Iragarkia

182. ALDIZKARIA - 2021eko abuztuaren 5a

1. NAFARROAKO FORU KOMUNITATEA

1.7. BESTELAKOAK

1584/2021 EBAZPENA, 2021eko uztailaren 22koa, Nafarroako Unibertsitate Publikoko errektoreak emana. Haren bidez agintzen da argitaratzeko “Erabakia, Nafarroako Unibertsitate Publikoko Administrazioko eta Zerbitzuetako langileen telelanaren erregelamendua onesten duena”, Gobernu Kontseiluak 2021eko uztailaren 22an hartu zuen erabakiaren bidez onetsia.

2003ko maiatzaren 12ko 110/2003 Foru Dekretuak onetsitako Unibertsitateko Estatutuetako 40. artikuluak ematen dizkidan ahalmenak erabiliz, agintzen dut argitaratzeko Gobernu Kontseiluaren 2021eko uztailaren 22ko Erabakia, Nafarroako Unibertsitate Publikoko Administrazioko eta Zerbitzuetako langileen telelanaren erregelamendua onesten duena.

“GOBERNU KONTSEILUAREN ERABAKIA, NAFARROAKO UNIBERTSITATE PUBLIKOKO ADMINISTRAZIOKO ETA ZERBITZUETAKO LANGILEEN TELELANAREN ERREGELAMENDUA ONESTEN DUENA

Nafarroako Administrazio Publikoen zerbitzura dauden Langileen Estatutuaren hogeita bigarren xedapen gehigarrian adierazten denez –2019ko otsailaren 7ko 6/2019 Foru Legeak erantsi zuen–, Nafarroako administrazio publikoek beharrezkoak diren ekintzak gauzatu beharko dituzte neurri jakin batzuk ezartzeko, telelana esaterako, zerbitzuak ematea bateragarria denean lantokietan presentzia fisikorik eskatzen ez duen lanaldi modalitate batekin.

Bestalde, 2020ko irailaren 29ko 29/2020 Errege Lege Dekretuaren bidez, Enplegatu Publikoaren Oinarrizko Estatutuan artikulu berri bat sartu zen: 47 bis artikulua, “Telelana” izenekoa. Artikulu horretan, lanean aritzeko modalitate hori definitzen da, baita haren oinarrizko baldintzak ezarri ere.

Nafarroako Unibertsitate Publikoan telelana ezartzeko, beharrezkoa da araubide espezifiko bat egitea, legez ezarritako baldintzak errespetatuz eta haren ezaugarri eta berezitasunetara egokituz.

Helburu horrekin, Unibertsitateko Administrazioko eta Zerbitzuetako Langileen Negoziazio Mahai Sektorialean negoziazio prozesu bat egin da, eta, horren ondorioz, akordioa lortu da mahai horretan dauden erakunde sindikalekin.

Hortaz, beharrezkoa da gai hori arautuko duen erregelamendu bat onartzea eta hark izaera arau-emailea izatea.

Horiek horrela, kudeatzaileak proposatuta, honako hau da Nafarroako Unibertsitate Publikoko Gobernu Kontseiluak, 2021eko uztailaren 22an eginiko bileran, hartu duen

ERABAKIA:

Lehenbizikoa.–Onestea Nafarroako Unibertsitate Publikoko Administrazioko eta Zerbitzuetako langileen telelanaren erregelamendua. Erabaki honi erantsita ageri da.

Bigarrena.–Erabaki honek Nafarroako Unibertsitate Publikoko iragarki-ohol elektronikoan argitaratu eta biharamunean hartuko du indarra.

Hirugarrena.–Erabaki hau Kudeatzailetzari eta Giza Baliabideen Zerbitzuari aditzera ematea.

Laugarrena.–Erabaki hau Nafarroako Unibertsitate Publikoaren iragarki-ohol elektronikoan eta Nafarroako Aldizkari Ofizialean argitaratzea.

Bosgarrena.–Erabaki honen aurka zilegi da berraztertzeko errekurtsoa aurkeztea Gobernu Kontseiluari zuzendua, hilabeteko epean, edo administrazioarekiko auzi-errekurtsoa Nafarroako maila bereko epaitegietan, bi hilabeteko epean, biak ere argitaratu eta biharamunetik kontatzen hasita”.

