Iragarkia

142. ALDIZKARIA - 2020ko ekainaren 29a

1. NAFARROAKO FORU KOMUNITATEA

1.7. BESTELAKOAK

161/2020 EBAZPENA, maiatzaren 27koa, Hezkuntzako zuzendari nagusiak emana, erabakitzen duena SKOLAE programaren irismena eta baldintzak ordeztea, eta onesten duena SKOLAE programa orokortzeko fasea, 2020-2021 ikasturtekoa. SKOLAE programa Hezkuntzako kontseilariaren abuztuaren 10eko 418/2018 Ebazpenaren bidez onetsi zen.

SKOLAE programak Nafarroako hezkuntza-sistemari beharrezko baliabideak ematea proposatu du, ikastetxeak hezkidetzako ikastetxe bihurtzeko.

Estatuan eta Foru Komunitatean, aholku eta betekizunak biltzen dituzten arau, plan eta bestelako elementu estrategiko ugarik premiatzen dituzte Hezkuntza Departamentua, ikastetxeak eta, oro har, hezkuntza-komunitatea modu aktiboan lan egitera hezkidetzako ikastetxe eredu bat lortzeko.

–Abenduaren 28ko 1/2004 Lege Organikoa, genero indarkeriaren aurka babes integrala emateko neurriei buruzkoa.

–Maiatzaren 3ko 2 2/2006 Lege Organikoa, Hezkuntzari buruzkoa.

–3/2007 Lege Organikoa, martxoaren 22koa, emakumeen eta gizonen berdintasun eragingarriari buruzkoa.

–14/2015 Foru Legea, apirilaren 10ekoa, emakumeen kontrako indarkeriari aurre egitekoa.

–103/2016 Foru Dekretua, azaroaren 16koa, zeinaren bidez ezartzen baita sexu- eta ugalketa-osasunaren arloko prestazio sanitarioen antolamendua.

–8/2017 Foru Legea, ekainaren 19koa, LGTBI+ pertsonen berdintasun sozialari buruzkoa.

–7/2019 Foru Legea, apirilaren 4koa, emakumeen eta gizonen arteko berdintasunari buruzkoa.

SKOLAE programaren orokortzea 418/2018 Ebazpenaren bidez onetsi zen. Geroago, 457/2019 Ebazpenaren bidez, SKOLAE programaren irismena eta baldintzak ordeztea onetsi zen.

2017-2018 ikasturtean SKOLAE programaren pilotajea egin zen, prestakuntza eta jarraipen plan bat abian jarriz 16 ikastetxetako irakasle taldeentzat; Nafarroako hezkuntza sistemaren etapa guztiak zeuden ordezkatuta.

Pilotaje prozesu horretan identifikatutako aldaketak eta hobekuntzak sartu ondoren, hiru urteko aldia aurreikusi zen SKOLAE programa orokortzeko. Orokortzeko proposamen horrek funts publikoekin eutsitako Nafarroako ikastetxe guztiak inplikatzen zituen, eta orokortze mailakatua planteatzen zuen, ikastetxeei horretarako beharrezko prestakuntza, jarraipena eta laguntza bermatu ahal izateko.

418/2018 Ebazpenak eta 457/2019 Ebazpenak ezarri zuten, hurrenez hurren, SKOLAE programa ezartzeko esparrua eta 2018-2019 eta 2019-2020 ikasturteetan sartu behar ziren ikastetxeen zerrenda.

Hiru ikasturte horietan, 2017tik 2020ra bitartean, prestakuntza egin duten irakasleek SKOLAE programa egiaztatu dute, baliabideak eskuratzeko eta hezkidetzaren ikuspegia ikasgelaren kudeaketan, programazioetan eta ikastetxearen kudeaketan txertatzeko.

Orain arte etapa eta titulartasun desberdinetako 193 ikastetxek parte hartu dute (16, 93 eta 84, ikasturte bakoitzeko). 450, 1.257 et 1.926 irakaslek, hurrenez hurren, gainditu dute edo bukatzen ari dira prestakuntza prozesua. Hori horrela, berresten da planteamenduak bide ematen duela eraldaketa prozesu hau hasi eta sakontzeko, ikasleek gara dezaten berdintasunean bizitzen ikasteko gaitasuna.

Aldi berean, 174 ikastetxetan talde bultzatzaileak berariaz osatu dira diagnostikoa egiteko eta ikastetxeko hezkidetza-kudeaketa ezarriko duen Identitate Hezkidearen Plana egiteko.

