227. ALDIZKARIA - 2020ko urriaren 2a

1. NAFARROAKO FORU KOMUNITATEA

1.1. XEDAPEN OROKORRAK

1.1.3. Foru Aginduak

110/2020 FORU AGINDUA, irailaren 18koa, Ekonomia eta Ogasuneko kontseilariak emana, zeinaren bidez onesten baitira Nafarroako Aurrekontu Orokorrak eta Balantze Kontuak ixteko eta likidatzeko oinarri arautzaileak, 2020ko ekitaldirako, bai eta 2021eko ekitaldikoak irekitzeko arauak ere.

Nafarroako Ogasun Publikoari buruzko apirilaren 4ko 13/2007 Foru Legearen 123. artikuluak ezartzen duenez, Ekonomia eta Ogasun Departamentuari dagokio erregelamendu ahalmena erabiltzea zehaztu daitezen kontuen eta kontabilitate publikoari buruzko gainerako agirien egitura, justifikazioa, tramitazioa eta kontu-ematea. Horren ondorioz, beharrezkoa da, aurreko urteetan bezala, onestea Nafarroako Aurrekontu Orokorrak eta Balantze Kontuak ixteko eta likidatzeko arauak, 2020ko ekitaldirako, bai eta 2021eko ekitaldian irekitzeko arauak ere.

Horrenbestez,

AGINTZEN DUT:

1. Onestea Nafarroako Aurrekontu Orokorrak eta Balantze Kontuak ixteko eta likidatzeko oinarri arautzaileak, 2020ko ekitaldirako, bai eta 2021eko ekitaldikoak irekitzeko arauak ere. Foru agindu honen eranskinean ageri dira.

2. Foru Komunitateko Administrazioaren departamentuek eta erakunde autonomoek behar diren jarraibideak emanen dituzte foru agindu honetan xedatutakoa gauzatzeko eta betetzeko.

3. Foru agindu hau eta eranskina igortzea Nafarroako Parlamentuari, Kontuen Ganberari, Arartekoari, Nafarroako Kontseiluari, departamentuetako idazkaritza tekniko nagusiei, erakunde autonomoei, sozietate eta fundazio publikoei, Kontu-hartzailetza Zerbitzuari, Kontabilitate Zerbitzuari, Aurrekontuen eta Programazio Ekonomikoaren Zerbitzuari eta kontu-hartzailetza delegatuei, eta agintzea Nafarroako Aldizkari Ofizialean argitara daitezela, orok jakiteko eta aplikatzeko.

Iruñean, 2020ko irailaren 18an.–Ekonomia eta Ogasuneko kontseilaria, Elma Saiz Delgado.

ERANSKINA

Xedea

Arau hauen xedea da onestea Nafarroako Aurrekontu Orokorrak eta Balantze Kontuak ixteko eta likidatzeko arauak, 2020ko ekitaldirako, bai eta 2021eko ekitaldian irekitzeko arauak ere.

1.–Gastuen aurrekontua.

1.1. 2020ko ekitaldiaren itxiera.

1.1.1. Aurrekontu aldaketak tramitatzeko epea.

2020ko azaroaren 20a izanen da aurrekontu aldaketen espedienteak Aurrekontuaren Zuzendaritza Nagusiari igortzeko mugaeguna, edo, kasua bada, kontu-hartzaile delegatuari igortzekoa, salbu aldaketa horiek beharrezkoak badira jada egin diren gastuak aplikatzeko, egun horren aurretik hartutako konpromisoei erantzuteko edo COVID-19 partidaren kargurako gastuak egozteko. Egun horren ondoren egiten diren era guztietako aldaketek beharko dute Aurrekontuen, Ondarearen eta Politika Ekonomikoaren Zuzendaritza Nagusiaren baimena.

1.1.2. Gastu konpromisoak tramitatzeko epea.

Abenduaren 11 izanen da mugaeguna kontabilitate espediente berrien aurretiazko idatzoharrak egiteko, baldin eta hartu beharreko konpromisoak badituzte, salbu eta dirulaguntzen esleipenen edo kontratuen adjudikazioen kasuetan, baldin eta horien gastu baimena 2020ko urriaren 1a baino lehen kontabilizatu bada behin betiko.

Honako hauek geldituko dira muga horretatik kanpo: toki entitateek Nafarroako tributuetan duten parte-hartzearen Funtsean integratutako kapital transferentziak –zeinak abenduaren 18a arte tramitatzen ahalko baitira–, aurretiazko tramitazioaren gastuak, Estatuarekiko Hitzarmen Ekonomikoaren ondoriozkoak, Nafarroako Gobernuak 2020ko abenduaren 4a baino lehen baimentzen dituenak, COVID-19aren partidei aplikagarri zaion gastua eta Nafarroako Gobernuak data horren ondotik baimentzen dituenak, ontzat ematen baldin baditu Aurrekontuen, Ondarearen eta Politika Ekonomikoaren Zuzendaritza Nagusiak.

1.1.3. Espedienteen fiskalizazioa.

Espedienteen fiskalizazioa aldekoa izan dadin, administrazio egintza abenduaren 31n egin beharko da beranduenez. Kudeaketa-zerbitzuek 2020ko abenduaren 18rako bidali beharko dituzte, beranduenez ere, aurretiazko fiskalizazioa egiteko kasuan kasuko kontu-hartzailetza delegatuen ebazpena behar duten obligazioak aitortzeko espedienteak. Muga horretatik salbuetsirik daude honako hauek:

–1.1.2 atalean ezarritako muga orokorretik kanpo dauden gastu-konpromisoen ondoriozko obligazioak.

