192. ALDIZKARIA - 2022ko irailaren 27a

1. NAFARROAKO FORU KOMUNITATEA

1.7. BESTELAKOAK

104/2022 EBAZPENA, abuztuaren 30ekoa, Industriaren, Energiaren eta S4 Proiektu Estrategikoen zuzendari nagusiak emana, zeinaren bidez aurretiazko administrazio baimena eta eraikitzeko administrazio baimena ematen baitira eta onura publikoa duela zehazki deklaratzen baita “Cierzo” eguzki-instalazio fotovoltaikoa deitzen den eta 24,84 MWp-ko instalatutako gehieneko potentzia izanen duen energia elektrikoa ekoizteko instalazio baterako, Corellako udal-mugartean.

1. 2020ko otsailaren 13ko eskaera.

2020ko otsailaren 13an, Sektore Elektrikoari buruzko abenduaren 26ko 24/2013 Legearen 53. artikulua betez, “Cierzo” eguzki-instalazio fotovoltaikoarentzako aurretiazko administrazio baimena, eraikitzeko administrazio baimena eta haren onura publikoa zehazki deklaratzea eskatu zuen Suno Energía 4 SLk Industria Antolamenduaren, Azpiegitura Energetikoen eta Meatzeen Zerbitzuan. 2020ko martxoaren 13an, ingurumen-inpaktuaren azterketa aurkeztu zuen, Ingurumen Ebaluazioari buruzko abenduaren 9ko 21/2013 Legearen 36. artikuluaren arabera.

Instalazio fotovoltaikoak 24,84 MWp-ko puntako potentzia izanen du eta 44,26 hektarea hartuko ditu guztira, eta 62.100 modulu fotovoltaikok osatuko dute, 690 eguzki-jarraitzailetan banatuta. Eguzki-jarraitzaileak ardatz bakarrean mugituko dira eta bakoitzak 36 kWp-ko potentzia izanen du. Sei eremutan banatuko da, eta izanen ditu inbertsioko eta transformazioko 4 MVA-ko bost estazio, eta inbertsioko eta transformazioko 2 MVA-ko estazio bat.

Inbertsioko eta transformazioko estazio bakoitzetik 20 kV-eko tentsioko lurpeko linea bat abiatuko da eguzki-parkeko azpiestazio elektrikoraino. “Cierzo” azpiestazioa deituko da, 66/20 kV-eko transformazio-erlazioa eta 25 MVA-ko potentzia izanen du, eta Corellan kokatuko da.

Sortutako energia ebakuatzeko azpiegiturak lehenagotik Tuteran dagoen 220/66 kV-eko “La Serna” azpiestazioarekin lotuko dira. Lotura El Montecillo eta Corral del Molino I haize-parkeak ebakuatzeko azpiegituraren bitartez eginen da: 66 kV-ekoa da, “El Montecillo-La Senda” GTAL deitzen da, eta aurretiazko baimen administratiboa eta eraikitzeko baimenak ditu, Industriaren, Energiaren eta S4 Proiektu Estrategikoen zuzendari nagusiaren martxoaren 3ko 18/2022 Ebazpenaren eta ekainaren 1eko 59/2022 Ebazpenaren bidez emanak, hurrenez hurren.

Beraz, aipatutako “Cierzo” azpiestaziotik zirkuitu bakuneko 66 kV-eko aireko linea bat abiatuko da, 374,99 metro luzekoa, “El Montecillo-La Senda” GTALaren 08 zenbakiko euskarriraino.

Azken tartean, “El Montecillo-La Senda” GTAL linea komuna bitan banatuko da, haize-parkeen eta eguzki-parke fotovoltaikoen lotura puntuak “La Serna” azpiestazioko leku desberdinetan kokatuta daudelako. Horregatik, “Cierzo” eguzki-instalazio fotovoltaikoaren ebakuazio linearen azken tartea 66 kV-eko lurpeko linea elektriko bat izanen da, “El Montecillo-La Senda” GTAL lineatik atera eta lehendik dagoen 220/66 kV-eko “La Serna” azpiestazioraino joanen dena. Linearen azken tarte horren titulartasuna eta eraikuntza soil-soilik Suno Energía 5 SLri dagokio, “Guardian” eguzki-instalazio fotovoltaikoaren proiektuaren esparruan, zeinarentzat gaur egun badituen aurretiazko administrazio baimena eta eraikitzeko administrazio baimena, Industriaren, Energiaren eta S4 Proiektu Estrategikoen zuzendari nagusiaren uztailaren 26ko 81/2022 Ebazpenaren bidez lortuak.

