Iragarkia

166. ALDIZKARIA - 2021eko uztailaren 19a

1. NAFARROAKO FORU KOMUNITATEA

1.7. BESTELAKOAK

596E/2021 EBAZPENA, ekainaren 21ekoa, Ingurumeneko zuzendari nagusiak emana, ingurumen inpaktuaren adierazpena ematen duena Pitillasko 4. poligonoko 704. lurzatian kokatutako zerriak (7.176 plaza) gizentzeko ustiategi baten instalazioaren proiekturako. Sustatzailea Saso de Caparroso 729 NA SAT da.

Proiektuaren ezaugarriak direla eta, Ingurumen Ebaluazioari buruzko abenduaren 9ko 21/2013 Legearen I. eranskinaren barnean sartzen da. Aipatu arauak 7.1 artikuluan ezartzen duenez, I. eranskinean sartutako proiektuei ingurumen inpaktuaren ebaluazio arrunta eginen zaie.

Prozedura honi hasiera eman aurretik, 2019ko urriaren 25ean, sustatzaileak ingurumen inpaktuaren azterketaren irismeneko dokumentua eskatu zion ingurumen organoari (Ingurumen Ebaluazioari buruzko abenduaren 9ko 21/2013 Legearen 34. artikuluaren arabera). Horretarako, ingurumen organoak proiektuaren hasierako agiriari buruzko kontsulta egin zien ukitutako administrazio publikoei eta pertsona interesdunei, ingurumen ebaluazioari buruzko hainbat gai bildu eta ingurumen inpaktuaren azterketan jaso ahal izateko. Egindako 20 kontsulta haietatik 4 erantzun jaso ziren, hain zuzen ere, Pitillasko Udalarena, Lurraldearen Antolamenduaren Atalarena, Baso Plangintzarako eta Ingurumen Hezkuntzarako Atalarena eta Ebroko Konfederazio Hidrografikoarena (azken hori irismeneko txostena argitaratu ondoren jaso zen, eta ohartarazten zuenez, aztertutako eremua nekazaritzako nitratoez kutsatzeko arriskua duen inguru batean kokatzen da).

2020ko martxoaren 27an irismeneko txostena igorri zitzaion sustatzaileari, une horretara arte jasotako erantzunekin batera (EKHren txostena 2020ko uztailaren 14an igorri zitzaion sustatzaileari). Irismeneko txostenean adierazten da honako hauek beharrezkoak direla: usainen eragina aztertzea, inguruko herriak gogoan hartuta; proiektuak “Pitillasko aintzira” Kontserbazio Bereziko Eremuan (KBE) eragin dezakeen kaltea baloratzea (era berezian, hezegunearen arro hidrografikoan isur litezkeen ongarri organiko likidoengatik); instalazioak paisaian izanen duen eragina aztertzea; proiektuaren ezarpen eremuko lurren balantzea zenbatestea; eta kanpoko argiteria egokitzea, argiak eragindako kutsadura ahal den txikiena izan dadin. Azkenik, prestatu beharreko inpaktuaren azterketak jaso behar duen ingurumen arloko kartografia adierazten da.

2020ko uztailaren 1ean, sustatzaileak ingurumen baimen integratua lortzeko proiektua aurkeztu zuen Ekonomia Zirkularraren eta Klima Aldaketaren Zerbitzuaren aurrean, erakunde eskuduna bera baita. Zerbitzu horrek, 21/2013 Legearen 36. eta 37. artikuluetan xedatuarekin bat, proiektua eta ingurumen inpaktuaren azterketa jarri zituen jendaurrean 30 egunez, eta iragarkia 2020ko 179. Nafarroako Aldizkari Ofizialean argitaratu zen, abuztuaren 13koan. Gainera, kontsultak egin zitzaizkien proiektuak ukitzen zituen administrazio publikoei eta pertsona interesdunei. Epe horretan ez da alegaziorik aurkeztu.

