1. NAFARROAKO FORU KOMUNITATEA
1.7. BESTELAKOAK
58/2022 EBAZPENA, abuztuaren 5ekoa, Lehendakaritza eta Gobernu Irekiko zuzendari nagusiak emana, zeinaren bidez xedatzen baita Nafarroako Aldizkari Ofizialean argitaratzea Estatuko Administrazio Orokorraren eta Nafarroako Foru Komunitatearen arteko Lankidetza Batzordearen 2022ko abuztuaren 2ko Erabakia, Kontratu Publikoei buruzko apirilaren 13ko 2/2018 Foru Legea aldatzen duen urriaren 21eko 17/2021 Foru Legearen gainekoa.
Aintzat hartuz Konstituzio Auzitegiari buruzko urriaren 3ko 2/1979 Lege Organikoaren 33. artikulua, urtarrilaren 7ko 1/2000 Lege Organikoak aldatu zuena,
EBAZTEN DUT:
Estatuko Administrazio Orokorraren eta Nafarroako Foru Komunitatearen arteko Lankidetza Batzordearen Erabakia, ebazpen honi eranskin gisa gehitu zaiona, Nafarroako Aldizkari Ofizialean argitara dadila xedatzea.
Iruñean, 2022ko abuztuaren 5ean.–Lehendakaritzako eta Gobernu Irekiko zuzendari nagusia, Joseba Asiain Albisu.
ERANSKINA
Estatuko Administrazio Orokorraren eta Nafarroako Foru Komunitatearen arteko Lankidetza Batzordearen Erabakia, Kontratu Publikoei buruzko apirilaren 13ko 2/2018 Foru Legea aldatzen duen urriaren 21eko 17/2021 Foru Legearen gainekoa
Estatuko Administrazio Orokorraren eta Nafarroako Foru Komunitatearen arteko Lankidetza Batzordeak erabaki hau hartu du:
I.–Estatuko Administrazio Orokorraren eta Nafarroako Foru Komunitatearen arteko Aldebiko Lankidetza Batzordearen Erabakiaren bidez, lantalde bat eratu zen urriaren 21eko 17/2021 Foru Legearen artikulu bakarraren bi, hogeita bi, hogeita hamahiru, hogeita hamalau, hogeita hemeretzi, berrogeita hamabi, berrogeita hamasei, hirurogeita hiru eta hirurogeita bost apartatuak direla-eta sorturiko desadostasunak aztertzeko (17/2021 Foru Lege hori 2021eko 251. Nafarroako Aldizkari Ofizialean argitaratu zen, azaroaren 2koan, eta haren bidez Kontratu Publikoei buruzko apirilaren 13ko 2/2018 Foru Legea aldatu zen). Lantalde horretan izandako negoziazioekin bat, bi alderdien iritziz konponduta daude desadostasun horiek, erabaki honen xedeko alderdiei dagokienez, konpromiso hauek hartuta:
1. Bi aldeek erabakitzen dute ezen, hurrengo manuak eskumenen ordenaren arabera interpretatzeko, Estatuan kontratazioaren arloan indarra duen oinarrizko legeriaren funtsezko printzipioak errespetatu behar direla, bat etorriz Espainiako Konstituzioan eta Nafarroako Foru Eraentza Berrezarri eta Hobetzeari buruzko abuztuaren 10eko 13/1982 Lege Organikoaren 49.1.d) artikuluan ezarritakoarekin; besteak beste, tratu-berdintasunaren eta diskriminazio ezaren printzipioa, gardentasunaren printzipioa, publizitatearen printzipioa eta lehia askearen printzipioa. Printzipio horiek guztiak Europar Batasunaren Funtzionamenduari buruzko Tratatuaren eta kontratazioari buruzko zuzentarauen ondoriozkoak dira, Estatuaren oinarrizko araudian eta Kontratu Publikoei buruzko Foru Legean islatuak daude eta kasu guztietan eta salbuespenik gabe aplikatuko dira, Europako Batasunaren Justizia Auzitegiak horiei buruz egiten duen edo etorkizunean eginen duen interpretazioari jarraikiz. Gogoeta horren arabera, eta aurretik adierazitako desadostasun puntuei dagokienez, interpretazioak honako hau zehazten du:
a) Artikulu bakarraren hogeita bigarren apartatua aplikatzean, zeinak aldatzen baitu 2/2018 Foru Legearen 44. artikuluaren 2. apartatua, kontratuaren gutxieneko edukiari buruzkoa, honako epai hauek hartu beharko dira kontuan bereziki: Batzordea/CAS Succhi di Frutta, 2004ko apirilaren 29koa (C-496/99 gaia); Pressetext (C-454/06 gaia); Finn Frogne, 2016ko irailaren 7koa (C-549/14 gaia); Stermann, 2016ko ekainaren 2koa (C-27/14 gaia), Parking Brixen, 2005eko urriaren 13koa (C-458/03); eta han aipatutako jurisprudentzia.
