1. NAFARROAKO FORU KOMUNITATEA
1.7. BESTELAKOAK
568/2020 EBAZPENA, 2020ko martxoaren 26koa, Nafarroako Unibertsitate Publikoko errektorearena, agintzen duena argitara eman dadila Gobernuko Kontseiluak 2020ko martxoaren 24an hartutako erabaki bat, “Nafarroako Unibertsitate Publikoko Irakasle eta Ikertzaileen Ikuskapen Unitatearen egitura eta eginkizunak arautzen dituen Erregelamendua onestekoa”.
2003ko maiatzaren 12ko 110/2003 Foru Dekretuaren bidez onetsitako Unibertsitatearen Estatutuetako 40. artikuluaren bidez esleitu zaizkidan eskumenez baliatuz, agindua eman dut argitara dadin Gobernu Kontseiluaren erabakia, “Nafarroako Unibertsitate Publikoko Irakasle eta Ikertzaileen Ikuskapen Unitatearen egitura eta eginkizunak arautzen dituen Erregelamendua onestekoa”.
NAFARROAKO UNIBERTSITATE PUBLIKOKO IRAKASLE ETA IKERTZAILEEN IKUSKAPEN UNITATEAREN EGITURA ETA EGINKIZUNAK ARAUTZEN DITUEN ERREGELAMENDUA
Unibertsitateko Irakasleen Araubideari buruzko 1985eko apirilaren 30eko 898/1985 Errege Dekretuaren 16.1 artikuluan zehaztutakoaren arabera, zerbitzuen ikuskapenari eta diziplinako espedienteen instrukzioari dagokionez, unibertsitate bakoitzean Ikuskapen Zerbitzu bat eratuko da zerbitzuen funtzionamendua ikuskatzeko eta diziplinazko espediente guztien instrukzio lanetan laguntzeko, baita diziplina akademikoaren jarraipen eta kontrol orokorra gauzatzeko ere.
Bestalde, Unibertsitateei buruzko 2001eko abenduaren 21eko 6/2001 Lege Organikoan ezartzen denez –2007ko apirilaren 12ko 4/2007 Lege Organikoak aldatu zuen–, unibertsitateak goi mailako hezkuntzaren zerbitzu publikoa ematen du, eta ikerketa, irakaskuntza eta ezagutzaren transferentzia dira bere eginkizunak. Gainera, unibertsitateko politikaren funtsezko helburuetako bat kalitatea sustatzea eta bermatzea da, baita, batetik, goi mailako unibertsitate-hezkuntzaren zerbitzu publikoaren errendimendua neurtzea eta gizarteari kontuak ematea eta, bestetik, irakaskuntza- eta ikerketa-jarduera eta unibertsitatearen kudeaketa hobetzea ere.
Arau-esparru horren babesean, errektoreak proposatuta, Nafarroako Unibertsitate Publikoko Irakasle eta Ikertzaileen Ikuskapen Unitatea sortzea onartu zuen Gobernu Kontseiluak. Era berean, Irakasleen Gaietarako errektoreordearen proposamenez, Gobernu Kontseiluaren 2009ko azaroaren 13ko Erabakiaren bidez, Nafarroako Unibertsitate Publikoko Irakasle eta Ikertzaileen Ikuskapen Unitatearen Egitura eta Eginkizunak Arautzeko Arautegia eta Unitate horren Jokabide Kodea onartu ziren –errektorearen aginduz argitaratu ziren 2009ko abenduaren 9ko NAOn, 2009ko azaroaren 16ko 1685/2009 Ebazpenaren bidez–.
Unitate hori sortu zenetik hamar urte igaro eta gero, bai estatu mailan eta bai Nafarroan onetsitako arau berriek eragin zuzena izan dute Unitate horren jardun profesionalean; izan ere, berrikuntza garrantzitsuak ekarri dituzte administrazio publikoen prozedura eta eginkizunetan -39/2015 Legea, 2015eko urriaren 1ekoa, Administrazio Publikoen Administrazio Prozedura Erkideari buruzkoa; 40/2015 Legea, 2015eko urriaren 1ekoa, Sektore Publikoaren Araubide Juridikoarena; 3/2018 Lege Organikoa, 2018ko abenduaren 5ekoa, Datu Pertsonalak Babesteari eta eskubide digitalak bermatzeari buruzkoa, eta 17/2019 Foru Legea, 2019ko apirilaren 4koa, Emakumeen eta Gizonen arteko Berdintasunari buruzkoa-. Bestalde, NUPek unibertsitate autonomiarako eskubidea baliatuz onetsi dituen arau eta plan estrategiko berriek eragina dute Unibertsitateko komunitateko kideen prozeduran eta jarduteko moduetan. Horrez gain, arau eta plan berrien bidez, Unibertsitatea Estatuko eta Nafarroako arau esparru berriari lotu nahi zaio, baita goi mailako hezkuntzaren zerbitzu gisa dagokion kalitatea hobetu ere.
