161. ALDIZKARIA - 2020ko uztailaren 22a

1. NAFARROAKO FORU KOMUNITATEA

1.7. BESTELAKOAK

972/2020 EBAZPENA, 2020ko ekainaren 29koa, Nafarroako Unibertsitate Publikoko errektoreak emana, zeinaren bidez agintzen baita argitaratzeko Gobernu Kontseiluak 2020ko ekainaren 29an onetsitako “Erabakia, Nafarroako Unibertsitate Publikoko unibertsitateko masterreko ikasketen arauak onesten dituena”.

2003ko maiatzaren 12ko 110/2003 Foru Dekretuak onetsitako Unibertsitateko Estatutuetako 40. artikuluak ematen dizkidan eskumenak erabiliz, agintzen dut argitaratzeko Gobernu Kontseiluak 2020ko ekainaren 29an hartutako erabakia, Nafarroako Unibertsitate Publikoko unibertsitateko masterreko ikasketen arauak onesten dituena.

“ERABAKIA, NAFARROAKO UNIBERTSITATE PUBLIKOKO UNIBERTSITATEKO MASTERREKO IKASKETEN ARAUAK
ONESTEN DITUENA

Unibertsitateko irakaskuntza ofizialen antolamendua ezartzen duen urriaren 29ko 1393/2007 Errege Dekretuak, 861/2010, 43/2015 eta 195/2016 Errege Dekretuen aldaketekin, Unibertsitateko Masterren diseinuan, plangintzan eta garapenean bete beharreko jarraibideak ezartzen ditu.

Aurreko arau-esparruak nolabaiteko autonomia eman du unibertsitateek beren interes eta baliabideen arabera antola ditzaten beren tituluak.

Errege dekretua garatze aldera, Nafarroako Unibertsitate Publikoak hainbat erregelamendu arau eman ditu, bere aldaketekin. Arau horiek Nafarroako Unibertsitate Publikoko Masterreko Titulu Ofizialak eta Ikasketa Berekien Arauen testu bateginean zehaztu ziren. Testu bategina 2018ko martxoaren 28ko Gobernu Kontseiluan onetsi eta 2018ko 75. Nafarroako Aldizkari Ofizialean, apirilaren 19koan, argitaratu zen.

Unibertsitateko masterreko araudi berria aurkezteko arrazoi nagusia da komenigarria dela unibertsitateko masterreko ikasketa ofizialei buruzko araudia eta Ikasketa Berekiei dagokiena bereiztea. Errektoreak hurrenez hurren Irakaskuntzako Errektoreordetzan eta Ikasleen gaietarako, Enplegurako eta Ekintzailetzarako Errektoreordetzan eskuordetu dituen eskumen esparruak dira.

Gainera, ikuspegi sistematikotik, araua sinplifikatu da Graduko ikasketak arautzen dituen araudira egokitzeko, eta prozesu administratibo eta akademikoak argitzeko eta eraginkorrago bihurtzeko hobekuntzak egin dira.

Berritasunei dagokienez aipatzekoak dira, besteak beste: egutegi akademiko eta administratiboetan ezartzen den malgutasuna, master titulu bakoitza atxikita duten ikastetxeek titulu bakoitzaren berezitasunen arabera antola dezaten; tituluak iraungitzeko prozesuak arautzen dira, eta aldi horietako eskaintza akademikoa bermatzen; bereiz arautzen dira masterraren aurreko prestakuntza-osagarriak eta prestakuntza-baldintzak, bai eta master-amaierako lanen matrikula- eta defentsa-baldintzak ere; eta matrikula-prozesu bakoitzak sortzen dituen azterketa-deialdien kopurua arautzen da, eta Unibertsitateko araudi orokorrera egokitzen da. Araudi horrek deialdi bakarra ezartzen du matrikulako, baina ebaluazio-sistema arruntak eta errekuperazio-azterketek osatzen dute.

Honako hau da Gobernu Kontseiluak, Irakaskuntzako errektoreordeak proposaturik, bere kideek aldez aurretik eztabaida eginda, 2020ko ekainaren 29an egindako bileran, hartu duen,

ERABAKIA:

Lehena.–Onestea Nafarroako Unibertsitate Publikoko Unibertsitateko masterreko ikasketen arauak onestea, erabaki honen eranskin gisa datozenak.

Bigarrena.–Erabaki hau helaraztea Irakaskuntzako errektoreordeari, Ikasleen gaietarako, Enplegurako eta Ekintzailetzarako errektoreordeari, ikastegi eta sailetako zuzendaritzei, eta Irakaskuntza Zerbitzuko zuzendariari. Erabaki hau Unibertsitatearen webgunean argitaratzea.

Hirugarrena.–Erabaki hau Nafarroako Aldizkari Ofizialean argitara dadila agintzea.

Laugarrena.–Unibertsitateei buruzko 6/2001 Lege Organikoaren 6.4 artikuluak eta Unibertsitatearen Estatutuen 144.1 artikuluak ezarritakoaren arabera, erabaki honek administrazio bidea agortzen du. Interesdunek zilegi dute erabaki honen aurka, aukeran, berraztertzeko errekurtsoa jartzea Gobernu Kontseiluaren aurrean, hilabeteko epean, edo administrazioarekiko auzi-errekurtsoa administrazioarekiko auzien epaitegietan, zuzenean.

Bosgarrena.–Gobernu Kontseiluak onetsi eta biharamunean hartuko du indarra erabaki honek.

Iruñean, 2020ko ekainaren 29an.–Errektorea, Ramón Gonzalo García.

