Iragarkia

260. ALDIZKARIA - 2022ko abenduaren 28a

1. NAFARROAKO FORU KOMUNITATEA

1.1. XEDAPEN OROKORRAK

1.1.3. Foru Aginduak

122/2022 FORU AGINDUA, abenduaren 5ekoa, Ekonomia eta Ogasuneko kontseilariak emana, zeinaren bidez aldatzen baita Ekonomia eta Ogasuneko kontseilariaren maiatzaren 17ko 47/2010 Foru Agindua, gasolioa erosteagatik nekazariek edo abeltzainek jasandako hidrokarburoen gaineko zergaren kuoten itzulketa partzialerako prozedura ezartzen duena.

Estatuaren eta Foru Komunitatearen arteko Hitzarmen Ekonomikoaren laugarren xedapen gehigarriarekin bat, Nafarroan Zerga Bereziei buruzko abenduaren 28ko 38/1992 Legearen 52 ter artikulua aplikatzen da, zeinean arautzen baita nekazaritzan eta abeltzaintzan erabiltzen den gasolioari dagokionez ordaindu edo jasandako hidrokarburoen gaineko zergaren itzulketa partziala.

Maiatzaren 17ko 47/2010 Foru Aginduan arautzen da Foru Komunitateko Zerga Administrazioak zerga horren itzulketa partziala egiteko prozedura. Prozedura hori, Estatuaren eta Foru Komunitatearen arteko Hitzarmen Ekonomikoaren 35.5 artikuluan ezarritakoarekin bat, lurralde erkidean indarra duen eta apirilaren 21eko EHA/993/2010 Aginduan araututa dagoenaren antzekoa da.

Urriaren 3ko HFP/941/2022 Aginduak aldatu du berriki agindu hori. Zehazki, arauaren 2.2.A).5 artikulua aldatu du, zergaren itzulketa partzialerako eskaeran eman beharreko informazioari buruzkoa. Aldaketaren ondorioz, bereizi beharra dago, batetik, gasolio hobaridunaren erosketak, txikizkako salmentarako instalazio batean txikizkako saltzaile bati egindakoak eta Zerga Bereziei buruzko Erregelamenduaren 107. artikuluan aipatzen diren ordainbide espezifikoekin ordaindutakoak, eta, bestetik, gasolio hobaridunaren gainerako erosketak.

Lehenbizikoei dagokienez, eskatzaileak honakoei buruzko informazio orokorra eman beharko du: "gasolio hobaridunaren txartelak" edo "gasolio hobaridunaren txekeak" erabiliz egin eta ordaindutako hornidura guztiak, erositako litro kopuru osoarekiko, ordaindutako zenbateko osoa, eta Identifikazio Fiskaleko Zenbakia (IFZ) eta Jarduera eta Establezimendu Kodea (JEK), txikizkako establezimendua identifikatzen dutenak.

Beste motako erosketei dagokienez, mantentzen da informazio banakatua eman beharra hornidura bakoitzari buruz edo faktura berean bildutako hornidura multzoari buruz, eta gehitzen da gasolio hobaridunaren erosketa egin den establezimenduaren Jarduera eta Establezimendu Kodeari buruzko informazioa emateko betebeharra.

Hitzarmen Ekonomikoaren 35.5 artikuluan ezarritakoa betetzeko, foru agindu hau onesten da aldaketa horiek beraiek foru arauetan egiteko, nekazaritzan eta abeltzaintzan erabiltzen den gasolioari dagokionez ordaindu edo jasandako hidrokarburoen gaineko zergaren itzulketa partzialerako prozedurari buruzkoetan, hain zuzen ere.

38/1992 Legearen 52 ter artikuluak 3. apartatuan xedatzen duenez, itzulketa egiteko prozedura Ekonomia eta Ogasun Ministerioak ezarriko du. Tributuei buruzko abenduaren 14ko 13/2000 Foru Lege Orokorraren 6. artikuluaren ondorioz, ulertu behar da gaikuntza hori Nafarroako Foru Komunitatean zergen arloko eskumena duen departamentuko titularraren alde egiten dela.

Horrenbestez,

AGINTZEN DUT:

Artikulu bakarra. Aldatzea Ekonomia eta Ogasun kontseilariaren maiatzaren 17ko 47/2010 Foru Agindua, gasolioa erosteagatik nekazariek edo abeltzainek jasandako hidrokarburoen gaineko zergaren kuoten itzulketa partzialerako prozedura ezartzen duena.

