35. ALDIZKARIA - 2022ko otsailaren 17a

2. NAFARROAKO TOKI ADMINISTRAZIOA

2.1. OPOSIZIOAK ETA LEHIAKETAK. LAN PUBLIKOAREN ESKAINTZA

IRUÑA

Deialdia, udal artxibozain lanpostu 1 oposizio bidez betetzeko

Iruñeko Udaleko Gobernu Batzarrak, 2022ko otsailaren 7an, honako deialdi hau onetsi zuen:

OINARRIAK

1. Deialdiaren xedea.

1.1. Deialdi honen xedea da Udal Artxibozain lanpostu bat (1) oposizio bidez betetzea, Iruñeko Udalaren eta haren erakunde autonomoen zerbitzurako, funtzionario araubidekoa eta A mailakoa. Deialdia honako arau hauetan xedatutakoaren arabera gauzatuko da: abuztuaren 30eko 251/1993 Legegintzako Foru Dekretua, Nafarroako Administrazio Publikoen zerbitzuko Langileen Estatutuaren testu bategina onetsi zuena; ekainaren 5eko 113/1985 Foru Dekretua, Nafarroako Administrazio Publikoetan sartzeko Erregelamendua onesten duena; aplikatzekoak diren gainerako arauak, eta deialdi honetako oinarriak.

1.2. Plaza, Kultura eta Berdintasuneko Alorrari atxikia eta plantilla organikoan 100400-1 zenbakiarekin identifikatua, honako txanda honetan banatuko da:

–1 lanpostu txanda irekian.

1.3. Izendapenak eta lanpostuaz jabetzeak nomina eta plantillako funtzionario bihurtuko dute izendatua, Iruñeko Udaleko funtzionarioei buruz indarra duten xedapenetan adierazitako eskubide eta betebehar guztiekin, eta Gizarte Segurantzaren Araubide Orokorrean afiliatuko da, eta alta emanen bertan, aipatu araubide horretan aurreikusitako babesaren pean.

Aurrekoa gorabehera, eta Nafarroako Administrazio Publikoen Zerbitzuko Langileen Estatutua onetsi zuen abuztuaren 30eko 251/1993 Legegintzako Foru Dekretuko Bederatzigarren Xedapen Gehigarriaren 3. puntuan ezarritakoarekin bat, baldin eta Montepio bateko eskubide pasiboen araubidean afiliatuta badago, aukeratzen ahalko du Montepio horretan geratzea, martxoaren 5eko 10/2003 Foru Legeak araututako eskubide pasiboen araubidearen babespean, edo Gizarte Segurantzaren Araubide Orokorrean afiliatzea.

2. Betekizunak.

2.1. Izangaiek honako baldintza hauek bete beharko dituzte oposizio honetan onartuak izateko:

a) Espainiako nazionalitatea izatea, edo Europar Batasuneko beste estatu batekoa, edo Europako Erkidegoak sinatu eta Espainiak berretsitako nazioarteko itunak direla medio langileen zirkulazio librea aplikagarria duen eremuko estatu batekoa.

Espainiako nazionalitatea, Europar Batasuneko beste estatu bateko edo aipatu nazioarteko itunak sinatutako beste estatuetako nazionalitatea duten herritarren ezkontideek ere parte har dezakete, betiere, zuzenbidez bereizita ez badaude, eta, orobat, beren ondorengoek eta ezkontideenek –zuzenbidez bereizita ez badaude–, hogeita bat urtetik beherakoak badira, edo adin horretatik gorakoak izanda haien kargura bizi badira.

b) Hamasei urte beteak izatea eta nahitaezko erretiroa hartzeko ezarritako adina gainditua ez izatea.

c) Lizentzia edo gradu titulua Historian, Filosofia eta Letretan, Informazio Zientzietan, Zuzenbidean, Filologian edo Antropologian, edo horietako baten baliokidea den titulu bat edukitzea, edo titulua eskatzeko eskubideak ordaindu izanaren ordezkagiria, eskaerak aurkezteko epea amaitzen den egunean.

Atzerrian eskuratutako titulazioen kasuan, dagokien baliozkotzea edo, bestela, horren homologazio-egiaztagiria eduki beharko dute.

d) Behar besteko gaitasun fisiko eta psikikoa izatea, bete behar dituzten eginkizunetan aritzeko.

e) Eginkizun publikoetan aritzeko desgaitu edo gabeturik ez egotea, ezta inongo Administrazio Publikoren zerbitzutik bereizita ere.

2.2. Betekizun horiek eskaerak aurkezteko epea bukatzen den egunean beteta eduki beharko dituzte izangaiek, eta lanpostuaren jabetza hartu arte bete.

2.3. Aurreko betekizun horiek izendatuak izateko proposatutako izangaiek egiaztatu beharko dituzte deialdi honen oinarriek zehazten duten unean.

3. Eskabideak.

3.1. Eskaerak aurkezteko epea.

Deialdian parte hartzeko eskaerak hogeita hamar egun naturaleko epean aurkeztu beharko dira, deialdia Nafarroako Aldizkari Ofizialean argitaratu eta biharamunetik aitzina kontatuta. Eskaerak aurkezteko ezarritako epea luzaezina izanen da.

3.2. Eskaera aurkeztea eta formalizatzea.

Hautapen-prozesu honetan parte hartu nahi dutenek eskaera telematikoki aurkeztu beharko dute, Interneten bidez, www.pamplona.es helbidean, honako nabigazio bide honi jarraiki: “Izapideak eta lizitazioak”, “Lan-eskaintzak”, “Enplegu publikoa”, “Enplegu publikoko deialdiak”, deialdi honi dagokion aipamenean.

