Iragarkia

10. ALDIZKARIA - 2023ko urtarrilaren 16a

1. NAFARROAKO FORU KOMUNITATEA

1.7. BESTELAKOAK

269/2022 EBAZPENA, abenduaren 13koa, Hezkuntza Departamentuko Irakasleak Hautatzeko eta Lanpostuak Betetzeko Zerbitzuko zuzendariak emana, Nafarroako Gobernuko Hezkuntza Departamentuaren menpeko Lanbide Heziketako ikastetxe bateratu publikoetako zuzendarien lanpostua izendapen askearen bidez betetzeko deialdia onesten duena.

Hezkuntzako kontseilariak martxoaren 29an emandako 42/2017 Foru Aginduaren bidez, arauak eman ziren Nafarroako Gobernuko Hezkuntza Departamentuaren menpeko Lanbide Heziketako ikastetxe bateratu publikoetako zuzendariak izendapen askearen bidez hautatzeko, ebaluatzeko eta haien izendapena berritzeko.

Foru agindu horren 2.2 artikuluak ezartzen du Hezkuntza Departamentuak aldian behin deialdia eginen duela ikastetxe bateratuetan hutsik gelditzen diren zuzendari lanpostuak izendapen askearen bidez betetzeko.

Horrenbestez, Lanbide Heziketako zenbait ikastetxe bateratu publikotan zuzendari lanpostua hutsik geldituko denez 2023ko ekainaren 30ean, beharrezkoa da lanpostu horiek izendapen askearen bidez betetzeko prozeduraren deialdia egitea.

Horiek horrela, Hezkuntza Departamentuko Hezkuntza Baliabideen zuzendari nagusiaren azaroaren 28ko 208/2019 Ebazpenaren bidez eskuordetutako eskudantziak erabiliz,

EBAZTEN DUT:

1. Nafarroako Gobernuko Hezkuntza Departamentuaren menpeko Lanbide Heziketako ikastetxe bateratu publikoetako zuzendarien lanpostua izendapen askearen bidez betetzeko deialdiaren oinarriak onestea. I. eranskinean jasotzen dira.

2. Ebazpen hau eta eranskinak Nafarroako Aldizkari Ofizialean argitara daitezela agintzea.

3. Ebazpen hau eta eranskinak igortzea Idazkaritza Tekniko Nagusira, Lanbide Heziketaren Zuzendaritza Nagusira, Hezkuntzako Ikuskapen Zerbitzura, Lanbide Heziketaren Plangintza eta Integraziorako Zerbitzura eta Irakasleak Hautatzeko eta Lanpostuak Betetzeko Zerbitzuko Lanpostuak Betetzeko Atalera, behar diren ondorioak izan ditzaten.

NAFARROAKO GOBERNUKO HEZKUNTZA DEPARTAMENTUAREN MENPEKO LANBIDE HEZIKETAKO IKASTETXE BATERATU PUBLIKOETAKO ZUZENDARIEN LANPOSTUA IZENDAPEN ASKEAREN BIDEZ BETETZEKO DEIALDIAREN OINARRIAK

Lehena.–Parte hartzeko betebeharrak.

1.1. Jarraian adierazten diren betebehar hauek bete beharko dira deialdian parte hartu ahal izateko:

a) Egitura organikoaren eta eginkizunen ondorioetarako Nafarroako Gobernuko Hezkuntza Departamentuaren menpe dagoen karrerako funtzionarioa izatea, gutxienez hiru urteko antzinatasuna izatea karrerako funtzionario gisa irakaskuntzaren funtzio publikoan, eta Hezkuntza Departamentuan zerbitzuak ematea.

b) Karrerako funtzionario gisa zuzeneko irakaslana egin izana, hiru urtez gutxienez, Lanbide Heziketako irakaskuntzan, Nafarroako Lanbide Heziketako ikastetxe publiko batean.

Ondorio horietarako, Hezkuntza Orientazioko espezialitatea duten irakasleei kontuan hartuko zaiena da gutxienez hiru urtez karrerako funtzionario gisa beren espezialitatearen berezko lanetan aritu izana, hezkuntza sistemako Lanbide Heziketako irakaskuntzak eskaintzen dituen Nafarroako ikastetxe publiko batean.

c) Zuzendaritza proiektu bat aurkeztea, II. eranskineko ereduaren arabera.

d) Zuzendaritza taldeko gainerako kideen izendapen proposamena aurkeztea, interesdunek onartua eta sinatua. Proposamen eta onarpen horiek zuzendaritza proiektua osatuko dute, haren parte direla. III. eranskinean ezarri da zuzendaritza taldeko gainerako kideak izendatzeko eta proposamen hori onartzeko eredua.

e) D ereduko ikasketak bakarrik ematen dituen ikastetxe bateratu bateko zuzendaria izateko hautagaitzen kasuan, EGA titulua edo baliokidea izatea.

