161. ALDIZKARIA - 2020ko uztailaren 22a

1. NAFARROAKO FORU KOMUNITATEA

1.7. BESTELAKOAK

971/2020 EBAZPENA, 2020ko ekainaren 29koa, Nafarroako Unibertsitate Publikoko errektoreak emana, zeinaren bidez agintzen baita argitaratzeko Gobernu Kontseiluak 2020ko ekainaren 29an onetsitako “Erabakia, Nafarroako Unibertsitate Publikoko ikasketa berekien arauak onesten dituena”.

2003ko maiatzaren 12ko 110/2003 Foru Dekretuak onetsitako Unibertsitateko Estatutuen 40. artikuluak ematen dizkidan eskumenak erabiliz, agintzen dut argitaratzeko Gobernu Kontseiluak 2020ko ekainaren 29an hartutako erabakia, Nafarroako Unibertsitate Publikoko ikasketa berekien arauak onesten dituena.

“GOBERNU KONTSEILUAK HARTUTAKO ERABAKIA,
NAFARROAKO UNIBERTSITATE PUBLIKOKO IKASKETA BEREKIEN ARAUAK ONESTEN DITUENA”

Gobernu Kontseiluak, 2009ko uztailaren 28an egindako bileran, Nafarroako Unibertsitate Publikoko Ikasketa Berekien eta Unibertsitateko Masterreko Titulu Ofizialen arauak onetsi zituen, Gobernu Kontseiluaren zenbait erabakiren bidez aldatu zirenak: 2010eko uztailaren 28koa, 2011ko urriaren 4koa, 2015eko martxoaren 27koa, 2015eko azaroaren 3koa, 2016ko urriaren 13koa, 2017ko uztailaren 4koa eta 2018ko martxoaren 28koa.

Unibertsitate masterrak diseinatu, planifikatu eta garatzeko orduan kontuan hartu beharreko jarraibideak zein diren ezarri zuen 1393/2007 Errege Dekretuak, 2007ko urriaren 29koak, Unibertsitateko Ikasketa Ofizialen Antolamendua ezartzen duenak (861/2010, 43/2015 eta 195/2016 errege dekretuen bidez aldatua).

Ikasketa berekiak ez daude araubide horren mende. Bestalde, egiaztatu da komeni dela unibertsitate masterren araubidea graduko ikasketa ofizialen araubidera egokitzea. Hori dela eta, unibertsitate masterreko ikasketa ofizialei buruzko araudia ikasketa berekiei buruzkotik bereiztea proposatzen da, 2009ko araudia eta haren ondorengo aldaketak indarrik gabe utziz ikasketa horiei dagokienez. Halaber, hobekuntza batzuk egin dira ikasketa berekien prozesu akademikoak eta administratiboak argitzeko eta eraginkorragok izateko.

Hau da, Ikasleen Gaietarako, Enpleguko eta Ekintzailetzako errektoreordeak proposaturik, Nafarroako Unibertsitate Publikoko Gobernu Kontseiluak 2020ko ekainaren 29an egindako bileran hartu duen

ERABAKIA:

Lehena.–Onestea Nafarroako Unibertsitate Publikoko Ikasketa Berekien Arauak, eranskinean jasotzen den bezala.

Bigarrena.–Erabaki honen berri ematea Ikasleen Gaietarako, Enpleguko eta Ekintzailetzako Errektoreordetzari, Irakaskuntzako Errektoreordetzari, fakultate, eskola eta sailetako zuzendaritzei eta dekanotzei, Unibertsitate-Gizarte Fundazioari, Irakaskuntza Zerbitzuari eta Sarbidearen, Beken eta Tituluen Atalari.

Hirugarrena.–Erabaki hau Nafarroako Aldizkari Ofizialean argitaratzeko agindua ematea.

Iruñean, 2020ko ekainaren 29an.–Errektorea, Ramón Gonzalo García.

ERANSKINA

Nafarroako unibertsitate publikoko ikasketa berekien arauak

ZIOEN AZALPENA

Unibertsitateei buruzko 2001eko abenduaren 21eko 6/2001 Lege Organikoaren 1. artikuluan ezartzen denez, bai unibertsitate zabalpenaren bidez ezagutza eta kultura hedatzea eta bai bizitza osoko prestakuntza ematea dira Unibertsitateak gizartearen zerbitzura dituen eginkizunak. Lege beraren 2. eta 34. artikuluetan xedatzen denez, unibertsitateek, beren autonomiaz baliatuta, zilegi dute bizitza osoko prestakuntzarako irakaskuntza espezifikoen ikasketa-planak prestatzea eta onartzea, baita diplomak eta titulu propioak lortzeko irakaskuntzak ezartzea ere. Gizartearen eskari kultural, zientifiko, artistiko edo profesionalei modu arin eta eraginkorrean erantzutera bideratutako irakaskuntza horiek curriculum irakaskuntza ofizialen multzoaren osagarri dira, eta, azken horiekin batera, unibertsitate bakoitzaren irakaskuntza-eskaintza osatzen dute, baita, ondorioz, berezko profila eratzen lagundu ere. Aipatutako legearen 83. artikuluan hori egiteko esparrua ezartzen da, unibertsitateei aukera emanez espezializazio ikasketak edo prestakuntza-jarduera espezifikoak egiteko.

Europako Erkidegoak honela definitu du etengabeko prestakuntza: “Pertsona baten bizitzan zehar egindako ikaskuntza-jarduera oro, ikuspegi pertsonal, zibiko, sozial eta/edo laboralari dagozkion ezagutzak, gaitasunak eta trebeziak hobetzeko edo zabaltzeko helburua duena”. Definizio horrek berretsi egiten du informazioaren eta komunikazioaren gizartean berrikuntzarako eta ekoizpenaren garapenerako elementu estrategikoa dela hezkuntza, hain zuzen giza kapitalaren eta bizi kalitatearen balioa handitzeko duen inplikazio argiagatik.

Unibertsitateek funtsezko eginkizuna dute gobernuek ezarritako hezkuntza-helburuak lortzeko; beraz, beren irakaskuntza-eginkizuna “bizitza osokoa” izateraino zabaltzeko erantzukizuna dute, prestakuntza mota hori akademikoki baliozkoa, profesionalki erabilgarria eta pertsonalki aberasgarria izanen dela bermatuz.

LEHEN TITULUA

Xedapen orokorrak

1. artikulua. Aplikazio eremua.

Araudi honek Nafarroako Unibertsitate Publikoko ikasketa berekiak erregulatzen ditu. Ikasketa horien xedea ikaslearen garapen profesionala, zientifikoa, teknikoa edota artistikoa hobetzea da, baita lanbidean aplikatzeko aukerak ematen dituzten ikerketa-arlo berriak hedatzea edo barneko edo inguru sozialeko eskakizunei erantzuteko jarduerak garatzea ere.

