1. NAFARROAKO FORU KOMUNITATEA
1.7. BESTELAKOAK
13/2022 EBAZPENA, otsailaren 14koa, Industriaren, Energiaren eta S3 Proiektu Estrategikoen zuzendari nagusiak emana, Berbintzana, Faltzes, Larraga, Miranda Arga, Erriberri eta Tafallako udal mugarteetan energia elektrikoa ekoizteko instalazioak husteko goi tentsioko linea elektrikoaren onura publikokoa zehazki deklaratzen duena.
Industriaren, Energiaren eta S3 Proiektu Estrategikoen zuzendari nagusiaren urtarrilaren 19ko 2/2021 Ebazpenaren bidez, Agrowind Navarra 2013 SLri aurretiazko administrazio baimena eta eraikitzeko administrazio baimena eman zitzaizkion Jenáriz, Linte eta San Marcos II izeneko haize-parkeetan ekoitzitako energia husteko 132 kV-ko goi tentsioko linearako, Berbintzana, Faltzes, Larraga, Miranda Arga, Erriberri eta Tafallako udal mugarteetan (SAT111110 espedientea).
2021eko martxoaren 12an, Agrowind Navarra 2013 SLk azpiegitura hauetarako onura publikoa zehazki deklaratzea eskatu zuen: Jenáriz, Linte (1. fasea) eta San Marcos II haize-parkeak eta beren ebakuazio azpiegiturak (132/220 kV-ko “SET Olite” transformazio azpiestazioa eta 132 kV-ko linea “SET Olite” azpiestazioraino).
Abenduaren 1eko 1955/2000 Errege Dekretuaren 144. artikuluan ezarritakoaren ondorioetarako, aipatu eskaera jendaurrean jarri zen hogeita hamar egunez, iragarkia argitaratu baitzen 2021eko 77. Nafarroako Aldizkari Ofizialean, apirilaren 8koan, eta Diario de Noticias egunkarian, 2021eko apirilaren 13an. Era berean, Miranda Arga, Berbintzana, Larraga, Lerin, Erriberri, Faltzes eta Tafallako udalei ere bidali zitzaien iragarkia, jendaurrean jar zezaten ediktuen taulan.
Jendaurreko aldia bukatuta, honako txosten eta alegazio hauek jaso dira, eta, abenduaren 1eko 1955/2000 Errege Dekretuaren arabera, Agrowind Navarra 2013 SLri igorri zitzaizkion:
1.–Faltzesko Udala, 2021eko abuztuaren 3koa.
2.–Larragako Udala, 2021eko maiatzaren 18koa.
3.–Zangozerriko Ekologistak Martxan/Ongaiz elkartea, 2021eko maiatzaren 20koa.
4.–Nafarroako Ekologistak Martxan elkartea, 2021eko maiatzaren 20koa.
5.–María Dolores Bariáin Loyola andrea eta Rafael Tamburri Bariáin jauna.
Aurreko dokumentuen edukia eta haiei emandako erantzuna I. eranskinean jaso dira.
Txosten eta alegazio horien edukia eta sustatzaileak horiei emandako erantzuna I. eranskinean jaso dira.
Abenduaren 1eko 1955/2000 Errege Dekretuaren 151. artikuluan adierazten denez, “Edozein unetan eta libreki, onura publikoaren deklarazioaren eskatzaileak beharrezkoak diren ondasun eta eskubideak erostea adostu dezake horien titularrekin. Instalazioaren onura publikoa deklaratzen denean, akordio horrek Nahitaezko Desjabetzeari buruzko Legearen 24. artikuluan aurreikusitako izaera eta ondorioak hartuko ditu, eta, beraz, horrek desjabetze espedientearen amaiera ekarriko du. Kasu horietan, onura publikoaren deklarazioaren onuradunak eskatzen ahalko dio agintari eskudunari Nahitaezko Desjabetzeari buruzko Erregelamenduaren 59. artikuluan ezarritako mekanismoa aplikatzeko”.
Aurkeztutako dokumentazioa ikusita, eta Nafarroan haize-parkeak baimentzea arautzen duen maiatzaren 8ko 56/2019 Foru Dekretuan xedatutakoari jarraikiz, Industria Antolamenduaren, Azpiegitura Energetikoen eta Meatzeen Zerbitzuak proposatu du instalazioaren onura publikoa zehazki deklaratzea eta Agrowind Navarra 2013 SL enpresa aitortzea onuradun gisa desjabetze-espedientean.
