1. NAFARROAKO FORU KOMUNITATEA
1.7. BESTELAKOAK
120/2022 EBAZPENA, maiatzaren 13koa, Industria Antolamenduaren, Azpiegitura Energetikoen eta Meatzeen Zerbitzuko zuzendariak emana, aurretiazko administrazio baimena eta eraikitzeko baimen administratiboa ematen dituena Erriberrin egiteko “La Pedrera III” izeneko eguzki parke fotovoltaikoa, 4,5 MW-ekoa eta sarearekin konektatzekoa.
2021eko uztailaren 2an, Energías Fotovoltaicas de Navarra SLk aurretiazko administrazio baimena eta eraikitzeko baimen administratiboa eskatu zituen eguzki-instalazio fotovoltaiko honetarako:
–Izena: “La Pedrera III” eguzki parke fotovoltaikoa, 4,5 MW-ekoa.
–Instalazioaren titularra: Energías Fotovoltaicas de Navarra SL
–Instalazioaren kokalekua: Erriberriko udal-mugarteko 7. poligonoko 554. lurzatia.
–Instalazioaren ezaugarri teknikoak:
• Sorgailu fotovoltaikoa: Muturreko potentzia, osotara, 5,3622 MWp (Potentzia nominala, osotara: 4,5 MW). 9.930 panel instalatuko dira, honela banatuta: 7.860 panel ardatz bateko jarraitzaileen gainean (7 jarraitzaile 60 panelekin eta 120 jarraitzaile 62 panelekin), eta 2.070 panel egitura finkoaren gainean. Panel fotovoltaikoa JAM72S30 da, eta 540 Wp-eko muturreko potentzia nominala du.
• Inbertsoreak: 22 string inbertsore, Sungrow SG250HX markakoak eta bakoitza 250 kWn-ekoa. Inbertsoreen guztizko batura 5,5 MWn bada ere, potentzia hori 4,5 MWn-era mugatuko da.
• Konexio instalazioak: Energia “La Pedrera II” parkean dagoen azpiestazioaren bidez hustuko da (66/20 kV-eko “Huerta FV Pedrera 2” transformazio azpiestazioa; eraberritu da bere potentzia 3,5 MVAtik 9 MVAra handitzeko). Energia azpiestazio horretaraino hustuko duen linea, 20 kV-ekoa, lurpetik joanen da. Gutxienez 0,6 m-ko sakonerako zangak eginen dira behe tentsioko eta tentsio ertaineko eroanbideetarako. Bi SPS estazio instalatuko dira 0,8/20 kV-eko transformadorea hartzeko. Bi estazio horietatik lurpeko lineak abiatuko dira, 20 kV-ekoak, La Pedrera II azpiestazioraino; bata 1.300 metrokoa da eta bestea 1.000 metrokoa.
Espedientean jasota dago 127E/2022 Ebazpena, apirilaren 20koa, Biodibertsitate Zerbitzuko zuzendariarena. Ebazpen horren bidez, parke fotovoltaikoaren proiektu horren gaineko ingurumen-ukipenen txostena egin zen, eta txosten horrek berekin ekarri zuen neurri batzuk aplikatzea.
Era berean, espedientean jasota dago 161E/2022 Ebazpena, maiatzaren 6koa, Lurralde eta Paisaia Zerbitzuko zuzendariarena. Horren bidez, baimena eman zen “La Pedrera III” eguzki parke fotovoltaikoaren proiekturako, Erriberriko 7. poligonoko 554. lurzatian, Pistolas alderdian. Ebazpen horretan jasotako zehaztapenak bete behar dira.
Energia elektrikoa garraiatu, banatu, merkaturatu eta horniketa egiteko jarduerak eta energia elektrikoaren instalazioak baimentzeko prozedurak arautzen dituen abenduaren 1eko 1955/2000 Errege Dekretuaren 125. artikuluarekin bat etorriz, Industria Antolamenduaren, Azpiegitura Energetikoen eta Meatzeen Zerbitzuak jendaurrean jarri zuen eskaera hori, iragarkia argitaratuz 2022ko 6. Nafarroako Aldizkari Ofizialean, urtarrilaren 11koan, bai eta Nafarroako Gobernuaren Gobernu Irekiaren webgunean ere. 30 egun balioduneko epean ez zen inolako alegaziorik jaso.
