Iragarkia

15. ALDIZKARIA - 2022ko urtarrilaren 21a

2. NAFARROAKO TOKI ADMINISTRAZIOA

2.2. XEDAPEN ETA IRAGARKIAK, HERRIEN ARABERA ANTOLATUAK

LESAKA

Etxeko animaliak, bereziki txakurrak, edukitzea arautzen duen ordenantzaren aldaketa. Behin betiko onespena

Lesakako Udalak, 2021eko urriaren 28an egindako osoko bilkuran, hasiera batez onetsi zuen Etxeko animaliak, eta bereziki txakurrak, edukitzea arautzen duen ordenantzaren aldaketa. Hasierako onespen hori argitaratu zen 2021eko 261. Nafarroako Aldizkari Ofizialean, azaroaren 16an.

Jendaurreko epea iraganik inork alegaziorik aurkeztu gabe, ordenantza hori behin betiko onesten da, eta testu osoa argitaratzeko agintzen, behar diren ondorioak izan ditzan; hori guztia, bat etorriz Nafarroako Toki Administrazioari buruzko uztailaren 2ko 6/1990 Foru Legearen 325.1. artikuluarekin (maiatzaren 31ko 15/2002 Foru Legeak aldatua).

Lesakan, 2021eko abenduaren 22an.–Alkatea, Ladis Satrustegui Alzugaray.

ETXEKO ANIMALIAK, BEREZIKI TXAKURRAK, EDUKITZEA ARAUTZEN DUEN ORDENANTZA

Xedea

1. artikulua. Ordenantza honen xedea etxeko animaliak, batez ere txakurrak, edukitzea arautzea da, animalia horiek babesteko, ongi egoteko eta arduraz edukitzeko, laneko txakurrak barne.

2. artikulua. Ordenantza honen ondorioetarako, etxeko animaliak dira gizakiak konpainiarentzat mantentzen dituen espezietakoak, baldin eta animalia horiek edukitzeak ez badu xede animalia horiek kontsumitzea edo haien ekoizpenak aprobetxatzea.

3. artikulua. Laneko txakurrak dira jarduera edo zeregin jakin batean aritzen diren konpainiako animaliak, hala nola zaintza-txakurrak, artzain-txakurrak, laguntza-txakurrak, ehiza-txakurrak edo -hudoak, boilur-bilatzaileak, erreskate-txakurrak eta segurtasun indar eta kidegoek erabiltzen dituztenak.

Helburua

4. artikulua. Ordenantza honek helburu hauek ditu:

1.–Etxeko animalien babes eta ongizate mailarik handiena sortzea.

2.–Tratu egokia bermatzea eta tratu txarreko egoerak sahiestea.

3.–Animaliak arduraz edukitzea sustatzea.

Aplikazio-eremua eta salbuespenak

5. artikulua. Ordenantza hau Lesakako udalerrian dauden konpainiako abere guztiei eta haien jabeei aplikatuko zaie, honako hauek izan ezik:

1.–Ekoizpen animaliak.

2.–Basafaunako animaliak.

3.–Toreo-ikuskizunetan erabiltzen diren animaliak.

Identifikazioa, osasun-kontrola, hilketa eta eutanasia

6. artikulua. Nahitaezkoa da txakurrak, katuak eta hudoak mikrotxip homologatuaren bidez identifikatzea. Kode bakar bat du, Nafarroako Konpainiako Animalien Identifikazio Erregistroak baliozkotua, eta bertan inskribatu behar dira sistema horren arabera identifikatutako animaliak.

Nafarroako Konpainiako Animalien Identifikazio Erregistroko altak jabearen, animaliaren eta jardun duen albaitariaren datuak jasoko ditu, identifikatu eta gehienez ere bost egun balioduneko epean. Alta hori identifikazioa egin duen albaitari gaitu baten bidez izapidetu ahal izango da.

Animalia baten titulartasun-aldaketa edo baja Nafarroako Konpainiako Animalien Identifikazio Erregistroan, gehienez ere bost egun balioduneko epean eskatuko da, animalia benetan edukitzen ez den edo baja hartzen den egunetik zenbatzen hasita.