Prozesuaren ebaluazioari dagokionez, eta hezkidetzaren ikuspegiko ikastetxeetan autonomia eta finkapena kontuan hartuta, orain proposatzen da ikastetxe-kopuru bat sartzea, orain arte sartu diren eta sartu berri diren ikastetxe guztien artean laguntza, jarraipen, ebaluazio eta esperientzia-trukerako egiturari eusteko.

Horregatik, hurrengo ikasturtean Haur eta Lehen Hezkuntzako ikastetxeak sartzea proposatzen da. Ikastetxe guztiek (bai sartu berri direnek, bai aurreko ikasturteetan sartutakoek) SKOLAE programa garatuko dute 2020-2021 ikasturtean, I. eranskinean jasotako modu eta baldintzetan. II. eta III. eranskinetan, berriz, sartuta daude, hurrenez hurren, sartuko diren ikastetxe berriak eta ikasturte honetan prestakuntza eta hezkidetza-kudeaketa osatu eta sakondu beharko duten ikastetxeak.

Horrenbestez, Hezkuntza Departamentuaren egitura organikoa ezartzen duen urriaren 30eko 267/2019 Foru Dekretuak ematen dizkidan ahalmenak erabiliz,

EBAZTEN DUT:

1. Onestea SKOLAE programaren irismena eta baldintzak ordeztea 2020-2021 ikasturterako, I. eranskinean azaltzen denaren arabera, eta aldaketa hori bermatzeko behar diren jarduketak abian jartzea.

2. SKOLAE programan 2020-2021 ikasturtean parte hartzen hasteko aukeratu diren ikastetxeen zerrenda onestea. II. eranskinean dago.

3. Onestea III. eranskineko zerrenda, biltzen dituena 2017-2018, 2018-2019 eta 2019-2020 ikasturteetan sartu eta ikasturte honetan honako hau osatu beharko duten ikastetxeak, oraindik ez badute egin: irakasle guztien prestakuntza, ikasle guztientzako irakaskuntza-ikaskuntza proposamenak eta ikastetxearen Identitate Hezkidearen Plana.

4. Ebazpen hau eta eranskinak Nafarroako Aldizkari Ofizialean argitaratzea, orok jakin dezan.

5. Ebazpen hau igortzea Hezkuntza Zuzendaritza Nagusira, Inklusio, Berdintasun eta Bizikidetza Zerbitzura, Hezkuntzako Ikuskapen Zerbitzura eta ebazpen honen II. eta III. eranskinetan ageri diren ikastetxeetara. Ebazpenak ez du administrazio bidea amaitzen, eta haren kontra gora jotzeko errekurtsoa aurkezten ahalko da, Hezkuntzako kontseilariari zuzendua, ebazpena jakinarazten denetik hilabeteko epean.

Iruñean, 2020ko maiatzaren 27n.–Hezkuntzako zuzendari nagusia, Gil Sevillano González.

I. ERANSKINA

SKOLAE programa

1. Sarrera.

2. Ikaskuntzaren helburuak.

3. Parte hartzea.

4. Konpromisoak.

5. Prestakuntza plana

6. Ikastetxeetan hezkidetza txertatzea.

7. Nahitaezkotasunaren baldintzak.

1.–Sarrera.

SKOLAE programak Nafarroako hezkuntza-sistemari beharrezko baliabideak ematea proposatu du, ikastetxeak hezkidetzako ikastetxe bihurtzeko.

SKOLAE programa sortu da akonpainamendua emateko Nafarroako hezkuntza sistemako unibertsitatez kanpoko etapa guztietako ikastetxeei eta irakasleei prestakuntza prozesu bat ezarri eta abian jar dezaten, berdintasunean bizitzen ikasteko gaitasun sozial eta zibikoa eskuratzeko helburuarekin.

SKOLAE programak ikastetxeko eta gelako hezkidetza-kudeaketa azpimarratzen du, pertsonen eta taldeen esperientziak txertatuz gelan, curriculumean eta metodologian, bai eta hezkidetzako ikastetxe bat osatzen duten elementu guztietan ere.

Programa honek ikastetxe baten hezkidetza-eraldaketari buruzko erreferentzia esparrua eta helburuak garatzen ditu. Lau ardatz edo ibilbide nagusi ematen ditu, ikasleak gaitasun batzuk bereganatzen joateko, norberaren bizitza-proiektua aukeratu, eraiki eta bizitzeko gaitasunak hain zuzen ere, ezagutzatik eta askatasunetik, eta nork bere etorkizuna erabakitzeko gaitasuna ere, genero baldintzatzailerik gabe, berdintasun ezak identifikatzen, haien kontra egiten eta bere kulturan, erlijioan, gizarte-klasean, egoera funtzionalean eta kezka pertsonalen arloan berdintasunerako eskubideaz baliatzen ikas dezaten.