NAFARROAKO UNIBERTSITATE PUBLIKOKO UNIBERTSITATE MASTERREKO IKASKETAK GOBERNATZEN DITUZTEN ARAUAK

ZIOEN AZALPENA

Unibertsitateko irakaskuntza ofizialen antolamendua ezartzen duen urriaren 29ko 1393/2007 Errege Dekretuak, 861/2010, 43/2015 eta 195/2016 Errege Dekretuen aldaketekin, unibertsitateko masterren diseinuan, plangintzan eta garapenean bete beharreko jarraibideak ezartzen ditu.

Aurreko arau-esparruak nolabaiteko autonomia eman du unibertsitateek beren interes eta baliabideen arabera antola ditzaten beren tituluak.

Errege dekretua garatze aldera, Nafarroako Unibertsitate Publikoak hainbat erregelamendu arau eman ditu, bere aldaketekin. Arau horiek Nafarroako Unibertsitate Publikoko Masterreko Titulu Ofizialak eta Ikasketa Berekien Arauen testu bateginean zehaztu ziren. Testu bategina 2018ko martxoaren 28ko Gobernu Kontseiluan onetsi eta 2018ko 75. Nafarroako Aldizkari Ofizialean, apirilaren 19koan, argitaratu zen.

Unibertsitateko masterreko araudi berria aurkezteko arrazoi nagusia da komenigarria dela unibertsitateko masterreko ikasketa ofizialei buruzko araudia eta ikasketa berekiei dagokiena bereiztea. Unibertsitateko masterrak, ikasketa berekiak ez bezala, 1393/2007 Errege Dekretuak araututako titulu ofizialak dira, eta, beraz, araudi desberdinak dituzte.

Ikuspegi sistematikotik, araudi hau graduko titulu ofizialak arautzen dituen araudira egokitu da, eta prozesu administratibo eta akademikoak argitzeko eta eraginkorrago bihurtzeko hobekuntzak egin dira.

Berritasunei dagokienez aipatzekoak dira, besteak beste: irakaskuntza eta administrazio egutegietan ezartzen den malgutasuna, master titulu bakoitza atxikita duten ikastegiek titulu bakoitzaren berezitasunen arabera antola dezaten; tituluak iraungitzeko prozesuak arautzen dira, eta aldi horietako eskaintza akademikoa bermatzen; bereiz arautzen dira masterraren aurreko prestakuntza-osagarriak eta prestakuntza-baldintzak, bai eta master-amaierako lanen matrikula- eta defentsa-baldintzak ere; eta matrikula-prozesu bakoitzak sortzen dituen azterketa-deialdien kopurua arautzen da, eta Unibertsitateko araudi orokorrera egokitzen da. Araudi horrek deialdi bakarra ezartzen du matrikulako, baina ebaluazio-sistema arruntak eta errekuperazio-azterketek osatzen dute.

ATARIKO KAPITULUA

1. artikulua. Aplikazio eremua.

1. Araudi hau Nafarroako Unibertsitate Publikoan ematen diren ikasketa ofizialei dagokie, lurralde nazional osoan ofizialak eta baliodunak diren master tituluak eskuratzeko direnei. Unibertsitateko Ikasketa Ofizialen Antolamendua ezartzen duen urriaren 29ko 1393/2007 Errege Dekretuak eta haren ondorengo aldaketek arautzen dituzte.

2. Nafarroako Unibertsitate Publikoaren parte-hartzearekin egindako unibertsitatearteko masterren kasuan, eta NUP unibertsitate koordinatzailea ez bada, hura arautzen duen hitzarmenean ezarritako xedapenak aplikatuko dira.

2. artikulua. Prozedura administratiboak eta akademikoak.

Araudi honetan arautzen diren prozedura administratiboak eta akademikoak, baita dagozkien epeak ere, errektorearen edo hark eskuordetutako errektoreordearen ebazpen baten bidez ezarriko dira ikasturte bakoitzerako.

LEHEN KAPITULUA

Unibertsitate masterreko ikasketen egitura eta edukia

3. artikulua. Ikasketa planak eta lan karga.

1. Nafarroako Unibertsitate Publikoan, moduluek, jakintzagaiek eta irakasgaiek osatuko dituzte unibertsitateko masterreko ikasketa planak, modu sekuentzialean ordenatuta eta planifikatuta, 60 eta 120 ECTS bitarteko luzapenarekin, eta aurreikusitako iraupena, ikasturte bateko eta biko dedikazio osoa dutenentzat, gehienez 60 ECTS izanen da ikasturte bakoitzeko.

2. Ikasleak eskuratu beharreko prestakuntza teoriko eta praktiko guztia edukiko du unibertsitateko masterreko titulu baten ikasketa arduraldiak: nahitaezko eta aukerako irakasgaiak, mintegiak, kanpo praktikak, egonaldiak atzerrian, lan zuzenduak, master amaierako lanak, ebaluazio jarduerak eta beste prestakuntza jarduera batzuk.

4. artikulua. ECTS kredituak.

Prestakuntza programa europar kreditutan egituratuko da (ECTS), eta horietako bakoitzak ikaslearen 25 lan ordu adina balioko du.

5. artikulua. Ikasketen denbora-egitura.

1. Irakasgaiak seihilekokoak edo urtekoak izanen dira. Ikasturte bakoitzean onesten den irakaskuntza programazioan zehaztuko da.

2. Seihilekoko irakasgaietan, ikasturtea bi seihilekotan eginen da: lehenbizikoa udazkeneko seihilekoa eta bigarrena udaberriko seihilekoa deitzen dira. Urteko irakasgaiak ikasturte osoan garatuko dira.

6. artikulua. Nahitaezko prestakuntza eta aukerakoa.

