Iragarkia

249. ALDIZKARIA - 2022ko abenduaren 14a

1. NAFARROAKO FORU KOMUNITATEA

1.7. BESTELAKOAK

526/2022 EBAZPENA, azaroaren 21ekoa, Hezkuntzako zuzendari nagusiak emana, zeinaren bidez ezartzen baita eskolaldi etengabea edo malgua baimenduta duten ikastetxeek hura 2023-2024 ikasturtera luzatzea eskatzeko prozedura.

Hezkuntza Departamentuak aukera eman du 2007az geroztik, modu esperimentalean, bi eskolaldi mota ezartzeko Haur Hezkuntzako bigarren zikloa, Lehen Hezkuntza eta Hezkuntza Berezia ematen duten ikastetxeetan: eskolaldi etengabea eta eskolaldi malgua.

Urte batzuk iraganik, eta ikastetxeek beraiek hezkuntza dinamikaz urtero autoebaluazioak egin ondoren eta kontuan hartuta Hezkuntzako Ikuskapen Zerbitzuak egindako jarraipena, Hezkuntza Departamentuaren iritziz garaia da esperimentazio aldia ixteko.

Hori guztia ikusirik, eta Hezkuntza Departamentua buru-belarri ari denez Haur Hezkuntzako, Lehen Hezkuntzako eta Hezkuntza Bereziko eskolaldiak erregulatuko dituen araudi espezifikoa prestatzeko lanetan, ulertu behar da luzapenerako ebazpen hau eskolaldi etengabea eta eskolaldi malgua modu esperimentalean baimentzeko prozesuaren barruko azkena dela.

Ebazpen honen bidez arautzen da, modu esperimentalean 2023-2024 ikasturterako, beherago aipatzen diren ebazpenetan zerrendatutako ikastetxeek 2022-2023 ikasturtean duten eskolaldi mota luzatzea eskatzeko prozedura: 482/2021 Ebazpena, azaroaren 10ekoa, Hezkuntzako zuzendari nagusiak emana, baimena ematen diena zenbait ikastetxeri eskolaldi etengabea edo malgua 2022-2023 ikasturtera luzatzeko, eta 62/2022 Ebazpena, otsailaren 25ekoa, Hezkuntzako zuzendari nagusiak emana, onesten duena eskolaldi etengabea edo malgua ezartzea 2022-2023 ikasturtean, Nafarroako Foru Komunitateko Haur eta Lehen Hezkuntzako edo Hezkuntza Bereziko ikastetxe batzuetan.

Ikusirik Antolamendu, Prestakuntza eta Kalitate Zerbitzuko zuzendariak emandako aldeko txostena, aipatu 482/2021 Ebazpenean eta 62/2022 Ebazpenean jasotako ikastetxeek eskolaldi etengabearen edo malguaren luzapena, kasuan-kasuan, eskatzeari buruz.

Hezkuntza Departamentuaren egitura organikoa ezartzen duen urriaren 30eko 267/2019 Foru Dekretuak ematen dizkidan ahalmenak erabiliz,

EBAZTEN DUT:

1. Ezartzea II. eranskinean adierazitako ikastetxeek eskolaldi etengabea edo malgua 2023­2024 ikasturterako luza dakiela eskatzeko prozedura, I. eranskinean xedatutakoaren arabera.

2. Ebazpen honen aurka gora jotzeko errekurtsoa jar daiteke, Hezkuntzako kontseilariari zuzendua, hilabeteko epean, Nafarroako Aldizkari Ofizialean argitaratu eta biharamunetik hasita.

3. Ebazpen hau eta eranskinak igortzea Antolamendu, Prestakuntza eta Kalitate Zerbitzura, Hezkuntzako Ikuskapen Zerbitzura eta Ikastetxeen Finantzaketaren, Ikasketetarako Laguntzen eta Zerbitzu Osagarrien Zerbitzura, behar diren ondorioak izan ditzaten.

4. Ebazpen hau eta eranskinak Nafarroako Aldizkari Ofizialean argitaratzea.

Iruñean, 2022ko azaroaren 21ean.–Hezkuntzako zuzendari nagusia, Gil Sevillano González.

I. ERANSKINA

Eskolaldi etengabearen edo malguaren luzapena, 2023-2024 ikasturterako

1. Ebazpen honen II. eranskinean jasotako ikastetxeek eskolaldi etengabearekin edo malguarekin jarraitzen ahal dute 2023-2024 ikasturtean, kasuan-kasuan, aurretik Ikasketak Antolatzeko Atalari eskatuta.