Iruñean, 2021eko uztailaren 22an.–Errektorea, Ramón Gonzalo García.

ERANSKINA

NAFARROAKO UNIBERTSITATE PUBLIKOKO ADMINISTRAZIOKO ETA ZERBITZUETAKO LANGILEEN TELELANAREN ERREGELAMENDUA

1. artikulua. Xedea eta definizioa.

Erabaki honen xedea Nafarroako Unibertsitate Publikoko administrazioko eta zerbitzuetako langileen telelaneko modalitate ez-presentzialeko lanaldia arautzea da.

Honako hau da telelana: zerbitzuak modalitate ez-presentzialean ematea; modalitate horretan, Nafarroako Unibertsitate Publikoko administrazioko eta zerbitzuetako langileek Unibertsitateko eraikinetatik kanpo eginen dituzte beren lanpostuari dagozkien funtzioak, informazioaren eta komunikazioaren teknologiak erabiliz.

2. artikulua. Telelanaren helburuak.

Telelaneko modalitateak honako helburu hauek ditu:

–Bizitza pertsonala zein familiakoa eta lana hobeki kontziliatzea.

–Langileen konpromisoa eta motibazioa areagotzea, NUPen parte izatearen sentipena indartuz.

–Lan prozesuak hobetzea, definitu egin beharko baitira eta haiek kontrolatzeko mekanismoak ezarri.

–Lana hobeki antolatzen laguntzea, helburuak identifikatuz eta haien betetze maila ebaluatuz.

–Langileek denbora gutxiago pasatzea bizilekutik lantokirako bidean. Unibertsitatearen espazioak eta baliabide materialak optimizatzea (ekipamendu informatikoa, energia eta abar).

–Ingurumen inpaktua txikitzea.

–Prozesu administratiboak gizartean errotuak dauden aldaketa teknologikoetara egokitu daitezen bultzatzea, eta jasangarritasunerako baliagarriak diren lan jardunak sustatzea.

–Lana antolatzeko autonomia handiagoa ematea.

Lanaldia telelaneko modalitatean egiteak ez du inola ere okerragotuko zerbitzuaren kalitatea.

3. artikulua. Aplikazio eremua.

Lehenbizikoa.–Erabaki hau Nafarroako Unibertsitate Publikoko administrazioko eta zerbitzuetako langileei aplikatu beharrekoa da.

Bigarrena.–Telelaneko modalitatean egiteko moduko lanpostuetan behin-behinean edo behin betiko ari diren langileek eskatzen ahalko dute zerbitzuak telelaneko modalitatean ematea.

Hirugarrena.–Deialdi bakoitzean emanen da aditzera NUPeko plantillako zein lanpostu diren telelaneko modalitatean egiteko modukoak.

Laugarrena.–Deialdi bakoitzean emanen da aditzera zein lanpostu baztertzen diren espresuki telelaneko modalitatetik.

4. artikulua. Baldintzak.

Lehenbizikoa.–Honako baldintza hauek betetzen dituzten administrazioko eta zerbitzuetako langileek eskatzen ahalko dute zerbitzuak telelaneko modalitatean ematea:

a) Zerbitzuak telelaneko modalitatean ematen hasteko egunean zerbitzu aktiboko egoeran edo prestakuntzarako zerbitzu berezietan egotea, eta gutxienez urtebetez aritu izana lanpostuan lanean, azkeneko bi urteetako lan denboraldiak batuta.

Hori kontuan hartzeko, eszedentzia berezian egondako aldietan langilea lanpostuan aritu dela ulertuko da, betiere denbora-tarte horretan unitate berean egon bada.

b) Telelaneko modalitate ez-presentzialean egiteko moduko lanpostu bat edukitzea, erabaki honen 3. artikuluan ezarritakoaren arabera.

c) Lanpostuaren funtzioak telelaneko modalitatean betetzeko behar diren ezagupen informatiko, telematiko, teoriko eta praktiko aski izatea. Halako gaitasuna egiaztatzeko, litekeena da telelaneko aldia hasi baino lehen proba bat gainditu behar izatea.

d) Zerbitzuak telelaneko modalitatean ematen hasteko egunean langileak bizilekuan duen Interneteko sarbide linea eta konexio mota aski ahaltsuak izatea telelana behar bezala eginen dela ziurtatzeko.