Mailaz mailako aplikazioaren bidez, bai gelan bai ikastetxearen kudeaketa eta proiektu pedagogikoa bideratzen dituzten elementuetan, ikasleek berdintasunean bizitzeko gaitasuna garatuko dute, hau da, berdintasunarekiko konpromisoa gauzatu eta azalduko dute, jokabide eta eredu berriak ikusaraziko dituzte emakumeenganako indarkeriarik gabeko kultura berdintzailea sortzen laguntzeko, eta argi eta irmo erantzunen dute diskriminazioa, indarkeria eta genero desberdintasunen aurrean.

SKOLAE giltzarria da Nafarroako hezkuntza sistemako ikastetxeen eraldaketa globalean, irakasleen lanean txertatuta eta ikusgai egonen dena, aldaketa sakon eta iraunkorren berme.

Behin pilotaje fasea bukatuta, 2018-2019 ikasturtetik aurrera orokortze prozesua hasi zen. Prozesu horrek era mailakatuan jarraituko du, ikasturtez ikasturte ikastetxe kopuru zehatz bat sartuz, unibertsitate mailakoak ez diren funts publikoekin eutsitako Nafarroako ikastetxe guztiek izan ditzaten gelaren eta ikastetxearen kudeaketan hezkidetza aplikatzeko gaitasuna duten irakasleak.

SKOLAEk ikastetxeei eskura jartzen die biurteko prestakuntza plan bat. Plan horrek biltzen ditu orientabide didaktikoak eta laguntzako materialak etapa guztietarako, diagnostikoa eta Identitate Hezkidearen Plana egiteko prozedura, eta jarraipena (presentziala eta online) SKOLAE ikastetxeen sareen egituraren bidez.

2.–Ikaskuntzaren helburuak.

SKOLAEk irakasteko gaitasunak hobetu nahi ditu, ikasleei lagun diezaieten “Berdintasunean bizitzen ikasteko” gaitasuna garatzen. Ikaskuntza hori mamitzen da zenbait helbururen inguruan, zeinak lortuko baitira berariazko proposamen planifikatu eta esplizituen bidez, ikastetxearen testuinguru zabalean: curriculuma, ikastetxea eta ingurua.

Helburuak aurkezten dira ikastetxearen bi antolaketa mailetarako: gelarako eta ikastetxea egituratzen duten elementuetarako, hain zuzen. Helburuen bidez proposatzen da curriculumaren hezkidetzako ikuspegiaren alde egitea curriculumeko edukietan eta beste elementu batzuetan, bai eta ere berean berdintasunean bizitzen ikasteko hezten eta kultura sortzen duten beste elementu batzuetan ere.

I.–Ikastetxeko kulturaren helburuak:

–Identifikatzea ikasleei berdintasunean bizitzen ikasteko laguntzen dieten elementuak, gelatik kanpo eta ikastetxean bertan ikasteko egoerak eta esperientziak sortzen dituzten elementuen artean.

–Diagnostiko bat egitea, informazioa biltzeko eta behaketa egiteko metodologia desberdinak erabiliz, hezkidetzako hobekuntza proposamenak egiteko erabilgarriak diren adierazleak eta ondorioak lortzeko.

–Irakasle guztiek parte hartzea diagnostikoa egiteko eta hobekuntzako proposamenak planifikatzeko prozesu horretan, sentsibilizazioaren eta prestakuntzaren alde eginez.

–Engaiatzea koordinazio pedagogikorako egiturak, ikastetxearen identitate pedagogikoari eragiten dioten erabakien arduradun izan daitezen.

–Identitate Hezkidearen Plana ikasturte bakoitzerako idaztea, beharrezkoak diren hobekuntzak ebaluatzeko eta proposatzeko konpromisoarekin.

–Ikastetxeko prestakuntza planean prestakuntza sartzea, ikastetxea hobetzeko eta eraldatzeko funtsezko elementu gisa.

–Identitate Hezkidearen Plana UPOan eta memorietan sartzea, beste hobekuntza plan batzuekin integratuta, lotuta eta harremanduta.

II.–Lau ardatzen helburuak:

Hiru esparru desberdinetan antolatzen dira: pertsonen, harremanen eta testuinguruaren esparruak. Horrela, kontuan hartzen dira testuinguru sozial eta kultural batean harremanetan sartzen den pertsona indibidualaren dimentsio guztiak.

Ardatzen ikaskuntza helburuak:

–1. ARDATZA.

Kritika eta ardura berdintasun-eza dela eta.

