1. NAFARROAKO FORU KOMUNITATEA
1.2. AGINTARIAK ETA LANGILEAK
1.2.2. Oposizioak eta lehiaketak. Lan publikoaren eskaintza
DEIALDIA, Nafarroako Foru Komunitateko Administrazioaren eta haren erakunde autonomoen zerbitzuko sistema informatikoetako goi mailako teknikarien sei lanpostu oposizio bidez betetzekoa. Izendapen proposamen osagarria.
Funtzio Publikoko zuzendari nagusiaren azaroaren 21eko 3321/2019 Ebazpenaren bidez, Nafarroako Foru Komunitateko Administrazioaren eta haren erakunde autonomoen zerbitzuko sistema informatikoetako goi mailako teknikarien sei lanpostu oposizio bidez betetzeko deialdia onetsi zen. Deialdiaren 9. oinarrian xedatutakoa betetzeko, 2021eko 228. Nafarroako Aldizkari Ofizialean, irailaren 29koan, argitara eman zen probak gainditu eta lanpostuetako baldintzak betetzen zituzten izangaietatik deialdiko lanpostu kopuruan sartzen ahal zirenak izendatzeko proposamena, eta 30 egun naturaleko epea ireki zen izendapena egiteko eskatutako dokumentazioa aurkez zezaten.
Funtzio Publikoko zuzendari nagusiaren urriaren 25eko 2900/2021 Ebazpenaren bidez, izendapen proposamen horretan sarturiko sei izangaiak funtzionario izendatu ziren.
Horretarako epearen barruan, Itziar Berrospe García andreari, igoera txandako izangaiari, eta Izaskun Sainz Lezaun andreari, txanda irekiko izangaiari, borondatezko eszedentzia eman zaie, lanpostuaz jabetzen direnetik aurrerako ondorioekin, une horretan administrazio publiko honetan edo beste batean zerbitzu finkoak ematen ari direlako.
Deialdiaren 10.4 oinarriak ezartzen du ezen izangaia funtzionario bihurtu eta, lanpostuan batere aritu gabe, zuzenean eta berak eskatuta, indarreko araudian ezarritako kasuetan, borondatezko eszedentzia ematen bazaio jabetza hartzen duen egunetik beretik, kasuko lanpostu hutsa ere deialdiaren 9.4 atalean xedatzen den moduan beteko dela.
Aurrekoa kontuan hartuta, eta igoera txandan beste inork oposizioa gainditu ez duenez, bidezkoa da izendapen proposamena osatzea Amaia Valgañón Petrizán andrea eta Asier Lizarraga Oroquieta jauna sartuz, haiek baitira lehendik izendatutako izangaien ondotik txanda irekian oposizioa gainditu dutenen artean hurrengoak.
Deialdiaren 9.2 oinarrian ezarritakoa betez, proposaturiko izangaiek 30 egun naturaleko epea izanen dute, proposamen hau Nafarroako Aldizkari Ofizialean argitaratu eta biharamunetik hasita, eskatutako agiriak aurkezteko Nafarroako Foru Komunitateko Administrazioaren Erregistro Orokor Elektronikoaren bidez.
Iruñean, 2021eko abenduaren 13an.–Langileriaren Kudeaketako Zerbitzuko zuzendaria, Pilar Goñi Muro.
Iragarkiaren kodea: F2117409
