Iragarkia

95. ALDIZKARIA - 2022ko maiatzaren 17a

1. NAFARROAKO FORU KOMUNITATEA

1.7. BESTELAKOAK

50/2022 EBAZPENA, apirilaren 21ekoa, Ingurumeneko zuzendari nagusiarena, Urbasa eta Andia ondare mendietako larreak erabiltzea baimentzen duena.

Urbasa eta Andia mendien jabaria –biak Erabilgarritasun Publikoko Mendien katalogoan sartuak– Nafarroari eskualdatu zitzaion, 334/1987 Errege Dekretuari, otsailaren 27koari, Estatuaren titulartasuneko Mendien jabaria Nafarroako Foru Komunitateari eskualdatzekoari, jarraituz, zeina eman baitzen 13/1982 Lege Organikoaren, abuztuaren 10ekoaren Nafarroako Foru Eraentza Berrezartzeari eta Hobetzeari buruzkoaren (aurrerantzean, NFBHLO), laugarren xedapen gehigarriaren babesean.

14/2007 Foru Legearen, apirilaren 4koaren, Nafarroako Ondareari buruzkoaren, 5. artikuluan xedatutakoari jarraituz, aipaturiko mendiak jabari publikoko ondasunak dira, eta bertako larreak laga eginen dira (“Nafarroako Foru Komunitateko ondasun eta eskubide inbentariagarrien katalogoa”n identifikatuak, 2961 zenbakia, Erabilgarritasun Publikoko 6 zenbakiko mendia –Urbasa mendia– eta 2962 zenbakia, Erabilgarritasun Publikoko 7 zenbakiko mendia –Andia mendia–).

1912ko Nafarroako Erabilgarritasun Publikoko Mendien Katalogoaren arabera, zeina partez eguneratu baitzen indarrean sartu zenean Landa Garapeneko eta Ingurumeneko kontseilariaren 2020ko apirilaren 17ko 6/5/2020 Foru Agindua, Erabilgarritasun Publikoko Mendien Katalogoaren kartografia eguneratzeko prozedura hastekoa, Nafarroako Foru Komunitatea da 6 zenbakiko mendiaren azaleraren % 99,3ren jabe (11.435,82 Ha ditu, guztira), eta 7 zenbakiko mendiaren azaleraren % 99,7ren jabe (4.358,86 Ha ditu, guztira). Biak dira besterenezinak, preskribaezinak, enbargaezinak, eta ez daude haren titulartasuna zergapetzen duen ezein tributuren mendean, Nafarroako Baso Ondarea Babesteko eta Garatzeko abenduaren 31ko 13/1990 Foru Legearen 8. artikuluak xedatzen duenez.

Nafarroako Ondareari buruzko apirilaren 4ko 14/2007 Foru Legearen 86. artikulua aplikatuz, Urbasa eta Andia mendietako larre erabilera “erabilera erkide berezia” da, eta horretarako “lizentzia edo baimena lortu beharko da aldez aurretik, kasuan kasuko ondasunak atxikiak dituen departamentuak edo erakunde publikoak emana; departamentu edo erakunde horrek berak zehaztuko ditu bete beharreko baldintzak”. Manu berak honako hau xedatzen du: “Baimenak zuzenean emanen zaizkie eskatutako baldintzak betetzen dituzten eskatzaileei, kopurua mugatua dagoenean izan ezik, kasu horretan lehia egonen baita edo, halakorik egitea bidezkoa ez bada, eskatzaileengan baldintza berezirik baloratu behar ez delako, zozketa bidez edo arauetan ezarritako hautabidea erabiliz”.

Hau da, onuradunen kopurua mugaturik ez badago, ezarritako betekizunak betetzen dituzten eskabide guztiak onartuko dira, ez da lehia prozedurarik ezarri beharko, eta ez du zentzurik izanen ezein baremo ezartzeak.

