1. NAFARROAKO FORU KOMUNITATEA
1.7. BESTELAKOAK
57/2021 EBAZPENA, irailaren 22koa, Lehendakaritzako eta Gobernu Irekiko zuzendari nagusiak emana, zeinaren bidez xedatzen baita Nafarroako Aldizkari Ofizialean argitaratzea Estatuko Administrazio Orokorraren eta Nafarroako Foru Komunitatearen arteko Lankidetza Batzordearen Erabakia, abenduaren 29ko 22/2020 Foru Legearen gainekoa. Foru lege horren bidez Nafarroako Toki Ogasunei buruzko Foru Legea aldatzen da.
Aintzat hartuz Konstituzio Auzitegiari buruzko urriaren 3ko 2/1979 Lege Organikoaren 33. artikulua, urtarrilaren 7ko 1/2000 Lege Organikoak aldatu zuena,
EBAZTEN DUT:
Estatuko Administrazio Orokorraren eta Nafarroako Foru Komunitatearen arteko Lankidetza Batzordearen Erabakia, ebazpen honi eranskin gisa gehitu zaiona, Nafarroako Aldizkari Ofizialean argitara dadila xedatzea.
Iruñean, 2021eko irailaren 22an.–Lehendakaritzako eta Gobernu Irekiko zuzendari nagusia, Joseba Asiain Albisu.
ESTATUKO ADMINISTRAZIO OROKORRAREN ETA NAFARROAKO FORU KOMUNITATEAREN ARTEKO LANKIDETZA BATZORDEAREN ERABAKIA, NAFARROAKO TOKI OGASUNEI BURUZKO FORU LEGEA ALDATZEN DUEN ABENDUAREN 29KO 22/2020 FORU LEGEAREN GAINEKOA
Estatuko Administrazio Orokorraren eta Nafarroako Foru Komunitatearen arteko Aldebiko Lankidetza Batzordeak erabaki hau hartu du:
ERABAKIA:
I. Estatuko Administrazio Orokorraren eta Nafarroako Foru Komunitatearen arteko Aldebiko Lankidetza Batzordearen erabakiz osatutako lantaldeak aurretik negoziazioak egin ditu, Nafarroako Toki Ogasunei buruzko Foru Legea aldatzen duen abenduaren 29ko 22/2020 Foru Legearen artikulu bakarraren Lau, Bost, Sei, Zazpi, Bederatzi, Hamar, Hogeita hamabost eta Hogeita hamasei apartatuen eta bigarren xedapen gehigarriaren inguruan adierazitako desadostasunak aztertzeko eta horien irtenbideak proposatzeko. Negoziazio horien ondoren, bi alderdiek uste dute konpondu egin direla desadostasunak, erabaki honen xede diren manuei dagokienez, honako konpromiso eta gogoeta hauetan oinarrituta:
1.–Nafarroako Toki Ogasunei buruzko martxoaren 10eko 2/1995 Foru Legearen (aurrerantzean, NTOFL) 125. artikulua aldatzen duen artikulu bakarraren Lau apartatuari dagokionez, Nafarroako Foru Komunitateak beharrezko den erregelamenduzko garapena sustatuko du, martxoaren 5eko 2/2004 Legegintzako Errege Dekretuaren bitartez onartutako Toki Ogasunak arautzeko Legearen testu bateginak (aurrerantzean, TOALTB) 48 bis.3 artikuluan xedatutakoari egokitzeko. Bertan xedatzen da zuhurtzia finantzarioko baldintzak Altxorraren eta Politika Finantzarioaren Idazkaritza Nagusiaren ebazpenen bidez ezartzen direla, eta finantza-aktiboen eragiketetakoak eta berme eragiketetakoak, berriz, Autonomietako eta Tokiko Koordinazioaren Idazkaritza Nagusiaren Ebazpenen bitartez.