Gainera, derrigorrezkoa da txakur, katu eta hudoen alta eta baja guztiak Udaletxeko Erroldan inskribatzea, Nafarroako Konpainiako Animalien Identifikazio Erregistroan inskribatu eta bost egun balioduneko epean. Betebehar hori animaliaren jabeari dagokio.

7. artikulua. Ongizatean edo animalien osasunean eskumena duen agintaritzak erabakiko du konpainiako animalien txertaketa edo nahitaezko tratamendua, eta, beharrezkoa izanez gero, zaintzarako, sendatzeko, tratamendurako edo eutanasiarako gaixotasunen bat diagnostikatu zaienen isolamendua erabakiko du.

8. artikulua. Animalien tratamenduak eta txertoak, nahitaezko osasun-azterketak eta horien aldizkakotasuna erregelamendu bidez ezarriko ditu animalien ongizatean edo osasunean eskumena duen organoak.

Amorruaren aurkako txertoa nahitaez hartu behar duten txakurren eta katuen kasuan, nahitaez egin behar da urteko edo bi urteko bisita bat, osasun-kontrol batekin. Kontrol hori agiri bidez egiaztatuko da, txertoa animaliaren pasaportean zigilatuz eta osasun-egoera orokorrari buruzko txostena eginez.

9. artikulua. Txakur guztiei eman behar zaie txertoa. Jabeei dagokie txertoa jartzeko hauek aurkeztu beharra.

Txakurrei txertoa jarri ondoren, jabeei identifikazio- eta txertaketa-txapa emango zaie, animaliaren lepokoan jar dezaten.

10. artikulua. Urtero, nahitaezko txertaketa errazteko, Alkatetzak txertaketa kolektiboko lekua, ordutegia eta epea adieraziko ditu.

11. artikulua. Txakurren jabeek albaitariaren laguntza eskatu beharko dute animaliaren gaixotasunaren, parasitoen edo zaurien sintomen aurrean, agertu eta hogeita lau ordu igaro baino lehen, eta gaitutako albaitariak adierazitako tratamendua aplikatuko zaie.

Gaixotasun kutsakorra egiaztatzen bada, txakurra isolamenduan eta behar den tratamenduarekin geratuko da, harik eta egoera hori amaitu dela egiaztatzen den arte.

12. artikulua. Animalia bat albaitari batek bakarrik hilko du, indarrean dagoen legeriaren arabera justifikatutako eta baimendutako egoeretan, eta udal honek legeriara jotzen du konpainiako animaliak hiltzeko edo eutanasia egiteko jarduera-protokoloak ezartzeko.

Debekuak

13. artikulua. Debekatuta daude ordenantza honetako 14.etik 19.era bitarteko artikuluetan deskribatutako jokabideak, bai eta arau-hauste arin, astun edo oso astunen zerrendan zerrendatutakoak ere.

14. artikulua. Lesakako udalerriko edozein gunetan debekatuta dago lepokorik gabeko txakurrak edo nortasun-xaflarik eta txertaketa zuzenik gabeko txakurrak ibiltzea.

15. artikulua. Lesakako hirigunean debekatuta dago aske dauden txakurrak ibiltzea, baita ibilgailuentzat zabalik dauden kale eta errepideetan ere. Libre egon ahal izango dira horretarako gaitutako eremuetan: aisialdirako eta solte egoteko guneetan, alegia.

16. artikulua. Hirigunean, txakurrek arduradun bati lotuta zirkulatu beharko dute nahitaez, gehienez 2 metroko luzera duen uhalaren bidez.

17. artikulua. Aurreko aginduetan aipatutako baldintzak bete gabe zirkulatzen duten txakurrak, udal-mugarteko eremu desberdinetarako, osasun publikorako arriskutsutzat hartuko dira, eta jaso eta atxiki egingo dira.

18. artikulua. Debekatuta dago animaliak edukitzea, leku horietan ezin bada haien gaineko kontrol egokirik egin. Animalia baten jabeak beharrezko neurriak hartuko ditu hirugarren pertsonei edo horien ondasunei kalterik edo eragozpenik ez eragiteko.

19. artikulua. Debekatuta dago txakurren gorotzak parkeetan, lorategietan edo Lesakako hirigunean erabilera publikoko beste edozein eremutan uztea.