2. artikulua. Nafarroako Unibertsitate Publikoko ikasketa berekiak

1. Nafarroako Unibertsitate Publikoak zilegi du lurralde nazional osoan ofizialak eta baliodunak diren tituluak lortzeko ikasketez bestelako ikasketa berekiak ematea, eta ikasketa-ziurtagiri ofizialak ez diren ziurtagiriak eta titulu berekiak lortzeko balioko dute.

2. Ikasketa Batzordea da organo eskuduna ikasketa berekiei eragiten dieten auzietan. Bere osaera eta eginkizunak Gobernu Kontseiluaren erabakien bidez arautzen dira.

BIGARREN TITULUA

Ikasketa berekien tipologia

3. artikulua. Ikasketa berekien tipologia.

Nafarroako Unibertsitate Publikoko ikasketa berekiak honela sailkatzen dira, beren iraupenaren, helburuen eta sartzeko baldintzen arabera:

a) Masterreko titulu berekiak, espezializazio diplomak, unibertsitateko aditu tituluak, unibertsitate zabalpeneko diplomak eta unibertsitate zabalpeneko egiaztagiria lortzeko aukera ematen dutenak.

b) Titulu bereki bat lortzeko aukera ematen ez duten prestakuntza jarraituaren eta ikasketa berekien beste modalitate batzuk: espezializazio ikastaroak, ikastaroak eta mintegiak.

4. artikulua. Masterreko titulu berekia.

1. Masterreko titulu berekiak maila handiko prestakuntza espezializatua edo diziplina anitzekoa emateko graduondoko ikasketak dira, eta irakaskuntzara edo lanbidera daude bideratuak.

2. Titulu bereki horietan sartzeko, beharrezkoa izanen da unibertsitateko titulu ofizial bat edo titulu baliokide bat izatea, 19. artikuluan ezarritakoa galarazi gabe.

3. Ikasturte batekoak izanen dira gutxienez, eta ikasleek titulua eskuratzeko egin beharko duten kreditu kopurua 60 eta 120 ECTS bitartekoa izanen da; horietatik, %10 gehienez proiektu edo lan bat egiteagatik ematen ahalko dira.

4. Ikastaro horiek gainditzeak masterreko titulu berekia eskuratzeko eskubidea emanen du.

5. artikulua. Espezializazio diplomaren eta unibertsitateko adituaren titulu berekiak

1. Edozein jakintza-adarretan espezializatzeko graduondoko ikasketek honako titulu hauek lortzeko bidea emanen dute:

a) Espezializazio diploma, 30 eta 59 ECTS kreditu bitartekoa.

b) Unibertsitateko aditua, 15 eta 29 ECTS kreditu bitartekoa.

2. Titulu bereki horietan sartzeko, beharrezkoa izanen da unibertsitateko titulu ofizial bat edo titulu baliokide bat izatea, 19. artikuluan ezarritakoa galarazi gabe.

3. Bi kasuetan, proiektu edo lan bat egiteagatik ECTS kredituen %10 emanen da gehienez ere.

6. artikulua. Unibertsitate zabalpeneko diplomaren eta unibertsitate zabalpeneko ziurtagiriaren titulu berekia.

Prestakuntza espezializatua eskuratzera bideratutako titulu bereki hauetan sartzeko, ez da derrigor unibertsitateko profila eduki behar:

a) Unibertsitate zabalpeneko diploma, 30 ECTS kreditukoa gutxienez.

b) Unibertsitate zabalpeneko ziurtagiria, 15 eta 29 ECTS kreditu bitartekoa.

7. artikulua. Prestakuntza jarraituaren eta ikasketa berekien beste modalitate batzuk.

1. Honako ikasketa hauek edozein jakintza-adarretako gai zehatzei buruzko prestakuntza espezifiko gaurkotua ematera daude bideratuak, eta dagozkien bertaratze edo aprobetxamendu ziurtagiriak eskuratzeko bidea emanen dute:

a) Espezializazio ikastaroak, 5 eta 15 ECTS kreditu bitartekoak, aprobetxamendu ziurtagiria lortzeko balioko dutenak.

b) Ikastaroak 1 eta 4 ECTS kreditu bitartekoak, bertaratze ziurtagiria lortzeko balioko dutenak.

c) Mintegiak, 2 ECTS kreditukoak gehienez, aprobetxamendu ziurtagiria lortzeko balioko dutenak.

2. Ikasketa horien memorian ezarriko da unibertsitateko titulu ofizial bat edo titulu baliokide bat edukitzea nahitaezkoa den ikasketetan sartzeko.

3. Ikastaro eta mintegiak salbuetsita egonen dira kanonetik, administrazio tasetatik eta titulua emateko tasetatik.

HIRUGARREN TITULUA

Ikasketa berekien egitura eta edukia

8. artikulua. ECTS kredituak.

1. Prestakuntza-programa europar kreditutan egituratua dago (ECTS). Ikasleak ikasketa-planean aurreikusitako helburuak lortzeko egin beharreko ikasketa-lanaren eduki edo karga osoa neurtzen dute europar kredituek.

2. Nafarroako Unibertsitate Publikoan europar kreditu bat emanen da ikasleak egindako 25 lan-ordurengatik, horien barnean daudela ikasgelako ordu presentzial eta/edo birtualak, teoriakoak eta praktiketakoak, tutoretza- eta ikasketa-orduak, mintegiak, lanak, praktikak edo proiektuak egiteko erabilitako orduak eta ebaluazio probak prestatzeko eta egiteko eskatutakoak.

3. Oro har, irakasgai bati dagozkion lan-ordu guztietatik, horien %30 eta %40 bitarte ikasketa-jardueretako orduak izanen dira.

4. ECTS kreditu sistemaren testuinguruan, tutoretza titulazio berrien prestakuntza-programetan sartutako ikaskuntza-metodo bat da, eta aukera ematen du lan autonomoa ikasle bakoitzari egokitzeko, gainbegiratzeko eta ebaluatzeko. Tutoretzako parte-hartzea programatuta dago, eta ikaslearen ikasketa-laneko orduak balira bezala zenbatuko da.

5. Ikasketak presentzialak, erdipresentzialak edo online modalitatekoak izaten ahalko dira.

9. artikulua. Moduluak eta irakasgaiak.

1. Titulu berekiak lortzera bideratutako ikasketak moduluetan eta irakasgaietan egituratuak egonen dira.

2. Titulu berekiak lortzera bideratutako ikasketen moduluak bereizirik egin daitezke, memoriak hala badio. Modulu bakoitza espezializazio ikastarotzat edo ikastarotzat hartzen ahalko da, iraupenaren arabera.

3. Titulu bereki bat lortzeko ikasketa baten modulu osoen parte bat egiteak dagokion ziurtagiria lortzeko bidea emanen du, betiere memorian hori aipatzen bada.

4. Titulu bereki bateko modulu guztiak bereizirik egiten badira, eman eginen da titulu hori, dagozkion prezio publikoak ordaindu eta gero, eta betiere ikasleak titulu berekia egiteko baldintzak betetzen baditu.