Proiektuak ukitzen dituen administrazio publikoak direnez, kontsulta egin zitzaien erakunde hauei: Ingurumen Eraginaren Atala, Kutsaduraren aurkako Prebentzio Atala, Animalien Ekoizpenaren Atala (Abeltzaintza Zerbitzua), Lurraldearen Antolamenduaren Atala, Vianako Printzea Erakundea-Kultura Zuzendaritza Nagusia eta Pitillasko Udala. Izapide horrek iraun duen bitartean, Ingurumen Eraginaren Atalaren, Lurralde Antolamenduaren Atalaren eta Kutsaduraren aurkako Prebentzio Atalaren erantzunak jaso dira.

Proiektuak ukitzen dituen administrazio publikoei eta pertsona interesdunei egindako kontsulten emaitzen laburpena ebazpen honen I. eranskinean dago.

Izapide horren ondorioz, sustatzaileak aldaketak egin ditu proiektuaren eta ingurumen inpaktuaren azterketaren hainbat ataletan, eta dokumentazio berri hori (eraikuntza proiektu aldatua, 2020ko azarokoa) 2020ko abenduaren 4an erregistratu zuen.

2020ko abenduaren 23an, Ekonomia Zirkularraren eta Klima Aldaketaren Zerbitzuak espedientea igorri zion Biodibertsitatearen Zerbitzuari, ingurumen inpaktuaren ebaluazio arrunta hasteko eskabidearekin batera, horiek tramita zitzan.

Zerriak gizentzeko edukiera handiko ustiategi bat da (7.176 zerri). Proiektuaren funtsa da sei abeltegi eraikitzea: haietako lau 72 metro luze dira, eta beste biak 63 metro luze, eta guztiek 14,80 metroko zabalera dute; beraz, guztira, 6.127,20 m² eraikitzea da asmoa. Horrez gain, 11.032 m³-ko minda putzu bat eta abereentzako urmael bat (polietileno orriez egina eta gehienez 1.066 m³-ko edukiera baliagarrikoa) egitea aurreikusten da. Urmael horren ur horniketa Nafarroako Ubidearen ureztapen saretik eginen da. Katastroaren arabera, 704. lurzatiak 113.443,53 m²-ko azalera du; instalazioak B azpi-lurzatian kokatzen dira, lehorreko alorrak dira, eta sarbide egokia dute. Argindarraren horniketa bermatzeko, ustiategiak plaka fotovoltaikoak izanen ditu zerritegien estalkian, baita gasoliodun bi ekipo elektrogeno (25 KVA sorgailu bakoitzeko) ere.

Dokumentazioan jaso behar da simaurrak kudeatzeko plan bat, titularrak Pitillasen eta Murillo el Cuenden tramitean dituen bi proiektuetarako komuna dena, gizentzeko 14.400 bururentzat, guztira. Guztira, ezarri beharreko jarduerak urtean 15.083 tona simaur sortuko ditu, proportzio berdinetan banatuak bi instalazioen artean, eta laborantzako 548 ha inguru erabiliko ditu ongarri gisa balorizatzeko. Aplikazio horretarako lurzatiak udal-mugarte hauetan daude: Murillo el Cuende, Pitillas, Santakara, Mélida, Caparroso, Beire, Cadreita, Azkoien eta Errege Bardea. Minden fase solidoa eta likidoa tokian bertan bereiztea aurreikusten da, eta zati solidoa konpost bihurtzea. Eraikuntza proiektu aldatuan (2020ko azaroa) adierazten da beharrezkoa izanen dela hormigoizko xafla bat egitea, zati solidoa biltzeko eta konpost bihurtzeko.