1. Nafarroako Unibertsitate Publikoko unibertsitateko masterreko ikasketen plan guztiek araudi hauetan ezarritako prestakuntza osoa edukiko dute: 1393/2007 Errege Dekretua eta hura garatzen duten xedapenak, eta, hala badagokio, master horien bidez garatzen den lanbide arautu bakoitzaren araudia.

2. Unibertsitateko masterreko titulu ofizialen ikasketa planek nahitaezko gaien kredituen % 50 izan beharko dute gutxienez ere, haien barne dela master amaierako lana.

3. Urteko aukerakoen eskaintza, espezialitateak barne, ikasturte bakoitzeko programazio akademikoa onesten duen Gobernu Kontseiluaren erabakiaren bidez ezarriko da.

7. artikulua. Kanpoko praktikak.

1. Posible baldin bada, tituluarekin lotutako kanpoko praktiken aldi bat jasoko da ikasketa planen barnean.

2. Nafarroako Unibertsitate Publikoan gai horri buruz indarrean dauden xedapenek zuzenduko dituzte kanpoko praktikak.

8. artikulua. Egonaldiak beste ikastegi batzuetan.

1. Posible baldin bada, tituluarekin lotuta dauden nazioko edo atzerriko beste unibertsitate batzuetan egonaldi bat egitea jasoko da ikasketa planen barruan.

2. Ikasleak Goi Mailako Hezkuntzako Unibertsitate Ikastegietan eginen duen egonaldia baliatuko du ikasketak egiteko, edo, hala badagokio, master amaierako lana egiteko, edo gero kredituak lortzeko aukera emanen dioten praktikak egiteko enpresetan eta erakundeetan edo garapenerako lankidetza jardueretan.

3. Ikasketa planean sartzen ahal da, halaber, tituluari lotutako nazioarteko mugikortasun birtualeko programen garapena.

4. Nafarroako Unibertsitate Publikoan gai horri buruz indarrean dauden xedapenek zuzenduko dituzte beste ikastegi batzuetan egiten diren egonaldiak.

9. artikulua. Master amaierako lana.

1. Unibertsitateko masterreko ikasketak amaitzeko, master amaierako lan bat egin eta jendaurrean defendatuko da. Konfidentzialtasun klausulen pean lan eginez gero, Nafarroako Unibertsitate Publikoan arlo horri buruz indarra duten xedapenetan ezarritakoari jarraikiz eginen da defentsa.

2. Master amaierako lanak 6 eta 30 ECTS kreditu bitartekoak izanen dira, kasuan kasuko ikasketa planaren arabera. Unibertsitateko ikerketako masterretan, lanak gutxienez 12 ECTS iraunen du.

3. Master amaierako lanek tituluari lotutako gaitasunak eskuratzera eta ebaluatzera bideratuta egon behar dute, eta araudi honetako zazpigarren kapituluan eta Nafarroako Unibertsitate Publikoan arlo horretan indarrean dauden xedapenetan ezarritakoari jarraituko diote.

10. artikulua. Prestakuntza-osagarriak.

1. Unibertsitateko masterreko tituluek prestakuntza-osagarriak izaten ahal dituzte, titulua egiaztatzeko memorian ECTS kredituetan definituko direnak. Prestakuntza-osagarri horiek ez dira sartuko unibertsitateko masterreko ikasketa planean.

2. Prestakuntza-osagarriei esker, ikasleek, egin nahi duten unibertsitateko masterrarekin zuzenean lotzen ez diren titulazioetatik datozenean, behar diren gaitasunak eskuratuko dituzte, gainditzeko bermearekin burutu ahal izateko beren masterrak.

3. Prestakuntza-osagarriak masterreko Irakaskuntza Batzordeak zehaztuko ditu, masterrean onartua izaterakoan.

4. Unibertsitateko masterraren irakastorduak berberak izanen dira, kontuan hartu gabe sartzeko titulazioa eta prestakuntza-osagarriak egin behar diren.

5. Inoiz ez dira 120 ECTS kreditu baino gehiago egin beharko, prestakuntza-osagarriak barne, unibertsitateko masterreko titulu ofizial bat lortzeko.

6. Unibertsitateko masterreko titulu ofizial bat egiteko onartuak izan diren ikasleak, prestakuntza-osagarriak egiten ari badira, unibertsitateko masterreko ikasleak izanen dira ondorio guztietarako.

7. Prestakuntza-osagarriei unibertsitateko masterreko ikasketak arautzen dituzten arauak aplikatuko zaizkie, matrikulari, deialdiei eta prezio publikoei dagokienez.

BIGARREN KAPITULUA

Antolamendua eta irakaskuntza

11. artikulua. Unibertsitateko masterraren Irakaskuntza Batzordea.

1. Unibertsitateko masterreko titulu ofizial bakoitzeko Irakaskuntza Batzordea masterraren zuzendaritza akademikoaz arduratuko da, eta irakaskuntza gaietan eskumena duen errektoreordeak izendatuko du, ikastegiak proposatuta. Unibertsitateko Ikasketa Batzordean jakinaraziko dira izendapenak.

2. Unibertsitateko masterraren Irakaskuntza Batzordea gutxienez lanaldi osoko hiru irakaslek osatuko dute. Horietako bat unibertsitateko masterraren irakaskuntzaren zuzendaria izanen da, beste bat kalitatearen arduraduna, beste bat idazkaria, eta gainerakoak, halakorik bada, batzordekideak izanen dira. Ikastegiak proposatuko du hiru kide horien izendapena, unibertsitateko masterrean aritzen irakasle iraunkorren edo bitartekoen artetik. Behar bezala justifikatutako kasuetan, irakaskuntza gaietan eskumena daukan errektoreordeak baimentzen ahalko du kalitatearen arduraduna eta idazkaria ikastegian aritzen diren irakasle ez-iraunkorren artetik izendatuak izan daitezen.