Agindu honetan ezarritako debekua betetzeko, txakurraren edukitzaileak txakurren gorotzak jaso beharko ditu, adierazitako guneetan uzteko.

20. artikulua. Debekatuta dago txakurrak edo beste edozein animalia edozein establezimendu edo garraio publikotara sartzea (jendaurreko, kiroletako eta kulturako ikuskizunetarako lokalak, bai eta erabilera publikoko igerilekuak ere), nahiz eta uhala eta muturrekoa izan eta arduradunez lagunduta egon. Laguntza-txakurren kasuan izan ezik, horiek berariazko baimena beharko baitute. Erabilera komuneko eremuetako higiezinei dagokienez, bereziki igogailuei dagokienez, txakurren jabeek erabil dezakete etxebizitzetara sartzeko edo kalera irteteko.

21. artikulua. Txakurrak, zaindari gisa, jabetza partikularreko esparruetan aske egon ahal izango dira, baldin eta esparru horiek bide publikora erabat itxita badaude eta txakurrak hesiaren kanpoaldera salto egin ezin badu. Horretarako, jabeak ohartarazi behar du txakur zaindaria dagoela, argi eta garbi irakurtzeko moduko plaken bidez. Plaka horiek ikusteko moduan jarri behar dira zaindutako barrutiko sarrera guztietan.

Erantzunkizunak

22. artikulua. Animalia baten edukitzaileak baldintza higieniko-sanitario eta etologiko onetan edukitzeko betebeharra izango du, animaliaren espeziearen arabera. Eta nahitaezkotzat jotako edozein tratamendu prebentibo egingo du.

23. artikulua. Jabearen erantzukizun subsidiarioaren kalterik gabe, animaliaren edukitzaileak:

a) Kasu bakoitzean aplikatzekoa den legearekin bat etorriz, pertsona zein basabereei edo etxabere edo aziendei, bai eta, bideei, espazio publikoei eta, oro har, natura-inguruneari gerta dakizkiekeen kalte eta eragozpenen erantzule da.

b) Halaber, animaliek bide eta espazio publikoak ez zikintzeko behar diren neurriak hartzeaz arduratzen da.

c) Era berean, bere animaliek sortutako zaunkak eta iskanbilak berehala isilarazteaz arduratzen da, bereziki 22:00tik 8:00tara, eta neurriak hartzen ditu aurrerantzean auzotarrei eragozpenik ez sortzeko.

Txakurrak edo beste animalia batzuk jasotzea eta atxikitzea

24. artikulua. Lesakako Udalari dagokio, bere eskumenen esparruan:

a) Bere udalerrian dauden abandonatutako edo galdutako animaliak biltzea eta animaliak hartzeko zentroetan sartzea. Bilketa zerbitzua Nafarroako Foru Komunitateko administrazioarekin hitzartuko da.

b) Etxeko animaliak konfiskatzea, baldin eta tratu txarren edo torturen zantzurik badago, eta akidura fisikoaren, desnutrizioaren edo instalazio desegokietan egotearen sintomak badaude.

25. artikulua. Harrera-zentroek gehienez ere hogeita lau orduko epean jakinaraziko diote RIACNri identifikatutako animalia bat sartu dela, eta epe horretan egingo dituzte jabea berehala aurkitzeko beharrezko izapideak.

26. artikulua. Jabeak edo baimendutako pertsonak hamar egun balioduneko epea du identifikatutako edo identifikatu gabeko animalia bat berreskuratzeko, jakinarazpena jasotzen duenetik zenbatzen hasita. Animalia horren titulartasuna behar bezala egiaztatu beharko du, eta, berreskuratu aurretik, animalia jasotzeak eta harrera-zentroan egoteak eragindako gastu guztiak ordaindu beharko ditu.

27. artikulua. Lesakako Udalak abandonatutako animalien adopzioa sustatu eta erraztu ahal izango du, harrera-zentroekin lankidetzan.