Aurkeztutako azterketak alderdirik garrantzitsuenak biltzen ditu, eta proiektuak ezarpenean eta funtzionamenduan izan litzakeen eraginak identifikatu eta deskribatzen ditu. “Pitillasko aintzira” KBEaren gainean zuzen edo zeharka gerta litezkeen ukipenak aztertzen ditu. Pitillas eta Murillo el Cuenderen mugakide diren herrietara eta Pitillasko aintziraren Bisitarien Zentrora hedatu litezkeen usainak aztertzen ditu, eta ondorioztatzen du leku horietan sumatuko diren usainen isuriak oso txikiak izanen direla. Hala ere, gasak eta usainak zaintzeko eta kontrolatzeko plan bat ezarriko du. Beste ukipen batzuk murrizteko prebentzio neurriak ezartzen ditu, batez ere sektoreko teknika erabilgarri onenak (TEO) aplikatuta. Proiektuaren ingurumen inpaktuaren azterketaren laburpena ebazpen honen II. eranskinean jaso da.

Espedientearen azterketa teknikoan, Ingurumen Eraginaren Atalak honako hau adierazi zuen 2021eko ekainaren 7an:

1.–Ustiategia Pitillasko 4. poligonoko 704-B lurzatian kokatzen da, eta haren inguruan ez dago ingurumen arloko balio handirik; azpimarragarriak diren bakarrak ustiategiaren mendebaldean kokatutako bazkalekuak eta gatzagak (ondoko 716. lurzatia) dira, eta ez dago aurreikusterik inolako ukipenik han. Lurzatian bertan landaredi naturala dago perimetroan eta erdiko drainatze batean (ipar-hegoa trazatuarekin); instalazioen hesiak 10 metroko tartea gordetzen du mugarekiko, era horretan erraztuz haien kontserbazioa eta fauna landaredi horretara iritsi ahal izatea. Beste alde batetik, eraikuntza proiektu aldatuak (2020ko azaroa) hainbat hobekuntza erantsi ditu nabeen paisaia integraziorako (perimetroan, bi ilaratan landatzea zuhaitzak eta zuhaixkak).

2.–Jarduerak ingurune hidrikoan, habitatetan eta espezieetan izaten ahal dituen eragin nagusiak simaurren eta minden nekazaritza kudeaketatik sor daitezke, bereziki proiektu handia delako eta haren eragina metatuko delako arro hidrografiko horretara biltzen diren nitratoen beste iturri organiko nahiz inorganiko batzuekin (besteak beste, izapidean dagoen Murillo el Cuendeko zerritegia, lehen aipatu bezala, biek batera, urteko 15.083 Tm simaur sortuko baitituzte). Simaurrak kudeatzeko planak (eraikuntza proiektu aldatua, 2020ko azarokoa) hainbat lurzati hartzen ditu barnean, ingurumen aldetik kalteberak diren eremuetan:

a) “Pitillasko aintzira” Kontserbazio Bereziko Eremuaren (ZEC ES0000133) arro hidrografikoa, nitratoen kutsadurak kaltetzen ahal duen eremu batean sartuta baitago. Inguruko balio ekologikorik handiena, hain zuzen ere, “Pitillasko aintzira” KBEa bera da, Natura 2000 Sarean sartuta dagoena. Natura Erreserba (RN-27) ere bada, eta Ramsarreko Itunak zerrendatutako Nazioarteko Hezegune Garrantzitsuetako bat da. Ustiategia KBEtik 1.350 metrora dago –distantzia egokitzat jo daiteke, eraginak murrizteko– baina mindak aplikatzeko 7 lurzati ditu hezegunearen arroan. Azaroaren 23ko 109/2016 Foru Dekretuaren bidez onartutako KBEaren Kudeaketa Planean, berariazko araudiaz gain, hainbat jarraibide ezartzen dira, ongarri organiko likidoak ezartzeko hezegunearen arro hidrografikoan (https://bon.navarra.es/eu/buletina/-/sumario/2016/246).

b) Nitratoen kutsadurak kaltetzeko arriskua duen eremua: “Zidakosko alubioia” lurpeko ur masa, Landa Garapeneko eta Ingurumeneko kontseilariaren irailaren 15eko 147E/2020 Foru Aginduaren arabera, haren bidez berrikusten baitira nekazaritzako nitratoez ura kutsatua izan dezaketen eremuak.

c) “Errege Bardea” Kontserbazio Bereziko Eremua (ZEC ES2200037); gainera, “Errege Bardea” Estepako Abifauna Kontserbatzeko Garrantzizko Eremua (EAKGE-AICAENA) ere bada. Lehorreko alorrak dira, ustiategi horretatik urrun samar daudenak (15 kilometro inguru).