1.1. Pertsonen esparrua:

• Berdintasun-ezaren inguruko pentsamolde kritikoa sustatzea
• ikasleengan, generoari dagokionez, azterketa-gakoak ekarriz berdintasun ezaren kausak identifikatze aldera.
• Ikasleek bizitza-proiektu propioaren garapena mugatzen duten genero-mandatuak identifika ditzatela sustatzea.
• Nor bere aldaketa pertsonalaren egilea delako eta identitate berdinzale propioa (feminitate eta maskulinitate hegemoniko diskriminatzaileez harago) garatzen ahal duelako kontzientzia hartzea.

1.2. Harremanen esparrua:

• Jasotako zaintzak emateko egin beharreko lanak identifikatzea, baita pertsona bakoitzak haietan jokatzen ahal duen papera ere.
• Harremanetan erantzunkidetasuna sustatzea (elkarrekiko zaintzetan eta autonomian oinarritu behar lukete harremanok).
• Ikasleen arteko harremanetan –nesken artekoetan, neska-mutilen artekoetan nahiz mutilen artekoetan– genero-lerratzeak aztertzea, eta indarkeriarik gabeko eredu eta harreman berdinzaleak sustatzea.

1.3. Testuinguruaren esparrua:

• Esparru guztietan emakumeen presentzia ikusgai jartzea eta emakumeek emandako zaintzen balioa ikusarazi eta aitortzea, zein hainbat alorretan (zientzia, kirola, asmakizunak, literatura...) nabarmendutako emakumeak ezagutaraztea, baita emakume borrokalariak eta berdintasunarekin konprometituak ere.
• Feminismoaren eta mugimendu sufragistaren historia, gaur egungo mugimendu feministak eta berdintasun-politiken sustapenean duten eragina ezagutzea. Genero-rol eta -estereotipoak hausten dituzten gizon-emakumeak baloratzea.
• Emakumeen kontrako diskriminazio edo indarkeria egoeretan aktibo izateak duen garrantziaz jabetzea.

–2. ARDATZA.

Autonomia eta independentzia pertsonala.

2.1. Pertsonen esparrua:

• Mota guztietako zaintza-lanak baloratzen eta egiten ikastea, bai nork bere burua zaintzekoak, bai gainerako pertsonak zaintzekoak, zaintzaren alderdi soziala ahaztu gabe, ez eta konponbiderako baldintzetako bat alderdi hori dela.
• Aitortzea zer garrantzitsua den zaintza-lanak eta enplegua orekatzea bizitza-proiektu berdinzaleago bat garatze aldera.
• Ikasleei genero-lerratzerik gabeko orientabide akademiko profesionala ematea hezkuntza-ibilbide osoan zehar.

2.2. Harremanen esparrua:

• Jasotako zaintza-lanen balioa aitortzea, baita haiek eman dizkiguten pertsonena ere.
• Erantzunkidetasunaren kultura bat sustatzea harremanetan, denborak eta lanak modu bidezkoan banatuta.
• Ikasleen artean lanak eta rolak banatzea, genero-lerratzerik gabe, lantaldetan ari daitezen.

2.3. Testuinguruaren esparrua:

• Hausnarketa eginaraztea gaur egungo eredu ekonomikoaz eta pertsona guztien beharrak eta zaintzak asetzearekin duen loturaz.
• Erreferenteak ematea ikasleei, jarrera berdinzaleak dituzten emakume eta gizonenak.
• Generoaren arloko berdintasun-eza aztertzea zaintza-lanetan eta lan-eremuan, eta ikasleek generoaren gainean dituzten ezagutzak handitzea (lanaren sexu-banaketa, soldata-arrakala, segregazio horizontala zein bertikala, sexu-jazarpena eta jazarpena sexu-arrazoiengatik...).

–3. ARDATZA.

Lidergoa, ahalduntzea eta partaidetza soziala.

3.1. Pertsonen esparrua:

• Ikasleek beren lidergo-gaitasuna ezagutzea sustatzea, erabili ahal izan dezaten.
• Nesken autokonfiantza eta ahalduntze pertsonala sustatzea, hainbat lidergo-desafio nork bere gain hartzeko, modu arrakastatsuan gaindituz gero, konfiantza hori indartu eta elika dezaten eta erronka berriei aurre egiteko aukera gehiago izan ditzaten.
• Berdintasunik gabeko egoerak ezagutzea eta jakitea boterearen banaketa noiz den berdintasunik gabekoa, eta pertsona bakoitzaren lidergo gaitasuna aktibatzea, horiek ikusarazi, ezbaian jarri eta aldatzeko.

