Iragarkia

10. ALDIZKARIA - 2023ko urtarrilaren 16a

1. NAFARROAKO FORU KOMUNITATEA

1.7. BESTELAKOAK

305E/2022 EBAZPENA, abenduaren 12koa, Landa Garapeneko zuzendari nagusiak emana, Nafarroa Jatorrizko Deitura Babestuaren Baldintza Orriaren Batasunerako aldaketa onesten duena, haren Kon tseilu Arauemaileak eskatuta.

Ikusirik Nafarroa Jatorrizko Deituraren Baldintza Orriaren Batasunerako aldaketaren eskaera, zeina deituraren Kontseilu Arautzaileak aurkeztu baitzuen; honako hauetan babestuta: 2013ko abenduaren 17ko Europako Parlamentuaren eta Kontseiluaren 1308/2013 (EB) Erregelamenduak (zeinaren bidez nekazaritza produktuen Erakunde Komuna sortzen baita eta 922/72 (EEE), 234/79 (EEE), 1037/2001 (EE) eta 1234/2007 (EE) erregelamenduak baliogabetzen baitira) 105. artikuluan xedatutakoa eta 1335/2011 Errege Dekretuak (zeina urriaren 3koa eta jatorrizko deitura babestuei eta adierazpen geografiko babestuei erkidegoko erregistroan izena emateko eskabideak izapidetzeko eta horiei aurka egiteko prozedura arautzekoa baita) xedatutakoa; eta honako hauek kontuan hartuta:

Aurrekariak

Nafarroa Jatorrizko Deituraren Kontseilu Arauemaileak, 2021eko uztailaren 2an egin osoko bilkuran, "Baldintza osagarriak" izeneko agiriaren 8. b) artikulua aldatzea erabaki zuen, 8) azpiatala, JDk babestutako ardoa zedarritutako ingurutik kanpoko upategietan botilatzeko aukera izan ezik.

2021eko abuztuaren 3an, 2021/829133 erregistro zenbakiarekin, eskabide hori Landa Garapeneko eta Ingurumeneko Departamentuan sartu zen, dokumentazio osagarriarekin batera.

2021eko azaroaren 27an, Landa Garapeneko zuzendari nagusiaren azaroaren 18ko 208E/2021 Ebazpena argitaratu zen Estatuko Aldizkari Ofizialean, Nafarroa Jatorrizko Deituraren baldintza orria Europar Batasunerako aldatzeko eskaera jakinarazteko. Hala, aurka egiteko prozedura nazionala hasi zen, eta epe bat ezarri zen, argitaratu eta bi hilabetekoa, zertarako eta legez Espainian finkatuta dagoen edo bizi den edozein pertsona fisiko eta juridikok, uste badu bere eskubide edo interes legitimoak ukitzen direla, aurka egiteko aukera izan dezan, dagokion adierazpen arrazoituaren bidez, Nafarroako Gobernuko Landa Garapeneko eta Ingurumeneko Departamentuko Landa Garapeneko Zuzendaritza Nagusiari zuzenduta.

Bodegas Manzanos SLk, 2022ko urtarrilaren 26an eta 2022/98716 erregistro zenbakiarekin, aurkakotza adierazpen bat aurkeztu zuen.

2022ko martxoaren 8an, Estatuko Aldizkari Ofizialean Landa Garapeneko zuzendari nagusiaren ebazpen bat argitaratu zen, azaroaren 18ko 208E/2021 Ebazpenean atzemandako akats bat zuzendu zuena, eta beste epe bat ireki zen, argitaratu eta bi hilabetekoa, zertarako eta legez Espainian finkatuta dagoen edo bizi den edozein pertsona fisiko eta juridikok, uste badu bere eskubide edo interes legitimoak ukitzen direla, aurka egiteko aukera izan dezan, dagokion adierazpen arrazoituaren bidez, Nafarroako Gobernuko Landa Garapeneko eta Ingurumeneko Departamentuko Landa Garapeneko Zuzendaritza Nagusiari zuzenduta.

