1. NAFARROAKO FORU KOMUNITATEA
1.7. BESTELAKOAK
1747/2020 EBAZPENA, 2020ko urriaren 27koa, Nafarroako Unibertsitate Publikoko errektoreak emana. Haren bidez agintzen da argitaratzeko “Erabakia, Nafarroako Unibertsitate Publikoan Graduko eta Masterreko Titulu Ofizialak eta Ikasketa-planak Iraungitzeko Prozesuen Arautegia onesten duena”, Gobernu Kontseiluak 2020ko urriaren 27an hartu zuen erabakiaren bidez onetsia.
2003ko maiatzaren 12ko 110/2003 Foru Dekretuak onetsitako Unibertsitateko Estatutuetako 40. artikuluak ematen dizkidan eskumenak erabiliz, 2020ko urriaren 27an Gobernu Kontseiluak hartu zuen erabakia argitaratzeko agintzen dut. Erabaki horren bidez, Nafarroako Unibertsitate Publikoan Graduko eta Masterreko Titulu Ofizialak eta Ikasketa-planak Iraungitzeko Prozesuen Arautegia onetsi da.
“GOBERNU KONTSEILUAREN ERABAKIA, NAFARROAKO UNIBERTSITATE PUBLIKOAN GRADUKO ETA MASTERREKO TITULU OFIZIALAK ETA IKASKETA-PLANAK IRAUNGITZEKO PROZESUEN ARAUTEGIA ONESTEN DUENA
Unibertsitateko Ikasketa Ofizialen Antolamendua ezartzen duen 2007ko urriaren 29ko 1393/2007 Errege Dekretuan ezarritako aginduen arabera, Europako Unibertsitate Eremura egokitutako Unibertsitateko graduko eta masterreko ikasketak pixkanaka ezartzeak lehen eta bigarren zikloetako ikasketa-planen iraungipena arautu beharra ekarri zuen. Nafarroako Unibertsitate Publikoan, arautze hori Gobernu Kontseiluak 2009ko azaroaren 13an hartutako erabakiaren bidez egin zen (Gobernu Kontseiluak 2013ko maiatzaren 29an hartutako erabakiaren bidez aldatu zen aipatu erabakia).
Beharrezkoa da orain Europako Unibertsitate Eremura egokitutako irakaskuntza ofizialen ikasketa-planak iraungitzeko prozesua arautzea.
Arautegi honek hauxe du helburu nagusia: ikasketa-plan bat iraungitzeko prozesua arautzea eta, bidezkoa bada, plan haren ordezkoa ezartzekoa, betiere ikasle eta irakasleei argi utziz nolako baldintzetan gauzatuko den irakaskuntza eta nola ebaluatuko den iraungitze-plana.
Halaber, iraungitzen ari den ikasketa-planeko ikasleak plan berrira egokitzeko baldintzak arautzen dira.
2020ko irailaren 9an Nafarroako Unibertsitate Publikoko Ikasketa Batzordeari jakinarazi ondoren.
Azaldutakoari jarraikiz, Irakaskuntzako errektoreordeak proposaturik, honako hau da Gobernu Kontseiluak, bere kideek aurretik eztabaidatu eta gero, 2020ko urriaren 27an egindako bileran hartu duen
ERABAKIA:
Lehenbizikoa.–Nafarroako Unibertsitate Publikoan graduko eta masterreko titulu ofizialak eta ikasketa-planak iraungitzeko prozesuaren arautegia onestea, erabaki honen eranskinean ezarritakoarekin bat etorriz.
Bigarrena.–Ikastegietako zuzendaritzei, Ikasleen Gaietarako, Enpleguko eta Ekintzailetzako Errektoreordetzari, Irakaskuntzako Errektoreordetzari eta Irakaskuntza Zerbitzuko zuzendariari helaraztea erabaki hau. Erabaki hau Unibertsitatearen webgunean argitaratzea.
Hirugarrena.–Agindua ematea erabaki hau Nafarroako Aldizkari Ofizialean argitaratzeko.