3.2. Harremanen esparrua:

• Autokontzientzia eta pertsona bakoitzak gainerakoengan duen eragina ulertzeko behar den ezagutza garatzea, errespetua, ulermena eta tolerantzia azalduz elkarlanean.
• Autonomiarekin eta hainbat taldetan egokitzeko gaitasunarekin lan egitea, taldearen premien eta lanaren helburuen arabera rol desberdinak hartuz. Norberaren eta besteen lidergoa gauzatu eta onartzea, eta lidergorako molde desberdinak ebaluatzea eta horietatik ikastea.
• Lidergoaren erabileran dagoen berdintasun-eza aztertzea, eta horretaz askatasunez hitz egitea, bizi izandako eta ikusitako berdintasun-ezari eta bidegabekeriei izena jarriz.

3.3. Testuinguruaren esparrua:

• Zereginera egokituta/sintonizatuta dagoen eta testuinguruarekiko sentikorra den lidergoa onartzea eta praktikatzea.
• Partaidetza-ikerketaren trebetasunak garatzea: gaiak eta informazio garrantzitsua identifikatzea, datu-bilketa, analisia, emaitzak jakinaraztea, etab.
• Talde-lan orekatua eta inklusiboa praktikan jartzea, abian jarritako ikerketa-proiektu komunitarioak egikaritzean: talde bat osatzeko, erabakiak hartzeko, proiektuak kudeatzeko, erkidegoaren lotura-lanak egiteko, proiektu pilotuak egiteko, emaitzak aurkeztu eta zabaltzeko eta abar, ikasle guztiek egiteko moduan.

–4. ARDATZA.

Sexualitatea eta tratu ona.

4.1. Pertsonen esparrua:

• Gorputza ezagutzea eta haren hazkuntzaren kontzientzia hartzea, desberdintasunak onartuz, gorputz-ongizatearen ohiturak hartuz eta gorputza sentsazio-, erlazio-, komunikazio-, gogobetetasun- eta plazer-iturri dela onartuz.
• Nork bere burua neska edo mutil gisa aitortzea, bere sexu-nortasuna modu positiboan onartuz, genero-elementu diskriminatzailerik gabe eta, gustuei dagokienez, geure burua emakume eta gizonezko gisa adierazteko modu desberdinak ulertzen lagunduz, batzuetan zaletasun, lehentasun eta nolakotasun berdinak eta beste batzuetan desberdinak izaten ahal baititugu, baina gure nortasuna galdu gabe.
• Sexualitatearen ugalketa-alderdia ezagutzea, hura kudeatzeko tresnak eta trebetasunak jarriz eta ama edo aita izateko erabaki arduratsua ahalbidetuz.

4.2. Harremanen esparrua:

• Inguruneko pertsona esanguratsuekin lotura afektiboak ezartzea, konfiantza, segurtasuna eta sentimendu zein ideiak adieraztea ezaugarritzat dituztenak.
• Errespetuan eta hazkunde pertsonalean oinarritutako bikoteen arteko harremanak ahalbidetzea eta indartzea.
• Tresnak eta trebetasunak ematea gure harremanetan tratu txarrak identifikatzeko, gure harremanetan abusuzko portaerei mugak jartzeko eta eraso sexista edo sexual bat dela-eta erantzun egokia emateko.
• Norberaren ideiak, sentimenduak, afektuak eta desirak adierazten laguntzen duten gaitasunak garatzea; gainerako pertsonak ulertzea, errespetatzea, onartzea eta arbuiatzea; bizipen afektibo-sexual positiboak, arduratsuak eta osasuntsuak izatea.

4.3. Testuinguruaren esparrua:

• Berdintasunean, errespetuan eta erantzukizunean oinarritutako funtsezko bizikidetza-irizpideak ezagutzea eta erabiltzea.
• Tresnak eta trebetasunak ematea honako hauei buruz azterketa kritikoak egiteko: edertasun-ereduak, ingurune hurbileko pertsonen artean ezartzen diren harremanak, sexua merkaturatzea eta sexu indarkeria.
• Identitate maskulino eta femeninoen aniztasun handia, familiako bizikidetza-eredu desberdinak, eta amatasunarekin eta aitatasunarekin zerikusia duten prozesuetako aniztasun handia aitortzea.

3.–Parte hartzea.

Ikasturte bakoitzean, Hezkuntza Departamentuak aurreikuspena ezarriko du programan sar daitezkeen ikastetxeen kopuruaz (03 urtekoak, Haur, Lehen eta Bigarren Hezkuntzakoak, LHkoak).

Hezkuntza Departamentuak, parte hartuko duten ikastetxeak aukeratzeko orduan, pilotajean eta ondorengo ikasturteetan bildutako esperientzian oinarritutako irizpideak erabiliko ditu. Ikastetxeek sartzen jarraituko dute, bermatuta egon daitezen akonpainamendua, jarraipena eta prozesuaren ebaluazioa.