Bigarrena.–Telelanerako hautatutako langileek zerbitzuak telelaneko modalitate ez-presentzialean emateari buruzko prestakuntza-ikastaroak gainditu beharko dituzte, erabaki honen 5. artikuluko 5. apartatuan zehaztuak daudenak.

5. artikulua. Nafarroako Unibertsitate Publikoaren konpromisoak eta betebeharrak telelaneko modalitatean.

Lehenbizikoa.–Telelaneko modalitatean ari diren langileek gainerako langileen eskubide eta betebehar berberak izanen dituzte.

Bigarrena.–Honako gai hauei buruzko araudiak exijitzen dituen baldintzak bermatuko dizkie Unibertsitateak telelangileei:

Laneko arriskuen prebentzioa.

Gizarte Segurantza.

Pribatutasuna.

Datuen babesa eta konfidentzialtasuna.

Deskonexio digitalerako eskubidea.

Intimitaterako eskubidea bideozaintzako eta soinu grabazioko gailuen erabileraren aurrean.

Intimitaterako eskubidea geolokalizazioko sistemen erabileraren aurrean.

Hirugarrena.–Telelanean aritzeko gaitasun teknologikoa ziurtatzeko, telelana NUPeko eraikinetatik kanpo egin ahal izateko behar den ekipamendua jarriko du telelangileen eskuetan Unibertsitateak.

Laugarrena.–Kantitate ekonomiko jakin bat ordainduko dio Unibertsitateak telelangileari konpentsazio gisa.

Bosgarrena.–Telelanean behar bezala aritzeko behar den prestakuntza emanen dio Unibertsitateak telelangileari. Alderdi hauei buruzkoa izanen da, batik bat, prestakuntza:

Laneko arriskuen prebentzioa; bestek beste, alderdi hauek landuko dira:

Lanpostuen egokitzapena, segurtasuna eta ergonomia.

Telelanaren arrisku psikosozialak.

Datu pertsonalen babesa.

Gaitasun digitalak eta zibersegurtasuna.

Laneko helburuetan eta emaitzetan oinarritutako zuzendaritza, plangintza eta kudeaketa.

Seigarrena.–Telelaneko lanak nola egiten diren gainbegiratuko du Unibertsitateak, eta telelangileen jarraipena eginen du, modu honetan:

Jarraipeneko bilerak eginez aldika.

Txostenak eginez, bi aldeek sinatutakoak.

6. artikulua. Telelangilearen konpromisoak, eskubideak eta betebeharrak.

Lehenbizikoa.–Oro har, borondatezkoa izanen da telelanaren aplikazio eremuko langileentzat zerbitzuak telelanean emateko modalitatea, eta, telelangileak hala eskatuz gero, modalitate presentzialera bueltatzen ahalko da noiznahi.

Bigarrena.–NUPeko administrazioko eta zerbitzuetako telelangileek gainerako langileen eskubide eta betebehar berberak izanen dituzte, eta, espezifikoki, honako hauek:

Intimitaterako eskubidea eta gailu digitalak erabiltzeko eskubidea lan arloan.

Deskonexio digitalerako eskubidea lan arloan.

Hirugarrena.–Zerbitzuak telelaneko modalitatean ematen dituzten langileek ez dute aldaketarik izanen ordainsarietan, ez inolako ondoriorik izanen promozio profesionaleko eta prestakuntzako aukeretan, ez eta gainerako langileei aitortzen zaizkien beste edozein eskubidetan ere.

Laugarrena.–Zerbitzuak telelaneko modalitatean ematen dituzten langileek datu pertsonalak babesteko eta haien konfidentzialtasuna bermatzeko arauak bete behar dituzte.

Bosgarrena.–Zerbitzuak telelaneko modalitatean ematen dituzten langileek arduraz erabili behar dute Unibertsitateak utzitako ekipamendua, eta beren lanpostuari dagozkion lanak egiteko erabili behar dute.

Telelaneko denboraldia amaitutakoan, utzi zaien ekipamendua itzuli beharko diote langileek Unibertsitateari.

Seigarrena.–Zerbitzuak telelaneko modalitatean ematen dituzten langileek laneko segurtasuna eta osasuna bermatzeko arauak bete behar dituzte telelanean ari diren lekuan.

7. artikulua. Telelanaren iraupena eta lanaldiaren banaketa.