–Sisteman 2021eko urtarrilaren 1a baino lehen sartzen diren fakturak, 1.1.5.1 puntuan adierazitako baldintzak betetzen badituzte eta ordainduak izateko ebazpenik behar ez badute; haien fiskalizazioa urtarrilaren 15era arte egiten ahalko da.

1.1.4. Aurretiazko tramitazioaren gastuak.

Abenduaren 1a izanen da mugaeguna aurretiazko tramitazioko espedienteak Aurrekontuen Zerbitzuari igortzeko, balora ditzan.

Ekitaldia bukatutakoan ebatzi ez diren gastu espedienteek bidezko diren jarduketei eutsiko diete tramitazioari segida emateko, hurrengo ekitaldiari egotzita.

1.1.5. Aitortutako obligazioak 2020ko ekitaldiaren kargura.

2020ko ekitaldiko aurrekontuaren kargura egotziko dira, bakar-bakarrik, jada egindako gastuek sortutako ordainketa obligazioak, betiere ekitaldia bukatu baino lehen aitortuak badira.

Ondorio horietarako, gastu horiek hornitzailearen faktura bidez frogatuko dira, egindako obren ziurtagiri bidez edo dirulaguntza kobratzeko eskubidearen frogagirien bidez, oinarri arautzaileetan ezarritakoaren arabera. 2020an egindakotzat joko dira aipatutako agiriei dagozkien gastuak, betiere idatzirik jasota baldin badago Administrazioak urte horretan jaso dituela. Hori frogatzeko, erabiliko da Ekonomia, Ogasun, Industria eta Enpleguko kontseilariaren maiatzaren 16ko 150/2014 Foru Aginduan arautzen den Fakturen Erregistroko idatzoharra, edo Dirulaguntzen Justifikazio Kontuen Erregistrokoa edo dokumentuen Sarreren Erregistrokoa, hala badagokio.

1.1.5.1. Obligazioak kontabilizatzeko epeak.

Aurrekontu gauzatzeari dagozkion agiri guztiek, edozein aurrekontu fasetakoek, sistema informatikoan erregistratuta egon beharko dute behin-behinekoz, 2020ko abenduaren 31 baino lehen, salbu eta dagozkienak nomina bidezko ordainketei, gastuaren sailkapen ekonomikoaren 16. eta 48. artikuluei (enpresaburuek Gizarte Segurantzari ordaindutako kuotari dagokionez) eta atal honetako hurrengo paragrafoetan aipatutakoei. Egun horretatik aurrera ezin izanen da sortu obligazioen aitorpenerako kontabilitate espedienterik; dena dela, dagozkion akats zuzenketak egin ahal izanen dira, baita 1.1.3 atalean aipatzen diren fakturen aurreko kontabilizazioa ere (sisteman 2021eko urtarrilaren 1a baino lehen sartzen diren fakturak eta ordaintzeko ebazpenik behar ez dutenak). Faktura horien aurreko kontabilitatea 2021eko urtarrilaren 8ra arte erregistratzen ahalko da.

Bestalde, 2021eko urtarrilaren 20rako kontabilizatuta egon beharko dute 2020. urteari dagozkion eragiketa guztiek, barne direla 2020ko ekitaldian aitortutako obligazioekin lotutako zuzenketa faktura negatiboak, betiere abenduaren 31 baino lehen jaso badira.

Aurrekontua betearazteko idatzohar guztiak, edozein fasetan daudela ere, baldin ez badira obligazio aitortu gisa behin betiko kontabilizatu aurreko ataleko epean, ezereztu eginen dira. Kasuan kasuko kontabilitate zentroei dagokie idatzohar horiek ezereztea, aurretiaz erregistratutako eragiketei dagokienez, eta 2021eko urtarrilaren 22a baino lehen ezereztuak beharko dute egon. Behin-behinekoz aitortutako obligazioak, puntu honetan ezarritakoa aplikatzearen ondorioz baztertzen direnak, 2021eko ekitaldiaren kargura egotziko dira, hala badagokio.

Arau hauen kariaz kontabilizatu diren obligazioen kargura, bidezkoak diren ordainketak egin daitezela agintzen ahalko da.

1.1.5.2. Langileria gastuak.

Abenduko nominan ordaindutako gastuen kontabilizazioa 2020ko abenduaren 18a baino lehen egin beharko da.

Kasuko partidan kreditu aski ez badago eta, horrenbestez, aurreko paragrafoan aipatutako gastua egiterik ez badago, arazoa 2021eko urtarrilaren 8rako ebatzi beharko da. Egun horretarako, kontabilizatuta egon beharko dute aurrekontuko 16. eta 48. artikulu ekonomikoetan biltzen diren gastu guztiek, enpresaburuek Gizarte Segurantzari ordaindutako kuotari dagokionez.

2020. urtean emandako zerbitzuetakoak izan arren, 2021eko urtarrileko nominan edo hurrengoetan ordaintzen diren denborazko kontzeptuen ordainsariak (dietak, aparteko orduak, jaiegunetako lana eta antzekoak) 2021eko aurrekontuari egotziko zaizkio.

1.1.6. Justifikatu beharreko funts libratuak.

Abenduaren 20ko 385/93 Foru Dekretuak justifikatu beharreko funts libratuak arautzen ditu, eta Ekonomia eta Ogasuneko kontseilariaren 172/94 Foru Aginduak aipatu foru dekretua garatu zuen. Halaber, 13/2007 Foru Legearen 56. artikuluak horiek arautu zituen berriro, eta indargabetu, hirugarren azken xedapenaren bidez, foru lege horretan ezarritakoari aurka egiten dioten maila bereko edo txikiagoko xedapenak oro.

