1. NAFARROAKO FORU KOMUNITATEA
1.7. BESTELAKOAK
27/2022 EBAZPENA, abuztuaren 12koa, Nafarroako Foru Ogasuneko Lur-ondasunen eta Ondarearen gaineko Tributuen Zerbitzuko zuzendariak emana, Noain Elortzibarren Otaoko 11. poligonoko 12. lurzatian dagoen titulartasuna aldatzekoa.
–Aurrekariak:
Lehenengoa.–2021eko urriaren 20an aurkeztutako eta 2021-1158749 zenbakiarekin erregistratutako eskabidearen bidez, Noain Elortzibarko Udalak Lur-ondasunen Erregistrora bidali zuen titulartasuna aldatzeko eskabidea, interesdunak eskatuta, Nafarroako Lurralde Aberastasunaren Erregistroari eta Katastroei buruzko azaroaren 21eko 12/2006 Foru Legearen (aurrerantzean, NLAEKFL) 32. artikuluan jasotako egiaztagiriekin batera.
Bigarrena.–Aurkeztu den dokumentazio erantsiaren barruan honako hauek daude:
1. agiria: Agoizko Jabetza Erregistroko (aurreratzean, JE) ohar soila. 2007ko martxoaren 12an Francisco Javier Zuazu Nagore jauna ageri da Elortzibarko 378. finkako jabe pribatu moduan (Otaoko jurisdikzioa). Finka hori, zehazki, hiri etxe moduan zehazten da, gaur egun aurri egoeran dagoen arren.
2. agiria: José María Barbarin jaunak 2014ko uztailaren 10ean eskuz idatzitako eskabide orokorra, zeinaren bidez adierazten baitu "5. zenbakiko etxea José M. Barbarinena dela, eta 12. zenbakiko lurzatiaren barruan dagoela. Katastroa aldatzeko eskatzen du".
3. agiria: María Socorro Goñi Gascue andreak Iruñeko JEko 3. zenbakian (2015eko 2460. zenbakia) eta Agoizko JEko 2. zenbakian (2015eko 1488. zenbakia) aurkeztutako dokumentua, "Nafarroako Gobernuko oinordetza eta egintza juridiko dokumentatuen zergaren likidatzaile jaunari zuzendua...".
María Socorrok, 2015eko martxoaren 21etik Jose María Barbarinen alarguna denak, deskribatu dituen higiezinak bere izenean inskribatzeko eskatzen die jabetza erregistratzaileei.
Erantsitako agiriak: erregistro zibilaren ziurtagiria, Iruñea eta Agoizko erregistratzaileen dokumentazioa, Oinordetza eta Dohaintzen Atalaren ziurtagiria, Nafarroako Foru Ogasuneko Ondare Eskualdaketen eta Egintza Juridiko Dokumentatuen gaineko Zerga, hildakoaren testamentua egin izanaren ziurtagiria (Justizia Ministerioarena) eta lurzati zedulak.
4. agiria: Jose María Barbarin jaunak 2012ko abenduaren 12an Noain Elortzibarko Udalari 2825. erregistro zenbakiarekin aurkeztutako eskabidea. Bertan hau eskatzen du:
"Etxearen aurrealdean eta atzealdean dauden herri lurrak mugatzeaz gain, etxe horren katastroa ere aldatzeko eskatzen dut, gaur egun oker baitago esleituta 11. poligonoko 12. lurzatian, María Gayarre Galbeteren izenean.
Ahalik eta lasterren, nire izenean erregistratzeko eskatzen dut, eta, horrela, katastroan berehala zuzentzeko".
5. agiria: Agoizko JEren erregistro ziurtagiria, 2012ko otsailaren 1ekoa, Elortzibarko 378. finkaren jabetza ziurtatzen duena. Finka hori 188. liburuan, 3131. liburukian, 100. orrialdean dago.
6. agiria: Jose Antonio Echarri Iribarren nekazaritza ingeniariaren txostena, 2013ko martxoaren 23koa, Jose María Barbarin jaunak aurkeztutako alegazioei buruzkoa. Txosten horrek Udalari ezezko txostena ematen dio, arrazoituta, gaia aztertu ondoren.
