Iragarkia

9. ALDIZKARIA - 2019ko urtarrilaren 15a

1. NAFARROAKO FORU KOMUNITATEA

1.4. DIRU-LAGUNTZAK, LAGUNTZAK ETA BEKAK

999E/2018 EBAZPENA, abenduaren 19koa, Ingurumeneko eta Lurraldearen Antolamenduko zuzendari nagusiak emana, zeinaren bidez onesten baita Nafarroako irabazi-asmorik gabeko ingurumen entitateei ehizazainak kontratatzeko, ehiza-espezieen habitata hobetzeko eta kalteak prebenitzeko eman beharreko laguntzen 2018-2019ko deialdia. DDBN identifikazioa: 430445.

Nafarroako Ehizari eta Arrantzari buruzko abenduaren 22ko 17/2005 Foru Legea aldatzen duen apirilaren 4ko 4/2014 Foru Legearen 51. artikuluak ezartzen du zer jarduketa egiteko den beharrezkoa barrutiek ehiza-zaintzako sistema bat izatea, barrutiaren kudeatzaileek jarri beharko dutena. Era berean, Nafarroako Ehizari eta Arrantzari buruzko 17/2005 Foru Legearen 52. artikuluak (“Ehiza sustatzeko neurriak”) ezartzen du Nafarroako Gobernuak diru-laguntzak ematen ahalko dituela zaintza sistema bat ezartzeko.

Ehiza jarduera iraunkorra izateko tresna lagungarritzat hartzen da ehizazaina, bereziki Nafarroa bezalako kasuetan, non ehiza jarduera basa faunako populazioetan oinarritzen baita. Ehizazainei eskatzen zaien prestakuntzak, barnean direla ekosistemei eta basa faunari buruzko ezagupenak, bermatu behar du titularrek egiten duten ehizaren kudeaketak babes teknikoa duela.

Orobat, ehizazaina funtsezko elementua da kudeaketaren arloan, batzuetan ehizazaina baita landa-inguruneko eragileen arteko zubi lana ongien egiten duena, hala nola barrutiaren kudeatzaileen eta nekazari eta abeltzainen artean.

Bestetik, Nafarroako Ehizari eta Arrantzari buruzko abenduaren 22ko 17/2005 Foru Legeak, 52. artikuluan (“Ehiza sustatzeko neurriak”), beste hainbat kontzepturen artean laguntza ekonomikoak ezartzea aurreikusten du, ehiza-espezieek eragiten dituzten kalteen kontrolerako neurriak hartzeko. Gainera, Basa Fauna eta Haren Habitatak Babestu eta Kudeatzeari buruzko martxoaren 5eko 2/1993 Foru Legeak, bere 2. eta 4. artikuluetan, gaitasuna ematen dio administrazioari neurriak gauzatzeko basa fauna kontserbatzeko.

Laguntza hauek orain urte anitzekoak direnez eta aldez aurretik ematen direnez, eskabideak prestatzeko eta aurkezteko prozesuak eta administrazio tramiteei lotutakoak, hots, laguntzak esleitzea, egiaztagiriak aurkeztea, ordainketa egitea eta jarraipena egitea, bat etortzen ahalko dira neurriak gauzatzeko teknikoki egokienak diren datekin.

Horregatik guztiagatik, beharrezkotzat jotzen da Nafarroako irabazi-asmorik gabeko ingurumen entitateei ehizazainen kontratazioa, ehiza-espezieen habitataren hobekuntza eta kalteen prebentzioa partzialki finantzatzeko eman beharreko laguntzak ematen jarraitzea.

Adierazitakoarekin bat, Nafarroako Foru Komunitateko Administrazioari buruzko abenduaren 3ko 15/2004 Foru Legearen 22. artikuluak eta Landa Garapeneko, Ingurumeneko eta Toki Administrazioko Departamentuaren oinarrizko egitura organikoa ezartzen duen irailaren 21eko 78/2016 Foru Dekretuak ematen dizkidaten eskudantziak erabiliz,

EBATZI DUT:

1. Onestea Nafarroako irabazi-asmorik gabeko entitateei ehizazainak kontratatzeko, ehiza-espezieen habitata hobetzeko eta kalteak prebenitzeko eman beharreko laguntzen 2018-2019ko deialdia.

2. Laguntzak emateko oinarri arautzaileak onestea. Ebazpen honen I., II., III. eta IV. eranskinetan ageri dira.

3. Deialdi honen gastu konpromisoei aurre egiteko, jarraian adierazten diren aurrekontuko kredituak baimentzen dira, 2018ko ekitaldiko gastu partiden baliokideak direnak:

4. Ebazpena eta eranskina Nafarroako Aldizkari Ofizialean argitaratzea, eta ohartaraztea deialdiak ez duela ondoriorik sortuko harik eta bere laburpena Nafarroako Aldizkari Ofizialean argitaratu arte.

5. Oinarri arautzaile hauek eta dagokien deialdia Diru-laguntzei buruzko Datu-base Nazionalean (DDBN) erregistratzea.

6. Ebazpen honek ez du administrazio bidea amaitzen, eta bere aurka gora jotzeko errekurtsoa jartzen ahal da, Landa Garapeneko, Ingurumeneko eta Toki Administrazioko kontseilariari zuzendua, hilabeteko epean hura argitaratu eta biharamunetik hasita. Administrazio Publikoek administrazioarekiko auzi-errekurtsoa jartzen ahal dute, eskumena duen ordena jurisdikzionalari zuzendua, honako hau argitaratu eta biharamunetik hasita bi hilabeteko epean, alde batera utzi gabe Nafarroako Gobernuan aldez aurreko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan aurreikusitako moduan eta epeetan.