Xedapen horietan ezarritakoa betetzeko, aurrekontuaren itxiera eragiketei dagokienez, honako arau hauek hartu beharko dira kontuan:

1.1.6.1. Kutxa finkoko aurrerakinak.

Kutxa finkoko aurrerakintzat jotzeak aukera ematen du aurrerakin hori ez itzultzeko eta emakida berri bat eskatzeko, ekitaldiaren itxieran eta irekieran. Dena dela, kutxa finkoko aurrerakinak kudeatu eta horien jarraipena egiteaz arduratzen diren organoek txosten bat eginen dute, biltzen duena funts horiek 2020ko abenduaren 31n duten egoera. Txostena dagokion organo arduradunak sinatuko du, eta Kontabilitate Zerbitzura igorriko da, 2021eko urtarrilaren 31 baino lehen.

Aipatutako txostenak informazio eta euskarri hauek edukiko ditu:

a) 2020ko abenduaren 31n justifikatutako eta kontabilizatutako gastuaren zenbatekoa, data horretan aurrerakinaren kontu korrontera itzuli gabekoa. Dagozkion kontabilitate espedienteak adieraziko dira.

b) Igorri eta onuradunak kobratutako taloien zenbatekoa, 2020ko abenduaren 31n justifikatu gabe eta kontu korrontearen saldora itzuli gabekoa. Zenbateko horien eta hartzaileen zerrenda emanen da.

c) Kasuko justifikazioa aurkeztuta ere, onuradunek kobratu ez dituzten taloien zenbatekoa. Hirugarrenen, kontzeptuen eta zenbatekoen zerrenda emanen da.

1.1.6.2. Justifikatu beharreko ordainketa aginduak.

a) Ordainketa-agindu hauek jasotzen dituztenek justifikatu egin beharko dute hartutako diru-kopuruen aplikazioa eta, hala egin behar bada, Diruzaintzara itzuli erabili gabeko funtsak, 2020ko abenduaren 18a baino lehen (abenduaren 2. hamabostaldia). Ekitaldiko diruzaintza ixteko behar diren koadratzeak egin ahal izateko, abenduaren 20ko epea bete ezin izan duten erabili gabeko funtsen itzulketa ohiko hamabostalditik kanpo ingresatuko da, betiere abenduaren 31 baino lehen. Hori horrela izan dadin, justifikatu beharreko funts horien kudeaketaz eta segimenduaz arduratzen diren organoek behar diren neurriak hartu beharko dituzte hori betetzeko.

b) Justifikatu beharreko ordainketa aginduen kudeaketaz eta segimenduaz arduratzen diren organoek txostena egin beharko dute 2020ko abenduaren 31n funts horiek duten egoerari buruz. Txostena dagokion organo arduradunak sinatuko du, eta Kontabilitate Zerbitzura igorriko da, 2021eko urtarrilaren 31 baino lehen.

Aipatutako txostenak informazio eta euskarri hauek edukiko ditu:

–2020ko abenduaren 31n ordaindu eta justifikatutako gastuaren zenbatekoa, kontabilizatu gabekoa. Dagozkion fakturen eta zenbatekoen zerrenda emanen da.

–Luzatutako taloiak, baldin eta 2020ko abenduaren 31n justifikatu gabe badaude, onuradunak kobratuak izan zein ez, eta atal honen a) letran ezarritakoa gorabehera. Zenbateko horien eta hartzaileen zerrenda emanen da.

1.2. 2021eko ekitaldiaren irekiera.

1.2.1. Fakturen Erregistroko esleipen kodeak 2. eta 6. kapitulu ekonomikoak ez diren partidetan sortzeko gaikuntza.

Kontabilitate zentroek 2. eta 6. kapitulu ekonomikokoak ez diren aurrekontuko partidak dituztenean, horietan aplikatu behar badituzte Fakturen Erregistroaren bidez kudeatutako fakturazio-agiriak, komunikatuko diote Kontabilitate Zerbitzuari, 2021eko urtarrilaren 10a baino lehen, aukera izan behar dutela 2021eko ekitaldian hori egiteko, kontuan hartu gabe 2020ko ekitaldian aukera hori izan duten ala ez.

1.2.2. Lehendik dauden egoeren aurrekontu kontabilizazioa.

Ekitaldi berriko aurrekontu programa bakoitzean, eta gastuari hasiera eman aurretik, aurrekontu berriaren kargura finantzatu beharreko gastuei dagozkien aurrekontuaren exekuzioaren faseak kontabilizatuko dira. Faseak honako hauek dira:

–Kreditu erreserbak, bakarrik kreditua erreserbatzea nahitaezkoa duten kontratuei dagozkienak, baldin eta haietatik ekitaldia bukatutakoan prestazioa oraindik jaso gabe badago.

–Dirulaguntzetarako nahiz kontratuetarako gastu baimenak, aurretiazko tramitazio egoerei dagozkienak.

–Gastu konpromisoak, ixten den ekitaldiaren bukaeran indarra dutenak eta ekitaldi berriko aurrekontuaren kargura finantzatu behar direnak; konpromiso horiek lot dakizkieke, batetik, hasten den ekitaldian ordaindu beharreko urte anitzeko gastu konpromisoetako urteko sariei, edo, bestetik, ixten den aurrekontuan kontabilizatuta egon arren, ekitaldiaren bukaeran obligazioa aitortu gabe dutenei, betiere, azken kasu horretan, konpromisoaren titularra den hirugarrenak ekitaldi berrian eskatzerik baldin baditu aurreko ekitaldian kontabilizatutako konpromisoari dagozkion obligazioak.

