2. NAFARROAKO TOKI ADMINISTRAZIOA
2.1. OPOSIZIOAK ETA LEHIAKETAK. LAN PUBLIKOAREN ESKAINTZA
NOAIN (ELORTZIBAR)
Deialdia, akordeoiko irakasle bat kontrata dadin, aldi baterako, Udalaren Julián Gayarre Musika Eskolan
2019ko otsailaren 18ko Ebazpena, Julián Gayarre Musika Eskolako Patronatuko lehendakariak emana (Noain Elortzibarko Udala), deialdi bat onesten duena izangaien zerrenda bat eratzeko hautaproben bidez, aldi baterako kontratuarekin ari daitezen akordeoiko irakaslearen lanpostuan Noain Elortzibarko Udalaren Julián Gayarre Musika Eskolan, sortzen diren beharrei erantzutearren.
Beharrezko jotzen da izangaien zerrenda bat eratzea hautaproben bidez, aldi baterako kontratuarekin ari daitezen akordeoiko irakaslearen lanpostuan Noain Elortzibarko Udalaren Julián Gayarre Musika Eskolan, destinoa aipatutako eskolan izanik, sortzen diren beharrei erantzutearren.
Aplikatzekoak diren xedapenek legez ematen dizkidaten eskudantziak erabiliz eta ekainaren 5eko 113/1985 Foru Dekretua kontuan hartuz,
EBAZTEN DUT:
1.–Deialdi bat onestea, izangaien zerrenda bat eratzeko hautaproben bidez, aldi baterako kontratuarekin ari daitezen Akordeoia espezialitateko irakaslearen lanpostuan Noain Elortzibarko Udalaren Julián Gayarre Musika Eskolan, sortzen diren beharrei erantzutearren.
2.–Hautaproben deialdia arautuko duten oinarriak onestea. Ebazpen honen I. eranskinean daude.
3.–Ebazpen hau Nafarroako Aldizkari Ofizialean argitara dadila agintzea.
Ebazpen honen kontra, errekurtso hauetako bat aurkez daiteke, hautara:
a) Administrazioarekiko auzi-errekurtsoa, Nafarroako Administrazioarekiko Auzien Jurisdikzioko organo eskudunari zuzendua, bi hilabeteko epean, ebazpen hau jakinarazi eta biharamunetik hasita.
b) Gora jotzeko errekurtsoa, Nafarroako Administrazio Auzitegiari zuzendua, hilabeteko epean, jakinarazten denetik hasita.
c) Berraztertzeko errekurtsoa, ebazpen hau eman duen organoari zuzendua, hilabeteko epean, ebazpena jakinarazi eta biharamunetik hasita.
Noain Elortzibarren, 2019ko otsailaren 18an.–Lehendakaria, Cecilia Antolín Astigarraga.
I. ERANSKINA
Oinarriak
1. oinarria.–Deialdiaren xedea eta arau orokorrak.
1.1. Deialdi honen xedea da izangaien zerrenda batzuk eratzea hautaproben bidez, aldi baterako kontratuarekin ari daitezen akordeoiko irakaslearen lanpostuan Noain Elortzibarko Udalaren Julián Gayarre Musika Eskolan, sortzen diren beharrei erantzutearren.
1.2. Deialdi hau Nafarroako Aldizkari Ofizialean argitaratuko da eta oinarriak interesdunen eskura egonen dira Udalaren www.noain.es web-orrian.
1.3. Noain Elortzibarko Udalaren www.noain.es web-orrian argitaratuta jakinaraziko zaie izangaiei deialdi honi, oinarriei edo betearazteko ematen diren egintzei buruzko edozein gorabehera, egintza edo errekurtso.
1.4. Lanaldiaren araubidea zerbitzuaren beharretara egokituko da.
1.5. Lanpostuak B mailari dagokion ordainsaria izanen du, Nafarroako Administrazio Publikoen zerbitzuko Langileen Estatutuaren arabera, bai eta, dagokion moduan, plantilla organikoan eta araudi indardunean agertzen diren ordainsari kontzeptuak ere.