Aurkakoak interes legitimoa du, 2020ko martxoaren 6az geroztik aparteko baimen bat baitu, ohiz kanpokoa, puntuala eta aldi baterakoa, Nafarroa Jatorrizko Deituraren Kontseilu Arauemaileak emana, Azagrako (Nafarroa) bere instalazioetan ardo babestua botilatzeko, Jatorrizko Deituraren eremu geografikotik kanpo, baldintza orriko EB aldaketaren eskaera ebazten den bitartean.

Motibazioa

Lehenengoa.–Nafarroa Jatorrizko Deituraren Kontseilu Arauemaileak, 2021eko uztailaren 2an egin osoko bilkuran, 8. b. artikulua, "Baldintza osagarriei" buruzkoa, aldatzea erabaki zuen, 8) azpiatala, alde batera utzita jatorri izenak babestutako ardoa botilatzeko aukera, mugatutako eremutik kanpoko upategietan.

Bigarrena.–2021eko abuztuaren 3an, 2021/829133 erregistro zenbakiarekin, eskabide hori Landa Garapeneko eta Ingurumeneko Departamentuan sartu zen, dokumentazio osagarriarekin batera.

Hirugarrena.–2021eko azaroaren 27an, Estatuko Aldizkari Ofizialean argitaratu zen Landa Garapeneko zuzendari nagusiaren azaroaren 18ko E/2021 Ebazpena, Nafarroa Jatorrizko Deituraren baldintza orria Europar Batasunerako aldatzeko eskaera jakinarazteko. Horren ondorioz, aurka egiteko prozedura nazionala hasi zen, eta epe bat ezarri zen, argitaratu eta bi hilabetekoa, zertarako eta legez Espainian finkatuta dagoen edo bizi den edozein pertsona fisiko eta juridikok, uste badu bere eskubide edo interes legitimoak ukitzen direla, aurka egiteko aukera izan dezan, dagokion adierazpen arrazoituaren bidez, Nafarroako Gobernuko Landa Garapeneko eta Ingurumeneko Departamentuko Landa Garapeneko Zuzendaritza Nagusiari zuzenduta.

Laugarrena.–Bodegas Manzanos SLk, 2022ko urtarrilaren 26an eta 2022/98716 erregistro zenbakiarekin, aurka egiteko adierazpena aurkeztu zuen.

Bosgarrena.–2022ko martxoaren 8an, Estatuko Aldizkari Ofizialean Landa Garapeneko zuzendari nagusiaren ebazpen bat argitaratu zen, azaroaren 18ko 208E/2021 Ebazpenean atzemandako akats bat zuzendu zuena, eta beste epe bat ireki zen, argitaratu eta bi hilabetekoa, zertarako eta legez Espainian finkatuta dagoen edo bizi den edozein pertsona fisiko eta juridikok, uste badu bere eskubide edo interes legitimoak ukitzen direla, aurka egiteko aukera izan dezan, dagokion adierazpen arrazoituaren bidez, Nafarroako Gobernuko Landa Garapeneko eta Ingurumeneko Departamentuko Landa Garapeneko Zuzendaritza Nagusiari zuzenduta.

Seigarrena.–Aurkako deklarazioa aztertu ondoren, honako hau adierazten da:

Aurkakoak interes legitimoa du, 2020ko martxoaren 6az geroztik aparteko baimen bat baitu, ohiz kanpokoa, puntuala eta aldi baterakoa, Nafarroa Jatorrizko Deituraren Kontseilu Arauemaileak emana, Azagrako (Nafarroa) bere instalazioetan ardo babestua botilatzeko, Jatorrizko Deituraren eremu geografikotik kanpo, baldintza orriaren EB aldaketaren eskaera ebazten den bitartean.

Aurkakotasunak bost arrazoi ditu. Hona hemen arrazoiak:

1.–Nafarroa Jatorrizko Deituraren Kontseiluaren baimenak, ekoizpen eremutik kanpo botilaratzeko eta Nafarroa Jatorrizko Deiturak babesturiko ontziratu gabeko ardoa produkzio eremutik kanpo bidaltzeko.

2.–Aldatzeko eskaerak ez du Batzordearen 2018ko urriaren 17ko 2019/33 Erregelamendu Delegatuaren (EB) 4.2 artikuluak eskatzen duen justifikaziorik, abenduaren 21eko 1151/2012 (EB) Erregelamenduaren 7.1.e) artikuluari dagokionez.