3. Unibertsitatearteko masterreko titulu ofizialen kasuan, masterraren Irakaskuntza Batzordearen osaera ezberdina izaten ahalko da, parte hartzen duten unibertsitateek sinatutako hitzarmen eta akordioen arabera.

4. Unibertsitateko masterraren Irakaskuntza Batzordearen eginkizunak dira:

a) Sarbidearen arloan eskumenak dituen errektoreordeari ikasleak masterrean onar ditzan proposatzea, titulu bakoitzaren memorietan ezarritako balorazio irizpideen eta onarpen baldintza espezifikoen arabera.

b) Ikasketak egiteko matrikulatutako ikasle bakoitzari tutore bat esleitzea, Unibertsitateko Tutoretzako Ekintza Planean ezarritakoaren arabera.

c) Unibertsitateko masterraren Irakaskuntza Batzordearen bileretan hartutako erabakien berri ematea unibertsitateko masterreko irakasleei.

d) Ikastegiari kredituen balioaren aitorpenak eta horien transferentziak proposatzea.

e) Unibertsitateko masterraren garapenaren jarraipena egitea, Tituluen Kalitatearen Berme Sisteman identifikatutako prozesuak betetzen direla ziurtatzea eta haien emaitzak jaso, aztertu eta ikastegiko Kalitatearen Berme Batzordeari horien berri ematea, bereziki eraginkortasunik eza edo disfuntzioak atzematen badira.

f) Tituluaren kalitatea ziurtatzeko barneko eta kanpoko jarraipen txostenak egitea.

g) Ikastegiari proposatzea master amaierako lanen epaimahairako kideak.

12. artikulua. Irakasleak.

1. Unibertsitateko masterreko titulu ofizialetako irakasgaien ardura duten irakasleek doktore titulua izan beharko dute, baita lanaldi osorako lotura ere; dena dela, aurreko baldintzak betetzen ez dituzten Unibertsitateko beste irakasle batzuek ere parte hartzen ahalko dute irakaskuntzan, eta ezin izanen dute beren gain hartu dagozkien prestakuntza-ikasgaien ardura.

2. Irakaskuntza Batzordeak, era berean, unibertsitateko masterrean parte hartzeko baimena ematen ahalko die ikertzaileei, Unibertsitatetik kanpoko profesionalei, Unibertsitateko institutuei atxikitako langileei, edo Nafarroako Unibertsitate Publikoko Administrazioko eta Zerbitzuetako langileei, profesional aditu gisa.

3. Unibertsitatearteko masterreko titulu ofizialetan, Nafarroako Unibertsitate Publikoko irakasleak izanik, irakaskuntza beste unibertsitate batean ematen duten irakasleek (master beraren barnean) irakaskuntza hori kontabilizatzen ahalko dute Nafarroako Unibertsitate Publikoko Irakaskuntza Antolamenduaren Planaren barnean, unibertsitateko masterra emateko unibertsitateen arteko hitzarmenean horrela ezarri bada.

13. artikulua. Urteko eskaintza.

1. Unibertsitateko Gobernu Kontseiluak, irakasteko baliabideen arabera, urtero proposatuko dio Nafarroako Gobernuari unibertsitateko masterreko titulu ofizialen eskaintza onesteko.

2. Urtero, irakaskuntza gaietan eskumena duen errektoreordeak hurrengo ikasturterako unibertsitateko masterreko titulu ofizialen eskaintzari dagokion programazioa eskatuko die ikastegiei, eta Gobernu Kontseiluak onetsiko du. 6.3 artikuluko hautazkotasunaren eskaintza zehaztuko da erabaki horretan.

14. artikulua. Irakaskuntza plangintza.

Matrikula epeak baino lehen, masterraren Irakaskuntza Batzordeak proposatuta, ikastegiek Unibertsitatearen webgunean jarriko dituzte eskolen asteko ordutegiari buruzko informazioa, irakasgaietako irakaskuntza gidak, ezarritako irakasleak, bai eta azterketen datak ere.

15. artikulua. Irakaskuntza eskaintzaren bermea.

1. Unibertsitateko masterreko titulu ofizialaren ardura duen ikastegiak matrikulatutako ikasleei emandako irakaskuntza eskaintzak bermatuko die masterra ikasturte batean osatu ahal izatea 60 kredituko ikasketak direnean, edo bi urtetan, 120 kreditura arteko ikasketak direnean.

2. Unibertsitateak erabakitzen duenean unibertsitateko master bat iraungiko dela eta, ondorioz, ikasketa planeko ikasmailetako irakaskuntza arautua arian-arian iraungitzat joko denean, oraindik ere bi azterketa deialdi eginen dira hurrengo bi ikasturteetan, ikasturte bakoitzeko bat, iraungiko den ikasketa planeko ikasmailaren barneko irakasgaietarako.

3. Bi ikasturte horietan, ikasle bakoitzak eskubidea izanen du geratzen zaizkion irakasgaietan matrikulatu eta ebaluatzeko, eta bere irakaskuntza tutoretzen bidez eginen da. Irakasgaiak ez dira kontuan hartuko Irakaslana Antolatzeko Planean.

4. Iraungitzen ari den titulua beste batek ordeztu badu, goian aipatutako bi ikasturteak igaro ondoren masterra amaitu ez dutenek master titulu berrira egokitzeko eskubidea izanen dute, horren ordezko master tituluaren egiaztapen memorian ezartzen dena aplikatuz.