1.6. Deialdi honen bidez egiten diren kontratazioetarako bi hilabeteko probaldia ezarri da, eta epe horretan edozein aldek deuseztatzen ahal du kontratua.
2. oinarria.–Parte-hartzaileek bete beharreko baldintzak.
Izangaiek, eskabideak aurkezteko epea bukatzen den egunean, baldintza hauek bete beharko dituzte:
a) Espainiako nazionalitatea izatea, edo Europar Batasuneko beste estatu batekoa, edo, Europar Batasunak izenpetu eta Espainiak berretsitako nazioarteko itunak direla medio, langileen zirkulazio librea aplikatzen den eremuko estatu batekoa. Espainiarren eta Europar Batasuneko beste estatu bateko edo aipatu nazioarteko itunek ukitutako estatuetako herritarren ezkontideek ere parte har dezakete, zuzenbidez bereizita ez badaude. Era berean, haien ondorengoek eta ezkontidearenek, baldin legez bananduta ez badaude, hogeita bat urtetik beherakoak badira, edo gorakoak, haien kontura biziz gero.
b) Hamasei urte beteak izatea eta nahitaezko erretiroa hartzeko gehieneko adina ez gainditzea.
c) Musikako titulua izatea, erdi mailakoa edo profesionala, Akordeoia espezialitatekoa, edo hura eskuratzeko moduan egotea eskabideak aurkezteko epea bukatzen den egunean.
d) Bete behar diren eginkizunetan aritzeko behar den gaitasun fisiko eta psikikoa izatea.
e) Eginkizun publikoetan aritzeko ezgaitua edo gabetua ez egotea, eta administrazio publikoren baten zerbitzutik bereizia ez izatea.
Ez izatea inoiz kondenatua sexu-askatasun eta sexu-ukigabetasunaren aurkako delituagatik, epai irmoaren bidez. Eskaerak aurkezteko epea bukatzen den egunerako bete beharko dira aurreko baldintzak, eta hautapen-prozesuak eta kontratazioak iraun bitartean beharko dira bete.
3. oinarria.–Eskabideak eta horiek aurkezteko epea.
Hautapen prozesuan parte hartu nahi dutenek eskabidea aurkeztu beharko dute, oinarri hauen eranskinean ageri den ereduaren araberakoa, Noain Elortzibarko Udalaren Musika Patronatuko erregistroetako edozeinetan (Udalaren Musika Eskolan dago: San Migel kalea 2, 31110 Noain), edo urriaren 1eko 39/2015 Legearen 16.1 artikuluan aurreikusten diren bideetako edozein erabiliz (lege horren bidez jorratu zen Administrazio Publikoen Administrazio Prozedura Erkidea).
Eskabideak aurkezteko epea hamar egun naturalekoa izanen da, deialdi hau Nafarroako Aldizkari Ofizialean argitaratu eta biharamunetik hasita.
Eskabidearekin batera, izangaiek honako agiri hauek aurkeztu beharko dituzte, betiere deusetan galarazi gabe jatorrizko dokumentuak edo fotokopia konpultsatuak edo autentifikatuak aurkeztu behar izatea kontratatuak izateko deitzen zaienean, indarreko araudiak ezarri moduan:
–Nortasun Agiri Nazionalaren edo nortasuna eta nazionalitatea eta, hala bada, deialdiko 2.a) arauan nazionalitateaz edo ahaidetasunaz eskatzen diren betebeharrak frogatzen dituen agiriaren fotokopia.
–Deialdiaren 2.c) oinarrian eskatutako tituluaren fotokopia.
–Izangaiek aurkeztu nahi dituzten merezimenduak, agirien bidez aurkeztu eta egiaztatu beharko direnak eskabidea aurkeztearekin batera, hari atxikirik geldituko baitira. Lan esperientziaren kasuan, lan bizitza aurkeztuta frogatuko da.
4. oinarria.–Behin-behineko zerrenda eta behin betikoa.
4.1. Behin-behineko zerrenda.
Eskabideak aurkezteko epea amaiturik, Noain Elortzibarko Udaleko alkateak ebazpen bat emanen du, onartu eta baztertuen behin-behineko zerrenda onesteko, eta aginduko du argitara dadila Noain Elortzibarko Udaleko iragarki-taulan eta Udalaren web-orrian (www.noain.es).