Proiektuaren ingurumen inpaktuaren azterketa teknikoa egin ondoren, Ingurumen Eraginaren Atalak ondorioztatu du Pitillasko eta Murillo el Cuendeko proiektu bateratuak, guztira gizentzeko 14.400 buru dituenak eta urtean 15.083 Tm simaur sortuko dituenak, eragin larria sortuko duela ingurumenean, lurzatien azalera zabala hartzen duelako ingurumen aldetik kalteberak diren eremuetan. Ondorioz, ingurumen arloko hainbat baldintza proposatzen ditu, ez KBEan, ez EAKGEan, ez eremu kalteberan ukipenik ez dela izanen bermatzeko.

Adierazitakoarekin bat, eta honako hauek ematen dizkidaten eskudantziak erabiliz: Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 32. artikulua, Nafarroako Foru Komunitateko Administrazioaren departamentuen egitura ezartzen duen Nafarroako Foru Komunitateko lehendakariaren abuztuaren 6ko 22/2019 Foru Dekretua, eta Landa Garapeneko eta Ingurumeneko Departamentuaren egitura organikoa ezartzen duen urriaren 23ko 258/2019 Foru Dekretua.

EBAZTEN DUT:

1. Ingurumen inpaktuaren adierazpen hau ematea Pitillasko 4. poligonoko 704. lurzatian zerriak gizentzeko ustiategia (7.176 plaza) eraikitzeko proiektuaren alde. Sustatzailea Saso de Caparroso 729 SAT da.

2. Jarduera espedienteari atxikitako dokumentazio teknikoan jasotako baldintzei jarraikiz eginen dela ezartzea, eta, gainera, baldintza hauek beteko dira:

–Mindak, simaurrak, digestatoa edo abereen gorozkien bestelako deribatuak banatzeko Lurralde Planari dagokionez:

a) Banaketa plan horretatik kanpo geratuko dira nitratoez kutsatzeko arriskua duen “Zidakosko alubioia” izeneko eremuan kokatutako lurzati guztiak (eremu hori Landa Garapeneko eta Ingurumeneko kontseilariaren irailaren 15eko 147E/2020 Foru Aginduan izendatu zen; foru agindu horren bidez berrikusten dira nekazaritzako nitratoez ura kutsatua izan dezaketen eremuak). Eremu kaltebera horrek “Pitillasko aintzira” Kontserbazio Bereziko Eremuaren (ES0000133) isuri-arroa hartzen du bere baitan, eta simaurren banaketa han egitea saihestuko da, kaltebera izateaz gain, hango habitaten kalitatea zaindu behar delako.

b) Gainera, “Simaurren sorrera eta kudeaketa planen kudeaketa”k ebazpen honen III. eranskin gisa atxikirik doan protokoloa beteko du, baita sustatzaileak eraikuntza proiektu aldatuan (2020ko azaroa) jaso zituen ohar orokorrak ere; honako hauek dira:

“Banaketa planerako kontuan hartu da proiektuko lurzati batzuk barnean dituzten hainbat udalerrik badituztela “Estepako Abifaunarentzako Garrantzitsuak diren Eremu” gisa izendatuta dauden lekuak, eta, horregatik, espezie horiek ugaltzen ari diren aldietan banaketa egitea saihestu da (apiriletik abuztuaren erdialdera bitartean). Halaber, minden kantitatea 170 kgN/ha-ren azpitik mugatu da, horixe baita nitratoekiko kalteberak diren eremuetako muga, lurzati batzuk eremu horietakoak direlako, segurtasun irizpide bat ezartzearren. Errege Bardeako lehorreko lurzatietan bi urtetik behingo laborantza errespetatu da, laborantza eta lugorria txandakatzen dituena, ohiko laborantza sistema izateagatik, eta mindak aplikatzen dira bi urtetik behin, laborantza egiten den urtean, hain zuzen”.

