1. NAFARROAKO FORU KOMUNITATEA
1.7. BESTELAKOAK
279/2022 EBAZPENA, urriaren 13koa, Industria Antolamenduaren, Azpiegitura Energetikoen eta Meatzeen Zerbitzuko zuzendariak emana, zeinaren bidez aurretiazko administrazio baimena eta eraikitzeko administrazio baimena ematen baitira Cárcarren "Andosilla I Eguzki Instalazio FVa" izeneko energia elektrikoa ekoizteko 998,76 kWp-eko instalazio bat jartzeko.
1.–2020ko abenduaren 10ean egindako eskaera.
2020ko abenduaren 10ean, Compactaciones y Nivelaciones Pardo SLk aurretiazko administrazio baimena eta eraikitzeko administrazio baimena eskatu zituen Cárcarko udal mugartean "Andosilla I Eguzki Instalazio Fotovoltaikoa" izeneko energia elektrikoa ekoizteko 998,76 kWp-eko instalazio bat jartzeko, Sektore Elektrikoari buruzko abenduaren 26ko 24/2013 Legearen 53. artikuluan xedatutakoari jarraituz.
–Instalazioaren titularra: Compactaciones y Nivelaciones Pardo SL.
–Instalazioaren kokapena: Cárcarko udal mugarteko La Lobera ingurua.
–Instalazioaren ezaugarri teknikoak:
- Energia saltzeko eguzki instalazio fotovoltaikoa, 875 kW-eko potentzia izendatukoa.
- Inbertsoreak: 6 ekipo trifasiko, Ingeteam-en INGECON SUN 160TL motakoak edo antzekoak.
- Gehieneko potentzia, guztira: 998,76 kWp.
- Modulu fotovoltaikoak: 2.436 modulu, BYD markakoak edo antzekoak, MYK-36-5BB modelokoak, 410 Wp-koak. Instalazio fotovoltaikoak 20.932,15 m²-ko azalera izanen du.
- Transformazio zentroa: 1.000 kVA-ko 1 unit., 0,6/13,2 kV-koa.
- Babesak eta neurketa ekipoak barne.
- 13,2 kV-ko aireko-lurpeko ebakuazio-linea, Cárcar BTAko 13,2 kV-ko Cárcar-Cárcar lineako 120. euskarriko konexio punturaino.
Espedientean jasota dago onartu egin dela I-DE Redes Eléctricas Inteligentes SAU enpresak instalazio horretarako ezarritako sarbide eta konexio baldintza teknikoen txostena, 2021eko martxoaren 18koa (Esp.: 9038987899).
2.–Proiektuaren informazio publikoa.
Energia elektrikoa garraiatu, banatu, merkaturatu eta horniketa egiteko jarduerak eta energia elektrikoaren instalazioak baimentzeko prozedurak arautzen dituen abenduaren 1eko 1955/2000 Errege Dekretuaren 125. artikuluarekin bat etorriz, Industria Antolamenduaren, Azpiegitura Energetikoen eta Meatzeen Zerbitzuak jendaurrean jarri zuen Compactaciones y Nivelaciones Pardo SL-ren eskaera, iragarkia argitaratuz 2021eko 56. Nafarroako Aldizkari Ofizialean, martxoaren 11koan, bai eta Nafarroako Gobernuaren Gobernu Irekiaren webgunean ere.
3.–Kontsultak ukitutako administrazio publikoei eta interesdunei.
Abenduaren 1eko 1955/2000 Errege Dekretuaren 125. artikuluan ezarritakoarekin bat, Industria Antolamenduaren, Azpiegitura Energetikoen eta Meatzeen Zerbitzuak kontsulta egin zion Cárcarko Udalari.
Halaber, Nafarroako Gobernuko Ingurumen Eraginaren Atalari, Lurraldearen Antolamenduaren Atalari eta Ondare Historikoaren Zerbitzuari txostena eskatu zitzaien, bai eta Trantsizio Ekologikoaren eta Erronka Demografikoaren Ministerioari eta Ebroko Konfederazio Hidrografikoari ere. Bestalde, i-DE Redes Eléctricas Inteligentes SAUri separata bat bidali zitzaion.