5. Bi ikasturte igarotzen badira sarbide berriko ikaspostuak eskaini gabe, Unibertsitateak behin betiko iraungiko du titulua.

6. Artikulu honetako 2. apartatutik 5.era bitartekoetan ezarritakoa aplikatuko da, halaber, titulu ofiziala iraungi gabe ikasketa plana aldatzen den kasuetan.

16. artikulua. Tutoretza akademikoak.

1. Seihileko bakoitzean garatuko diren tutoretzen bidez, irakasgai bakoitzaren ikasketa prozesuan zehar ikasleei banaka lagunduko zaie eta argibideak emanen zaizkie.

2. Sailek zaindu behar dute ikasketa planekin bat eta ematen dituzten irakaskuntzen plangintzaren arabera atxikita dituzten irakasleen tutoretzak behar bezala beteko direla.

3. Nafarroako Unibertsitate Publikoak bermatuko du ikasleek tutoretzak izan ditzatela, beharrezko irizpideak ezarrita.

HIRUGARREN KAPITULUA

Irakaskuntza eta administrazio egutegia

17. artikulua. Urteko irakaskuntza eta administrazio egutegiaren onespena.

1. Gobernu Kontseiluak onetsiko du ikasturte bakoitzean behar den irakaskuntza egutegia, betiere hurrengo artikuluan ezarritako jarraibideak betez.

2. Nafarroako Unibertsitate Publikoko errektoreak edo horrek eskuordetzen duen errektoreordeak ikasturte bakoitzerako administrazio egutegia onetsiko du.

18. artikulua. Irakaskuntza egutegia.

1. Irakaskuntza egutegiak aukera emanen die arduraldi osoko ikasleei masterra garatzeko jarduera guztiak gauzatu ditzaten: eskola presentzialak ikasgelan, teorikoak zein praktikoak, mintegiak, tutoretzak, banakako lanak edo taldean egitekoak, kanpoko praktikak, proiektuak, bakarka ikastea edo taldean, eta ebaluazio probak prestatzea eta egitea.

LAUGARREN KAPITULUA

Sarbidea eta onarpena

19. artikulua. Sartzeko betekizun orokorrak.

1. Unibertsitateko masterreko ikasketa ofizialetara sartzeko, beharrezkoa izanen da Espainiako unibertsitate titulu ofizial bat edukitzea, edo Europako Unibertsitate Eremuko goi mailako hezkuntza erakunde batek emandako bestelakoren bat, titulua eman den herrialdean unibertsitateko master ikasketetara sartzeko aukera ematen duena.

2. Era berean, Europako Unibertsitate Eremutik kanpoko hezkuntza sistemetako tituludunek sartzeko aukera izanen dute, beren tituluak homologatu beharrik gabe, betiere Unibertsitateak egiaztatu eta gero titulu horien prestakuntza maila Espainian dagokien unibertsitate tituluaren baliokidea dela eta titulua eman den herrialdean ikasketa baliokideetara sartzeko gaitzen dituztela. Sarbide modu horrek inolaz ere ez du ekarriko interesdunak aurretik duen tituluaren homologazioa, ezta beste ondoriorik ere, Nafarroako Unibertsitate Publikoan onartuak izan diren unibertsitateko masterreko ikasketak egitearena ez bada.

3. Araututako lanbideetan jarduteko gaitzen duten unibertsitateko masterretan sartzeko, 967/2014 Errege Dekretuaren I. eranskinean aurreikusitakoaren arabera, beharrezkoa izanen da graduko titulu edo lizentziatura jakin bat izatea.

20. artikulua. Ikaspostu kopuruen mugak eta erreserbatutako ikaspostuak.

1. Ikasturte bakoitza hasi aurretik, Gobernu Kontseiluak Nafarroako Gobernuari proposatuko dio onar dezala eskainitako unibertsitateko masterreko tituluetarako sarbide berriko ikaspostu kopurua.

2. Gehienez ere masterreko ikaspostuen %25 gordetzen ahalko dira atzerriko ikasleen mugikortasuna errazteko aritzen diren erakundeekin egindako hitzarmenen bidez sartzen diren ikasleentzat.

3. Onartua izateko eta matrikula egiteko epe bat baino gehiago ezartzen baldin bada, masterreko Irakaskuntza Batzordeak aukera izanen du epe bakoitzean ikaspostuen kopuru mugatua esleitzeko.

21. artikulua. Ikasleak onartzeko prozesua.

1. Unibertsitateko masterraren tituluaz arduratzen den ikastegiak titulua egiaztatzeko memorian ezartzen diren onarpen irizpide berariazkoak argitaratuko ditu webgunean.

2. Ikasturte bakoitzerako aurreinskripzio datak administrazio egutegian zehaztuko dira.

3. Aurreinskripzio eskaera bakarra eginen da, eta bertan titulu bakarra adieraziko da. Ikaslea ez bada adierazitako titulazio horretan onartua izan, ikaspostuak bete gabe dituen beste titulazio batean onartua izateko eskaera egiten ahalko du.

4. Ikasle bakoitzak unibertsitateko master bakar batean egiten ahalko du matrikula. Hala ere, aurreko ikasturtean unibertsitateko beste masterreko titulu ofizial batean matrikulatutako ikasleak badira, errektoreari eskatzen ahalko diote beste ikasketa batzuekin batera egitea, betiere aurreko ikasketak bukatzeko gehienez ere 20 kreditu falta bazaizkie.

5. Masterreko Irakaskuntza Batzordeak onarpen zerrenda eta zain dauden ikasleen zerrenda prestatuko du. Zerrenda hori unibertsitateko master bakoitzaren egiaztapen memorian ezartzen diren sartzeko baldintza eta onarpen irizpide espezifikoen arabera eginen da, eta onarpena proposatuko du. Sarbidearen arloan eskumenak dituen errektoreordeak ebatziko du.