Uztailaren 1eko 267/1996 Foru Dekretuaren bidez onetsi zen Urbasa eta Andia mendietako natur baliabideen antolamendu plana. Antolamendu Planaren 31. artikuluko C) hizkiak jasotzen du “larre kudeaketako” gune bat dagoela, “zuhaitzik gabeko larreen eta larre zuhaiztunen” azalerak hartua, baina 34.2 artikuluko b) hizkian “zedarrituriko guneetan” artzaintza debekatzen du. 2. artikuluan, 198/2011 Foru Dekretuak, irailaren 7koak bertan egindako erreformaren ondoren, 4.372,45 hektareako azalera ezartzen du Andimendian, eta 11.445,22 hektareakoa Urbasan.

3/1997 Foru Legeak, otsailaren 27koak, parke natural izendatu zuen Urbasa eta Andia mendiak, Limitaciones mendia eta Urederra ibaiaren iturburuaren Erreserba Naturala hartzen dituen lurralde eremua. 4.1 artikuluak xedatzen duenez, “Parke Naturalaren kudeaketa Urbasa eta Andian eta Urederra ibaiaren iturburuaren Erreserba Naturalean, Limitaciones mendiaren lurretan izan ezik, Nafarroako Gobernuko Ingurumen, Lurralde Antolaketa eta Etxebizitza Departamentuari dagokio”.

Abenduaren 4ko 340/2001 Foru Dekretuaren bidez onetsi zen Urbasa Parke Naturala Erabili eta Kudeatzeko Plan Zuzentzailea (EKPZ). Plan horren 4.1 artikuluaren arabera, eskubide tradizionalen erabilera, besteak beste larratzekoa, Ingurumen Zuzendaritza Nagusiak ezarri prozedurari jarraikiz eginen da.

228/2007 Foru Dekretua, urriaren 8koa, “Urbasa eta Andia” izeneko Batasunaren Garrantzizko Lekua Kontserbazio Bereziko Eremu izendatzen duena eta haren kudeaketa plana onesten duena. Foru dekretu honek aipaturiko planaren testua jasotzen du; haren VIII. epigrafean, “Jarduketa programa”ri buruzkoan, “Erabileren eta aprobetxamenduan kudeaketa jasangarria” programan, 3. zenbakikoan, honako hau aipatzen du, 2012 kodearekin: “Larre antolamendua egitea Urbasa-Andian (LAP)”.

Kudeaketa plan horri jarraituz, Ingurumenaren eta Uraren zuzendari nagusiaren abuztuaren 12ko 1259/2011 Ebazpena eman zen, eta haren xedea zen “Urbasa eta Andia Mendietako larre eta oihanak antolatzeko proiektua” izeneko dokumentu teknikoa onestea. Ebazpen horrek aipatutako plana onetsi zuen, eta Urbasa eta Andimendiko Larreen Aprobetxamendu Batzarrari jakinarazi zion.

Kontuan harturik Urbasa eta Andia mendietako Larreen Antolamendu Planean ez dela mugarik ezartzen mendietara bazkatzera sartuko diren AzLUen kopuruari dagokionez;

Ikusirik Nekazaritza Zerbitzuak eta Baso eta Ehiza Zerbitzuak emaniko txostenak. Horrenbestez, erabiliz Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 32.1 artikuluan xedatutako eskumenak eta Landa Garapeneko eta Ingurumeneko Departamentuaren egitura organikoa onesten duen urriaren 23ko 258/2019 Foru Dekretuaren 43. artikuluko d) hizkiari lotuta ematen dizkidanak,

EBAZTEN DUT:

1. Baimentzea Urbasa eta Andia ondare mendietako erabilera erkideko larreak erabiltzea, Nafarroako Foru Komunitatearen jabetzakoak, 2022ko kanpainarako, zeina 2022ko apirilaren 15ean hasi eta 2022ko abenduaren 15ean bukatuko den, ebazpen honen I. eranskinean ezarritako baldintzak betetzen dituzten guztiei.

2. Onestea azienda Urbasa eta Andia ondare mendietan bertako larreak erabiltzeko sartzeko aurretiazko komunikazio eredua, ebazpen honen III. eranskinean jaso dena izendapen honekin: “Urbasa eta Andia mendietara azienda igotzearen jakinarazpena”.

