1. NAFARROAKO FORU KOMUNITATEA
1.7. BESTELAKOAK
120E/2020 EBAZPENA, irailaren 24koa, Biodibertsitatearen Zerbitzuko zuzendariak emana, zeinaren bidez ingurumen ukipenetarako baimena ematen baitzaio honako proiektu honi: neurketa anemometrikorako dorre baten kokapena aldatzea Serralta haize parkean, Tuterako udal mugartean. Eólica Cabanillas SL da proiektuaren sustatzailea.
Honen bidez aldatzen da Biodibertsitatearen Zerbitzuko zuzendariaren otsailaren 10eko 6E/2020 Ebazpena, zeinaren bidez ingurumen ukipenetarako baimena eman baitzitzaion proiektu honi: Serralta haize parkean neurketarako bi dorre (Tuterako eta Cabanillasko udal mugarteetan, hurrenez hurren) ezartzeko proiektua, Eólica Cabanillas SLk sustatua. Orobat, ebazpen horren bidez ingurumen ukipenetarako baimena eman zitzaion proiektu honi: Tuterako udal mugarteko neurketa anemometrikorako dorrearen kokapena aldatzea.
2020ko ekainaren 12an, Biodibertsitatearen Zerbitzuan jaso zen ingurumen ukipenetarako baimenaren eskaera, proiektu honi dagokiona: neurketa anemometrikorako dorre baten kokapena aldatzea Serralta haize parkean, Tuterako udal mugartean. Eskaera horretan, sustatzaileak adierazi du ezen aldatu behar izan duela Tuterako dorrearen kokapena, ez baita ados jarri hasieran aurreikusia zegoen lurzatiko jabearekin. Hortaz, eskatu du dorrea Tuterako 10. poligonoko 46. lurzatian kokatu beharrean, poligono horretako 45. lurzatian kokatzea.
Zehazki, neurketa anemometrikorako dorrea UTM koordenatu hauetan egonen litzateke, Tuterako 10. poligonoko 45. lurzatian: X:621.513, Y:4.660.091 (WGS84 erreferentzia sistema, 30T eremua).
120 m-ko altuera duen egitura bat da, sareta motakoa eta ebakidura triangeluarrekoa. Piken bidez finkatzen zaio, oinarrian, altzairuzko xafla bati, eta horiek txarrantxaturik daude, 120 gradutan bereizitako hiru planotan banatuta dauden tiranteen bidez. Tirante horiek lur azpiko xafla batzuetan ainguratuko dira. Xaflak, gutxi gorabehera 1×1 m-koak, 1,7 m-ko sakoneran egonen dira.
Espedientea abenduaren 28ko 93/2006 Foru Dekretuaren 2C eranskineko M epigrafean sartzen da. Foru dekretu horren bidez onetsi zen Ingurumena Babesteko Esku-hartzeari buruzko martxoaren 22ko 4/2005 Foru Legea garatzeko Erregelamendua.
Abenduaren 28ko 93/2006 Foru Dekretuaren 36. artikuluak ezartzen du Ingurumen, Lurraldearen Antolamendu eta Etxebizitzako kontseilariak ebazpen arrazoitua emanen duela ingurumen ukipenetarako baimena eman edo ukatzeari buruz.
Foru dekretu horren 31.2 artikuluak ezartzen du ingurumen ukipenetarako baimenak barne hartuko duela lurzoru urbanizaezinean baimen daitezkeen jardueretarako baimena ere, eta uztailaren 26ko 1/2017 Legegintzako Foru Dekretuak, Lurraldearen Antolamenduari eta Hirigintzari buruzko Foru Legearen testu bategina onesten duenak, 117. artikuluan ezarritako ondorioak izanen dituela.
Espedientean Tuterako Udalaren aldeko txostena jaso da. Lurraldearen Antolamenduaren eta Estrategiaren Atalak txostena egin du, bat etorriz Lurraldearen Antolamenduari eta Hirigintzari buruzko Foru Legearen testu bategina onesten duen uztailaren 26ko 1/2017 Legegintzako Errege Dekretuaren 117. artikuluan ezarritakoarekin. Ingurumen Eraginaren Atalak aldeko txostena eman du, baina baldintza batzuk ezarrita.
Espedientean dauden txostenak ikusirik eta Ingurumeneko zuzendari nagusiaren azaroaren 8ko 107/2019 Ebazpenaren bidez eskuordetutako eskumenak erabiliz,
EBAZTEN DUT:
1. Ingurumen ukipenetarako baimena ematea honako proiektu honi: neurketa anemometrikorako dorre baten kokapena aldatzea Serralta haize parkean, Tuterako udal mugartean. Eólica Cabanillas SL da proiektuaren sustatzailea.
2. Baimen honek behartzen du honako baldintza hauek aplikatzera (Biodibertsitatearen Zerbitzuko zuzendariaren otsailaren 10eko 6E/2020 Ebazpenean ezarritakoez gain):
–Ingurumen arlokoak:
- Zuhaitzik moztu edo kimatu behar bada, horren berri eman eta baimena eskatu behar zaio aldez aurretik Ingurumena Zaintzeko Atalari (Tuterako Koordinazio Unitatea, gmatudela@navarra.es, 948847033 eta 609904957 telefonoak), bat etorriz Nafarroako Oihan Ondarea Babestu eta Garatzeari buruzko abenduaren 31ko 13/1990 Foru Legean zehaztutakoarekin (otsailaren 21eko 3/2007 Foru Legeak eta hori garatzen duen erregelamenduak aldatua).