Desgaitasuna duten izangaiek denboraren nahiz bitartekoen egokitzapenak eskatuz gero horiek beharrezkoak diren probetarako, hala jakinarazi beharko dute eskaeran, eta zehaztu, horretarako prestatutako espazioan, zein den eskatutako egokitzapena edo zein diren eskatutako denboraren eta/edo bitartekoen doikuntzak. Horretarako, izangaiak egoki jotzen dituen agiriak aurkezten ahalko ditu eskaera aurkezteko unean, 3.4 puntuan ezarritakoarekin bat.

3.3. Tasak.

Azterketa-eskubideengatik eta espedientearen formalizazioagatik ordaindu beharreko tasa 25 eurokoa da. Tasa telematikoki ordainduko da, eskaera formalizatzeko unean, telematikoki ordaintzeko sistema seguru baten bidez.

3.4. Eskaerarekin batera aurkeztu beharreko agiriak.

Eskaera online aurkezteko unean, izangaiek, kasuaren arabera, honako agiri hauek aurkeztu beharko dituzte:

–Lizentzia edo gradu titulua Historian, Filosofia eta Letretan, Informazio Zientzietan, Zuzenbidean, Filologian edo Antropologian, edo horietako baten baliokidea den titulu bat edukitzea, edo titulua eskatzeko eskubideak ordaindu izanaren ordezkagiria, eskaerak aurkezteko epea amaitzen den egunean.

Atzerrian eskuratutako tituluen kasuan, dagokien baliozkotzea edo, bestela, horren homologazio-egiaztagiria aurkeztu beharko dute.

–Desgaitasun bat aitortua duten izangaiek hori frogatzeko agiria –organo eskudunak emana– aurkeztu beharko dute.

3.5. Agiri horiek aurkezten ez dituztenak ez dira deialdian onartuak izanen, eta ordura arte haiek gauzatutako egintza guztiak baliorik gabe geldituko dira, eskabidean egindako faltsukeria dela-eta legokiekeen erantzunbeharra ezertan galarazi gabe.

3.6. Nahikoa izanen da agirien kopia sinpleak aurkeztea; hala ere, emandako datuak edo agiriak okerrak edo faltsuak badira, horrek berekin ekarriko du halako kasuetarako ezarritako erantzukizun penalak, zibilak edo administratiboak eskatzea.

4. Izangaien onarpena.

4.1. Eskaerak aurkezteko epea amaitutakoan, Giza Baliabideetako zuzendariak ebazpena emanen du izangai onartu eta baztertuen behin-behineko zerrenda onetsita, eta Nafarroako Aldizkari Ofizialean argitara dadin aginduko du.

4.2. Baztertutako izangaiek aukera izanen dute hamar egun balioduneko epean, behin-behineko zerrenda Nafarroako Aldizkari Ofizialean argitaratu eta biharamunetik aurrera kontatuta, erreklamazioak aurkezteko edo, hala behar izatera, egindako akatsak zuzentzeko, eskaerak aurkezteko 3.2 oinarrian adierazitako izapide elektroniko beraren bidez.

4.3. Behin erreklamazioak aurkezteko epea iraganik eta haien gainean ebatzitakoan, Giza Baliabideetako zuzendariak izangai onartuen eta baztertuen behin betiko zerrenda onesteko ebazpena emanen du, eta Nafarroako Aldizkari Ofizialean argitara dadin aginduko.

4.4. Izangaiei ez zaizkie azterketa-eskubideak itzuliko, baldin eta baztertuak izan badira beraiei egotz dakizkiekeen arrazoiengatik.

4.5. Onartuen zerrendan agertzeak ez du esan nahi izangaiei aitortzen zaienik ebazpen honen bidez egindako deialdian abiatutako prozeduran eskatutako baldintzak betetzen dituztela. Hautapen-prozedura gainditu ondoren izangaiek aurkeztu beharreko dokumentazioa aztertzen denean egiaztatzen bada ez dutela baldintzaren bat betetzen, interesdunek prozedura honetan parte hartzeagatik izan ditzaketen eskubide guztiak galduko dituzte, deusetan galarazi gabe faltsukeria dela-eta legozkiekeen erantzukizun penal, zibil edo administratiboak.

5. Kalifikazio-epaimahaia.

5.1. Kalifikazio-epaimahaia honako kide hauek osatuko dute:

–Epaimahaiburua: Jorge Urdánoz Apezteguía, Iruñeko Udaleko Kultura eta Berdintasuneko Alorreko zuzendaria.

Epaimahaiburu ordezkoa: Javier Marquinez Hermoso de Mendoza, Iruñeko Udaleko Udal Artxiboko teknikaria.

–Epaimahaikidea: María Teresa Sola Landa, Nafarroako Artxibo Garaikideko ataleko burua.

Epaimahaikide ordezkoa: Iñaki Montoya Ortigosa, Nafarroako Unibertsitate Publikoko Dokumentuen Kudeaketa eta Artxibo Nagusiaren ataleko burua.

–Epaimahaikidea: Luis Javier Fortún Pérez de Ciriza, Nafarroako Unibertsitate Publikoko Zuzenbidearen Historiako irakasle elkartua.

Epaimahaikide ordezkoa: Félix Segura Urra, Nafarroako Artxibo Nagusiko zuzendaria.

–Epaimahaikidea: Iruñeko Udaleko Langileen Batzordeko ordezkari bat, Batzordeak berak izendatua.

Epaimahaikide ordezkoa: Iruñeko Udaleko Langileen Batzordeko ordezkari bat, Batzordeak berak izendatua.

