Iragarkia

157. ALDIZKARIA - 2022ko abuztuaren 8a

1. NAFARROAKO FORU KOMUNITATEA

1.7. BESTELAKOAK

387/2022 EBAZPENA, uztailaren 5ekoa, Toki Administrazioaren eta Despopulazioaren zuzendari nagusiak emana, Nafarroako Foru Komunitateko gaikuntzadun funtzionarioentzat erreserbatutako lanpostuetan aldibaterakotasuna murrizteko presako neurriei buruzko maiatzaren 30eko 16/2022 Foru Legearen 1.3 artikuluan aurreikusitako ondorioetarako, gaikuntzadun funtzionarioen artetik betetzeko merezimendu lehiaketan eskaintzen diren idazkari eta kontu-hartzaile lanpostuen behin betiko zerrenda onesten duena, eta espresuki adierazten duena zeintzuk betetzen dituzten aldi baterako enplegua egonkortzeko baldintzak Enplegu publikoan aldibaterakotasuna murrizteko presako neurriei buruzko abenduaren 28ko 20/2021 Legean ezarritakoaren arabera.

Nafarroako Foru Komunitateko gaikuntzadun funtzionarioentzat erreserbatutako lanpostuetan aldibaterakotasuna murrizteko presako neurriei buruzko maiatzaren 30eko 16/2022 Foru Legeak 1. artikuluan ezartzen du lanpostuak foru-gaikuntzadun funtzionarioen artetik betetzeko lehiaketa bereziaren xedea izanen dela merezimendu lehiaketaren bidez betetzea Nafarroako toki-entitateetako idazkari eta kontu-hartzaile lanpostu guztiak, Nafarroako Toki Administrazioari buruzko uztailaren 2ko 6/1990 Foru Legearen 247.2 eta 247.3 artikuluetan jasota egonik hutsik daudenak.

Aipatu foru lege horrek, bere eranskin bakarrean, Nafarroako toki entitateetan hutsik dauden idazkari eta kontu-hartzaile lanpostuen hasierako zerrenda onetsi zuen, espresuki adieraziz horietatik zeintzuk betetzen dituzten Enplegu publikoan aldibaterakotasuna murrizteko presako neurriei buruzko abenduaren 28ko 20/2021 Legean aldi baterako enplegua egonkortzeko ezarritako baldintzak, eta 20 egun naturaleko epea ezarri zuen, foru legeak indarra hartu eta biharamunetik zenbatuta, jendaurreko informazioaren ondorioetarako eta alegazioak aurkezteko.

16/2022 Foru Legearen 1.3 artikuluan xedatutakoaren arabera, arestiko atalean ezarritako epea amaituta eta aurkeztutako alegazioak aztertu ondoren, Toki Administrazioaren gaineko eskumena duen departamentuak, lanpostuak betetzeko aipatu lehiaketen deialdia egin aurretik, funtzionario gaituentzat merezimendu lehiaketan eskainiko diren idazkari eta kontu-hartzaile lanpostuen behin betiko zerrenda onetsiko eta Nafarroako Aldizkari Ofizialean argitaratu behar du, espresuki adieraziz zein diren aldi baterako lanpostua egonkortzeko baldintzak betetzen dituzten lanpostu hutsak.

Horretarako ezarritako epean, hainbat toki entitatek alegazioak aurkeztu dituzte lanpostu hutsen hasierako zerrendaren aurka.

Otsagabia, Irurtzun eta Agoizko udalek jakinarazi dute toki entitate horietako idazkari lanpostuek C1 hizkuntza eskakizuna dutela beren plantilla organikoan. Inguruabar hori egiaztatu ondoren, bidezkoa da alegazioa baiestea, eta dagokion aldaketa egin da ebazpen honetan jasotzen den lanpostu hutsen behin betiko zerrendan.

Irurtzungo Udalak, idazkari lanpostuaren hizkuntza eskakizunaren akatsa zuzentzeaz gain, eskatu du lanpostua betetzeko sistema 20/2021 Legearen 6. xedapen gehigarriko merezimendu lehiaketa izan dadila, lanpostuaren aldi baterako betetzean 3 hilabete eta 18 eguneko etena egon izana pandemiaren testuinguruan ulertu behar dela iritzita, garai horretan epeak etenik izan zirela eta aurreko idazkariak aldi baterako gaikuntza izan zuela aintzat hartuz.

16/2022 Foru Legeak, 7.5 artikuluan, aldi baterako betetze etengabearen kontzeptuari dagokionez, ezartzen du etenik ez dela izan ulertuko dela baldin eta lanpostua egiazki berriro bete bada hiru hilabete baino gehiagokoa ez den epean. Beraz, ez dira betetzen lanpostu huts hori merezimendu lehiaketa bidez egonkortzeko prozedura aplikatzeko baldintzak eta, horrenbestez, aipatu arauko 3. artikuluan ezarritako prozeduraren arabera bete behar da, alegia, txanda irekiko oposizio-lehiaketa bidez, Nafarroako Toki Administrazioari buruzko uztailaren 2ko 6/1990 Foru Legearen 245. artikuluan eta hurrengoetan ezarritakoaren arabera.

Bestetik, 2022ko plantilla organikoa argitaratu ondoren jakin denez Garesko Udaleko idazkari lanpostuak dagoeneko ez duela C1 hizkuntza eskakizuna, aldaketa hori ere jaso da lanpostu hutsen behin betiko zerrendan.

Irunberriko Udaleko plantilla organikoan egiaztatu da idazkari lanpostua hutsik dagoela haren titularra 2021ean erretiratu zenetik eta, beraz, Irunberriko eta Erromantzatuko Udalen Batasuneko lanpostu hori ere jaso da behin betiko zerrendan eta txanda irekiko oposizio-lehiaketa bidez beteko dela ezarri da.