Izangai baztertuek, behin-behineko zerrenda argitaratu ondoko 5 egun baliodunen barrenean, erreklamazioak egiten ahalko dituzte eta, okerrik egin baldin badute, horiek zuzendu.
4.2. Behin betiko zerrendak.
Eskaerak aurkezteko epea bukaturik, Noaingo Udalaren Musika Eskolako Patronatuko lehendakariak ebazpen bat emanen du izangai onartuen eta baztertuen behin betiko zerrenda onesteko, eta aginduko du jendaurrean jar dadila Noain Elortzibarko Udalaren www.noain.es web-orrian. Ebazpen horretan berean zehaztuko da probak non, noiz eta zer ordutan hasiko diren.
4.3. Izangai onartu eta baztertuen zerrendak argitaratzearekin ulertuko da interesdunei egin beharreko jakinarazpena egin dela, urriaren 1eko 39/2015 Legearen 45.b) artikuluan aurreikusitako ondorioetarako (lege horren bidez jorratu zen Administrazio Publikoen Administrazio Prozedura Erkidea).
5. oinarria.–Kalifikazio epaimahaia.
5.1. Honako kide hauek osatuko dute espezialitate bakoitzeko epaimahaia, baina izangai onartuen behin betiko zerrenda onesten duen ebazpenean zehazten ahalko da behin betiko osaera:
–Epaimahaiburua: María Cecilia Antolín Astigarraga, Noain Elortzibarko Musika Eskolako Udal Patronatuko lehendakaria.
–Ordezko epaimahaiburua: Aitor Pérez Bakaikoa, Noain Elortzibarko Musika Eskolako Udal Patronatuko zinegotzia.
–Lehen epaimahaikidea: Garbiñe Sertutxa Azkarate, Akordeoia espezialitateko irakaslea eta Noain Elortzibarko Udalaren Musika Eskolako zuzendaria.
–Lehen mahaikidearen ordezkoa: Ainhoa Iparraguirre Iribarren, akordeoiko irakaslea Burlata-Atarrabiako Musika Eskolan.
–Bigarren epaimahaikidea: Oihane Manterola Legaz, Noain Elortzibarko Udalaren Musika Eskolako ikasketaburua.
–Bigarren mahaikidearen ordezkoa: Marta Moreno Ibarrola, musika hizkuntzako irakaslea Noain Elortzibarko Udalaren Musika Eskolan.
–Hirugarren mahaikidea: Joseba Andoni Zugasti Arizmendi, Noain Elortzibarko Udalaren Musika Eskolako langileen ordezkaria eta perkusio irakaslea.
–Hirugarren mahaikidearen ordezkoa: África Domínguez Méndez, gitarra klasikoko irakaslea Noain Elortzibarko Udalaren Musika Eskolan.
–Epaimahaikide-idazkaria: Isabel Álvarez Berango, Noain Elortzibarko Musika Eskolako Udal Patronatuko idazkaria eta pianoko irakaslea.
–Mahaikide-idazkariaren ordezkoa: Laura Álvarez Berango, Abesbatzen zuzendaria eta musika hizkuntzako irakaslea Noain Elortzibarko Udalaren Musika Eskolan.
5.2. Epaimahaiko kideek parte hartzeari uko egin beharko diote eta Patronatuko buruari hala jakinarazi, baldin indarreko legerian horretarako aurreikusiak dauden arrazoiak gertatzen badira.
Izangaiek, halaber, zilegi dute epaimahaikideak errekusatzea, inguruabar horietako bat gertatzen denean.
Epaimahaia aldatzen bada, epaimahaikideek beraiek uko egiteko edo haiek errekusatzeko legez ezarritako kasuak direla eta, aditzera emanen da, behin betiko zerrendarekin batera.
5.3. Hautaprobak hasi baino lehen eratuko da epaimahaia.
Epaimahaia ezin izanen da eratu, ezta jardun ere, gutxienez kideen gehiengo osoa bertaratzen ez bada. Halaber, epaimahaiaren eraketak balio izateko, mahaiburuak eta idazkariak bertan egon beharko dute.