5. Ikasketa berekiek honako hauek izan ditzakete: nahitaezko edo aukerako irakasgaiak, mintegiak, kanpo praktikak, atzerriko egonaldiak, ikasketa amaierako lana eta beste prestakuntza-jarduera batzuk.

6. Titulu berekitzat joko dira graduko edo unibertsitate masterreko titulu ofizial baten, masterreko titulu bereki baten, espezializazio diploma baten edo unibertsitate zabalpeneko diploma baten babesean diseinatutako moduluak, betiere memorian horrela eskaintzen badira.

10. artikulua. Kanpo praktikak.

1. Ikasketa berekiek kanpo praktikak izaten ahal dituzte. Memorian onetsitakoaren arabera zehaztuko da kanpo praktikarik dagoen eta nahitaezkoak diren.

2. Nafarroako Unibertsitate Publikoan gai horri buruz indarrean dauden xedapenek zuzenduko dituzte kanpo praktikak.

11. artikulua. Egonaldiak beste ikastegi batzuetan.

1. Ikasketa berekien barrenean Espainiako edo atzerriko beste unibertsitate batzuetan egonaldiak sar litezke. Egonaldi horiek ikasketak egiteko izanen dira, edo, bestela, ikasketa amaierako lana garatzeko edo enpresetan eta erakundeetan geroago aitortuko diren praktikak egiteko.

2. Halaber, zilegi da memorian tituluarekin lotutako nazioarteko mugikortasun birtualeko programak ere jasotzea. Programa horiei esker, ikasleek aukera izanen dute beren hizkuntza-gaitasuna hobetzen lagunduko dien “urruneko” nazioarteko esperientzia lortzeko.

12. artikulua. Ikasketa amaierako lana.

1. Modularitatea duten ikasketa berekietan, titulua lortzeko beharrezkoak diren gainerako irakasgaiak gaindituta dauzkaten ikasleek edo irakasgai horien matrikularekin batera ikasketa amaierako lanerako matrikula egin dutenek egiten ahal dute ikasketa amaierako lanerako matrikula.

2. Ikasketa amaierako lanaren defentsa ezin izanen da inola ere egin baldin aldez aurretik titulua lortzeko bidea ematen duten gainerako irakasgai guztiak gainditu ez badira.

3. Nafarroako Unibertsitate Publikoko Ikasketa Amaierako Lanen Arautegian ezarritakoak arautuko du ikasketa amaierako lanak egin, defendatu, ebaluatu, kalifikatu eta administrazioan tramitatzeari dagokion guztia.

LAUGARREN TITULUA

Ikasketa berekien onespena, ezarpena, berriztapena eta ezabapena

13. artikulua. Ikasketa berekien antolaketa eta kudeaketa.

1. Nafarroako Unibertsitate Publikoak, modu lehenetsian, Unibertsitate-Gizarte Fundazioari aginduko dio ikasketa berekien antolamendua eta kudeaketa ekonomiko eta administratiboa egiteko. Agindu horren baldintzak urtero ezarriko dira, errektorearen ebazpen baten bidez.

2. Era berean, ikasketa berekien antolamendua eta kudeaketa Nafarroako Unibertsitate Publikoan dagokion administrazio unitateak ere egin ditzake.

3. Halaber, Espainiako edo nazioarteko beste erakunde eta unibertsitateekin lankidetzan ere antolatzen ahalko dira. Kasu horretan, hitzarmenean bertan ezarritakoak arautuko ditu ikasketa horiek.

14. artikulua. Titulu berekiak ezartzeko eta berritzeko proposamena.

1. Sailek, ikastegiek eta errektoreordetzek zilegi dute 30 ECTS edo gutxiago dituzten titulu berekiak ezartzeko eta berritzeko proposamenak egitea.

2. Lotura iraunkorra duten irakasleek, lotura iraunkorrik gabeko arduraldi osoko irakasle doktoreek, sailek, ikastegiek, errektoreordetzek eta ikerketa-taldeek dute zilegi 29 ECTS edo gutxiago dituzten titulu berekiak ezartzeko eta berritzeko proposamenak egitea. Proposamena lotura iraunkorra duten irakasleek edo lotura iraunkorrik gabeko arduraldi osoko irakasle doktoreek egiten badute, beren sailaren aginduzko txosten bat eskatuko zaie.

3. Araudi honetan ezarritako baldintzak bete beharko dira proposamenak aurkezteko, baita dagokion gaian eskumena duen errektoreordetzak urtero ezarritako epeak ere.

15. artikulua. Titulu berekiak lortzera bideratutako ikasketen proposamen berrien edukia eta onespena.

1. Titulu berekiak lortzera bideratutako ikasketa berekiak ezartzeko proposamenek I. eranskineko memorian aipatzen diren edukiak izan beharko dituzte gutxienez, eta II. eranskinean ezarritako prozedurari jarraikiz onetsiko dira.

2. Gobernu Kontseiluari dagokio titulu berekien ezarpena onestea, dagokion gaian eskumena duen errektoreordetzak proposatuta, aldez aurretik Ikasketa Batzordeak aldeko txostena eginda.

16. artikulua. Titulu berekiak lortzera bideratutako ikasketen berriztapena eta ezabapena.

1. Azken bi ikasturteetako batean emandako titulu berekiak berritzen ahalko dira.

2. Horretarako eskaera egiteko, errektoreordetzak, ikastegiak, sailak edo ikerketa-institutuak aldeko txostena eman beharko du, eta titulu berekiaren azken edizioaren txosten ekonomiko batekin batera aurkeztu beharko da.

3. Titulu berekia berritzeko eskaeran izena, programa edo finantzabidea aldatzeko eskatuz gero, memoria berri bat aurkeztu beharko da, eta, bertan, egokitzat jotzen diren aldaketak besterik ez jaso, Ikasketa Batzordeak balioets dezan.

4. Gobernu Kontseiluak onetsiko du titulu berekien berriztapena, dagokion gaian eskumena duen errektoreordetzak proposatuta.

5. Gobernu Kontseiluak, Ikasketa Batzordeak proposatuta, edozein titulu berekiren eskaintza ez berritzea erabaki dezake, justifikaturiko arrazoirik baldin badago. Matrikulatutako ikasleek titulu berekia bukatzeko gelditzen zaizkien kredituak egiteko modua ezar dezake erabakiak.

17. artikulua. Gainerako ikasketa berekien proposamena eta onespena.

1. Lotura iraunkorra duten irakasleek, lotura iraunkorrik gabeko arduraldi osoko irakasle doktoreek, sailek, ikastegiek, errektoreordetzek eta ikerketa-taldeek dute zilegi espezializazio ikastaroak, ikastaroak eta mintegiak ezartzeko eta berritzeko memoriak egitea.

Proposamena lotura iraunkorra duten irakasleek edo lotura iraunkorrik gabeko arduraldi osoko irakasle doktoreek egiten badute, beren sailaren aginduzko txosten bat eskatuko zaie.