–Idazkaria: Marta Martínez Llobet, Iruñeko Udaleko Giza Baliabideetako eta Antolaketako teknikaria.

Idazkari ordezkoa: Xabier Burgui Vergara, Iruñeko Udaleko Giza Baliabideetako eta Antolaketako teknikaria.

5.2. Epaimahaia hautaprobak hasi baino lehen eratu beharko da.

Epaimahaia ezin izanen da eratu, ezta jardun ere, gutxienez kideen gehiengo osoa bildu gabe.

Kide anitzeko organoaren eraketak eta jardunak balio izateko, epaimahaiburuak eta idazkariak bertan egon beharko dute, edo, hala behar izatera, haien ordezkoek, kontuan harturik ordezko izan daitezkeela, baita ere, epaimahaikide ordezko gisara izendatutakoak, bigarren ordezpena egitea beharrezkoa izanez gero.

5.3. Kalifikazio-epaimahaiko kideek parte hartzeari uko egin beharko diote, eta organo deitzaileari hori jakinarazi, Sektore Publikoaren Araubide Juridikoari buruzko urriaren 1eko 40/2015 Legearen 23. artikuluan horretarako aurreikusiak dauden arrazoiak suertatzen badira.

Izangaiek, halaber, zilegi izanen dute epaimahaikideak errefusatzea, aipatu inguruabar horiek gertatzen badira.

5.4. Epaimahaiak gehiengoz ebatziko ditu deialdiaren oinarriak interpretatzeko eta aplikatzeko moduari buruz sor daitezkeen gorabehera guztiak.

5.5. Epaimahaiak aholkulari adituak deitzen ahalko ditu proba guztietarako nahiz batzuetarako. Aholkulari horiek beren espezialitate teknikoetan baizik ez dira arituko, eta horietan bakarrik emanen diote laguntza epaimahaiari.

6. Oposizioaren garapena:

6.1. Oposizioa 2022ko urritik aurrera hasiko da.

6.2. Izangai onartuen eta baztertuen behin betiko zerrenda onesteko emanen den ebazpenean zehaztuko dira oposizioko lehen proba egiteko tokia, eguna eta ordua.

Oposizioko proba bakoitzaren kalifikazio-aldia amaitutakoan, Epaimahaiak argitara emanen du, Iruñeko Udalaren webgunean (www.pamplona.es), proba gainditu duten izangaien zerrenda, lortu duten behin betiko puntuazioarekin batera, eta, halaber, hurrengo proba egiteko tokia, eguna eta ordua, betiere, gutxienez, hura egin baino 48 ordu lehenago.

Oposizioko probetarako deialdi bakarra eginen da, eta izangaiak Nortasun Agiri Nazionala, pasaportea edo gidabaimena aldean dutela azalduko dira haietara. Oposizio-alditik baztertuak izanen dira iragarritako egunetan, orduetan eta tokietan agertzen ez diren izangaiak eta aipatu diren agirien bidez identifikatzen ez direnak.

6.3. Hautaprobak egin bitartean, beharrezko egokitzapenak ezarriko dira, probak egiteko denboraren nahiz bitartekoen aldetik, desgaitasuna aitortua eduki eta eskabidean halakorik eskatu duten izangaiendako.

6.4. Oposizioko probak oinarri honetan zehaztutakoak izanen dira, eta deialdiaren II. eranskinean zehazten den gai-zerrendako gaiei buruz eginen dira.

Deialdia Nafarroako Aldizkari Ofizialean zein egunetan argitaratu eta egun horretan indarra duen araudiaren arabera eskatuko dira gai guztiak.

6.5. Oposizioak honako proba hauek izanen ditu:

6.5.1. Lehen proba.

Ariketa teorikoa da, eta izangaiek idatziz garatu beharko dituzte –Epaimahaiak ezarritako gehieneko denbora-tartean– deialdi honen II. eranskineko gaitegiko artxibogintzari buruzko bi gai, zozketa bidez hautatuak, bata gaitegiko “Artxibogintza I” atalekoa, eta bestea “Artxibogintza II” atalekoa.

Ariketa honetan gehienez ere 40 puntu eskura daitezke. Bazterturik geldituko dira ariketaren balioaren %50 lortzen ez duten izangaiak.

6.5.2. Bigarren proba.

Ariketa teorikoa da, eta izangaiek idatziz garatu beharko dute deialdi honen II. eranskineko gaitegiko “Historia eta erakundeak” ataleko gai bat eta “Legeak” ataleko gai bat, zozketa bidez hautatuak. Epaimahaiak probaren hasieran zehaztuko du izangaiek zenbat denbora izanen duten hura egiteko.

Bigarren proban gehienez ere 30 puntu eskura daitezke. Proba gaindituko dute probaren balioaren %50, gutxienez, lortzen duten izangaiek.

6.5.3. Hirugarren proba.

Ariketa teoriko-praktikoa da, eta izangaiek bi kasu praktiko idatziz garatu beharko dituzte. Bat dokumentazio aktibo edo erdiaktiboari buruzkoa, eta bestea dokumentazio historikoari buruzkoa. Epaimahaiak probaren hasieran zehaztuko du izangaiek zenbat denbora izanen duten hura egiteko.

Hirugarren proban gehienez ere 30 puntu eskura daitezke. Proba gaindituko dute probaren balioaren %50, gutxienez, lortzen duten izangaiek.

6.6. Probak egiteko behar diren materialak Epaimahaiak zehaztuko ditu eta behar besteko denboraz jakinaraziko ditu www.pamplona.es helbidean.

