1. NAFARROAKO FORU KOMUNITATEA
1.7. BESTELAKOAK
ERABAKIA, Nafarroako Gobernuak 2020ko irailaren 30ean hartua, suhiltzaile-kabo eta suhiltzaile lanpostuetan aritzen diren langileei gaueko ordutegian eta jaiegunetan lan egiteagatik ematen zaizkien konpentsazio ekonomikoen igoera aplikatzen duena. Konpentsazio ekonomiko horiek Nafarroako Foru Komunitateko Administrazioaren eta haren erakunde autonomoen zerbitzuko langileen arloko neurri batzuk onesten dituen maiatzaren 15eko 2/2019 Foru Lege-dekretuaren 6. eta 7. artikuluetan daude ezarrita.
Azaroaren 4ko 225/2002 Foru Dekretuak, Nafarroako Foru Komunitateko Administrazioaren eta haren erakunde autonomoen zerbitzuko langileek txandaka, gauez eta jaiegunetan lan egiteagatik dituzten konpentsazio ekonomikoak arautzen dituenak, 9. artikuluan ezartzen du, azaroaren 12ko 106/2014 Foru Dekretu bidezko aldaketaren ostean, ofizial, ofizialorde, sarjentu, kabo eta suhiltzaile lanpostuetan aritzen diren langileek urtean jasoko duten konpentsazio ekonomikoa gauez eta jaiegunetan lan egiteagatik.
Aipatu 9. artikuluaren 6. apartatuak xedatzen du artikulu horretan eta langile horientzat zehaztutako kopuruei aplikatuko zaizkiela gauez eta jaiegunetan lan egiteagatik ezarritako konpentsazio ekonomikoetan oro har egiten diren aldaketak, aldaketarik egiten bada.
2/2019 Foru Lege-dekretuan, maiatzaren 15ekoan, zeinaren bidez onesten baitira Nafarroako Foru Komunitateko Administrazioaren eta haren erakunde autonomoen zerbitzuko langileen arloko neurri batzuk, 6. artikuluan ezartzen da C maila/taldean 0,16 euroan handitzen dela jaiegunean lan egindako ordu bakoitzeko konpentsazio ekonomikoa. Halaber, aipatu foru lege-dekretu horren 7. artikuluan ezartzen da C maila/taldean 0,16 euroan handitzen dela gauez lan egindako ordu bakoitzeko konpentsazio ekonomikoa.
Foru lege-dekretu horren aurretik C maila/taldeko langileek kontzeptu horien truke jasotzen zituzten konpentsazioak ikusirik, kopuru horiek % 1,97 eta % 5,10 handitzea dakar, jaiegunetan lan egindako ordu bakoitzeko eta gauez lan egindako ordu bakoitzeko, hurrenez hurren.
Maiatzaren 15eko 2/2019 Foru Lege-dekretu horren xedapen gehigarri bakarrak ezartzen du arau horretan jasotako neurriak atzeraeraginez aplikatuko direla 2019ko urtarrilaren 1etik aurrera.
Orain arte, suhiltzaile-kabo eta suhiltzaile lanpostuetan aritzen diren langileek gaueko ordutegian eta jaiegunetan lan egiteagatik jaso duten urteko konpentsazio ekonomikoan ez dira aintzat hartu 2/2019 Foru Lege-dekretuaren arabera aplikatu beharreko igoera-ehunekoak, eta hortaz, bidezkoa da horiek erregularizatzea, hartan ezarritako atzeraeraginez.