Azaldutakoarengatik, Irakasleen Gaietarako errektoreordeak Nafarroako Unibertsitate Publikoko Irakasle eta Ikertzaileen Ikuskapen Unitatearen egitura eta eginkizunak arautuko dituen erregelamendu berri bat proposatzen du, onar dadin eta indarrik gabe utz ditzan Unitate horren 2009ko Arautegia eta Jokabide Kodea.
Horregatik guztiagatik, Irakasleen Gaietarako errektoreordeak proposatuta, honako hau da Gobernu Kontseiluak, bere kideek aurretik eztabaida egin eta gero, 2020ko martxoaren 24an egindako bileran hartu duen
ERABAKIA
Lehenbizikoa.–Nafarroako Unibertsitate Publikoko Ikuskapen Unitatearen egitura eta eginkizunak arautzen dituen Erregelamendua onestea. Erabaki honen I. eranskinean dago.
Bigarrena.–Erabaki hau Nafarroako Aldizkari Ofizialean argitaratzea.
Hirugarrena.–Erabaki honek Nafarroako Aldizkari Ofizialean argitaratu eta biharamunean hartuko du indarra.
Laugarrena.–Erabaki honen aurka, zilegi da administrazioarekiko auzi-errekurtsoa jartzea Nafarroako Justizia Auzitegi Nagusiko administrazioarekiko auzien epaitegietan, bi hilabeteko epean, erabakia Nafarroako Aldizkari Ofizialean argitaratu eta biharamunetik kontatzen hasita, Unibertsitateei buruzko 2001eko abenduaren 21eko 6/2001 Lege Organikoaren 6.4 artikuluan eta Nafarroako Unibertsitate Publikoaren Estatutuetako 144.1 artikuluan xedatutakoarekin bat etorriz”.
Iruñean, 2020ko martxoaren 26an.–Ramón Gonzalo García, Errektorea.
I. ERANSKINA
1. artikulua. Definizioa, atxikipena eta osaera.
1. Nafarroako Unibertsitate Publikoko Ikuskapen Unitatea irakasleen eginkizunak betetzen direla zaintzeaz arduratzen den unitatea da, eta errektorearen aginduetara dago, ikastegi eta sailetako arduradunen edo araudiaren arabera haien ordezkoak direnen eskuduntzak galarazi gabe, zeinek lehendabizi eta lehenbailehen, beharrezkoak diren ekimenak jarriko dituzte abian irakasleen irakaskuntza-mandatua betetzeko eta kontrolatzeko, indarrean den araudia betez.
2. Nafarroako Unibertsitate Publikoko Ikuskapen Unitateak arduradun bat izango du, eta A edo B mailako funtzionarioa izan behar du. Errektoreari dagokio hura izendatzea eta kargutik kentzea.
Halaber, errektoreak proposatuta, ikuskatzaileen esleipena onesten ahalko du Gobernu Kontseiluak Unitate horri dagozkion eginkizunak betetzeko.
3. Unitatearen arduradunak organo honen jarduketen berri emango du, eta bidezkoak iruditzen zaizkion proposamen eta txostenak bidaliko dizkio errektoreari, edo, bestela, irakasleen gaietan eskumena duen errektoreordeari.
2. artikulua. Eginkizunak
Ikuskapen Unitateak honako eginkizun hauek ditu:
a) Irakasle eta ikertzaileek beren betebeharrak betetzen dituztela egiaztatzea, betiere aplikatzekoak diren arauak betetzen direla ziurtatze aldera.
b) Irakasle eta ikertzaileei aholkuak ematea, bere eskumen-esparruan, aplikatzekoak zaizkion arauak eraginkortasunez betetzeko.
c) Nafarroako Unibertsitate Publikoko sail eta ikastegien eta esparru partikularreko edo sektorialeko beste edozein organo kolegiaturen funtzionamendu hobetzea ahalbidetzen duten txostenak eta estatistikak egitea, irakasle eta ikertzaileek beren eginkizunak hobeki betetze aldera.
d) Irakasle eta ikertzaileei espediente informatiboa edo diziplinazkoa ireki behar zaien edo ez erabakitzeko beharrezkoak diren ikerketak egitea. Ikerketaren ondoren, Unitateko arduradunak errektoreari zuzendutako txostena egingo du diziplinazko espedientea artxibatzeko edo hasteko proposamenarekin, edo egokitzat jotzen dituen beste edozein neurri edo jarduketaren proposamenarekin.
e) Errektorearen eskumena da espedienteak irekitzeko edo Ikuskapen Unitateak proposatutako beste edozein neurri onartzeko erabakia hartzea.
f) Errektoreak, edo, hala badagokio, irakasle gaietan eskumen delegatuak dituen errektoreordeak eskatutako txostenak egitea, eta gobernu-erakunde horiek Unitate honi dagokion eskumen-esparruaren barruan esleitutako beste edozein eginkizun betetzea.