3.–Eskabidearekin batera aurkeztutako txosten teknikoari dagokionez.

4.–Nafarroa Jatorrizko Deituraren titulartasunari dagokionez.

5.–EBFTren 34. artikulua aplikatzeari dagokionez, non hau ezartzen baita: "... Estatu kideen artean debekatuta dago inportaziorako kopuruak murriztea, bai eta ondorio baliokideak dauzkaten beste neurri guztiak ere.".

1.–Nafarroa Jatorrizko Deituraren Kontseiluaren baimenak, ekoizpen eremutik kanpo botilatzeko eta Nafarroa Jatorrizko Deiturak babesturiko ontziratu gabeko ardoa produkzio eremutik kanpo bidaltzeko.

Kontseilu Arautzaileak baimen zehatzak eman ditu ekoizpen eremutik kanpo botilaratzeko, betiere salbuespenez eta aldi baterako, eta administrazio unitate baten barruan, Nafarroako Foru Komunitatea, non agintari eskudunak kontrolerako eskumen guztiak baititu.

Adibidez, ardandegi alegatzaileari baimena eman zaio eremutik kanpo botilaratzeko. Baimen hori ohiz kanpokoa da salbuespenezkoa, puntuala eta aldi baterakoa, interesdunari 2020ko martxoaren 6an jakinarazitako baimenean bertan jasota dagoen bezala. Baimen horretan honako hau jasotzen da:

"... aipatu prozedura izapidetu bitartean, eta gogoan izanik denboran luza daitekeela, eta, era berean, urriaren 8ko 188E/2018 Foru Agindua betez, Kontseilu Arautzaile honen asmoa izanik operatzaileei inolako kalterik ez egitea, eta kontuan hartuta zuek 2017ko urriaren 7ko datarekjn egin zenuten eskaria, zeina erregistroan 2559 zenbakiarekin sartu baitzen 2017ko azaroaren 7an, bai eta aldeen artean gaiari buruz geroago izandako jakinarazpenak ere, zertarako eta Nafarroa Jatorrizko Deiturako ardoa botilatzeko NA-134 errepideko 49. kilometroan dagoen upeltegian, Azagran (Nafarroa) eta, beraz, Nafarroa Jatorriko Deituraren ekoizpen eremutik kanpo, honako honen bidez hau jakinarazten dizuegu:

Aurreko paragrafoan aipatutako prozedura izapidetzen den bitartean eta horri buruzko behin betiko ebazpena eman arte, baimen aparteko, salbuespenezko, puntual eta aldi baterakoa emateko erabakia hartu dela, prozedura izapidetzean zuei kalterik ez eragiteko justifikazio bakarrarekin. Baimen hau ez da inola ere modu iraunkorrean ulertu behar."

Era berean, Bodegas Manzanos SLk esaten du 2020ko abenduaren 30eko 344/2020 epaian frogatutzat eman zela zonatik kanpo botilatzeko operatzaile baimendu bat egon zela, eta Kontseilu Arauemaileak baimena ematen duela ardoak ontziratu gabe igortzeko Estatura, Erkidegora eta nazioarte osora.

Kontseilu Arauemaileak 2007ko maiatzean baimena eman zion operatzaile bati ekoizpen eremutik kanpo botilatzeko; zehazki, San Adriángo udalerrian, Nafarroako Foru Komunitatean. Baimenak 2010. urtera arte iraun zuen.

Aipatutako salbuespenezko bi baimenek, 1986koa den Jatorrizko Deitura batean, Nafarroa Jatorrizko Deituran araua produkzio eremuaren barruan botilatzea dela berresten dute.

Jatorrizko Deituraren babespeko ardoa ontziratu gabe beste herrialde batzuetara bidaltzeari dagokionez, ziurtatzen den gauza bakarra da ardoak, bidaltzen den unera arte, Nafarroa JDBaren baldintza orriko eskakizunak eta jatorria betetzen dituela. Ziurtatze horrek ez du baimenik ematen ardo babestuak botilatzeko produkzio eremutik kanpo. Ardo horiek ezin dira Nafarroa Jatorrizko Deiturako ardo gisa etiketatu, trazabilitatea erabat galtzen delako, ez dagoelako botilatze lanei buruzko erregistrorik, ez direlako egiten Nafarroa Jatorrizko Deituran erregistratutako establezimenduetan, eta ez dituelako kontrolatzen kontrol eta ziurtapen erakundeak.

