4. PROZEDURA JUDIZIALAK
NAFARROAKO JUSTIZIA AUZITEGI NAGUSIA
ADMINISTRAZIOAREKIKO AUZIEN SALA
Oinarrizko Eskubideen gaineko 77/2021 Prozedura
Aditzera ematen dut: sala honetan bideratu den oinarrizko eskubideen gaineko 0000077/2021 prozeduran, 21/2021 Autoa eman da 2021eko otsailaren 24an, eta irmo geratu da. Hona hemen haren aurrekariak eta xedapen zatia, hitzez hitz:
“21/2021 Autoa.
Lehendakaria: Francisco Javier Pueyo Calleja.–Magistratuak: Raquel Hermela Reyes Martínez, Antonio Sánchez Ibañez eta Ana Irurita Díez de Ulzurrun. Iruñean, 2021eko otsailaren 24an.
Aurrekariak
Lehena.–Nafarroako Foru Komunitateko legelari eta aholkulari juridikoak eskatu du, 2021eko otsailaren 23an, judizialki baimentzea Osasuneko kontseilariaren otsailaren 23ko 5/2021 Foru Aginduaren bidez hartutako neurriak. Foru agindu horren bidez berariazko prebentzio neurri apartekoak hartu ziren Nafarroako Foru Komunitaterako, COVID-19ak eragindako egoera epidemiologikoak izandako bilakaeraren ondorioz.
Bigarrena.–Fiskaltzari igorri zitzaion, txostena egin zezan berehala; 2021eko otsailaren 23an berean egin zuen, prozeduran ageri den emaitzarekin, eta ebazteko zain dago.
Xedapen zatia
Salak erabakitzen du:
1. Berrestea Osasuneko kontseilariaren otsailaren 23ko 5/2021 Foru Aginduan jasotako osasun neurriak. Foru agindu horren bidez berariazko prebentzio neurri apartekoak hartu ziren Nafarroako Foru Komunitaterako, COVID-19ak eragindako egoera epidemiologikoak izan duen bilakaeraren ondorioz.
2. Administrazioak jakinarazi beharko dio Administrazioarekiko Auzien Sala honi berretsitako neurrien betearazpenean eragina duen edozein gorabehera, edo, kasua bada, neurri horiek kentzea eragiten duen beste edozein. Halaber, neurrien luzapena baimentzeko eskaera egin beharko du, osasun arloko administrazioak halakorik erabakitzen badu.
3. Administrazioak txosten bat igorri beharko dio auzitegi honi, zazpi egun naturaleko epean, bilakaera epidemiologikoari eta hartutako neurrien eraginkortasunari buruzkoa.
4. Eragindako prozesuko kostuak ez zaizkio inori ezartzen berariaz.
Ebazpen hau jakinaraz bekie alderdi guztiei, eta ohartaraz bekie ez dela irmoa eta haren kontra berraztertzeko errekurtsoa jar daitekeela bost eguneko epean.
Hori erabaki, agindu eta sinatzen dute idazpuruan adierazitako magistratuek.
Eta Nafarroako Aldizkari Ofizialean argitara dadin, honako hau egin eta sinatzen dut.
Iruñean, 2021eko apirilaren 16an.–Justizia Administrazioaren Salako letradua, Virginia Arias López de Lacalle.
Iragarkiaren kodea: J2106207
