1. NAFARROAKO FORU KOMUNITATEA
1.7. BESTELAKOAK
175/2021 EBAZPENA, uztailaren 30ekoa, Ingurumeneko zuzendari nagusiak emana; honen bidez onesten da hondakinen prebentziorako eta ekonomia zirkularra sustatzeko bulegoaren jarduerak aurrera eramateko esparru hitzarmena.
Hondakinen Prebentziorako eta Ekonomia Zirkularra Sustatzeko Bulegoa, Nafarroako Hondakinen Planaren esparruan sortzen da, Plan horretan aurreikusitako ekintzen dinamizatzaile, aholkulari eta kudeatzaile izateko helburuarekin, hondakinen prebentzioa eta ekonomia zirkularra sustatzeko.
Hondakinei eta haien Fiskalitateari buruzko ekainaren 18ko 14/2018 Foru Legearen bidez, “Hondakinen Prebentziorako eta Ekonomia Zirkularra Sustatzeko Bulegoa sortzen da, sarean izaera birtuala izanen duena. Nafarroako Hondakinen Planean aurreikusitako ekintzen dinamizatzaile, aholkulari eta kudeatzaile gisa arituko da, hondakinen prebentzioa eta ekonomia zirkularra sustatzeko”. Haren 18. artikuluan ezartzen da bulegoaren helburua dela Nafarroako Hondakinen Plan indardunean prebentziorako ezarritako helburuak betetzea. Horrez gain, artikulu horren beraren arabera, bulegoaren jardueretan, Nafarroako Gobernuaz gainera, bulegoaren koordinatzailea eta arduraduna izanen baita, Nafarroako Hondakinen Erakunde Publikoak, toki entitateek eta hondakinen kudeatzaileek parte hartuko dute.
Nafarroako Hondakinen Erakunde Publikoaren parte-hartzea, artean eratu gabeko erakundea izanik, Nafarroako Hondakinen Partzuergoaren eta Iruñerriko Mankomunitatearen bitartez gauzatuko da. Toki entitateen ordezkaritza Nafarroako Udal eta Kontzejuen Federazioak eramanen du, eta azkenik, Nafarroako Enpresaburuen Konfederazioak egikarituko du hondakin kudeatzaileen ordezkaritza.
Nafarroako Udal eta Kontzejuen Federazioaren eta Nafarroako Enpresaburuen Konfederazioaren kasuan, etorkizunean bestelako eskumen edo jarduketak zehazteko aukera ukatu gabe, haien eginkizuna izanen da zabaltzea, ordezkatzen dituzten erakunde eta pertsonen artean, Hitzarmen honen berri eta esparru honetan jarduerak proposatzeko aukeraren berri, dagokien aurrekontua aurkeztuta.
Koordinazioaren eginkizuna hondakinen arloko eskumenak dituen Nafarroako Foru Komunitateko Administrazioaren organoari dagokio. Beraz, Landa Garapeneko eta Ingurumeneko Departamentuaren Ingurumeneko Zuzendaritza Nagusiak beteko du Hondakinen Prebentziorako eta Ekonomia Zirkularra Sustatzeko Bulegoa zuzentzeko eta koordinatzeko lana, Ekonomia Zirkularraren eta Klima Aldaketaren Zerbitzuan integratutako Hondakinen Sekzioaren bidez.
Azkenik, sinatzaileen interes komuna da jarduteko protokolo komun bat ezartzea, Hondakinen Prebentziorako eta Ekonomia Zirkularra Sustatzeko Bulegoari eraginkortasun handiagoa emanez bere eginkizunak betetzeko. Era berean, jarduerak bikoiztea saihestu nahi da Hitzarmena sinatzen dutenen artean, baliabide ekonomikoen erabilera efizienteagoa, eta eraginkortasun handiagoz betetzea Hondakinen Prebentziorako eta Ekonomia Zirkularra Sustatzeko Bulegoaren eta Nafarroako Hondakinen 2017-2027 Planaren helburuak.
