1. NAFARROAKO FORU KOMUNITATEA
1.7. BESTELAKOAK
488/2022 EBAZPENA, abuztuaren 19koa, Toki Administrazioaren eta Despopulazioaren zuzendari nagusiak emana, 2022ko ekitaldiko transferentzia arrunten bidez toki entitateek Nafarroako tributuetan parte hartzeko duten funtsagatik Nafarroako udalei eta kontzejuei dagozkien behin betiko zenbatekoak onartzen dituena.
Martxoaren 22ko 7/2022 Foru Legearen bidez transferentzia arrunten bidez toki entitateek Nafarroako tributuetan parte hartzeko duten funtsa nola banatu ezartzen da.
Foru lege horren 3. artikuluak ezartzen du Transferentzia Arrunten Funtsaren zuzkidura 257.859.026 eurokoa izanen dela 2022ko ekitaldirako, Nafarroako Udal eta Kontzejuen Federaziorako laguntza barne.
4. artikuluak hasiera batean honela banatzen du 2022an udalen eta kontzejuen artean banatu beharreko Transferentzia Arrunten Funtsaren zenbatekoa:
–Finantzaketa Orokorreko Funtsa: 196.709.026 euro.
–Zerbitzuak Finantzatzeko Funtsa: 20.000.000 euro.
–Montepioen defizita Finantzatzeko Funtsa: 24.500.000 euro.
–Lurralde Kohesiorako Funtsa: 16.200.000 euro.
Horren ondorioz eta 7/2022 Foru Legean xedatutakoa aplikatuz, Kudeaketa Ekonomiko-finantzariorako Atalak funtsa banatzeko txostena egin du eta bertan zehaztu ditu Finantzaketa Orokorreko Funtsa (1. eranskina), Finantzaketa Orokorreko Funtsaren banaketa kontzejuen artean (2. eranskina), Zerbitzuak Finantzatzeko Funtsa (3. eranskina), Montepioen defizita Finantzatzeko Funtsa (4. eranskina) eta Lurralde Kohesiorako Funtsa (5. eranskina) kalkulatzeko eta banatzeko erabilitako prozedura eta aldagaiak. Era berean, udalei eta kontzejuei Transferentzia Arrunten Funts gisa dagozkien behin betiko zenbatekoak zehaztu dira, aipatutako arauaren 19. artikuluan ezarritako berme-klausula aplikatuz. Toki entitate bakoitzari dagokion behin betiko zenbatekoaren xehetasuna ebazpen honen 6. eranskinean dago jasota.
Administrazioen arteko lankidetzaren printzipioari jarraikiz, Sektore Publikoaren Araubide Juridikoaren urriaren 1eko 40/2015 Legearen 3.1.k artikuluan xedatutakoa, eta Administrazio Publikoen Administrazio Prozedura Erkidea arautzen duen urriaren 1eko 39/2015 Legearen 82. artikulua aplikatuz, 10 egun balioduneko epea eman zaie toki entitateei, dokumentazioa aztertu eta aurkezteko, hala badagokio, egoki iritzitako alegazioak.
Jendaurrean jartzeko iragarkia 2022ko 150. NAOn argitaratu zen, uztailaren 28koan, eta horretarako ezarritako epean bi alegazio aurkeztu dira, biak Antsoaingo Udalarenak:
Lehenengoak “65 urte edo gehiago dituzten biztanleen haztapena” aldagaiaren balioari egiten dio erreferentzia. Udalak emandako kalkulua ez da egin martxoaren 22ko 7/2022 Foru Legearen I. eranskinaren 3. apartatuan eta 6. artikuluaren 3. apartatuan ezarritakoaren arabera. Ondorioz, alegazioa ezetsi egin behar da.
Bigarren alegazioan, Antsoaingo Udala ez dago ados liburutegiari emandako azalerarekin, eta haren katastro-azalera ematen du.