3. Aldi baterako aitortzea ebazpen honen II. eranskinean agertzen den erabiltzaile zerrendari, Urbasa eta Andia ondare mendietan erabil ditzaketen larreen azalerak.

4. Komunikazio eta kontrol sistema bat ezartzea, aipaturiko mendietara azienda igotzen duten abeltzain guztiek Urbasa eta Andia ondare mendietan erabil ditzaketen larreen azalerak ezagutzeko. Horretarako, aipaturiko IV. eranskina aurkeztu behar dute, “Azalera aitortzeko Urbasa eta Andia ondare mendietan sartutako aziendaren zenbatespenaren jakinarazpena” izenekoa.

5. Ebazpen hau jakinaraztea Baso Plangintzarako eta Ingurumen Hezkuntzarako Atalari, Basozaintza Atalari, Nekazaritza Zerbitzuari eta Urbasa eta Andimendiko Larreen Aprobetxamendu Batzordeari, behar diren ondorioak izan ditzan.

6. Ebazpen hau Nafarroako Aldizkari Ofizialean argitaratzea.

7. Ebazpen honek ez du administrazio bidea amaitzen, eta espedientean interesa dutenek gora jotzeko errekurtsoa jar dezakete, Landa Garapeneko eta Ingurumeneko kontseilariari zuzendua, hilabeteko epean.

Iruñean, 2022ko apirilaren 21ean.–Ingurumeneko zuzendari nagusia, Pablo Muñoz Trigo.

I. ERANSKINA

2022ko kanpainarako Urbasa eta Andia ondare mendietako erabilera erkideko larreen aprobetxamendua baimentzeko baldintzak

Lehena.–Xedea.

Ebazpen honen xedea da ezartzea Urbasa eta Andia ondare mendietan erabilera erkideko larreak erabiltzeko baimena eskatzeko interesdunek bete beharreko baldintzak, 2022ko kanpainarako.

Bigarrena.–Onuradunak.

Honako hauek izaten ahalko dira Urbasa eta Andia ondare mendietako erabilera erkideko larreen onuradun: abeltzaintza ustiategietako nafar auzotasun forala duten titularrak, beren jabetzako azienda mendi horietara larratzera eramaten dutenak eta belarren aprobetxamendua Urbasa eta Andia Parke Naturala Erabili eta Kudeatzeko Plan Zuzentzaileari jarraikiz egiten dutenak (abenduaren 4ko 340/2001 Foru Dekretuaren bidez onetsi zen plan hori), eta gainerako araudi aplikagarria betetzen dutenak.

Hirugarrena.–Komunikazioa.

Abeltzain guztiek aurkeztu beharko dute ebazpen honen III. eranskina, “Urbasa eta Andia mendietara azienda igotzearen jakinarazpena” behar bezala beteta eta dokumentuan bertan jasotako epeetan eta lekuetan.

Laugarrena.- NPEko laguntzak eskatzeko azalera adjudikazioa.

1.–Larre azalera aitortzeko prozedura.

2021eko kanpainan Urbasa eta Andia mendietara sartu ziren azienda ustiategiei 2022rako, behin-behinean, orduan erabilitako azalera aitortuko zaie, II. eranskinean jasotako zerrendan jaso den moduan. Guztira aitorturiko azalera 6.167,01 Ha dira, 12.585,73 AzLUri dagokiona, hau da, 0,49 Ha/AzLU da ratioa.

Oinarri hauen ondorioetarako, “eskari berri”tzat joko dira abeltzain hauek egindakoak:

(a) Urbasan edo Andian aurreko urtean aziendarik sartu ez zutenak (ez daude jasota II. eranskinean).

(b) Urbasan edo Andian aurreko urtean azienda sartu zutenak, baina larre azalerarik aitortzerik eskatu ez zutenak Nekazaritza Politika Erkideko laguntzak eskatzeko (aurrerantzean, NPE). Horiek ere ez dira ageri II. eranskinean.

(c) Urbasan edo Andian aurreko urtean azienda sartu zutenak, larre azalera aitortzeko eskatu zutenak, NPEko laguntzak eskatzeko (horiek agertzen dira II. eranskinean), eta kanpaina honetan bestelako larre azalera behar dutenak (handiagoa zein txikiagoa).