Arau-hausteak

28. artikulua. Ordenantza honen ondorioetarako, arau-hausteak arinak, astunak edo oso astunak izan daitezke:

1.–Arau-hauste arinak:

a) Konpainiako animaliak 19/2019 Foru Legean aurreikusitako baldintzetan identifikatuta edo erregistratuta ez edukitzea.

b) 19/2019 Foru Legeak eskatzen dituen artxibo edo erregistroak ez izatea, eta osatu gabe izatea, eguneratuta ez egotea edo akatsak izatea.

c) 18 urtetik beherakoei eta ezgaituei etxeko animaliak eskualdatzea, guraso-ahala, tutoretza edo zaintza dutenen baimenik gabe.

d) Edozein motatako animaliak erakusleihoetan, merkataritza-establezimenduetan, aisialdirako edo dibertsiorako lokaletan erakustea.

e) Udalak, udalaz gaindiko erakundeak edo eskualdeak baimendutakoa baino animalia gehiago edukitzea bizileku batean, dagokion baimenik gabe.

f) Espezie basatietako animaliak (baita etxekotuak ere) zirkulatzea herri barruko bideetan.

g) Mediku-zentroetan, igerilekuetan, taberna-jatetxeetan eta, oro har, lokal publikoetan animaliekin sartzea.

h) Laguntzako animaliak baldintza desegokietan edo horretarako bereziki egokituta ez dauden maletategietan garraiatzea, betiere animaliek kalterik ez badute.

i) Edozein espezietako animaliek azoka, erakusketa, lehiaketa, filmazio, kultur jarduera edo antzekoetan parte hartzea, dagokion baimenik gabe.

j) Edozein motatako animaliak artifizialki manipulatzea, saltzeko, ondo pasatzeko edo arte-adierazpenerako erakargarri egiteko.

k) Txakurrak hiriko espazio publikoetan eramatea uhalez gidatu gabe.

l) Animalien gorozkiez zikintzea espazio publikoak eta horiek ez garbitzea.

m) Aurretik erasoak eragin dituzten txakurrak muturrekorik ez eramatea.

n) Behar diren neurriak ez hartzea, bere zaintzapean dauden edozein motatako animaliek eragin ditzaketen kalteak saihesteko.

ñ) Laguntzako animaliei heziketa- eta soziabilitate-probak ez egitea, animaliaren izaerak eta portaerak hala gomendatzen dutenean.

o) Jabeek konpainiako animalien datuak eguneratuta ez edukitzea Nafarroako Konpainiako Animalien Identifikazio Erregistroan, eta animalien galera, heriotza, salmenta edo titulartasun-aldaketa ezarritako epeetan ez jakinaraztea.

2.–Arau-hauste astunak:

a) Animaliak behar ez bezala, modu desegokian edo debekatutako elikagaiekin elikatzea.

b) Animaliak, edozein espezietakoak, leku edo instalazio desegokietan mantentzea, baldin eta higiene- eta osasun-baldintza egokiak betetzen ez badituzte, neurri desegokiak badituzte edo, beren ezaugarriengatik, distantziagatik edo beste edozein arrazoirengatik, ezin badira egunero kontrolatu edo gainbegiratu.

c) Edozein espezietako animaliak lotuta edo giltzapetuta edukitzea, denbora batez edo sufrimenduak edo kalteak eragin diezazkieketen baldintzetan, edo gizakiarengandik edo beste animalia batzuengandik bakartuta edukitzea, espezie taldekoiak izanez gero; eta txakurrak modu iraunkorrean lotuta edukitzea, 19/2019 Foru Legearen 7.5 artikuluan araututakoa bete gabe.

d) Konpainiako animaliei ez jartzea txertoak edo ez egitea agintari eskudunek nahitaezkotzat jotako tratamenduak, eta ez antzutzea 19/2019 Foru Legearen 16.4 artikuluan ezarritako konpromisoa bete gabe edo agintari eskudunek hala erabakitzen dutenean.

e) Albaitari batek egin gabeko edo 19/2019 Foru Legean ezarritako baldintzen eta betekizunen aurkako esterilizazioa, txertoa, tratamenduak edo edozein ebakuntza kirurgiko.

f) Osasun-alerta deklaratu bada, osasun-zerbitzu ofizialei nahitaez adierazi beharreko gaixotasunen berri ez ematea.

g) Elikagaiak fabrikatzeko, manipulatzeko edo biltegiratzeko lokaletan animaliekin sartzea.