Lehenbizikoa.–Urtero egiten den deialdian ezarriko da astean zenbat egunez egiten ahalko den lan gutxienez eta gehienez telelaneko modalitatean. Halaber, telelaneko modalitateko egunetan lanaldia zatikatzeko aukerarik ba ote dagoen adieraziko da.

Bigarrena.–Kudeatzailearen ebazpen baten bidez zehaztuko da zein denbora-tartetan ematen ahalko diren zerbitzuak telelaneko modalitate ez-presentzialean. Telelaneko denboraldiez gainera, eguneko lanaldia nolakoa izanen den ere zehaztuko da ebazpenean; izan ere, eguneko lanaldia honako hiru ordutegi-modalitate hauetako batean egiten ahalko da:

a) Ordutegi finkoa: eguneko ordutegi finko bat ezarriko da eguneko lanaldi osorako, eta lanaldi presentzialen malgutasun maila bera izanen du. Modalitate honetan, fitxatu egin beharko da.

b) Ordutegi mistoa: eguneko ordutegi finko bat ezarriko da eguneko lanaldiaren portzentaje jakin baterako, eta hor ez da malgutasunik izanen. Lanaldiaren gainerako ordutegia, berriz, erabateko malgutasunez beteko da. Modalitate honetan, fitxatu egin beharko da.

c) Ordutegirik gabe: laneko helburuak zein diren ezarri beharko da.

8. artikulua. Zenbat langile aritzen ahal diren telelanean gehienez.

Deialdi bakoitzean, Unibertsitate osoan telelaneko modalitatean gehienez zenbat langile aritzen ahalko diren ezarriko da.

Urte bakoitzeko deialdian ezarriko da zenbat langile aritzen ahalko diren gehienez ere aldi berean telelanean zerbitzu edo atal bakoitzean –baldin eta atala zerbitzu baten mende ez badago–.

9. artikulua. Telelanean aritzeko baimena emateko prozedura.

Lehenbizikoa.–Kudeatzaileak telelaneko deialdia eginen du urtero, eta hor emanen da aditzera zer epe dauden zerbitzuak telelaneko modalitate ez-presentzialean emateko baimen eskaerak aurkezteko eta haiei buruzko ebazpena emateko, eta noiz hasi eta bukatuko den telelanean aritzeko aldia.

Bigarrena.–Deialdia egin baino lehen, zerbitzuetako zuzendariek eta/edo unitateetako arduradunek eguneratu eginen dute telelanean aritzeko moduko lanpostuak zein diren, kontuan harturik erabaki honetako irizpideak nolakoak diren eta urte bakoitzean nolako premiak dituen zerbitzuak.

Hirugarrena.–Eskatzaileak telelaneko eskaera aurkeztu behar du, eta hor adierazi behar du astean zenbat egunez arituko den telelanean.

Laugarrena.–Zerbitzuko zuzendariak eta/edo unitateko arduradunak txosten bat idatzi behar du, eta hor adierazi behar du baimena ematen diola telelaneko proposamenari eta zergatik.

Laneko helburuak zein diren eta helburu horiek lortzeko zein adierazle erabiliko diren eman behar da jakitera txostenean, baldin eta lanpostuaren funtzioak betetzeko beharrezkoak badira.

Eskatzailea bi zerbitzuren edo unitateren mende badago funtzionalki eta organikoki, bi zerbitzu edo unitate horien txostenak izanen dira beharrezkoak.

10. artikulua. Telelanerako baimena lotzeko lehentasun irizpideak.

Lanaldia telelaneko modalitatean egiteko baimena emateko, honako pauso hauek eman behar dira:

a) Lanpostua berraztertu, erabaki honetan telelanerako ezarritako baldintzak betetzen direla ziurtatzeko.

b) Egiaztatu zerbitzu eta/edo unitateetako arduradunek oniritzi arrazoitua eman dutela. Oniritzia adierazteko txostenean, baimena eman behar zaie, era berean, eguneko lanaldiari (7. artikuluan aipatutakoa) eta ezarritako laneko helburuei.

c) Egiaztatu unitate bakoitzean edo Unibertsitate osoan telelanerako deialdian sartutako lanpostu kopurua baino eskaera gehiago egin diren telelanerako.