7. agiria: eskuz idatzitako eskabidea, Marian Cuesta andreak sinatua, Noain Elortzibarko Udalean aurkeztua, 2013ko irailaren 13an (71. dokumentu zenbakia). Katastroa aldatzeko eskatzen du. Otaon dagoen etxebizitzaren jabetza eskritura eransten du.
8. agiria: entzunaldiaren jakinarazpena Jose María Barbarin jaunari, Elortzibarko Udaleko alkate-lehendakariak sinatua, 2014ko uztailaren 3an.
2012ko azaroaren 14ko Nafarroako Aldizkari Ofizialean argitaratutako Otaoko zenbait finkaren ondare ikerketako espedientearen hasierako onespenaren berri eman du Udalak.
9. agiria: lurzati zedula, 2017ko azaroaren 22koa, Noain Elortzibarko udalerriko Otaon 11 12 1 1 erreferentziarekin identifikatuta dagoen eta aurri egoera duen finkari buruzkoa. Higiezin unitateak kokatuta dauden lurzatiaren kokapenaren krokisa ageri da bertan. 618,99 metro karratuko azalera ageri da.
10. agiria: Ibirucu jaunak, María Socorro Goñiren izenean, 2019ko apirilaren 5ean, 2019-E-RC-1000 erregistro zenbakiarekin, Udalari aurkeztutako eskabide agiria. Agirien bilduma bat erantsi da.
11. agiria: María Socorro Goñi andreak 2013ko irailaren 13an Noain Elortzibarko Udalean aurkeztutako eskuzko eskabide orokorra, 2449. erregistro zenbakia duena. Eskatu du "katastroa aldatzeko", eta azaldu du "Otaoko 12. lurzatiaren barruan katastroan dagoen etxebizitzaren jabetza eskritura eransten duela, eta mugaketan teknikariak nirea dela esaten duela" (sic).
PDFan María Socorro Goñi andreak 2012ko otsailaren 29an Noain Elortzibarko Udalean aurkeztutako eskuzko beste eskabide bat sartzen du (ez da erregistro zenbakia ageri). Bere aurreko eskabidearen asmoa errepikatzen du.
Era berean, Agoizko 2. zenbakiko Jabetza Erregistrora zuzendutako ziurtagiri eskabidearen inprimaki bat dago, 2012ko otsailaren 1eko data duena, 183. sarrera zenbakiarekin, eta mugaketa interes legitimotzat jotzen duena.
Era berean, Agoizko 1. zenbakiko Jabetza Erregistratzailearen ziurtagiria aurkeztu da, 148. liburukiko 228. folioan Elortzibarko 378. zenbakiko finkaren 1. inskripzioa agertzen dela ziurtatzen duena (...).
Era berean, Iruñeko Pons notarioaren aurrean (1189 zk., 2007/05/02) emandako salerosketako eskritura publiko baten kopia ere erantsi da. Eskritura horren bidez, Jesús María Zuazu jaunak, bere anaia Francisco Javier Zuazu ordezkatuz, ahalduna den aldetik, Jose María Barbarini Otaoko jurisdikzioko finka bat saltzen dio, Agoizko JEn inskribatua (3131. liburukia, 188. liburua, 100. folioa, 378. finka).
12. agiria: Noain Elortzibarko Udalak María Gayarre andrearen oinordekoei (ez dira zehaztu) egindako errekerimendua, hilabeteko epean aurkez ditzaten Otaoko 11. poligonoko 12. lurzatiaren jabetza titulua eta haien interesen alde bat datozen agiri guztiak, 2019ko apirilaren 8an.
13. agiria: 2019ko apirilaren 11ko minuta, 2019-S-RC-896 erregistro zenbakia, Telmo Aldaz de la Cuadra jaunari dokumentazioa eskatuz.
14. agiria: Correos enpresako frogagiria, Telmo Aldaz jaunari egindako jakinarazpenarena.