Espedientean jasota daude instalazio horretarako sarbide- eta konexio-baimenak, 2021eko irailaren 22koak, I-DE Redes Eléctricas Inteligentes SAUk emanak (Erref.: 9040203343)
Aurkeztutako dokumentazioa ikusita, eta kontuan hartuta abenduaren 1eko 1955/2000 Errege Dekretuaren VII. tituluan ezarritakoa (errege dekretu horren bidez arautu ziren energia elektrikoa garraiatu, banatu, merkaturatu eta horniketa egiteko jarduerak eta energia elektrikoaren instalazioak baimentzeko prozedurak) eta ekainaren 6ko 413/2014 Errege Dekretuan ezarritakoa (errege dekretu horren bidez arautu zen energia-iturri berriztagarrietatik, kogeneraziotik eta hondakinetatik energia elektrikoa ekoizteko jarduera), eskatutakoa bete behar da.
Adierazitakoarekin bat, eta Industriaren, Energiaren eta S3 Proiektu Estrategikoen zuzendari nagusiak azaroaren 18an emandako 52/2019 Ebazpenaren bidez eskuordetu dizkidan eskumenak (2019ko 234. Nafarroako Aldizkari Ofiziala, azaroaren 27koa) erabiliz, Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 32. eta 11. artikuluetan ezarritakoa betetzeko,
EBAZTEN DUT:
1. Aurretiazko administrazio baimena eta eraikitzeko baimen administratiboa ematea Energías Fotovoltaicas de Navarra SLri aipatu instalaziorako.
2. Onestea instalazio horiek egiteko aurkeztutako proiektuak, Andoni Mitxelena Damboriena eta David Remírez de Ganuza industria ingeniari teknikoek sinatuak. Hogeita lau hilabete emanen zaizkio obrak burutzeko.
3. Instalazioak aurkeztutako proiektuari jarraikiz gauzatu beharko dira, eta bat etorri beharko dute honako hauetan xedatutakoarekin: Goi tentsioko instalazio elektrikoen baldintza teknikoei eta segurtasun bermeei buruzko erregelamendua onesten duen maiatzaren 9ko 337/2014 Errege Dekretua; Goi tentsioko linea elektrikoen baldintza teknikoei eta segurtasun bermeei buruzko erregelamendua onesten duen otsailaren 15eko 223/2008 Errege Dekretua; eta Behe tentsiorako Erregelamendu elektroteknikoa onesten duen abuztuaren 2ko 842/2002 Errege Dekretua.
4. Behin proiektua gauzaturik, eskatzaileak zerbitzuan jartzearen akta eskatu beharko du. Eskaera horri erantsiko zaizkio aipatutako araudian ezarritako agiriak eta obra bukaeraren ziurtagiria, teknikari eskudun batek sinatua.
5. Administrazio baimen hau emanda ere, instalazioa gauzatzeko beharrezkoak diren kontzesio, lizentzia eta baimen guztiak, publikoak nahiz pribatuak, lortu beharko ditu instalazioaren eskatzaileak, aplikatzekoak diren beste xedapen batzuekin bat.
6. Ebazpen hau Industria Antolamenduaren, Azpiegitura Energetikoen eta Meatzeen Zerbitzura igortzea, behar diren ondorioak izan ditzan.
7. Ebazpen hau Nafarroako Aldizkari Ofizialean argitaratzea, orok jakin dezan.
8. Ebazpen hau Energías Fotovoltaicas de Navarra SLri jakinaraztea, eta ohartaraztea ez duela administrazio bidea amaitzen, eta haren aurka gora jotzeko errekurtsoa jartzen ahal dela Garapen Ekonomiko eta Enpresarialeko kontseilari zuzendua, hilabeteko epean, ebazpena jakinarazi eta hurrengo egunetik aurrera. Errekurtso horretan, espedientearen zenbakia adierazi beharko da.
Iruñean, 2022ko maiatzaren 13an.–Industria Antolamenduaren, Azpiegitura Energetikoen eta Meatzeen Zerbitzuko zuzendaria, Laura Larraya Irigoyen.
Iragarkiaren kodea: F2207086