(d) 2021eko kanpainan Urbasa-Andia mendietan azienda sartu zuten titularren abeltzaintzako ustiategiak eskualdatu zaizkienak, kanpaina honetan aurreko ekitaldian ustiategi lagatzaileak erabilirikoa besteko larre azalera behar dutenak (handiagoa zein txikiagoa).

–Eskaera berriek eskualdaketa bidez jasotzen dituztenean 2021eko kanpainan Urbasa-Andia mendietan sartu ziren titularren abeltzaintzako ustiategiak, aurreko apartatuan adierazitako behin-behinekotasun berarekin, lagatzaileak ekitaldi horretan erabilitako larre azalera aitortuko zaie. Aitortza horrek ez du handituko guztizko azalera, ezta aurreko paragrafoan jasotako AzLUak ere.

Azienda Urbasa eta Andia mendietan 2022an sartu nahi dutenen ustiategietarako larre azalera kalkulatzeko, 2021ean sartu ez bazuten, kontuan hartuko da IV. eranskineko “Azalera aitortzeko Urbasa eta Andia ondare mendietan sartutako aziendaren zenbatespenaren jakinarazpena” dokumentuan, eskaera berri guztietan aurkeztu beharrekoak adierazitako AzLUak, bider 0,49. Baldin eta eskaera guztiei hori aitortu ondoren azalera nabarmen bada 286 hektarea baino handiagoa, horiek falta baitira aitortzeko, beste ratio bat kalkulatuko da eskaera guztietarako, eta, beraz, behin-behinean aitortutako azalerak aldatuk odira.

II. eranskinean ageri direnek, aurreko urtean erabilitako larre azalera bera behar badute 2022rako kanpainarako, ez dute aurkeztu beharko IV. eranskina. Gainerakoek aurkeztu behar dute aipatutako IV. eranskina, eta bertan adierazi beharko dute beren egoera eta eskatutako larreen azalera.

Kasu honetan, behin ratio berria kalkulatzeko eta eskatzaile bakoitzari dagokion azalera zehazteko prozeduraren instrukzioa eginik, eta ebazpen proposamena idatzi aurretik, eskatzaileei hamar eguneko epea emanen zaie alegazioak egin eta egokiak iruditzen zaizkien dokumentuak eta frogagiriak aurkez ditzaten.

Alegazio izapidea amaiturikoan eta hiru hileko epean, Ingurumeneko zuzendari nagusiak ebatziko du larre azaleraren behin betiko esleipena.

II. eranskinean jasotako zerrendan ageri ez direnek ez badute aurkeztu IV. eranskinean jasotako “Azalera aitortzeko Urbasa eta Andia ondare mendietan sartutako aziendaren zenbatespenaren jakinarazpena” dokumentua, ulertuko da uko egiten dietela ebazpen horretan jasotako baimenetik eratorritako eskubideei, eta galarazi egin ahalko da haien azienda Urbasa eta Andia mendietara sartzea.

II. eranskineko zerrenda horretan ageri direnek ez badute aurkeztu IV. eranskinean jasotako “Azalera aitortzeko Urbasa eta Andia ondare mendietan sartutako aziendaren zenbatespenaren jakinarazpena” dokumentua, ulertuko da soilik behar dutela aipaturiko zerrendan jasotako azalera, eta behin-behinean aitorturiko azalera baino gehiago behar duten haien abelburuak Urbasa eta Andia mendietara sartzea galarazten ahalko da. Aipaturiko IV. eranskin hori aurkeztu ez denez, kanpaina honetarako behin betiko esleitutako azaleratzat joko da.