c) Ekainaren 23ko 148/2003 Foru Dekretua bete beharko da; haren bidez ezartzen dira Nafarroako Foru Komunitateko abeltegien ingurumen baldintza teknikoak; bereziki bete beharra da 8. artikuluaren 5. eta 6. puntuetan hondakinen deuseztapenaz adierazten dena, ingurune naturalari kalte egitea eragozteko.

d) Jarduera horrek klima aldaketan duen eraginari dagokionez, eta erregai fosilen kontsumoa eta negutegi eragineko gasen isurketa murrizteko, gaian eskumena duen organoak ezarriko du banaketa hartuko duten lurzatien eta ustiategiaren arteko gehieneko distantzia.

–Urmaelean aplikatuko dira eraikuntza proiektu aldatuaren (2020ko azaroa) 8. planoan fauna itotzea eragozteko jasotzen diren prebentzio neurriak.

–Argiteriak eragindako kutsadura eta fauna basatiaren (bereziki, saguzarrak eta intsektuak) gaineko eragina minimizatzeko, kanpoko argiteriak (nabearen eta zamaketa lekuen aurreko argiak) eraikuntza proiektu aldatuan (31. or.) adierazitakoa beteko du: “Gauez, argiak itzalita egonen dira. Kanpoko argiteria une zehatzetan erabiliko da, eta denbora tarte oso laburrez: zerrien zamaketa lanetan, lan horiek, oro har, goizaldean egiten baitira”.

–Landaketak eginen dira eraikuntza proiektu aldatuaren arabera (IV. agiria: Paisaia-integrazioaren zuhaitzen aurrekontuak eta zenbakirik gabeko planoa).

3. Ebazpen hau Nafarroako Aldizkari Ofizialean argitaratzea, Ingurumen Ebaluazioari buruzko abenduaren 9ko 21/2013 Legearen 41.3 artikuluan ezarritakoari jarraikiz.

4. Ebazpen hau jakinaraztea Ekonomia Zirkularraren eta Klima Aldaketaren Zerbitzuari (Kutsaduraren Aurkako Prebentzio Atala), Ebroko Konfederazio Hidrografikoari, Pitillasko Udalari, Basozaintzari (10. barrutia, Tafalla-Zangoza) eta sustatzaileari, behar diren ondorioak izan ditzan.

Iruñean, 2021eko ekainaren 21ean.–Ingurumeneko zuzendari nagusia, Pablo Muñoz Trigo.

I. ERANSKINA

Ukituriko administrazio publikoentzat eta pertsona interesdunentzat irekitako kontsulta-izapidearen laburpena

Hona hemen tramite horretan kontsultatutako entitateen eta jasotako erantzunen gaineko laburpena:

Vianako Printzea Erakundea-Kultura Zuzendaritza Nagusia: aldeko txostena eman du ondare arkeologikoaren gaineko ukipenari dagokionez, proiektuak jasotzen dituen lurzatietan ez baitago katalogatutako aztarnategi arkeologikorik. Hala ere, adierazi du legezko betebeharra dela aztarna arkeologikorik ez kaltetzea eta haien agerpena agintariei jakinaraztea, lanek irauten duten bitartean agertuz gero. Ondare arkitektonikoari dagokionez, ez da ukipenik sumatzen.

Ingurumen Eraginaren Atalak adierazi du sustatzaileak aurkeztu duen ingurumen inpaktuaren azterketa osatu behar dela ondoko alderdi hauek zehaztuta: a) ingurumen inpaktu metatua, sustatzaile berak Murillo El Cuendeko 2. poligonoko 92. lurzatian izapidetzen ari den ustiategia kontuan hartuta; b) drainatzeei lotutako landaredi naturalaren deskribapena (70. lurzatiaren perimetroa); c) paisaia-integraziorako neurriak (landaketen xehetasun planoa eta espezien zerrenda ere eskatzen dira); Pitillasko aintzira KBEaren Bisitarien Zentroan usainek izaten ahal duten eragina aztertzea; e) bateragarri egitea simaurren kudeaketa plana, nekazaritza jarduera eta estepako abifauna zaintzen laguntzen duen lehorreko laboreen txandaketa; f) hesiaren diseinua (perimetroaren kanpoaldean landaketak eginez); g) ustiategiaren urmaelean fauna basatia itotzea saihesteko neurriak; eta h) klima aldaketara egokitzeko eta CO2-ren isurketak murrizteko neurriak.