h) Parasitoak edo gaixotasunak dituzten animaliak saltzea, edo gaixotasunik ez dutela egiaztatzen duen albaitaritza-ziurtagiririk ez izatea.

i) Txakurrek basabereei edo etxabere edo aziendei kalteak eragitea, bereziki ugaltze-garaian. Zakurra aziendentzat arriskutsua izatea saihesteko, azienden ondoan egotean lotu edo kontrolatu beharko dira.

j) Laguntzako animaliei albaitaritza-azterketa ez egitea, agintari eskudunak hala agindu duenean.

k) Konpainiako animaliak haztea edo saltzea, 19/2019 Foru Legean ezarritakoa urratuz.

l) Edozein motatako animalien kostu bidezko salerosketaz bestelako erosketengatik, publizitate-, sari- edo opari-eskaera gisa, sari gisa dohaintza, zozketa edo entrega egitea.

m) Ibilgailu motordun bati lotuta dauden edozein motatako animaliak martxan eramatea.

n) Urkatzeko lepokoak erabiltzea eta saltzea, konpainiako animalientzat kaltegarriak diren pintxoekin edo elektrikoekin.

ñ) Animaliei nahitaezko albaitaritza-tratamenduak, tratamendu aringarriak, prebentiboak edo funtsezko sendatze-tratamenduak ez ematea.

o) Konpainiako animaliak kontrolik gabe ugaltzea saihesteko beharrezko neurriak ez hartzea.

p) Animaliak pertsonen eta animalien (basabere, etxabere edo aziendeen) osasunerako edo segurtasunerako arriskutsuak izan daitezen edo gauzei kalte materialak eragin diezazkieten baimentzea edo ez eragoztea.

q) Laguntzeko animaliak gizakiek edo animaliek kontsumitzeko erabiltzea.

r) Istripu, zauritu edo arriskuan dagoen animalia bati laguntzarik ez ematea, hori bere buruarentzat edo hirugarrenentzat inolako arriskurik gabe egin daitekeenean.

s) Laguntzako animaliak baldintza desegokietan edo maletategietan garraiatzea, horretarako bereziki egokituta ez badaude eta animaliek kalteak jasaten badituzte.

t) Hiru urteko epean arau-hauste arin bat baino gehiago egitea, ebazpen irmo bidez hala adierazi eta jakinarazi denean.

3.–Arau-hauste oso astunak dira:

a) Edozein motatako animalien arteko borrokak antolatzea, iragartzea edo egitea.

b) Edozein motatako animalien aurkako ankerkeria, tratu txarra eta eraso fisikoak.

c) Animaliak erabiltzea ikuskizunetan, herri-jaietan, borroketan, animalien arteko liskarretan, beste animalia batzuk harrapatzean, erasoetan, simulatu gabeko eszenak filmatzean edo krudeltasuna, tratu txarrak edo sufrimenduak eragin diezazkieketen beste jarduera batzuetan, tratamendu antinatural edo iraingarrietan, edo heriotzan.

d) Animaliak trebatzea edo heztea, agresibitatea gara dezaten, eta borroketarako prestatzea, borrokatzera bultzatzea edo haien osasunari edo ongizateari kalte egiteko moduan lan eginaraztea.

e) Animalia, bizirik zein hilda, abandonatzea.

f) Hamar eguneko epean ez berreskuratzea galdutako konpainiako animaliak, harrera-zentro batean jaso badira.

g) Konpainiako animalia baten heriotza eragitea, eutanasiari edo hilketari buruzko 19/2019 Foru Legean araututakoa bete gabe.

h) Laguntzako animaliei debekatutako ebakuntza kirurgikoak egitea.

i) Animalia bat, edozein espezietakoa, sufritzea edo hiltzea eragiten duten edo eragin dezaketen hazkuntza-prozedurak erabiltzea, baita animalia ugaltzaileak erabiltzea ere, horien ondorengoek herentziazko gaixotasun larriak badituzte eta heriotza goiztiarra eragiten badiote edo albaitariek esku hartu behar badute haren ondorioak arintzeko.

j) Animaliak, edozein espezietakoak, nahita ehizatzea, 19/2019 Foru Legean aurreikusitako kasuetan izan ezik, eta ehiza-espezie baimenduak izan ezik.