Ezporogiko Udalak alegatu du haien idazkaritza zerbitzuak Xabierko eta Petilla Aragoiko idazkariak ematen dituela, horretarako hitzarmena baitute, eta bete beharreko lanpostuen hasierako zerrendan, ordea, udal hori Zare, Eslaba, Lerga eta Ezporogik osatutako udalen batasuneko lanpostu hutsaren barnean sartu dutela. Aurrekoari dagokionez, esan beharra dago udal hori behar bezala sartuta dagoela lanpostu hutsen zerrendan, Ezporogik aipatutako udalen batasuneko kide izaten jarraitzen duelako.

Eslabako eta Zareko udalek adierazi dute, idazkari lanpostu hutsen hasierako zerrendan Zare, Eslaba, Lerga eta Ezporogik osatutako udalen batasuna sartzeari dagokionez, lehenik eta behin, udalen batasun hori “ope legis” desegin zela udalen batasuneko lanpostua betetzen zuen idazkari funtzionarioak lekualdatzeagatik lanpostua utzi zuen egunean. Izan ere, udal horien iritziz, “Nafarroako Udal Administrazioaren 1928ko Erregelamenduaren bidez eratutako udalen batasunak desegin egiten dira batasuneko lanpostua betetzen duen idazkari funtzionarioak lanpostua uzten duenean, 6/1990 Foru Legeak Nafarroako Udal Administrazioaren Erregelamendu hori indargabetu baitzuen”. Haien ustez, beraz, batasun horrek ez du idazkari postu espezifikorik eta, horregatik, ez dago hori egonkortzerik ere, eta ondorioz, halakorik ez dagoenez, 16/2022 Foru Legearen eranskinetik kanpo utzi beharko da. Azkenik, hainbat proba eginbide egitea eskatzen dute.

Arestiko baieztapen horiei dagokienez, adierazi behar da ezen, egiaz Nafarroako Toki administrazioari buruzko uztailaren 2ko 6/1990 Foru Legearen xedapen indargabetzaile bakarrak 1928ko otsailaren 3ko Nafarroako Udal Administrazioaren Erregelamendua indargabetu bazuen ere, espresuki mantendu zuela idazkaria partekatzeko asmoz eratutako udalen batasunen figura. Izan ere, Nafarroako Toki Administrazioari buruzko uztailaren 2ko 6/1990 Foru Legearen 239. artikuluak, jatorrizko testuan, honako hau azaltzen zuen espresuki: “Nafarroako toki korporazio guztietan izanen da idazkari kargua, dela haietako bakoitzaren lanpostu gisa, dela horretarako eratutako batasuneko kideekin partekatua”.

Errealitate hori dokumentuz egiaztatuta gelditu zen Nafarroako toki entitateetako idazkari postuak betetzeko Lehendakaritzako, Administrazio Publikoetako eta Barneko kontseilariak maiatzaren 8an emandako 186/2012 Foru Aginduaren bidez ebatzitako lehiaketan. Han egiaztatzen da aipatu udalen batasuneko azken titularraren kargu uztea eta haren izendapena beste udal idazkaritza baterako formalizatuta gelditu zirela pertsona hark lehiaketan parte hartzearen ondorioz, eta jasota gelditu aipatu udalen batasuna existitzen zela gaikuntzadun funtzionarioak idazkari titularraren kargua bete zuen aldian, hain zuzen, 2012ra bitartean.

Horrenbestez, 1928ko otsailaren 3ko Nafarroako Udal Administrazioaren Erregelamenduaren indargabetzeak, alegazioan aipatzen baita, inolaz ere ez zuen ekarri udalen batasun horien desagerpena, ez Nafarroako Toki Administrazioari buruzko uztailaren 2ko 6/1990 Foru Legea onetsi zen hasierako unean, hala erakusten baitu era horretako hamarka udalen batasun egoteak, ez eta, are gutxiago, udalen batasun horietan idazkari lanpostua betetzen ari zen funtzionarioak kargua utzi zuenean ere. Izan ere, Zare, Eslaba, Lerga eta Ezporogiko Udalen Batasuna arau mailan eratu zen eta gaur egun ere existitzen da, batere aldaketarik gabe, eratu zeneko arau erregulatzailetik eta 6/1990 Foru Legeak ondoren izan dituen aldaketetatik ondorioztatzen denez.

Bestetik, nahiz eta aipatutako uztailaren 2ko 6/1990 Foru Legeak, martxoaren 17ko 4/2011 Foru Legearen bidez onetsitako idazkeraren arabera, funtzionario lanpostuak betetzeari buruz esaten zuen idazkari postua egonen zela 2.000 biztanle edo gehiagoko udaletan, ezin da inolaz ere ahaztu haren lehenengo xedapen iragankorrak espresuki ezartzen zuela ezen “foru lege honek indarra hartzen duen unean, idazkari edo kontu-hartzaile lanpostuak dituzten toki entitateek lanpostu horiek mantenduko dituztela, harik eta, Nafarroako Tokiko Mapa eta toki entitateen antolamendua arautzen duen Foru Legeak ezarriko duena aplikatuz, haien plantilla organikoak egokitzen diren arte”. Nafarroako Toki Administrazioaren Erreformarako otsailaren 4ko 4/2019 Foru Legearen bidez egindako erreformarekin ere ez ziren desagertu udalen batasun horiek. Aitzitik, mantendu eginen dira eskualdeak eratu arte, hirugarren xedapen iragankorrak ezarritakoari jarraituz, hau esaten baitu: “Egungo administrazio zerbitzuen batasunak toki entitate gisa mantenduko dira ordezkatuko dituzten eskualdeak eratu, beren eskumenak eta langileak bere gain hartu eta dagozkien zerbitzuak emateko moduan egon arte”.