2.–Halaber, TOALTBren 1.2 artikuluan xedatutakoari jarraituz, honako hau xedatzen baitu: “Lege hau lurralde nazional osoan aplikatuko da, nahiz eta Euskadiko eta Nafarroako lurralde historikoetan foru araubide finantzarioak aplikatuko diren”; eta Konstituzio Auzitegiak alor horretan duen jurisprudentziari, bereziki Konstituzio Auzitegiaren 2014ko urriaren 23ko 171/2014 epaiari jarraituz, bi alderdiek uste dute jarraian aipatzen diren foru legearen manuak honako oharpen hauen arabera interpretatu behar direla:
2.1. TOALTBren 126. artikulua aldatzen duen artikulu bakarraren Bost apartatuari dagokionez, bi alderdien iritziz, ulertu behar da 126. artikuluaren 1. apartatuan xedatutakoa administrazio publikoen sektorean sailkatutako entitateei dagokiela, eta ez toki entitateen mendeko edozein entitateri; horrenbestez, bi alderdiek uste dute apartatu hori zentzu horretan interpretatu, aplikatu eta garatu behar dela. Horrez gain, 126. artikuluaren 4. apartatuan xedatutakoak bere erregelamendu bidezko garapenean jaso behar du TOALTBren 49.3 artikuluaren aipamen bat, Estatuak jaulkitako zor publikoari buruzkoa, eta ondorioz aplikatzekoa izanen da artikulu hori.
2.2. Bi alderdien iritziz, ulertu behar da artikulu bakarraren Sei apartatuak, NTOFLren 127.2 artikulua aldatzen duenak, ez dakarkiola eragozpenik TOALTBren 49.7 artikuluan xedatutakoaren indarrari, hau da, abala ematea posible egiten du baldin eta toki entitateek partaidetza kuota jakin bat badute pertsona edo entitate pribatuak partaide dituzten merkataritza sozietateen kapital sozialean, % 30ekoa edo handiagoa. Horretarako, ahal bezain laster, foru komunitateak manu hori garatuko du, interpretazio hori jaso dezan.
2.3. Bi alderdiek uste dute artikulu bakarraren Zazpi apartatuan xedatutakoa (NTOFLren 128. artikulua aldatzen du) ulertu behar dela inolako eragozpenik eragin gabe Estatuko legedian ezarritako mugei, horiek hertsagarriagoak direnean. Beraz, manuaren erregelamenduzko garapenean jaso beharko da TOALTBren 51. artikuluak epe laburreko finantza-eragiketetarako finkatutako muga, hau da, aurreko ekitaldian eragiketa arruntengatik aitortutako diru sarreren % 30.
3.–Bi alderdien iritziz, NTOFLren 130. artikulua aldatzen duen artikulu bakarraren Bederatzi apartatuan xedatutakoa honako irizpide hauekin bat ulertu behar da:
3.1 Epe laburreko eta luzeko kreditu eragiketek, abal emateek eta kontratu baldintzak aldatzen edo berme gehigarriak eransten dituzten gainerako eragiketek, hirugarrenen esku hartzea dutenek nahiz ez dutenek, kasu orotan behar dute Ogasun Ministerioaren baimena, NTOFLren 130. artikuluaren 2. apartatuan aurreikusitako moduan, baita, hala badagokie, beste baimen gehigarri batzuk ere, TOALTBk xedatutakoari jarraituz. Horretarako, Nafarroako Foru Komunitateak erregelamendu bidezko garapena sustatuko du, Ogasuneko eta Funtzio Publiko Ministerioak eman beharreko baimena edo TOALTBrako igorpena jasoko duena.
3.2 NTOFLren 130. artikuluan aldi baterako inbertsioak finantzatzen dituzten eta Foru Legearen 128. artikuluan araututako mugak gainditzen dituzten epe laburreko eragiketei buruz xedatutakoa ulertu behar da TOALTBren 51. artikuluan xedatutakoa eragotzi gabe. Bertan, muga ezartzen zaie diruzaintzako eragiketei, epe laburreko finantza-eragiketak diren aldetik, aurreko ekitaldiko eragiketa arruntengatik aitortutako diru sarreren % 30eko muga, hain zuzen, behin NTOFLren 128. artikulua aldatu ondoren (ikus aurreko 2.3 puntua). Halaber, Nafarroako Foru Komunitateko Gobernuak erregelamenduzko garapen bat sustatuko du halako moldez non berariaz xedatuko baita inbertsioak aldi baterako finantzatzen dituzten epe laburreko eragiketak egiten ahalko direla soilik Estatuko araudiak berariaz baimendutako kasuetan.