Hitzarmen honen helburua da Nafarroako Hondakinen 2017-2027 Planean hondakinen prebentzioari buruz eta ekonomia zirkularra sustatzeari buruz aurreikusten diren ekintzak koordinatzea gai horietan inplikatutako eragileekin; modu koordinatuan lan egitea administrazio publiko eta erakunde pribatu guztiekin, Hondakinei eta Fiskalitateari buruzko ekainaren 18ko 14/2018 Foru Legean Hondakinen Prebentziorako eta Ekonomia Zirkularra Sustatzeko Bulegoarentzat aurreikusitako eginkizunetan; eta sustatzea, dinamizatzea eta aholku ematea, hondakinen prebentzioa eta ekonomia zirkularra sustatzeari buruz, Bulegoko kide direnen intereseko gaietan.
Hitzarmen honek ez dakar berekin inolako betebehar ekonomikorik, sinatzaileen konpromisoa delako Hitzarmena sinatu duten erakundeek proposatutako ekintzak aurrera eramatea.
Amaitzeko, Hitzarmenaren araubide juridikoari dagokionez, adierazi behar da betetzen dituela Nafarroako Foru Komunitateko Administrazioari buruzko martxoaren 11ko 11/2019 Foru Legean, eta Sektore Publikoaren Araubide Juridikoari buruzko urriaren 1eko 40/2015 Legean, ezarritako baldintzak; izan ere, ez da asmoen adierazpen hutsa, ez du xede kontratu publikoei dagokien prestaziorik, ez dakar Foru Komunitateko Administrazioaren eskumenen lagapenik, berau sinatzeak onura publikoko jarduerak egiten laguntzen du, ez dakar finantzazio konpromisorik Foru Komunitateko Administrazioarentzat, eta finantza aldetik jasangarria da, inongo gasturik eragiten ez duelako; azkenik, ez du dirulaguntzarik bideratzen, eta ez du eskumenik delegatzen toki entitateetan.
Adierazitakoarekin bat, Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 32. artikuluak eta Landa Garapeneko eta Ingurumeneko Departamentuaren egitura organikoa onesten duen urriaren 23ko 258/2019 Foru Dekretuak ematen dizkidaten eskudantziak erabiliz,
EBAZTEN DUT:
1. Hondakinen Prebentziorako eta Ekonomia Zirkularra Sustatzeko Bulegoaren jardueretarako esparru hitzarmena onestea; hari dagokion testua ebazpen honen eranskin gisa jaso da.
2. Ebazpen hau Nafarroako Hondakinen Partzuergoari, Iruñerriko Mankomunitateari, Nafarroako Udal eta Kontzejuen Federazioari eta Nafarroako Enpresaburuen Konfederazioari jakinaraztea, eta ohartaraztea honek ez duela administrazio bidea agortzen, eta honen kontra gora jotzeko errekurtsoa jartzen ahal dela, Landa Garapen eta Ingurumeneko kontseilariari zuzendua, jakinarazpenaren biharamunetik aurrera, hilabeteko epean. Administrazio Publikoek deialdi honen kontra administrazioarekiko auzi errekurtsoa jartzen ahalko dute, Nafarroako Justizia Auzitegi Nagusiko Administrazioarekiko Auzien Salari zuzendua, bi hilabeteko epean, ebazpena jakinarazi eta biharamunetik hasita. Horrek ez du ukatzen Nafarroako Gobernuan aldez aurreko errekerimendua egiteko aukera, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan aurreikusiriko moduan eta epean.
3. 15 egun baliodunen epean hitzarmenaren eta ebazpen honen kopia igortzea Hitzarmen eta Akordioen Erregistrora.
4. Ebazpen hau Nafarroako Aldizkari Ofizialean argitaratzea.
5. Ebazpen honen berri ematea Ekonomia Zirkularraren eta Klima Aldaketaren Zerbitzuari.
Iruñean, 2021eko uztailaren 30ean.–Ingurumeneko zuzendari nagusia, Pablo Muñoz Trigo.
ESPARRU HITZARMENA
Hondakinen Prebentziorako eta Ekonomia Zirkularra Sustatzeko Bulegoaren jarduerak aurrera eramateko
Iruñean,
BILDU DIRA:
Alde batetik, Pablo Muñoz Trigo, Nafarroako Landa Garapeneko eta Ingurumeneko Departamentuko Ingurumeneko zuzendari nagusia.