4.–Jasotako txostenak eta alegazioak.
Eskatutako txostenen, egindako kontsulten eta jendaurreko informazio epearen esparruan, Industria Antolamenduaren, Azpiegitura Energetikoen eta Meatzeen Zerbitzuak txosten eta alegazio hauek jaso zituen:
–Txostenak:
1. txostena. Ondare Arkitektonikoaren Atalarena, 2021eko martxoaren 12koa.
2. txostena. Cárcarko Udalarena, 2021eko martxoaren 16koa.
3. txostena. Erregistroaren, Ondasun Higigarrien eta Arkeologiaren Atalarena, 2021eko abenduaren 10ekoa.
Ondare Arkitektonikoaren Atalaren eta Erregistroaren, Ondasun Higigarrien eta Arkeologiaren Atalaren txostenak eguzki parke fotovoltaikoa ezartzearen aldekoak izan ziren.
Cárcarko Udalaren txostenak adierazten zuen obra lizentzia emateko baldintza batzuk bete behar zirela, besteak beste, ebakuazio linea lurpekoa izatea, hesiaren baldintzak eta lurpeko kanalizazioa Udal Plan Orokorrak ezarritako antolamenduarekin bat etortzea.
Ez zen erantzunik jaso i-DE Redes Eléctricas Inteligentes SAUren, Lurralde Antolamenduaren Atalaren, Ingurumen Eraginaren Atalaren, Trantsizio Ekologikoaren eta Erronka Demografikoaren Ministerioaren eta Ebroko Konfederazio Hidrografikoaren aldetik.
–Alegazioak:
Lau alegazio jaso ziren:
1. alegazioa. Ana Gurbindo Cizur andrearena.
2. alegazioa. Gurelur elkartearena (ingurune naturala babesteko Nafarroako funtsa).
3. alegazioa. Nafarroako Ekologistak Martxan elkartearena.
4. alegazioa. Ekologistak Martxan-Ongaitz elkartearena.
Alegazioak ingurumen arlokoak ziren nagusiki. Horri dagokionez, adierazi behar da, proiektatutako instalazioaren ezaugarriak zirela eta, Compactaciones y Nivelaciones Pardo SL enpresaren eskaera elektrizitatearen sektoreko araudiari jarraituz jarri zela jendaurrean, hau da, abenduaren 1eko 1955/2000 Errege Dekretuari jarraituz, eta ez ingurumeneko araudiari. Nolanahi ere, proiektuaren ingurumen ukipenak dagokion izapidean ebaluatu ziren.
Gurelur elkartea-Ingurune naturala babesteko Nafarroako funtsak, Ekologistak Martxan-Ongaitz elkarteak eta Nafarroako Ekologistak Martxan elkarteak aurkeztutako alegazioei dagokienez, zeinetan adierazten zuten ez zela egin 4/2005 Foru Legeak eta 64/2006 Foru Aginduak eskatzen zuten ingurumen ukipenen nahitaezko azterketa eta, horregatik proiektu hau ezetsi egin behar zela, esan behar da ingurumen ukipenen azterketa egin dela, bai, eta ingurumen ukipenetarako baimenaren ebaluazioan kontuan hartu dela. Kontuan hartu behar da espediente hau elektrizitateari buruzko araudi sektorialari jarraituz jarri zela jendaurrean, ez ingurumen araudiari jarraituz, eta, beraz, ingurumen ukipenen azterketa ez zela jendaurrean jarri.
2030erako Nafarroako Energia Planari buruzko aipuei dagokienez, bidezkoa da adieraztea plan horrek prebisio orientagarri batzuk biltzen dituela, eta Nafarroak energiaren gaian eramanen duen estrategia markatzen badu ere, ez dela erregelamendu bat.
