1. NAFARROAKO FORU KOMUNITATEA
1.4. DIRU-LAGUNTZAK, LAGUNTZAK ETA BEKAK
3/2022 FORU AGINDUA, urtarrilaren 24koa, Garapen Ekonomiko eta Enpresarialeko kontseilariak emana, indarrik gabe uzten duena 47/2019 Foru Agindua, Garapen Ekonomikorako kontseilariak maiatzaren 8an eman zuena; foru agindu horren bidez, 26E/2017 Foru Agindua aldatu zen, Garapen Ekonomikorako kontseilariak ekainaren 16an eman zuena, zeinaren bidez arautu baitzen erakunde sindikalei beren ohiko jarduerak egiteko dirulaguntzak emateko araubidea, Nafarroan lortutako ordezkari kopuruaren arabera.
Garapen Ekonomikorako kontseilariaren ekainaren 16ko 26E/2017 Foru Aginduaren bidez ezarri zen erakunde sindikalei beren ohiko jarduerak egiteko dirulaguntzak emateko oinarri arautzaileak, Nafarroan lortutako ordezkari kopuruaren arabera.
Nafarroan prebentzio-politikak gauzatze aldera, 2019an egokitzat jo zen erakunde sindikal nagusien baliabideak indartzea laneko ezbeharren kontrako borrokan, eta, beraz, egokitzat jo zen erakunde horiei dirulaguntzak ematea prebentzio-arloko jarduerak indartzeko, maiatzaren 8ko 47/2019 Foru Aginduaren bidez, zeinak Garapen Ekonomikorako kontseilariaren ekainaren 16ko 26E/2017 Foru Agindua aldatu baitzuen.
Gaur egun, eta kontuan hartuta dirulaguntza espezifiko baten deialdia dela biderik egokiena sindikatuek dirulaguntzak jasotzeko lan-arriskuen prebentzioko jarduerak egin ditzaten, indarrik gabe utzi behar da 47/2019 Foru Agindua, Garapen Ekonomikorako kontseilariak maiatzaren 8an eman zuena, zeinaren bidez aldatu baitzen ekainaren 16ko 26E/2017 Foru Agindua; izan ere, foru agindu horrek Nafarroan ordezkaritza zuten erakunde sindikalak behartzen zituen ordezkagarritasunaren arabera lortutako dirulaguntzaren ehuneko bat erabiltzera laneko arriskuen prebentzioko jardueretan; beraz, betebehar hori kendu eta hasieran bezala utzi da dirulaguntzaren erregulazioa.
Azaldutakoarekin bat, eta Nafarroako Gobernuari eta Lehendakariari buruzko abenduaren 3ko 14/2004 Foru Legearen 41.1 artikuluak ematen dizkidan eskudantziak erabiliz,
AGINTZEN DUT:
1. Indarrik gabe uztea Garapen Ekonomikorako kontseilariaren maiatzaren 8ko 47/2019 Foru Agindua, Garapen Ekonomikorako kontseilariaren ekainaren 16ko 26E/2017 Foru Agindua aldatzen duena, zeinaren bidez arautu baitzen erakunde sindikalei beren ohiko jarduerak egiteko dirulaguntzak emateko araubidea, Nafarroan lortutako ordezkari kopuruaren arabera.
2. Foru agindu hau Nafarroako Aldizkari Ofizialean argitaratzea, orok jakin dezan. Argitaratu eta biharamunetik aurrera izanen ditu ondorio juridikoak.
Iruñean, 2022ko urtarrilaren 24an.–Garapen Ekonomiko eta Enpresarialeko kontseilaria, Mikel Irujo Amezaga.
Iragarkiaren kodea: F2201236