- Biodibertsitatearen Zerbitzuko zuzendariaren 6E/2020 Ebazpenean ezarritakoarekin bat, dorrea kendu beharko da beranduenez hura instalatu eta 3 urtera; hortaz, Ingurumen Eraginaren Atalari jakinarazi beharko zaio noiz instalatzen den.
- Azpiegitura egiteko behar diren obrak bukatu ondoren, ukitutako eremuak leheneratu eginen dira.
–Hirigintza arlokoak:
- Baimen honek parametro eolikoak neurtzeko dorre bat eraikitzea baizik ez du babesten, aurkeztutako dokumentazioarekin bat eta baimen honetan ezartzen diren determinazioei jarraituz.
- Baimen hau ematen da Biodibertsitatearen Zerbitzuko zuzendariaren otsailaren 10eko 6E/2020 Ebazpenaren ordez aplikatu dadin. Haren bidez ingurumen ukipenetarako baimena eman zitzaion proiektu honi: Serralta (Cabanillas) haize parkean neurketarako bi dorre instalatzea. Haize parkea Tutera eta Cabanillasko udal mugarteetan dago, eta Eólica Cabanillas SL da sustatzailea.
- Egin gogo den jarduerak uki ditzakeen edo horren trabagarri izan daitezkeen azpiegitura eta zortasunei dagokienez, sustatzaileak, obrak hasi baino lehen, behar diren kontsultak eginen ditu, eta, hala badagokio, behar diren baimen guztiak eskuratuko ditu kasuan kasuko gaian eskudun diren organoetatik.
- Zehazki, Zortasun Aeronautikoei buruzko otsailaren 24ko 584/1972 Dekretuan ezarritakoarekin bat, sustatzaileak lortu beharko du Aireko Segurtasunaren Estatuko Agentziak emandako aurretiazko akordioa, dorreek 100 metrotik gorako garaiera dutelako.
- Ezagutzen ez den aztarna arkeologikoren bat agertzen bada, legeak agintzen du Arkeologia Atalari horren berri eman behar zaiola berehalakoan, hala jasota baitago ondare historikoaren arloan indarra duen legerian (Nafarroako Kultur Ondareari buruzko azaroaren 22ko 14/2005 Foru Legearen 59. artikulua eta Espainiako Ondare Historikoari buruzko ekainaren 25eko 16/1985 Legearen 42.3 eta 44. artikuluak). Aditzera ematen dugu ezen, hala egin ezean, eginbehar hori ez betetzeagatik ondare historikoari eragiten zaizkion ukipen guztiak arau-hauste larritzat hartuko direla, foru lege horren 101.h artikulua aplikatuz.
- Lurraldearen Antolamenduari eta Hirigintzari buruzko Foru Legearen testu bateginaren 117.4 artikuluan xedatutakoarekin bat, ebazpen honen bidez babesten diren jarduera edo jarduketak egin edo martxan jarri beharko dira baimena eman eta bi urteko epean. Epe hori iragandakoan, baimenaren ondorioak bukatuko dira, eta ez du eraginkortasunik izanen.
- Jarduera uzteak berekin ekarriko du jardueraren titularrak ukitutako lurrak leheneratu beharra, gehienez ere bost urteko epean, eraikuntzak eraitsita eta/edo kenduta. Lurraldearen Antolamenduari eta Hirigintzari buruzko Foru Legearen testu bateginaren 119. artikuluarekin bat, lizentzia eman baino lehen, udalak sustatzaileari eskatuko dio aitorpen baten bidez konpromisoa har dezala, baimendutako jarduera utziz gero, bost urteko epean, gehienez, lurzorua leheneratzeko.
3. Baimen honek, gainera, Lurraldearen Antolamenduari eta Hirigintzari buruzko Foru Legearen testu bategina onesten duen uztailaren 26ko 1/2017 Legegintzako Foru Dekretuaren 117. artikuluan ezarritako ondorioak izanen ditu; izan ere, artikulu horretan lurzoru urbanizaezinean eginen diren jarduerak baimentzeko prozedura ezartzen da.
4. Ebazpen honek ez du administrazio bidea amaitzen, eta espedientean interesa dutenek, administrazio publikoek izan ezik, gora jotzeko errekurtsoa jar dezakete, Landa Garapeneko eta Ingurumeneko kontseilariari zuzendua, hilabeteko epean.
Administrazio publikoek administrazioarekiko auzi-errekurtsoa jartzen ahalko dute, Nafarroako Justizia Auzitegi Nagusiko Administrazioarekiko Auzien Salari zuzendua, bi hilabeteko epean. Horrek ez du galarazten Nafarroako Gobernuari aurretiazko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarritako moduan eta epean.
Epeak ebazpen hau jakinarazi eta biharamunetik aurrera kontatuko dira.
5. Ebazpen hau Nafarroako Aldizkari Ofizialean argitaratzea.
6. Ebazpen hau igortzea Lurraldearen Antolamenduaren Atalera, Tuterako Udalera, Ingurumena Zaintzeko Ataleko Tuterako Koordinazio Unitatera eta interesdunari, behar diren ondorioak izan ditzan.
Iruñean, 2020ko irailaren 24an.–Biodibertsitatearen Zerbitzuko zuzendaria, Enrique Eraso Centelles.
Iragarkiaren kodea: F2011167
