4. PROZEDURA JUDIZIALAK
NAFARROAKO JUSTIZIA AUZITEGI NAGUSIA
Oinarrizko Eskubideen gaineko 386/2020 Prozedura
Virginia Arias López de Lacalle andrea, Nafarroako Justizia Auzitegi Nagusiko Administrazioarekiko Auzien Salako Justizia Administrazioaren letradua.
Aditzera ematen dut: sala honetan bideratu den oinarrizko eskubideen gaineko 16/2021 prozeduran, 3/2021 Autoa eman da 2021eko urtarrilaren 14an, eta irmo geratu da. Hona hemen haren aurrekariak eta xedapen zatia, hitzez hitz:
“3/2021 Autoa.
Lehendakaria: María Jesús Azcona Labiano andrea.–Magistratuak.–Raquel Hermela Reyes Martínez andrea.–Antonio Sánchez Ibáñez jauna.–Ana Irurita Díez de Ulzurrún andrea.
Iruñean, 2021eko urtarrilaren 14an.
Aurrekariak
Lehena.–Nafarroako Foru Komunitateko legelari eta aholkulari juridikoak eskatu du, 2021eko urtarrilaren 13an, judizialki berrets daitezen Osasuneko kontseilariaren urtarrilaren 13ko 1/2021 Foru Aginduaren bidez hartutako neurriak. Foru agindu horren bidez luzatu eta zati batean aldatu ziren Osasuneko kontseilariaren abenduaren 14ko 63/2020 Foru Aginduaren bidez hartutako berariazko prebentzio neurri apartekoak Nafarroako Foru Komunitaterako, COVID-19ak eragindako egoera epidemiologikoak izandako bilakaeraren ondorioz.
Bigarrena.–Fiskaltzari igorri zitzaion, txostena egin zezan berehala; 2021eko urtarrilaren 13an egin zuen, prozeduran ageri den emaitzarekin, eta ebazteko zain dago.
Txostengilea Antonio Sánchez Ibáñez magistratua da.
Salak erabakitzen du:
1. Berrestea Osasuneko kontseilariaren urtarrilaren 13ko 1/2021 Foru Aginduan jasotako neurriak, salbu eta bigarren puntuan jasotakoa. Foru agindu horren bidez luzatu eta zati batean aldatu ziren Osasuneko kontseilariaren abenduaren 14ko 63/2020 Foru Aginduaren bidez hartutako berariazko prebentzio neurri apartekoak Nafarroako Foru Komunitaterako, COVID-19ak eragindako egoera epidemiologikoak izandako bilakaeraren ondorioz. Aldatzea Osasuneko kontseilariak abenduaren 14an emandako 63/2020 Foru Aginduaren neurri hauek, honela idatzita geldituko baitira:
(...) 3. Ostalaritza.
3.2. f) Debeku da erretzea ostalaritzako establezimenduetako eta jatetxeetako inolako terrazetan, horien barnean direlarik zenbait establezimenduren kanpoko aldean jarritako upelak”, ulertuta mantentzen dela terrazetan erretzeko debekua 2 metroko segurtasun tartea bermatzerik ez dagoenean.
2. Administrazioak jakinarazi beharko dio Administrazioarekiko Auzien Sala honi berretsitako neurrien betearazpenean eragina duen edozein gorabehera, edo, kasua bada, neurri horiek kentzea eragiten duen beste edozein. Halaber, neurrien luzapena baimentzeko eskaera egin beharko du, osasun arloko administrazioak halakorik erabakitzen badu.
3. Administrazioak txosten bat igorri beharko dio auzitegi honi, zazpi egun naturaleko epean, bilakaera epidemiologikoari eta hartutako neurrien eraginkortasunari buruzkoa.
4. Ez dira espresuki ezartzen eragindako prozesuko kostuak.
Ebazpen hau jakinaraz bekie alderdi guztiei, eta ohartaraz bekie ez dela irmoa eta haren kontra berraztertzeko errekurtsoa jar daitekeela bost eguneko epean.
Hori erabaki, agindu eta sinatzen dut; fede ematen dut. Idazpuruan adierazitako magistratuak. Fede ematen dut.”
Eta honako hau egin eta sinatzen dut, Nafarroako Aldizkari Ofizialean argitara dadin, bat etorriz Administrazioarekiko Auzien Jurisdikzioa arautzen duen Legearen 72.2 eta 107.2 artikuluetan ezarritakoarekin.
Iruñean, 2021eko urtarrilaren 27an.–Justizia Administrazioaren letradua, Virginia Arias López de Lacalle.
Iragarkiaren kodea: J2101233