Instalazioa sistema elektrikoarekin lotzeko puntua 220/66 kV-eko “La Serna” azpiestazioko 66 kV-eko barretan ezarriko da; azpiestazioa I-DE Redes Eléctricas Inteligentes SAUrena da, eta Red Eléctrica de España SAUren 220/400 kV-eko transformazioko azpiestazio elektrikoari atxikita dago. I-DE Redes Eléctricas Inteligentes SAUren 9038662573 erreferentziako espedientean jasota daude “Cierzo” eguzki-instalazio fotovoltaikorako sarbidearen eta loturaren aldeko txostena eta garraio sarearen ikuspegitik Red Eléctrica de España SAUk emandako onargarritasun txostena.

2. Jendaurreko informazioa proiektuaren, ingurumen-inpaktuaren azterketaren eta ukitutako ondasun eta eskubideen zerrendaren gainean.

Ingurumen Ebaluazioari buruzko abenduaren 9ko 21/2013 Legearen 36. artikuluan eta Energia elektrikoa garraiatu, banatu, merkaturatu eta haren horniketa egiteko jarduerak eta instalazioak baimentzeko prozedurak arautzen dituen abenduaren 1eko 1955/2000 Errege Dekretuaren 125. eta 144. artikuluetan xedatutakoaren arabera, Industria Antolamenduaren, Azpiegitura Energetikoen eta Meatzeen Zerbitzuak jendaurrean jarri zuen Suno Energía 4 SLk aurkeztutako dokumentazioa, iragarkia argitaratuz 2020ko 138. Nafarroako Aldizkari Ofizialean, ekainaren 23koan, Diario de Noticias egunkarian, 2020ko ekainaren 24an, bai eta Nafarroako Gobernuaren Gobernu Irekia webgunean ere.

3. Ukitutako administrazio publikoei eta interesdunei egindako kontsultak.

Abenduaren 9ko 21/2013 Legearen 37. artikuluan eta abenduaren 1eko 1955/2000 Errege Dekretuaren 127. artikuluan xedatutakoaren arabera, Industria Antolamenduaren, Azpiegitura Energetikoen eta Meatzeen Zerbitzuak kontsulta egin zien Ingurumen Eraginaren Atalari, Lurraldearen Antolamenduaren Atalari, Ondare Historikoaren Zerbitzuari, Herri-lanen eta Azpiegituren Zuzendaritza Nagusiari eta Corellako Udalari.

4. Jasotako txostenak eta alegazioak.

Eskatutako txostenen, egindako kontsulten eta jendaurreko informazio tramitearen esparruan, Industria Antolamenduaren, Azpiegitura Energetikoen eta Meatzeen Zerbitzuak txosten eta alegazio hauek jaso zituen:

–Txostenak:

  • 1. txostena. Lurraldearen Antolamenduaren Atalarena, 2020ko ekainaren 2koa.
  • 2. txostena. Zainketa Zerbitzuarena, 2020ko ekainaren 23koa.
  • 3. txostena. Corellako Udalarena, 2020ko abuztuaren 14koa.
  • 4. txostena. Ondare Arkitektonikoaren Atalarena, 2020ko abuztuaren 24koa.
  • 5. txostena. Ingurumen Eraginaren Atalarena, 2020ko irailaren 23koa.

Aurreko txostenen edukia ebazpen honen xede den espedientean dago, eta ebazpenaren I. eranskinean laburbiltzen da.

–Alegazioak:

  • 1. alegazioa. Gurelur elkartearena, 2020ko abuztuaren 5ekoa.
  • 2. alegazioa. Corellako Ureztaketa Sindikatuarena, 2020ko uztailaren 31koa.
  • 3. alegazioa. Nafarroako Paisaiak eta Mahastiak elkartearena, 2020ko uztailaren 23koa.