Beste alde batetik, Fernando Mendoza, Nafarroako Hondakinen Partzuergoa ordezkaria,
Alfonso Amorena, Iruñerriko Mankomunitatea ordezkaria,
Juan Carlos Castillo, Nafarroako Udal eta Kontzejuen Federazioko ordezkaria eta
Carlos Fernández Valdivielso, Nafarroako Enpresaburuen Konfederazioaren ordezkaria.
ADIERAZI DUTE:
Hondakinen Prebentziorako eta Ekonomia Zirkularra Sustatzeko Bulegoa Nafarroako Hondakinen 2017-2027 Planaren esparruan sortzen da, Plan horretan aurreikusitako ekintzen dinamizatzaile, aholkulari eta kudeatzaile izateko helburuarekin, hondakinen prebentzioa eta ekonomia zirkularra sustatzeko.
Hondakinei eta haien Fiskalitateari buruzko 14/2018 Foru Legearen bidez, “Hondakinen Prebentziorako eta Ekonomia Zirkularra Sustatzeko Bulegoa sortzen da, sarean izaera birtuala izanen duena. Nafarroako Hondakinen Planean aurreikusitako ekintzen dinamizatzaile, aholkulari eta kudeatzaile gisa arituko da, hondakinen prebentzioa eta ekonomia zirkularra sustatzeko”. Haren 18. artikuluan ezartzen da bulegoaren helburua dela Nafarroako Hondakinen Plan indardunean prebentziorako ezarritako helburuak betetzea. Horrez gain, artikulu horren beraren arabera, bulegoaren jardueretan, Nafarroako Gobernuaz gainera, bulegoaren koordinatzailea eta arduraduna izanen baita, Nafarroako Hondakinen Erakunde Publikoak, toki entitateek eta hondakinen kudeatzaileek parte hartuko dute.
Nafarroako Hondakinen Erakunde Publikoaren parte-hartzea, artean eratu gabeko erakundea izanik, Nafarroako Hondakinen Partzuergoaren eta Iruñerriko Mankomunitatearen bitartez gauzatuko da. Toki entitateen ordezkaritza Nafarroako Udal eta Kontzejuen Federazioak (aurrerantzean NUKF) eramanen du, eta azkenik, Nafarroako Enpresaburuen Konfederazioak (aurrerantzean NEK) egikarituko du hondakin kudeatzaileen ordezkaritza.
NUKFren eta NEKren kasuan, etorkizunean bestelako eskumen edo jarduketak zehazteko aukera ukatu gabe, haien eginkizuna izanen da zabaltzea, ordezkatzen dituzten erakunde eta pertsonen artean, Hitzarmen honen berri eta esparru honetan jarduerak proposatzeko aukeraren berri, dagokien aurrekontua aurkeztuta.
Koordinazioaren eginkizuna hondakinen arloko eskumenak dituen Nafarroako Foru Komunitateko Administrazioaren organoari dagokio. Beraz, Landa Garapeneko eta Ingurumeneko Departamentuaren Ingurumen Zuzendaritza Nagusiak beteko du Hondakinen Prebentziorako eta Ekonomia Zirkularra Sustatzeko Bulegoa zuzentzeko eta koordinatzeko lana, Ekonomia Zirkularraren eta Klima Aldaketaren Zerbitzuan integratutako Hondakinen Sekzioaren bidez.
Azkenik, sinatzaileen interes komuna da jarduteko protokolo komun bat ezartzea, Hondakinen Prebentziorako eta Ekonomia Zirkularra Sustatzeko Bulegoari eraginkortasun handiagoa emanez bere eginkizunak betetzeko. Era berean, Hitzarmena sinatzen dutenen jarduerak bikoiztea saihestu nahi da, baliabide ekonomikoen erabilera efizienteagoa, eta eraginkortasun handiagoz betetzea Hondakinen Prebentziorako eta Ekonomia Zirkularra Sustatzeko Bulegoaren eta Nafarroako Hondakinen 2017-2027 Planaren helburuak.
KLAUSULAK
Lehena.–Hitzarmenaren xedea.
Hitzarmen honen xedea da funtzionamendu protokolo bat ezartzea, Hondakinei eta haien Fiskalitateari buruzko 14/2018 Foru Legearen bidez Hondakinen Prebentziorako eta Ekonomia Zirkularra Sustatzeko Bulegoari esleitu zaizkion eginkizunei dagozkien jarduerak aurrera eramateko.
Bigarrena.–Zuzendaritza organoa.