Horrenbestez, Zare, Eslaba, Lerga eta Ezporogiko toki entitateek, aipatutako araudiaren arabera, aipatu udalen batasuneko kide izaten jarraitzen dute, udalen batasunak irauten baitu, eta toki entitate izaera duenez eta idazkari lanpostu huts propioa duenez gero, maiatzaren 30eko 16/2022 Legean ezarritako baldintzak betetzen dituenez, lanpostu hori txanda irekiko oposizio-lehiaketa bidez bete beharra dago. Eskatutako proba eginbideei dagokienez, proba horiek praktikatzea ez da bidezkoa, ez baita hau prozeduraren une egokia horretarako.

Xabierko Udalak alegatu du administrazio hitzarmen bat dagoela idazkaritza zerbitzua emateko Xabier eta Petilla Aragoiko udaletan, baina lanaldia % 80koa dela, eta ez % 100ekoa, lanpostu hutsen hasierako zerrendan ageri den bezala. Hitzarmen hori ikusita, alegazioa baietsi eta aldatu egin da idazkari lanpostu hutsaren lanaldia.

Barasoaingo Udalak eta Orbaibarko Administrazio Zerbitzuen Udalen Batasunak hainbat alegazio aurkeztu dituzte, adieraziz akats bat dagoela hasierako zerrendan, eta Barasoaingo lanpostu hutsak ez duela joan behar Oloritzekin. Gainera, alegatzen dute Puiu eta Olorizko udalak Orbaibarko Batasuneko kideak direla, Garinoain, Orisoain eta Untzuerekin batera. Aurreko hori egiaztatuta, alegazioa baietsi eta behin betiko zerrenda aldatu da, toki entitate interesdunek adierazitako zentzuan.

Zizur Zendeako Udalak hainbat alegazio aurkeztu ditu. Azpimarratzen du idazkari lanpostua funtzionario titularrak bete zuela 2019an jubilatu zen arte, eta ondoren ez dela bitarte baterako bete; horren ordez, plantillako funtzionario bati gaikuntza eman zitzaiola eta, horregatik, ez direla betetzen 20/2021 Legean lanpostua egonkortzeko ezarritako baldintzak, ezta aldi baterako betetzeari dagokionez ere. 16/2022 Foru Legeari dagokionez, udalak adierazten du ezen, aipatu 20/2021 Legea betetzeko aitzakiarekin, urratu egiten dela, haren izaera mugatzailea aise gainditzen baitu, eta bi arauak Konstituzioaren kontrakoak direla. Toki entitateak bere alegazioak amaitzen ditu eskatuz idazkari lanpostua 16/2022 Foru Legearen eranskineko lanpostu hutsen hasierako zerrendatik kanpo uzteko.

Zizur Zendeako Udalak arrazoia du esaten duenean idazkari lanpostuak ez dituela betetzen egonkortzeko baldintzak eta, beraz, hura betetzeko ezin direla erabili 20/2021 Legean ezarritako prozedurak, baizik eta 16/2022 Foru Legearen 3. artikuluan aurreikusitako txanda irekiko oposizio-lehiaketa.

Hala ere, ezin da onartu ezen, gaikuntza halabeharrez eman zaion funtzionario batek betetzen duelako orain, ez dagoela lanpostu hutsaren aldi baterako okupaziorik.

Bi arauen konstituzio-kontrakotasunari dagokionez, ez dagokio erakunde honi gai horri buruzko irizpena ematea, horretarako eskumenik ez duelako. Adierazi beharrekoa da, ordea, 16/2022 Foru Legeak hitzaurrean ezartzen duenaren arabera, Nafarroak toki administrazioari buruz duen eskumen historikoa egikarituz, eta aipatu foru lege horren bidez, hiru helburu lortu nahi direla: lehenik eta behin, eta 20/2021 Legeak oinarrizko izaera duela aintzat hartuta, Nafarroako toki entitateetako idazkari eta kontu-hartzaile lanpostuetarako, aldi baterako enplegua egonkortzea ahalbidetuko duten prozesuak antolatzea, arau horretan ezarritako baldintzak betez, lanpostu aldibaterakotasun-abusuko egoera historikoa eta larria jasaten baitute.

Bigarrenik, beharrezkotzat jotzen da, egonkortze prozesu horien aurretik, foru-gaikuntza duten funtzionarioei aukera ematea hutsik dauden lanpostu guztien arteko mugigarritasunerako eskubidea baliatzeko, ia hamar urte joan ondoren gaikuntzadun funtzionarioen arteko merezimendu lehiaketaren bidez lanpostuak betetzeko prozesuetarako deialdirik egin gabe.

Eta azkenik, lanpostuak betetzeko foru-gaikuntzadun funtzionarioen artean lanpostuak betetzeko lehiaketa bereziak amaitzen direnean, aurreikusia dago foru-gaikuntza lortzeko hautaprozesu baterako deialdia egitea, txanda irekian, oposizio-lehiaketa sistemaren bidez. Helburu horiek betetzeko, 16/2022 Foru Legeak aldatu egiten ditu Nafarroako Toki Administrazioari buruzko uztailaren 2ko 6/1990 Foru Legearen hainbat manu, eta Nafarroako Toki Administrazioa Erreformatzeko otsailaren 4ko 4/2019 Foru Legean ezarritako beste hainbat ere bai, behin betiko bereiziz Nafarroako toki entitateetako idazkari eta kontu-hartzaile lanpostuak funtzionarioez hornitzeko bidea Nafarroako tokiko maparen berregituraketa administratibotik, era horretan saihesteko denboran luzatzen diren bitarteko egoerak berriz ere gertatzea, zuzenbide europarrak zehatzen baititu, eta 20/2021 Legeagatik ere bai, oinarrizko izaera duenez, hartan ezarritako neurriak gure foru araudian jaso behar izan baitira.