Oposizioko proba guztiak plika-sistemaren bidez eginen dira.

6.7. Behin proba bakoitza amaituta, Epaimahaiak Iruñeko Udalaren webgunean (www.pamplona.es) argitaratuko ditu izangaiek eskuraturiko puntuazioak, eta 5 egun balioduneko epea emanen du interesdunek erreklamazioak egin ditzaten eta eskubidez komeni zaien guztia alega dezaten balorazioei buruz.

7. Gainditu dutenen zerrenda.

7.1. Behin hautaprobak bukatuta, kalifikazio-epaimahaiak Iruñeko Udalaren webgunean (www.pamplona.es) argitaratuko du probak gainditu dituzten izangaien zerrenda, oposizioan lortutako kalifikazioekin eta eskuratutako puntuazio-hurrenkerarekin bat, eta zerrenda hori Giza Baliabideetako zuzendariari bidaliko dio, betekizunak egiaztatzeko eta lanpostu hutsak aukeratzeko izapideak egin ditzan.

7.2. Amaierako emaitzetan puntu berdinketarik gertatuz gero, oposizioaren lehen proban puntuazio handiagoa lortzen dutenen alde ebatziko da, eta berdinduta segitzen badute, zozketa bakar batez ebatziko da horretarako deituko den ekitaldi publikoan.

Zozketaren emaitzak Iruñeko Udalaren webgunean argitaratuko dira.

8. Betekizunen egiaztapena eta lanpostu hutsen hautaketa.

8.1. Giza Baliabideetako zuzendariak 10 egun balioduneko epea irekiko du izangaiek aurkez ditzaten, horretarako ezarriko den bidea baliatuta, bete beharreko baldintzak egiaztatzeko agiri hauek:

a) Deialdiaren 2.1.c) oinarrian eskatutako tituluetako baten fotokopia konpultsatua edo hura erdiesteko eskubideak ordaindu izanaren ordezkagiriarena, edo, bestela, eskaera aurkezteko epea amaitu baino lehenago hura lortzeko egoeran egotearen gaineko ziurtagiria.

8.2. Behin izapide hori bete ostean, Giza Baliabideetako Zuzendariak lanpostu hutsak hautatzeko ekitaldirako deia eginen du, eta horretarako argitara emanen ditu hautatu beharreko lanpostu hutsak –haien kopurua handitzen ahalko da, gerora onets daitezkeen lan-eskaintza publikoei jarraikiz–, izangaien zerrenda –lanpostu hutsak hautatzeko puntuazio-ordenaren arabera daukaten lehentasun-hurrenkerarekin bat– eta lanpostu hutsak hautatzeko izangaiei ematen zaien epea.

Informazio hori Udalaren webgunean argitaratuko da.

Ondoren, izangaiek adierazi beharko dute, horretarako zehaztutako epean, deitutako lanpostuetatik zein nahiago duten.

9. Izendapen-proposamena eta agirien aurkezpena.

9.1. Behin lanpostu hutsak hautatzeko izapidea bukaturik, Epaimahaiak Tokiko Gobernu Batzarrari igorriko dio, espediente osoarekin batera, izendapen-proposamena, probak gainditu dituzten izangaien alde, deialdian zenbat lanpostu eskaini eta horren arabera.

Izendapen-proposamen hori Nafarroako Aldizkari Ofizialean eta Udalaren webgunean argitaratuko da.

9.2. Proposatzen diren izangaiek honako agiri hauek aurkeztuko dituzte Iruñeko Udalaren Erregistro Orokorraren bidez, izendapen-proposamena Nafarroako Aldizkari Ofizialean argitaratu ondoko 30 egun naturaleko epean:

a) Nortasun Agiri Nazionalaren fotokopia edo izangaiaren nazionalitatea eta nortasuna egiaztatzen dituen agiri baliokidearena.

b) Iruñeko Udaleko zerbitzu medikoek egindako txostena, lanpostuaren eginkizunetan aritzea eragozten dion eritasun nahiz akats fisiko edo psikikorik ez duela egiaztatuta.

c) Zinpeko adierazpen bat edo adierazpen solemnea, eginkizun publikoetarako ezgaiturik edo gabeturik ez dagoela eta inongo Administrazio Publikoren zerbitzutik bereizia izan ez dela adierazirik.

e) Zin egiteko edo hitza emateko agiria Nafarroako Foru Eraentza errespetatu, Konstituzioari eta Legeei men egin eta karguaren eginkizunak zintzo beteko dituela adierazita.

9.3. Agiri horiek aipatu epean –salbu behar bezala justifikatuta egon behar duten ezinbesteko kasuetan– aurkezten ez dituztenak eta deialdiaren 2. oinarrian eskatutako betekizunen bat betetzea egiaztatzen ez dutenak ezin izanen dira izendatuak izan, eta haien egintza guztiak baliogabeturik geldituko dira, betiere ezertan galarazi gabe haien eskabideetan egindako faltsutasunarengatik legokiekeen erantzukizuna.

9.4. Aurreko paragrafoan aurreikusitako kasuan, Tokiko Gobernu Batzarrak oposizioa gainditu dutenen zerrendan, hots, 7. oinarrian aipatzen den horretan, hurren dagoen eta baldintzak betetzen dituen izangaiarekin beteko du hutsunea, halako eran non, horri dagokiolarik, aurreko ataletan adierazitako prozedurari berari jarraituko baitzaio.

9.5. Deialdiaren xedezko lanposturako betekizunak eta baldintzak egiaztatzekoak ez diren baina Iruñeko Udalak bere eskumenak gauzatuz eska dezakeen beste edozein agiri, proposatutako izangaiari eskatuko zaio eta hark aurkeztuko du deialdiaren 9.2. zenbakian ezarritakoarekin bat.