Aurreko alegazioen edukia, epearen barnean jaso baitziren, ebazpen honen xede den espedientean dago, eta ebazpenaren II. eranskinean laburbiltzen da.

5. Jendaurreko informazioaren eta kontsulten emaitza sustatzaileari igortzea.

Abenduaren 9ko 21/2013 Legearen 38. artikuluan eta abenduaren 1eko 1955/2000 Errege Dekretuaren 127. artikuluan xedatutakoaren arabera, 2020ko urriaren 15ean eta 30ean, Industria Antolamenduaren, Azpiegitura Energetikoen eta Meatzeen Zerbitzuak Suno Energía 4 SLri igorri zizkion aipatutako txostenak eta alegazioak, proiektuaren, ingurumen-inpaktuaren azterketaren eta ukitutako ondasun eta eskubideen zerrendaren jendaurreko informazio tramitean jaso zirenak.

6. Alegazioei eta txostenei emandako erantzuna.

Ingurumen Ebaluazioari buruzko abenduaren 9ko 21/2013 Legearen 39. artikuluan xedatua aintzat hartuz, 2020ko urriaren 16an, Suno Energía 4 SLk ingurumen-inpaktuaren ebaluazioa hasteko eskatu zuen, eta jendaurreko informazio tramitean jasotako alegazio eta txostenei eman zien erantzuna erantsi zion eskaerari.

Artikulu berari jarraituz, 2020ko urriaren 20an, Industria Antolamenduaren, Azpiegitura Energetikoen eta Meatzeen Zerbitzuak Ingurumen Eraginaren Atalera igorri zuen aipatutako eskaera.

7. Ingurumen-inpaktuaren adierazpena.

Proiektuaren ezaugarriak direla-eta, Ingurumen Ebaluazioari buruzko abenduaren 9ko 21/2013 Legearen II. eranskinean sartzen da, ingurumen-ebaluazio sinplifikatua behar duten proiektuen epigrafean. Hala ere, lege horren 7. artikuluaren arabera, ingurumen-inpaktuaren ebaluazio sinplifikatua behar duten proiektuei ingurumen-inpaktuaren ebaluazio arrunta eginen zaie sustatzaileak hori eskatzen badu, eta horrela jokatu da kasu honetan.

Ingurumen-inpaktuaren azterketa ikusi ondoren, ingurumen-organoak ondorioztatu du eguzki-instalazioak eta haren azpiegiturek ez dutela eraginik Europar Batasunaren intereseko habitatetan, haietatik kanpo daudelako, ezta katalogazio motaren bat duen landaredi naturalean ere. Era berean, ez dago ezein naturagune babesturen mugen barnean, ezta Natura 2000 Sarearen barneko espazio batean ere. Zenbat neurri prebentibo eta zuzentzaile gehitu ondoren, inpaktu orokorra bateragarritzat jotzen da, eta ingurumen-zaintzarako plan bat ere erantsi da, eraikuntza lanak egin bitartean zaindu beharreko alderdiak jasotzen dituena.

Espedientearen azterketa teknikoa egin ondoren, Biodibertsitatearen Zerbitzuko Ingurumen Eraginaren Atalak, Ingurumeneko zuzendari nagusiaren apirilaren 26ko 397E/2021 Ebazpenaren bidez, aldeko ingurumen-inpaktuaren adierazpena egin zuen, baina zenbait baldintzarekin. Ezartzen du jarduera gauzatu behar dela espedienteari erantsitako dokumentazio teknikoan jasotako baldintzen arabera eta ebazpenean bertan jasotakoen arabera (aipatu ebazpena 2021eko 121. Nafarroako Aldizkari Ofizialean, maiatzaren 25ekoan, argitaratu zen). Ingurumen-inpaktuaren ebaluazioari buruzko azken ebazpena zenez, jarduera baimentzen den ala ez erabakitzen duena, proiektuaren ukipenen gaineko txosten partzial guztiak biltzen ditu.

8. Lurzoru urbanizaezineko baimena.

Lurralde eta Paisaia Zerbitzuko zuzendariaren abenduaren 17ko 304E/2021 Ebazpenaren bidez, lurzoru urbanizaezinean jarduerak egiteko baimena eman zen “Cierzo” eguzki-instalazio fotovoltaikoaren eta haren ebakuazio azpiegituren proiekturako, baina ebazpenean ezartzen diren baldintzak bete beharrarekin.