Kutsaduraren aurkako Prebentzio Atala: Nafarroako abeltegien ingurumen baldintza teknikoak ezartzen dituen ekainaren 23ko 148/2003 Foru Dekretuan ezarritako kokapen baldintzak (gutxieneko distantziak) betetzeari dagokionez, azaldu du proiektuak barnean hartu beharko dituela Pozo Pastor erreka-zuloaren ibilgua eta ibilgu etena duen errekatxo bat (abeltegira sartzeko bidearen ondoan).

Lurraldearen Antolamenduaren Atalaren txostena: a) Pitillasko Udal Planari dagokionez, nabe berria kokatzen den lurzatia emankortasun ertaineko lurzoru urbanizaezinaren kategorian sartuta dago; Planaren arauek eta ordenantzek aipatzen dutenez (2.7 artikulua), lurzoru horretan bada eremu bat etxaldeak debekatuta dituena (eremu hori zein den zehaztea, ordea, ezinezkoa izan da, departamentuak eskura duen dokumentazioan); ildo horretatik, eta gai horri dagokionez, Pitillasko Udalaren azalpenik/baloraziorik ez dagoen bitartean, espedientean aztertzen den lurzatia emankortasun ertaineko lurzoruen kategoriakotzat hartzen da, debeku horrek eragiten ez diona, eta beraz, proposatutako jarduerak baimena izan lezake. b) Udal Planaren araudiaren arabera, proposatutako instalazioek bete beharreko baldintzak aipatzen ditu (% 30eko okupazioa, mugekiko 6 metroko distantzia, eraikinen gehieneko tamaina, gehieneko garaiera, etab.); c) “Erdialdea” Lurralde Antolamenduko Planaren (LAP4) alderdi batzuen berri ematen du (maiatzaren 16ko 46/2011 Foru Dekretua); d) adierazten du jarduketak ukitzen duela Nafarroako Ubidearen Udalez gaindiko Proiektu Sektorial bateko ureztatze eremu bat (IX. sektorea), eta beraz, txostena eskatuko zaiola nekazaritza azpiegituren arloan ardura duen organoari; eta e) azkenik, tramitazioari eta eskatutako dokumentazio teknikoari buruzko azalpena eman du.

Abeltzaintza Zerbitzuko Animalien Ekoizpenaren Atalak ez du txostenik eman, espedientearen beste fase batean emanen baitu.

II. ERANSKINA

Ingurumen inpaktuaren azterketaren laburpena

Tramitazioan jaso da ingurumen inpaktuaren azterketa bat, ingurumen baimen integratuaren eskabidean aurkeztutako dokumentazioarekin koherentea dena, eta horretatik ondorioztatzen da alternatibarik egokiena, ingurumenaren ikuspegitik, instalazioak proiektuan proposatzen den eremuan eraikitzea dela.

Azterketa egiteko, ondoko metodologia hau erabili da:

–Proiektuaren kokapena eta deskribapena, ondoko instalazioak eta alternatibak.

–Teknikoki bideragarriak diren alternatibak aztertzea eta aukeratutako konponbidea justifikatzea.

–Erabili beharreko lehengaiak.

–Hondakinak, isuriak eta emisioak.

–Ingurumen inbentarioa eta ukitutako ingurumen faktoreak.

–Eragina izateko arriskua duten ekintzak.

–Proiektuak zuzenean eta zeharka eragindako ondorioak identifikatzea.

–Funtsezko interakzio ekologiko nagusiak eta ingurumen arlokoak ebaluatzea.

–Eraginik handienak baloratzea.