15. agiria: Noain Elortzibarko Udalak María Gayarre andrearen oinordekoei (ez dira zehaztu) egindako errekerimendua, hilabeteko epean aurkez ditzaten Otaoko 11. poligonoko 12. lurzatiaren jabetza titulua eta haien interesen alde bat datozen agiri guztiak, 2019ko maiatzaren 7an.
16. agiria: 2019ko maiatzaren 7ko minuta, 2019-S-RC-1054 erregistro zenbakia, María Gayarre andrearen oinordekoei (ez dira zehazten) dokumentazioa eskatuz.
17. agiria: arrakastarik gabeko jakinarazpena itzuli izanaren frogagiria.
18. agiria: 2019ko uztailaren 24ko Nafarroako Aldizkari Ofizialean (143. zk.) egindako argitalpena Otaoko 11/12 lursailaren titulartasuna aldatzeko espedienterako dokumentazioa eskatzeko jakinarazpen egintzaren iragarkiaren gainean, María Gayarre Galbete andrearen ondorengoei zuzendua, 466.2019 espedientearen interesdun diren aldetik.
19. agiria: 2019-791518 instantzia, Udalak LOOTZri bidalia, txosten bat eskatuz.
20. agiria: eskuz marraztutako mapa zaharra. Ez da jatorria zehazten.
21. agiria: 2020ko otsailaren 14an igorritako txostena, orduko Lur-ondasunen Erregistroaren atalburuak sinatua, 2019-791518 eskabideari erantzunez.
Udalaren eskabidean ez da berariaz adierazten zein txosten behar den, baina eskabideari erantsitako dokumentaziotik ondoriozta daiteke Otaoko 11. poligonoko 12. lurzatiaren zati baten titulartasunaren eta grafikoaren (mugak eta azalera) aldaketari buruzko txostena eskatzen duela.
Bertan dagoen dokumentazioa xehetasunez aztertu ondoren, txostenak ondorioztatzen du litekeena dela interesdunek erreklamatzen duten etxea izatea. Eraikin hori 11. poligonoko 12. lurzatiaren hegoaldeko eremuko egungo katastroan dago, eta aurri egoeran dago (lurzati bereko gainerako eraikuntzak bezala). Hala ere, argigarria litzateke jakitea zein puntutatik sar daitekeen eraikin horretara, eta ea bide publikotik soilik sar daitekeen (eta ez aipatutako 12. lurzatiaren barrutik). Hala ere, puntu hori ez dago argituta aurkeztutako dokumentazioan.
Ondorioz, txostena ez zen eztabaidaezina izan, eta arrazoizko hipotesi bat baino ez zuen adierazi.
22. agiria: katastro zaharreko eskuz idatzitako kopia.
23. agiria: Otaoko 11. poligonoko 12. lurzatiari buruzko txostenaren eskabidearen erantzunaren sarrera erregistroaren hartu-agiria.
24. agiria: Laura Lamana Pastor andreak Otaoko 11. poligonoko 12. lurzatia aldatzeari buruz egindako txostena, 2021eko otsailaren 18an emana.
Txostenak ondorioztatzen duenez, "azken batean, Goñi andreak egindako eskabidea dagoen dokumentazioaren arabera oinarrituta egon daitekeela dirudien arren, lurzati berria behar bezala mugatzeko, 28. lurzatiaren jabetzari jabetza titulua eskatzea gomendatzen da".
Beraz, egindako analisiak titulartasunari buruzko zalantzak ematen ditu, eta dokumentazio gehiago lortzeko beharra adierazten du.
25. agiria: Agoizko Jabetza Erregistroko informazio ohar soila, Elortzibarko 13774. finkaren 2. zenbakiaren gainekoa; lurzati zedularen arabera, bat dator Otaoko 11. poligonoko 1. azpieremuko 28. lurzatiarekin.
Noain Elortzibarko Udala da titularra, 2016ko urtarrilaren 18an immatrikulatu zenetik.