5.–Ingurumen ukipenetarako baimena.
Biodibertsitatearen Zerbitzuko zuzendariaren uztailaren 20ko 179E/2021 Ebazpenaren bidez, ingurumen ukipenetarako baimena ukatu zitzaion "Andosilla I" eguzki parke fotovoltaikoaren proiektuari, Lurralde eta Paisaia Zerbitzuaren kontrako txostenagatik, zeinetan honako hau jasotzen zen:
"Proiektuko eguzki parkea instalatzeko aukeratu den lurzatia honela dago sailkatuta Cárcarko Udal Planean: gorde beharreko lurzoru urbanizaezina, natura aldetik ustiatzeko balioa duena, nekazaritza eta abeltzaintzakoa. Cárcarko Udal Planean energia berriztagarriak aprobetxatzeko instalazioak aurreikusten badira ere, lurzoru urbanizaezinaren kategoria honetan, zehazki, horren babes araubideak (Araudi Partikularraren III. tituluko II. kapituluko 2.4 apartatua) ez ditu berariaz jasotzen baimendutako edo baimendu daitezkeen jardueren artean, eta, beraz, leku horretan debekatutzat jotzen dira".
6.–Espedientea berrikusteko eskaera.
2022ko urtarrilaren 20an, sustatzaileak espedientea berrikusteko eskaera aurkeztu zuen. Cárcarko Udal Plan Orokorraren Hirigintzako Araudi Partikularraren 2.4.1 artikulua, lurzoru urbanizaezinari buruzkoa, aldatu zela adierazi zuen –gorde beharreko lurzoruen kategorian eta ustiapen naturalerako balioa dutenen azpikategorian–, eta, bertan, eguzki energiako eta haize energiako instalazioak jarduera baimengarri gisa jasotzen zirela.
Berrikusteko eskaera Lurraldearen Antolamenduaren Atalari helarazi zitzaion, balora dezan, eta atal horrek adierazi zuen ez zela berrikusi behar ingurumen ukipenak baimentzeko aurretiko prozedura; aitzitik, hirigintzaren arloko baimen berri bat eskatu behar zela, Lurraldearen Antolamenduari eta Hirigintzari buruzko Foru Legearen testu bategina onesten duen uztailaren 26ko 1/2017 Legegintzako Foru Dekretuaren 118. artikuluan ezarritako prozedurari jarraituz.
7.–2022ko otsailaren 11n egindako eskaera.
2022ko otsailaren 11n, Sektore Elektrikoari buruzko abenduaren 26ko 24/2013 Legearen 53. artikuluan xedatutakoa aplikatuz, Compactaciones y Nivelaciones Pardo SLk aurretiazko administrazio baimena, eraikitzeko administrazio baimena, ingurumen baimena eta lurzoru urbanizaezineko jarduera baimena eskatu zituen, Cárcarko udal mugartean "Andosilla I Eguzki Instalazio Fotovoltaikoa" izeneko 998,76 kWp-eko instalazioa jartzeko.
Cárcarko Udalaren txostenean ezarritako baldintzak betetzeko, proiektuak zenbait aldaketa jaso zituen 2020ko abenduaren 10eko eskaerarekin alderatuta. Ebakuazio linearen trazadura eta instalazioko hesitik Ebroko Iraganbide Nagusia errege altxonbiderainoko tartea aldatu ziren. Banaketa sarearekiko konexio puntua aldatu zen; Cárcar BTAko 13,2 kV-ko Cárcar-Cárcar lineako euskarri berri batean kokatuko zen, 116. euskarriaren eta 117. euskarriaren artean. Ebakuazio linearen trazadura lurpekoa izanen zen, banaketa sarearekiko aireko-lurpeko konexioraino.
