1. NAFARROAKO FORU KOMUNITATEA
1.2. AGINTARIAK ETA LANGILEAK
1.2.1. Kargu-uzteak, izendapenak eta bestelako egoerak
220E/2020 FORU AGINDUA, uztailaren 31koa, Osasuneko kontseilariak emana, Osasunbidea-Nafarroako Osasun Zerbitzuko Kudeaketa Ekonomikoaren eta Zerbitzu Orokorren Zuzendaritzako titularrari eskuordetzen diona COVID-19 funtsen mugimenduak eta aurrekontu aldaketak baimentzeko eskumena.
Nafarroako Ogasun Publikoari buruzko apirilaren 4ko 13/2007 Foru Legearen 45.1 artikuluak ezartzen du ezen Nafarroako Gobernuko kontseilariek, beren departamentuen esparruan, baimena eman dezaketela programa bereko kredituen artean transferentziak egiteko.
Era berean, Nafarroako 2020ko Aurrekontu Orokorrei buruzko martxoaren 4ko 5/2020 Foru Legearen 58. artikuluak adierazten du funts mugimenduak egiten ahalko direla COVID-19ari dagozkion partiden artean, eta, hala, gastua hobeki kudeatzeko partida berriak sortzen ahalko direla. Funts mugimendu horiek baimentzeko eskumena, ukitutako partidak zein departamentutakoak diren, hango titularrak izanen du.
Organo honen irailaren 30eko 337E/201 Foru Aginduaren bidez, Osasunbidea-Nafarroako Osasun Zerbitzuko zuzendari kudeatzaileari eskuordetu zitzaion Nafarroako Ogasun Publikoari buruzko apirilaren 4ko 13/2007 Foru Legearen 45.1 artikuluan aipatutako aurrekontu aldaketak baimentzeko eskumena.
Prozedurak eraginkorragoak eta azkarragoak izan daitezen, egokitzat jotzen da Osasunbidea-Nafarroako Osasun Zerbitzuko Kudeaketa Ekonomikoaren eta Zerbitzu Orokorren Zuzendaritzako titularrari eskuordetzea ekonomia eta aurrekontu kudeaketarako eskumen horiek.
Nafarroako Gobernuari eta Lehendakariari buruzko abenduaren 3ko 14/2004 Foru Legearen 41.2 artikuluak xedatzen du kontseilariek beren eskudantzien erabilera beste bati eskuordetzen ahal diotela, bertan zehazten direnak izan ezik.
Ildo berean, Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 12. artikuluak ezartzen du ezen Nafarroako Foru Komunitateko Administrazio Publikoaren goi organoek zilegi izanen dutela dagozkien eskumenen erabilera eskuordetzea beren erakunde publikoei eta menpean edo loturik dituzten entitateei, baldin eta hori komeni baldin bada esleiturik dituzten helburuak lortzeko eta beren kudeaketaren eraginkortasuna hobetzeko. Ezartzen du, orobat, eskuordetza eraginkorra izan dadin, eskumenak bere gain hartu behar dituen erakundeak edo entitateak aldez aurretik onartu beharko duela.
Ikusirik Kudeaketa Ekonomikoaren eta Zerbitzu Orokorren Zuzendaritzaren txostena, non Osasunbidea-Nafarroako Osasun Zerbitzuko Kudeaketa-zuzendaritzaren adostasuna agertzen baita.
Horrenbestez, aipatu araudiak eman dizkidan ahalmenak erabiliz,
AGINTZEN DUT:
1. Indarrik gabe uztea organo honen irailaren 30eko 337E/2019 Foru Agindua. Foru agindu horren bidez Osasunbidea-Nafarroako Osasun Zerbitzuko zuzendari kudeatzaileari eskuordetu zitzaion Nafarroako Ogasun Publikoari buruzko apirilaren 4ko 13/2007 Foru Legearen 45.1 artikuluan aipatutako aurrekontu aldaketak baimentzeko eskumena.
2. Osasunbidea-Nafarroako Osasun Zerbitzuko Kudeaketa Ekonomikoaren eta Zerbitzu Orokorren Zuzendaritzako titularrari eskuordetzea Osasunbidea-Nafarroako Osasun Zerbitzuan COVID-19ari dagozkion partiden arteko funtsen mugimenduak eta aipatutako aurrekontu aldaketak baimentzeko eskumena.
3. Eskuordetza honen bidez ematen diren ebazpenetan inguruabar hori azaldu beharko da berariaz, eta, ondorio guztietarako, Osasuneko kontseilariak emanak balira bezala hartuko dira.
4. Foru agindu hau igortzea Osasuneko kontseilariari; Osasun Departamentuko Idazkaritza Tekniko Nagusiari eta Ebazpenak Kudeatzeko Bulegoari; Osasunbidea-Nafarroako Osasun Zerbitzuko zuzendari kudeatzaileari, Araubide Juridikoaren Zerbitzuari, Kudeaketa Ekonomikoaren eta Zerbitzu Orokorren Zuzendaritzari eta Aurrekontuen eta Kontabilitatearen Zerbitzuari; eta Osasun Departamentuko Kontu-hartzailetza Delegatuari, behar diren ondorioak izan ditzan.
5. Foru agindu honek Nafarroako Aldizkari Ofizialean argitaratzen den egunetik beretik sortuko ditu ondorioak.
Iruñean, 2020ko uztailaren 31n.–Osasuneko kontseilaria, Santos Induráin Orduna.
Iragarkiaren kodea: F2008633