Hitzarmen honen helburuak lortzeko zuzendaritza organo bat sortzea erabaki da, hartan ordezkaritza izanen dutela Hitzarmen hau sinatu duten guztiek.
Honako hauek osatuko dute zuzendaritza organoa:
–Nafarroako Gobernuko Hondakinen Ataleko ordezkari bat (koordinatzailea).
–Nafarroako Hondakinen Partzuergoaren ordezkari bat.
–Iruñerriko Mankomunitatearen ordezkari bat.
–Toki entitateen ordezkari bat, NUKFek izendatua, eta
–Hondakin kudeatzaileen ordezkari bat, NEKek izendatua.
Hirugarrena.–Zuzendaritza organoaren funtzionamendua.
Urte bakoitzeko urtarrilean, hitzarmen hau sinatu dutenek igorriko dute, Ingurumeneko Zuzendaritza Nagusira, urte horretan aurrera eraman nahi dituzten jardueren zerrenda (hitzarmen honen xedeari dagozkionak). Zehazki, NEK eta NUKFren kasuan, monitorizatu, jaso eta jakinaraziko dituzte beraiek ordezkatzen dituzten erakundeek proposatzen dituzten jarduerak.
Jasotako proposamen guztiekin, Ingurumeneko Zuzendaritza Nagusiak bilduko du urteko jardueren proposamena, dokumentu batean; bertan zehaztuko dira jarduerak, nork proposatu dituen eta haien aurrekontu estimatua, eta Ingurumeneko Zuzendaritza Nagusiaren beraren jarduerak ere hor jasoko dira (laugarren apartatuan aipatutako jardueretatik). Urteko proposamen hori otsailaren 15a baino lehen igorriko zaie hitzarmena sinatu duten guztiei.
Proposamena igorri eta hurrengo hamabost eguneko epean, Ingurumeneko Zuzendaritza Nagusiak hitzarmenaren zuzendaritza organoa biltzeko deia eginen du. Hartan azaldu eta komentatuko dira urteko proposamenean jasotako ekintzak, eta parte-hartzaileek egiten ahal dituzten iradokizunak solastuko dira. Iradokizun horiek proposatutako jarduerak aldarazten badituzte, urteko proposamenean jasoko dira, eta jardueren urteko plana osatuko da. Eta aldaketarik ez badago, urteko jardueren proposamena automatikoki bihurtuko da urteko jardueren plana. Bilera bukatu ondoren, urteko jardueren txostena sinatzaile guztiei igorriko zaie, 5 eguneko epea emanez akatsak zuzentzeko.
Beste alde batetik, urte bakoitzeko apirileko azken eguna baino lehen, sinatzaile guztiek zuzendaritza organoari igorriko diote aurreko urtean egin dituzten jardueren txostena, haien balorazio teknikoa eta ekonomikoa jasoz. Datu horiez elikatuko da Hondakinen 2017-2027 Planaren Jarraipenerako datu basea. Txostenak jaso ondoren, Ingurumeneko Zuzendaritza Nagusiak jardueren urteko memoria prestatuko du, sinatzaileek aurrera eraman dituzten jarduerak bilduta, eta zuzendaritza organoaren urteko batzarra biltzeko eguna zehaztuko du (urte bakoitzeko lehen seihilekoan). Han komentatuko da urteko memoria, eta akta jasoko da, haien ondorengo jarraipena egiteko eta hurrengo urteetan egiteko adostu diren jarduerak aztertzeko. Urteko bilera hori indarrean den Nafarroako Hondakinen Planaren Jarraipen Batzordearen osoko bilkura egiten den egun berean egin daiteke.
Azkenik, sinatzaileetako batek eskatuz gero, hitzarmenaren zuzendaritza organoaren koordinazio edo lan bilera bat antolatzeko aukera ere zabalik dago.
Laugarrena.–Izaera orokorreko eta koordinazioko jarduerak.