2. Dagokion gaian eskumena duen errektoreordetzak espezializazio ikastaroak, ikastaroak eta mintegiak ezartzeko eta berritzeko memoriak aztertu eta onetsiko ditu, eta aldian-aldian Ikasketa Batzordeari jakinaraziko dizkio jaso dituen eskaera guztiak.

BOSGARREN TITULUA

Antolamendua eta irakaskuntza

LEHEN KAPITULUA

Sarbidea, onarpena, matrikula, ECTSen aitorpena
eta ikaslearen estatusa

18. artikulua. Sartzeko argibideak.

Ikasketa berekietako onarpen aldia hasi baino lehen, Unibertsitateak informazio hau argitaratu beharko du:

a) Onarpen eta matrikula prozesuetarako bitartekoak, lekuak, egunak eta ordutegiak.

b) Zer ikaspostu eskaintzen diren, eta ikaspostuak banatzeko betekizunak, halakorik balego.

c) Izangaiak hautatzeko balioespen irizpideak eta onarpenerako betekizun espezifikoak.

d) Prestakuntza-programa, modulu eta irakasgaien arabera zehaztua.

e) Ikasteko behar den arduraldia.

f) Irakaskuntza modalitateak.

g) Zein hizkuntzatan edo hizkuntzetan ematen den titulu berekia edo titulu berekiaren parte jakin batzuk, gaztelaniaz ematen ez direnean.

19. artikulua. Ikasketa berekietarako sarbidea.

1. Ikasketa berekietan sartzeko, Unibertsitatean sartzeko behar diren legezko eskakizunak bete behar dira.

2. Arau hauetako 4. eta 5. artikuluetan azaltzen diren ikasketa berekietan sartzeko, unibertsitateko titulu ofiziala edo baliokidea eduki behar da.

Era berean, Europako Unibertsitate Eremutik kanpoko hezkuntza sistemetako tituludunek izanen dute sartzeko aukera, beren tituluak homologatu beharrik gabe, betiere Unibertsitateak egiaztatuta eta gero titulu horien prestakuntza maila Espainian dagokien unibertsitate tituluaren baliokidea dela eta titulua eman den herrialdean ikasketa baliokideetara sartzeko gaitzen dituztela.

Hala ere, sarbide modu horrek inolaz ere ez du ekarriko interesdunak aurretik duen tituluaren homologazioa, ezta beste ondoriorik ere, Nafarroako Unibertsitate Publikoan ikasketa berekiak egitearena ez bada.

3. Hala ere, Ikasketa Batzordeak, ikasketa berekien Zuzendaritza Akademikoak proposatuta, ikasketetako espezialitatearekin lotura zuzena duten eta Unibertsitatean sartzeko titulaziorik edo unibertsitateko titulaziorik edo baliokiderik ez duten profesionalak onesten ahalko ditu, betiere, agirien bidez egiaztatzen badute profesionaltasun hori eta egin nahi duten ikasketa berekian eskatutako gainerako eskakizun berariazkoak betetzen dituztela.

4. Nafarroako Unibertsitate Publikoan ikasketa ofizialak eta, aldi berean, beren eskaintzan ikasketa ofizial horiekin lotura zuzena daukatela berariaz adierazita daukaten ikasketa berekiak egiten dituzten ikasleei ez zaie unibertsitateko titulu ofizialik eskatuko sartzeko, eta automatikoki emanen zaie 3. apartatuan adierazitako sarbide baimena.

5. Unibertsitateko titulu ofizial baten irakasgaien 12 ECTS kreditu gehienez ere edo Ikasketa Amaierako Lana gelditzen zaizkien ikasleei automatikoki emanen zaie 3. apartatuan adierazitako sarbide baimena.

6. Aipatu gabeko gainerako kasuetan, ikasleek ez badaukate unibertsitateko titulu ofizialik, Ikasketa Batzordeak baimendu beharko du ikasketa horietarako sarbidea.

7. 3., 4., 5. eta 6. apartatuetan ezarritako baimenen arabera titulu bereki bat egiten duten ikasleek ezin izanen dute masterreko titulu berekia, aditu edo espezializazio diploma jaulkitzeko eskatu, harik eta unibertsitateko titulua lortu arte. Ikasleak ikasketa berekiak bukatu eta ondoko lau ikasturteen barruan eskuratu beharko du unibertsitateko titulu ofiziala. Nolanahi ere, bitartean, egindako ikasketen ziurtagiria lortzeko eskubidea izanen dute.

20. artikulua. Onarpena eta matrikula.

1. Nafarroako Unibertsitate Publikoan ikasketa berekiak egin nahi dituztenek ikasketa bakoitzerako ezarritako epean aurkeztuko dute onartuak izateko eskaera.

2. Onartua izateko prozedura ikasketa bereki bakoitzerako ezarritakoa izanen da, memorian ezarritako irizpideekin bat etorriz.

3. Onarpena behin-behinekoa izanen da, eta, behin betikoa bihurtuko da izangai bakoitzak, matrikula egiteko unean, ikasketa berekian sartzeko betekizun espezifikoak eta onarpen irizpideak betetzen dituela frogatzen duenean.

4. Horretarako ezarritako epeetan eginen da matrikula, eta ikasketak egiteko betekizunak betetzen direla egiaztatzen duten agiriak aurkeztu beharko dira.

5. Matrikula gauzatzeko, ikasleak epean eta forman ordaindu beharko ditu matrikula egiten duen ikasturtean indarrean diren ECTSen prezioak eta tasak.

6. Ezarritako epean matrikula gauzatzen ez duten ikasleek matrikula egiteko eskubidea galduko dute, salbu eta ustekabeko kausa larri bat gertatu bada, eta ikasleek behar bezala egiaztatzen badute hori.

7. Istripu aseguru bat kontratatuko da, ikasle guztiak estaliko dituena titulu berekiak lortzera bideratutako ikasketak egiteko aldian, bidaiak eta praktikak barne, halakorik balego. Aseguru horren zenbatekoa matrikularen prezioaren barruan sartuko da.

21. artikulua. Matrikula baliogabetzea eta aldatzea.

1. Bidezkoa izanen da matrikula baliogabetzea ikasturte bakoitzean ezarritako epeetan ordaindu ezean. Ez ordaintzeagatik matrikula baliogabetu dioten ikasleak ordaindu dituen zenbatekoak galduko ditu.

2. Ikasturtea hasi baino 24 ordu lehenago gutxienez matrikula baliogabetzeko eskatzen dutenei matrikulatutako edo onartutako ECTS kontzeptuan ordaindutako zenbatekoak baino ez zaizkie itzuliko. Inolaz ere ez dira itzuliko inskripzio-eskubideengatik ordaindutako zenbatekoak, ezta espedientea irekitzeagatik eta kudeaketa administratiboengatik ordaindutako prezio publikoak ere.

3. Ikasturtea hasi eta gero, matrikula baliogabetzeko eskatzen dutenek ez dute dirua itzultzeko eskubiderik izango, eta matrikularen zenbatekoa osorik ordaindu beharko dute.