Egoera horiek kontabilizatuko dira PEP elementuen birprogramazioa egin ondoren, eranskin honen 3. atalean aipatzen dena. Bidezko diren kontabilitate eragiketa guztiak eginik, Kontabilitate Zentro bakoitzeko arduradunak kontu-hartzaile delegatuari jakinaraziko dio, Kontu-hartze Orokorrean eskuratuko den inprimakia beteta.

Dirulaguntzen deialdiaren kodea agertuko da ekitaldi berriaren aurrekontuan erregistratzean emandako dirulaguntzei dagozkien gastu-konpromiso ordaindu gabeak, ixten den aurrekontuaren kargurakoak izan beharko zutenak. Kontabilitate agiriak D2 motakoak izanen dira, eta horietan deialdiaren kodea idatziko da, eta kontabilitateko data izanen da urte berriaren urtarrilaren 1a. Hala ere, erantzun gabeko aurrekontu konpromisoa jasorik baldin badago urte anitzeko dokumentu batean, eta ekitaldi berrian dokumentu horretako urteroko bat baldin badago, posible izanen da erantzun gabeko konpromisoaren zenbatekoari gehitzea urteroko berriaren zenbatekoa.

1.2.3. Aurrekontuaren gaitasun finantzarioaren bermea.

Aurrekontu berria aurreikusi diren konpromiso guztiak finantzatzeko gai dela bermatzeko, kontu-hartzailetzak ez du inolako gastu baimenik edo aurrekontuaren aldaketarik fiskalizatuko, baldin fiskalizazio horiek aurrekontuaren gaitasuna kaltetzen ahal badute, hala egun duen egituran, nola aurreko atalean aipatutakoari jarraikiz kontabilizatu behar diren eragiketa guztiei erantzuna emateko asmoz departamentuaren titularrak aurrekontuen kudeaketari buruz egin behar dituen ohiko operazioak egin ondoren. Eragiketa horiek erabaki berrien aurretik kontabilizatu behar dira lehentasunez. Hortaz, organo kudeatzaileak proposamen bat egiten duenean lehendik dauden egoerak behar den bezala kontabilizatu gabe gastu berriak baimentzeko, kontsideratuko da, eragozpen-oharren ondorioetarako, ez duela behar bezala ziurtatzen aurrekontuan dirurik badela.

2.–Diru-sarreren aurrekontua

2.1. 2020ko ekitaldiaren itxiera.

2.1.1. Diru-sarreren esleipena.

13/2007 Foru Legearen 28. artikuluak xedatzen du aurrekontu-ekitaldiari egotziko zaizkiola ekitaldi horretan likidatutako eskubideak, kontuan hartu gabe zer alditan sortuak diren.

Horrekin bat, 2020ko diru-sarreren aurrekontuari aplikatuko zaizkio urte horretan aitortu diren eskubideak, nahiz eta kontabilizazioa 2021eko urtarrilaren 10a arte luza daitekeen.

2.1.2. Formalizaziotik datozen diru-sarrerak.

2021eko urtarrilaren 10erako, lan pertsonalaren etekinen eta ondasun higigarrien kapitalaren etekinen atxikipenengatik sortzen diren diru-sarrera guztiak aplikatu beharko zaizkie dagozkien partidei, bai eta, halakorik bada, formalizaziotik datozen gainerako diru-sarrerak ere.

2.2. 2021eko ekitaldiaren irekiera.

Kontabilitate zentroek egiaztatu beharko dute, 2020ko abenduaren 31 baino lehen, dagozkien eta ekitaldi berrian indarra izanen duten tributuz besteko diru-sarrera normalizatuen kontzeptu guztiek jasotzen dituztela ekitaldi berrirako aurreikusitako diru-sarreren aurrekontuko partidak.

Aurreko atalean ezarritakoa gertatzen ez bada, eta aurrekontu berriak indarra hartu ondotik, kasuko kontzeptuen bertsio berriak sortu beharko dira, eta diru-sarreren aurrekontuko partidak eguneratu.

3.–Gastuetarako proiektuak.

2021eko otsailaren 5erako, gastuetarako proiektuen kudeatzaileek proiektu horietako PEP elementuak berrantolatu beharko dituzte, izandako gauzatzearen eta 2020ko ekitaldiaren itxieran eskura dagoen informazioaren arabera. Halaber, 2021eko ekitaldia (proiektu eta PEP elementuena) baliozkotuko da, informazio sisteman.

4.–Balantze kontuak.

Kontabilitate itxierako eragiketa obligatuetan ezinbestekoa da ondare egoera azaltzeko aurkeztuko diren finantzen egoera orrien zehaztasuna bermatzea. Horregatik, egiaztapen batzuk egin eta dokumentatu behar dira, ziurtatzeko bat datozela balantzeko kontuak eta departamentuetan dauden erregistro lagungarriak. Koadratze hori egiaztatzeko, kontabilitate zentroek hurrengo ataletan aipatzen den informazioa eman beharko dute.

4.1. Ibilgetu materiala eta immateriala.

Ondare Zerbitzuak, Foru Komunitateko Ondareko Ondasun eta Eskubideen Inbentarioa prestatu eta eguneratzeko ardura duen aldetik, informazioa eman beharko dio Kontabilitate Zerbitzuari, 2021eko urtarrilaren 31 baino lehen, lurrei, eraikinei eta ondasun higigarriei dagozkien eta aplikatzeko dauden bajei buruz. Era berean, data hori baino lehen, zerrenda bat bidaliko dio Kontabilitate Zerbitzuari, jasoko dituena etorkizunean etekin ekonomikoak edo zerbitzua emateko probabilitate handia duten aktibo immaterialetan egindako gastuak.