5.4. Epaimahaiak gehiengoz ebatziko ditu deialdiko oinarrien interpretazio eta aplikazioari buruz sortzen diren gorabeherak.
5.5. Epaimahaiak aholkulari adituen laguntza eska dezake probarako. Aipatu aholkulariak beren espezialitate teknikoetan baizik ez dira ariko eta haietan oinarriturik bakarrik emanen diote laguntza epaimahaiari.
6. oinarria.–Hautapen prozesuaren nondik norakoa eta balorazioa.
6.1. Hautapen prozesuak, zerrenda eratzeko, bi zati izanen ditu:
6.1.1 Merezimenduen balorazioa (30 puntu gehienez):
Epaimahaiak izangaiek aurkezturiko merezimenduak baloratuko ditu, ondoko baremoaren arabera. Izangaiek merezimenduak agirien bidez aurkeztu eta egiaztatu beharko dituzte eskabidea aurkeztearekin batera eta hari atxikirik geratuko dira.
A.–Laneko esperientzia (20 puntu gehienez):
A.1.–Akordeoiko irakasle gisa, administrazio publikoen musika eskoletan edo kontserbatorioetan egindako zerbitzuak; ikasturte oso bakoitzeko, betiere akordeoiko irakasle gisa aritutako lanaldiaren araberan: 1,50 puntu.
Ikasturtearen zatiki bakoitzeko eta lanaldiaren proportzioan. Eskatutako lanpostuetan egindako hilabete bakoitzeko: 0,125 puntu.
A.2.–Akordeoiko irakasle gisa zentro pribatuetan egindako zerbitzuak, ikasturte oso bakoitzeko eta lanaldiaren proportzioan (5 puntu gehienez): 0,75 puntu.
Ikasturtearen zatiki bakoitzeko eta lanaldiaren proportzioan. Hilabete bakoitzeko: 0,06 puntu.
B.–Prestakuntza (4 puntu gehienez):
–Instrumentuen espezialitateetarako:
B.1.–Akordeoiko goi mailako titulua izatea: 3 puntu.
B.2.–Goi edo erdi mailako titulua izatea beste espezialitate batean: 0,50 puntu.
B.3.–Pedagogiaren arloko titulua izateagatik, goi mailakoa edo erdi mailakoa: 0,50 puntu.
C.–Bertze merezimendu batzuk (gehienez ere 6 puntu).
C.1.–Aurkeztu nahi diren beste merezimendu batzuk, Akordeoia espezialitatearekin harremana dutenak eta izangaiak behar bezala egiaztatu baditu, baldin aurreko apartatuetan baloratu ez badira.
Kontzertua ematea akordeoiko bakarlari gisa: 0,5 puntu.
Kontzertua ematea talde batean akordeoia joz: 0,25 puntu.
Akordeoia espezialitateari buruzko prestakuntza ikastaroak egitea: 0,25 puntu.
Musika diziplinari buruzko idazkiak argitaratzea: 0,5 puntu.
Izangaiek aurkeztutako merezimenduen gaineko argibideak eta datu osagarriak eskatzen ahalko ditu epaimahaiak, edozein unetan.
6.1.2 Ariketa praktikoa (gehienez 70 puntu).
Bi proba egin beharko dira:
A.–Proba praktikoa, musikala (20 puntu):
Bakarlari gisa norberak aukeratutako bi tema edo gehiago interpretatzea, gehienez ere hamar minutuko iraupenarekin, denera. Izangaiak interpretatutako lanetan, baloratuko dira alderdi teknikoak, musikalak, eta soinuari eta estiloari dagozkionak.
B.–Idatzizko proba (50 puntu):
Idatzizko proba bat eginen da, Akordeoia espezialitatearen irakaskuntzaren gainean epaimahaiak proposatzen dituen galderen inguruan.
Baloratuko dira azaldutako edukien argitasuna, koherentzia eta aplikagarritasuna, epaimahaiak planteatutako egoerarekin lotuta, baita izangaiak erabilitako baliabide didaktikoen aniztasuna eta aberastasuna.