2.–Azienda mendietan egiaz sartu aurreko jakinarazpena:

–IV. eranskinean jasotako “Azalera aitortzeko Urbasa eta Andia ondare mendietan sartutako aziendaren zenbatespenaren jakinarazpena” dokumentuan, baimenduak adierazi beharko du bere jabetzako zer azienda sartu nahi duen Urbasa-Andian 2022ko kanpainan, azienda kopurua espezieka eta adin tarteka zehaztuta, bai eta Urbasa eta Andia mendietan adjudikatzea eskatzen duen larre azalera garbi maximoa ere, hektareatan emana. Adierazpen horretan ez da jasoko sei hiletik gorako zezenik, ezin baitira mendietara igo, sexu transmisioko gaixotasunak direla eta, 140/2021 Foru Arauari, abuztuaren 12koari, Landa Garapeneko eta Ingurumeneko kontseilariarenari, jarraituz, zeinak osasun programa bat ezartzen duen Urbasa eta Andimendiko larreak erabiltzen dituzten abeltzaintzako establezimenduentzat.

Aipatutako IV. eranskina Landa Garapeneko eta Ingurumeneko Departamentuan aurkeztuko da, ebazpena Nafarroako Aldizkari Ofizialean argitaratu eta hurrengo 10 egunetan.

Dokumentu hori aurkeztetik salbuetsirik dauden abeltzain bakarrak dira II. eranskinean agertzen direnak eta aurreko kanpainan adjudikatu zitzaien azalera bera behar dutenak kanpaina honetarako. Gainerakoak behartuta daude aurkeztera, hala NPEko laguntzak eskatu nahi dituztenak nola aurkeztu nahi ez dituztenak.

Bosgarrena.–Onuradunen konpromisoak.

(1) Bete egin beharko dituzte Urbasa eta Andia Parke Naturala Erabili eta Kudeatzeko Planean abeltzaintza erabilerarako jasotakoak, baita Ingurumeneko Zuzendaritza Nagusiak ezarritakoak ere, hemen jasotako baldintzetan ageri direnak.

(2) Eskatzen zaizkien abeltzaintzako ikuskapenak erraztu eta baimendu beharko dituzte, eta lagundu egin beharko dute.

(3) Dagozkion nekazaritzako garraio gidak izapidetu beharko dituzte, garaiz eta behar bezala, nahitaez eraman beharko dituzte azienda mendira eramatean, eta Basozainei aurkeztu beharko diete, hurrengo 15 egunetan.

(4) Basozainei jakinarazi beharko diete, horretarako ezarritako bitartekoen bidez, zehazki noiz sartuko den azienda, eta zenbat abelburu sartuko den, gutxienez hiru egun lehenago.

(5) Sartu beharreko azienda desparasitatu beharko dute mendietan sartu aitzin.

(6) Basozainei jakinaraziko zaie osasun instalazioak edo azienda maneiatzekoak erabiliko direla, gutxienez 48 ordu lehenago.

(7) Azienda ez da sartuko apirilaren 15a baino lehen, eta beranduenez abenduaren 15ean aterako da.

(8) Basozainei jakinarazi beharko zaie azienda parketik aterako dela, irten baino astebete lehenagotik irten eta astebete beranduagora arte.

(9) Azienda Urbasa eta Andia mendietan 2022an sartu nahi dutenek, aurretik inoiz egin ez badute, Basozainei edo Ingurumeneko Departamentuari eskaera eginez (Baso Plangintza eta Ingurumen Hezkuntzako Atala), azienda igotzeko jakinarazpenarekin batera indarrean dagoen NANa/IFK aurkeztu beharko dute, eta foru auzotasun nafarra dokumentuz frogatu beharko dute. Dokumentazio hori aurrez aurre aurkezten ahalko da, otsailaren 15etik apirilaren 13ra (ordutegia: 9:30-14:00), Abeltzaintzako Eskualdeko Bulegoetan, Irurtzunen (astearteak) edo Lizarran (ostegunak). Apirilaren 15etik aurrera, eskaerak soilik jasoko dira erregistroan eta EKPZn ezarritako prozeduraren arabera.

Horren inguruko edozein argibide hemen eskatu ahalko da:

NIK (aipaturiko ordutegian), helbide elektroniko honetan: sirigoya@gan-nik.es, edo 699964905, 629260209 eta 948020722 telefonoetan.

Basozainak, Lizarra (aipaturiko ordutegian), edo 608417635 eta 948554824 telefonoetan.