1.2. Eskabideak aurkezteko epea bukatzen den egunean bete beharko dira oinarri honetan aipatzen diren baldintza guztiak.

Bigarrena.–Parte hartzeko eskabide telematikoa eta aurkeztu beharreko agiriak.

2.1. Prozeduran parte hartu nahi dutenek telematikoki egin beharko dute eskaera, Nafarroako Gobernuaren atarian (www.nafarroa.eus) prestatuko den web fitxan.

Fitxa horretan, parte hartzeko eskabide zehatza emanen zaie izangaiei, eta baita zuzendaritza taldeko gainerako kideen proposamena (interesdunek onartua) aurkezteko eredua ere, III. eta IV. eranskinetan ezarritako ereduen arabera.

2.2. Hautagaiek honako agiri hauek erantsi beharko dizkiote parte hartzeko eskabideari:

a) Eskatutako baldintzak betetzen direla frogatzen duen dokumentazioa.

Kasuan kasuko zerbitzu-orriaren bidez egiaztatuko dira 1.1. oinarriaren a) eta b) apartatuetan ezarritako baldintzak. Irakasleak Hautatzeko eta Lanpostuak Betetzeko Zerbitzuak ofizioz aurkeztuko du zerbitzu-orria.

b) Zuzendaritza proiektu bat, II. eranskinean adierazitako edukiak biltzen dituena.

c) Curriculum vitaea, V. eranskineko ereduaren arabera. Bertan alegatutako merezimenduen frogagiriak ere aurkeztu behar dira, eta behar den epean eta moduan justifikatu direnak hartuko dira kontuan soilik.

d) Zuzendaritza taldeko gainerako kideen izendapen proposamena, interesdunek onartua eta sinatua.

e) D ereduko ikasketak bakarrik ematen dituen ikastetxe bateratu bateko zuzendaria izateko hautagaitzen kasuan, zuzendaritza taldea osatzen duten kide guztiek EGA titulua edo baliokidea izan behar dute, eta horren frogagiria aurkeztu beharko da, haien zerbitzu-orrian agertzen ez bada.

2.3. Halaber, izangaiek agiri hauek aurkezten ahalko dituzte:

–Zuzendaritza eginkizunaren garapenari buruzko prestakuntza ikastaro bat gainditu dutela ziurtatzen duen frogagiria. Ikastaroak Hezkuntzako eta Lanbide Heziketako Ministerioak edo hezkuntza administrazioek antolatua izan beharko du, eta urriaren 17ko 894/2014 Errege Dekretuaren arabera egina (894/2014 Errege Dekretua, urriaren 17koa, zeinak garatzen baititu Hezkuntzari buruzko maiatzaren 3ko 2/2006 Lege Organikoaren 134.1.c) artikuluan ezarritako zuzendaritza eginkizunaren garapenari buruzko prestakuntza ikastaroaren ezaugarriak, bai eta zuzendaritza gaitasunak eguneratzeko ikastaroenak ere).

–Zuzendaritza gaitasunak eskuratzeko edo eguneratzeko prestakuntza ikastaro bat egin dutela ziurtatzen duen agiria.

2.4. Parte-hartzaileek aurkeztu nahi duten dokumentazioaren kopia eskaneatua aurkeztuko dute. Administrazioak noiznahi eskatzen ahalko dizkie hautagaiei parte hartzeko eskabidearekin batera aurkeztutako dokumentazioaren jatorrizkoak edo fotokopia konpultsatuak.

2.5. Gaztelaniara itzuli beharko dira atzerriko hizkuntza batean idatzitako agiriak eta beste autonomia erkidego bateko hizkuntza ofizial propioan idatzitakoak, euskarazkoak izan ezik. Zinpeko itzultzaileek egin beharko dituzte itzulpen horiek, eta agiriarekin batera aurkeztu beharko dira. Nolanahi ere, ez da beharrezkoa izanen hizkuntza gaitasunen ziurtagiriak gaztelaniara itzultzea.