4. Ordaindutako zenbateko guztiak itzuliko dira ikastaroa bertan behera uzten bada soilik.

5. Modularitatea duten ikasketa berekietan matrikula aldatzen ahalko da ikasleek aukera izan dezaten maila baxuagoko ikasketaren matrikula baliogabetu eta ikasturte berean maila altuagoa duen ikasketan matrikulatzeko.

6. Unibertsitateko graduko edo masterreko ikasketa ofizialen babesean sortutako ikasketa berekien kasuan, matrikula baliogabetzeko eta aldatzeko araubidea kasuan kasuko unibertsitateko gradu edo masterrerako ezarritako bera izanen da.

Aurrekoa gorabehera, Ikasketa Batzordeak baimena ematen ahalko du aurreko apartatuetan matrikula baliogabetzeari edo aldatzeari buruz xedatutakoa aplikatzeko, hala eskatzen bada eta behar bezala justifikatzen bada beste ikasketa ofizial bati lotutako ikasketa berekia onartzeko edo berritzeko memorian.

22. artikulua. Ebaluazioa, deialdi kopurua eta kalifikazioak.

1. Edozein ikasketa berekitako matrikularen barnean deialdi bakar bat izanen du ikasleak ebaluaziorako, matrikula egin den ikasturtean, jakina. Matrikulak eskubidea ematen die ikasleei ikasketetan zehar eskuratutako ikasketen eta gaitasunen emaitzak ebaluatu diezazkieten. Ebaluazio horrek azken kalifikazio bat sortuko du, ikasketa espedientean agertuko dena.

2. Modulu eta ikasturte bakoitzerako errekuperazioko ebaluazio proba bat eginen da irakastaldiaren barrenean.

3. Ikasketa berekia berriz ere ematen bada, matrikulatutako kreditu guztiak edo batzuk gainditu ez dituen ikasleak eskubidea izanen du hurrengo bi edizioetan ikasketa amaitzeko, eta, horretarako aurretik gainditu edo matrikulatu ez dituen ECTS kredituak matrikulatu. Matrikulatu ezean, bere espedientea itxiko da eta titulurako eskubidea galduko du.

4. Ikasketa berekietarako indarrean den Nafarroako Unibertsitate Publikoko Ebaluazio Prozesuak Arautzen dituen Araudian ezarritako kalifikazio sistema erabiliko da. Espezializazio ikastaroetarako Gai/Ez gai sistema erabiliko da. Ikastaroetarako eta mintegietarako ez da kalifikazio sistemarik ezarri.

23. artikulua. ECTSen aitorpena.

1. Zuzendari akademikoak zilegi du ECTSak aitortzea titulu bereki batean. Nafarroako Unibertsitate Publikoan gai horri buruz indarrean dauden xedapenek arautuko dute aitorpen hori. Horretarako, behar den dokumentazioa eskatuko zaio kredituak aitortu nahi dituen eskatzaileari.

Ondorio ekonomikoei dagokienez, ez da matrikularen prezioa murriztuko aitortutako ECTSengatik.

Salbuespen gisa, Ikasketa Bulegoak zilegi du ikasketa bereki batean ECTSak aitortzea artikulu honetan ezarritako moduari jarraitu gabe, egoerak hala eskatzen duenean.

2. Modularitatea duten ikasketa berekietako ECTSak aitortzen ahalko dira baldin eta ikaslea maila altuagoko ikasketa batean matrikulatzen bada, betiere ikasketa horrek ikasleak aurreko ikasturteren batean egin duen maila baxuagoko ikasketa bat barne hartzen badu.

Ikasleak ordaindu beharko ditu egiten ez dituen ECTSen prezioak eta tasak, matrikula egiten duen ikasturtean indarrean direnak.

BIGARREN KAPITULUA

Ikasketa berekien zuzendaritza, irakaskuntza eta kudeaketa

24. artikulua. Zuzendaritza Akademikoa.

1. Nafarroako Unibertsitate Publikoarekin lotura iraunkorra duen irakasle doktore baten esku egonen da ikasketa berekien Zuzendaritza Akademikoa. Salbuespen gisa, ikasketa berekien gaietan eskumena duen errektoreordetzak aukera izanen du lotura iraunkorrik gabeko arduraldi osoko irakasle doktore bat Zuzendaritza Akademikoaren arduradun izendatzeko.

2. Zuzendaritza Akademikoak koordinatzaile bat izendatzen ahalko du Nafarroako Unibertsitate Publikoarekin lotura iraunkorra duten irakasle doktoreen edo lotura iraunkorrik gabeko arduraldi osoko irakasle doktoreen artean. Kanpoko erakunde batekin lankidetza dagoenean, koordinatzailea Nafarroako Unibertsitate Publikotik kanpoko profesional bat izan daiteke.

3. Zuzendariak eta/edo koordinatzaileak jasoko duten ordainsaria finkatzeko datu hauek hartuko dira kontuan: zein eginkizun dituzten eta eginkizun horiek egiteko zenbat ordu lan egin behar duten.

Nafarroako Unibertsitate Publikoko errektorearen ebazpen batez bidez, Ikasketa Batzordeari entzun eta gero, urtero ezarriko da lan ordu bakoitzeko zenbat diru jasoko duten gehienez ere, eta dagokion nominan ordainduko da.

4. Hauek dira Zuzendaritza Akademikoaren eginkizunak:

a) Ikasturte bakoitzean behar den informazio eguneratua prestatzea titulu berekiaren publizitatea eta ikasleen matrikulazioa errazteko.

b) Titulu berekira sartzeko betekizunak eta onartuak izateko irizpideak proposatzea.

c) Titulu berekian inskribatutako pertsonen onarpena proposatzea.

d) Kredituen aitorpenak eta transferentziak ezartzea.

e) Titulu berekiaren garapenaren jarraipena egitea, kalitate prozesuen emaitzak jasoz eta aztertuz, bereziki eraginkortasunik ezak eta disfuntzioak detektatuz gero. Azken balorazioa eta hobetzeko proposamenak egitea.

f) Programa ikasketa egutegiari lotu dakion zaintzea, kronograma zehaztuz eta ikasturtean zehar doituz beharrezkoa izanez gero, ikasketa amaierako lanen defentsak eta, kasua bada, kanpoko praktikak egitea barne.

g) Titulu berekiko irakasleak proposatzea, 25. artikuluan jasotako jarraibideei segituz eta bateraezintasunen araubidea kontuan hartuta.

25. artikulua. Ikasketa berekietako irakasleak.

1. Ikasketa berekietako irakasleak Nafarroako Unibertsitate Publikoko eta beste unibertsitate batzuetako irakasleak izanen dira, lehentasunez doktoreak. Irakastorduen %30 gutxienez Nafarroako Unibertsitate Publikoko irakasleek edo AZLek emanen dituzte, edo haien parekoek. Irakastorduen %10 gutxienez Nafarroako Unibertsitate Publikoarekin lotura iraunkorra duten irakasleek emanen dituzte. Azken betekizun hori ez da aplikatuko Zuzendaritza Akademikoak hala eskatzen badu, justifikatutako arrazoiengatik.