Telelaneko baldintzak betetzen dituzten eskaerak telelanerako deialdian sartutako lanpostuak adina edo gutxiago badira, telelanerako baimena emanen zaie.

Aitzitik, unitate bakoitzeko edo Unibertsitate osoko telelaneko lanpostu kopurua baino eskaera gehiago egin badira, kudeatzaileak zilegi izanen du bai eskatzaileari bai arduradunari informazio gehiago eskatzea.

Kasu horretan, telelaneko lanpostuak ordenatu eginen dira, eta, horretarako, honako faktore hauek haztatuko dira gutxienez ere, dagokion deialdian adierazitakoarekin bat etorriz:

i) Ezintasun iraunkor partzialen bat aitortua izatea.

ii) %33tik gorako desgaitasun maila aitortua izatea.

iii) Genero indarkeriaren biktima eta emakumezko langile publikoa izatea.

iv) Familiako bizitza eta lana kontziliatzeko premia.

a. 14 urtetik beherako adingaberen bat zuzeneko zaintzapean edukitzea.

b. Haurdunaldian egotea.

c. Bigarren gradurainoko odolkidetasuna edo ahaidetasuna duen senitartekoren bat zaindu edo artatu behar izatea; senitartekoa bizikidea dela egiaztatu behar da, eta medikuaren txostena aurkeztu.

d. Zuzeneko ardurapean edukitzea desgaitasun fisiko, psikiko edo sentsorialen bat duen norbait, ordaindutako jarduerarik egiten ez duena, edo maila jakin bateko mendekotasun egoera aitortua duen norbait.

e. Guraso bakarreko familia izatea eta adingaberen bat ardurapean edukitzea; egiaztatu egin behar da egoera hori.

v) Langilearen bizilekutik lantokirako distantzia. Eskatzailea erroldatua dagoen lekua ulertuko da bizileku gisa.

Eskatzaileen artean berdinketarik badago, aurreko apartatuko ordenari jarraikiz puntu gehien dituen langileak izanen du lehentasuna. Berdinketak jarraitzen badu, langile zaharrenaren alde ebatziko da.

11. artikulua. Telelanerako baimena ukatzeko arrazoiak.

Lehenbizikoa. Honako arrazoi hauengatik ukatuko da telelanerako baimena:

a) Eskatzaileak ez baditu betetzen 4. artikuluko baldintzak.

b) Txosten negatiboa egin bada, zerbitzuko edo unitateko beharrei erantzuten ez zaielako.

c) Unibertsitate osoan edo unitate bakoitzean gehienez eskainitako lanpostu kopurua gainditzen bada. Zerrenda bat eginen da hasierako bi hilabeteetarako, telelangileren batek lanaldi ez-presentzialari uko eginen balio edo eten eginen balu ere.

d) Telelaneko lekuan azpiegitura teknologikoa mugatua bada edo konektibitatea bermatzerik ez badago. Kudeatzaileak txostena eskatuko dio Informatika Zerbitzuari.

12. artikulua. Deialdiaren ebazpena.

Deialdian ezarritako epean, kudeatzaileak ebazpen arrazoitu bat emanen du telelaneko eskaerak baimentzeko edo ukatzeko. Zerbitzuko edo unitateko arduradunaren txostenak zer dioen gorabehera, baimena ematearen aldekoa edo kontrakoa izaten ahal da ebazpena.

Ebazpen horretan, itxaron zerrenda bat osatuko da, gorago deskribatutako baremoaren araberako lehentasun ordenan, telelaneko hasierako bi hilabeteetan telelaneko lanposturen bat hutsik gelditzen bada betetzeko.

Kudeatzailearen ebazpenaren aurka, NUPeko Estatutuetako 144.2 artikuluan jasotako errekurtsoa aurkezten ahalko da.

13. artikulua. Unibertsitateak aldi batez etetea eta baliogabetzea telelanerako baimena. Langilearen eskariz telelanean aritzetik gelditzea.

