1. NAFARROAKO FORU KOMUNITATEA
1.3. LURRALDEAREN ANTOLAMENDUA ETA HIRIGINTZA
5E/2022 FORU AGINDUA, urtarrilaren 12koa, Lurralde Antolamenduko, Etxebizitzako, Paisaiako eta Proiektu Estrategikoetako kontseilariak emana, behin betiko onesten duena Allingo Udal Planaren aldaketa, 1. poligonoko 932. lurzatiari dagokiona. Mikel Oroquieta Landa jaunak sustatu du.
Allingo Udalak idazpuruan azaltzen den espedientea aurkeztu du Lurralde Antolamenduko, Etxebizitzako, Paisaiako eta Proiektu Estrategikoetako Departamentuan, behin betiko onets dadin.
Espedientearen xedea da, Allingo udal mugartean, Arbeitzako 1. poligonoko 932. lurzatiko lurzoruaren sailkapena eta kalifikazioa aldatzea.
Ingurumen Kalitatearen eta Klima Aldaketaren Zerbitzuko Ingurumen Ebaluazioaren Atalaren 2018ko urriaren 19ko txostenaren bidez, jakinarazi zen proposamenak ez duela ingurumen ukipen nabarmenik eragiten, eta adierazi zen hirigintza-eraldaketako prozesuan neurri egokiak hartuko zirela eremutik hurbil dauden karrasken aleei (928. lurzatikoei, esaterako) kalterik ez eragiteko. Lurzatiaren hegoaldeko muga bat dator karrasken ilara batekin, eta horiek kontserbatzeko ahaleginak eginen dira.
Ikusirik aurkeztutako dokumentazioa, bai eta Lurralde eta Paisaia Zerbitzuaren txostena ere, bidezkoa da espedientea behin betiko onestea.
Adierazitakoarekin bat, eta Lurralde Antolamenduko, Etxebizitzako, Paisaiako eta Proiektu Estrategikoetako Departamentuaren egitura organikoa ezartzen duen urriaren 30eko 262/2019 Foru Dekretuari jarraikiz,
AGINTZEN DUT:
1. Behin betiko onestea Allingo Udal Planaren aldaketa, Arbeitzako 1. poligonoko 932. lurzatiari dagokiona. Mikel Oroquieta Landak sustatu du.
2. Adieraztea foru agindu honek ez duela administrazio bidea amaitzen. Administrazio publikoak ez diren interesdunek gora jotzeko errekurtsoa jartzen ahalko dute, Nafarroako Gobernuari zuzendua, legezkotasunaren kontrola onesteko egintza honen aurka, hilabeteko epean, foru agindu hau jakinarazi edo, hala badagokio, Nafarroako Aldizkari Ofizialean argitaratu eta biharamunetik hasita.
Onetsitako hirigintzako araudiaren aurka administrazioarekiko auzi-errekurtsoa jar daiteke, Nafarroako Justizia Auzitegi Nagusiko Administrazioarekiko Auzien Salari zuzendua, bi hilabeteko epean, dagokion udalak eskaturik, edukia Nafarroako Aldizkari Ofizialean argitaratzen denetik aurrera.
Administrazio publikoek administrazioarekiko auzi-errekurtsoa jartzen ahalko dute, Nafarroako Justizia Auzitegi Nagusiko Administrazioarekiko Auzien Salari zuzendua, bi hilabeteko epean. Horrek ez du galarazten Nafarroako Gobernuari aurretiazko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarritako moduan eta epean.
3. Foru agindu hau espedientearen sustatzaileari eta Ingurumen Eraginaren Atalari jakinaraztea, behar diren ondorioak izan ditzan.
4. Foru agindu hau Allingo Udalari igortzea, jakinaren gainean egon dadin eta behar diren ondorioak izan ditzan, eta, zehazki, dagokion hirigintza-araudia Nafarroako Aldizkari Ofizialean argitara dezan eta, hala, onetsitako hirigintza-tresnak indarra har dezan.
5. Foru agindu hau Nafarroako Aldizkari Ofizialean argitaratzea, behar diren ondorioak izan ditzan.
Iruñean, 2022ko urtarrilaren 12an.–Lurralde Antolamenduko, Etxebizitzako, Paisaiako eta Proiektu Estrategikoetako kontseilaria, José María Aierdi Fernández de Barrena.
Iragarkiaren kodea: F2200724