6. Zerrenda Unibertsitatearen egoitza elektronikoan jarriko da. Bertan, ikasle bakoitzarentzat xehatuta jarriko da zein balorazio izan duen sartzeko betekizunei eta onartzeko irizpide espezifikoei begira.

7. Onarpena behin-behinekoa izanen da, eta, izangai bakoitzak, matrikula egiteko unean, master bakoitzean sartzeko berariazko betekizunak eta onartzeko irizpideak betetzen dituela frogatzen duenean, behin betiko onarpen bihurtuko da.

8. Ikasle interesdunek aipatu zerrenden aurkako erreklamazioa aurkezten ahalko dute, administrazio egutegiak ikasturte bakoitzerako ezartzen duen epean.

22. artikulua. Aldez aurreko prestakuntza baldintzak.

1. Titulua egiaztatzeko memorian hala ezarrita dagoen kasuetan, unibertsitateko masterrean gradudunak onartzeko aldez aurreko prestakuntza baldintzak gainditu beharko dituzte.

2. Aldez aurreko prestakuntza eduki horiek ez dira masterraren parte izanen, eta kasuan kasuko masterrerako sarbide naturala ahalbidetzen duten Nafarroako Unibertsitate Publikoko graduko edo graduetako jakintzagai edo irakasgaiez osatuak egonen dira.

3. Hori zehazteko, masterreko Irakaskuntza Batzordeak kontuan hartuko du ikasle bakoitzak aurreko ikasketetan ekarritako gaitasunak bat ote datozen aurreko atalean adierazitako Nafarroako Unibertsitate Publikoko graduarekin edo graduekin.

4. Masterreko Irakaskuntza Batzordeak adierazitakoari jarraikiz, masterra atxikia dagoen Ikastegiko Zuzendaritzaren ebazpen bidez zehaztuko dira baldintza horiek.

5. Aldez aurreko prestakuntza baldintzei graduko ikasketak arautzen dituzten arauak aplikatuko zaizkie, matrikulari, deialdiei eta prezio publikoei dagokienez.

6. Masterrean onartua izateko beharrezkoa izanen da aldez aurreko prestakuntza baldintzak osatzen dituzten jakintzagaiak edo irakasgaiak gainditzea.

7. Baldintza guztiak 4. apartatuan aipatzen den ebazpenean adierazitako ikasturte akademikoan gainditu beharko dira, eta horrela hurrengo ikasturtean masterrera automatikoki sartzeko modua izanen da.

8. Gainditu eta gero, hurrengo ikasturtean matrikula formalizatzen ez bada, masterreko ikaspostu erreserba galduko da, eta geroago sartu nahi izanez gero, onartzeko beste eskaera bat egin beharko da.

BOSGARREN KAPITULUA

Ikasleen mailak eta arduraldia

23. artikulua. Ikasleen tipologia arduraldiaren arabera.

1. Nafarroako Unibertsitate Publikoak ikasleen tipologia hau ezarriko du, ikaslearen arduraldiaren arabera:

a) Arduraldi osoko ikaslea: ikasturte bakoitzeko 60 eta 84 ECTS kreditu artean matrikulatzen dituena.

Arduraldi horrekin jarraituko du ikasketak bukatzeko falta zaion kreditu kopurua 60tik beherakoa denean eta bukatzeko geratzen zaion guztia matrikulatzen duenean.

b) Arduraldi partzialeko ikaslea: ikasturte bakoitzeko 15 eta 59 ECTS kreditu artean matrikulatzen dituena, baldin eta ikasketak amaitzeko geratzen zaion guztia matrikulatu ez badu.

c) Aurreko tipologiez gain, hezkuntza behar bereziak dituzten ikasleak izaten ahal direla aurreikusten da. Ondorioz, beste ikasle mota bat sortzen ahal da, bere izaera aitortzeko bana-banako analisia eskatzen duena.

2. Aurreko ataleko a) eta b) motak matrikula egiten denean zehaztuko dira.

24. artikulua. Ikasle bisitaria.

1. Unibertsitateko masterreko titulu ofizial bateko ikasle bisitaritzat hartuko dira master horren modulu batean edo batzuetan, edo irakasgai multzo jakin batean matrikulatuta dauden ikasleak. Horrela gainditzen diren irakasgaiak ziurtagiri batean jasota geldituko dira.

2. Ikasle bisitaria Nafarroako Unibertsitate Publikoko unibertsitateko beste masterreko titulu ofizial bat egiten ari bada, aukera egonen da kredituak unibertsitateko master horretako bere ikasketa espedientean aitortuak edo transferituak izan daitezen.

3. Ikasle bisitari gisa onartua izateko baldintza izanen da ikaspostuak libre gelditzea, behin unibertsitateko masterreko ikasleen matrikularako ohiko epea bukatu eta gero.

SEIGARREN KAPITULUA

Matrikula

25. artikulua. Matrikula epea.

1. Ikasturte bakoitzean matrikula bakarra eginen da, administrazio egutegia onesten duen ebazpenean horretarako ezarritako epeetan.

2. Ezarritako epean matrikula gauzatzen ez duten ikasleek matrikula egiteko eskubidea galduko dute, ez bazaie, behintzat, epe barruan matrikula egitea galarazi dien zerbait larria gertatu ez agertzeko, eta hori behar bezala egiaztatzen badute. Horretarako, eskabidea aurkeztu behar dute errektoreari zuzendua, edo hark eskuordetutako errektoreordeari, eta berak ebatziko du.