–Neurri babesle eta zuzentzaileak ezartzea eta alboko eraginak azaltzea.

Aurkeztutako azterketak alderdirik garrantzitsuenak biltzen ditu, eta proiektuak ezarpenean eta funtzionamenduan izan litzakeen eraginak identifikatu eta deskribatzen ditu. “Pitillasko aintzira” KBEaren gainean zuzen edo zeharka gerta litezkeen ukipenak aztertzen ditu. Pitillas eta Murillo el Cuenderen mugakide diren herrietara eta Pitillasko aintziraren Bisitarien Zentrora hedatu litezkeen usainak aztertzen ditu, eta ondorioztatzen du leku horietan sumatuko diren usainen isuriak oso txikiak izanen direla. Hala ere, gasak eta usainak zaintzeko eta kontrolatzeko plan bat ezarriko du (Ingurumen Memoriaren 12. puntua: “Konforta eta giroa”). Halaber, kontuan hartu da teknika erabilgarri onenen 9. multzoan.

Aurkeztutako dokumentazioaren arabera, gasen isurketen produkzioa –besteak beste, amoniakoa eta oxido nitrosoa– edo materia esekia IPPC eta BREF jarraibideek ezartzen dituzten mailetan egonen dira, instalazioen, erabileraren eta ekipamenduen baldintzen ondorioz.

Proiektuaren ingurumen integrazioa ziurtatzeko behar diren neurriak ezartzen ditu; neurriok, alde batetik, prebentziozkoak dira, proiektuaren esparru hertsiari dagozkion obren ukipena mugatu nahi dutenak; eta, bestetik, teknika erabilgarri onenak (TEO) aplikatzeari lotuak, funtzionamenduaren ondorioz ingurumenean izan daitezkeen gorabeherak gutxitzeko; horien artean azaltzen dira lurralde planari dagozkionak (behar den gutxieneko nekazaritza eremua), ustiategian sortutako mindak balorizatzeko. Zati likidoa barreiatuko den nekazaritza eremuaren azalera aski izanen da emandako nitrogeno kantitatea ez izateko 170 UF N/ha baino handiagoa, bai eremu kalteberetan, bai eremu ez kalteberetan. Azalera hori ustiategiari lotuta egonen da etengabe (proiektu aldatuaren 6. eranskina: “Ingurumen Memoria”, 55. or.).

Lurzatian izanen diren lur mugimenduei dagokienez, neurketak kalkulatu dira, eta horien arabera, 1.715,00 m³ lur begetal mugituko da, gehi 14.902,00 m³, abeltegien lur-berdinketa, zimenduak eta saneamendua egiteko eta aipatutako putzuak hondeatzeko. Lur guztiak lurzatian erabiltzen dira: lur begetalak bereizi, eta ezpondak lehengoratzeko erabiltzen dira, eta soberakinak lurzatian barreiatzen dira, lurzorua sortzeko. Lur ez begetal guztiak lur berdinketa prestatzeko betelanetan erabiltzen dira.

Hilotzen kudeaketari dagokionez, hondakinak kudeatzeko baimena duen enpresa batek abere hilak jaso eta ustiategitik kenduko ditu berehala. Abere hilak eraman arte, isolatuak egonen dira, itxitura hermetikoa duen edukiontzi egoki eta homologatu batean.

Azterketan, era berean, ingurumen zaintzako plan bat dago, eta bertan daude jasota proiektuaren eragin nagusien jarraipen eta kontrolerako betebeharrak, nagusiki jardueraren funtzionamendu faseari eragiten dietenak.

III. ERANSKINA

Abeltegietako minden, digestatoaren edo/eta simaurren kudeaketa egokirako ezarritako protokoloa

Abeltegi bateko minden, digestatoaren edo/eta simaurren kudeaketa planak ukitzen badu estepako hegazti katalogatuak edo bestelako espezie mehatxatuak daudela egiaztatuta duen lurzatirik (esaterako, ibaien ibilguak edo Natura 2000 Sarean edo Nafarroako Estepako Abifauna Kontserbatzeko Garrantzizko Eremuetan sartutako guneak), bermatu beharko da nekazaritza jarduera eta lehorreko laboreen txandaketa mantentzen direla, faunaren kontserbazio egokirako, eta ingurumen baldintza hauek bete beharko dira:

–Oro har, intereseko flora eta faunaren habitat eta espezieak ukitzen dituzten erabilerek eta jarduketek haien kontserbazioa bermatzeko behar diren baldintzak bete beharko dituzte.

