2. NAFARROAKO TOKI ADMINISTRAZIOA
2.2. XEDAPEN ETA IRAGARKIAK, HERRIEN ARABERA ANTOLATUAK
ULTZAMAKO OINARRIZKO GIZARTE ZERBITZUEN MANKOMUNITATEA
2022rako lan-egutegia
Mankomunitateko Kideen Batzarrak, 2021eko abenduaren 28an egin ohiko bilkuran, onetsi zuen Ultzamako Gizarte Zerbitzuen Mankomunitatearen zerbitzuko langileen 2021eko aste barreneko jaiegunen egutegia. Hona hemen zein diren ordaindu bai baina errekuperatu behar ez diren jaiegunak 2022an:
–Urtarrilaren 6a, osteguna: Jaunaren Agerkundea (Errege Eguna).
–Urtarrilaren 17a, astelehena: herriko jaieguna.
–Apirilaren 14a: Ostegun Santua.
–Apirilaren 15a: Ostiral Santua.
–Apirilaren 18a: Pazko astelehena.
–Uztailaren 25a, astelehena: Santiago eguna.
–Abuztuaren 15a, astelehena: Ama Birjinaren Jasokundea.
–Urriaren 12a, asteazkena: Pilareko Andre Maria.
–Azaroaren 1a, asteartea: Santu Guztien Eguna.
–Abenduaren 6a, asteartea: Konstituzioaren eguna.
–Abenduaren 8a, osteguna: Ama Birjina Sortzez Garbiaren eguna.
–Abenduaren 26a, astelehena: Eguberri bigarrena.
Orobat, baliogabeak izanen dira, 2022. urtean epeak kontatzeari dagokionez, igande guztiak eta Mankomunitatearen bulegoetako jaiegunak.
Ultzamako Gizarte Zerbitzuen Mankomunitatean lanaldiaren urteko egiazko lanordu kopurua, 1.592koa izanen dena, honela banatuko da, Mankomunitatearen egungo hitzarmenak ezartzen duen gisan:
Astelehenetik ostiralera bitarteko eguneroko lanaldia 7 ordu eta 20 minutu izanen da. Ordutegiari dagokionez, 8:00etatik 15:00ak arte lan egin beharko da; gainerako 20 minutuak egiteko langileek malgutasuna izanen dute, 07:40tik 08:00ak arte eta 15:00etatik 15:20ra arte.
Langileek beste ordutegi batzuk izan ahalko dituzte, lanaldi partzialagatik eta/edo zerbitzuaren beharrengatik, eta bestelako programetan aritzeagatik nahiz horietan lan batzuk egiteagatik.
Lan ordutegiak adosteko ahalegina eginen da beti, bizitza pertsonala eta lan-bizitza bateratzea ahalbidetzeko eta errazteko. Gai honetan, bereziki kontuan hartuko dira honako hauek dituztenak: seme-alaba adingabeak, desgaitasuna duten seme-alabak, odol-ahaidetasuneko edo ezkontza-ahaidetasuneko lehen eta bigarren graduko pertsona gaixoak, mendekotasuna dutenak eta abar. Egoera hori frogatu egin beharko dute.
Ordutegia lanorduen zenbateko osora egokitzeko, langileek 4 egun eta 6 ordu izanen dituzte; horietatik, egun bat oporrei erantsiko zaie (28 egun izanen dira, eta ez 27) eta 3 egun eta 6 ordu, herriko bestetarako.
Erregelamenduz ezarritako oporrak administrazio organo eskudunak emanen ditu, Mankomunitatearen hitzarmenak berak ezartzen duen gisan.
Horiez gain, norberaren aferetarako 3 egun gelditzen dira, langileek aukeratzeko.
Betiere, 2022rako, orokorrean, Nafarroako Administrazio Publikoetarako behin betiko ezartzen den urteko lanaldiak baldintzatuko du urteko lanaldiaren iraupena. Horren ondorioetarako, aldaketaren bat izanez gero, behar diren doikuntzak eginen dira.
Larraintzarren, Ultzama, 2021eko abenduaren 28an.–Mankomunitateko burua, Ekaitz Astiz Martínez.
Iragarkiaren kodea: L2200342