2. Aurreko atalean ezarritakoa ez zaie aplikatuko 5 ECTS baino gutxiago dituzten eta kanpoko profesional adituak behar dituzten ikastaroei.

3. Gehienez ere 100 irakastordu emanen dituzte Nafarroako Unibertsitate Publikoko irakasleek ikasketa berekietan ikasturte bakoitzeko.

4. Alabaina, eta ikasketa berekiaren izaeraren arabera, irakaskuntzan parte hartzen ahalko dute Unibertsitatekoak ez diren beste hainbat ikertzailek edo profesional adituk, herrialdekoak edo atzerritarrak, hitzaldiak edo/eta mintegiak emanez, 3. artikuluan ezarri diren ikasketa berekien mota bakoitzean.

Unibertsitatetik kanpokoak izanik ere, gai batean adituak diren profesionalek lankidetza izan dezakete unibertsitatearekin, eta Unibertsitatearekiko harreman administratiboa izanen da, kontratu publikoei buruzko foru araudiarekin bat etorriz, baina horrek ez du ekarriko lan-loturarik Unibertsitatearekin.

5. Ikasketa berekietan parte hartzen duten irakasleek bateraezintasunei buruzko arautegia bete behar dute.

6. Nafarroako Unibertsitate Publikoko errektorearen ebazpen batez bidez, Ikasketa Batzordeari entzun eta gero, urtero ezarriko da zenbat diru jasoko duten gehienez ere Unibertsitateko irakasleek irakastordu bakoitzeko eta beste lan batzuengatik (tutoretzak, azterketak...). Ikasketa berekietan parte hartzeagatik jaso beharreko ordain-saria nominaren bidez ordainduko da.

7. Ikasketa berekiak antolatzea eta kudeatzea Unibertsitate Gizarte Fundazioari dagokionean, ikasketak emateko beharrezkoa den kudeaketa ekonomiko-administratibo guztia eta langile-kudeaketa guztia bere gain hartuko ditu Fundazioak, baita laguntza emanen duten kanpoko profesionalak atzematea ere, irakaskuntza zuzendaritzarekin lankidetzan.

Unibertsitateak ikasketa berekian parte hartzeko baimena duen unibertsitateko langileen zerrenda emanen dio Unibertsitate Gizarte Fundazioari, ordainsariak Unibertsitateak berak ordainduko ditu nominaren bidez, betiere egin behar den likidazio ekonomikoa eginez.

26. artikulua. Ikasketa berekien kalitatearen jarraipena eta ebaluazioa.

1. Nafarroako Unibertsitate Publikoak berak izanen du ematen dituen ikasketen babes akademikoa, kontrola eta jarraipena egiteko lana, eta hori Ikasketa Batzordearen bidez eginen du, nahiz zuzenean, nahiz beste hainbat erakunderekin elkarlanean.

2. Kalitatearen jarraipena eta ebaluazioa helburu akademikoak nola bete diren aztertzen duten prozesuen bidez eginen da urtero. Horretarako, gutxienez hauek hartuko dira aintzat: ikasleek jasotako prestakuntzaz duten iritzia, eta parte hartzen duten irakasleen eta ikasketa berekien Zuzendaritza Akademikoarena.

3. Ebaluazio negatiboa izanez gero, proposamenak aurkeztea eskatuko da, hurrengo ikasturtean horri berehala konponbidea emateko. Konponbidea emateko proposamenik ez bada, edo horiek eskasak direla uste bada, Ikasketa Batzordeak Gobernu Kontseiluari emanen dio horren berri, hala behar izanez gero, ikasketa berekiarekin jarraitzeko baimena ez ematea erabaki dezan.

27. artikulua. Finantzaketa.

1. Ikasketa berekiek autofinantzatu egin behar dute, eta Memoria Ekonomikoan diru-sarrerek eta gastuek orekatuta egon behar dute. Hauek izan daitezke diru-sarrerak:

a) Prezio publikoen eskubide ekonomikoak. Matrikularen prezio publikoak ezarriko dira Gizarte Kontseiluak ezarritako gehienezko prezioaren arabera eta kostuen irizpideei eta eskariaren eta eskumenaren gaineko eskakizunei erreparatuz, bai eta beste diru-sarrera batzuen eraginaren arabera ere.

b) Erakunde publiko nahiz pribatuen dirulaguntzak edo ekarpenak.

2. Beste erakunde batzuekin ikasketa berekiak egitea adosten denean, hitzarmen baten bidez jaso behar dira bi aldeen kontraprestazio ekonomikoak.

3. Salbuespen gisa, ikasketen garrantzia edo interes estrategikoa dela eta, Unibertsitateak zilegi du, errektoreorde eskudunaren bidez, finantzabidearen parte bat bere gain hartzea, Unibertsitatearen diru-sarreren aurrekontu orokorraren kargura.

4. Zilegi da beketara zuzendutako gastuen partida bat ikasketa bereki bakoitzaren aurrekontuan sartzea, eta ikasketa berekiaren bideragarritasuna bermatuko da beti. Bekak esleitzeko baldintzak onetsitako Memorian jasoko dira.

5. Ikasketa bereki bat Memoria Ekonomikoan ezarritako gutxieneko matrikula kopurura iristen ez bada edo finantza-orekarekin bideragarritasun ekonomikoa bermatzeko beharrezkoak diren dirulaguntzak lortzen ez baditu, zuzendari akademikoak, ikasketa berekia hasi baino lehen, ikasketa berekien arloko errektoreorde eskudunari eskatuko dio aurreikusitako gastuak jaistea, benetako diru-sarreretara egokitzeko edo bertan behera uztea.

6. Ikasketa berekia amaitu ondoren, haren txosten ekonomikoa aurkeztu beharko da.

28. artikulua. Irakaskuntza, administrazio eta antolaketa kudeaketa.

1. Ikasketa berekien arloko errektoreorde eskudunari dagokio irakaskuntza mailako ebazpenak ematea, eta haien aurka gorako errekurtsoa jartzen ahalko da errektorearen aurrean.

2. Onartzeko eta matrikula egiteko prozedurak, bai eta administrazioa eta antolamendua tramitatu eta kudeatzeko beste edozein gai ere, kasu bakoitzaren arabera, Nafarroako Unibertsitate Publikoko edo Unibertsitate Gizarte Fundazioko administrazio zerbitzuek kudeatuko dituzte.