–Debeku da urak kutsatzeko edo intereseko habitatak narriatzeko arriskua ekar dezaketen hondakin solidoak, mindak, digestatoa eta/edo simaurrak, obra-hondakinak edo substantziak bertan uztea.

–Ez da mindarik aplikatuko, ezta deribaturik ere, lehorreko laboreetan, martxoaren 1etik abuztuaren 31ra bitartean, estepako hegaztien babesa bermatze aldera ugaltze garaian.

–Lugorrietan ez da mindarik aplikatuko, ezta deribaturik ere. Gainera, estepako hegaztien bizi zikloa osatzeko lugorriek duten garrantzia ikusirik, saihestu behar da simaurren planaren ondorioz laborantza areagotzea eta lehendik zegoen lugorri-sistema eraldatzea.

–Debeku da presio baxuko aspertsiozko ureztapen lokalizatuko banaketa sistema (fertirrigazioa). Leku horietan banaketa lokalizatua baimentzen da, hodi esekiekiko tangen bidez egiten bada, lehen aipatutako oharrak kontuan hartuta: dosifikazioak errespetatu beharko du estepako hegaztien babes egutegia, eta bermatu beharko du intereseko habitatak kaltetzen ahal dituen ur putzurik edo isuririk ez dela sortuko.

–Eremu alfer iraunkorretan ezin izanen da simaur, minda edo haien deribaturik aplikatu (ekainaren 23ko 148/2003 Foru Dekretuaren 8.5 artikulua aplikatuz; haren bidez ezartzen dira Nafarroako Foru Komunitateko abeltegien ingurumen baldintza teknikoak). Halaber, eremu alfer horiek, bereziki intereseko habitatak badira –KBEaren barnean nahiz kanpoan– ez dute zeharkako ukipenik jaso behar, mindak edo haien deribatuak aplikatzen diren laborantzatik sor daitezkeen isuri edo ur putzuen ondorioz.

–Debeku da mindak, digestatoa edo/eta simaur likidoa erabiltzea ur masa iraunkorretatik 50 metro baino gutxiagoko distantzia batera, kontuan hartuta ibilgu nagusiak nahiz bigarren mailakoak. Ur masak babesteari begira, banaketaren baldintzak ezartzean kontuan hartuko dira estatu mailan sektorerako ezarritako berariazko araudian ezarritako betebeharrak (Batzordearen 2017ko otsailaren 15eko 2017/302 EB Betearazpen Erabakian deskribatutako TEOak - Abeltzaintza Sektorea).

–Ur-ibilguen eta hezeguneen kutsapena saihestuko da, sasoian sasoikoak izan nahiz iraunkorrak izan. Erreka-zuloak eta haien adarrak ur-ibilgutzat hartuko dira, batez ere inguruan habitat naturalak dituztenak (gatzagak, bazkalekuak, landaredi higrofiloa edo landare mehatxatuen multzoak), habitat horiek KBEaren barnean sartuta egon nahiz ez. Nolanahi ere, ezin izanen da hustubide edo drainatzeetara doan azaleko ur jariatzerik egin.

–Gatz-hezegune eta erreka-zuloetako arro hidrografikoan, Nafarroako Foru Komunitatearen Nekazaritzako Jardunbide Egokietarako Kodean lurzoruaren erabilerari eta ongarritzeari buruz jasotako gomendioak beteko dira. Kode hori Nekazaritza, Abeltzaintza eta Elikadurako kontseilariaren 1997ko otsailaren 17ko Foru Aginduaren bidez onetsi zen.

Iragarkiaren kodea: F2110008