9. Espedientearen azterketa teknikoa eta aurretiazko baimen administratiboa eta eraikitzeko baimen administratiboa emateko proposamena.

Kontuan hartuta espedienteko informazioa, Ingurumeneko zuzendari nagusiaren apirilaren 26ko 397E/2021 Ebazpena eta Lurralde eta Paisaia Zerbitzuko zuzendariaren abenduaren 17ko 304E/2021 Ebazpena, eta espedientearen azterketa teknikoa egin ondoren, Industria Antolamenduaren, Azpiegitura Energetikoen eta Meatzeen Zerbitzuko Azpiegitura Energetikoen Atalak ondorioztatu du behar bezala gauzatu dela prozedura, eta proposatu du espedientea ebaztea “Cierzo” eguzki-instalazio fotovoltaikoa izeneko energia elektrikoa ekoizteko instalazioari aurretiazko administrazio baimena emanez eta exekuzio proiektua onetsiz.

Adierazitakoarekin eta espedientean jasotako agiriekin bat, eta Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 32. artikuluak ematen dizkidan eskudantziak erabiliz,

EBAZTEN DUT:

1. Aurretiazko baimen administratiboa eta eraikitzeko administrazio baimena ematea Suno Energía 4 SLk sustatzen duen eta 24,84 MWp-ko puntako potentzia izanen duen “Cierzo” eguzki-instalazio fotovoltaikorako, Corellako udal-mugartean.

2. Onestea instalazioak egiteko aurkeztutako proiektua, Javier de Pedro Íñigo industria ingeniari teknikoak sinatua. Hogeita lau hilabete eman zaizkio obrak burutzeko.

3. Instalazio horren onura publikoa zehazki deklaratzea, Sektore Elektrikoari buruzko abenduaren 26ko 24/2013 Legearen 54., 55. eta 56. artikuluetan, eta abenduaren 1eko 1955/2000 Errege Dekretuaren 148. eta 149. artikuluetan ezarritakoarekin bat; hori horrela, enpresa eskatzailea onuraduna izanen da desjabetze-espedientean.

4. Instalazioak aurkeztutako proiektuaren arabera gauzatu beharko dira, eta honako arau hauetan xedatutakoa bete beharko dute: Goi tentsioko instalazio elektrikoen baldintza teknikoei eta segurtasun bermeei buruzko erregelamendua onesten duen maiatzaren 9ko 337/2014 Errege Dekretua; Goi tentsioko linea elektrikoen baldintza teknikoei eta segurtasun bermeei buruzko erregelamendua onesten duen otsailaren 15eko 223/2008 Errege Dekretua; eta Hegaztiak goi tentsioko linea elektrikoen aurka talka egitetik eta elektrokutatzetik babesteko neurriak ezartzen dituen abuztuaren 29ko 1432/2008 Errege Dekretua.

5. Behin proiektua gauzaturik, eskatzaileak zerbitzuan jartzearen akta eskatu beharko du. Eskaera horri erantsiko zaizkio aipatutako araudian ezarritako agiriak eta obra bukaeraren ziurtagiria, teknikari eskudun batek sinatua.

6. Aurretiazko administrazio baimena eta eraikitzeko administrazio baimena emanda ere, instalazioaren eskatzaileak lortu beharko ditu instalazioa gauzatzeko beharrezkoak diren emakida, lizentzia eta baimen guztiak, publikoak nahiz pribatuak, aplikatzekoak diren beste xedapen batzuekin bat.

7. Ebazpen hau Nafarroako Aldizkari Ofizialean argitaratzea, orok jakin dezan.

8. Ebazpen hau igortzea, behar diren ondorioak izan ditzan, Industria Antolamenduaren, Azpiegitura Energetikoen eta Meatzeen Zerbitzuari, Ingurumen Eraginaren Atalari, Lurraldearen Antolamenduaren Atalari, Zainketa Zerbitzuari eta Ondare Historikoaren Zerbitzuari.