10. Izendapena, lanpostu hutsen adjudikazioa eta lanpostuaz jabetzea.

10.1. Tokiko Gobernu Batzarrak, erabaki bidez, Iruñeko Udaleko funtzionario izendatuko du, lanpostuan aritzeko, eta lanpostu hutsa adjudikatuko dio aurreko oinarrietan ezarritakoa betetzen duen izangaiari.

10.2. Izendapena Nafarroako Aldizkari Ofizialean argitaratuko da, eta izendatutako izangaiek hilabeteko epea izanen dute lanpostuaz jabetzeko, izendapena noiz jakinarazi eta hortik aitzina.

Epe horretan, ezinbesteko kasuetan izan ezik, lanpostuaren jabetza hartzen ez dutenek Iruñeko Udaleko funtzionario bilakatzeko eskubide guztiak galduko dituzte. Kasu horretan, deialdiaren 9.4. zenbakian ezarritakoari lotuko zaio.

10.3. Izangaiak funtzionario bihurtu eta, lanpostuan batere aritu gabe, zuzenean eta beraiek eskatuta borondatezko eszedentzia ematen bazaie lanpostuaren jabetza hartzen duten egunetik beretik –indarreko araudian ezarritako kasuetan–, kasuan kasuko lanpostu hutsa ere deialdiaren 9.4 zenbakian xedatzen den moduan beteko da.

10.4. Aurreko bi puntuetan aipatutako kasuetan, ez da aldatuko izendapenaren aurretik egindako lanpostu hutsen hautua, eta funtzionario berriei egoera horien ondoriozko lanpostuak adjudikatuko zaizkie zuzenean.

11. Jarduketen publikotasuna.

Deusetan galarazi gabe Nafarroako Aldizkari Ofizialaren bidez modu ofizialean argitaratu beharreko izapideak, ariketen deialdiei eta kalifikazioei buruz epaimahaiak eman beharreko ebazpenen eta jarduketen gaineko informazioa zein interesdunendako jakingarriak izan daitezkeen argibide orokor guztiak www.pamplona.es udal-webgunean argitaratuko dira.

12. Aldi baterako kontratazioetarako izangaien zerrendak.

12.1. Bat etorrita Nafarroako Administrazio Publikoetan sartzeko Erregelamenduaren 42. artikuluan ezarritakoarekin, oinarri honetan ezarritako prozedurarekin, eta 2017-2019ko aldirako Iruñeko Udaleko zein haren menpeko erakundeetako funtzionarioen eta administrazio-araubidean kontratatutako langileen lan-baldintzei buruzko Hitzarmenaren III. eranskinean jasotako prozedurarekin –non arautzen baita Iruñeko Udaleko langileen administrazio-araubideko kontratazioa–, aldi baterako kontratazioetarako zerrenda hauek eratuko dira, hautaketa-prozesuan parte hartu eta bertan lanposturik eskuratu ez duten izangaiekin:

a) Lanposturik lortu gabe gainditu duten izangaien zerrenda.

b) Hautapen-prozesuko probaren bat gainditu duten izangaien zerrenda.

c) Hautapen-prozesuko lehendabiziko proban ezarritako gehieneko puntuazioaren % 30 gutxienez lortu duten izangaien zerrenda.

12.2. Giza Baliabideetako zuzendariaren Ebazpenaren bidez hamar egun balioduneko epea emanen zaie, ebazpen hori jakinarazi eta biharamunetik aitzina, aurreko atalean aldi baterako kontratazioetarako zerrendak osatzeko aurreikusitako izangaiei, jarraian adierazten diren agiriak aurkezteko:

–Deialdiaren 2. oinarrian eskatutako tituluen agiri originala edo administrazioak edo notarioak konpultsatutako kopia, edo horiek erdiesteko eskubideak ordaindu izanaren frogagiriarena.

Ebazpen hori argitara emanen da, dagokien langileen zerrendekin batera, Iruñeko Udalaren webgunean.

12.3. Adierazitako epearen barnean eskatutako agiriak aurkezten ez dituztenak zein eskatutako betekizunak betetzen ez dituztenak ez dira sartuko aldi baterako kontrataziorako izangaien zerrendetan, eta galduko dituzte deialdi honetan parte hartzeagatik izan ditzaketen eskubide guztiak, deusetan galarazi gabe parte hartzeko eskabidean faltsukeria egiteagatik legokiekeen erantzukizuna.

12.4. Eskatutako betekizunak sarrera-prozedurako eskaerak aurkezteko epea noiz bukatu eta egun horretan bete behar direla ulertuko da, eta, orobat, hautaprobak egin bitartean eta kontratazio-aldiak iraun bitartean.

12.5. Behin agiriak aurkezteko epea amaituta, Giza Baliabideetako zuzendariak eman beharreko ebazpenaren bidez onetsiko dira, hala behar izatera, aldi baterako kontrataziorako honako izangai-zerrenda hauek, eta argitara emanen dira Iruñeko Udalaren webgunean:

a) Lanposturik lortu gabe gainditu duten izangaien zerrenda.

b) Hautapen-prozesuko probaren bat gainditu duten izangaien zerrenda.

c) Hautapen-prozesuko lehendabiziko proban ezarritako gehieneko puntuazioaren % 30 gutxienez lortu duten izangaien zerrenda.