k) Beharrezkoak ez diren sufrimenduak edo kalteak eragin diezazkieketen substantziez hornitzea.

l) Estatu espainiarrean indarrean dauden nazioarteko itun eta hitzarmenen arabera babestuta edo galzorian dauden espezieen eta 19/2019 Foru Legean berariaz debekatutako animalien merkataritza, salmenta, edukitza, merkataritza-erakusketa eta ale, kume, arrautza edo edozein zati edo produktu naturalizatzea.

m) Akta edo administrazio-ebazpen bidez behin-behinean ibilgetutako edozein motatako animaliak lekualdatzea.

n) Konpainiako animalia baten osasun-kontroleko neurriak ez hartzea edo ez egitea, eta agintari eskudunari ez jakinaraztea gaixotasun transmitigarri baten susmo- edo diagnostiko-kasuak, osasun-alerta deklaratu denean.

ñ) 19/019 Foru Legean ezarritako eginkizunak betetzeko agintaritza eskudunak edo haren agenteek eskatutako datuak emateari edo informazioa emateari uko egitea edo aurka egitea, bai eta informazio okerra edo dokumentazio faltsua ematea ere.

o) Hiru urteko epean arau-hauste astun bat baino gehiago egitea, ebazpen irmo bidez hala adierazi eta jakinarazi denean.

Zehapenak

29. artikulua. Zehapen hauek aplikatuko dira:

a) Arau-hauste arinengatik, 200 eurotik 1.000 eurorainoko isuna.

b) Arau-hauste astunengatik, 1.001 eurotik 6.000 eurora bitarteko isuna.

c) Arau-hauste oso astunengatik, 6.000 eurotik 100.000 eurora arteko isuna.

30. artikulua. Aurreko artikuluan araututako zehapenak alde batera utzi gabe, zehapen-espedientea ebaztea dagokion organoak zehapen osagarri hauek erabaki ahal izango ditu:

a) Instalazioak aldi baterako ixtea, gehienez ere bi urtez arau-hauste astunetarako eta lau urtez oso astunetarako.

b) 19/2019 Foru Legeak araututako jarduerak egiteko aldi baterako debekua edo desgaikuntza, gehienez ere bi urterako arau-hauste astunetarako eta lau urterako oso astunetarako.

c) Arau-hauste astun edo oso astunen kasuan, animaliak konfiskatzea.

d) Animaliak edukitzeko debekua, gehienez ere bi urterako, astunen kasuan, edo lau urterako edo iraunkorra oso astunen kasuan, animaliari eragindako kaltearen krudeltasun-maila edo intentzionalitatea kontuan hartuta.

e) Gaitutako edo baimendutako albaitariaren aitortza kentzea.

31. artikulua. Zehapenak ezartzerakoan, honako irizpide hauek hartuko dira kontuan isunen zenbatekoa eta zehapen osagarriak mailakatzeko:

a) Intentzionalitatea.

b) Animalien babeserako, animalien osasunerako, osasun publikorako edo ingurumenerako sortutako kaltea edo arriskua, edo ukitutako animalien kopurua.

c) Urtebetean arau-hauste bat baino gehiago behin baino gehiagotan egitea.

d) Subjektu arau-hauslearen kargua edo eginkizuna, edo haren lanbidea eta ikasketak direla-eta jarduera hobeto ezagutzea.

e) Arau-hauslearen eta agintaritza eskudunaren arteko lankidetza, egitateak argitzeko eta babestutako ondasuna itzultzeko.

f) Jokabide berean legez kanpokoak pilatzea.

g) Bi urtez berrerortzea gertatuz gero, zehapenaren zenbatekoari 100eko 50 gehituko zaio, eta birritan edo gehiagotan berreroriz gero, 100eko 100.

h) Egintza bakar batek bi arau-hauste edo gehiago badakartza, astuntasun handienari dagokion zehapena ezarriko da, erdi-mailakoa edo handiena.

Arau-hausteen eta zehapenen preskripzioa

32. artikulua. Arau-hauste eta zehapen arinak urtebetera preskribatzen dira, astunak bi urtera eta oso astunak hiru urtera.

33. artikulua.