Laburbilduz, babestutako ontziratu gabeko ardoa igortzeak ez du esan nahi, inola ere, baimenik dagoenik Nafarroa JD gisa botilatzeko zonatik kanpo. Ez dakigu ardo horiek nola merkaturatzen diren azkenean, baina ezin dira botilatu Nafarroa JD gisa. Nolanahi ere, botilek ez dituzte JDn derrigorrezkoak diren kontraetiketa edo zigilu zenbakidunak, eta, erabili nahi izanez gero, ardandegi botilatzaile horiek kontrol erakundeari eskatu beharko lizkiokete.

Aurrekoa gorabehera, eta edozein interpretazio desegoki galarazteko, Kontseiluak adierazi du ontziratu gabeko bidalketak Nafarroa JDko ardo gisa ziurtatzeari uzteko asmoa duela, JDn erregistratutako operatzaile batendako ez badira.

2.–Baieztapen hau: aldaketa eskaerak ez du Batzordearen 2018ko urriaren 17ko 2019/33 Erregelamendu Delegatuaren (EB) 4.2 artikuluak eskatzen duen justifikaziorik, abenduaren 21eko 1151/2012 (EB) Erregelamenduaren 7.1.e) artikuluari dagokionez.

Batzordearen 2018ko urriaren 17ko 2019/33 Erregelamendu Delegatuaren (EB) 4.2 artikuluan ezartzen den bezala, Kontseilu Arauemaileak aurkeztutako aldaketa eskaerarekin batera, beharrezko txosten teknikoa aurkeztu da, azaltzeko kasu zehatz horretan ontziratzea zergatik egin behar den eremu geografiko jakin horretan, kalitatea zaintzeko, jatorria bermatzeko edo kontrola ziurtatzeko, Batasuneko Zuzenbidea kontuan hartuta, bereziki salgaien zirkulazio askeari eta zerbitzuak libreki emateari buruzkoa. Azaroaren 21eko 1151/2012 Erregelamenduaz egindako aipamenari dagokionez, adierazi behar da ez diela mahastizaintzako eta ardogintzako produktuei aplikatzen, 2. artikuluko 2. puntuan jasota dagoen bezala.

Jatorri eta kontrol arrazoiak

Jatorrizko deitura duten ardoen elaborazioa ez da amaitzen muztioa ardo bihurtzeko prozesuarekin, hartzidura alkoholikoaren eta beste prozesu osagarri batzuen bidez; aitzitik, ontziratzea ardo horien elaborazioaren azken fasetzat hartu behar da, prozesu horrekin batera jarduera enologiko osagarriak, iragazketa, egonkortzea eta haien ezaugarriei eta berezitasunei eragin diezaieketen askotariko zuzenketak egiten baitira. Gainera, kasu askotan, botilan zahartu behar izaten da ardoa biribildu eta fintzeko (onduak eta erreserbak); beraz, botilatzea tarteko prozesua da babestutako produktua egiteko, eta Nafarroa Jatorrizko Deituraren eremuan egin behar da, baldintza orria betez.

Kontrolari dagokionez, Espainiako agintari eskudunak eskuordetutako eta Egiaztatze Erakunde Nazionalak produktuen ziurtapenari buruzko ISO 17065 arauan egiaztatutako kontrol erakundearen jarduera eremua Nafarroako Foru Komunitatearen lurralde eremura mugatzen da, non baitago baldintza orrian zehaztutako ekoizpen eremu osoa. Lehengaiaren eta elaborazioaren jatorri zehatza bermatzeko egin beharreko trazabilitate osoko ariketak, lehen aipatu diren aparteko aldi baterako baimenak salbuetsita, ezin dira ekoizpen eremutik kanpo egin arrazoi logistiko eta ekonomikoengatik.