6.2. Probetarako deialdi bakarra eginen da; hartara, izangaiak nortasun agiri nazionala aldean dutela azaldu beharko dira.
Agertzen ez diren izangaiak bazterturik geldituko dira.
7. oinarria.–Hautaprobak gainditzen dituztenen zerrenda eta lanean hasteko deia.
7.1. Proben kalifikazioa amaiturik, epaimahaiak jendaurrean jarriko ditu probak gainditzen dituzten izangaien zerrendak, Musika Eskolako iragarki-taulan eta Noain Elortzibarko Udalaren www.noain.es webgunean, lortu duten puntuazio osoaren hurrenkeran, eta alegazioetarako bost egun naturaleko epea irekiko da.
Epea amaituta eta, hala dagokionean, alegazioak ebatzita, epaimahaiak Patronatuko lehendakariari gainditu dutenen behin betiko zerrenda bidaliko dio onetsi dezan. Zerrendan agertuko dira izena, abizenak, identifikazio agiria eta puntuazioa, eta jendaurrean jarriko dira Musika Eskolako iragarki-taulan eta Udalaren http://www.noain.es/eu/ webgunean.
7.2. Noain Elortzibarko Udalaren Musika Eskolan gertatzen diren premien arabera eginen zaie dei gainditu duten izangaiei, deialdi honetako oinarrietan ezarritakoarekin bat eta aplikatzekoak diren gainerako arauei jarraituz.
8.–Zerrendaren kudeaketa.
8.1. Deialdi honetan jasotako lanpostuetan langile beharren bat sortzen den bakoitzean, amaierako puntuazio osoaren ordenaren arabera (handienetik txikienera) deituko ditu izangaiak Noain Elortzibar Udalaren Musika Patronatuak.
Izangaiak lan eskaintza egiten zaion egunean bertan onartuko du edo uko egin beharko dio (ezintasuna justifikatua denean), eta betiere, izangaia lanean hasteko egun eta ordutik behar bezainbesteko tartearekin.
Izangaiak ez badu lan eskaintza onartzen edo ez badio uko egiten behar besteko tartearekin, harreman laboralari eta zerbitzuari hasiera emateko, automatikoki hurrengo izangaiari deituko zaio.
Lan eskaintza onartu eta lanean hasteko agertu ezean, edo harreman laborala formalizatzeko beharrezko dokumentazioa formalizatzeko agertu ezean, izangaia automatikoki baztertuko da zerrendatik, langileak behar diren hurrengo aldietarako.
Lan eskaintzari uko egitea ez da izanen zerrendatik baztertzeko arrazoi eta ez da inolako zigorrik ezarriko, baldin eta justifikatua bada, motibatua eta arrazoizkoa.
8.2. Iraupen mugagabea izanen du izangaien zerrenda honek, helburu baitu deialdiko lanposturako langile beharrak asetzea. Indarrean egonen da harik eta, akordeoiko irakaslearen lanpostu bererako, Noain Elortzibarko Udalaren Musika Patronatuak deitzen duen hurrengo hautapen prozesu berria amaitzen den egunera arte. Orduan, automatikoki indargabetuko da.
9. oinarria.–Errekurtsoak.
Deialdi honen, oinarrien eta aplikatzeko egintzen aurka errekurtso hauetako bat aurkez daiteke, hautara:
a) Berraztertzeko errekurtsoa, egintza eman duen organo berari zuzendua, hilabeteko epean, hura jakinarazi edo argitaratu eta biharamunetik hasita.
b) Administrazioarekiko auzi-errekurtsoa, Administrazioarekiko Auzien Iruñeko Epaitegiari zuzendua, bi hilabeteko epean, errekurtsoaren xedeko egintza edo erabakia jakinarazi edo argitaratu eta biharamunetik hasita.
c) Gora jotzeko errekurtsoa, Nafarroako Administrazio Auzitegiari zuzendua, hilabeteko epean, hau jakinarazten denetik aitzina.
II. ERANSKINA
Inskripzio fitxa (PDFa).
Iragarkiaren kodea: L1904231