Laugarrena.–Unibertsitateei buruzko 6/2001 Lege Organikoaren 6.4 artikuluak eta Unibertsitatearen Estatutuen 144.1 artikuluak ezarritakoaren arabera, erabaki honek administrazio bidea amaitzen du. Interesdunek zilegi dute erabaki honen aurka, aukeran, berraztertzeko errekurtsoa jartzea Gobernu Kontseiluari zuzendua, hilabeteko epean, edo administrazioarekiko auzi-errekurtsoa administrazioarekiko auzien epaitegietan, zuzenean.
Iruñean, 2020ko urriaren 27an.–Errektorea, Ramón Gonzalo García.
NAFARROAKO UNIBERTSITATE PUBLIKOAN GRADUKO ETA MASTERREKO TITULU OFIZIALAK ETA IKASKETA-PLANAK IRAUNGITZEKO PROZESUEN ARAUTEGIA
Zioen azalpena
Unibertsitateko Ikasketa Ofizialen Antolamendua ezartzen duen 2007ko urriaren 29ko 1393/2007 Errege Dekretuan ezarritako aginduen arabera, Europako Unibertsitate Eremura egokitutako Unibertsitateko graduko eta masterreko ikasketak pixkanaka ezartzeak lehen eta bigarren zikloetako ikasketa-planen iraungipena arautu beharra ekarri zuen. Nafarroako Unibertsitate Publikoan, arautze hori Gobernu Kontseiluak 2009ko azaroaren 13an hartutako erabakiaren bidez egin zen (Gobernu Kontseiluak 2013ko maiatzaren 29an hartutako erabakiaren bidez aldatu zen aipatu erabakia).
Orain, beharrezkoa da Europako Unibertsitate Eremura egokitutako irakaskuntza ofizialen ikasketa-planak iraungitzeko prozesua arautzea.
Arautegi honek hauxe du helburu nagusia: graduko edo masterreko ikasketa-plan ofizial bat iraungitzeko prozesua arautzea eta, bidezkoa bada, plan haren ordezkoa ezartzekoa, betiere ikasle eta irakasleei argi utziz nolako baldintzetan gauzatuko den irakaskuntza eta nola ebaluatuko den iraungitze-plana.
Halaber, iraungitzen ari den ikasketa-planeko ikasleak plan berrira egokitzeko baldintzak arautzen dira.
I. KAPITULUA
Printzipio orokorrak
1. artikulua. Xedea eta aplikazio eremua.
1. Arautegi honek hauxe du xedea: 2007ko urriaren 29ko 1393/2007 Errege Dekretuan edo horren ordezko irakaskuntzei buruzko arautegian aurreikusitako unibertsitate-ikasketei dagozkien ikasketa-plan ofizialak iraungitzeko prozedura arautzea.
2. Halaber, iraungitzeko bidean diren ikasketa ofizialetan jarraitzeko baldintzak arautzen ditu, baita irakaskuntza- eta ebaluazio-eredua ere, kasuan kasuko irakasgaietan.
3. Arautegi honetan adierazitakoa programazio bikoitzetan eta nazioarteko programetan ere aplikatuko da.
II. KAPITULUA
Iraungitze prozedura
2. artikulua. Iraungitzeko prozesua eta epea.
1. Ikasketa-plana ordezko beste plan bat ezartzearen ondorioz iraungitzen bada, titulua egiaztatzeko memorian adierazitakoaren arabera, iraungitze prozesua ikasketa-plan berria ezartzen den ikasturte berean hasiko da.
2. Titulua iraungitzeagatik ikasketa-plan bat iraungitzeko prozesua, beste titulu batek ordezkatu gabe, titulua iraungitzea onetsi duen Gobernu Kontseiluaren erabakiak ezartzen duen ikasturtetik aurrera eginen da.
3. Aurreko kasu guztietan, gutxienez lehen ikasmailako irakasgaien irakaskuntza iraungiko da, eta, pixkanaka, hurrengo ikasturteetakoenak, ikasmaila bat ikasturte bakoitzean.