12.6. Probak gainditu baina lanposturik lortu ez dutenen zerrendan, hautapen-prozesuan lortutako puntuazio altuenaren araberakoa izanen da izangaien hurrenkera. Halaber, lanposturik lortu gabe oposizioa gainditu ez eta deialdiko probetakoren bat gainditu duten izangaien hurrenkera gainditutako proba-kopuru handienaren arabera zehaztuko da, lehenik eta behin, eta, bigarrenik, gainditutako probetan guztira lortutako puntuaziorik altuenaren arabera. Era berean, aurreko ataleko c) letran ezarritako kasuan, zerrendaren hurrenkera lehen proban lortutako puntuazio altuenari jarraikiz ezarriko da.

Izangaiek lortutako puntuetan berdinketarik bada, deialdi honetan ezarritako irizpideekin bat ebatziko dira.

12.7. Aurreko atalean ezarritako hurrenkerari dagokionez, 251/1993 Legegintzako Foru Dekretuko Zazpigarren Xedapen Gehigarrian xedatutakoari men eginen zaio, eta, horrenbestez, aldi baterako kontratazioen zerrendan, hiru lanpostuetako lehena erreserbatuko da % 33ko desgaitasuna edo handiagoa duten zerrendako pertsonentzat, baldin eta dagozkien hautaprobak gainditu eta dagozkien zeregin eta funtzioekin bateragarri direla egiaztatzen badute, betiere lortutako puntuazioa eta gainditutako proba-kopurua kontuan harturik.

13. Errekurtsoak.

Kalifikazio-epaimahaiaren egintzen eta erabakien aurka, gora jotzeko errekurtsoa aurkez daiteke, deialdia egin duen udal-organoari zuzendua, hilabeteko epean, errekurritu nahi den egintza jakinarazi eta hurrengo egunetik aitzina kontatuta.

Deialdi honen nahiz haren oinarrien eta hura aplikatzeko egintzen aurka, errekurtso hauetariko bat paratzen ahal da, aukeran:

a) Berraztertzeko errekurtsoa, egintza gauzatu duen organoari zuzendua, hilabeteko epean, ebazpen hau jakinarazi edo argitaratu eta biharamunetik aitzina.

b) Gora jotzeko errekurtsoa, Nafarroako Administrazio Auzitegiari zuzendua, hilabeteko epean, errekurritutako egintza edo erabakia argitaratu edo jakinarazten denetik aitzina.

c) Administrazioarekiko auzi-errekurtsoa, Administrazioarekiko Auzien Iruñeko Epaitegiari zuzendua, bi hilabeteko epean, errekurritu nahi den egintza edo erabakia jakinarazi edo argitaratu eta biharamunetik aitzina.

Udalaren webgunean argitaratuko dira hala jarritako errekurtsoak nola haien gainean emandako ebazpenak, hautapen-prozesu honetako interesdunei jakinarazteko eta deia egiteko.

Iruñean, 2022ko otsailarean 7an.–Tokiko Gobernu Batzarreko Idazkaria, Ana Elizalde Urmeneta.

I. ERANSKINA

Eskabidea (PDFa).

II. ERANSKINA

Gaitegia

Legeak.

1. 1978ko Espainiako Konstituzioa (1). Ordena konstituzionalaren oinarrizko balio eta printzipioak. Oinarrizko eskubide eta askatasunak: tipologia eta edukia.

2. 1978ko Espainiako Konstituzioa (2). Estatuaren erakundeak. Estatuaren lurralde antolamendua. Nafarroa Konstituzioan.

3. 13/1982 Lege Organikoa, Nafarroako Foru Eraentza Berrezarri eta Hobetzeari buruzkoa. Xedapen orokorrak. Nafarroako foru erakundeak. Nafarroaren ahalmenak eta eskumenak: tipologia eta zerrendatzea.

4. 7/1985 Lege Organikoa, Toki Araubidearen Oinarriei buruzkoa. Udalerria: izaera, eskumenak eta antolaketa.

5. 6/1990 Foru Legea, Nafarroako Toki Administrazioari buruzkoa. Nafarroako toki-korporazioen osaeraren eta funtzionamenduaren berezitasunak. Jarduerak, zerbitzuak eta lanak. Mankomunitateak.

6. 2/1995 Foru Legea, Nafarroako Toki Ogasunei buruzkoa. Baliabide-motak. Udal-zergak. Tributuz besteko baliabideak.

7. 39 eta 40/2015 legeak. Administrazio Publikoen jarduerak eta organoak. Administrazio-prozeduraren faseak. Administrazio-errekurtsoak.

8. Kontratazio administratiboa Nafarroako Kontratu Publikoei buruzko 2/2018 Foru Legean. Kontratu-tipologia eta izapidetzea.

9. Iruñeko udal-antolaketa. Iruñeko udal-ordenantzak.

10. Artxibo eta dokumentu-ondarearen gaineko estatuko legeak. Espainiako Ondare Historikoaren 16/1985 legea eta haren garapen normatiboa. Espainiako Artxibo-sistema.

11. Administrazio elektronikoa eta dokumentu-kudeaketa bere lege esparruan: 39 eta 40/2015 legeak eta 203/2021 Errege Dekretua.

12. Informazio publikoa eskuratzeko eskubidea artxiboetan. Sarbidea datu pertsonaletara eta horien babesa. Jabetza intelektuala eta egile-eskubideak. Nafarroako, estatuko eta Europako esparru juridikoa. Ezartzeko estrategiak.

13. Gardentasunez aritzea eta dokumentu-kudeaketa. Estatuko eta Nafarroako lege-esparrua. Udal-antolaketari ezartzea.

14. 12/2007 Foru Legea, Artxiboei eta Dokumentuei buruzkoa. Nafarroako Artxibo Sistema. Artxiboen antolaketa eta tratamendua. Arreta berezia Nafarroako toki-erakundeen artxibo-sistemei. Nafarroako toki-erakundeen dokumentazio-fondoen sailkapen koadroa.