Garapen Ekonomikorako Departamentuak txosten bat egin beharko du 2019ko ekitaldian “Nafarroako AHTko Korridorea” izeneko 2320601901cfna kontuan aktibatu beharreko gastuei buruz, bai eta aktibo horrek 2020ko abenduaren 31n duen balioari buruz ere. Txostena 2021eko urtarrilaren 31 baino lehen bidaliko zaio Kontabilitate Zerbitzuari.

4.2. Finantza inbertsio iraunkorrak (250, 251, 252, 259, 260 eta 542 kontuak).

4.2.1. Ondare Zerbitzuak, 2021eko urtarrilaren 31 baino lehen, Kontabilitate Zerbitzura igorri beharko du 250 (Akzioak), 251 (Errenta finkoko baloreak) eta 259 (Akzioengatik ordaindu beharrekoak) kontuei dagozkien saldoen informazio txostena, 2020ko ekitaldian izandako aldaketen berri emanez eta adieraziz aldaketa horiek aurrekontuak gauzatzean eraginik izan duten ala ez.

Txostenak, halaber, hauxe jasoko du:

a) Nafarroako Gobernuak eta haren erakunde autonomoek 2020ko abenduaren 31n dituzten akzioei buruzko informazio hau:

–Akzioen kopurua.

–Balio nominala.

–Partaidetzako sozietatearen kapitalean zer partaidetza portzentaje hartzen duten.

–Urtean egindako kapital handitze edo murrizteak, edo ekitaldiko aurrekontuan behar den aplikazioa eginez hasitakoak, eta horien tratamendua aurreko puntuetan emandako datuetan.

–Nafarroako Gobernuak erosi edo saldutako harpidetza eskubideak.

b) Aurreko informazioa kontuan hartuta, akzioengatik ordaindu beharrekoen eta emandako partaidetza maileguen egoeraren edo aplikazioaren zerrenda.

c) Aurreko ataletan aipatu gabeko edozein finantza aktibo eskuratu bada, horren gaineko informazioa.

d) Aipatutako tituluetako batzuek baloreen merkaturen batean kotizatzen badute, ekitaldiko azken hiruhilekoko batez besteko kotizazio ofiziala eta itxierako ekitaldiko abenduaren 31ko kotizazioa ere emanen dira.

Azkenik, 2021eko otsailaren 5a baino lehen igorri beharko du, akzioei dagokienez, 2020ko abenduaren 31n Nafarroako Gobernuaren edo haren erakunde autonomoen jabetzakoak diren sozietate pribatuen eta publikoen arabera, sozietatearen funts propioetan dagoen partaidetzaren kuantifikazioa, 2020ko abenduaren 31n, edo sozietatearen funts propioei buruzko informazioa, 2020. urteko ekitaldiaren urteko itxiera balantzean, eta sozietate bakoitzari dagozkion partaidetza portzentajeak.

4.2.2. Departamentu edo erakunde autonomoetako kontabilitate zentroek, baldin eta maileguak, epe luzerako aurrerakin itzulgarriak edo Nafarroako Ogasun Publikoaren beste kreditu batzuk eman badituzte (252 eta 260 kontuak ukitzen dituztenak), sistema informatikoan sartu beharko dute mailegu horietako bakoitzari buruzko informazioa, 2020ko abenduaren 31n eguneratuta. Departamentuek, 2021eko urtarrilaren 31a baino lehen, Idazkaritza Tekniko Nagusiaren ziurtagiri edo txosten bat igorri beharko dute Kontabilitate Zerbitzura, egiaztatzen duena kontabilitate datuak bat datozela Departamentuan dauden administrazio espedienteetako hirugarrenen zerrendarekin (zerrenda ere aurkeztu behar da). Orobat, interesen edo printzipalaren ordainketan mugaegunetik gutxienez 90 eguneko atzerapena duten maileguak adieraziko dira, halakorik bada.

4.2.3. Kontabilitate zentroek, 2021eko urtarrilaren 31 baino lehen, 542 kontuetan dagoen saldoa berresten duen txostena igorri beharko diote Kontabilitate Zerbitzuari. Zehazki, Lehendakaritza, Justizia eta Barne Departamentuak 542 kontuaren (Udal funtzionarioen Montepioko mailegua) euskarria igorri beharko du. Orobat, interesen edo printzipalaren ordainketan mugaegunetik gutxienez 90 eguneko atzerapena duten maileguak adieraziko dira, halakorik bada.

4.3. Izakinak (3. multzoko kontuak).

Izakinen inbentarioa duten departamentu edo erakunde autonomoek (NOZ eta OPLAIa) GE 21 sisteman agertzen diren izakinak erregularizatu beharko dituzte 2020ko abenduaren 31ko kontabilitate datarekin, abenduaren 31n benetan dauden izakinetara egokituz. Erregularizatu ondoren, kontu horiek ekitaldia ixtean dituzten saldoei buruzko datuak bidaliko zaizkio Kontabilitate Zerbitzuari 2021eko urtarrilaren 20a baino lehen.

4.4. Aurrekontuko hartzekodunak.

4.4.1. 2018. urtea baino lehenagoko gerakinen eta obligazio aitortuen ondoriozko hartzekodunak (T).