3.3 NTOFLren 130. artikuluaren 5. apartatuak ahalbidetu egiten du Nafarroako Aurrekontu Orokorrei buruzko legeetan finkatzea “toki entitateek kreditua lortzeko beste baldintza batzuk, koiunturaz eta interes orokorreko arrazoiak tarteko neurri hori justifika dezaketen inguruabarrak badaude”. Ulertu behar da apartatu horretako aurreikuspenek ez dakarkiotela inolako eragozpenik Estatuko Aurrekontu Orokorren Legeek ezarritako baldintzei, TOALTBren 53.9 artikuluan ezarritakoari jarraituz. Beraz, manuaren erregelamenduzko garapena sustatuko da, hiri argiago gera dadin.
4.–Bi alderdien iritziz, interpretatu behar da NTOFLren 131. artikulua aldatzen duen artikulu bakarraren Hamar apartatuan xedatutakoak ez dakarkiola inolako oztoporik TOALTBren 54. artikuluan xedatutakoaren indarrari:
5.–Bi alderdien iritziz, NTOFLren 242 bis artikulua, erabaki honen xede den legearen artikulu bakarraren Hogeita hamabost apartatuak hari emandako idazkera berriarekin eta, bereziki, Gastu Arauaren aplikazioari dagokionez, arau bidez egokitu behar zaiola Aurrekontu Egonkortasunari eta Jasangarritasun Finantzarioari buruzko apirilaren 27ko 2/2012 Lege Organikoaren 12. artikuluan xedatutakoari.
6.–Bi alderdiek uste dute NTOFLren 242 ter artikulua, erabaki honen xede den legearen artikulu bakarraren Hogeita hamasei apartatuak hari emandako idazkera berriarekin, erregelamenduzko garapenaren bidez egokitu behar zaiola aurrekontu egonkortasunaren eta jasangarritasun finantzarioaren arloko Estatuko oinarrizko araudiari, bermatzeko kasu guztietan betetzen direla plan ekonomiko-finantzarioen galdagarritasuna eta haien gutxieneko edukia, Aurrekontu Egonkortasunari eta Jasangarritasun Finantzarioari buruzko apirilaren 27ko 2/2012 Lege Organikoan xedatutakoari eta Toki Araubidearen Oinarriak arautzen dituen apirilaren 2ko 7/1985 Legean jasotakoari jarraituz. Hala ere, kasu bakoitzean zehaztutako eduki gehigarria eskatzeko eskumena izanen du tutoretza finantzarioko organoak.
7.–Abenduaren 29ko 22/2020 Foru Legearen bigarren xedapen gehigarriari dagokionez, bi alderdiek uste dute haren erregelamenduzko garapenak kontuan hartu behar dituela TOALTBren 49. eta 53. artikuluetan jasotako mugak, baita 2013rako Estatuko Aurrekontu Orokorrei buruzko abenduaren 27ko 17/2012 Legearen azken xedapenetatik hogeita hamaikagarrenean jasotakoak ere.
II. Lortutako akordioaren bitartez, bi alderdiek uste dute konpondu direla agertutako desadostasunak eta bukatu dela azaldutako auzia.
III. Erabaki hau Konstituzio Auzitegiari jakinaraztea, Konstituzio Auzitegiari buruzko urriaren 3ko 2/1979 Lege Organikoaren 33.2 artikuluan aurreikusitako ondorioetarako, eta erabaki hau Estatuko Aldizkari Ofizialean eta Nafarroako Aldizkari Ofizialean argitaratzea.
Iragarkiaren kodea: F2114162
