2. NAFARROAKO TOKI ADMINISTRAZIOA
2.2. XEDAPEN ETA IRAGARKIAK, HERRIEN ARABERA ANTOLATUAK
ERROTZ
Ordenantza fiskala, zeinaren bidez arautzen baita tokiko jabari publikoaren aprobetxamendu berezia egiteko tasa, interes orokorreko hornidura zerbitzuak ustiatzen dituzten enpresentzat. Behin betiko onespena
Ordenantza hasiera batean onetsi ondotik, eta jendaurreko epean ez denez alegaziorik jaso, Nafarroako Toki Administrazioari buruzko 6/1990 Foru Legearen 325. artikuluan ezarriari jarraikiz, bidezkoa da behin betiko onestea eta haren testu osoa Nafarroako Aldizkari Ofizialean argitaratzea.
Errotzen, 2019ko martxoaren 22an.–Kontzejuko burua, Sergio Altuna Garro.
ORDENANTZA FISKALA, ZEINAREN BIDEZ ARAUTZEN BAITA TOKIKO JABARI PUBLIKOAREN APROBETXAMENDU BEREZIA EGITEKO TASA, INTERES OROKORREKO HORNIDURA ZERBITZUAK USTIATZEN DITUZTEN ENPRESENTZAT
1. artikulua. Toki Ogasunei buruzko Foru Legearen artikuluen babespean, ordenantza honen helburua da tasa arautzea Kontzejuko bide publikoko lurzoru, lurgain eta lurpeko erabilera pribatiboa edo aprobetxamendu berezia egiteko, hornidura zerbitzuak ustiatzen dituzten enpresentzat, zerbitzu horiek interes orokorrekoak direnean edo herritar guztiei edo frankori eragiten dietenean.
2. artikulua. Tasa honen zerga-egitatea dira Kontzejuko bide publikoko lurzoru, lurgain eta lurpeko erabilera pribatiboa edo aprobetxamendu bereziak, hornidura zerbitzuak ematen dituzten enpresa edo entitateek egiten dituztenak, zerbitzu horiek interes orokorrekoak direnean edo herritar guztiei edo frankori eragiten dietenean.
Bereziki, zerbitzu horien barnean egonen dira hornidura hauek: ura, gasa, argindarra, telefonia finkoa eta mugikorra eta beste komunikabide mota batzuk; betiere, ematen baldin badira Kontzejuaren jabari publikoa okupatzen duten sare edo antena finkoen bitartez, osorik nahiz partez.
3. artikulua. Tasa honen subjektu pasiboak dira aurreko atalean aipatu diren horniduren zerbitzuak ematen dituzten enpresak. Telefonia mugikorreko enpresak kenduta, subjektu pasiboak izanen dira bai hornidurak egiteko erabiltzen diren sareen titularrak direnak, bai, sare horien titularrak izan gabe, sareak erabiltzeko, haietara iristeko edo elkar lotzeko eskubideen titularrak direnak.
Horri dagokionez, zerbitzu horiek ustiatzen dituzten enpresen artean sartzen dira banaketarako eta merkaturatzeko enpresak.
4. artikulua. Tasa honen zenbatekoa, salbu telefonia mugikorraren kasuan, izanen da tasa horri lotuta dauden enpresek kontzeju-mugartean urtero lortzen duten fakturazioaren diru-sarrera gordinen %1,5.
Ondorio horietarako, diru-sarrera gordinen artean ez dira sartuko egindako zerbitzuak kargatzen dituzten zeharkako zergak, ezta hirugarrenen kontura kobratutako partida edo zenbatekoak ere, baldin ez badira entitatearen diru-sarrera berekiak, alegia, tasaren zenbatekoa zehazteko araubide hau aplikatzen zaion entitatearen diru-sarrera berekiak. Orobat, Ekonomia Ministerioaren Energia elektrikoa sortzeko instalazioen administrazio erregistroaren 1. eta 2. ataletan energia sortzeko beharrezko lehengaitzat hartutako instalazioetan (araubide berezi honetan tributatzekoak) erabiltzen diren hornidura zerbitzuen zenbatekoak ez dira sartuko fakturazioaren diru-sarreren barnean.
Hornidurak egiteko kanpoko sareak erabiltzen dituzten enpresek beren fakturazioaren diru-sarrera gordinetatik kenduko dituzte beste enpresa batzuei haien sareak eskuratzeagatik edo haiei lotzeagatik ordaindu dizkieten zenbatekoak. Sare horien titulartasuna duten enpresek kontzeptu horregatik eskuratzen dituzten zenbatekoak sartu beharko dituzte beren fakturazioaren diru-sarrera gordinetan.
Erabilera pribatiboak edo aprobetxamendu bereziak berekin dakartenean tokiko jabari publikoaren suntsiketa edo narriadura, onuraduna beharturik dago ordaintzera –deusetan ukatu gabe tasaren ordainketa– aipatutako horiek berreraiki edo konpontzeko gastuen kostu osoa, baita aurretik zenbateko hori gordailutako uztera ere.
Kalteak konponezinak badira, suntsitutako ondasunek zenbat balio duten edo kaltetutakoen balio-galera norainokoa den, horrenbeste emanen du kalte-ordainetan onuradunak.
5. artikulua. Tasa urte guztietako urtarrilaren 1ean sorraraziko da, eta zergaldia urte naturalekoa izanen da, salbu erabilera pribatiboa hasteko edo uzteko kasuetan, kasu horretan urte naturalaren zenbatekoa proportzionalki banatuko baita.
6. artikulua. Tasa ordaintzera beharturik egonik zerbitzu publikoak ustiatzen dituzten enpresek hiruhilero aurkeztu beharko dute kontzeju-mugartean lortutako diru-sarrera gordinen aitorpena, hain zuzen ere aurreko hiruhilekoari dagokiona.
Aipatu aitorpen horretan tasaren zenbatekoa kalkulatu beharko da, arau honetan ezarritakoaren arabera.
Aitorpena aurkeztearekin batera, dagokien tasaren zenbatekoa ordaindu beharko dute enpresek.
7. artikulua. Ordenantza honetan arautzen den tasa bateragarria da –independentea baita– zerbitzuak edo toki entitatearen eskumeneko jarduerak egiteagatik ezartzen ahal diren beste tasa batzuekin, salbu eta erabilera pribatibo edo aprobetxamendu bereziarekin ikusteko duten tasekin, horiexek baitira ordenantzaren berezko xedeak.
8. artikulua. Tasa hau kudeatzeko, toki entitate honek beste entitate batzuekin bat egiten ahal du hitzarmenen bidez, errazagoak eta arinagoak izan daitezen kudeaketa eta likidazioa.
Iragarkiaren kodea: L1904341