3. artikulua. Jarduteko prozedura.
1. Ikuskapen Unitateak Jarduera Plan bat garatuko du, ikasturte bakoitzaren hasieran errektoreak onetsi beharko duena, eta Gobernu Kontseiluari jakinaraziko zaio. Jarduera Planaren barruan egongo da irakasleen jarduerari buruzko informazioa biltzeko planak diseinatzea.
2. Ikuskapen Unitateak urteko jarduketa planaren arabera beteko du bere eginkizuna. Jarduteko planean ezarri gabeko jarduketak ere egingo ditu, kexa, erreklamazio edo irakasle eta ikertzaileei dagozkien eginkizunak betetzeari dagokionez eragina izan dezaketen gertaeren ondorio direnak.
3. Ikuskapen Unitateak ofizioz jarduten ahalko du baldin eta Unitateko arduradunak egokitzat jotzen badu, edo errektoreak, irakasleen gaietan eskumena duen errektoreordeak edo ikastegi eta sailetako zuzendaritzak eskatuta.
4. Beren eginbeharrak betetzerakoan, Ikuskapen Unitateko langileek bisitak egingo dituzte unibertsitate jarduerak garatzen diren instalazioetara eta beren eginkizunak betetzeko egoki jotzen dituzten unibertsitateko komunitateko kideekin elkarrizketak egiteko eskatuko dute, instalazioetan egiten diren lanen garapenean trabarik izan gabe.
Unibertsitateko komunitateko kideen lankidetzan jardun behar dute Ikuskapen Unitatearekin eta eskatzen zaien informazio eman behar dute.
5. Ikuskapen Unitateko langileek Unitate horretakoak direla egiaztatu behar diete unibertsitateko komunitateko kideei beren eginkizunak betetzeko egiten dituzten ikuskaritza jarduketak direla eta.
Halaber, aurretik egiaztapena egin eta gero, langile horiek libreki sar daitezke edozein unetan, aurretik jakinarazi gabe, irakasle eta ikertzaileek beren jarduerak egiten dituzten toki guztietara.
6. Ikuskapen Unitatearen eginkizunak betetzeko beharrezkoak diren datu eta informazioak biltze aldera, egoki jotzen dituen unibertsitateko komunitateko kideekin hitzorduak jarri eta elkarrizketak eta agerraldiak eskatzen ahalko dizkie Unitateko arduradunak.
7. Ikuskapen Unitateko arduradunak Nafarroako Unibertsitate Publikoko erakundeetako eta unitateetako dokumentazio guztia eskuratzen ahalko dute, kasu bakoitzean aplikatu beharreko legeriarekin bat.
4. artikulua. Printzipio gidariak
Honako printzipio hauek arautuko dute Ikuskapen Unitateko langileen jarduera: erantzukizun profesionala eta inpartzialtasuna, konfidentzialtasuna, gardentasuna eta parte-hartzea, apartatu hauetan ezarritakoarekin arabera.
4.1. Erantzukizun profesionala eta inpartzialtasuna:
a) Ikuskapen Unitateko langileek araudi honen, Nafarroako Unibertsitate Publikoaren Estatutuen eta kasu bakoitzean aplikatzekoa den beste edozein arau edo xedapenen arabera jardungo dute.
b) Beren eginkizunak betetzerakoan jarrera aktiboa izango dute gaitasun eta garapen profesionala hobetzeko, eta urteko jarduera planak hobeki betetzea eta irakaskuntzaren kalitatea hobetzea ahalbidetuko duten mekanismoak bilatzeko.
c) Inpartzialtasun, berdintasun eta objektibotasun printzipioek arautuko dute Unitateko langileen jarduna, eta uko egin behar diote 40/2015 Legeko 23. artikuluan ezarritako zirkunstantziak dituzten prozedura edo ikerketetan parte hartzeari.
Parte hartzeari uko egiten diotenean, parte hartzeari uko egiteko kausetan ez dauden Unitateko gainerako langileek ordeztuko dituzte aldi baterako, edo, hala badagokio, errektoreak izendatutako beste edozein funtzionariok edo Unibertsitatearekin lotura iraunkorra duen langilek.