9. Ebazpen hau jakinaraztea Suno Energía 4 SLri, Suno Energía 5 SLri, I-DE Redes Eléctricas Inteligentes SAUri, Red Eléctrica de España SAUko Sarean Sartzeko Departamentuari, Red Eléctrica de España SAUko Tramitazioen Departamentuari, Gurelurri, Nafarroako Paisaiak eta Mahastiak elkarteari, Corellako Ureztaketa Sindikatuari, Renovables del Cierzo SLUri eta Enerfin Sociedad de Energía SLUri, eta ohartaraztea ebazpenak ez duela administrazio bidea amaitzen eta haren aurka gora jotzeko errekurtsoa jartzen ahal dela, jakinarazi eta biharamunetik hilabeteko epean, Garapen Ekonomiko eta Enpresarialeko kontseilariari zuzenduta eta espediente zenbakia adieraziz.

10. Ebazpen hau Corellako Udalari jakinaraztea, eta aditzera ematea honen kontra administrazioarekiko auzi-errekurtsoa jartzen ahal dela, Nafarroako Justizia Auzitegi Nagusiko Administrazioarekiko Auzien Salari zuzendua, bi hilabeteko epean, ezertan galarazi gabe Nafarroako Gobernuan aldez aurreko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarritako moduan eta epean.

Iruñean, 2022ko abuztuaren 30ean.–Industriaren, Energiaren eta S4 Proiektu Estrategikoen zuzendari nagusia, Uxue Itoiz Mariñelarena.

I. ERANSKINA

Jasotako txostenak

Jasotako txostenen laburpena eta analisia azalduko dira jarraian.

1. txostena.–Lurraldearen Antolamenduaren Atala.

Proiektuaren lurralde eta hirigintza bateragarritasunari dagokionez, txostenak ohartarazten zuen ezen, 54/2006 Foru Aginduaren arabera, ezin dela eguzkia aprobetxatzeko instalaziorik ezarri udal planeamenduak nekazaritzako produktibitate handiko lurzoru eta zuhaitzik gabeko baso lurzoru gisa sailkatutako lurretan.

Baina geroago, Corellako Udal Plan Orokorra onetsi zen, Lurralde Antolamenduko, Etxebizitzako, Paisaiako eta Proiektu Estrategikoetako kontseilariaren urriaren 14ko 131E/2021 Foru Aginduaren bidez, udalerri horretako Udalak sustatuta, eta, horren ondorioz, lehen nekazaritzako produktibitate handiko lurzoru eta zuhaitzik gabeko baso lurzoru gisa sailkatuta zeuden lurrei sailkapen hori kendu zaie.

2. txostena.–Zainketa Zerbitzua.

Txostenean esan zuen proiektatutako jarduketak Nafarroako errepide sareari eragiten diola, lurpeko linea bat NA-6891 errepidearekiko paralelo joanen delako, eta sustatzaileak, lanak gauzatu aurretik eta lanak baimentzeko nahitaezko eskaerarekin batera, baimena emateko behar den dokumentazio teknikoa aurkeztu beharko duela Herri-lanen Zuzendaritza Nagusian.

3. txostena.–Corellako Udala.

Txostenean esan zuen hiru kategoriatako lurzatietan kokatuta daudela azpiegiturak (nekazaritzako produktibitate handiko lurzoruan, zuhaitzik gabeko baso lurzoruan eta bide publikoetan), eta hiruretan dela baimengarria proiektuaren xedea, indarrean den Corellako Udal Planeko araudiaren arabera.

Erantzuna: Sustatzaileak ez du eragozpenik jarri txostenari buruz, eta dagokion obra lizentzia eskatuko dio Corellako Udalari.

4. txostena.–Ondare Arkitektonikoaren Atala.

Adierazi du ez dagoela ukipenik atal horren eskumeneko arloetan.

5. txostena.–Ingurumen Eraginaren Atala.

Aurkeztutako dokumentazioa aztertu ondoren, ingurumen-inpaktuaren azterketari dagokionez, honako hau dio:

–Instalazioa lurraren topografia naturalera egokitu beharko da, lur mugimenduak ahalik txikienak izan daitezen. Orobat, lur mugimenduak kuantifikatu eta zehaztu beharko dituzte.

–Perimetroko hesiak animalia txikiei pasatzen utzi behar die.

–Sinergien azterketak kontuan hartu beharko ditu azterketa eremuan lehendik dauden edo tramitatzen ari diren gainerako azpiegiturak.