15. Iruñeko Udal Artxiboa udal-antolaketaren esparruan. Funts nagusiak eta horien edukia. Udal Artxiboaren antolaketa- eta funtzionamendu-arauak. Esku hartzea Udalaren protokoloan eta ondare historikoan.

Historia eta erakundeak.

1. Iruñeko Udal Artxiboa. Funts nagusiak eta horien edukia. Hiriko eta Nafarroako historiari ekarpena.

2. Iruñeko hiriaren historiografia. Bibliografia- eta hemerografia-iturriak Iruñeko hiriari buruzko azterlanak egiteko.

3. Iruña XI. mendera arte. Aztarna arkeologikoak eta testigantza dokumentalak.

4. Burgoen Iruña: udal-antolaketa, demografia- eta hiri-bilakaera.

5. Iruñeko hiria Aro Modernoan: udal-antolaketa, demografia- eta hiri-bilakaera.

6. Iruñeko hiria Aro Garaikidean: udal-antolaketa, demografia- eta hiri-bilakaera.

7. Iruñeko hiriaren higiezinen ondasun historikoa: arkitektura zibila, militarra eta erlijiosoa.

8. Iruñeko erresumaren sorrera eta bilakaera (VIII. mendea-1076). Bilakaera historiko orokorra eta erakundeak.

9. Iruñeko erresumatik Nafarroako erresumara (1076-1234). Bilakaera historiko orokorra eta erakundeak.

10. Nafarroako erresuma 1234tik 1512ra bitarte. Bilakaera historiko orokorra eta erakundeak.

11. Nafarroa hispaniar monarkian (1512-1808). Bilakaera historiko orokorra eta erakundeak.

12. Nafarroa Aro Garaikidean (XIX. eta XX. mendeak). Bilakaera historiko orokorra eta erakundeak. Gerra zibilak eta memoria historikoa. Gizarte-eraldaketak eta urbanizazio-prozesuak.

13. Nafarroako dokumentu-tipologia Erdi Aroan. Errege-dokumentuak. Udal-dokumentuak. Notario-dokumentuak. Elizaren dokumentuak. Bereziki Iruñekoak.

14. Nafarroako dokumentu-tipologia Aro Modernoan. Udal-dokumentazioa: espedienteak eta liburuak. Notario-protokoloak. Prozesu judizialak. Bereziki Iruñekoak.

15. Nafarroako dokumentu-tipologia Aro Garaikidean. Arreta berezia Iruñeko Udalaren dokumentuei.

Artxibogintza I.

1. Artxibogintza eta paradigma berriak: mugaketa eta bilakaera. Artxibogintzaren oinarriak: dokumentuen jatorri-printzipioa eta dokumentuen ordena naturala errespetatzea, dokumentuen bizitza-zikloa eta dokumentuen continuuma edo jarraitutasuna.

2. Artxibo bateko langileak. Zerbitzu integral baten organigrama funtzionala eta beharrak. Gaitasun profesionalak artxibogintzan eta dokumentuen kudeaketan. Artxibozainen prestakuntza profesionala.

3. Artxiboak eta dokumentu-ondarea Espainian. Espainiako Artxibo-sistema. Estatuko artxiboen Administrazioa. Nazioko eta nazioarteko lankidetza.

4. Artxiboak eta dokumentu-ondarea Nafarroan. Eskumenak. Artxibo nagusiak. Erakundeen artxibo-sistemak. Proiektuak.

5. Nafarroako udal-artxiboak. Jatorria, eginkizun nagusiak, bilakaera eta antolaketa. Nafarroako Toki-erakundeen artxiboen arautzea.

6. Artxiboen deskribapena. Artxibo-funtsak zaintzen dituzten erakundeak deskribatzeko Nazioarteko Arauak (ISDIAH) eta Funtzioen Deskribapenerako Nazioarteko Araua (ISDF).

7. Markatze-hizkuntzak: EAD (Encoded Archival Description), EAC-CPF (Encoded Archival Context-Corporate bodies, Persons and Families) eta EAG (Encoded Archival Guide).

8. Indexazioa eta dokumentu-berreskuratzea. Tesauroak, ontologia semantikoak eta indexatzeko beste sistema batzuk. Sarbide guneen Espainiako araua eta tesauroetako ISO arauak.

9. Artxiboetan dokumentuak sartzeko moduak. Dokumentuak eskualdatzeko prozedura. Ezaugarri nagusiak ingurune fisikoan eta ingurune elektronikoan. Aparteko sarrerak: motak.

10. Ikus-entzunezko dokumentuak eta soinu-dokumentuak: kontzeptua, ezaugarriak eta artxibo-tratamendua.

11. Dokumentu grafikoak: kontzeptua, tipologia eta artxibo-tratamendua.

12. Erabiltzaileei emandako zerbitzua planifikatzea eta antolatzea. Sarrera, kontsultak eta maileguak. Erabiltzaile-tipologia.

13. Artxiboaren zerbitzu didaktikoak. Material didaktikoak egitea. Hezkuntza-komunitateari aholkularitza.

14. Kultura-produktuen marketina eta komunikazioa. Artxiboen zabalpena eta ikusgarritasuna. Herritarrak erakartzea. Kultura-produktuen komunikazio estrategikoa. Artxiboak sare sozialetan.