26. agiria: Otaon dagoen finkaren (erreferentzia: 141/6-7/4-4/A-4) 2021eko urriaren 13ko lurzati zedula, San Salvador kaleko S-P helbidean, 108,90 metro karratuko azalerakoa.
27. agiria: Noain Elortzibarko Udaleko alkate-udalburuaren ebazpena, Otaoko 11. poligonoko 12. zenbakiko lurzatiaren hegoaldean dagoen eraikuntzari dagokion 29,82 m2-ko azalera karratuari dagokion titulartasunaren esleipena oker dagoela zalantzarik gabe uste duena.
María Socorro Goñi Gascue andreak aurkeztutako erreklamazioa baiestea proposatzen du. Bertan, katastroa zuzentzeko eskatzen du, Otaoko 11. poligonoko 12. lurzatiaren hegoaldean dagoen eraikuntzari dagokion 29,82 m2-ko azalera karratuaren titulartasuna oker esleitzen zaiolako, bere jabetzakoa baita.
28. agiria: baiespen ebazpena María Socorro Goñi andreari helarazi izanaren agiria.
29. agiria: Joaquín Ibiricu jaunaren aldeko ebazpena helarazteko minuta.
Hirugarrena.–Erantsitako dokumentazioa aztertuta, eta aipatutako artikuluko eskakizun formalekin erkatuta, beharrezkoa da tokiko entitateak 32. artikuluko 7. puntuko bigarren paragrafoan eskatzen diren kudeaketa hauen frogagiriak aurkeztea:
"Administrazio publikoak ezin baldin baditu identifikatu titularrak aurreko lerroaldean azaldutako informazioa baliatuta, balizko interesdunei jakinaraziko zaie Nafarroako Aldizkari Ofizialean eta udalaren ediktuen oholean iragarkia jarriz hilabete batez, eta gainera, eskatutako aldaketaren berri emateko iragarki bakar bat jarriko da Nafarroako Foru Komunitatean gehien zabaltzen diren egunkarietako batean edo, kasua bada, egoki iritzitako herri aldizkari edo buletinean."
Laugarrena.–Ofizioa bidali zitzaion tokiko entitateari, hilabetez udaletxeko iragarki oholean argitaratu zela egiaztatzen zuen froga aurkez zezan.
Halaber, Nafarroako Foru Komunitatean zabalkunderik handiena duten egunkarietako batean eskatutako aldaketaren berri ematen duen iragarki bakar baten bidez eta, hala badagokio, komenigarritzat jotzen den egunkariko edo tokiko aldizkari bateko iragarki baten bidez zabaldu dela frogatzen du.
Bosgarrena.–2022ko otsailaren 16an, tokiko entitateak udal idazkariaren ziurtagiria aurkeztu zuen, honako hau adieraziz:
"Noain Elortzibarko Udalak egoitza elektroniko bat du, «esPublicoGestión» plataformarekin, internet bidez eskuragarri, https://noain.sedelectronica.es helbidean. Bertan, iragarki taula bat du.
Gure sistema informatikoetan dagoen informazioaren arabera, 2021/11/04an honako dokumentu hau argitaratu zen iragarki taulan: baiespen ebazpena helarazteko agiria - MARIA-SOCORRO GOÑI GASCUE CSV: AM(...)LC Aztarna digitala MD5: 6cb6fbb7e163597708deb3e8c6d7998e Aztarna digitala SHA1: 997335ed04d36b632d29f64808e2e326d4022043.
Agiri horrek argitaratuta egoteari utzi zion 2021-12-04an".
Diario de Navarra egunkarian argitaratutako iragarkiaren kopia ere erantsi da.
–Inguruabar juridikoak.
Lehenengoa.–Noain Elortzibarko Udalak Lur-ondasunen Erregistroko oinarrizko datuak aldatzeko prozedura bat izapidetu du, NLAEKFLren 32. artikuluan aurreikusia. Artikulu horrek "lursailen edo higiezin unitate jakin batzuen titulartasunak aldatzeko prozedura arautzen du, interesdunak eskatuta". NLAEJFLren 32. artikuluaren 1. paragrafoan aurreikusitakoarekin bat etorriz, interesdunak eskatuta hasi da prozedura, Lur-ondasunen Erregistroan inskribatutako titulartasunaren esleipen desegokian oinarrituta, titulu juridiko nahikoaren bidez egiaztatu den bezala.