Adierazitakoarekin bat, eta Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 32. artikuluak ematen dizkidan eskudantziak erabiliz,
EBAZTEN DUT:
1.–Instalazio horren onura publikoa zehazki deklaratzea, bat etorriz Sektore Elektrikoari buruzko abenduaren 26ko 24/2013 Legearen 54., 55. eta 56. artikuluetan eta lege hori garatzen duen abenduaren 1eko 1955/2000 Errege Dekretuaren 148. eta 149. artikuluetan ezarritakoarekin, eta Nafarroako Toki Administrazioari buruzko uztailaren 2ko 6/1990 Foru Legearen 140.4 artikuluan aipatutako ondorioetarako.
2.–Agrowind Navarra 2013 SL enpresari onuradun izaera aitortzea desjabetze espedientean.
3.–Aurkeztutako alegazioak ezestea.
4.–Ebazpen hau Industria Antolamenduaren, Azpiegitura Energetikoen eta Meatzeen Zerbitzura igortzea, behar diren ondorioak izan ditzan.
5.–Ebazpen hau Nafarroako Aldizkari Ofizialean argitaratzea, orok jakin dezan.
6.–Ebazpen hau jakinaraztea Agrowind Navarra 2013 SLri, Zangozerriko Ekologistak Martxan/Ongaiz elkarteari, Nafarroako Ekologistak Martxan elkarteari, María Dolores Bariáin Loyola andreari, Rafael Tamburri Bariáin jaunari eta eraginpeko ondasun eta eskubideen titularrei, eta ohartaraztea ebazpen honen aurka, zeinak ez baitu administrazio bidea amaitzen, bidezkoa dela gora jotzeko errekurtsoa jartzea, Garapen Ekonomiko eta Enpresarialeko kontseilariari zuzendua, hilabeteko epean, jakinarazi eta biharamunetik hasita, betiere espediente zenbakia adierazita.
7.–Ebazpen hau jakinaraztea Berbintzanako Udalari, Faltzesko Udalari, Larragako Udalari, Miranda Argako Udalari, Erriberriko Udalari eta Tafallako Udalari, eta ohartaraztea honen kontra administrazioarekiko auzi-errekurtsoa jarri ahal dela, eskumena duen jurisdikzioari zuzendua, ebazpena argitaratu eta biharamunetik hasita bi hilabeteko epean, alde batera utzi gabe Nafarroako Gobernuari aldez aurreko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarritako moduan eta epean.
Iruñean, 2022ko otsailaren 14an.–Industriaren, Energiaren eta S3 Proiektu Estrategikoen zuzendari nagusia, Uxue Itoiz Mariñelarena.
I. ERANSKINA
Lehenengoa.–Faltzesko Udala.
Faltzesko Udalak, 2021eko abuztuaren 3an, 205/2021 espedienteari buruz emandako ebazpena igorri du. Ebazpen horren bidez, udalbatza horren osoko bilkuraren erabakia jakinarazi zen, honako helburu hauekin: (i) hasiera batez onestea “Jenariz”, “Linte” eta “San Marcos II” izeneko haize-parkeen proiektuetan sartutako herri-ondasunak desafektatzeko espedientea; (ii) desafektazio hori arautzen duen baldintzen plegua onestea; eta (iii) desafektazio espediente hori jendaurrean jartzea hilabete batez.
Erantzuna:
Informazio hori sustatzaileari bidali zaio, eta hark adierazi du igorritako ebazpenaren jakitun dela.
Bigarrena.–Larragako Udala.
Larragako Udalak, 2021eko maiatzaren 18ko alegazioetan, eskatu du idazkia aurkeztutzat hartzeko, argi utzita Larragako Udala Agrowind Navarra SLk sustatutako azpiegituren onura publikoa zehazki deklaratzeko tramitearen kontra dagoela erabat, hots, Jenáriz, Linte (1. fasea) eta San Marcos II haize-parkeei eta beren ebakuazio azpiegiturei dagokiena (132/220 kV-ko “SET Olite” transformazio azpiestazioa eta 132 kV-ko linea “SET Olite” azpiestazioraino). Eskatu du, orobat, idazkia tramitazio-bidean onartzea eta, ikusirik jendaurrean jarritako agirien arau mailako ez-betetze larriak, prozedura bertan behera utz dezala eta behar diren tramiteak has ditzala iraungitzeko bai “Nafarroako Proiektu Eolikoa” Udalez gaindiko Proiektu Sektoriala, bai sareko puntu batean sartzeko eta konektatzeko eskubidea.