15. Hondamendiak artxiboetan. Prebentzio-planak. Funtsezko dokumentuen programak.

16. Segurtasuna artxiboetan. Segurtasun eta larrialdi planak.

17. Euskarri fisikoetako dokumentuak babestu eta gordetzea. Dokumentuak zaharberritzeko oinarrizko printzipioak. Degradazio-arrazoiak eta prebentzio-neurriak.

18. Artxiboen eginkizuna informazioaren gizartean. Artxibo soziala.

19. Artxiboei buruzko erakunde profesionalak, nazionalak eta nazioartekoak: xedea, eginkizuna eta antolaketa. Nazioarteko kode deontologikoa.

20. Artxibo-informazioa zabaltzeko plataformak eta atariak. Europako Artxiboen Ataria (EUROPEANA). Espainiako Artxiboen Ataria (PARES) eta Espainiako eta Iberoamerikako Artxiboen Errolda-Gidaren Ataria. Nafarroako Artxibo Irekia.

Artxibogintza II.

1. Artxibo-dokumentuak eta Artxiboak. Oinarrizko kontzeptuak: definizioak, ezaugarriak, bereizgarriak eta erabilerak.

2. Administrazio publikoen dokumentu-ekoizpena. Administrazio-dokumentuen tipologia. Erabakitzeko, helarazteko, epaitzeko eta jasota geratzeko administrazio-dokumentuak. Dokumentu-moten katalogo/inbentarioen esperientzia nagusiak Espainiako estatuan.

3. Artxiboetako funtsen antolaketa eta tratamendua. Eginkizunak identifikatzea. Dokumentuak taldekatzea; kontzeptuak eta definizioak: funtsa, funts atala, dokumentu-saila, artxibo-unitate konposatua, artxibo-unitate soila, dokumentu-bildumak eta funts multzoak.

4. Dokumentuen sailkapena. Kontzeptua, prestatzeko metodologia eta ezarpena. Metodologia, prestaketa eta ezarpena. Sailkapen-koadroa funts historiko bat antolatzeko tresna gisa eta dokumentuak kudeatzeko sistema baten tresna gisa. Funtsen koadroa. Dokumentuak antolatzea.

5. Dokumentu fotografikoak: kontzeptua, ezaugarriak eta artxibo-tratamendua. Egile- eta ustiatze-eskubideen kudeaketa argazkien tratamenduan eta zabalpenean. Iruñeko fototeka.

6. Artxiboen deskribapena. Printzipioak, metodologiak eta arauak. Deskribatzeko baliabideen tipologiak eta ezaugarriak. ISAD (G) araua: Maila anitzeko deskribapena eta Arauaren elementuak.

7. Artxiboen deskribapena. Erakunde, pertsona eta familiendako artxibo-agintaritzen sarrerei buruzko ISAAR (CPF) nazioarteko araua.

8. Dokumentu-ebaluazioa. Dokumentu-ebaluazioaren oinarri orokorrak eta hautaketa-metodoak. Nafarroako Foru Komunitateko Dokumentuak Ebaluatzeko Batzordea: osaera, antolaketa eta funtzionamendua.

9. Informazio publikoa eskuratzeko eskubidea artxiboetan. 16/1985 Legea, ekainaren 25ekoa, Espainiako Ondare Historikoari buruzkoa. 12/2007 Foru Legea, apirilaren 4koa, Artxiboei eta Dokumentuei buruzkoa. 5/2018 Foru Legea, maiatzaren 17koa, Gardentasunari, informazio publikoa eskuratzeari eta gobernu onari buruzkoa.

10. Sarbidea datu pertsonaletara eta horien babesa. Esparru juridikoa. Ezartzeko estrategiak.

11. Jabetza intelektuala eta egile-eskubideak: eragina dokumentuetara eta informaziora sartzeko eta hura hedatzeko.

12. Artxiboa gune gisa: eraikina, ekipamenduak eta gutxieneko instalazioak. Ezaugarri arkitektonikoak. Guneak, zirkulazio-zirkuituak eta altzairuak. Ingurumen- eta segurtasun-neurriak.

13. Dokumentuen kudeaketa Administrazio Publikoetan: kudeaketa-sistemak eta prozesuak. Nazioarteko arauak eta jardunbide egokiak. ISO 15489 araua eta ISO 30300 familiako arauak.

14. Administrazio elektronikoa eta dokumentu-kudeaketa. Esparru juridikoa eta eragin praktikoak. 39/2015 eta 40/2015 legeak eta 203/2021 Errege Dekretua, martxoaren 30ekoa, sektore publikoaren bitarteko elektronikoen bidezko jardunaren eta funtzionamenduaren erregelamendua onartzen duena.

15. Dokumentu elektronikoa: kontzeptua, espezifikazioak eta artxibo-tratamendua. Administrazio-espediente elektronikoa. Artxibo-tratamendua. Iruñeko Udalaren agiri elektronikoaren plan zuzentzailea.

16. Elkarreragingarritasun Eskema Nazionala: arau teknikoak eta ezartzeko gidak.

17. Metadatuak eta metadatuen eskemak dokumentu elektronikoak kudeatzeko. Dokumentu Elektronikoak Kudeatzeko Metadatuen Eskema (e-EMGDE).

18. Informazio digitalaren segurtasuna. Segurtasun Eskema Nazionala eta horren ezarpena dokumentuak kudeatzeko sistema batean.

19. Dokumentu elektronikoak babesteko politika. Oinarrizko eredu eta elementuak. Ezartzeko estrategiak. Formatu-katalogoak. Migrazioa eta emulatzea.

20. Konfiantzako artxibo digitala epe luzean. OAIS eredua.

Iragarkiaren kodea: L2201825