Horregatik guztiagatik, eta 16/2022 Foru Legean aurreikusitakoa betez, bidezkoa da Zizur Zendeako idazkari lanpostu hutsa betetzeko 6/1990 Foru Legean jasotako txanda irekiko oposizio-lehiaketaren prozedura erabiltzea, ez dituelako betetzen 20/2021 Legean aurreikusten diren aldi baterako enplegua egonkortzeko prozedurak erabiltzeko baldintzak.

Asier Gil Artuch jaunak, administrazio araubidean kontratatutako Erronkariko Ibaxaren Batzordeko idazkariak, alegatu du lanpostu hutsen hasierako zerrendan ageri dela 20/2021 Legearen 6. xedapen gehigarriko prozedura erabili behar dela idazkari lanpostua betetzeko, baina, aurreko titularraren jubilazioa 2021ean izan zenez, erabili beharreko prozedura 6/1990 Foru Legeko txanda irekiko oposizio-lehiaketa izan beharko litzatekeela. Dagozkion egiaztapenak egin ondoren, bidezkoa da alegazioa baiestea eta idazkari lanpostu hori betetzeko sistema aldatzea.

Aberin, Arellano eta Morentingo Langileen Mankomunitateko buruak alegatu du aurreko idazkaria, mankomunitate horretako funtzionarioa, 2018an jubilatu zela, eta erabili beharreko prozedura 6/1990 Foru Legeko txanda irekiko oposizio-lehiaketa izan beharko litzatekeela. Dagozkion egiaztapenak egin ondoren, bidezkoa da alegazioa baiestea eta idazkari lanpostu hori betetzeko sistema aldatzea.

Cristina Montes Chivite, Iñaki Andía Garcés, Alvaro Marcén Echandi, María Ortega Aicua, Ana Gómez Senosiain eta Esther Salazar Cameros jaun-andreek hainbat alegazio aurkeztu dituzte 16/2022 Foru Legearen eta lanpostu hutsen hasierako zerrendaren aurka, argudiatuz 16/2022 Foru Legea behin-behinekoa dela eta haren eranskina eta 6. artikulua Konstituzioaren aurkakoak direla, ez dagoelako justifikatuta merezimendu lehiaketaren sistema salbuespenez erabiltzea, eta mugatzen ari direlako hautapen prozesuan parte hartzeko eskubidea. Era berean, adierazten dute ez dela justifikatzen euskara nahitaezkoa izatea eremu mistoko idazkari eta kontu-hartzaile lanpostuak betetzeko. Horregatik eskatzen dute aintzat hartzeko 16/2022 Foru Legearen eranskinaren eta 6. artikuluaren konstituzio-kontrakotasuna aztertzeko aukera eta, orobat, arau hori indargabetuko duen legegintza prozesu berri bat zabaltzeko aukera.

Ana Gómez Senosiainen iritziz, gainera, organoak ez du eskumenik, botere legegilea izan delako lan publikoaren eskaintza egin duena.

Ildo beretik, Rosa Ferrer Garcíak ere alegazioak aurkeztu ditu esanez 20/2021 Legearen seigarren eta zortzigarren xedapenak Konstituzioaren kontrakoak direla eta, halaber, Konstituzioaren kontrakoa dela euskara ezagutzeko nahitaezko eskakizuna duten eremu mistoko lanpostu hutsak sartzea 16/2022 Foru Legearen eranskinean. Horiek horrela, lanpostu hutsen hasierako zerrenda hori erabat baliogabe uzteko eskatzen du.

Alegazio horiei erantzunez, adierazi behar da zuzendaritza nagusi honek ez duela eskumenik foru legeen maila duen arau bat Konstituzioaren kontrakoa den ala ez ebazteko eta, beraz, eskaera hori dagokion erakundeari zuzendu beharko zaiola. Foru legeak ezarri du hasierako zerrenda, eta eskumena eman dio Toki Administrazioaren eta Despopulazioaren Zuzendaritza Nagusiari lanpostu hutsen hasierako zerrendaren aurka aurkezten diren alegazioak ebazteko, eta lanpostu hutsen behin betiko zerrenda onesteko ere bai, baina ez du eskumenik ebazteko Foru Parlamentuak hasierako zerrenda onesten ahal duen ala ez, edota arau hori edo 20/2021 Legea indargabetzea komeni den.

Hala ere, interesgarria da azpimarratzea azken arau hori xedatu dela administrazio publikoen araubide juridikoaren oinarriei eta haren funtzionarioen estatutu-araubideari dagokienez Estatuak duen eskumenaren babesean eta, zentzu horretan, Nafarroako Foru Eraentza Berrezarri eta Hobetzeari buruzko Lege Organikoaren 49. artikuluaren arabera, bere foru araubidearen kariaz, Nafarroak eskumen esklusiboa duela Foru Komunitateko funtzionario publikoen estatutu-araubidearen gainean, betiere Estatuko oinarrizko legediak funtzionario publikoei aitortzen dizkien eskubide eta betebeharrekiko errespetuaren mugen barnean.

Horrenbestez, eta 20/2021 Legea aplikatuta, 16/2022 Foru Legearen Hitzaurreak adierazten du ezen, foru-gaikuntza duten funtzionarioen kolektiboarentzat aldi baterako enplegua egonkortzeko prozedurak antolatzearekin batera (Estatuko araudiak oinarrizko izaera du hor), Foru Komunitateari lege-araudi berri bat ematen zaiola, bermatzen duena Nafarroako Toki Administrazioan beharrezkoak diren funtzio publikoetan aritzeari erreserbatutako lanpostuak betetzeko eta eskuratzeko sistemaren normalizazioa, halatan desblokeaturik gaur egun indarrean dauden legegintzako neurriek berek sortutako egoera.