Bestalde, ardoen etiketan botilatzailearen izena eta helbidea adierazi behar dira. Etiketan adieraztea botilatzea zedarritutako ekoizpen eremutik kanpo egin dela, nahasgarria da gutxienez azken kontsumitzailearentzat, eta 1169/2011 Erregelamenduaren 7. artikuluko a puntuaren aurkakoa, esaten baitu elikagaiei buruzko informazioak ez duela okerrera eramanen jatorrizko herrialdeari edo lekuari dagokionez.

Kalitate arrazoiak

Baldintza orria aldatzeko eskaerarekin batera aurkeztutako txosten teknikoan ageri denez, ardoa elaborazio eremutik kanpo garraiatzea eta botilatzea oso arriskutsua da, besteak beste, ardoa honako hauen eraginpean jartzen baita: oxido erredukzioko fenomeno kimikoak; tenperatura, hotz eta bero baldintzak, argia, garaiera eta presio atmosferikoa aldatzea; bat-bateko mugimendu zinetikoak... Zenbat eta handiagoa izan jatorritik botilaratu arte egin beharreko distantzia, orduan eta gehiago areagotuko dira fenomeno negatibo horiek guztiak, eta horrek azkarregi zahartzea eta kalitatea galtzea eragin ditzake.

Europako Batzordeak argudio horiek onetsi ditu, Jumilla JDBaren eremu geografiko mugatuan ontziratzea mugatzeari dagokion EBren aldaketa onesteko. Hona hemen, hitzez hitz:

"... Gainera, argi dago distantzia eta denbora luzeak eskatzen dituzten lekualdaketetan produktua aldatzeko arriskua handitzen dela, besteak beste oxidazio fenomenoak eta tenperatura aldaketak gertatzekoa, eta horiek kalte egiten diote kalitateari." (2022/02/15eko EBAOn argitaratu zen eskaera, eta 2022/06/14ko EBAOn onartu zen).

3.–Eskabidearekin batera aurkeztutako txosten teknikoari buruzko oharrak.

Baldintza orria aldatzeko eskabidearekin batera aurkeztu den txosten teknikoa Antonio Tomás Palacios Garcíak egin du. Laboratorios Excell Ibérica SLko zuzendari kudeatzailea da, bai eta Biologiako doktorea eta enologoa ere. Laborategi hori ardoetan espezializatuta dago, eta mahastizaintza inguru batean kokatuta, Errioxako Autonomia Erkidegoan; beraz, frogatutzat jotzen da ardogintza ezagutzen duela eta kaudimen teknikoa duela.

Alegatzen duen ardandegiak azpimarratzen du Kontseiluak baimena ematen duela eremutik kanpo botilatzeko babestutako ardoa, ontziratu gabeko ardoetatik abiatuta, beti ere ontziratu gabeko ardo horien dokumentuetan Nafarroa JDko ardoa dela agertzen bada. Esan bezala, ontziratu gabeko produktu horiek ezin dira botilatu babestutako ardo gisa ekoizpen eremutik kanpo. Horrek, alegatzen duen ardandegiak dioenaren aurka, berretsi egiten du babestutako ardoa botilatzeko baimena ekoizpen eremuan soilik ematen dela, zonatik kanpo botilatzeko aparteko baimenak salbuetsita. Izan ere, azken horiei dagokienez, baimenak apartekoak izateaz gain, ekoizpen eremuaren aldameneko Nafarroako Foru Komunitateko udalerrientzat onartu ziren eta, horrenbestez, aparteko baimen horietan gutxienekora murriztuta egonen lirateke txostenean aipatzen diren kalitatea galtzeko arriskuak.

Azaldutako arrazoien arabera, eta bereziki kontuan hartuta ontziratu gabeko ardo horiek baliatuta babestutako ardoa ontziratzeko aukerari dagokionez interpretazio okerra egiteko arriskua, ez da komeni ardoei buruzko ziurtagiriak ematen jarraitzea, ardoen kontrola guztiz galtzen denean merkaturatu aurretik.

Hain zuzen ere, mugatu den eremutik ontziratu gabeko produktuak ateratzea baimendu den denbora osoko esperientziak erakutsi die operatzaileek zer garrantzi duen botilatzeak ardoaren elaborazioaren azken fase moduan.