4.2. Konfidentzialtasuna:
Ikuskapen Unitateko langileek beren eginkizunak betetzeko egiten dituzten egitekoak konfidentzialak dira eta erreserbaz, konfidentzialtasunez eta isiltasunez jokatu behar dute Ikuskapen Unitateko langile guztiek, bai eta egiteko horietan parte hartzen edo laguntzen duten pertsona eta organo guztiek ere, eta ukitutako pertsonari konponbiderako prozedura eta tramiteen gaineko informazioa eman beharko zaio, jarduketak berak eta zirkunstantziek, aplikatzekoa den araudiarekin bat etorriz, informazio tramite hori baztertzea edo atzeratzea ahalbidetzen edo behartzen duenean izan ezik.
4.3. Gardentasuna eta parte-hartzea:
a) Unitateko langileek informazio argi eta egiazkoa emango dizkie pertsona eta organo eskudunei beren jarduketetan ezagututako gertaera eta zirkunstantziei buruz, eta urtero diseinatzen den Jarduketa Planeko eragileen parte-hartzea bultzatuko du.
b) Datuen babesaren arloan indarrean diren legeek ahalbidetzen duten zabalpen esparruaren barruan, Gobernu Kontseiluari jakinaraziko zaizkio bai Jarduketen Txostena bai ikasturte bakoitzeko Jarduketa Plana.
c) Ikuskapen Unitateko langileek lankidetza harreman bat ezarriko dute irakasle eta ikertzaileekin gatazkak konpontzeko eragile aktiboak izateko, bai eta irakaskuntzaren kalitatearen ardura duten organoekin ere.
d) Ikuskapen Unitateko langileek praktikak onak bilatzea eta zabaltzea sustatuko du irakasle eta ikertzaileen jarduketan, Nafarroako Unibertsitate Publikoko balioei ekarpena egiteko.
5. artikulua. Lagundu beharra eta jarduteko bermea.
Unibertsitateko komunitate kide diren pertsona guztiek, eta bereziki gobernu-erakundeek eta Unibertsitateko langileek behar duen laguntza eta lankidetza eman beharko diote Ikuskapen Unitateari bere eginkizunak garatzeko.
Unitateko langileei ezin izango zaie zehapenik jarri edo espedienterik ireki beren eginkizunak betetzeko egiten dituzten jarduketengatik edo ematen dituzten aholku edo txostenengatik.
6. artikulua. Egindako jarduketen txostenak eta aktak.
1. Ikuskapen Unitateak jarduketak erregistratuko ditu. Erregistroak eta erregistrorako sarbideak datuen babesaren arloan indarrean den araudiak ezarritakoa beteko du.
2. Honako eduki hau izango dute Unitatearen jarduketen emaitza dokumentatzen duten txostenek: jarduketen esparru funtzionala eta espaziala, zein diren jarduten duten ikuskatzaileak, egindako jarduketaren deskribapena, egutegia eta emaitzak. Erakunde barruan erabiltzen ahalko da bakarrik, salbu eta indarrean den araudiak, eta, harekin bat etorriz, gobernu organo eskumendunek ezartzen dutenean txostena jakinarazi, argitaratu eta zabaldu egin behar dela.
3. Ikuskapen Unitateak egiten duten jarduketa bakoitzeko, arduradunak dagokion akta idatziko du eta eduki hauek jasoko ditu bertan:
a) Jarduketak zein egun, ordu eta tokitan egin ziren.
b) Zein ikuskatzailek egin duen jarduketa.
c) Zein den ikuskatutako organoa edo pertsona.
d) Gertaera, zirkunstantzia, eta, hala badagokio, atzemandako irregulartasunen deskripzioa.
7. artikulua. Jarduketen txostena.
Unitateko arduradunak aurreko ikasturtean Unitateak burututako jarduketen txosten bat aurkeztuko dio errektoreari, edo, hala badagokio, irakasle gaietan eskumen delegatuak dituen errektoreordeari ikasturte bakoitzeko lehen seihilekoa amaitu baino lehen. Txosten honen laburpenaren berri emango dio errektoreak Gobernu Kontseiluari.
XEDAPEN INDARGABETZAILEA
Araudi hau indarrean sartzen denean, Nafarroako Unibertsitate Publikoko Irakasle eta Ikertzaileen Ikuskapen Unitatearen Egitura eta Eginkizunak Arautzeko Arautegia eta Unitatearen Jokabide Kodea indargabetuko ditu, biak 2009ko azaroaren 13ko Gobernu Kontseiluaren erabaki baten bidez onetsiak (errektorearen aginduz argitaratuak, 2009ko azaroaren 19ko 1685/2009 Ebazpenaren bidez, 2009ko abenduaren 9ko NAOn).
AZKEN XEDAPENA
1. Nafarroako Aldizkari Ofizialean argitara eman eta biharamunean hartuko du indarra araudi honek.
2. Arautegi hau Gobernu Kontseiluaren erabaki bidez aldatzen ahalko da.
Iragarkiaren kodea: F2004311