Hirugarrena.–Eskabideak aurkezteko epea.

Eskabideak aurkezteko hamabost egun balioduneko epea izanen da, deialdi hau Nafarroako Aldizkari Ofizialean argitaratu eta biharamunetik hasita.

Laugarrena.–Hautagaitzak onartzea.

4.1. Irakasleak Hautatzeko eta Lanpostuak Betetzeko Zerbitzuaren ebazpenaren bidez onetsiko da onartu eta baztertutako hautagaitzen behin-behineko zerrenda, eta baztertzeko arrazoiak adieraziko dira. Aipatu ebazpena Nafarroako Gobernuaren webgunean argitaratuko da.

Behin-behineko zerrenda onesten duen ebazpena argitaratzearekin ulertuko da interesdunei egin beharreko jakinarazpena egin dela, Administrazio Publikoen Administrazio Prozedura Erkideari buruzko urriaren 1eko 39/2015 Legearen 40. artikuluan eta hurrengoetan xedatutakoarekin bat.

4.2. Behin-behineko zerrenda horren aurka, interesdunek erreklamazioak aurkezten ahalko dituzte eta, kasua bada, haiek baztertzera eraman duten akatsak zuzentzen ahalko dituzte, 10 egun balioduneko epean, zerrenda argitaratu eta biharamunetik hasita, Nafarroako Gobernuaren webgunearen bitartez.

4.3. Erreklamazioak ebatzi ondoren, Irakasleak Hautatzeko eta Lanpostuak Betetzeko Zerbitzuko zuzendariaren ebazpen bidez, onartu eta baztertutako hautagaitzen behin betiko zerrenda onetsiko da. Ebazpena Nafarroako Gobernuaren webgunean argitaratuko da.

Ebazpen hori argitaratzearekin ulertuko da interesdunei egin beharreko jakinarazpena egin dela, Administrazio Publikoen Administrazio Prozedura Erkideari buruzko urriaren 1eko 39/2015 Legearen 40. artikuluan eta hurrengoetan xedatutakoarekin bat.

Bosgarrena.–Balorazio batzordeak.

5.1. Balorazio batzorde bat eratuko da ikastetxe bateratu bakoitzerako, kide hauek izanen dituena:

–Lanbide Heziketaren Plangintza eta Integraziorako Zerbitzuko zuzendaria, edo hark hautatzen duen pertsona. Batzordeburu gisa arituko da.

–Lanbide Heziketaren Zuzendaritza Nagusiari atxikitako funtzionario bat, Lanbide Heziketaren Plangintza eta Integraziorako Zerbitzuak proposatua eta Lanbide Heziketaren Zuzendaritza Nagusiak hautatua, zuzendaritzarako hautagaiak aukeratu duen ikastetxean edo haren jatorrizko ikastetxean behin betiko destinoa ez duena. Funtzionario hori idazkari gisa arituko da.

–Hezkuntzako Ikuskapen Zerbitzuko zuzendaria, edo hark hautatzen duen pertsona.

–Irakasleak Hautatzeko eta Lanpostuak Betetzeko Zerbitzuko zuzendaria, edo hark hautatzen duen pertsona.

5.2. Hautapen batzordeak martxoaren 29ko 42/2017 Foru Aginduan ezarrita dagoenari jarraikiz arituko dira.

5.3. Balorazio batzordeak osatuko dituzten kideen izendapena Irakasleak Hautatzeko eta Lanpostuak Betetzeko Zerbitzuko zuzendariaren ebazpen bidez eginen da, Lanbide Heziketaren Zuzendaritza Nagusiak, Hezkuntzako Ikuskapen Zerbitzuak, Lanbide Heziketaren Plangintza eta Integraziorako Zerbitzuak eta Irakasleak Hautatzeko eta Lanpostuak Betetzeko Zerbitzuak berak ere jakinarazi ondoren zer pertsona hautatu duten batzordeko kide titularrak eta haien ordezkoak izateko. Aipatu ebazpena Nafarroako Gobernuaren webgunean argitaratuko da.

Seigarrena.–Prozedura.