2020ko abenduaren 20a baino lehen, 2020 baino lehenagoko obligazio aitortuen ondoriozko hartzekodunak dituzten departamentuek edo erakunde autonomoek, baldin eta obligazio horien ordainketa agindua tramitatu gabe badago oraindik, ezereztu beharrekoak ezereztuko dituzte (Gastuak gauzatzea/Espedienteak sortzea/Aurrekontuetako obligazioak kitatzea eta ezereztea ataletan bildutako eragiketen bitartez), eta 2020ko ekitaldiari egotzi, eta mantentzen diren gerakinen zerrenda Kontabilitate Zerbitzura igorri beharko dute. Horrekin batera, ekitaldia ixtean oraindik ere, denbora luzea pasatu arren, indarrean dauden obligazioei dagozkiela frogatzen duten agiriak igorri beharko dituzte.

4.4.2. Hartzekodun orokorrak eta/edo departamentukoak.

Kontabilitate zentroek 2021eko urtarrilaren 31 baino lehen igorri beharko dute Kontabilitate Zerbitzura hartzekodun orokorrei eta/edo departamentukoei dagozkien 2020ko abenduaren 31ko saldoen txostena, kanpoko hirugarrenen araberako zerrenda batean. Txosten horretan ez dira kontuan hartuko kutxa finkoko aurrerakinei eta justifikatu beharreko ordainketei dagozkien hartzekodun orokorrak eta/edo departamentukoak, foru agindu honetako atal egokian bildutakoari jarraikiz beste txosten batean jorratzen baitira.

4.5. Aurrekontura aplikatzeke dauden aurrekontutik kanpoko hartzekodunak eta kobrantzen kudeaketaren ondoriozko aurrekontutik kanpoko hartzekodunak. (413 eta 419).

4.5.1. Fakturen kontabilitate erregistroa.

2021eko urtarrilaren 1a baino lehen sartutako faktura guztiek, atzera bota ez badira, 413 kontuetan agertu beharko dute. Horretarako, 2020ko aurrekontuari aplikatu gabe geratu diren fakturen egoera 2021eko urtarrilaren 20a baino lehen “esleitua” izan beharko da edo “baliozkotua” esleipen-kodea 3000000026 bada. Egun hori igarota, kudeatzaileak atzera bota beharko ditu dagokien 413 kontuan ez dauden fakturak.

2020ko abenduaren 31n ezin izanen da “esleitu” edo “baliozkotu” egoerako fakturarik gelditu, 2020ko urriaren 1a baino lehenagoko erregistro sarrera duenik; lehenago igorriko dira kontabilitate zentroetara, kontabilizatzeko; bestela, atzera botako dira.

4.5.2. SAPeko MM moduluaren bidez kudeatzen diren 413000 kontuak.

2021eko urtarrilaren 21a baino lehen, Nafarroako Osasun Zerbitzuko eta Nafarroako Osasun Publikoaren eta Lan Osasunaren Institutuko Erosketak eta Biltegiak Kudeatzeko Sistemaren kudeatzaileek 413000 kontuen saldo hartzekodunetan egon litezkeen akatsak zuzenduko dituzte, eta horretarako, jasotako fakturei nahiz jasotzekoak diren fakturei lotzen ez zaizkien WS (zerbitzu sarrera) eta WE (salgaien sarrera) dokumentuak ezereztu eta 2020ko ekitaldiari egotziko dizkiote. Zuzenketa hori egin ondoren, Kontabilitate Zerbitzura igorriko dute, data hartarako, oraindik sisteman dauden eta faktura Kudeaketa Sisteman erregistratu gabe duten WS eta WE dokumentuen zerrenda (2020ko urriaren 1a baino lehenagokoak); halaber, salgaiak edo zerbitzuak jasotzen direnetik ordaintzeko batez besteko aldia eta aurrekontu egonkortasunaren araudiak aldi horri jartzen dion tartea igarota, dagokion faktura erregistratu gabe egoteko arrazoiak justifikatu beharko dituzte.

Halaber, eta 2021eko urtarrilaren 20a baino lehen, itxi gabeko material eskaera guztiak ekitaldi berrira ekarriko dituzte, eta, behar denean, batetik bestera aldatu behar ez direnak erregularizatu eginen dira. 2020ko ekitaldia ixtearekin, eskaerak 2021era aldatzeko aukera blokeatuko da.

4.5.3. Zorren kobrantzen ondoriozko aurrekontutik kanpoko hartzekodunak (419 kontuak).

Kontabilitate zentroek derrigorrezko diru-bilketa agentziara eskualdatzen dituztenean kobrantza kudeaketaren ondoriozko aurrekontutik kanpoko zordunak, beste erakunde batzuei dagozkienak (Nekazaritza Bermatzeko Europako Funtsa-Landa Garapenerako Europako Nekazaritza Funtsa, Nilsa eta Konpentsazio Batzordea), abenduaren 31ko saldoaren dagokien zatia jasan beharko dute 2021eko urtarrilaren 20a baino lehen, derrigorrezko diru-bilketa agentziara eskualdatu eta kobratzeke edo ezeztatzeko dauden zordunei dagokiena; informazio hori Kontabilitate Zerbitzura igorriko dute.

4.5.4. Aplikatzeke dauden eragiketen ondoriozko hartzekodunak - Eskuzko kontabilizazioa (413003 kontuak)

Departamentu eta erakunde autonomoek 2021eko urtarrilaren 20a baino lehen bidaliko dizkiote Kontabilitate Zerbitzuari 2019ko ekitaldian eta aurrekoetan erregistratutako Justifikazio Kontuak, baldin eta eskuz erregistratutako idatzoharrak egin badira 413003 kontuetan eta horiek aurrekontuari aplikatzeke badaude oraindik 2020ko abenduaren 31n. Jasotzen ez diren zenbatekoak ezereztu eginen dira.