Espedientean jasota dago Funtzio Publikoko Zuzendaritza Nagusiko Langileriaren Gastuaren Kontrolaren eta Nominen Zerbitzuak egindako txostena, eta hartan aditzera ematen da, ezen, urteko konpentsazio ekonomikoaren zenbatekoa ezartzeko orduan jaiegunetako eta gaueko lanorduek duten berariazko pisua ikusirik, Nafarroako Foru Komunitateko Administrazioaren eta haren erakunde autonomoen zerbitzuko langileen arloko neurri batzuk onesten dituen maiatzaren 15eko 2/2019 Foru Lege-dekretuaren 6. eta 7. artikuluetan ezarritakoa aplikatzeko, % 3,36ko igoera aplikatu behar dela. Hortaz, gaueko ordutegian eta jaiegunetan lan egiteagatik ematen den urteko moduluaren konpentsazio ekonomikoa suhiltzaile-kabo eta suhiltzaile lanpostuetarako, 2019ko ekitaldirako, honela ezarrita gelditzen da, ekitaldi horri eragiten dioten lansarien aldaketei jarraikiz: 4.462,44 euro, 2019ko urtarrilaren 1etik ekainaren 30era, eta 4.473,36 euro, 2019ko bigarren seihilekorako; bi kasuetan, kopuruak dagozkien hilabeteei aplikatuko zaizkie, proportzioan.
Bestalde, suhiltzaile-kabo eta suhiltzaile lanpostua duten langileek gaueko ordutegian eta jaiegunetan lan egiteagatik jasotzen duten urteko konpentsazio ekonomikoa, 2020ko urtarrilaren 1etik, 4.562,88 euroan ezarri behar da, 2020rako Nafarroako Aurrekontu Orokorrei buruzko martxoaren 4ko 5/2020 Foru Legean oro har ezarrita dagoen lansarien igoerari jarraikiz.
Espedientean daude Ekonomia eta Ogasun Departamentuko Aurrekontuen, Ondarearen eta Politika Ekonomikoaren Zuzendaritza Nagusiaren aldeko txostena eta Kontu-hartzailetza Nagusiaren adostasuna.
Horrenbestez, Nafarroako Gobernuak, Lehendakaritzako, Berdintasuneko, Funtzio Publikoko eta Barneko kontseilariak proposaturik,
ERABAKITZEN DU:
1. Suhiltzaile-kabo eta suhiltzaile lanpostua dutenek gaueko ordutegian eta jaiegunetan lan egiteagatik duten urteko konpentsazio ekonomikoaren zenbatekoa ezartzea, honela:
–2019ko urtarrilaren 1etik ekainaren 30a arte: 4.462,44 euro.
–2019ko uztailaren 1etik abenduaren 31 arte: 4.473,36 euro.
–2020ko urtarrilaren 1etik aurrera: 4.562,88 euro.
2. Aipatu aldietan suhiltzaile-kabo eta suhiltzaile lanpostuetan aritu diren langileei kontzeptu horrengatik jaso ez dituzten kopuruak ordain dakizkiela agintzea, aurreko atalean ezarritako kopuruak aintzat harturik.
Suhiltzaile-kabo eta suhiltzaile lanpostuetan aritzen diren langileei gaueko ordutegian eta jaiegunetan egiten duten lanagatiko konpentsazio ekonomikoetan igoera hori aplikatzeak 122.311 euroko kostua dakar 2020ko ekitaldian; horietatik 60.550 euro 2019an sortutako kopuruei dagozkie, eta 61.761 euro 2020an aurreikusten direnei, eta honako aurrekontuko partida hauei egotziko zaizkie:
–054000 02800 1703 134200 partida, Jaiegunetan lan egitearen konpentsazioa: 33.750 euro 2019an eta 34.425 euro 2020an, osotara 68.175 euro.
–054000 02800 1705 134200 partida, Gauez lan egitearen konpentsazioa: 26.800 euro 2019an eta 27.336 euro 2020an, osotara 54.136 euro.
3. Erabaki hau Barne Zuzendaritza Nagusiari eta Funtzio Publikoko Zuzendaritza Nagusiari igortzea, langileen kudeaketa sisteman behar diren neurriak har daitezen erabakia bete dadin.
4. Erabaki hau Nafarroako Aldizkari Ofizialean argitaratzea, behar diren ondorioak izan ditzan.
Iruñean, 2020ko irailaren 30ean.–Nafarroako Gobernuko kontseilari-idazkaria, Javier Remírez Apesteguía.
Iragarkiaren kodea: F2011377