Jatorrizko deitura hori 1986an onartu zen Espainian, eta, haren historia luzean zehar, sektorearen gainerakoan bezala, nabarmen aurreratu dira kalitate eskakizunak eta, horregatik, egun, deitura ez da ulertzen botilatzearen jarraipen zorrotza egin gabe; hori dela eta, sektoreak berak eskatzen du orain «Nafarroa» izena izaten ahal duen ezein ardo ez geratzea jarraipen horretatik kanpo. Aski da esatea ontziratu gabeko esportazioak gutxituz joan direla pixkanaka. Ontziratu gabe merkaturatzen den kopurua oso-oso txikia da, JDBak merkaturatutako guztiaren % 3 baino txikiagoa.

Ardoa ekoizpen eremuan soltean saltzeari dagokionez, inskribatuta dauden eta kontrol erakunde delegatuak gainbegiratzen dituen ardandegien artean egiten da. Produktuaren kalitate osoa babesteko, beharrezkoa da botilaratzea JDBa osatzen duten operatzaile ziurtatuek egitea, hau da, mugatutako eremuaren barruan daudenek, horiek baitira ardoaren prestigioaren erantzule eta onuradunak; izan ere, bestela, kalte egin dakioke.

Produkzio eremutik kanpo Nafarroa JDko ardoa botilatzen duen upategi bakarra alegazio egilea da, eta haren "Ezohiko baimena, ohiz kanpokoa, puntuala eta aldi baterakoa" delakoan adierazten zaie Baldintza Orrian eta Kontseilu Arautzailearen erregelamenduan jasotako prozedura eta baldintza guztiak bete behar dituztela.

4.–Nafarroa JDren titulartasuna dela-eta aurka egoteko arrazoiari dagokionez.

Mahastizaintzari eta Ardogintzari buruzko abenduaren 5eko 16/2005 Foru Legeak bere 20.2 artikuluan ezartzen duenaren arabera, jatorri deituraren kudeaketa Kontseilu Arauemaileari esleitzen zaio; bertan ordezkaritza izanen dute ekoizleek eta merkaturatzaileek, eta jatorri deituraren kudeaketaz arduratzen den zuzenbide publikoko korporazio izaera izanen du. Kontseilu Arauemaileak nortasun juridiko propioa, autonomia ekonomikoa, ahalmen juridiko osoa eta bere eginkizunak betetzeko gaitasuna ditu. Abenduaren 29ko 459/2014 Foru Aginduaren arabera, besteak beste, helburu eta eginkizun hauek ditu:

–Jatorrizko Deituraren izena eta sustapena begiratzea, eta edozein erabilera oker salatzea, beharrezkoa bada, eskumena duten organo administratibo eta jurisdikzionaletan.

–Jatorrizko Deituraren operatzaileen erregistroak kudeatzea.

–Baldintza orria eta erregelamendu hau betetzen direla begiratzea.

–Baldintza orria eta erregelamendua aldatzeko proposamenak egitea.

–Jatorriaren ziurtagiriak eta berme zigiluak ematea.

Inskribatutako operatzaileak izena erabiltzeko eskubidea duela dioen baieztapenaren aurrean, argitu behar da inskribatutako operatzaileak ezarritako baldintza orria betetzen duten eta JDBaren kontrol eta ziurtapen organoak (gaur egun "Nekazaritzako Elikagai Teknologien eta Azpiegituren Nafarroako Institutua, S.A.", INTIA) egiaztatzen dituen produktuetan baino ez duela izanen erabiltzeko eskubidea.

5.–EBFTren 34. artikulua aplikatzearen aurka egiteko arrazoiari dagokionez.

Kalitate bereiziko figuren kasuan, eta bereziki jatorrizko deitura babestuen kasuan, honako honetan bezala, Europar Batasuneko araudiak produkzio eremua murrizteko aukera ezartzen du.

Ardoa egiteko produktu konplexua da, zenbait ekoizpen fase ditu eta, ardo motaren arabera, ardoa egiteko beharrezkoa da ardoa denbora jakin batean botilatuta egotea. Ardoa botilatzea, beraz, elaborazioaren zatitzat hartu behar da.