1.–Ordenantza honetan aurreikusitako arau-hausteei zehapenak ezartzeko, erregelamendu bidez araututako zehapen-prozedurari jarraitu beharko zaio.

2.–Hauek dira lagun egiteko animalien arau-hausteengatiko zehapen-espedienteak instruitu eta ebazteko eskumena dutenak:

a) Arau-hauste arinen kasuan, alkatea edo zinegotzi delegatua.

b) Arau-hauste astun edo oso astunen kasuan, Udalbatzaren osoko bilkura.

3.–Zehatzeko ebazpena ebazteko eta jakinarazteko gehieneko epea urtebetekoa izango da, zehapen-prozedura hasten den egunetik zenbatzen hasita.

Erantzukizun zibila eta penala

34. artikulua. Ordenantza honetan aurreikusitako edozein zehapen ezartzeak ez du baztertzen erantzukizun zibila eta zehatuari legokiokeen kalte-galerengatiko balizko kalte-ordaina.

35. artikulua. Arau-hauste administratiboa delitua izan badaiteke, Lesakako Udalak, espedientea hasita, jurisdikzio eskudunari jakinaraziko dizkio egitateak.

Prozedura penala hasitakoan, administrazio-prozedura zehatzailea eten egingo da harik eta prozedura horrek ebazpen irmoa eman arte.

Zehatzeko eskumena eta prozedura ebazteko epea

36. artikulua. Lagun egiteko animalien arau-hausteengatiko zehapen-espedienteak instruitzeko eta ebazteko eskumena Lesakako Udalari dagokio, eta zehapen-ebazpena emateko eta jakinarazteko gehieneko epea urtebetekoa izango da, zehapen-prozedura hasten den egunetik zenbatzen hasita.

Animaliak babestearen arloko dibulgazioa eta hezkuntza

37. artikulua. Lesakako Udalak, besteak beste, animalien babesari buruzko prestakuntza-, dibulgazio- eta informazio-jarduera hauek sustatuko ditu:

a) Aldizkako sentsibilizazio- eta sustapen-kanpainak sustatuko ditu, gai hauei buruz: edukitza arduratsua, animaliak identifikatzeko betebeharra, kontrolik gabeko ugalketa eta abandonua saihestea, adopzioak sustatzea, etab.

b) Animalien babesarekin lotutako edukiak zabalduko ditu ikasleen eta herritarren artean.

c) Animalien jabe eta edukitzaileentzako prestakuntza-kanpainak sustatuko ditu, animaliak arduraz edukitzea bermatzeko.

Arriskutsuak izan daitezkeen animaliak

38. artikulua. Arriskutsuak izan daitezkeen animaliatzat sailkatutako edozein animalia edukitzeko, aldez aurretik administrazio-lizentzia lortu beharko da. Lizentzia hori eskatzailea bizi den udalerriko Udalak emango du, Arriskutsuak izan daitezkeen animaliak edukitzeko araubide juridikoari buruzko abenduaren 23ko 50/1999 Legeak ezarritako baldintzak betetzen direla egiaztatu ondoren.

39. artikulua. Arriskutsuak izan daitezkeen txakurrak espazio publikoetan egoteko eta zirkulatzeko, nahitaezkoa izango da bi metroko luzera duen uhala erabiltzea, bai eta ezaugarri morfologikoetarako egokia den muturrekoa ere.

Ordenantza honetan arriskutsuak izan daitezkeen animaliei buruz aurreikusi ez den guztiari dagokionez, Arriskutsuak izan daitezkeen animaliak edukitzeko araubide juridikoari buruzko abenduaren 23ko 50/1999 Legean eta hura garatzen duen martxoaren 28ko 287/2002 Errege Dekretuan xedatutakoa aplikatuko da.

AZKEN XEDAPEN BAKARRA

Ordenantza honetan aurreikusi ez den guztirako, Nafarroako Toki Administrazioari buruzko uztailaren 2ko 6/1990 Foru Legean, Jardueren Erregelamenduan, Nafarroako Konpainiako Animaliak Babesteko apirilaren 4ko 19/2019 Foru Legean eta haren erregelamenduzko xedapenetan xedatutakoa aplikatuko da.

Iragarkiaren kodea: L2118172