Urtero onetsiko da parte hartuko duten ikastetxeen zerrenda, Hezkuntzako zuzendari nagusiaren ebazpen baten bidez.

Ikastetxeek berariazko dinamika dute, irakasleen mugikortasuna beti bertan egonen den elementua baita, eta horregatik ikastetxeek konpromisoa hartzen dute beren irakasleak ikasturte bakoitzean prestatzeko. Hori dela eta, irakasleek zenbait prestakuntza maila izanen dituzte eskura, berma dadin ikasle talde guztiek proposatzen diren edukiak lantzen dituztela eta hezkidetzako ikastetxearen kulturan parte hartzen dutela.

Berdintasunaren eta Bizikidetzaren Atalak, Berdintasunaren Bulegoaren bidez, ikastetxe horien eskura jarriko ditu beharrezkoak diren laguntza eta jarraipena; programaren moldaketa eta aplikazioa, haien ezaugarriak direla-eta hala behar duten ikastetxeetan; material berrien egokitzapena; eta ekintzen koordinazioa hezkuntza komunitateekin.

4.–Konpromisoak.

Programan parte hartzen duten ikastetxe guztiek beren konpromisoa berretsi, eta Berdintasunaren eta Bizikidetzaren Atalera igorri beharko dute ikasturtearen hasieran partaidetzako agiria, zeinaren bidez ikastetxeak honen berri emanen baitu:

–Hezkidetza koordinatzailea izendatzea.

–Talde sustatzaile bat izendatzea, hiruzpalau pertsonak osatua; haietako batek gutxienez zuzendaritza taldekoa izan behar du, 8 talde baino gehiago dituzten ikastetxeetan. Ikastetxe txikiagoek edo ezaugarri bereziak dituztenek Berdintasunaren Bulegoarekin adostuko dute ikastetxean hezkidetza koordinatzeko eta bultzatzeko erarik egokiena.

–Identifikatzea SKOLAEko zein prestakuntza mailatan eginen duen irakasleen inskripzioa. SKOLAE programan sartzeko ikastaroak, irakasleen mugikortasunak, ikastetxeen ezaugarri desberdinek eta beste zenbait aldagaik desberdintasunak sortzen dituzte ikastetxeen artean eta ikastetxean bertan; horregatik, ikastetxe berean proposamenaren maila batean edo bestean inskribatu beharko dira, irakasleen gaitasunerako prestakuntza gisa eta/edo talde sustatzailearen funtzioak hartzeko prestakuntza gisa.

Ikastetxe bakoitzeko zuzendaritzak edo hezkidetzako irakasle koordinatzaileak erabakiko du zer konpromiso hartzen duen irakasleei programaren aplikazioaren gaineko prestakuntza emateko ikastetxearen bi antolaketa mailetan (gelan ezartzeko plana eta ikastetxearen kultura eta antolaketa), eta konpromiso horren berri emanen dio Berdintasunaren Bulegoari.

Haur, Lehen eta Bigarren Hezkuntzako eta LHko ikastetxe guztiek, irakasleei ordutegiak esleitzean, kontuan hartuko dute zenbat ordu behar diren astean hezkidetzako koordinazioaren eta talde sustatzailearen eginkizunetarako, bai eta SKOLAE sarean parte hartzeko ere, urtero Hezkuntza Departamentuak horri guztiari buruz ezartzen dituen orientabideei jarraikiz.

5.–Prestakuntza plana

SKOLAE hezkidetza programaren garapen progresiborako, beharrezkoa da ikastetxeko irakasle guztiek prestakuntza progresiboa eta akonpainamendua jasotzea.

Prestakuntza planaren abiapuntua oinarrizko esparru teoriko bat da ikaskuntza ardatz bakoitzerako, eta haren osagarri dira proposamen didaktiko zehatzak, ikasturte bakoitzean etapa guztietan aplikatu beharrekoak. Era berean, proposamen eta prozedura eraginkorrak bilduko ditu, Identitate Hezkidea hobetzeko Plana egiteko.

Honako hauek dira prestakuntza planaren oinarrizko helburuak:

1.–Irakasleen eskura tresnak jartzea, laguntza emanen dietenak gogoeta egin dezaten hezkuntzak duen indarraz ikasleei gaitasunak emateko, berdintasunerako eskubideaz balia daitezen eremu pribatuan nahiz publikoan.

2.–Irakasleei prestakuntza ematea eskura ditzaten gaitasun profesionalak, trebetasunak eta baliabideak, sustatzen dutenak ikasleei garapen pertsonalerako eta pertsonen arteko harremanetarako eredu berdinzaleak transmititzea, bai eta haien bizitza-proiektuak mugatzen dituzten estereotipoen kritika ere.