Eskaerarekin batera aurkeztutako txosten teknikoan ageri denez, ardoa elaborazio eremutik kanpo garraiatzea eta botilatzea oso arriskutsua da, besteak beste, ardoa honako hauen eraginpean jartzen baita: oxido erredukzioko fenomeno kimikoak; tenperatura, hotz eta bero baldintzak, argia, garaiera eta presio atmosferikoa aldatzea; bat-bateko mugimendu zinetikoak... Zenbat eta handiagoa izan jatorritik botilaratu arte egin beharreko distantzia, orduan eta gehiago areagotuko dira fenomeno negatibo horiek guztiak, eta horrek azkarregi zahartzea eta kalitatea galtzea eragin ditzake.

Arestian adierazi bezala, Europako Batzordeak arrazoi horiek kontuan hartu ditu agirietan aldaketak onartzeko, zertarako eta eremu geografikoaren barruan beste izendapen batzuetan ontziratzea mugatzeko, hala nola Jumilla JDBaren kasuan, zeinean hitzez hitz hau jasotzen baita: "... argi dago distantzia eta denbora luzeak eskatzen dituzten lekualdaketetan produktua aldatzeko arriskua handitzen dela, besteak beste oxidazio fenomenoak eta tenperatura aldaketak gertatzekoa, eta horiek kalte egiten diote kalitateari." (Eskaera 2022/02/15eko EBAOn argitaratu zen eta 2022/06/14ko EBAOn onartu zen).

Nafarroa Jatorrizko Deituraren Kontseilu Arauemaileak aurkeztutako baldintza orriaren aldaketak aukera hori du oinarri, kontrolaren bermerik ez izateaz gain, eta Europar Batasuneko araudiarekin bat dator.

Ondorioa

Justifikatutzat jotzen da Nafarroa Jatorrizko Deituraren Kontseilu Arauemaileak aurkeztutako baldintza orria aldatzeko eskaera; izan ere, ekoizpen eremuaren barruan ontziratzea beharrezkoa da ardoaren kalitatea zaintzeko, ardoaren jatorria ziurtatzeko eta azken kontsumitzaileari kontrola bermatzeko, bai eta JDBaren ospea, erabilera egokia eta izen ona babesteko ere.

Adierazitakoarekin bat, eta erabiliz Nafarroako Foru Komunitateko Administrazioari eta foru sektore publiko instituzionalari buruzko martxoaren 11ko 11/2019 Foru Legeak eta Landa Garapeneko eta Ingurumeneko Departamentuaren egitura organikoa onesten duen urriaren 23ko 258/2019 Foru Dekretuak ematen dizkidaten eskudantziak, honako hau

EBAZTEN DUT:

1. Nafarroa Jatorrizko Deitura Babestuaren baldintza orria Batasunerako aldatzeko eskaera onestea.

2. Ebazpen hau Nekazaritza, Arrantza eta Elikadura Ministerioari jakinaraztea, Nafarroa Jatorrizko Deitura Babestuaren baldintza orria Europar Batasunerako aldatzeko eskaera hau Europako Batzordeari helarazteko, urriaren 3ko 1335/2011 Errege Dekretuak (jatorrizko deitura babestuei eta adierazpen geografiko babestuei erkidegoko erregistroan izena emateko eskabideak izapidetzeko eta horiei aurka egiteko prozedura arautzekoa) 15.2 artikuluan xedatuarekin bat etorriz.

3. Baldintza orriaren bertsioa web helbide honetan dago argitaratuta:

https://cutt.ly/EMCqKmh

4. Ebazpen hau interesdunei jakinaraztea eta Nafarroako Aldizkari Ofizialean argitaratzea, aldeko erabakia publikoa izan dadin bermatzeko.

5. Ebazpen honek ez du administrazio bidea amaitzen, eta haren aurka gora jotzeko errekurtsoa jartzen ahal da, Landa Garapeneko eta Ingurumeneko kontseilariari zuzendua, ebazpena jaso eta hilabeteko epean.

Iruñean, 2022ko abenduaren 12an.–Landa Garapeneko zuzendari nagusia, Fernando Santafé Aranda.

Iragarkiaren kodea: F2216971