Suspertzerako Europako Bitartekoetatik heltzen diren funtsen bidez finantzatzen ahal diren jarduketak kudeatzeko eta betetzeko premiazko neurriak onesten dituen apirilaren 14ko 4/2021 Foru Lege Dekretuaren 12.a) artikuluan xedatutakoaren arabera, 1 MW-eko potentzia edo txikiagoa ekoizteko, eraldatzeko eta ebakuatzeko instalazioek, ingurumen eraginaren ebaluazioaren mende ez badaude eta onura publikoaren deklarazio zehatzik eskatzen ez bada, proiektu honen kasuan bezala, ez dute jendaurreko informazioaren izapidea bete behar administrazio baimena lortzeko.
8.–Kontsultak ukitutako administrazio publikoei.
Abenduaren 1eko 1955/2000 Errege Dekretuaren 125. artikuluan ezarritakoarekin bat, Industria Antolamenduaren, Azpiegitura Energetikoen eta Meatzeen Zerbitzuak kontsulta egin zion Cárcarko Udalari.
Era berean, Nafarroako Gobernuko Ondare Historikoaren Zerbitzuari txostena eskatu zitzaion eta i-DE Redes Eléctricas Inteligentes SAUri separata bat bidali zitzaion.
9.–Jasotako txostenak eta alegazioak.
Eskatutako txostenen eta egindako kontsulten esparruan, Industria Antolamenduaren, Azpiegitura Energetikoen eta Meatzeen Zerbitzuak txosten hauek jaso zituen:
–Txostenak:
1. txostena. Ondare Arkitektonikoaren Atalarena, 2022ko ekainaren 7koa.
2. txostena. Cárcarko Udalarena, 2022ko ekainaren 13koa.
3. txostena. I-DE Redes Eléctricas Inteligentes SAUrena, 2022ko ekainaren 20koa.
Aurreko txostenen edukia proiektuaren aldekoa da edo harekin bat dator.
10.–Ingurumen ukipenen ebaluazioa.
Espedientean jasota dago 242E/2022 Ebazpena, 2022ko abuztuaren 2koa, Biodibertsitatearen Zerbitzuko zuzendariarena, zeinaren bidez "Andosilla I" eta "Esperanza I" eguzki instalazio fotovoltaikoen proiektuen aldeko ingurumen ukipenen txostena egin zen, aipatutako ebazpenean jasotako neurri batzuk aplikatzeko baldintzapean.
11.–Lurzoru urbanizaezinean jarduerak egiteko baimena.
Era berean, espedientean jasota dago 320E/2022 Ebazpena, irailaren 26koa, Lurralde eta Paisaia Zerbitzuko zuzendariarena, zeinaren bidez baimena eman zen "Andosilla I" eguzki instalazio fotovoltaikorako (998,76 kWp), aipatutako ebazpenean jasotako determinazioak betetzeko baldintzapean.
12.–Aurretiazko administrazio baimena eta eraikitzeko administrazio baimena proposatzea.
Aurkeztutako dokumentazioa ikusita, eta kontuan hartuta abenduaren 1eko 1955/2000 Errege Dekretuaren VII. tituluan ezarritakoa (errege dekretu horren bidez arautu ziren energia elektrikoa garraiatu, banatu, merkaturatu eta horniketa egiteko jarduerak eta energia elektrikoaren instalazioak baimentzeko prozedurak) eta ekainaren 6ko 413/2014 Errege Dekretuan ezarritakoa (errege dekretu horren bidez arautu zen energia iturri berriztagarrietatik, kogeneraziotik eta hondakinetatik energia elektrikoa ekoizteko jarduera), Compactaciones y Nivelaciones Pardo SLk eskatutakoari erantzun behar zaio.
Adierazitakoarekin bat, eta Industriaren, Energiaren eta S3 Proiektu Estrategikoen zuzendari nagusiak azaroaren 18an emandako 52/2019 Ebazpenaren bidez eskuordetu dizkidan eskumenak (2019ko 234. Nafarroako Aldizkari Ofiziala, azaroaren 27koa) erabiliz, Nafarroako Foru Komunitateko Administrazioari eta Sektore Publiko Instituzionalari buruzko martxoaren 11ko 11/2019 Foru Legearen 32. eta 11. artikuluetan ezarritakoa betetzeko,
EBAZTEN DUT:
1. Aurretiazko administrazio baimena ematea Compactaciones y Nivelaciones Pardo SLri Cárcarko udal mugartean "Andosilla I Eguzki Instalazio Fotovoltaikoa" izeneko energia elektrikoa ekoizteko 998,76 kWp-eko instalazio bat jartzeko.