3. Unibertsitate Gizarte Fundazioari eskatzen zaionean ikasketa berekien kudeaketa bere gain hartzea, Fundazioak eginkizun hauek beteko ditu:

a) Unibertsitateko sail, ikastegi, ikerketa institutu eta beste organo batzuekin batera sustatzea eta lankidetzan jardutea ikasketa berekietako ikasketak eta jarduerak sortzen eta garatzen, eta haien zabalpena eta sustapena egitea bere ingurune sozioekonomikoan.

b) Dagoen gizarte eskaera aztertzea, eta prestakuntza behar horiek unibertsitateko komunitateari jakinaraztea, erantzun arin eta malgu bat antolatzeko eta sustatzeko, eta kalitateko prestakuntza eskaintza bat bermatzea, antzeman diren beharren araberakoa.

c) Agindu zaizkion ikasketa berekien antolamendua, administrazio-kudeaketa eta kudeaketa ekonomikoa gauzatzea. Titulu berekiaren kudeaketa ekonomiko eta aurrekontu kudeaketarekin zerikusia duten ekintza guztiak eginen ditu, ikasketa berekian lankidetzan arituko diren Unibertsitatetik kanpoko aditu profesionalen kontratazioa, laguntzeko langileen kontratazioa, ikasketen eta prestakuntza jardueren jarraipenak, baita haiei laguntza administratiboa ematea ere, eta oro har mandatua aurrera eramateko beharrezkoak diren guztiak. Hori guztia ikasketa berekiaren Zuzendaritza Akademikoarekin lankidetzan.

d) Ikasketa berekien arloko errektoreorde eskudunari informazioa eta aholkuak ematea arau indardunen betearazpenari buruz.

e) Unibertsitateak nazioko prestakuntza iraunkorreko sare nagusiekin lotuta jarrai dezala bermatzea, esperientzia berritzaileen trukea eta ikaskuntza ahalbidetzeko.

f) Ekimen ekintzaileak sustatzea eta laguntzea, prestakuntza iraunkorra aztertzeko, garatzeko eta hobetzeko.

29. artikulua. Tituluak eta ziurtagiriak.

1. Interesdunek eskaturik eta dagozkien prezioak aldez aurretik ordainduta, Unibertsitateak dagokion titulu edo ziurtagiria jaulkiko du. Tituluak edo ziurtagiriak ikasketa berekietarako Unibertsitateak duen Erregistroan jasota egonen dira. Halaber, titulua jaulkitzeko unean, kalifikazioen ziurtagiria ere emanen da.

2. Legeria indardunarekin bat etorriz, Gobernu Kontseiluak, Ikasketa Batzordeak eskatuta, zilegi du masterreko titulu berekiak eta espezializazio diplomen inskripzioa egitea Unibertsitate, Ikastegi eta Tituluen Erregistroan, bai jendaurreko informazioari begira, bai egon daitezkeen aitorpen akademikoei begira.

3. Unibertsitatean gordeko dira ikasketa bereki bakoitzaren datuak, behin betiko matrikulaturiko ikasleen zerrenda, asistentziaren azken akta, eta, halakorik denean, ebaluazio akta.

4. Modularitatea duten ikasketa berekietan, ikasleak egin eta gainditu duen maila altueneko ikasketaren titulua edo ziurtagiria lortzen ahalko du, ez besterik.

30. artikulua. Ikasketa berekien urteko eskaintzari buruzko xedapenak.

Nafarroako Unibertsitate Publikoko errektorearen ebazpen baten bidez, Ikasketa Batzordeak proposatuta, aurreko ikasturtearen hasieran onetsiko da urtero ikasketa berekien urteko eskaintzari buruzko xedapena. Xedapen horrek informazio hau jasoko du gutxienez ere: ikasketa berekien proposamenak egiteko egutegia, matrikularen prezio publikoa ordaintzeko modua, irakaskuntza emateagatik jasoko den ordainsaria, irakaskuntza zuzendaritzaren eta, hala badagokio, koordinazio eginkizunen ordainsaria, eta beste jarduera batzuek sortutakoak, hala nola, tutoretzak, proiektuak eta azterketak.

XEDAPEN GEHIGARRI BAKARRA

Irakaskuntza berekien arloko errektoreorde eskudunari ahalmena ematen zaio bertan jasotzen ez diren gaiak ebazteko, bai eta araudi honetan xedatutakoa betetzeko beharrezkoak diren jarraibide guztiak emateko ere.

XEDAPEN INDARGABETZAILEA

1. Indargabetuta geratzen da Nafarroako Unibertsitate Publikoaren unibertsitate masterreko titulu ofizialak eta ikasketa berekiak arautzen dituen Arautegiaren (Gobernu Kontseiluaren 2018ko martxoaren 28ko bileran onetsitako testu bategina) hirugarren titulua: Nafarroako Unibertsitate Publikoaren ikasketa berekiak.

2. Indarrik gabe geldituko dira arautegi honetan xedatutakoaren kontraesanekoak edo kontrakoak diren lerrun bereko edo txikiagoko arau guztiak.

AZKEN XEDAPENA

Indarra hartzea

Arautegi honek Nafarroako Aldizkari Ofizialean argitaratu eta biharamunean hartuko du indarra.

I. ERANSKINA

Titulu bereki berriak ezartzeko memoriek nahitaez izan behar
dituzten edukiak

a) Proposamenaren egilea.

b) Ikasketekin eskuratzen den titulu berekiaren izena, sailkapena “Ikasketa berekien tipologiak” artikuluan eta hurrengoetan ezarritakoaren arabera, eta, halakorik bada, baita titulu bereki baten modulu oso bat edo batzuk egiteko bidea ematen duten ziurtagiriena ere.

c) Titulu berekiaren justifikazio arrazoitua, tituluak ekonomian eta gizartean duen beharrari, egokitasunari eta bideragarritasunari buruz.

d) Programak ikasleari eman dakizkiokeen prestakuntza profila, abileziak eta irakaskuntzarako eta lanbiderako gaitasunak.

e) Irakaskuntzen hedapena ECTS kredituetan.

f) Programa, zeinetan ECTS kredituen kopuru osoa, titulua eskuratzeko gehieneko denbora, ikastaroaren helburuak eta ikasketa programari aurreikusten zaion iraupena adieraziko baitira. Behar denean, titulu berekia eskuratzeko modu berezian egin daitezkeen moduluen zerrenda. Halaber, moduluen, jakintzagaien eta irakasgaien zerrenda bat edukiko du, honako hauek adierazita: kredituen izena, edukiak eta iraupena, teorikoak edo praktikoak diren, eta ikasleak titulua lortzeko eskuratu beharreko gaitasun orokorrak edo zeharkakoak, baita gaitasun espezifikoak ere.

g) Ikaskuntza ebaluatzeko irizpideak, bai eta kalifikazioak berrikusteko eta erreklamatzeko prozedura ere. Gainera, titulua lortzeko nahitaez joan beharreko eskola orduen ehunekoa adieraziko da. Baldintza hori betetzen ez bada, Zuzendaritza Akademikoak aztertu eta ebatziko du.

h) Zuzendaritza Akademikoa eta, beharrezkoa denean, koordinatzailea.