Horri dagokionez, adierazi behar da Kultura eta Kirol Departamentuko Liburutegi Zerbitzuak liburutegi bakoitzaren erabilera-azalera eman duela, katastro-azalera ez bezalakoa; izan ere, azken horrek azalera eraikia gehi unitate bakoitzari dagozkion eraikuntza osoko eremu komunen zati proportzionala hartzen ditu. Ondorioz, alegazioa ezetsi egin behar da.
Alegazioak aurkezteko ezarritako epea amaituta eta aurkeztutakoak aztertu ondoren, Nafarroako udal eta kontzejuei dagozkien behin betiko zenbatekoak onartu behar dira, 2022ko ekitaldiko transferentzia arrunten bidez toki entitateek Nafarroako tributuetan parte hartzeko duten funtsagatik.
Horrenbestez, Lurralde Kohesiorako Departamentuaren egitura organikoa ezarri zuen urriaren 30eko 263/2019 Foru Dekretuaren bidez eskuratu ditudan eskumenak erabiliz,
EBATZI DUT:
1. Azalpen zatian adierazitakoari jarraituz, 2022ko ekitaldiko transferentzia arruntengatik toki entitateek Nafarroako tributuetan parte hartzeko duten Funtsaren banaketa jendaurrean jartzeko izapidea.
2. 2022ko ekitaldiko transferentzia arrunten bidez toki entitateek Nafarroako tributuetan parte hartzeko duten funtsagatik Nafarroako udalei eta kontzejuei dagozkien behin betiko zenbatekoak onartzea. Zenbatekoa guztira 257.409.026 eurokoa da, ebazpen honen 6. eranskinean toki entitate bakoitzeko jasotzen den xehetasunaren arabera.
3. Banaketa honen ondoriozko gastua “Transferentzia arrunten funtsa” izeneko 211001-21200-4600-942100 partidaren kontura izanen da 233.035.345,39 euroko zenbatekoarekin eta “Konpentsazioa udalei Montepioagatik” izeneko 211001-21200-4600-942105 partidaren kontura 24.373.680,61 euroko zenbatekoarekin, biak 2022ko ekitaldiko gastu-aurrekontukoak.
4. Ebazpen hau igortzea Toki Administrazioaren eta Despopulazioaren Zuzendaritza Nagusiko kontabilitate zentrora. Halaber, ebazpen hau toki entitate interesdunei ere igorriko zaie eta Nafarroako Aldizkari Ofizialean eta Zuzendaritza Nagusiaren web orrian argitaratuko da.
5. Ebazpen honen aurka administrazioarekiko auzi-errekurtsoa jartzen ahalko da, Nafarroako Auzitegi Nagusiko Administrazioarekiko Auzien Salari zuzendua, bi hilabeteko epean, argitaratu eta biharamunetik hasita. Horrek ez du alde batera uzten Nafarroako Gobernuan aldez aurreko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarritako moduan eta epean.
Iruñean, 2022ko abuztuaren 19an.–Toki Entitateentzako Aholkularitza Juridikoaren eta Lankidetzaren Zerbitzuko zuzendaria. (Toki Administrazioko eta Despopulazioko zuzendari nagusiaren aldi baterako ordezkapena, Lurralde Kohesioko kontseilariaren abuztuaren 20ko 3/2019 Foru Aginduarekin bat), Ana Rodríguez Hidalgo.
1. ERANSKINA.
2022ko Finantzaketa Orokorreko Funtseko aldagaiak eta hasierako banaketa.
2. ERANSKINA.
Finantzaketa Orokorreko Funtsaren Banaketa kontzejuen artean.
3. ERANSKINA.
2022ko Zerbitzuak Finantzatzeko Funtsa.
4. ERANSKINA.
2022ko Montepioen Defizita Finantzatzeko Funtsa.
5. ERANSKINA.
2022ko Lurralde Kohesiorako Funtsa.
6. ERANSKINA.
2022ko Transferentzia Arrunten Funtsaren behin betiko esleipena.
Deskargatu 1. eranskinetik 6. eranskinera bitarte (PDFa).
Iragarkiaren kodea: F2211400