Lehenbizikoa.–Unibertsitateak zilegi du zerbitzuak modalitate ez-presentzialean emateko baimena aldi batez etetea eta/edo baliogabetzea, arrazoi hauetako batengatik:

a) Bat-bateko kausengatik, zeinek nabarmen aldatzen baitituzte baimena emateko ebazpena eragin zuten kondizioak eta baldintzak; besteak beste, telelanean ari den pertsonak aldi baterako ezintasun egoeran izatea eta aurreikustea haren iraupena halakoa izanen dela non egokiago irizten baita hura ordezkatzea langile hori atxikita dagoen zerbitzuan.

b) Langileak eta Unibertsitateak hala adosten dutelako.

c) Antolamendu arrazoiengatik.

d) Telelangileak ez dituelako bete ezarritako helburuak.

e) Langilea lanpostuz aldatu delako, baldin eta lanpostu berriak ez baditu betetzen telelanerako baimena eman zen lanpostuaren kondizio berak.

f) Telelaneko lekuan azpiegitura teknologikoa mugatua bada edo gabeziak baditu edo konektibitatea bermatzerik ez badago.

Prozedura tramitatzean, entzunaldia emanen zaio ukitutako pertsonari.

Apartatu honetan adierazitako kausaren bat egiaztatuz gero, kudeatzaileak ebazpena emanen du aditzera emateko eten edo baliogabetu egin dela eta zergatik telelaneko modalitatean parte hartzeko baimena.

Bigarrena.–Telelangileak zilegi du eskatzea ezarritako eguna baino lehen bukatu nahi duela lan ez-presentzialaren modalitatea; horretarako, astebete lehenago jakinarazi behar du nahi hori. Orduan, zerbitzuak telelaneko modalitate ez-presentzialean ematetik gelditzeko ebazpena emanen du kudeatzaileak.

Hirugarrena.–Telelanerako ezarritako aldiko bigarren hilabetea bukatu baino lehen uzten badu telelangileak modalitate hori, beste eskatzaile bati ematen ahalko zaio baimena telelanean aritzeko, itxaron zerrendako ordenari jarraikiz.

Laugarrena.–Kudeatzailearen ebazpenak ez dio amaiera emanen administrazio bideari. Ebazpen hori interesdunari jakinarazi behar zaio, eta unitateko arduradunari zein Giza Baliabideen Zerbitzuari helarazi behar zaie.

Kudeatzailearen ebazpenaren aurka, NUPeko Estatutuetako 144.2 artikuluan jasotako errekurtsoa aurkezten ahalko da.

14. artikulua. Lanen plangintza eta jarraipena egitea.

Lehenbizikoa.–Aldian-aldian erabaki eta ezarriko da, plangintza-fitxan zehaztutakoaren arabera, zer lan egin behar diren modalitate ez-presentzialeko lanaldian.

Bigarrena.–Adostasunik ez badago, langilearen eta haren arduradunaren nagusi hierarkiko edo funtzionalak ebatziko du, aldeei entzunik, kudeatzaileak horretarako ezarritako irizpideei jarraikiz.

Hirugarrena.–Telelaneko emaitzen jarraipena egiteko tresnak plangintza-fitxa, jardueraren jarraipen fitxa, prozesuak birdefinitzeko proposamena eta prozesuen/prozeduren katalogoa hobetzekoa izanen dira, zerbitzu edo unitateko arduradunak eta telelangileak egoki deritzen beste baliabideren bat baztertu gabe.

15. artikulua. Prestakuntza.

5. artikuluko 5. apartatuan jasoa dagoenez, prestakuntza emanen dio Unibertsitateak telelangileari.

Nahitaez hartu behar da parte prestakuntza-ekintzetan, eta, kasua bada, telelangileek proba bat egin behar dute behar diren ezagupenak badituztela erakusteko.

Era berean, telelangileen gainbegirale izanen direnek ere prestakuntza jasoko dute modalitate horretako lanak idatziz jasotzen, behar bezala kudeatzen eta haien betetze maila ebaluatzen ikas dezaten, bai eta emaitzak definitzen eta haiek neurtzeko adierazleak erabiltzen trebatzeko ere.

16. artikulua. Laneko arriskuen prebentzioa.

Lehenbizikoa.–Laneko Osasuneko Unitatekoek laneko arriskuen prebentziorako behar den prestakuntza eta informazioa emanen diete telelangileei, segurtasunari eta laneko osasunari buruzkoa. Edo, laneko arriskuak ekidinezinak badira, haiek minimizatzeko eta beharrezko prebentzio neurriak aplikatzen hasteko informazioa emanen diete.