4.6. Hirugarrenentzako Kontabilitate Lagungarriaren kudeaketa esparruko hartzekodunak (420 kontuak eta 431 kontuetako saldo hartzekodunak).

HKLren (Hirugarrenentzako Kontabilitate Lagungarria) esparruan kudeatutako diru-sarreren itzulketaren ondoriozko hartzekodunen kontuei (420 kontuak eta 431 kontuetako saldo hartzekodunak) eta aplikatzeke dauden zerga kobrantzei (431 kontuetako saldo hartzekodunak) dagokienez, Diru-bilketa Zerbitzuak horiek ekitaldia ixten denean duten saldoei buruzko informazioa emanen du 2021eko urtarrilaren 20a baino lehen.

Halaber, Nafarroako Foru Ogasuna erakunde autonomoak aipatu den egunean igorriko du zerga unitateetan diru-sarrerak itzultzeko aurkeztu diren eskaeren zenbatekoa, zergen arabera banatuta, betiere abenduaren 31n diru-sarreren itzulketaren ondoriozko hartzekodun gisa erregistratzeke badaude kasuan kasuko zerga zordunen hartzekoan. 2021eko apirilaren 1a baino lehen eskaera horiei dagokien behin betiko informazioa eman beharko du, eskatzaileen benetako eskubideak aitortu ondoren, hala badagokie.

4.7. Zordunak. (43 eta 44 kontuak).

Kontabilitate zentroek 2021eko urtarrilaren 20a baino lehen sartu beharko dute sistema informatikoan ekitaldia ixtean kobratzeke dauden zor guztien gaineko informazio eguneratua. (4311) eta aurrekontutik kanpoko zordunei buruzkoena (4490).

4.7.1. 2020ko ekitaldiaren aurretik likidatutako eskubideen ondoriozko zordunak.

Data hori baino lehen, departamentu edo erakunde autonomoek zordunak dituztenean, 2020ko ekitaldia ixtean aurreko urteetan likidatutako eskubideen ondoriozkoak, ezereztuko dituzte justifikatzen ez direnak (Gastuak gauzatzea/Espedienteak sortzea/Aurrekontuetako obligazioak kitatzea eta ezereztea ataletan bildutako eragiketen bitartez). Horrekin batera, Kontabilitate Zerbitzura igorriko dituzte mantentzen direnak, zorra hasi zeneko urtearen arabera ordenatuta eta, agirien bidez justifikatuta ezen, denbora luzea pasatu arren, eskubide horiek ekitaldia ixtean indarra izanen dutela eta derrigorrezko diru-bilketa agentziara eskualdatu behar ez direla.

4.7.2. Hirugarrenendako Kontabilitate Lagungarriaren kudeaketa esparruko zordunak.

HKLren (Hirugarrenendako Kontabilitate Lagungarria) kudeaketa esparruan kudeatzen diren zordunen kontuei dagokienez (431, 432, 435 eta 436), 2021eko urtarrilaren 20a baino lehen Diru-bilketa Zerbitzuak informazioa emanen du aurreko ekitaldietako (aurrekontu itxietako) zordunen eta haiek abenduaren 31n duten saldo zordunaren gainean ekitaldian egin den kudeaketari buruz.

Kontu horien gainean, eta egun berean, Diru-bilketa Zerbitzuak informazioa emanen du ekitaldian likidatu diren eskubideei dagozkien 2020ko abenduaren 31ko saldo zordunei buruz, aurreko paragrafoan bildutako informaziotik bereizia.

Aipatu kontuen saldoak bat etorriko dira aurreko bi paragrafoetan agertzen diren saldoen baturarekin.

4.7.3. Zordun orokorrak eta/edo departamentukoak.

Kontabilitate zentroek 2021eko urtarrilaren 31 baino lehen igorri beharko dute Kontabilitate Zerbitzura zordun orokorrei eta/edo departamentukoei dagozkien abenduaren 31ko saldoen txostena, kanpoko hirugarrenen araberako zerrenda batean.

4.8. Formalizatze kontuak eta aplikatzeko daudenak (554, 556, 585, 586 eta 589 kontuak).

Zor/kreditu konpentsazio edo barruko formalizazioen eragiketetan kontu multzo hau erabiltzen duten kontabilitate zentroek ziurtatu beharko dute, ekitaldi itxieran, saldoa zero dutela. Halaber, eta 5540001700 eta 5540200000 kontuei dagokienez, itxiera ekitaldiko mugimenduak konpentsatu beharko dira, 2020ko abenduaren 31n.

Epigrafe honetan aipatutako konturen batek saldoa zero ez badu, Kontabilitate Zerbitzura igorriko da, 2021eko urtarrilaren 31 baino lehen, 2020ko abenduaren 31n duen saldoaren berri xehakatua.

Era berean, 5540001700, 5540200000, 5561000000, 5561000001, 5561000004, 5852000002 eta 5852000003 kontuei, zeinak HKLren (Hirugarrenentzako Kontabilitate Lagungarria) esparruan kudeatzen baitira, dagozkien saldo zordunen eta hartzekodunen informazioa emanen da.