1.–Sarean lan egitea, programan parte hartzen duten ikastetxeen artean hezkidetzaz ikasten eta jardunbide onak trukatzen laguntzeko, bai eta jarraipena eta ebaluazioa laguntzeko ere.

2.–Irakasleen artean gogoeta kritikoa sustatzea gizartean sexismoa izatearen arrazoi nagusiaren gainean eta feminitate eta maskulinitate ereduei buruz, identitate pertsonal berdinzale berriak sortzeko oinarria izan dadin.

3.–Norberaren bizitzan, familian eta gizartearen esparru guztietan gatazkak modu baketsuan bideratzeko aukera izateko jarraibideak ematea eta hura defendatzea.

4.–Ibilbidearen egitura, ardatzen araberakoa, osatzen duten oinarrizko kontzeptuak gertutik ezagutzea, programazioan sartzeko gai izateko, eta Identitate Hezkidearen Plana ere ezagutzea, ikastetxearen hezkidetzako kultura sortzeko.

5.–SKOLAE programa sendotzen laguntzea, akonpainamenduaren bidez eta hura etengabe ebaluatuz eta hobetuz.

Irakasleentzako prestakuntza eta aholkularitza plan honek prestakuntza teorikoa eta praktikoa ditu, eta honela egiaztatuko da:

1.–SKOLAE I ikastaroa: “Hezkidetzako ekintzaren teoria eta praktika; SKOLAE programaren 4 ardatzen hastapenak”. Programak 200 orientabide didaktiko baino gehiago biltzen ditu, ikasmailaz ikasmaila antolatuak, ikasgeletan haien aplikazioa deskribatu eta orientatzeko.

Modalitate erdipresentziala eta iraupen orduak ikasturte hasierako jarraibideetan ezarriko dira.

SKOLAE I maila nahitaezkoa izanen da 2020-2021 ikasturtean sartzen diren edo aurreko ikasturteetatik SKOLAEn dauden ikastetxeetako klaustroko kide diren irakasleentzat.

Prestakuntza gisa ziurtatuko da.

2.–Ikastaroa SKOLAEko talde sustatzailearentzat.

Ikastetxearen hezkidetzako diagnostiko bat eginen da eta “Ikastetxearen identitate hezkidearen plana” prestatuko da, epe ertainera begira.

Era berean, modalitate erdipresentziala ikasturte hasierako jarraibideetan ezarriko da.

Ikastaro hau nahitaezkoa izanen da talde sustatzaileko kideentzat eta, sartu berri diren edo oraindik ikastaroa egin ez duten ikastetxeen kasuan, baita bertako hezkidetzako irakasle koordinatzailearentzat ere.

Berrikuntzako 15 orduren ziurtagiria emanen da.

3.–SKOLAE II ikastaroa.

Hezkidetzako curriculum proposamenetan sakonduko da, 4 ardatzak integratuz.

Modalitate erdipresentziala eta iraupen orduak ikasturte hasierako jarraibideetan ezarriko dira.

SKOLAE II maila nahitaezkoa izanen da aurreko ebazpenen ondorioz sartu ziren eta SKOLAE I ziurtatu zuten ikastetxeetako klaustroko kide diren irakasleentzat.

Berrikuntza gisa ziurtatuko da.

4.–Sakontzeko ikastaroa talde sustatzailearentzat.

Diagnostikoaren itemetan eta Identitate Hezkidearen Planean sakonduko da.

Modalitate erdipresentziala eta iraupen orduak ikasturte hasierako jarraibideetan ezarriko dira.

SKOLAE II maila nahitaezkoa izanen da aurreko ebazpenen ondorioz sartu ziren eta orduko ziurtagiria lortu zuten ikastetxeetako talde sustatzaileko kide diren irakasleentzat.

Berrikuntza gisa ziurtatuko da.

5.–SKOLAE ikastetxeen koordinazio-sarea.

Esperientziak jarraitu, ebaluatu eta trukatuko dira SKOLAE programan parte hartzen duten ikastetxe guztien artean.

Koordinazio modalitatea (presentziala eta online) ikasturte hasierako jarraibideetan ezarriko da.

Nahitaezkoa izanen da ikastetxeko hezkidetzako irakasle koordinatzailearentzat.

Berrikuntzako proiektuaren koordinatzaile gisa ziurtatuko da.

6.–SKOLAE proiektuak.