4. Salbuespen gisa, ikasketa-plan berriko ikasmaila bat baino gehiago ezartzen ahalko dira aldi berean, tituluaren egiaztapen-memorian hala adierazten bada.
3. artikulua. Aukerako irakasgaiak iraungitzeko prozesua.
1. Gobernu Kontseiluak onetsitako aukerako irakasgaien urteko eskaintzaren bidez, Unibertsitateak haiek iraungitzeko ordena zehaztuko du, bai ikasmaila bati atxikitako aukerako irakasgaiak dituzten planetarako, bai ikasmaila jakin bati atxiki gabeko aukerako irakasgaiak dituzten planetarako.
2. Ikasmaila bateko irakaskuntza arautua amaitu eta gero, ezin izanen da aukerako irakasgai berririk onetsi baldin eta haiek aurreko ikasturtean eskaini ez badira.
3. Nolanahi ere, titulua ematen den azken urtean, iraungitzen ari diren ikasketak osatzeko adina aukerako irakasgai ziurtatu beharko dira eskaintzan.
III. KAPITULUA
Iraungitze prozesuan dauden planetako ikasleen eskubideak
4. artikulua. Ikasleen eskubideak.
Graduko edo unibertsitate masterreko ikasketak 2007ko urriaren 29ko 1393/2007 Errege Dekretuari edo horren ordezko irakaskuntzen arautegiari jarraikiz hasi dituzten ikasleei, ikasketak iraungitze prozesuan sartzen badira, haietan hasi zirenean indarra zuten xedapenak aplikatuko zaizkie.
5. artikulua. Iraungitze prozesuan den ikasketa-planean jarraitzeko aukera.
1. Gradu edo unibertsitate master batean diren Nafarroako Unibertsitate Publikoko ikasleek iraungi ez diren ikasmailetako irakasgaien ikasketa-planetan jarraitzen ahalko dute matrikulatzen.
2. Ebaluaziorako eskubidea bermatzeko, ikasleek ordurako iraungi diren ikasmailetako irakasgaietan egin lezakete matrikula, iraungi aurreko ikasturteetan haietan matrikulatu baziren.
3. Ikasleak lehenago matrikulatuak ez bazeuden iraungi den ikasmailako irakasgairen batean, ordezko ikasketa-planera egokitu beharko dute ikasketetan jarraitu nahi izanez gero.
6. artikulua. Iraungitzeko bidean diren irakasgaien irakaskuntza eta azterketen deialdiak.
1. Ikasmaila bateko irakasgaien irakaskuntza arautua amaitu ondoren, bi azterketa-deialdi mantenduko dira hurrengo bi ikasmailetan, bat ikasturte bakoitzeko, eta aldi horretan haien irakaskuntza bermatuko da.
2. Iraungitze bidean diren irakasgaietan irakaskuntza osoa bermatuko da baldin eta ikasleak gutxienez 15 badira. Kopuru hori txikiagoa izan daiteke, baldin eta, tituluaren ardura duen ikastegiak eskatuta eta aldez aurretik justifikatuta, irakaskuntzen arloko eskumenak dituen errektoreordetzak baimena ematen badu.
3. Matrikulatutako ikasle kopurua aurreko atalean ezarritakoa baino txikiagoa bada, berariazko tutoretza eta orientazio ekintzetan oinarrituko da irakaskuntza.
4. Ikasleek irakaskuntza osorako eskubidea izanen dute iraungitzeko bidean den irakasgaia ordezko ikasketa-planaren irakasgairen batekin lotua baldin badago akademikoki, zeinahi delarik ere hartan matrikulaturik dauden ikasleen kopurua.
7. artikulua. Ebaluazioa.
1. Iraungitze prozesuan dauden irakasgaietan matrikulatutako ikasleei kasuan kasuko irakaskuntza-gidan ezarritakoaren arabera eginen zaie ebaluazioa. Gida hori indarrean dauden ikasketa-planetako irakasgaietarako ezarritako epean argitaratuko da.