i) Modulu bakoitzeko arduradunen zerrenda. Erantzukizun hori Nafarroako Unibertsitate Publikoko irakasleek hartuko dute nahitaez.

j) Parte hartzen duten irakasleen izen-zerrenda, haien irakaskuntza- edo lanbide-egoera eta ikastaroan emanen duten ordu kopurua zehaztuz. Unibertsitateko irakaslea ez bada, curriculum vitaea aurkeztuz justifikatuko da parte-hartzea.

k) Ikasleen gutxieneko eta gehieneko kopuruak ikasketak ezartzeko, irakasteko baliabideen eta baliabide materialen arabera, Unibertsitateak, hala dagokionean, ezarriko dituen irizpideen arabera. Irakaskuntzarako eskakizunak, bai eta salbuespenak, matrikula-epea eta onarpena ere, behar balitz. Atal honetan, ikasleak hautatzeko prozedura ere adieraziko da, eskaera kopurua ikaspostu kopurua baino handiagoa bada, baita bekak edo ikasteko laguntzak dauden ere.

l) Egutegia eta gauzatzeko tokia.

m) Titulua irakasteko behar diren azpiegiturak, bai eta giza baliabideak eta baliabide materialak ere.

n) Memoria ekonomikoa, zeinak aurreikusitako diru-sarreren eta gastuen azalpen zehatza jasoko baitu. Diru-sarrera eta gastu horien bidez autofinantzatuko da ikastaroa.

Gutxienez ere kontzeptu hauek jasoko ditu memoria ekonomikoak:

–Diru-sarreren aurrekontua, zeinean atal hauek jasoko baitira:

a. Matrikulen prezio publikoak.

b. Erakunde publiko eta pribatuek emandako dirulaguntzak.

c. Beste diru-sarrera batzuk.

–Gastuen aurrekontua, zeinean atal hauek jaso behar baitira:

a. Unibertsitatearen gastu orokorrak, gehienez ere diru-sarrera guztien %10eko balioa izanen dutenak.

b. Zuzendari akademikoari eta/edo koordinatzaileari ordaintzera bideratutako zenbatekoa.

c. Irakasleen ordainsariak. Nafarroako Unibertsitate Publikoko irakasleen, beste unibertsitate batzuetako irakasleen eta kanpoko irakasleak bereiziko dira.

d. Joan-etorrien gastuak eta irakasleen dietak.

e. Material didaktikoaren kostua.

f. Publizitate eta marketin gastuak.

g. Administrazio eta idazkaritza gastuak.

h. Ikasleen aseguruak.

i. Material inbentariagarria.

j. Ikastaro bakoitzeko emanen diren beken kopurua eta zenbatekoa.

k. Beharrezkoak diren bestelako gastu batzuk.

–Beste informazio batzuk.

Proposamena bideragarria izateko eta autofinantzatzeko beharrezkoa den gutxieneko ikasle-kopurua.

o) Izaera: sailen artekoa, fakultateen artekoa, unibertsitateen artekoa –estatuko edo nazioarteko unibertsitateak–. Halakorik bada, titulu edo ikasketa berekia egiteko beste erakunde publiko zein pribatuekin egindako hitzarmena erantsi.

p) Proposatutako programaren kalitatea ziurtatzeko egokitzat ematen diren iritzi guztiak, eta horien artean, nahi bada, autoebaluazioa egiteko proposamen bat.

q) Eguna eta proposamena egin dutenen sinadura.

II. ERANSKINA

Titulu berekiak lortzera bideratutako ikasketak ezartzeko eta berritzeko proposamenak izapidetzea

1. Titulu berekiak lortzera bideratutako ikasketa berekien proposamenak ikasketa berekien arloko errektoreorde eskudunaren ebazpenaren bidez urtero ezartzen diren epeen barruan aurkeztuko dira. Ebazpen horretan, epez kanpo proposamen berriak aurkezteko aukera jaso beharko da, epez kanpo aurkeztea justifikatzen duten arrazoiak daudenean.

2. Titulu bereki berri bat ezarri behar denean, proposamenarekin batera I. eranskinean adierazitako edukiak jasotzen dituen memoria bat aurkeztuko da, eta errektoreorde eskudunak ezartzen duen ereduari jarraituko zaio. Errektoreordeak memoria aztertuko du, Unibertsitate Gizarte Fundazioak edo dagokion administrazio-unitateak aztertu ondoren. Balorazioa egin ondoren, Nafarroako Unibertsitate Publikoko Ikasketa Batzordeari igorriko zaio.

3. Azken bi ikasturteetako batean emandako titulu bereki bat berritu behar denean, ez da beharrezkoa izanen memoria aurkeztea. Proposamenarekin batera, titulu berekiaren azken edizioaren txosten ekonomikoa aurkeztuko da.

Berritzeko eskaeran aldaketak sartzen badira titulu berekiaren izendapenean, ikasketa-programan edo finantzaketan, proposamen bat aurkeztu beharko da, zeinak, azken edizioko txosten ekonomikoaz gain, onartutako azken memoria ere jasoko baitu, proposatzen diren aldaketak zehaztuta.

4. Ikasketa Batzordeak proposamen bakoitzaren berri emanen du. Txostena kontrakoa bada, edo aldekoa izanda ere baldintza jakin batzuk betetzera behartzen badu, erabaki hori arrazoitu egin beharko du, eta proposamena egin duenari zehaztutako epean zuzentzeko eskatuko dio.

5. Ikasketa Batzordearen txostena ikusirik, errektoreorde eskudunak titulu berekien eskaintza onartzeko proposatuko dio Gobernu Kontseiluari.

Titulu berekiak lortzera bideratuta ez dauden ikasketak ezartzeko eta berritzeko proposamenak izapidetzea.

1. Titulu berekiak lortzera bideratuta ez dauden ikasketa berekien proposamenak (espezializazio ikastaroak, ikastaroak, mintegiak) ikasturtean zehar aurkeztuko dira.

2. Espezializazio ikastaro, ikastaro edo mintegi berri bat ezarri behar denean, proposamenarekin batera memoria bat aurkeztuko da, errektoreorde eskudunak urtero onartzen duen ereduan adierazitako edukiekin.

3. Azken bi ikasturteetako batean emandako espezializazio ikastaro, ikastaro edo mintegi bat berritu behar denean, ez da beharrezkoa izanen memoria aurkeztea. Proposamenarekin batera, haren azken edizioaren txosten ekonomikoa aurkeztuko da.

Berritzeko eskaeran aldaketak sartzen badira izendapenean, ikasketa-programan edo finantzaketan, proposamen bat aurkeztu beharko da, zeinak, azken edizioko txosten ekonomikoaz gain, onartutako azken memoria ere jasoko baitu, proposatzen diren aldaketak zehaztuta.

4. Errektoreordetza eskudunak proposamena aztertu eta, hala badagokio, onetsiko du, eta aldian-aldian aurkeztutako proposamenen berri emanen dio Ikasketa Batzordeari.

Iragarkiaren kodea: F2007328