Erantzuna:
Larragako Udalak egindako alegazioen edukia bat dator, funtsean, udalak berak jarritako administrazioarekiko auzi-errekurtsoan jasotako demandarekin, zeina, 463/2018 P.O. gisa, Nafarroako Justizia Auzitegi Nagusiko Administrazioarekiko Auzien Salak aztertu baitzuen, eta 218/2021 epaiaren bidez ebatzi 2021eko irailaren 2an. Epai horretan, alegatutako alderdiei buruzko erabaki judizialak jasotzen dira.
Horregatik guztiagatik, alegazio hau ezesten da.
Hirugarrena.–Zangozerriko Ekologistak Martxan/Ongaiz elkartea.
2021eko maiatzaren 20an, Zangozerriko Ekologistak Martxan/Ongaiz elkarteak alegazioak aurkeztu zituen, eta horien bidez adierazi zuen, oro har, jendaurrean jarritako haize-parke eta eguzki-parkeen proiektu berrien aurka eta haien ebakuazio-lineen aurka dagoela. Alegaziogileek adierazi duten bezala, sei zatitan egituratu dituzte beren alegazioak. Lehenengo hirurak baliagarriak dira jendaurrean jarritako proiektu guztietarako, azterketa orokor bat delako; laugarrenean eta bosgarrenean, beren alternatibak azaltzen dituzte. Azkenik, ingurumen erantzukizunari buruzko Legea aldatzeko eskatzen dute.
1.–Nafarroako egoera energetikoa.
2.–Proiektuen eraginak.
3.–Klima-aldaketaren ondorioak/ekarpena.
4.–Alternatibak: energia kontsumoa murriztea; efizientzia energetikoa; autokontsumoa; erregai fosilen ordez energia berriztagarriak erabiltzea.
5.–Lehendik dauden parkeak indartzea, proiektu berriak saihesteko.
6.–Ingurumen erantzukizunari buruzko Legea aldatzea.
Erantzuna:
Aurreko alegazioak ez dira jo behar Agrowind Navarra 2013 SLren proiektuen onura publikoa zehazki deklaratzeko tramiteari egindako alegaziotzat, baizik eta energia elektrikoa ekoizteko proiektuak, oro har, ezartzeari aurkeztutako alegaziotzat.
Nolanahi ere, eta zehazki proiektu horien inpaktuei dagokienez, esan daiteke jada ebaluatu direla ingurumen inpaktuaren adierazpenaren esparruan. Adierazpen hori Ingurumeneko eta Lurraldearen Antolamenduko Zuzendaritza Nagusiaren 2018ko ekainaren 14ko 400E/2018 Ebazpenaren bidez egin zen, eta geroago partzialki aldatu zen (haren baldintzetako bat zehazte aldera) irailaren 11ko 698E/2018 Ebazpenaren bidez.
Horregatik guztiagatik, alegazio hau ezesten da.
Laugarrena.–Nafarroako Ekologistak martxan elkartea.
2021eko maiatzaren 20an, Nafarroako Ekologistak Martxan elkarteak alegazioak aurkeztu zituen, eta horien bidez adierazi zuen, oro har, jendaurrean jarritako haize-parke eta eguzki-parkeen proiektu berrien aurka eta haien ebakuazio-lineen aurka dagoela.
Erantzuna:
Alegazio horiek eta “Zangozerriko Ekologistak Martxan/Ongaiz” elkarteak aurkeztutakoak antzekoak dira. Beraz, modu berean erantzun behar zaie.
Bosgarrena.–María Dolores Bariáin Loyola andrea eta Rafael Tamburri Bariáin jauna.
María Dolores Bariáin Loyola andreak eta Rafael Tamburri Bariáin jaunak, 2021eko ekainaren 22an, alegazioak aurkeztu zituzten, proiektuarekin ados ez zeudela adieraziz. Jarraian, haien alegazioak eta bakoitzari emandako erantzuna jasotzen dira.