4.9. Epe laburreko fidantzak eta Hiri Jabetzaren Ganberako errentamenduen fidantzak (180 eta 560 kontuak).

Departamentuek edo erakunde autonomoek epe laburrera jasotako fidantzen ondoriozko hartzekodunak dituztenean, 2020ko abenduaren 31 baino lehen ezereztuko dituzte bermea jada beharrezkoa ez duten fidantzak eta bost urtean bederen itzultzeko eskaerarik gabe egon direnak, eta 2020ko ekitaldiari egotziko dizkiote (Kontabilitate orokorra/Hirugarrenen kontabilizazioa/Aurrekontuz kanpoko obligazioak kitatzea eta ezereztea/Aurrekontuz kanpoko obligazioak kitatzea atalean bildutako eragiketen bitartez).

2021eko urtarrilaren 31 baino lehen, kontabilitate zentroek Idazkaritza Tekniko Nagusiaren txostena igorriko dute Kontabilitate Zerbitzura, agertuta 2020ko abenduaren 31n itzultzeke egonen diren epe laburrera jasotako fidantzen zerrenda, fidantzak eratu zireneko urtearen arabera ordenatuta.

5.–Jasotako eta emandako abalen gaineko informazioa.

5.1. Emandako abalak.

Ondare Zerbitzuak, 2021eko urtarrilaren 31 baino lehen, gai hauek bilduko dituzten txostenak igorriko ditu Kontabilitate Zerbitzura:

–Eratutako abalek abenduaren 31n dituzten saldoak eta 2020ko ekitaldian horietan izandako aldaketak.

–Emandako abalen saldo bizia, abenduaren 31n exekutatu ez baina kasuan kasuko finantza entitateari egin beharreko ordainketetan ez-ordaintze bat izan dutenena, behar diren hornidurak gauzatzeko.

5.2. Jasotako abalak.

Egun horretan berean, Diruzaintza Atalak abenduaren 31 arte jasotako abalen inguruko saldoen eta 2020an horietan izandako aldaketen txostena eginen du.

6.–Finantza-entitateetan dauden kontuak, kontabilitatean korrelaziorik ez dutenak.

6.1. Diruzaintza Atalean zentralizaturik ez dauden finantza-entitateetako kontuak, hau da, kontabilitatean korrelaziorik ez dutenak, kudeatzeko baimena duten arduradunek Nafarroako Gobernuko diruzaintza nagusian sartu beharko dituzte haien saldoak, dagokion ordainketa gutunaren bidez abenduaren 18a baino lehen (2020ko abenduaren 2. hamabostaldia) edo transferentziaren bidez abenduaren 31 baino lehen (hamabostalditik kanpo). Kutxa finkoko aurrerakinak eta justifikatu beharreko ordainketa aginduak salbuetsita daude, haien tratamendua 1.1.5 atalean biltzen baita.

6.2. Aurreko atalean aipatu diru-sarrera bidezkoa ez denean eta, betiere, kontu horiek abenduaren 31n saldo positiboa edo negatiboa badute, 2021eko urtarrilaren 31 baino lehen arduradun baimenduek, kasuan kasuko idazkaritza nagusiaren bidez, Diruzaintza Atalera igorri beharko dituzte kontu horiek abenduaren 31n duten saldoaren laburpena eta haren osaerari buruzko txostena.

6.3. Diruzaintza Atalak Nafarroako Gobernuak finantza-entitateetan kontabilitatean korrelaziorik gabe dituen kontuen zerrenda eginen du 2021eko otsailaren 5a baino lehen, 2020ko abenduaren 31n duten saldoak barne, sailkapen honekin: diru-bilketaren kontu bereziak, Hezkuntza Departamentuak ikastetxeak kudeatzeko dituen kontuak eta kontabilitatean korrelaziorik ez duten bestelako kontuak.

7.–Sozietate eta fundazio publikoak.

7.1. Edukia.

Nafarroako Ogasun Publikoari buruzko apirilaren 4ko 13/2007 Foru Legearen 2. artikuluko f) eta g) apartatuetan aipatzen diren entitateen kontuetan bilduko dira balantzea, emaitzen kontua, ondare garbiaren aldaketen egoera orria, eskudiru fluxuen egoera orria eta memoria, azaroaren 16ko 1514/2007 Errege Dekretuaren bidez onetsi zen Kontabilitate Plan Orokorrean adierazitako moduan eginak.

Nafarroako Ogasun Publikoari buruzko apirilaren 4ko 13/2007 Foru Legearen 128. eta 129. artikuluetan aipatzen diren dirulaguntzak eta beste transferentzia batzuk erakusten dituen egoera orrian, emandako kontabilitateko tratamendua aipatuko da, eta bereiz jasoko Estatuarenak, Foru Komunitatearenak, toki entitateenak eta Europar Batasunarenak; gainera, azken horiek zein funts edo finantza bitartekoren kargura jaso diren adieraziko da.

7.2. Igorri beharreko informazioa.

Sozietate eta fundazio publikoek Kontabilitate Zerbitzuari igorri beharko dizkiote onetsitako kontuak, barnean direla Nafarroako Ogasun Publikoari buruzko apirilaren 4ko 13/2007 Foru Legearen 128. eta 129. artikuluetan aipatzen diren agiriak, 2021eko maiatzaren 7a baino lehen. PDF formatuan igorriko dira.

8.–Beste erakunde batzuk.

Nafarroako Ogasun Publikoari buruzko apirilaren 4ko 13/2007 Foru Legearen lehen xedapen gehigarrian aipatzen diren erakundeek xedapen horren 3. zenbakian adierazten den itzulketa egin beharko dute, dagozkien urteko kontuak onetsi eta hamabost eguneko epean.

Iragarkiaren kodea: F2011097