen arabera, eta lurren ezaugarrien eta landaredia moten arabera".

Hamaika.–11. artikulua aldatzen da, eta honela idatzita geldituko da:

11. artikulua. Erromeriak eta herriko bestak. Erromerietan eta herriko bestetan otorduak prestatzeko.

1. Baso suteen arrisku indizea oso handia edo muturrekoa denean Meteorologiako Estatu Agentziaren informazio meteorologikoaren arabera, debeku izanen da erromerien eta herriko besten karietara sua piztea toki irekietan, mota guztietakoetan, eta debeku horrek lurzoru urbanizaezin guztiari eraginen dio.

2. Aurrekoa gorabehera, udako aldian salbuespenez erabiltzen ahalko da sua. Horretarako aurretiazko komunikazio bat aurkeztu beharko zaio Baso Administrazioari, ekitaldia baino hilabete lehenago gutxienez, adieraziz zer ekintza eginen diren eta zer neurri aurreikusi diren baso suteak prebenitzeko.

3. Udako alditik kanpo, eta 1. apartatuan azaldutako salbuespenarekin, baimenduta dago jarduera horietarako sua erabiltzea, baina beharrezko neurri guztiak hartu beharko dira sute arriskurik ez izateko.

Hamabi.–12. artikulua aldatzen da, eta honela idatzita geldituko da:

"12. artikulua. Hiri lurretako eta lur urbanizagarrietako erabileren erregulazioa, hiri eta baso inguruen artean eta hiri eta landa inguruen artean.

Hiri lurretan eta lur urbanizagarrietan, landaredun lur urbanizaezinen mugakide direnean, zilegi izanen da sua erabiltzea eta funtzionatzean deflagrazioa, txinpartak edo deskarga elektrikoak sor ditzaketen makina eta ekipoak baliatzea, baldin eta jardueraren ondorioz has litekeen edozein su txiki itzaltzeko behar diren neurriak eta baliabideak antolatzen badira, komunikazio sistema aski eta egokiak barne".

Hamahiru.–14. artikuluan aldaketa hauek egiten dira:

1. Artikuluaren izenburua aldatzen da, eta honela idatzita geldituko da:

"14. artikulua. Nahitaez bete beharreko baldintzak eta beste gomendio batzuk".

2. Lehenengo paragrafoa aldatzen da, eta honela idatzita geldituko da:

"Ezar daitekeen bestelako baldintza berariazkorik ukatu gabe, honako hauek dira nahitaez bete beharreko baldintzak sua erabiltzeko eta makina eta ekipoak baliatzeko:

3. Letra berri bat gehitzen da lehenengo apartatuan:

f) Erreketa egiten hasi baino lehen, baso suteen arrisku indizea (Meteorologiako Estatu Agentziak ematen duena) zein den begiratu beharko da. Indize hori AEMETen web-orri ofizialean zein Nafarroako Gobernuaren atarian (www.nafarroa.eus) kontsultatzen ahalko da.

4. 2. eta 3. apartatuetako a) letrak kentzen dira. Hala, apartatu horietako b) eta c) letrak berrantolatu eta a) eta b) letrak izanen dira aurrerantzean.

5. Beste apartatu bat gehitzen da, 5. apartatua:

"5. Funtzionatzean deflagrazioa, txinpartak edo deskarga elektrikoak sor ditzaketen makina eta ekipoak.

a) Langileak telefono mugikorra izatea. Ustekabekoren bat gertatuz gero, berehala abisatuko zaio 112-SOS Nafarroari, makina eta ekipoen kokapena zehaztuta.

b) Makinan edo lan esparruan sua itzaltzeko urezko ekipo eramangarri bat izatea; motxila itzaltzaile bat, gutxienez 15 litroko edukierakoa, edo urezko su-itzalgailu bat, gutxienez 9 litroko edukierakoa.

6. Beste apartatu bat gehitzen da, 6. apartatua:

"6. Debeku da bulldozerrak, atzerako hondeamakinak, motonibelagailuak, skidderrak, basoko prozesagailuak eta autokargatzaileak, sasiak garbitzeko makinak, zereala biltzeko makinak, fardo makinak eta xehagailuak erabiltzea eguzkia sartu eta bi ordutik egunsentira bitarte".