Are gehiago, adierazi behar da Estatuaren esparruan idazkari eta kontu-hartzaile lanpostuak ere egonkortzeko asmoa dagoela. Ildo horretan, Estatuaren Aldizkari Ofizialean, 2022ko maiatzeko 124. zenbakian, argitaratu da 408/2022 Errege Dekretua, maiatzaren 24koa; haren bidez onesten da Estatuko Administrazio Orokorrean aldi baterako enplegua egonkortzeko lan publikoaren eskaintza, Enplegu publikoan aldibaterakotasuna murrizteko presako neurriei buruzko abenduaren 28ko 20/2021 Legeari dagokiona. Errege Dekretu horren 1. artikuluaren arabera, egonkortzeko bidean sartzen dira Estatu mailako gaikuntzadun toki administrazioko funtzionarioen eskalako lanpostuak. Bestetik, aipatu den 408/2022 Errege Dekretuaren 4. eranskinak ezartzen du Estatu mailako gaikuntzadun toki administrazioko funtzionarioen eskaletako 658 lanpostu lehiaketa bidez bete beharrak direla eta 149 lanpostu, berriz, oposizio-lehiaketa bidez, 20/2021 Legearen arabera.

Eremu mistoko hizkuntza eskakizunei buruz, berriz, zuzendaritza nagusi honek bere egiten du ebazpen honen hurrengo apartatuetan adieraziko dena.

Eguzkiñe Aiesa Andrések alegatu du Nafarroan ez dela aplikatzekoa 20/2021 Legea, eta Nafarroako idazkari lanpostu hutsen kasuan ez dagoela justifikatua lege horretan aipatzen den salbuespenezko egoera lanpostu horiek lehiaketa bidez bete ahal izateko. Halaber, adierazten du prozedura hori ezarrita desberdintasuna sortzen dela enplegu publikoaren sarbidean, eta amaitzen du eskatuz 16/2022 Foru Legearen 6. artikulua indargabetzeko, eranskineko lanpostu guztiak oposizio edo oposizio-lehiaketa bidez bete daitezen, eta berdin baloratu dadin edozein administraziotako idazkari lanpostuko antzinatasuna. Arestiko horri dagokionez, berriro ere argitu behar da zuzendaritza honek ez duela eskumenik Konstituzioaren inguruko auzirik ebazteko, ez eta 16/2022 Foru Legearen edo beste edozein arauren inongo artikulu bertan behera uzteko ere; aitzitik, horietan agindutakoa bete behar du.

Ollarango eta Goñerriko udalek alegazioak aurkeztu dituzte, adieraziz bi udalen artean idazkari lanpostu bakarra baliatzeko asmoa dutela, eta horretarako sinatzekoa dutela lankidetza hitzarmen bat, beraien iritziz ekonomia eta administrazio mailako arrazionalizatzeko neurria baita hori. Horregatik eskatu dute idazkari lanpostu hutsen zerrendan lanpostu huts bakarra jasotzeko bi udalei zerbitzua emateko.

Goñerriko Udalak, gainera, alegatu du nolanahi ere idazkari lanpostuaren lanaldia % 40koa dela, eta ez lanaldi osokoa, lanpostu hutsen hasierako zerrendan ageri den bezala.

Arestiko horri erantzunez azpimarratu behar da, 16/2022 Foru Legearen 6. eta 9. artikuluetan ezarritakoaren arabera, bi lanpostu horiek lanpostu hutsen zerrendan egon behar dutela, eta ezin dela onartu eskatutakoa.

Zentzu horretan, Nafarroako Toki Administrazioa Erreformatzeko otsailaren 4ko 4/2019 Foru Legearen hirugarren xedapen iragankorrak espresuki ezartzen du 1.500 biztanle baino gutxiagoko toki entitateek, lege horrek indarra hartzen duen unean, idazkari lanpostu propioa badute, lanpostu hori mantenduko dutela, harik eta eskualde bakoitza eratzeko foru legeak indarra hartzen duen unera arte.

Bi toki entitate horiek, 4/2019 Foru Legeak indarra hartu zuen unean, idazkari lanpostu espezifiko propioak zituzten, eta egun ere hala mantentzen dituzte, eta, beraz, ezinezkoa da, zuzenbidean oinarrituta eta aldi baterako enplegua egonkortzeko arautegi erregulatzailearen babesean, lanpostu huts horiek amortizatzea, aurrekontuz hornituak eta etengabe beteta egon baitira. Gainerakoan, urratuko lirateke bai 20/2021 Legean ezarritakoa, bai 16/2022 Foru Legean eta lehen aipatutako hirugarren xedapen iragankorrean ezarritakoa ere, hartan xedatzen baita nahitaezkoa dela lanpostu horiek mantentzea dagokion eskualdea eratzen den arte.

Goñerriko Udaleko idazkari lanpostuaren lanaldia, ordea, aldatu egin da eta % 40koa da orain.

Buñuelgo Udalak eskatu du kontu-hartzaile lanpostua sartzea, bete dadin, lanpostua hutsik dagoelako eta ez dagoelako hasierako zerrendan. Aipatu toki erakunde horren plantilla organikoa azterturik, bidezkoa da alegazioa baiestea eta lanpostua behin betiko zerrendan sartzea, hasierakoan ez delako sartu oker bat egon delako.