2. Horretarako, ikastetxeek Eskola Kontseiluaren bilkura berezi baterako deia eginen dute, eta gai-zerrendan honako hauek bilduko dira, gutxienez:

a) I. eranskin honen 9. puntuan jasota ageri diren balizko aldaketak aurkeztuko ditu zuzendariak.

b) Botoa emateko eskubidea duten Eskola Kontseiluko kideek bozketa egitea eskolaldi mota luzatzeari buruz. Bozketaren akta eginen da, baita haren ondorioz Eskola Kontseiluak hartutako erabakiarena ere, ebazpen honen III. eranskineko ereduari jarraituz. Akta jendaurrean paratuko da, ikastetxean.

3. Botoa ahal eta objektiboena izan dadin, Eskola Kontseiluaren bilkura egin aurretik kontseiluko kideek, egokitzat jotzen dituzten bideak erabiliz, eranskin honen 2a) atalean aipatzen diren aldaketei buruzko informazioa ematen ahalko diete ordezkatzen dituzten hezkuntza-komunitatearen sektoreei.

4. Kontsultarako galdera hau izanen da:

Dagoeneko baimenduta dagoen eskolaldi etengabea/malgua luzatzearen alde zaude?

5. Eskolaldi etengabea edo malgua, kasuan-kasuan dagokiona, 2023-2024 ikasturterako luzatuko da baldin eta Eskola Kontseiluan boto eskubidea duten kideen gehiengo osoak baiezkoa ematen badio arestiko galderari. Gehiengo osoa lortu ezean, edo luzatzeko eskaerarik aurkezten ez bada, ikastetxea eskolaldi zatitura itzuliko da (eskolak goiz eta arratsaldez) 2023-2024 ikasturtean.

6. Zuzendaritza taldeak erabakitzen badu proiektu berri bat aurkeztea eskolaldi etengabea edo malgua ezartzeko hurrengo deialdian, eta ikastetxeko hezkuntza komunitateak proiektu hori onesten ez badu, 2023-2024 ikasturtean aurreko puntuaren araberako eskolaldi mota izanen da.

7. Bozketaren emaitza edozein dela ere, III. eranskinaren kopia bat igorri beharko da, ebazpen hau argitaratu eta biharamunetik hasita bost egun balioduneko epean, Ikasketak Antolatzeko Ataleko helbidera (ordenacion.academica@navarra.es), Hezkuntzako zuzendari nagusiak hari buruzko ebazpena eman dezan.

8. Luzapena onesteak berekin ekarriko du eskolaldi etengabea edo malgua betetzea baimena eman zitzaion deialdiaren ebazpenean ezarritako baldintza berberetan, eta arreta berezia jarriko da alderdi hauek bete daitezen:

–Ikasleek eskubidea izanen dute asteko lau egunetan arratsaldez arreta jasotzeko, eta ikastetxeak eskaintzen dituen jardueretan aurreinskripzioa egiteko. Ikastetxeen betebeharra izanen da beti ikasle guztiei arreta ematen zaiela ziurtatzea.

–Jarduera bakoitzean izena emandako ikasleen kopurua ikusirik, zuzendaritza taldeak erabakiko du zer jarduera gauzatuko diren, kontuan hartuta ikasleen interesak eta ezaugarriak eta ikastetxearen baliabideak.

–Ikastetxeetako elkarbizitza erregelamenduaren aplikazioak, bai curriculum saioetan bai eskolaz kanpokoetan, bat etorri beharko du abuztuaren 23ko 47/2010 Foru Dekretuan, Nafarroako Foru Komunitateko unibertsitateaz kanpoko ikastetxe publiko eta pribatu itunduetako ikasleen eskubide eta eginbeharrei eta ikastetxe horietako elkarbizitzari buruzkoan, erregelamenduz xedatutakoarekin.

–Jantokiko eta eskola garraioko zerbitzu osagarriei dagokion guztia zerbitzu horien gaineko indarreko araudian xedatutakoari eta ebazpen honetako jasotakoari lotuko zaio.