7. Beste apartatu bat gehitzen da, 7. apartatua, gomendioekin:

"7. Toki erakundeentzako gomendioak, haien lurralde eremuari dagokionez:

a) Hiri eta nekazaritza inguruen arteko eremuetan, oso erraz su hartzen duten laboreak daudenean (garia, garagarra, oloa, etab.), babes zerrenda perimetralak ezartzea gomendatzen da, 8 metroko zabalerakoak, pertsonek erabiltzeko diren eraikin edo instalazioen kanpoko mugatik neurtuta, eta laborerik eta landare lehorrik gabe mantendu beharrekoak. Babes zerrenda horien gomendioa ez zaie aplikatuko ez ureztaketako laboreei, ez NPEan adierazitako espezie hobetzaileei, alegia, lekadunei (ilarrak, babak, txitxirioak), olio-landareei (ekilorea, koltza edo soja) eta kruziferoei (errefaua, errukula eta arbia), ezta mahastiaren, almendrondoaren edo olibondoaren gisako lehorreko laboreei ere.

b) Behin lastoa jasota eta bilduta hiriguneekin eta 10 hektareatik gorako zuhaitz-masa jarraituekin mugakide diren nekazaritza lurzatietan, gutxienez 8 metroko zabalera izanen duten suebaki zerrendak egitea gomendatzen da, lurra landuz, lurzatiaren mugaketaren kanpoko lerroraino".

Hamalau.–17. artikuluaren bigarren apartatua aldatzen da, eta honela idatzita geldituko da:

"2. Baso Administrazioak, deusetan ukatu gabe 7 bis artikuluan xedatutakoa, baldintza meteorologikoen eta baso suteak izateko arriskuaren bilakaera aintzat hartuta, edozein unetan indarrik gabe uzten ahalko ditu, administrazio egintza bidez, foru agindu honetan jasotzen diren baimenak edo salbuespenez ematen diren gainerako guztiak".

Hamabost.–Bi xedapen gehigarri eransten dira eta, horrenbestez:

1. Xedapen gehigarri bakarraren izenburua honela idatzita geldituko da:

"Lehenengo xedapen gehigarria.–Babes zibilaren eta larrialdien arretaren arloko jarduerak".

2. Bigarren xedapen gehigarria eransten da, eduki honekin:

"Bigarren xedapen gehigarria.–Zehaztasunik eza, faltsutasuna edo omisioa erantzukizunpeko adierazpeneko edo aurretiazko komunikazioko datuetan edo informazioan.

Erantzukizunpeko adierazpenari edo aurretiazko komunikazioari eransten zaion edozein datu edo informaziotan funtsezko zehaztasunik eza, faltsutasuna edo omisioa gertatuz gero, edo Baso Administrazioari ez bazaizkio aurkezten erantzukizunpeko adierazpena, adierazitakoa betetzen dela egiaztatzeko eskatzen den dokumentazioa, edo komunikazioa, horrek ekarriko du erreketa egiteko ezintasuna, egitate horien berri izaten den unetik beretik, eta, nolanahi ere, sor litezkeen erantzukizun penal, zibil edo administratiboak ukatu gabe".

3. Hirugarren xedapen gehigarria eransten da, eduki honekin:

"Hirugarren xedapen gehigarria.–Administrazio antolamenduari buruzko aipamenak.

Foru agindu honetan zerbitzuei eta zuzendaritza nagusiei buruz eta, orobat, haien zuzendariei buruz egiten diren aipamen guztietan, ulertuko da kasuan kasuko eskumena duten unitate organikoei eta haien titularrei buruz ari direla, egiturari buruzko foru dekretuetan ezarritakoaren arabera.

Era berean, gaztelaniaz, "Guarderío Forestal" izena aipatzen denean, haren ordez, "personal del Basozainak/Guarderío de Medio Ambiente" ulertuko da.

Hamasei.–Azken xedapenetako lehena aldatzen da, eta honela geldituko da idatzita:

"1. Ingurumenaren arloan eskumenak dituen zuzendari nagusiak emanen ditu foru agindu hau aplikatzeko behar diren administrazio egintzak.

2. 1. eranskinean adierazitako datak aldatzen ahalko dira, ingurumenaren arloan eskumenak dituen zuzendaritza nagusiaren ebazpen bidez, behar bezala justifikatutako salbuespenezko inguruabarrak gertatzen direnean".

Azken xedapen bakarra.–Indarra hartzea.

Foru agindu honek Nafarroako Aldizkari Ofizialean argitaratzen den egun berean hartuko du indarra.

Iruñean, 2023ko maiatzaren 17an.–Landa Garapeneko eta Ingurumeneko kontseilaria, Itziar Gómez López.

Iragarkiaren kodea: F2307682