Edurne Ayesta Zardoya andreak alegatu du Berriozarko Udaleko kontu-hartzaile lanpostua hasierako zerrendan ageri dela 20/2021 Legearen 2.1 artikuluaren bidez betetzeko, baina lege horren 6. xedapen gehigarriko sistemaren bidez bete beharko litzatekeela. Hala dela egiaztatu baita, bidezkoa da alegazioa baiestea eta, horrenbestez, lanpostu huts hori betetzeko bidea aldatzea.

Tuterako Udaleko diruzain Javier García Sanchez jaunak, toki entitateko kontu-hartzaile izateko gaikuntza halabeharrez eman zaionak, alegatu du diskriminazioa dagoela, ezin delako aurkeztu kontu-hartzaileen lekualdatze lehiaketara, eta lanpostu horietan sartzeko aukera emanen dion interpretazio bat egiteko eskatzen du. 6/1990 Foru Legeak ez du eskatzen foru-gaikuntza diruzain lanposturako, baina bai kontu-hartzaile izateko. Gainera, lanpostu horien deialdia egitea ez dagokio Foru Komunitateko Administrazioari, lanpostu espezifiko hori duten toki entitateei baizik.

Horregatik, eta indarrean dagoen araudiarekin bat, Foru Komunitateko gaikuntzadun funtzionarioen arteko lekualdatze lehiaketan foru-gaikuntza hori duten kontu-hartzaileek bakarrik har dezakete parte, eta ezin da onartu diruzain lanpostua duten toki entitateetako funtzionarioek, foru-gaikuntza ez dutenek, parte hartzea, ez dutelako lanpostuak betetzeko lehiaketa horretan parte hartzeko ezinbestekoa den baldintza bat.

Mairagako Mankomunitateko buruak adierazten du kontu-hartzaile lanpostua, 2005ean sortu bazen ere, ez dela inoiz aurrekontuz hornitua izan, eta aldi baterako ere ez dela bete, aholkulari ekonomikoaren lanpostua betetzen duen funtzionarioari gaikuntza halabeharrez eman zitzaiolako kontu-hartzaile eginkizunak betetzeko, aholkulari ekonomikoaren lanpostuan jarraituz eta dagokion lansari osagarria kobratuz. Horregatik, haren iritziz, lanpostu horrek ez ditu betetzen 20/2021 Legearen arabera egonkortzeko baldintzak, eta kendu egin behar da lanpostu hutsen zerrendatik.

Egiaztatu da Mairagako kontu-hartzaile lanpostuak ez dituela betetzen egonkortzeko baldintzak, aurrekontuz hornitua ez delako egon eta, beraz, hura betetzeko bidea aldatu da. 6/1990 Legearen txanda irekiko oposizio-lehiaketa baliatuko da, lanpostua hutsik dagoelako, eta Mankomunitateak kontu-hartzaile lanpostu espezifikoa duelako bere plantilla organikoan.

Zentzu horretan, eta 6/1990 Foru Legearen 234. artikuluan ezarritakoaren arabera, lanpostu espezifikoa duten mankomunitateetan, Mairagakoan kasu, toki entitate horren langile propioen bidez bete behar dira beharrezkoak diren eginkizun publikoak. Soilik langile hori kanpoan, gaixo edo plaza erreserbatzea ekartzen duen egoera administratiboan denean, edo lanpostua behin betiko betetzea galarazten duen arau bat dagoenean, edo lanpostu huts bat aldi baterako betetzen bada egina dagoenean hura funtzionario batek betetzeko deialdia, kasu horietan soilik, behar diren idazkaritzako eta kontu-hartzailetzako eginkizun publikoak betetzen ahal dituzte entitate horretako plantillako langile finkoek, lanpostua betetzeko titulazio egokia badute eta gaikuntza halabeharrez ematen bazaie, edo administrazio araubidean aldi baterako kontratatutako pertsonek, deialdi publiko bidez hautatu badituzte.

José Vicente Busto Aizpún jaunak, Alesbes eta Cadreitako udaletako administrazio-kontratudun kontu-hartzaileak, bi toki entitateek 2000. urtean izenpetu zuten hitzarmen batean bidez kontratatu baitzuten, eskatu du lanpostu hori lanpostu hutsen hasierako zerrendatik kentzeko, eta sartzeko soilik Alesbesko Udalaren lanpostu huts gisa.

Kontu-hartzaile lanpostu hori ezin da inola ere hartu Alesbesko Udalari soilik eta modu esklusiboan dagokion lanpostutzat, lehenengo kontratazioa bi toki entitate horien arteko hitzarmen baten bidez egin zelako, haren helburua baitzen kontu-hartzaile lanpostua kontratatzea bi udalen artean partekatzeko.

Lanpostu hori bi udalen plantilla organikoetan ageri da eta, egonkortzearen ikuspegitik, plaza bakarra da, orain arte aldi baterako okupatu duena administrazio-kontratudun langile batek, aipatu hitzarmenaren bidez, bi udaletan zerbitzuak emanez, adostutako lanaldiaren arabera.

Lanpostu hori betetzeko kontratua egin eta Gizarte Segurantzan alta eman diona Alesbesko Udala izateak ez du biderik ematen ondorioztatzeko zerbitzuen edo lanpostuan ari zen langilearen lagapena egon denik, bi alderdiek izenpetutako hitzarmenaren aplikazioa izan delako.

Alegazioaren egilea bi toki entitateetan kontu-hartzaile zerbitzuak eman zitzan kontratatu zuten bere garaian, bi alderdiek izenpetutako hitzarmenean jasota dauden baldintzetan, zerbitzuak eman zitzan bai Alesbesko Udalean, bai Cadreitako Udalean.

Horregatik, ezin da eskatutakoa onartu eta, hitzarmen horrek indarra duen bitartean, lanpostu hutsen zerrendan kontu-hartzaile lanpostu bakarra jaso behar da, horrek betetzen dituelako egonkortzeko baldintzak.