6.1. Ikastetxe bateratuetako kide anitzeko partaidetza-organoei egin beharreko kontsulta.

Irakasleak Hautatzeko eta Lanpostuak Betetzeko Zerbitzuak jasotako eskaera bakoitzaren kopia bidaliko dio Lanbide Heziketako kasuan kasuko ikastetxe bateratuari, eskaerei erantsitako dokumentazioarekin batera. Dokumentazioa jaso ondoren, ikastetxeko zuzendariak bilera berezi bana egiteko deia bidaliko die ikastetxeko gizarte kontseiluari eta irakasleen klaustroari. Aurkeztutako hautagaitzei buruzko kontsulta izanen da bilera horien gai bakarra. Orobat, behar diren neurriak hartuko ditu hautagaitza bakoitzaren dokumentazioa kide anitzeko bi organo horietako kideen eskura egon dadin.

Gizarte kontseiluaren eta irakasleen klaustroaren bilera berezi horietan iritziak plazaratuko dira aurkeztutako hautagaitzei buruz. Kide anitzeko organo bakoitzeko idazkariak bileraren akta eginen du, eta Lanbide Heziketaren Zuzendaritza Nagusira bidaliko du gehienez hamabost egun naturaleko epean, dokumentazioa ikastetxean jaso zenetik hasita. Akta horiek ikastetxe bakoitzeko partaidetza-organoek egindako txostentzat hartuko dira, aginduzkoak baina ez lotesleak.

6.2. Balorazio batzordeari egin beharreko kontsulta.

Halaber, Irakasleak Hautatzeko eta Lanpostuak Betetzeko Zerbitzuak jasotako eskaera bakoitzaren kopia bidaliko dio zuzendari postuak betetzeko deialdiaren kasuan kasuko ikastetxe bateratu bakoitzerako eratuko den balorazio batzordeko buruari, eskaerei erantsitako dokumentazioarekin batera.

Dokumentazioa jaso ondoren, balorazio batzordeko buruak bilerarako deia eginen dio batzordeari. Aurkeztutako hautagaitzei buruzko kontsulta izanen da bilera horren gai bakarra. Orobat, behar diren neurriak hartuko ditu hautagaitza bakoitzaren dokumentazioa balorazio batzordeko kideen eskura egon dadin.

Balorazio batzordearen bileran iritziak plazaratuko dira aurkeztutako hautagaitzei buruz. Idazkariak bileraren akta eginen du, eta Lanbide Heziketaren Zuzendaritza Nagusira bidaliko du gehienez hamabost egun naturaleko epean, dokumentazioa jaso zenetik hasita. Akta hori ikastetxe bakoitzeko balorazio batzordeak egindako txostentzat hartuko da, aginduzkoa baina ez loteslea.

Zazpigarrena.–Ikastetxe bateratuko zuzendaria eta zuzendaritza taldea hautatzea eta izendatzea.

7.1. Zuzendariaren hautaketa.

Irakasleen klaustroaren, gizarte kontseiluaren eta balorazio batzordearen aginduzko txostenak jaso ondoren, Lanbide Heziketaren zuzendari nagusiak izangaiek aurkeztutako dokumentazioa aztertuko du, eta, beharrezkotzat jotzen badu, izangaiei dei eginen die zuzendaritza proiektua defenda dezaten.

Denak batera eta beren osotasunean aztertu eta ebaluatu ondoren, Lanbide Heziketaren zuzendari nagusiak ebazpena emanen du deialdiko ikastetxe bateratu publikoetako zuzendari bakoitza hautatzeko, merezimendu, gaitasun eta publikotasunaren printzipioen arabera. Interesdunari jakinaraziko zaio hautaketaren ebazpena.

Hautagai egokirik ez dagoela uste delako zuzendari lanpostua bete gabe gelditzen bada, Lanbide Heziketaren zuzendari nagusiak lanpostua bete gabe uzten duen ebazpenean arrazoitu beharko du erabakia.

7.2. Zuzendariaren izendapena.

Lanbide Heziketaren Zuzendaritza Nagusiak Hezkuntza Departamentuko Irakasleak Hautatzeko eta Lanpostuak Betetzeko Zerbitzuari igorriko dio ikastetxe bateratuko zuzendariak hautatzen dituen ebazpena, zuzendari guztiak izenda ditzan.

Hautatutako pertsonak lau urterako izendatuko dira zuzendari, Irakasleak Hautatzeko eta Lanpostuak Betetzeko Zerbitzuaren ebazpen baten bidez. Ebazpen hori Nafarroako Aldizkari Ofizialean argitaratuko da.