–Estepako abifauna kontserbatzeko garrantzizko eremuetan (EAKGE) eragiten ahal den ukipena aztertu beharko da, eta barnean sartu beharko da eremu horien artean eragiten den hesi efektuaren eta konektagarritasun galeraren azterketa.

–Estepako abifaunaren gaineko ukipena konpentsatzeko neurri gisa ezarritako gutxieneko lurzatiak eremu lau, ireki eta gailenetan kokatuko dira, lehentasunez, “Ombatillo-Morterete” EAKGEaren barnean, edo inguruko estepako hegaztientzat interesekoak diren beste eremu batzuetan. Lurzatiak hautatzeko, Biodibertsitatearen Zerbitzuari galdetzen ahal diote. Lurzatiak arinki goldatuko dira 2 edo 3 urtean behin, azaroan, abenduan, urtarrilean edo otsailean.

II. ERANSKINA

Jasotako alegazioak

Jaso diren alegazioen laburpena eta analisia azalduko dira jarraian.

1.–Gurelur - Ingurune Naturala Babesteko Nafarroako Funtsa elkartea.

Proiektuari dagokionez, alegatu du proiektua eta proposatutako alternatibak ez direla teknikoki bideragarriak, sortutako energia ebakuatzeko El Montecillo - La Senda GTAL linea elektrikoa behar delako, baina gaur egun ez dago horrelakorik, eta ez dago proiektuan sartuta.

–Ingurumen-inpaktuaren azterketari dagokionez:

  • Proposatutako alternatibak ez dira teknikoki bideragarriak, eta ez da irizpide anitzeko azterketarik egin alternatiba bakoitza konparatuta.
  • Fauna inbentarioak iturri bibliografikoetako informazioa baino ez du biltzen.
  • Eguzki-zentralen saturazioa gainditzen du eremu horretan, ingurumenaren ikuspuntutik.
  • Ez da kuantifikatzen eraikitzeko zenbat lur mugitu behar den.
  • 2030erako Nafarroako Energia Planean (2030NEP) jasotako helburuen aurkakoa da instalazioa.
  • Sinergien azterketa egitean, ez dituzte kontuan hartu ez handik hurbil eraikiko den El Montecillo haize-parkea ez ebakuazio linea, biak ere inpaktu handiko azpiegiturak diren arren.
  • Proiektuan, lurpean egin beharko litzateke “Cierzo” transformazioko azpiestaziotik ateratzen den linea, “El Montecillo-La Senda” GTALarekin lotzen den puntura arte.
  • Dokumentuan jasotako landareztatze plana ez da nahikoa.

Erantzuna:

Instalazio fotovoltaikoaren lotura El Montecillo eta Corral del Molino I haize-parkeak ebakuatzeko azpiegituraren bitartez eginen da: 66 kV-ekoa da, “El Montecillo-La Senda” GTAL deitzen da, eta aurretiazko baimen administratiboa eta eraikitzeko baimenak ditu, Industriaren, Energiaren eta S4 Proiektu Estrategikoen zuzendari nagusiaren martxoaren 3ko 18/2022 Ebazpenaren eta ekainaren 1eko 59/2022 Ebazpenaren bidez emanak, hurrenez hurren.

Instalazioa ez da 2030erako Nafarroako Energia Planean jasotako helburuen aurkakoa; aitzitik, helburu horiek betetzen laguntzen duela esaten ahal da. Zehazki, 2030NEParen helburu nagusietako bat da energia berriztagarrietatik datorren azken energiaren ehunekoa handitzea, berotegi efektuko gasen eta osasunarentzat kaltegarriek diren partikulen isuriak murriztu daitezen.

Ingurumen-inpaktuaren adierazpenaren esparruan ebaluatu eta aintzat hartu ziren ingurumenarekin loturiko edukia duten alegazioak.

2.–Corellako Ureztaketa Sindikatua.

Alegazio-egileak eskatu du kontsulta egin diezaiotela erretenen bati eragiten ahal dion edozein jarduketa egin baino lehen eta, halakoetan, lehentasuna izan dezatela ureztatzeko txandak eta eskubideak. Era berean, azaldu du Nafarroako Ubidearen 2. faseak ukitutako eremu ureztagarriaren barnean dagoela instalazioa, eta eskatzen du eremu ureztagarri horren zatietako bat izaten jarrai dezala.

