1. NAFARROAKO FORU KOMUNITATEA
1.7. BESTELAKOAK
1749/2020 EBAZPENA, 2020ko urriaren 27koa, Nafarroako Unibertsitate Publikoko errektoreak emana. Haren bidez agintzen da argitaratzeko “Erabakia, Nafarroako Doktoretza Eskola Sortzeko eta Haren Eginkizunak Ezartzeko Araudia aldatzen duena”, Gobernu Kontseiluak 2020ko urriaren 27an hartu zuen erabakiaren bidez onetsia.
2003ko maiatzaren 12ko 110/2003 Foru Dekretuak onetsitako Unibertsitateko Estatutuen 40. artikuluak ematen dizkidan eskumenak erabiliz, 2020ko urriaren 27an Gobernu Kontseiluak hartu zuen erabakia argitaratzeko agintzen dut. Erabaki horren bidez, Nafarroako Doktoretza Eskola Sortzeko eta Haren Eginkizunak Ezartzeko Araudia aldatu da.
“GOBERNU KONTSEILUAREN ERABAKIA, NAFARROAKO DOKTORETZA ESKOLA SORTZEKO ETA HAREN EGINKIZUNAK EZARTZEKO ARAUDIA ALDATZEN DUENA
2011ko urtarrilaren 28ko 99/2011 Errege Dekretuak (2011ko otsailaren 10eko Estatuko Aldizkari Ofiziala), unibertsitate-ikasketetako hirugarren zikloari dagozkion doktoretza-ikasketen antolaketa arautzen duenak, 9. artikuluan, unibertsitateek doktoretza-eskolak sortzeko aukera aurreikusten du, beren kudeaketa-esparruaren barruan doktoretzari dagozkion irakaskuntzak eta jarduerak antolatzeko.
Nafarroako Unibertsitate Publikoak, Gobernu Kontseiluaren 2012ko maiatzaren 8ko 29/2012 Erabakiaren bidez, Nafarroako Doktoretza Eskola (NADOE) sortu zuen Nafarroako Unibertsitate Publikoan doktoretzari dagozkion irakaskuntzak eta jarduerak antolatzeko ardura duen unitate gisa. Gobernu Kontseiluaren 2015eko uztailaren 23ko erabaki baten bidez NADOE Sortzeko eta Haren Eginkizunak Ezartzeko Araudia aldatu zen, NADOEko idazkariaren figura sortzeko.
Araudiaren azken aldaketaz geroztik, agerian gelditu da aldaketak egin behar direla NADOEko idazkariak bete behar dituen baldintzei dagokienez, kontratupeko bitarteko irakasle doktoreek eginkizun horiek bete ahal izan ditzaten, eta NADOEko zuzendariorde kargua sortzeko aukera eman behar dela, NADOEren funtzionamendua arinagoa izateko.
Nafarroako Doktoretza Eskola Sortzeko eta Haren Eginkizunak Ezartzeko Araudiaren aldaketaren aldeko txostena emanda.
Honako hau da Gobernu Kontseiluak, Ikerketako errektoreordeak proposatuta, 2020ko urriaren 27an egindako bileran hartu duen
ERABAKIA:
Lehena.–Nafarroako Doktoretza Eskola Sortzeko eta Haren Eginkizunak Ezartzeko Araudiaren aldaketa onestea.
Honela aldatzen da Nafarroako Doktoretza Eskola Sortzeko eta Haren Eginkizunak Ezartzeko Araudia:
Bat. 5. artikuluari h) letra gehitzea, eduki honekin:
“h) NADOEko zuzendariordea, halakorik baldin badago.”
Bi. 7. artikuluari g) letra gehitzea, eduki honekin:
“g) NADOEko zuzendariordea, halakorik baldin badago.”
Hiru. Nafarroako Doktoretza Eskola Sortzeko eta Haren Eginkizunak Ezartzeko Araudiko 8 bis artikulua aldatzea. Honela geldituko da:
“8 Bis artikulua.–Nafarroako Doktoretza Eskolako idazkaria.
Doktoretza Eskolako idazkaria Nafarroako Unibertsitate Publikoan lanaldi osoan diharduten irakasle ikertzaile doktoreen artetik izendatu beharko da, haiek lotura iraunkorra izan edo kontratupeko bitarteko doktore izan. Halaber, 1086/1989 Errege Dekretuaren arabera onartutako ikerketa-jardueraren aldi bat behintzat izan beharko du, edo, bere posizioan aurreko irizpidea aplikatu ezin bada, merezimendu parekagarriak egiaztatu beharko ditu. Errektoreak izendatuko du, NADOEko zuzendariak proposatuta, lau urterako, eta epe berdinetan berritu ahal izango da.
Doktoretza Eskolako idazkariaren kargua Unibertsitateko Ikastegiko idazkariaren karguarekin parekagarria izango da ondorio guztietarako.”
Lau. 8 Ter artikulua gehitzea, eduki honekin:
“8 Ter artikulua.–Nafarroako Doktoretza Eskolako zuzendariordea.
NADOEko zuzendariak Doktoretza Eskolako zuzendariorde bat izendatzea proposatzen ahalko du, Nafarroako Unibertsitate Publikoan lanaldi osoan diharduten irakasle ikertzaile doktoreen artetik, haiek lotura iraunkorra izan edo kontratupeko bitarteko doktore izan. Halaber, 1086/1989 Errege Dekretuaren arabera onartutako ikerketa-jardueraren aldi bat behintzat izan beharko du, edo, bere posizioan aurreko irizpidea aplikatu ezin bada, merezimendu parekagarriak egiaztatu beharko ditu. Errektoreak izendatuko du, NADOEko zuzendariak proposatuta, lau urterako, eta epe berdinetan berritu ahal izango da.
Doktoretza Eskolako zuzendariordearen kargua Unibertsitateko Ikastegiko zuzendariordearen edo dekanordearen karguarekin parekagarria izango da ondorio guztietarako.”
Bigarrena.–Erabaki hau Nafarroako Aldizkari Ofizialean argitaratzea.
Hirugarrena.–Erabaki honek Nafarroako Aldizkari Ofizialean argitaratu eta biharamunean hartuko du indarra.
Iruñean, 2020ko urriaren 27an.–Errektorea, Ramón Gonzalo García
Iragarkiaren kodea: F2012574
