4. PROZEDURA JUDIZIALAK
IRUÑEKO ADMINISTRAZIOAREKIKO AUZIEN 3. EPAITEGIA
Titulu judizialak betearazteko 4/2019 prozedura
Organo judizial honetan bideratzen ari da PA 380/2015aren ondoriozko 4/19 zenbakiko titulu judizialak betearazteko intzidentea, María Lledo Soriano Segarrak eskatuta, Nafarroako Unibertsitate Publikoaren aurka. Horren harira, Nafarroako Justizia Auzitegi Nagusiko Administrazioarekiko Auzien Salak, 2020ko martxoaren 24ko 55/2020 apelazio epaian, erabaki du Nafarroako Aldizkari Ofizialean argitaratu dadila 2017ko ekainaren 14ko 145/2017 zenbakiko epaiaren epaitza, Iruñeko Administrazioarekiko Auzien 3. Epaitegiak 380/2015 prozedura laburtuan emandakoa, eta hitzez hitz honako hau diona:
Epaitza:
Partez baiesten dut Muñiz prokuradore andreak ordezkari gisa jarri duen errekurtsoa, eta deusez deklaratzen dut, batetik, NUPeko errektoreak irailaren 15ean emandako 1582/2015 Ebazpenaren bigarren apartatua, 4616 plaza bete gabe gelditu zela deklaratzen zuena, eta, bestetik, NUPeko irakasleak eta ikertzaileak kontratatzeko Erregelamenduaren 29.2.4 artikulua; halaber, deklaratzen dut auzi-jartzaileak eskubidea duela organo eskudunak balora diezazkion auzi honen xedeko kontratazio prozesuan alegatutako merituak, eta kontratazio proposamen berria formulatu behar dela.
Kosturik gabe:
Jakinaraz bekie ebazpen hau alderdiei, aditzera emanez ez dela irmoa, eta haren aurka apelazio errekurtsoa jartzen ahal dutela, jakinarazi eta hamabost eguneko epean, organo judizial honen Gordailu eta kontsignazioen kontuan 50 euroko gordailua egin ondoren, Banesto bankuan (Banco Español de Crédito), 3171000094038015 kontu zenbakian, dirua sartu izanaren egiaztagiriaren kontzeptuan “Errekurtsoa” adierazi beharko dutelarik.
Doako laguntza juridikoaren onuradun direnak, Fiskaltza, Estatua, autonomia erkidegoak, toki entitateak eta horien guztien mendeko erakunde autonomoak salbuetsita daude gordailua eratu beharraz (BJLOaren 15. xedapen gehigarria).
Honako hau egin eta sinatzen dut, Nafarroako Justizia Auzitegi Nagusiko Administrazioarekiko Auzien Salak 55/20 zenbakiko apelazio epaian erabakitakoarekin bat eta Nafarroako Aldizkari Ofizialean argitaratu dadin.
Iruñean, 2020ko abenduaren 1ean.–Justizia Administrazioaren letradua, M.ª Angeles Ederra Sanz.
Iragarkiaren kodea: J2015101