Segida emanen zaie honako gai hauen gainean lan egiten duten SKOLAE proiektuei: Identitate Hezkidearen Planaren itemak (patioak, gazteria eta materialak), Bigarren Hezkuntzako eta LHko arloetako curriculumean hezkidetzaren ikuspegia sartzea, eta ardatzen orientazioak.

Berrikuntza gisa ziurtatuko da.

7.–Berdintasunaren Bulegotik ikastaroak eskainiko dira, kontuan hartuz SKOLAE ikastetxeen sarean identifikatutako beharrak eta Hezkuntza Departamentuak finkatuko dituen aukerak.

Kontuan hartuta hezkidetzako ikastetxe bat irakasle guztien eta ikasleekin ikastetxeko espazio formaletan nahiz informaletan eta ingurune familiarrean harremanak dituzten pertsona guztien hezkidetzarako gaitasunen batura dela, SKOLAE programak sartzen ditu familiei eta irakasle ez diren langileen parte-hartzeari buruzko erabakiak Identitate Hezkidearen Planean.

Jarraituko da familiei bideratutako materialak ematen, beren galderei eta hezkidetzaren ikuspegiari erantzungo dietenak.

6.–Ikastetxeetan hezkidetza txertatzea.

Hezkidetza ikastetxeetan sartzeak honako bi noranzko hauek ditu: alde batetik, hezkidetzaren ikuspegia gelaren eta ikastetxearen kudeaketan integratzea, eta, beste alde batetik, hura beste hobekuntza programa batzuekin uztartzea.

SKOLAE programan parte hartzen duten ikastetxeek proposatzen den prestakuntza dute nahitaezko bi mailatan, hezkidetzako programazioak garatzeko eta hezkidetzako kultura pedagogikoa duen ingurunea sortzeko, eta denboran mantentzea, hobetzea eta sakontzea bermatu beharko dute.

Urtero parte hartzeko aukeratzen diren ikastetxeek lehendabiziko urtetik hartuko dute bere gain hezkidetzarekiko konpromisoa eta SKOLAE programaren helburuen aplikazio progresiboa egitekoa UPOan. Dokumentu horretan biltzen ahalko da ikastaroaren prestakuntza prozesua.

Ikastetxeko irakasleek bere eginen dute konpromiso hori, eta erantzukizuna ez dute utziko ikastetxekoak ez diren pertsonen esku; azken hauek osatu eta aberastu ditzakete hezkidetza eduki horiek eskolaz kanpoko guneetan, baina inoiz ez dituzte irakasleak ordeztuko.

Hurrengo urteetatik aurrera, ikastetxe bakoitzak SKOLAE programaren urteko zehaztapena jasoko du UPAn eta Hezkuntza Ikuskaritzak eskatzen dituen dokumentu guztietan.

Horrez gain, ikastetxeek beharko dute “Ikastetxearen Identitate Hezkidearen Plana” onetsi, haren urteko garapenean elkarrekin parte hartu, Eskola Kontseiluari horren berri eman, eta ikastetxearen komunikazioetan eta beste informazio- eta publizitate-euskarrietan (web-orriak, blogak, sare sozialak, etab.) SKOLAE programan parte hartzen dutela aipatu.

Ikastetxeek parte hartuko dute programaren jarraipen eta ebaluazioan, eta programaren aplikazioaren gaineko informazio zehatza sartuko dute ikasturte bukaerako memorietan. SKOLAE ebaluazioaren eta jarraipenaren menpe egonen da, halatan, epe ertainean, Nafarroako ikasleengan izan duen eraginaren bilakaera egiaztatzeko, berdintasuneranzko aldaketaren joerak identifikatzeko eta behar diren zuzenketak egiteko, joera horiek sendotu eta finkatzearren.

Ikastetxeak murgilduta daude eraldaketa globalera bideratutako hobekuntza jarraituko prozesuetan. Prozesu horiek hobekuntza planak dakartzate, non ahalegina inklusioan, digitalizazioan, kalitatean, hizkuntza-planetan eta abarretan jartzen baita. Horregatik, aurreikusi eta erabakiko da hobekuntza plan desberdinak elkarren artean nola lotu, nola integratu, eta nola laguntzen ahal duten ikastetxeak benetan bilaka daitezen hezkuntza kalitateko ikastetxe eta hezkidetzako ikastetxe inklusibo.

7.–Nahitaezkotasunaren baldintzak.

Aplikatzeko konpromiso eta baldintza hauek nahitaez bete beharko dira SKOLAE programan ebazpen bidez sartutako ikastetxe guztietan.

II. ERANSKINA

SKOLAE programan 2020-2021 ikasturtean parte hartzeko izendatutako Haur eta Lehen Hezkuntzako ikastetxeak

Iragarkiaren kodea: F2005444