2. Iraungitzeko bidean diren irakasgaietan, ez dira prestakuntza jarduera praktikoak ebaluatuko baldin eta ezin badira berriz egin.
8. artikulua. Prezio publikoak.
Iraungitze prozesuan diren irakasgaiei dagozkien zerbitzu akademikoengatik ordaindu beharreko prezioak unibertsitate gaietan eskuduna den departamentuak urtean urteko foru aginduak ezartzen dituenak izanen dira (unibertsitateko zerbitzu akademikoen prezio publikoak finkatzen dituen foru agindua).
IV. KAPITULUA
Ikasketa-plan berrietara egokitzeko prozesua
9. artikulua. Egokitzapen prozesua, iraungitzeko bidean diren ikasketetan jarraitu ezina dela-eta.
1. Erabat iraungia dagoen irakasgai bat edo gehiago gainditu gabe duten ikasleek ezin izanen dute bukatu iraungitze prozesuan den ikasketa-plana, eta, nahi izanez gero, haren ordez jartzen diren ikasketa berrietara egokitu beharko dute.
2. Ikasle bat ezin izanen da aldi berean matrikulaturik egon iraungitzeko bidean den plan batean eta hura ordezten duen planean.
10. artikulua. Borondatezko egokitzapenaren prozesua.
1. Ikasleek iraungitzeko bidean diren planeko irakasgaietan jarraitzen ahalko dute matrikulatzen, baldin eta ebaluaziorako eskubidea ematen duen deialdirik gelditzen bada. Geroago egin lezakete egokitzapenerako eskaera.
2. Iraungitzeko bidean diren ikasketa-planak egiten ari diren ikasleak haien ordezko graduko edo unibertsitate masterreko ikasketa berrietara egokitzen ahal dira, sarbide berriko ikasposturik eskatu beharrik gabe.
3. Egokitzapena ikasturte bakoitza hasi baino lehen eskatu beharko da, matrikula egin aurretik. Egokitzapena behin eginda, ikaslea ezin izanen da itzuli iraungitzeko bidean den ikasketa-planera.
11. artikulua. Egokitzapenaren baldintzak.
Egokitzapen prozesua Gobernu Kontseiluak 2009ko ekainaren 2an hartutako Erabakian ezarritako baldintzei jarraikiz egin beharko da (haren bidez onetsi zen Nafarroako Unibertsitate Publikoan iraungitzeko bidean diren ikasketa-planak egokitzeko Erregelamendua).
V. KAPITULUA
Iraungitzeko bidean den ikasketa-plan batean onartua izatea
12. artikulua. Onarpena.
1. Sarbidea edozein dela ere, ikasketa-plan baten iraungitze prozesua hasi eta gero, ikasle berriak onartuko dira baldin eta, kredituak onartzeko administrazio-prozeduraren ondoren, eskaera egiten den unean egiaztatzen bada iraungitze bidean diren irakasgai guztiak gainditu dituztela.
2. Iraungitzeko bidean den ikasketa-plan batean onartutako ikasleei Nafarroako Unibertsitate Publikoan irauteko arautegia aplikatuko zaie, arautegi honetan azaldutakoaz gainera.
VI. KAPITULUA
Iraungitzeko bidean diren ikasketa-planetako irakasgaien irakaskuntza-mandatua
13. artikulua. Irakasleak.
1. Arau hauetako 6. artikuluan aurreikusitako irakaskuntzaz eta ebaluazioaz arduratzen diren irakasleak irakasgaia atxikia dagoen Sailak izendatuko ditu.
2. Irakasgaiek 6. artikuluko 2. apartatuan aurreikusitako kasuetan baizik ez dute izanen irakaskuntza-mandatua.
3. Iraungitzeko bidean diren ikasketen bukaerako lanek matrikulako ikasturtean indarra zuen Arduraldi Akademikoaren Planean ezarritako irakaskuntza-mandatua izanen dute.
Azken xedapenetan lehena. Indarra hartzea.–Arautegi honek 2020-2021 ikasturtean hartuko du indarra.
Iragarkiaren kodea: F2012573