26. artikulua. Matrikula egiteko eskaera.

Honako baldintza hauek bete behar dira Unibertsitateak eskaera onar dezan: eskaeran emandako datuak egiazkoak izatea, ikasleak master ikasketetan sartzeko arauetan ezarritako baldintzak betetzea, iraupen arauak betetzea, eta dagozkion prezio publikoak ezarritako moduan eta epean osorik ordaintzea.

27. artikulua. Matrikulatutako kredituen denboraren araberako antolamendua.

1. Ikasle bakoitzak, irakasgaiak lehenengo aldiz matrikulatu baino lehen, aurreko ikasturteetan gainditu gabeko irakasgai guztiak matrikulatu behar ditu. Betebehar horretatik salbuetsita daude mugikortasun programa batean parte hartzen duten ikasleak mugikortasunean ematen diren irakasgaietarako.

2. Aukerako irakasgaietan matrikulatzen diren ikasleek, gainditzen ez badituzte, irakasgai horiek utzi eta beste batzuetan egiten ahalko dute matrikula, kontuan hartu gabe utzitako irakasgaien deialdi edo matrikulazio kopurua.

3. 60 ECTS baino gehiagoko iraupena duten unibertsitateko masterren kasuan, lehen ikasmailako nahitaezko irakasgai guztiak bigarren ikasmailakoak baino lehenago matrikulatu beharko dira.

28. artikulua. Matrikula aldatzea.

1. Matrikula aldatzeak bere baitan hartuko du, besteak beste, irakasgaiak ordezkatzea, talde aldaketa eta baliogabetze partziala.

2. Matrikulatu, aitortu edo baliokidetutako kreditu guztiei eragiten ahalko die aldaketak, betiere aipatu kreditu horiek aktan kalifikaziorik ez badute matrikula aldatu nahi den ikasturtean.

3. Zilegi izanen da matrikularen aldaketa eskatzea seihileko bakoitzaren hasieran, administrazio egutegian ezarritako epeetan.

4. Nafarroako Unibertsitate Publikoko errektorearen ebazpen baten bidez arautuko dira ikasleei matrikula aldatzea utziko dieten arrazoiak.

29. artikulua. Unibertsitatearen ofiziozko jarduna matrikulari buruzko eskaerei dagokienez.

1. Nafarroako Unibertsitate Publikoak ikasleen espedienteak blokeatuko ditu honako kasu hauetan:

–Matrikularen prezio publikoak ezarritako epeetan ordaintzen ez badira.

–Ikasleak ez badu aurkezten matrikula egiteko nahitaez eskatzen diren agirietakoren bat.

2. Espedientearen blokeoa interesdunari jakinaraziko zaio, eta blokeoa dela-eta ezin izanen da titulurik edo ziurtagiririk eman, ez espedientea beste unibertsitate batera lekualdatu, ez eta bestelako kudeaketa akademiko-administratiborik egin ere. Paragrafo honetatik kanpo gelditzen da ikasleen kalifikazioak irakasgai baten aktan sartzea, jakinik kalifikazioak ez direla agertuko ezein ziurtagiritan, ez eta bestelako ezein kudeaketa akademiko-administratibotan ere.

30. artikulua. Matrikula erabat baliogabetzea eta horren ondorioak.

1. Ikasleek matrikula erabat baliogabetzeko eskubidea edukiko dute inolako justifikaziorik gabe, ondorengo atalean ezartzen diren epeetan.

2. Matrikula baliogabetzeko eskaera Unibertsitateko Erregistro Orokorrean aurkeztu beharko da matrikula egiten denetik aurrera edozein unetan eta ikasturtea hasten denetik hilabete igaro baino lehen. Matrikula ikasturtea hasi eta gero egin bada, baliogabetzea eskatzeko hilabeteko epea matrikula egin den egunetik hasiko da zenbatzen.

3. Aurreko apartatuan ezarritakoa galarazi gabe, ikasleak ikasturtearen edozein unetan eskatzen ahalko du matrikula baliogabetzeko baldin eta gerora sortutako eta behar bezala justifikatutako salbuespenezko inguruabarrak gertatu badira eta, horien ondorioz, ikasleak ezin badu bere ikasketekin jarraitu ikasturtearen gainerako aldian. Matrikulatutako irakasgaietako bat jada ebaluatu eta kalifikatu badute eta kalifikazioa ebaluazio aktetan jasota baldin badago, matrikula ez da erabat baliogabetuko, aldatu baizik, oraindik ebaluatu eta kalifikatu gabe dauden irakasgaiak bertatik kentzeko.

4. Kasu guztietan, errektorearen edo hark eskuordetzen duen errektoreordearen ebazpen baten bidez ebatziko dira baliogabetzeak.

5. Matrikula baliogabetzen bada, matrikulatu, aitortu edo baliokidetutako kredituengatik ordaindutako prezio publikoen %100 itzuliko da, betiere aipatu kreditu horiek aktan kalifikaziorik ez badute matrikula baliogabetu nahi den ikasturtean.

6. Inolaz ere ez dira itzuliko espedientea irekitzeagatik ezarritako prezio publikoak, ezta kudeaketa administratiboari dagozkionak ere.

ZAZPIGARREN KAPITULUA

Master amaierako lanaren matrikula eta defentsa

31. artikulua. Master amaierako lanerako matrikula.

1. Master amaierako lanaren matrikula, bai eta hura egin, defendatu, ebaluatu, kalifikatu eta administrazioan tramitatzea ere, Ikasketa Amaierako Lanei buruzko Araudian ezarritakoaren arabera eginen da, ikasturte bakoitzeko administrazio egutegian ezarritako epeetan.