Hondakinei eta haien Fiskalitateari buruzko 14/2018 Foru Legean Hondakinen Prebentziorako eta Ekonomia Zirkularra Sustatzeko Bulegoari esleitzen zaizkion eginkizunak betetzeko diren ondorengo jarduera hauek, hitzarmen honetan adostu denez, Ingurumeneko Zuzendaritza Nagusiak eramanen ditu aurrera, berak ezarriko dituen funtsen kargura, aipatutako Foru Legearen 18.5 artikuluan ezartzen zaion koordinazio betebeharrari dagozkiola eta gizarte osoarentzat betetzen direla aintzat hartuta:
–Aliantzak bilatzea hondakinen kudeaketan inplikaturiko eragileekin eta lankidetzan aritzea Nafarroako Hondakinen Erakunde Publikoarekin.
–Hondakinei buruzko lan mahaiak sortzea eta dinamizatzea.
–Hondakinen Plan indardunari egindako jarraipenaren zabalkundea eta komunikazioa.
–Hondakinei eta ekonomia zirkularrari buruzko kontsulta orokorrak bideratzea.
–Hondakinen Prebentziorako eta Ekonomia Zirkularra Bultzatzeko Bulegoaren web-orriaren mantenua.
–Hitzarmena sinatu dutenek aurrera eramandako ekintzen urteko memoria prestatzea.
Bosgarrena.–Alderdien betebeharrak.
Hitzarmen hau sinatu dutenek konpromisoa hartzen dute zuzendaritza organoak prestatu eta alderdi guztiek onartutako urteko jardueren planean jasotako ekintzak aurrera eramateko, eta kide bakoitzak bere funtsak erabiltzeko konpromisoa ere bai, planteatu dituen ekintzak aurrera eramateko.
Seigarrena.–Hitzarmenaren iraupena.
Hitzarmen honek indarra izanen du Nafarroako Aldizkari Ofizialean argitaratzen den egunetik aurrera, lau urte bete arte. Hitzarmena berritzen ahalko da isilbidez, urteko epeetarako, alderdi bakar batek ere ez badu hura ez amaitzeko gogorik erakusten, berritzeko egunaren aurretik.
Zazpigarrena.–Zabalkundea eta publizitatea.
Landa Garapeneko eta Ingurumeneko Departamentuak, Hondakinen Prebentziorako eta Ekonomia Zirkularra Bultzatzeko Bulegoaren bitartez, konpromisoa hartzen du Hitzarmen honen xedea eta lortutako emaitzak ezagutarazteko, egokiena iruditzen zaion moduan.
Zortzigarrena.–Konfidentzialtasuna.
Hitzarmen hau modu egokian garatzeko alderdiek ematen ahal duten informazio guztia, publikoa ez bada, konfidentziala eta eman duenaren jabetzakoa joko da, eta ezin izanen da inolaz ere erabili, dagokion alderdiaren onespenik gabe.
Hitzarmen hau betetzeko eginkizunetan, Datu pertsonalen babesari eta eskubide digitalen bermeari buruzko 3/2018 Lege Organikoan datu pertsonalen babesaren inguruan ezarritako xedapenak betetzeko konpromisoa hartzen dute alderdiek.
Bederatzigarrena.–Hitzarmena ez betetzea.
Hartutako konpromisoak betetzen ez baditu sinatzaileren batek, justifikazioko txosten bat prestatu beharko du, konpromisoa ez betetzera eraman duten arrazoiak eta zioak azalduz. Txosten hori Hondakinen Prebentziorako eta Ekonomia Zirkularra Bultzatzeko Bulegoaren urteko memorian jasoko da, eta haren azalpena emanen da Nafarroako Hondakinen 2017-2027 Planaren Jarraipen Batzordearen osoko bilkuran.
Konpromisoa betetzen ez duenak aipatutako txostena egiten ez badu, Ingurumeneko Zuzendaritza Nagusiak prestatuko du, zuzendaritza organoaren urteko memorian jaso dadin. Era berean, Bulegoak huts egileari idatziz eskatuko dio hurrengo urtean aurrera eramateko huts egindako ekintzak, edo bestelakoak, ezarritako helburuak betetzeko.
Hamargarrena.–Izaera eta jurisdikzioa.
Hitzarmen hau izaeraz administratiboa da, eta administrazioarekiko auzien jurisdikzioari dagozkio sor daitezkeen eztabaidak, betiere adostasunez konpontzen ez bada Hitzarmen honen garapenean sor litekeen edozein desadostasun.
Eta ados daudela erakusteko, bi aldeek hitzarmen honen bi ale sinatu dituzte.
Iragarkiaren kodea: F2202946