(10) Azienda mendietara sartzeko eta handik ateratzeko jakinarazpenak, eranskin honen 4. eta 8. baldintzek aipatzen dituztenak, Basozainei bidaliko zaizkie, honela: SMS bat edo Whatsapp mezu bat bidaliz 608417635 (Basozainak) eta 629260209 (NIK teknikaria) telefonoetara. Azienda ez da mendietara igotzen ahalko parkeko langileek jakinarazpena jaso dutela berretsi artean.

(11) Zirkulazio txartel zaharrak kentzea, gidak aurkeztea eta 2022ko txartel berriak ematea asteazkenean egin ahalko dira: [a] Guardetxean apirilaren 15etik ekainaren 15era (ordutegia: 11:00-13:00) eta [b] Lizarragako tuneleko aparkalekuan (ordutegia: 13:00-14:00).

(12) Baldintza hauek aipatzen duten dokumentazioa goian ageri den eran ez beste batean aurkeztu bada, Administrazio Publikoen Administrazio Prozedura Erkideari buruzko urriaren 11eko 39/2015 Legearen 16. artikuluan jasotako edozein bitartekoren bidez, dokumentazioa aurkeztu izanaren gordekina aurkeztu beharko zaie Basozainei, eskatzen dutenean.

Seigarrena.–Baldintzak ez betetzearen erregimena eta dagozkion zehapenak.

Baldintzak hauek ez betetzea da basoa baimenik gabe erabiltzea, eta baimenik gabe erabiltzea jabari publikoko ondasunak; horren ondorioz dagokion zehapen prozedura ireki daiteke, eta, haren bidez, besteak beste, diruzko isunak ezar daitezke, baita arau-hausleari zehapenaren ebazpenak ezarririko aldirako baimenen edo emakiden titular izateko desgaikuntza ere, hala badagokio.

II. ERANSKINA

2021eko kanpainarako Urbasa eta Andia ondare mendietako erabilera erkideko larreen azalera aitortu zaienen behin-behineko zerrenda

Prozesu honi jarraitu zaio behin-behineko esleipena egiteko:

1. Nekazaritzako Informazio Sistemen Bulegoari galdetu zaio zein den Urbasa eta Andia mendietako larreen azalera garbia, eta zenbatetsi da 6.453,01 hektarea eskuragarri daudela, baina 2021ean 6.167,01 erabili zirela eta, beraz, 286 daudela eskuragarri eskaera berrietarako.

2. Ezagutzen da guztira zenbat AzLU igo ziren benetan Urbasa-Andia mendietara aurreko kanpainan (12.585,73). AzLUko ratioa kalkulatzeko, Urbasa-Andiaren azalera garbitik 350 hektarea kendu dira (adjudikazio berrietarako gordeak), eta azalera hori zatitu da AzLU kopuru jakin batekin; hain zuzen ere, 2021eko kanpainan Urbasa-Andia mendietan sartu ziren AzLU kopuruarekin, titularrek egindako NPEko laguntza eskaera bakarrari jarraikiz. Ratio hori aplikatuko da eskaera berriei esleitu beharreko azalera kalkulatzeko, salbu eta mendietan sartu nahi dituzten AzLUak tarteko onuradun bakoitzari esleitu beharreko azalera murriztu behar bada.

3. Aurreko kanpainan esleituriko azalera zehaztu da Baso eta Ehiza Zerbitzuak jakinarazi ondoren zenbat abeltzainek igo zuten azienda egiaz Urbasa eta Andia mendietara aurreko kanpainan, eta azienda igo ez zutenena kanpo utzi da, Baso eta Ehiza Zerbitzuko zuzendariaren otsailaren 15eko 88/2022 Ebazpenean.

AURKEZTU BEHARREKO DOKUMENTAZIOA

III. eranskina.–2022an azienda Urbasa eta Andimendira igotzearen jakinarazpena

IV. eranskina.–“Azalera aitortzeko Urbasa eta Andia ondare mendietan sartutako aziendaren zenbatespenaren jakinarazpena”.

Deskargatu III. eta IV. eranskinak (DOC).

Iragarkiaren kodea: F2205988