Azkenik, Juan Frommknecht Lizarraga jaunak alegazioak aurkeztu ditu 16/2022 Foru Legearen eranskin bakarraren aurka, haren iritziz zuzenbidearen kontrakoa delako euskara nahitaezko eskakizuna izatea eremu mistoko idazkarien eta kontu-hartzaileen zenbait lanpostutan, eta baita administrazioaren egintzen aurka ere, Nafarroako Administrazio Auzitegiaren hainbat epai eta ebazpenetatik ondorioztatuko litzatekeenaren arabera.

Zentzu bereko alegazioak aurkeztu ditu Sergio Santiago Uría Borrego jaunak, FeSP-UGTko Toki Administrazioko idazkaria den aldetik, eskatzen baitu, bere idazkian aipatzen dituen legedian, jurisprudentzian eta Nafarroako Administrazio Auzitegiaren ebazpenetan oinarrituta, euskararen ezagutzako nahitaezko hizkuntza eskakizuna kentzeko maiatzaren 30eko 16/2022 Foru Legearen eranskinean ageri diren Oltza Zendea, Gares, Atarrabia, Antsoain eta Berriozarko udaletako, Izarbeibarko Ur eta Hondakinen Mankomunitateko, Erronkariko Ibaxaren Batzordeko eta Zaraitzu Ibarreko Unibertsitateko idazkari lanpostuei eta Orkoiengo Udaleko kontu-hartzaile lanpostuari, hau da, eremu mistoko guztiei, eta, kasua bada, Nafarroako toki entitateen egintzak eta erabakiak, espresuak zein ustezkoak izan, jarduketa eza eta egintzen bidea zabaltzen duten jarduketa materialak aurkaratzeko eskumenak gauzatzeko, 6/1990 Foru Legearen 335. artikuluak aipatzen baitira eta toki administrazioaren arloan eskumenak dituen Foru Komunitateko Administrazioko organoari baitagozkio, betiere toki entitateen autonomia errespetatuz, toki entitateei eska diezaien beren plantilla organikoak alda ditzatela araudia bete dadin udal idazkarien lanpostuaren hizkuntza eskakizunari dagokionez eta, beraz, hizkuntza eskakizuna ken dadila eta LPEa zuzenketa horien arabera alda dadila.

Alegazio horiei erantzunez, adierazi behar da Nafarroako Foru Komunitateko Administrazioak, lanpostu hutsak eta haien baldintzak ezartzeko, toki entitateek onartzen dituzten plantilla organikoak hartu behar dituztela aintzat, eta haietan agertzen bada nahitaezkoa dela hizkuntza eskakizun zehatz bat, eta plantilla hori deuseztatu ez badute ez Nafarroako Administrazio Auzitegiak, ez administrazioarekiko auzien epaitegiek, hizkuntza eskakizun hori dela lanpostu hutsen zerrendan jaso behar dena.

Nafarroako Toki Administrazioari buruzko 6/1990 Foru Legeak 235.1 artikuluan xedatzen duenez, “toki entitate bakoitzak bere plantilla organikoan adierazi beharko ditu plazen eta lanpostuen ezaugarriak, Euskarari buruzko abenduaren 15eko 18/1986 Foru Legea eta hura garatzeko araudia aplikatuz kontuan hartzen direnak barne. Langile horiek hartzeko prozedurak ezaugarri horietara egokituko dira”.

Beraz, Toki Administrazioaren eta Despopulazioaren Zuzendaritza Nagusiak, idazkari eta kontu-hartzaile lanpostu hutsak zehaztean, kontuan hartu behar ditu toki entitateen plantilla organikoetan haientzat ezarritako ezaugarriak, bere eskumenetik kanpo geratzen delako horiek aldatzea edo deuseztatzea.

Toki entitateetako plantilla organikoek arau izaera dute, izaera orokorreko xedapenak dira, baina horrek ez ditu salbuesten motibatzeko betebeharretik, haien erabilera arbitrariorik gerta ez dadin, baina, era berean, toki entitateek beren burua antolatzeko duten ahalaren adierazpena dira.

Zentzu horretan, 2008ko urriaren 15ean Nafarroako Justizia Auzitegi Gorenak emandako epaiak adierazten duenez, “plantilla organikoaren konfigurazioa Administrazioak bere zerbitzuak antolatzeko duen ahalaren barnean dago”.

Zentzu berean ageri da Auzitegi Gorenaren jurisprudentzia, 1997ko otsailaren 17ko epai batean adierazten baitu administrazio publikoek beren burua antolatzeko duten ahalaren arabera, zerbitzuak ahal den efikazenak izan daitezen egokiena iruditzen zaien antolaketa eratzeko eskumena dutela, eta beren burua antolatzeko ahal horren ezaugarri nagusietako bat dela hautazkotasuna, ezen ez arbitrariotasuna.

Galiziako Justizia Auzitegi Gorenak 2004ko urtarrilaren 21ean emandako ebazpen batek honako hau dio: “beren burua antolatzeko ahalean biltzen da, funtsean, agintaritza publiko baten ahalen multzoa, esleitzen zaizkion baliabide pertsonalak, materialak eta errealak antolatzeko, eskumen eta ahal publiko zehatz batzuk egikaritu ahal izan daitezen. Bete-betean sartzen da hautazko ahal publikoak deitutakoen eremuan, eta horiei buruz, administrazioarekiko auzien jurisdikzioak fiskalizatzen ahal duen bakarra da ea egintza edo xedapen hori antolamendu juridikoarekin bat datorren ala ez”.