9. Hala ere, eskolaldi etengabearen kasuan, goizeko sarrera ordutegia eta irteerakoa (eskolaz kanpoko jarduerak barne) mantentzen badira, ikastetxeek barne aldaketak egiten ahalko dituzte, eskolaldia ebaluatu ondoren. Aldaketa horiek 2023-2024 ikasturtean aplikatuko dira, eta honako hauek izan daitezke:

a) Eskolaz kanpoko jarduera batzuen ordez beste batzuk jartzea. Jarduerak antolatzerakoan, ikastetxeen antolamendu aukeren barruan betiere, ikasleen premiak eta ezaugarriak izanen dira lehentasunezko irizpide. Oro har, barne jarduerak izanen dira, eta ikastetxean bertan egin beharko dira. Ikastetxetik kanpo egiten direnak –ikastetxetik kanpo egiten diren eskolaz kanpoko jarduerak–, ikastetxearen proiektu barrukoak izaten ahalko dira ikastetxearen ordutegiaren barruan egiten badira. Ikasleen joan-etorriak ikastetxearen ardura izanen dira, eta ikasleek ikastetxean egon beharko dute ikastetxean bertan egiten diren eskolaz kanpoko jarduerak amaitzen diren ordu berean.

b) Jolas-orduen eguneko egitura aldatzea, kontuan harturik hura finkatzeko modua izan behar dela 30 minutuko jolasaldi bat, 40 minutuko jolasaldi bat edo bi jolasaldi, 40 minutukoak biak baturik.

c) Curriculum saioen iraupena aldatzea.

Nolanahi ere, curriculum saioak eta jolasaldiak, guztira hartuta, gutxienez 1.550 minutukoak izanen dira oro har astean, jolasaldiak 40 minutukoak izanez gero, eta gutxienez 1.500 minutukoak, jolasaldiak 30 minutukoak badira.

10. Eskolaldi etengabea izanez gero, eskolaz kanpoko jarduerak bukatu ondotik aterako da garraioa. Ordutegi hori aitzinatzen ahalko da, betiere garraiorako ibilgailu bera erabiltzen duten ikasle guztien adostasuna lortuz gero, eta aldaketa horrek ukitzen ez badu ez garraioa partekatzen duten gainerako ikastetxeekiko koordinazioa, ez adjudikaziodunaren plangintza, ezta jantokiaren antolaketa ere. Ordutegian egin litekeen aldaketa horretarako beharrezkoa izanen da, ebazpen honen IV. eranskinean ezarritakoari jarraikiz, ikastetxeak horren berri ematea Hezkuntza Departamentuko Ikastetxeen Finantzaketaren, Ikasketetarako Laguntzen eta Zerbitzu Osagarrien Zerbitzuari, 2023ko maiatzaren 1etik 25era, horrek ontzat eman dezan. Zerbitzuak oniritzia emandakoan, huraxe izanen da ukitutako ibilgailuaren irteera ordua 2023-2024 ikasturtean, ikastetxean ikasle berriak sartu ala ez.

11. Nolanahi ere, aurreko atalean xedatutakoa aplikatzeak eskola garraioaren irteera orduan eragiten dituen aldaketei, edo ikasleren batek eskola garraioa ez erabiltzeko erabakiari dagokienez, jantoki zerbitzuaren gaineko indarreko araudian xedatutakoa beteko da, eta ikastetxeek horren berri eman beharko diete familiei, bai eta zerbitzuaren erabilerarako horrek dauzkan ondorioena ere.

12. Ikastetxeek aldatu nahi badute goizean sartzeko ordua edo irteerakoa (eskolaz kanpoko jarduerak barne, kasua bada), Hezkuntza Departamentuak onetsitakoaz beste bat izateko, berriz eskatu beharko dute baimena hurrengo deialdian, Hezkuntza Departamentuak horretarako ezartzen duen prozeduraren arabera beste proiektu bat aurkezturik.

II. ERANSKINA

Eskolaldi etengabea duten ikastetxeen zerrenda

(482/2021 Ebazpena eta 62/2022 Ebazpena)

Eskolaldi malgua duten ikastetxeen zerrenda

(482/2021 Ebazpena eta 62/2022 Ebazpena)

III. eranskina: Eskola Kontseiluak eskolaldia luzatzearen gainean egindako bilerako bozketaren akta.

IV. eranskina: eskolaldi etengabearen luzapena. Garraioaren irteera ordua aurreratzea.

Deskargatu III. eta IV. eranskinak (DOC).

Iragarkiaren kodea: F2215604