Bigarrena.–Telelangileak prestakuntza-ekintza bat egin beharko du, etxeko lanlekua nola egokitu behar duen jakin dezan, eta jakin beharrekoa ikas dezan datuak bistaratzeko pantailekin aritzen diren lanpostuen segurtasunari eta ergonomiari buruz, lan administratiboen segurtasunari buruz eta telelaneko arrisku psikosozialei buruz.

Hirugarrena.–Telelanean parte hartzen duten langileek zinpeko adierazpena egin behar dute arriskuen prebentzioko eta ebaluazioko neurriak betetzen dituztela aditzera emanez.

Laneko Osasuneko Unitatekoek emanen dute horretarako behar den laguntza eta aholkularitza teknikoa.

Laugarrena.–Laneko Osasuneko Unitatekoek zuzentze neurriak hartzeko gomendioa eginez gero, telelangileak arduratu beharko du neurri horiek ezartzeaz. Neurriak hartu ondoren, betetzen direla eman behar du aditzera telelangileak.

17. artikulua. Datu pertsonalen babesa.

Zerbitzuak modalitate ez-presentzialean ematen dituzten telelangileek datu pertsonalak babesteko arauak beteko dituzte, eta behar besteko zuhurtzia eta konfidentzialtasuna gordeko dute esku artean dituzten dokumentuen eta dakizkiten lan kontuen inguruan, beren funtzioak modalitate presentzialean betetzen dituztenean bezalaxe.

Telelangileek emandako datu pertsonalen konfidentzialtasuna ere bermatuko da.

18. artikulua. Salbuespenezko egoerak.

Telelana ezartzeko urtero egiten diren deialdiez aparte, salbuespenezko egoeretan ere ematen ahalko du kudeatzaileak aldi baterako telelanerako baimena.

Salbuespenezko egoerak izaten ahal dira familiakoren bat gaixo egotea, egoera larriko prozesuak bizitzea, denbora luzez gaixo egon ondoren lanera bueltatzea, dolu prozesuen ondoren laneratzea eta antzeko egoerak.

Halako kasuetan, kudeatzaileak ebazpen batean emanen du aditzera salbuespenezko egoera dela eta zenbat denbora iraunen duen telelanak.

Kudeatzaileak telelaneko baimena eman baino lehen, Jarraipen Batzordeak aztertuko ditu salbuespenezko egoerako kasuak.

19. artikulua. Jarraipen Batzordea.

Lehenbizikoa.–Jarraipen Batzorde bat eratuko da telelaneko modalitaterako.

Osaera parekidea izanen du: sindikatuen aldetik, ordezkari bana izanen dute telelaneko lanaldiari buruzko erabakia sinatu duten sindikatuek; Kudeatzailetzaren aldetik, ordezkari sindikalak adina kide.

Bigarrena.–Batzordeak jarraipena eginen dio zerbitzuak modalitate ez-presentzialean emateko moduari, eta telelanaren ezarpena aztertuko du. Horretarako behar den informazioa bilduta, ondorioak aterako ditu, eta, ondorioetan oinarrituta, hobekuntzarako proposamenak eginen ditu urteroko deialdietan.

Hirugarrena.–Erabaki honi buruzko auziak sortzen direnean, Jarraipen Batzordeak aztertu, erabaki eta interpretatuko ditu.

Lehenbiziko xedapen gehigarria.

Zerbitzuak modalitate ez-presentzialean ematea borondatezkoa izatea eragotzi gabe, erabaki honetan jasotakoarekin bat etorriz, larrialdi egoeretan denboraldi jakin baterako bizilekuan egoteko betebeharra ezarriko balitz, zilegi izanen litzateke denboraldi horretan telelanean aritzeko betebeharra ezartzea.

Larrialdi egoera errektoreak ezarri behar du ebazpen bidez.

Bigarren xedapen gehigarria.

Erregelamendu hau onesteak administrazioko eta zerbitzuetako langileen 2021. urterako lan-egutegiaren II. kapitulua aldatzea dakar berekin (Gobernu Kontseiluaren 2020ko urriaren 27ko Erabakiaren bidez onetsia eta 2021eko ekainaren 4ko Erabakiaren bidez aldatua), jardunaldi ez-presentzialak gehitu behar baitzaizkio, hemen ezarritako baldintzetan.

Iragarkiaren kodea: F2111486