Hizkuntza eskakizunak zehazteko, beraz, dagokion udalaren plantilla organikoa hartu behar da aintzat, eta horiek, ebazpen edo epai judizial irmo batez deuseztatu ez badira, baliozkoak direla eta indarra duen legediarekin bat datozela onartu behar da, eta administrazio organo honek ezin du plantilla horietan ezarritakoa deuseztatu, eskumenik ez duelako, Konstituzioan bermatzen den tokiko autonomiaren funtsezko printzipioak errespetatuko baditu.

Soilik Nafarroako Administrazio Auzitegiak edo administrazioarekiko auzien jurisdikzioko organoek epaitzen ahal dute plantilla horiek indarra duen legedira egokitzen diren ala ez.

Bestetik, Toki Administrazioaren gaineko eskumena duen Departamentuari legezkotasuna kontrolatzeko egiten zaion eskaerari dagokionez, kontuan hartu behar da kontrol hori ezin dela egikaritu plantilla organikoak zuzenean deuseztatuz, eta are gutxiago lanpostu hutsen behin betiko zerrenda baten haritik, izan ere, lehen adierazi denez, soilik jurisdikzio-organoek edo Nafarroako Administrazio Auzitegiak dute horretarako eskumena.

Nafarroako Toki Administrazioari buruzko uztailaren 2ko 6/1990 Foru Legearen 341. artikuluan aipatzen den legezkotasunaren kontrola egikaritzeko bi bide daude, alegia, aldez aurreko errekerimendua, hamabost egun balioduneko epean, edo zuzenean aurkaratzea administrazioarekiko auzien jurisdikzioaren aurrean, bi hilabeteko epean. Beraz, ez da bidezkoa horren egikaritza aipatzea foru legeen maila duen arau batean jasotzen den lanpostu hutsen hasierako zerrenda baten behin betiko onespenaren haritik.

Kontuan hartu behar da, gainera, plantillen indarraldia urtebetekoa dela eta, beraz, Foru Komunitateko Administrazioak epe barnean errekerimendu bat egiten badu eta toki entitateak errekerimendua aintzat hartzen ez badu, administrazioarekiko auzien jurisdikziora jo beharko litzatekeela, hala badagokio, hizkuntza eskakizuna deuseztatu dezaten, eta ordurako gerta daitekeela toki entitateak plantilla organiko berri bat onetsi izana, errekurritu den hizkuntza eskakizun berarekin.

Horiek horrela, alegazio horiek ezesten dira, zuzendaritza nagusi honek eskumenik ez duelako toki entitateen plantilla organikoen hizkuntza eskakizunak deuseztatzeko, indarra duten xedapen orokorrak direlako eta, epai irmo batek deuseztatu ez dituenez, ulertzen delako baliozkoak eta indarreko araudiaren araberakoak direla.

Horrenbestez, Nafarroako Foru Komunitateko gaikuntzadun funtzionarioentzat erreserbatutako lanpostuetan aldibaterakotasuna murrizteko presako neurriei buruzko 2022ko maiatzaren 30eko 16/2022 Foru Legearen 1.3 artikuluan ezarritakoa betez, eta eskuordetu dizkidaten ahalmenak erabiliz, zehazki, Lurralde Kohesiorako kontseilariaren uztailaren 1eko 35/2020 Foru Aginduaren bidez (Nafarroako Toki Administrazioari buruzko uztailaren 2ko 6/1990 Foru Legean ezarritako zenbait eskumen Toki Administrazioaren eta Despopulazioaren zuzendari nagusiari eskuordetzen dizkiona) eta urriaren 30eko 263/2019 Foru Dekretuaren bidez (Lurralde Kohesiorako Departamentuaren egitura organikoa ezartzen duena) emandakoak,

EBAZTEN DUT:

1. Onestea, Nafarroako Foru Komunitateko gaikuntzadun funtzionarioentzat erreserbatutako lanpostuetan aldibaterakotasuna murrizteko presako neurriei buruzko maiatzaren 30eko 16/2022 Foru Legearen 1.3 artikuluan aurreikusitako ondorioetarako, gaikuntzadun funtzionarioen artetik betetzeko merezimendu lehiaketan eskaintzen diren idazkari eta kontu-hartzaile lanpostuen behin betiko zerrenda. Bertan espresuki adierazten da zeintzuk betetzen dituzten aldi baterako enplegua egonkortzeko baldintzak Enplegu publikoan aldibaterakotasuna murrizteko presako neurriei buruzko abenduaren 28ko 20/2021 Legean ezarritakoaren arabera.

Behin betiko zerrenda hori ebazpen honen eranskinean jaso da.

2. Ebazpen hau Nafarroako Aldizkari Ofizialean argitara ematea, horrek jakinarazpen baten ondorioak izanen dituelarik, Administrazio Publikoen Administrazio Prozedura Erkideari buruzko urriaren 1eko 39/2015 Legearen 45. artikuluan xedatutakoarekin bat.

Ebazpen honen aurka, administrazio publikoak ez diren espedienteko interesdunek gora jotzeko errekurtsoa aurkezten ahalko dute, Nafarroako Gobernuari zuzendua, argitaratu eta biharamunetik hilabeteko epean, eta Administrazio publikoek, berriz, administrazioarekiko auzi errekurtsoa aurkezten ahal dute, Nafarroako Justizia Auzitegi Nagusiko Administrazioarekiko Auzien Salari zuzendua, argitaratu eta biharamunetik bi hilabeteko epean, alde batera utzi gabe Nafarroako Gobernuaren aurrean aldez aurreko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarritako moduan eta epean.

Iruñean, 2022ko uztailaren 5ean.–Toki Administrazioaren eta Despopulazioaren zuzendari nagusia, Jesús M.ª Rodríguez Gómez.

Iragarkiaren kodea: F2209849