1. alegazioa.–Proiektu horrekiko desadostasuna eta aurka agertzea.
Alegaziogileek adierazi dute ez daudela ados proiektuarekin, interes partikularra delako eta jabetza bat inbaditzen duelako behar bezala konpentsatu gabe.
Erantzuna:
Energia elektrikoa ekoizteko proiektuen erabilgarritasuna eta interes publikoa Sektore Elektrikoari buruzko abenduaren 26ko 24/2013 Legearen 54.1 artikuluan ezarritakoaren arabera esleitzen dira:
“Onura publikokotzat jotzen dira energia elektrikoa sortu, garraiatu eta banatzeko instalazio elektrikoak eta 250 kW-etik gorako potentzia duten ibilgailu elektrikoak kargatzeko estazioetako azpiegitura elektrikoak, horiek ezartzeko beharrezkoak diren ondasun eta eskubideak nahitaez desjabetzeko eta bide-zorra ezarri eta erabiltzeko ondorioetarako”.
Beraz, horrelako proiektuetarako oro har deklaratutako onura publikoa da hau, onura publikoa zehazki deklaratzearen bidez zehazten eta indibidualizatzen dena, eta horixe da, hain zuzen ere, aztergai dugun espedientearen jendaurreko informazio tramitearen xedea.
Horregatik guztiagatik, alegazio hau ezesten da.
2. eta 4. alegazioak.–Gehiegizko zortasuna eta goi tentsioko linea gehiegi finkan. Trazadura aldatzeko eskaera.
Jabeek finkak dituen zortasunak aipatzen dituzte, eta eskatzen dute ebakuazio-linearako proposatutako trazadura aldatzea eta ahalik eta gehiena lur publikoetan barna eramatea, dela bideetatik, errepideen jabariko eremuetatik, autobietatik eta trenbideetatik, horrela jabe partikularren lursail gutxiago ukitzeko”.
Erantzuna:
Alegazio horiei erantzuteko, komeni da adieraztea Agrowind Navarra 2013 SLk, proiektuen beste edozein sustatzailek bezala, ez duela proiektuak ebakuatzeko azpiegituren trazadura ezarri eragindako finka bakoitzaren titulartasunaren izaera kontuan hartuta; aitzitik, ikuspegi teknikotik, ingurumenekotik eta hirigintzakotik bideragarriak diren alternatibei erantzun die, eta babestutako ondasun juridikoetan eragin txikiena izan dezakeen aukera hautatu du.
Horregatik guztiagatik, alegazio horiek ezetsi behar dira.
3. eta 5. alegazioak.–Trazadurak lurzatietako floran eta faunan izanen duen eragin kaltegarria. Ingurumen inpaktuaren adierazpena.
Erantzuna:
Eraginpeko lurzatietan dagoen floraren eta faunaren gaineko kalte potentziala aztertu egin da ingurumen inpaktua ebaluatzeko prozedura egokian, eta kalte potentzial hori arintzeko neurri zuzentzaileak eta ingurumen jarraipeneko neurriak dagoeneko ezarriak ditu ingurumen organoak egin duen ingurumen inpaktuaren adierazpenean.
Jabeek aurkeztutako alegazioekin bat etorriz, Agrowind Navarra 2013 SLk sustatutako proiektuak ezartzeak “inpaktu kaltegarri zehaztugabea eraginen luke lurzatietako floran eta faunan”.
Adierazi beharra dago ezen, hain zuzen ere, inpaktu potentzial horren eragina ebaluatzeko, aztertzeko eta neurri zuzentzaileak behar bezala ezartzeko, ingurumen inpaktua ebaluatzeko prozedura bat egin dela, eta, horren ondorioz, ingurumen inpaktuaren aldeko adierazpena egin dela erreferentziako proiektuei dagokienez, Ingurumeneko eta Lurraldearen Antolamenduko Zuzendaritza Nagusiaren 2018ko ekainaren 14ko 400E/2018 Ebazpenaren bidez, zeina partzialki aldatu baitzen (haren baldintzetako bat zehazte aldera) irailaren 11ko 698E/2018 Ebazpenaren bidez.