2022ko urtarrilaren 1etik aurrera egindako gasolio hobaridunaren erosketetan izanen dituzte ondorioak 47/2010 Foru Aginduaren aldaketa hauek:

Bat.–3.2.a) artikuluaren aldaketa.

3. artikuluko 2.a) atalak testu hau izanen du:

"a) Nafarroako Foru Ogasunak Interneteko zerbitzari bat du aitorpena egin behar dutenen eskura, eta hor dagoen esteka baten bidez lor daiteke gasolioa erosteagatik nekazariek eta abeltzainek ordaindu edo jasandako hidrokarburoen gaineko zergaren kuoten itzulketa partzialerako eskabidearen aurkezpen elektronikoa. Zerbitzu horretaz baliatzeko, aitortzaileak Nafarroako Foru Komunitatearen atariko Interneteko helbidean sartu beharko du, eta bidali beharreko itzulketa-eskabidea aukeratu, non datu hauek jarri beharko baititu:

1. Eskatzailearen IFZ: 9 karaktere.

2. Gasolioaren kontsumoa egin duten ibilgailuen matrikula, kontsumo horrek tributatu badu Hidrokarburoen gaineko zerga Zerga Bereziei buruzko abenduaren 28ko 38/1992 Legearen 50.1 artikuluko 1. tarifako 1.4 epigrafean ageri den gaineko zerga-tasarekin (aurrerantzean, gasolio hobariduna).

3. Gasolio hobaridunaren kontsumoa egin duen makina edo tresna mota eta fabrikazio zenbakia.

4. Gasolio hobaridunaren erosketetan, txikizkako saltzaile bati egin eta uztailaren 7ko 1165/1995 Errege Dekretuaren bidez onetsitako Zerga Bereziei buruzko Erregelamenduaren 107. artikuluan aipatzen diren ordainbide espezifikoetan ordaindu badira, aitortzaileak zehaztu beharko du, orokorrean, erositako gasolio hobaridunaren litro kopurua, establezimendu berean egin eta gasolio hobaridunaren txartelak edo txekeak erabiliz ordaindu dituen erosketa guztiei dagokienez; datu hori adierazi beharko du eskabidean, beste hauekin batera: ordainbide horiek erabiliz ordaindutako zenbateko osoa, eta gasolio hobaridunaren erosketa egin den txikizkako establezimenduaren Identifikazio Fiskaleko Zenbakia (IFZ) eta Jarduera eta Establezimendu Kodea (JEK).

Beste establezimendu batzuetan, gasolio hobaridunaren txikizkakoak ez direnetan, egiten diren gasolio hobaridunaren erosketetan, berriz, aitortzaileak honako datu hauek adierazi beharko ditu, hornidura bakoitzari edo faktura berean bildutako hornidura multzoari buruz: fakturaren zenbakia eta data, erregaiaren erosketa egin den establezimenduaren Identifikazio Fiskaleko Zenbakia (IFZ) eta Jarduera eta Establezimendu Kodea (JEK), eta erositako gasolio hobaridunaren litro kopurua eta ordaindutako zenbatekoa, biak bi dezimalekin biribilduta.

5. Itzulketen transferentziak egiteko finantza entitatearen eta kontu korrontearen kodearen identifikazioa."

Bi.–Erregistro diseinuen aldaketa.

Aldatzen dira erregistro diseinuak, nekazariek eta abeltzainek gasolioa erosteagatik ordaindutako edo jasandako hidrokarburoen gaineko zergaren kuoten itzulketa partzialerako eskabide-fitxategiek bete behar dituztenak eta 47/2010 Foru Aginduaren eranskinean daudenak, foru agindu honen eranskinean daudenekin ordeztuko dira.

Azken xedapen bakarra.–Indarra hartzea.

Foru agindu honek Nafarroako Aldizkari Ofizialean argitaratu eta biharamunean hartuko du indarra, agindu berean aurreikusitako ondorioekin.

Iruñean, 2022ko abenduaren 5ean.–Ekonomia eta Ogasuneko kontseilaria, Elma Saiz Delgado.

ERANSKINA

Fitxategiek bete behar dituzten erregistroen diseinuak, gasolioa erosteagatik nekazariek eta abeltzainek jasandako hidrokarburoen gaineko zergaren kuoten itzulketa partzialerako eskabidea banaka nahiz multzoka aurkezteko.

1. erregistroa: Aitortzailea.

2. erregistroa: Ibilgailuak eta makinak.

3. erregistroa: Txartela/Txekearen bidezko ordainketak eta fakturak.

Ibilgailuen eta makinen kode baimendua.

Iragarkiaren kodea: F2216524