1. NAFARROAKO FORU KOMUNITATEA
1.7. BESTELAKOAK
108/2021 EBAZPENA, abenduaren 23koa, Lehendakaritzako eta Gobernu Irekiko zuzendari nagusiak emana, zeinaren bidez xedatzen baita Nafarroako Aldizkari Ofizialean argitaratzea Estatuko Administrazio Orokorraren eta Nafarroako Foru Komunitatearen arteko Lankidetza Batzordearen Erabakia, hain zuzen, Suspertzerako Europako Bitartekoetatik heltzen diren funtsen bidez finantzatzen ahal diren jarduketak kudeatzeko eta betetzeko premiazko neurriak onesten dituen apirilaren 14ko 4/2021 Foru Lege-Dekretuaren gainekoa.
Aintzat hartuz Konstituzio Auzitegiari buruzko urriaren 3ko 2/1979 Lege Organikoaren 33. artikulua, urtarrilaren 7ko 1/2000 Lege Organikoak aldatu zuena,
EBAZTEN DUT:
Estatuko Administrazio Orokorraren eta Nafarroako Foru Komunitatearen arteko Lankidetza Batzordearen Erabakia, ebazpen honi eranskin gisa gehitu zaiona, Nafarroako Aldizkari Ofizialean argitara dadila xedatzea.
Iruñean, 2021eko abenduaren 23an.–Lehendakaritzako eta Gobernu Irekiko zuzendari nagusia, Joseba Asiain Albisu.
ERANSKINA
Estatuko Administrazio Orokorraren eta Nafarroako Foru Komunitatearen arteko Lankidetza Batzordearen Erabakia, hain zuzen, Suspertzerako Europako Bitartekoetatik heltzen diren funtsen bidez finantzatzen ahal diren jarduketak kudeatzeko eta betetzeko premiazko neurriak onesten dituen apirilaren 14ko 4/2021 Foru Lege-Dekretuaren gainekoa
Estatuko Administrazio Orokorraren eta Nafarroako Foru Komunitatearen arteko Aldebiko Lankidetza Batzordeak erabaki hau hartu du:
ERABAKIA:
I.–Estatuko Administrazio Orokorraren eta Nafarroako Foru Komunitatearen arteko Lankidetza Batzordearen Erabakiaren bidez eratu zen lantaldeak aldez aurretik egin dituen negoziazioekin bat etorriz, apirilaren 14ko 4/2021 Foru Lege-Dekretuaren 13. artikuluaren inguruan agertutako desadostasunak aztertu eta konpontzeko proposamenak egiteko (aipatu foru lege-dekretuak Suspertzerako Europako Bitartekoaren funtsekin finantza daitezkeen jarduketak kudeatzeko eta gauzatzeko premiazko neurriak onartzen ditu), bi aldeek konpondutzat jo dituzte desadostasunok, ondoren aipatzen diren konpromiso eta deliberoen arabera:
1. 13. artikuluari dagokionez, bi aldeek adierazi dute Nafarroako Foru Komunitateko Gobernuak auzitan jarritako manuaren lege aldaketa sustatu duela eta idazketa hori 2022rako Nafarroako Aurrekontu Orokorrei buruzko Foru Lege Proiektuan sartu dela, hitzez hitz honela:
“Azken xedapenetako seigarrena. Apirilaren 14ko 4/2021 Foru Lege-dekretua aldatzea. Foru lege-dekretu horren bidez premiazko neurriak onetsi ziren Suspertzerako Europako Bitartekoetatik heltzen diren funtsen bidez finantzatzen ahal diren jarduketak kudeatzeko eta betetzeko.
13. artikulua aldatzen da, eta hauxe da testu berria:
“13. artikulua. Energia iturri berriztagarrietatik energia elektrikoa sortzeko instalazioen administrazio baimena.
Jarraian adieraziko diren instalazioek, zeinek energia iturri berriztagarrietatik energia elektrikoa sortzen baitute, ez dute aurretiazko administrazio baimenaren beharrik izanen, ez eta eraikitzeko administrazio baimenaren beharrik ere, non eta ez dauden ingurumen-inpaktuaren ebaluazioaren menpe. Bai aurkeztu beharko dituzte, ordea, aplikatu beharreko araubide teknikoaren arabera beharrezkoak diren agiriak. Instalazio horiek dira:
a) Soberakinik ez duten autokontsumo modalitateko instalazioak.
b) Soberakina duten autokontsumo modalitateko instalazioak, baldin eta konektaturik badaude 1 kV-eko tentsioa baino gutxiagoko sareetara.
c) Instalazio isolatuak”.
2. Era berean, bi aldeek ulertzen dute 13. artikulua gai horri buruzko Estatuko oinarrizko legeriaren arabera interpretatu behar dela, eta, zehazki, potentzia txikiko energia elektrikoa ekoizteko instalazioen sarerako konexioa arautzen duen azaroaren 18ko 1699/2011 Errege Dekretuaren 1. eta 2. artikuluen arabera, potentzia txikiko instalazioei aplikatu beharreko definizioari eta araubideari dagokienez.
II.–Lortutako akordioaren bitartez, bi alderdiek uste dute konpondu direla agertutako desadostasunak eta bukatu dela azaldutako auzia.
III.–Erabaki hau Konstituzio Auzitegiari jakinaraztea, Konstituzio Auzitegiari buruzko urriaren 3ko 2/1979 Lege Organikoaren 33.2 artikuluan aurreikusitako ondorioetarako, eta erabaki hau Estatuko Aldizkari Ofizialean eta Nafarroako Aldizkari Ofizialean argitaratzea.
Iragarkiaren kodea: F2118048