Ingurumen inpaktuaren adierazpen hori txosten publiko bat da, eta, jabeek eskatuta, adierazten da 2018ko 151. Nafarroako Aldizkari Ofizialean (abuztuaren 6koan) eta 2018ko 193. Nafarroako Aldizkari Ofizialean (urriaren 4koan) argitaratu zela. Txosten horretan, erreferentziako proiektuen ingurumen eraginei buruzko azterketaren emaitzaz gain, neurri zuzentzaile eta ingurumen jarraipeneko neurri batzuk jasotzen dira (sustatzaileak aurkeztutako ingurumen inpaktuaren azterketan hasieran planteatutako neurri guztiez gain).
Ondorioz, ingurumen organo eskudunak aintzat hartu eta behar bezala aztertu ditu erreferentziako proiektuek ingurumenean izan ditzaketen ondorio kaltegarriak, eta egindako ingurumen inpaktuaren adierazpenean jaso dira, bai eta ondorio horiek arintzera edo aurrea hartzera bideratutako neurri zuzentzaileak eta ingurumen jarraipenekoak ere.
Horregatik guztiagatik, alegazio hau ezesten da.
6., 7. eta 8. alegazioak.–Proiektua gauzatu ondoren finkan egin daitezkeen jarduketei eta baldintzei dagokienez, baita ezarritako mugei dagokienez ere. Dagoen ureztatze-instalazioari eta drainatze-sistemari dagokienez. Nekazaritza-aprobetxamenduari eta eragindako finkaren kokapenari buruzkoa.
Azkenik, jabeek Agrowind Navarra 2013 SLren proiektuei egindako alegazioetan honako hau sartu dute: “Proiektua gauzatuz gero, berariaz adieraz diezagutela zein diren lurzatietan garatzen jarraitu ahal izanen diren jarduketak, eta fruta-arbolak, olibadiak, mahastiak, almendrondoak eta abar ezartzeko aukera dagoen”.
Horri dagokionez, Agrowind Navarra 2013 SLk adierazten du ez duela inolako interes partikularrik jabeek beren titulartasuneko finken barruan, eraginpean ez dauden azaleretan, egin ditzaketen jarduerak murrizteko, baina, nolanahi ere, begiratu beharko da jarduera horiek inola ere kaltetu edo aldatu ez dezaten proiektuen operazio eta funtzionamendu onena.
Bestalde, jabeek adierazi dute Agrowind Navarra 2013 SLk sustatutako proiektuek beren titulartasuneko finketan izanen duten eraginagatik ezarritako konpentsazioa ez dela egokia, arreta berezia jarriz ureztatze-instalazioetan eta drainatze-sistemetan. Bada, jabeen finketan eragindako balizko kalteengatiko kalte-ordaina nahitaezko desjabetze-espediente egokiaren ondorioz finkatzen den balio justuan gauzatuko da, hala badagokio eta lehen esan bezala; Nafarroako Desjabetze Epaimahaiak finkatu beharko du balio hori.
Azkenik, eta, bakar-bakarrik, informazio ondorioetarako, jabeek eskatuta, sustatzaileak adierazten du haien titulartasuneko finketan lurpetik eramanen diren ebakuazio-azpiegiturak 0,5-1 metro sakon joanen direla, gutxi gorabehera.
Horregatik guztiagatik, alegazio hau ezesten da.
9. alegazioa.–Zuinketaren beharrari dagokionez eta ukitutako ondasunak okupatu aurreko aktan jasotzeari dagokionez.
Alegaziogileek adierazi dutenez, “orain arte, eta lekuan bertan egiaztatu dugun bezala, eraginpeko azalera ez dago mugatuta lursailean bertan, eta, beraz, ezin da egiaztatu zer ondasun eta eskubideri eragiten ahal dieten”.
Horri dagokionez, adierazi behar da prozeduraren une honetan ez dela bidezkoa jabeek nahi duten mugaketa fisikoa egitea lekuan bertan. Horrela, finken presako okupazioa legeztatu arte (okupatu aurreko aktak egin ondoren) eta finkak desjabetzeko prozedura hasi arte, Agrowind Navarra 2013 SLk ez du zilegi izanen finketan sartzea gauzatzea eta eraginpeko eremuaren mugaketa fisikoa egitea.
Horregatik guztiagatik, alegazio hau ezesten da.
Iragarkiaren kodea: F2202274