Izendapenak eta lanpostuaz jabetzeak 2023ko uztailaren 1ean izanen dituzte ondorioak. Ordura arteko zuzendariak aurreko egunean utziko du kargua, ondorio guztietarako.

7.3. Zuzendaritza taldearen hautaketa eta izendapena.

Zuzendariak zuzendaritza taldeko gainerako kideak izendatzeko proposamena eginen du. Proposamenak bat etorri beharko du deialdi honetako 1.1.d) oinarrian baldintza gisa ezarritakoarekin, non eta ez den gertatzen arrazoitutako inguruabarrik; inguruabar horiek Hezkuntzako Ikuskapen Zerbitzuak onartu beharko ditu.

Zuzendaritzako taldekide izateko proposatzen bada behin betiko destinoa ikastetxe horretan ez duen irakasleren bat, Hezkuntzako Ikuskapen Zerbitzuak onartu beharko du hori, betiere kargualdian betetzen ahal duen lanpostu hutsik badago, ikasturte bakoitzeko hezkuntza plangintzaren arabera. Hezkuntzako Ikuskapen Zerbitzuak berretsi beharko du lanpostu huts hori badagoela.

Hezkuntza Departamentuko Irakasleak Hautatzeko eta Lanpostuak Betetzeko Zerbitzuak zuzendaritza taldeak izendatuko ditu, ikastetxeko zuzendariari dagokion epe bererako.

Zortzigarrena.–Hautaketa eta izendapen bereziak.

8.1. Hautagai egokirik edo hautagaitzarik ez badago, Lanbide Heziketaren zuzendari nagusiak hautaketa egin ondoren, karrerako irakasle funtzionario bat izendatuko da zuzendari izateko, lau urterako gehienez. Izendapena Aldi Baterako Langileak Kudeatzeko Zerbitzuko zuzendaritzak emanen duen ebazpenaren bidez eginen da.

8.2. D ereduko ikasketak bakarrik ematen dituen ikastetxe baterako izendatutako zuzendariak EGA titulua edo baliokidea izan beharko du.

8.3. Zuzendaritza taldeetako kideen izendapen berezia ikastetxeko zuzendariari dagokion epe bererako eginen da, ebazpen honen 7.3 oinarriko jarraibideen arabera.

8.4. D ereduko ikasketak bakarrik ematen dituen ikastetxe baten kasuan, izendapen bereziz izendatutako zuzendaritza taldeko kideek EGA titulua edo baliokidea izan beharko dute.

8.5. Deialdi bat aurreikusten den ikasturteetan hutsik gelditzen bada zuzendari karguren bat, kargu hori hautaketa eta izendapen bereziaren bidez beteko da, gehienez ere ikasturte baterako, eta nahitaez sartu beharko da egiten den lehenbiziko deialdian.

Bederatzigarrena.–Zuzendari kargua uztea.

9.1. Ikastetxe bateratu bateko zuzendariak kargua utziko du kasu hauetako bat gertatzen denean:

a) Zer alditarako hautatu eta izendatu zuten, aldi hori bukatzean edo, kasua bada, haren luzapena bukatzean.

b) Uko egite arrazoitua, Lanbide Heziketaren Zuzendaritza Nagusiak onartua.

c) Lanbide Heziketaren Zuzendaritza Nagusiak kargutik kentzea, modu arrazoituan. Lanbide Heziketaren Zuzendaritza Nagusiak eginen du hautaketa errebokatzeko proposamena, eta Irakasleak Hautatzeko eta Lanpostuak Betetzeko Zerbitzura igorriko du, izendapena errebokatzeko ebazpena eman dezan.

9.2. Hautaketaren errebokatzea eta ondoko izendapenaren errebokatzea Lanbide Heziketaren Zuzendaritza Nagusiaren ekimenez eginen dira, besteak beste, inguruabar hauetako bat gertatzen denean:

a) Gerora sortutako ezintasun psikikoa edo fisikoa, karguari dagozkion zereginak betetzea galarazten diona.

b) Zuzendari karguaren berezko eginkizunen ez-betetze astuna. Kasu horretan, interesdunari entzun ondoren eta diziplina-espediente bat instruitu ondoren gauzatuko da kargu-uztea.

c) Konfiantza-elementuak galtzea kargudunarengan, Lanbide Heziketako ikastetxe bateratuko zuzendariari dagozkion zereginak gauzatzeko moduagatik.