2. Titulua lortzeko beharrezkoak diren gainerako irakasgaiak gaindituta dauzkaten ikasleek edo irakasgai horien matrikularekin batera master amaierako lanerako matrikula egiten dutenek izanen dute eskubidea master amaierako lana matrikulatzeko.

3. Master amaierako lanen defentsa publikoa titulua zein ikastegiri atxikita dagoen, haiek zehazten dituzten epeetan egiten ahalko da, eta ebaluazioa sortzen diren aktetan jasoko da.

4. Ikasleek deialdi bakarra erabiltzeko aukera dute ikasturte bakoitzean, master amaierako lana defendatzeko.

ZORTZIGARREN KAPITULUA

Azterketa deialdiak eta ebaluazio prozesuak

32. artikulua. Deialdi kopurua.

1. Edozein irakasgaitan matrikulatzeagatik, master amaierako lana barne, deialdi bakarrera aurkezteko eskubidea izanen du ikasleak, ebaluaziorako, irakasgaia egiten duen ikasturtean.

2. Ikasleek hiru deialditarako eskubidea dute irakasgai bakoitza gainditzeko.

3. Irakasgai baten lehen matrikulan, deialdia ez da agortuko irakasgaian “Ez aurkeztua” kalifikazioa jarri bada.

4. Irakasgai bateko bigarren eta hurrengo matrikuletan, kalifikazioa edozein dela ere, deialdia agortuko da.

33. artikulua. Deialdien izaera.

Irakasgai bakoitzeko lehenbiziko bi deialdiak deialdi arruntak izanen dira, eta hirugarrena berezia.

34. artikulua. Deialdi berezia.

1. Ikasleek zilegi dute hirugarren eta azken deialdiko ebaluazioa epaimahai batekin egiteko eskatzea, administrazio egutegian ezarritako epeetan.

2. Eskabidea egiteko prozedura, epaimahaiaren izendapena eta osaera, eta ebaluazio probei dagokien guztia Nafarroako Unibertsitate Publikoan ebaluazio arloan indarra duten xedapenetan xedatutakoaren arabera arautuko dira.

35. artikulua. Ebaluazioari buruz.

Nafarroako Unibertsitate Publikoan gai horri buruz indarrean dauden xedapenek arautuko dituzte ebaluazio prozesuak.

BEDERATZIGARREN KAPITULUA

Konpentsazioaren bidez gainditzea

36. artikulua. Aplikazio araudia.

Nafarroako Unibertsitate Publikoan ebaluazioari buruz indarrean dauden xedapenek arautuko dute konpentsazioaren bidez gainditzeko sistema.

HAMARGARREN KAPITULUA

Kredituen balioa aitortzea eta transferitzea

37. artikulua. Aplikazio araudia.

Nafarroako Unibertsitate Publikoan gai horri buruz indarrean dauden xedapenek arautuko dute kredituak aitortzeko eta transferitzeko sistema.

HAMAIKAGARREN KAPITULUA

Iraupen araubideari buruz

38. artikulua. Aplikazio araudia.

Errendimenduaren eta iraupenaren arloan, Nafarroako Unibertsitate Publikoko Gizarte Kontseiluak onetsitako indarreko arauak aplikatuko dira, Nafarroako Unibertsitate Publikoko Gizarte Kontseiluari buruzko 2008ko uztailaren 2ko 15/2008 Foru Legearen 7 d) artikuluan ezarritakoaren arabera.

XEDAPEN GEHIGARRIAK

Lehenbizikoa

Araudi honetan jaso ez diren egoerak errektoreak edo berak eskuordetutako errektoreordeak ebatziko ditu. Ebazpen horien alderdirik garrantzizkoenak Unibertsitatearen webgunean argitaratuko dira, dagokion prozedurari buruzko informazioa ematen den atalean.

Bigarrena

Arau hauen aplikazio eremuan ikasleek aurkezten dituzten eskaerak, epea ezarrita ez dutenak, eskaera epea bukatzen denetik gehienez ere 30 egun naturaleko epean ebatziko dira. Nolanahi, administrazioaren isiltasunak eskaera ez onartzea dakar.

Hirugarrena

Espainian araututako lanbide jardueretarako gaitzen duten tituluak direnean, araudi hau aplikatuko da baldin eta bateragarria bada Gobernuak ezarritako baldintzekin, 1393/2007 Errege Dekretuaren 15. artikuluaren 4. apartatuan eta haren ondorengo aldaketetan ezarritako moduan.

Laugarrena

Araudi honen gaztelaniazko bertsioan dauden pertsona bakarreko organoei eta Unibertsitateko komunitateko kideei dagozkien izenen genero maskulinoa femeninoa dela ulertuko da aipatutako organoak edo kideak emakumezkoak direnean.

XEDAPEN INDARGABETZAILEA

Indarrik gabe geratzen dira 2018ko martxoaren 28ko Gobernu Kontseiluaren bilkuran onetsitako Unibertsitateko Masterreko titulu ofizialak eta Nafarroako Unibertsitate Publikoaren ikasketa berekiak arautzen dituzten Arauen testu bateginaren Atariko Titulua, Lehen Titulua eta Bigarren Titulua, bai eta akordio honetan ezarritakoaren kontra doazen xedapenak ere.

AZKEN XEDAPENA

Indarra hartzea

Araudi honek 2020-2021 ikasturtean hartuko du indarra. Aurreko ikasturteetan hasitako unibertsitateko masterreko ikasketei haietarako onarpena eta matrikula egiteko unean indarrean zegoen araudia aplikatuko zaie, salbu eta araudi hau onuragarriagoa zaienean.

Iragarkiaren kodea: F2007327