2. Eraikitzeko baimen administratiboa ematea eta instalazioak gauzatzeko aurkeztutako proiektuak onartzea, Manuel Cañas Mayordomo goi mailako ingeniari teknikoak eta Daniel Correro Cabrera industria ingeniari teknikoak izenpetuak, eta hogeita lau hilabeteko epea ematea obrak egiteko.
3. Instalazioak aurkeztutako proiektuari jarraikiz gauzatu beharko dira, eta bat etorri beharko dute honako hauetan xedatutakoarekin: Goi tentsioko instalazio elektrikoen baldintza teknikoei eta segurtasun bermeei buruzko erregelamendua onesten duen maiatzaren 9ko 337/2014 Errege Dekretua; Goi tentsioko linea elektrikoen baldintza teknikoei eta segurtasun bermeei buruzko erregelamendua onesten duen otsailaren 15eko 223/2008 Errege Dekretua; eta Behe tentsiorako Erregelamendu elektroteknikoa onesten duen abuztuaren 2ko 842/2002 Errege Dekretua.
4. Behin proiektua gauzaturik, eskatzaileak zerbitzuan jartzearen akta eskatu beharko du. Eskaera horri erantsiko zaizkio aipatutako araudian ezarritako agiriak eta obra bukaeraren ziurtagiria, teknikari eskudun batek sinatua.
5. Administrazio baimen hau emanda ere, instalazioa gauzatzeko beharrezkoak diren kontzesio, lizentzia eta baimen guztiak, publikoak nahiz pribatuak, lortu beharko ditu instalazioaren eskatzaileak, aplikatzekoak diren beste xedapen batzuekin bat.
6. Ebazpen hau Nafarroako Aldizkari Ofizialean argitaratzea, orok jakin dezan.
7. Ebazpen hau Nafarroako Gobernuko Industria Antolamenduaren, Azpiegitura Energetikoen eta Meatzeen Zerbitzura, Lurralde eta Paisaia Zerbitzura eta Ondare Historikoaren Zerbitzura igortzea, behar diren ondorioak izan ditzan.
8. Ebazpen hau jakinaraztea Compactaciones y Nivelaciones Pardo SLri, i-DE Redes Eléctricas Inteligentes SAUri, Ana Gurbindo Cizur andreari, Gurelur elkartea-Ingurune naturala babesteko Nafarroako funtsari, Nafarroako Ekologistak Martxan elkarteari eta Ekologistak Martxan-Ongaitz elkarteari, eta ohartaraztea ezen ebazpen honek ez duela administrazio bidea amaitzen eta honen aurka gora jotzeko errekurtsoa paratzen ahal dela, Garapen Ekonomiko eta Enpresarialeko kontseilariari zuzendua, hilabeteko epean, ebazpen hau jakinarazi eta biharamunetik hasita. Errekurtsoan espediente zenbakia adierazi beharko da.
9. Ebazpen hau Cárcarko Udalari jakinaraztea, eta aditzera ematea honen kontra administrazioarekiko auzi-errekurtsoa jartzen ahal dela, eskumena duen ordena jurisdikzionalari zuzendua, honako hau jakinarazi eta biharamunetik hasita bi hilabeteko epean, alde batera utzi gabe Nafarroako Gobernuan aldez aurreko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarritako moduan eta epean.
Iruñean, 2022ko urriaren 13an.–Industria Antolamenduaren, Azpiegitura Energetikoen eta Meatzeen Zerbitzuko zuzendaria, Laura Larraya Irigoyen.
Iragarkiaren kodea: F2213651