b) Artikulu bakarraren hogeita hamahirugarren apartatua aplikatzean, zeinak aldatzen baitu 2/2018 Foru Legearen 75. artikulua, ulertuko da ezen 75. artikuluaren 4. apartatua artikulu horren 1. apartatuan jasotako kasuei dagokiela bakarrik.
c) Artikulu bakarraren hogeita hamalaugarren apartatua aplikatzean, zeinak aldatzen baitu 2/2018 Foru Legearen 81. artikulua, munta txikiko kontratuetarako araubide bereziari buruzkoa, kontuan hartu behar da, bereziki, Europako Batzordeak Europako Erkidegoko zuzenbidearen gainean egin beharreko interpretazioari buruz eman duen gomendioa, kontratazio publikoari buruzko zuzentarauek (2006/C 179/02) partez estalitako edo estaltzen ez dituzten kontratuak adjudikatzean aplikatu beharreko zuzenbideari dagokionez.
d) Artikulu bakarraren hogeita hemeretzigarren apartatua aplikatzean, zeinak aldatzen baitu 2/2018 Foru Legearen 96. artikulua, parte-hartzaileen onarpenari buruzkoa, bat etorriz 39/2015 Legearen 68.1 artikuluan prozedurak hasteko eskaerak zuzentzeari dagokionez xedatuta dagoenarekin, ulertuko da aurreikuspen horrek ez duela baztertzen proposamenetan hauteman daitekeen beste edozein falta edo akats zuzentzeko eskubidea.
e) Artikulu bakarraren berrogeita hamabi apartatua aplikatzean, zeinaren bidez kentzen baita 2/2018 Foru Legearen 116.2.b) artikulua, kontuan hartuko da krediturik gabe edo kreditu nahikorik gabe adjudikatutako kontratu baten erabateko deuseztasuna aitortua dagoela ogasun arloko araudian.
f) Artikulu bakarraren berrogeita hamasei apartatua aplikatzean, zeinaren bidez aldatzen baita 2/2018 Foru Legearen 138. artikulua, munta txikiko kontratuei eta prozedura erraztuaren bidez edo publizitaterik gabeko prozedura negoziatuaren bidez adjudikatzen direnei buruzkoa, kasuan kasuko espedientea izapidetzea eskatuko da, haietako bakoitzean aplikatu beharreko dokumentazio eta berezitasunekin.
2. Nafarroako Foru Komunitateak konpromisoa hartzen du artikulu bakarraren hirurogeita hiru apartatutik esaldi hau ken dadila sustatzeko (apartatu horren bidez 2/2018 Foru Legearen hamargarren xedapen gehigarria aldatu zen): “...eta espezialitate artistikoaren arabera adjudikatzekoak diren kontratuetan, hala nola zuzendaritza artistikoak, komisariotzak eta antzeko jarduerak,...”.
II.–Honako auzi hauen gaineko desadostasunak bere horretan mantentzen dira: batetik, artikulu bakarraren bi apartatuaren gainekoa, zeinaren bidez aldatzen baita 7. artikulua, l) eta m) letrei dagokienez; eta bestetik, artikulu bakarraren hirurogeita bost apartatuaren gainekoa, zeinaren bidez hogeita batgarren xedapen gehigarria gehitzen baitzaio 2/2018 Foru Legeari.
III.–Lortutako akordioa dela eta, bi alderdiek konpondutzat jotzen dituzte erabaki honen xede diren manuei buruz adierazitako desadostasunak, aurreko paragrafoan adierazitakoa alde batera utzi gabe.
IV.–Erabaki hau Konstituzio Auzitegiari jakinaraztea, Konstituzio Auzitegiari buruzko urriaren 3ko 2/1979 Lege Organikoaren 33.2 artikuluan aurreikusitako ondorioetarako, eta erabaki hau Estatuko Aldizkari Ofizialean eta Nafarroako Aldizkari Ofizialean argitaratzea.
Lurralde Politikako ministroa, Isabel Rodríguez García.–Lehendakaritzako, Berdintasuneko, Funtzio Publikoko eta Barneko kontseilaria, Javier Remírez Apesteguía.
Iragarkiaren kodea: F2210948