Bigarrena.–Tokiko entitateak NLAEKFLren 32. artikuluan ezarritakoaren arabera izapidetu du prozedura eta, espedientean dagoen informaziotik abiatuta, udala titulartasuna oker esleitu dela inolako zalantzarik gabe ondorioztatzeko moduan dago, eta, beraz, Lur-ondasunen Erregistroari titulartasuna aldatzeko eskabidea bidali dio, ondorio hori frogatzen duen dokumentazioarekin batera.
Hirugarrena.–Lur-ondasunen Zerbitzuak, espedientea aztertu ondoren, ez du zalantzan jartzen inskribatu nahi den oinarrizko datuen aldaketa egiaztatzeko aurkeztutako frogabideen balio juridikoa.
Laugarrena.–Udalak zailtasunak izan ditu interesdun batzuk aurkitzeko. NLAEKFLren 32. artikuluko 7. atalaren bigarren paragrafoaren arabera: "Administrazio publikoak ezin baldin baditu identifikatu titularrak aurreko lerroaldean azaldutako informazioa baliatuta, balizko interesdunei jakinaraziko zaie Nafarroako Aldizkari Ofizialean eta udalaren ediktuen oholean iragarkia jarriz hilabete batez, eta gainera, eskatutako aldaketaren berri emateko iragarki bakar bat jarriko da Nafarroako Foru Komunitatean gehien zabaltzen diren egunkarietako batean edo, kasua bada, egoki iritzitako herri aldizkari edo buletinean."
Nafarroako Aldizkari Ofizialean, tokiko entitatearen iragarki oholean eta tokiko egunkari batean (Diario de Navarra) argitaratu izanaren ebidentzia aurkeztu du Udalak.
Eskabidea oinarrituta dago eta ez da antzematen izaera zibileko auzirik dagoenik.
Bosgarrena.–NLAEKFLren 32. artikuluko 5. atalaren bigarren paragrafoaren arabera: "Nafarroako Zerga Ogasunean Lurralde Aberastasunaren Erregistroaren kontserbazio lana esleitua duen zerbitzuko zuzendariak titulartasun hori aldatzeko ebazpena emanen du, salbu eta ebazpen proposamena arbitrarioa edo nabarmen funsgabekoa bada, edo egiaztatzen bada tartean auzi zibil bat dagoela, orduan eskabidea ezesteko ebazpen arrazoitua emanen baitu".
Horrenbestez, aipatu aginduan xedatutakoaren arabera,
EBAZTEN DUT:
Lehenengoa.–Onestea oinarrizko datuak aldatzeko eskabidea, era berean Noain Elortzibarko Otaoko 11. poligonoko 12. lurzatiaren titulartasuna aldatzen duena.
Bigarrena.–Ebazpen hau interesdunei jakinaraztea, eta interesdunak ezin izan direnez kontaktatu, Administrazio Publikoen Administrazio Prozedura Erkidearen urriaren 1eko 39/2015 Legearen 44. artikuluaren arabera, ebazpen hau Nafarroako Aldizkari Ofizialean eta Estatuko Aldizkari Ofizialean argitaratzea, eta, horrez gain, adieraztea ebazpen honen aurka interesdunek gora jotzeko errekurtsoa aurkezten ahalko diotela Ekonomia eta Ogasuneko kontseilariari, hilabeteko epean, ebazpena argitaratu eta hurrengo egunetik aurrera.
Hirugarrena.–Noain Elortzibarko Udalari ebazpenaren berri ematea, jakinaren gainean egon dadin.
Iruñean, 2022ko abuztuaren 12an.–Lur-ondasunen eta Ondarearen gaineko Tributuen Zerbitzuko zuzendaria, Sergio Osés Amézqueta.
Iragarkiaren kodea: F2215388