Hamargarrena.–Zuzendaritza eginkizunaren aitortza.

Ikastetxe bateratu publikoetako zuzendariek karguak berezko dituen eginkizunak beteko dituzte, ezarritako ordainsariak jasoko dituzte eta balorazio berezia eginen zaie irakaskuntzako funtzio publikoan lanpostuak betetzeko ondorioetarako.

Hamaikagarrena.–Plangintza instituzionaleko agiriak.

Ikastetxeak hautagaien esku utziko ditu, eskatzen badituzte, zuzendaritza proiektua prestatzeko behar diren plangintza instituzionaleko agiriak.

Hamabigarrena.–Errekurtsoak.

Ebazpen hau aplikatzearen ondoriozko egintzen eta ebazpenean aurka, gora jotzeko errekurtsoa aurkezten ahalko da, Lehendakaritzako, Berdintasuneko, Funtzio Publikoko eta Barneko kontseilariari zuzenduta, errekurritutako egintza edo ebazpena Nafarroako Aldizkari Ofizialean argitaratzen denetik hilabeteko epean.

Hori guztia bat etorriz Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legean xedatutakoarekin eta Administrazio Publikoen Administrazio Prozedura Erkideari buruzko urriaren 1eko 39/2015 Legearen 121. eta 122. artikuluei jarraikiz.

Iruñean, 2022ko abenduaren 13an.–Irakasleak Hautatzeko eta Lanpostuak Betetzeko Zerbitzuko zuzendaria, Amalia Cuartero Arteta.

I. ERANSKINA

Zuzendari kargua hutsik duten ikastetxeak

II. ERANSKINA

Zuzendaritza proiektua

Zuzendaritza proiektuak, gutxienez, alderdi hauek jasoko ditu:

A) Lanbide Heziketako ikastetxe bateratuaren ezaugarri nagusien deskribapena eta analisia.

–Ikastetxearen definizioa.

–Ikastetxe bateratuaren prestakuntza eskaintza.

–Lanbide ingurunea.

–Produkzio ingurunea.

B) Zuzendaritza lanarekin lortu nahi diren lehentasunezko helburuak, eta aurkeztutako zuzendaritza proiektuak eta bere helburuek ikastetxe bateratuaren proiektu funtzionalarekin duten lotura.

C) Jarduketaren lerro estrategikoak eta plan zehatzak, besteak beste, hauekin lotura duten helburuak lortzeko:

–Kudeaketa prozedurak.

–Berrikuntza metodologikoko proiektuak (Kimua).

–Berrikuntza teknologikoko eta ikastetxea digitalizatzeko proiektuak.

–Nazioartekotze proiektuak.

–Prestakuntza egiaztagarriko eta konpetentziak egiaztatzeko proiektuak.

–Lanbide-orientazioa.

–Irakasleen prestakuntza.

D) Zuzendaritza kudeaketa eta zuzendaritza proiektua ebaluatzeko prozedurak, adierazleen edo parametroen bidez.

E) Izangaiak garrantzitsutzat jotzen duen beste edozein alderdi.

Proiektuak 20 orri izanen ditu gehienez, DIN-A4 formatukoak, bi aldeetan idatziak, 12 puntuko calibri letra motarekin eta tarte bikoitzarekin.

V. ERANSKINA

Izangaien curriculum vitaearen edukia

Izangaiaren identifikazio datuak.

1. Zuzendaritza eginkizunean duen esperientzia.

2. Ibilbide profesionala.

3. Titulazio akademikoak.

4. Prestakuntza eta hobekuntza ikastaroak, arlo hauekin lotuta:

–Informazioa, lanbiderako orientazioa eta enplegua.

–Kalitatea eta etengabeko hobekuntza.

–Berrikuntza eta ezagutzaren transferentzia.

–Konpetentzien ebaluazioa eta egiaztapena.

–Zuzendaritza eginkizunaren garapena.

5. Bestelako merezimenduak.

AURKEZTU BEHARREKO DOKUMENTAZIOA

III. eranskina.–Zuzendaritza taldeko kideak izendatzeko proposamena, eta zuzendaritza taldeko kide izateko proposamenaren onarpena.

IV. eranskina.–Lanbide Heziketako ikastetxe bateratuetako zuzendariak hautatzeko deialdian parte hartzeko eskabidea.

Deskargatu III. eta IV. eranskinak (DOC).

Iragarkiaren kodea: F2216981