Erantzuna:

Sustatzaileak adierazi du ados dagoela, eta prest dagoela alegazio-egilearekin batera egiteko obretarako behar diren zuinketak, baita adostutako aldian egiteko eta ureztatzeko txandari eta eskubideari lehentasuna emateko ere. Trazadurak aldatu behar izanez gero, sustatzaileak baimena eskatuko du, eta bi alderdiek adostutako baldintzetan eginen da.

3.–Nafarroako Paisaiak eta Mahastiak elkartea.

–Alegazio-egileak eskatu du prozeduran interesdun izaera aitor diezaiotela eta, proiektuari dagokionez, hau alegatu du:

  • Ebakuazio linea osoa sartu behar da.
  • “Guardian” eta “Cierzo” eguzki-instalazio fotovoltaikoen proiektuek ebakuazio linea bera partekatzen dute, eta instalazio bakartzat hartu behar dira.
  • Eragin ekonomiko positiborik eza.

–Ingurumen inpaktuaren azterketari dagokionez, hau alegatzen du:

  • “Guardian” eta “Cierzo” eguzki-instalazio fotovoltaikoen inpaktua osotara aztertzen duen ingurumen-inpaktuaren azterketa bat aurkeztu behar da.
  • Ez dago alternatiben ebaluazio zuzenik.
  • Ez du betetzen 4/2005 Foru Dekretua, martxoaren 22koa, Ingurumena Babesteko Esku-hartzeari buruzkoa.
  • Ez dago eremu babestuen maparik, ezta lurzoruen hirigintza sailkapenaren maparik ere.
  • Ez dago babestutako espezieentzako arriskuaren azterketarik, paisaiarentzako arriskuaren ebaluaziorik, ezta sute arriskuaren ebaluaziorik ere.

Erantzuna:

Instalazio fotovoltaikoaren lotura El Montecillo eta Corral del Molino I haize-parkeak ebakuatzeko azpiegituraren bitartez eginen da: 66 kV-ekoa da, “El Montecillo-La Senda” GTAL deitzen da, eta aurretiazko baimen administratiboa eta eraikitzeko baimenak ditu, Industriaren, Energiaren eta S4 Proiektu Estrategikoen zuzendari nagusiaren martxoaren 3ko 18/2022 Ebazpenaren eta ekainaren 1eko 59/2022 Ebazpenaren bidez emanak, hurrenez hurren.

Energia berriztagarrien proiektu batzuek energia ebakuatzeko sistema partekatzeak ez du esan nahi nahitaez instalazio bakartzat hartu behar direnik. Are gehiago, instalazioen erabilera partekatzeak ingurumenean duten eragina gutxitzea dakar.

Oro har, ulertu behar da sustatzailearen ahalmena dela instalazio elektriko bat diseinatzea eta zehaztea, enpresa askatasunak babesten baitu (Konstituzioaren 39. artikuluaren eta Sektore Elektrikoari buruzko abenduaren 26ko 24/2013 Legearen 2.1 artikuluaren arabera). Ahalmen hori baliatuz, sustatzaileak banaka aurkeztu zizkion Industria Antolamenduaren, Azpiegitura Energetikoen eta Meatzeen Zerbitzuari eguzki-instalazio fotovoltaikoetarako (haien ebakuazio azpiegiturak barne) aurretiazko administrazio baimenen eskaerak.

Bestalde, bi proiektuetako bakoitzak sarbide eta lotura baimen independenteak ditu. Gainera, instalazio fotovoltaiko bakoitzak bere transformazioko azpiestazioa dauka, eta modu independentean sortzen ahal du energia elektrikoa.

Azkenik, nabarmendu behar da bi proiektuak proiektu independentetzat jotzeak ez duela ekarri araubide juridikoa onuragarriagoa izatea ingurumen-ebaluazioaren ikuspuntutik.

Ingurumen-inpaktuaren adierazpenaren esparruan ebaluatu eta aintzat hartu ziren ingurumenarekin loturiko edukia duten alegazioak.

Iragarkiaren kodea: F2211774