Iruñean, 2018ko abenduaren 19an.–Ingurumeneko eta Lurraldearen Antolamenduko zuzendari nagusia, Eva García Balaguer.

I. ERANSKINA

Oinarri arautzaileak, Nafarroako irabazi-asmorik gabeko ingurumen entitateei ehizazainak kontratatzeko, ehiza-espezieen habitata hobetzeko eta kalteak prebenitzeko eman beharreko 2019ko laguntzenak

1. oinarria.–Xedea.

Oinarri hauen xedea da Nafarroako irabazi-asmorik gabeko ingurumen entitateei ehizazainak kontratatzeko, ehiza-espezieen habitata hobetzeko eta kalteak prebenitzeko eman beharreko laguntzak arautzea 2018-2019 kanpainarako, honako gastu hauen zati bat ordaintzeko: ehizazainen kontratazioa eta ehiza-espezieen habitata hobetzeko eta kalteak prebenitzeko jarduketak.

2. oinarria.–Laguntzen helburua.

Ehizazainak kontratatzeko laguntzen helburua da baliabide naturalen jarraipena, kudeaketa eta mantentze-lanak egiteko behar den zaintza-lana modu iraunkorrean egotea barrutietan.

Kalteak prebenitzeko eta ehiza-espezieen habitatak hobetzeko laguntzen xedea da ehiza-espezie jakin batzuek nekazaritzako eta basogintzako habitatetan eragiten dituzten kalteak txikiagotzea edo murriztea eta habitatek espezie horiek hartzeko duten ahalmena hobetzea.

3. oinarria.–Onuradunak.

Laguntza hauek jasotzen ahalko dituzte Nafarroako irabazi-asmorik gabeko ingurumen entitateek, hala nola ehiza-elkarteek eta ingurumen elkarteek, baldintza hauek betetzen baldin badituzte eskaerak aurkezteko epearen barnean:

3.1. Ehizazainak kontratatzeko laguntzak jasotzeko, hiru baldintza hauek bete behar dira:

–Ehizazainak Nafarroako ehizazain titulua izan behar du, irailaren 4ko 94/2012 Foru Aginduaren arabera.

–Deialdiaren aldirako kontratatutako zerbitzuak 3.000 eurotik gorakoak izatea (soldata gordina edo BEZa kanpo) eskabide bakoitzeko.

–Ehizazainak ez du, deialdi honen epealdian zehar, desgaitua egon behar ehizarekin lotutako jardueretarako.

3.2. Habitata hobetzeko eta kalteak prebenitzeko laguntzei dagokienez, eskatutako inbertsioak 1.000 eurotik gorakoa (BEZa kanpo) izan behar du.

4. oinarria.–Eskaerak onartzeko irizpideak.

Eskaerak tramitera onartuak izateko, onuradunek baldintza hauek bete beharko dituzte:

4.1. Eskabideek behar bezala beteta eta sinatuta egon beharko dute.

4.2. Diru-laguntzei buruzko azaroaren 9ko 11/2005 Foru Legearen 13. artikuluan laguntzen onuradun izateko ezarritako debeku-egoeretako bakar batean ere ez egotea. Eskabidean sartutako erantzukizunpeko adierazpenaren bidez frogatzen ahalko da hori.

4.3. Tributu arloko betebeharrak eta Gizarte Segurantzarekikoak egunean izatea. Zerga arloko eginbeharrak eta Gizarte Segurantzarekikoak eguneraturik dauzkala frogatzeko, interesdunari jakinarazten zaio ezen eskaeran baimena ematen diola departamentuari hura frogatzen duten datuak diru-laguntzaren gaineko ebazpen proposamena ematen denean begiratzeko.

4.4. Nafarroako Foru Komunitateko administrazioarekiko zorrik ez izatea.

4.5. Ehizan aritzeko zehapen irmorik ez izatea edo ingurumen arloko beste arau-hauste batzuen ondoriozko zehapen irmorik.

5. oinarria.–Gastu diruz lagungarriak.

5.1. Ehizazainen kasuan, gastu diruz lagungarriak izanen dira 2018ko urriaren 1etik 2019ko irailaren 30era bitarte ehizazainak kontratatzetik sortutako haiek. 7.2.3 apartatuan aipatzen diren ehizazainen berariazko lanak eta horiei lotutako kostuak baino ez dira izanen diruz lagungarriak. Hala denean, kontratuak diru-laguntzaren xede ez diren beste zereginak zehaztu, eta horien banakapen ekonomikoa egin beharko du.

5.2. Ehiza-espezieen habitatak hobetzeko eta kalteak prebenitzeko, gastu diruz lagungarriak izanen dira (BEZa kanpo), jarduketa hauetatik eratorritako haiek, jarraian aipatzen diren baldintza tekniko hauen arabera. Adostasunik ez bada, Nafarroako tarifa ofizialak erabiliko dira:

A.–Laboreak babesteko hesi fisikoak:

A.1. Laboreak babesteko sareen kostu materiala, haiek ongi funtzionatzeko behar diren osagai guztiak barne. Metro bat altu izanen dira gutxienez, 20 zentimetro lurrean sartuta dutela. Sare-hesiak, justifikatutako kasuetan izan ezik, labore iraunkorretan ezarriko dira edo balio ekonomiko handikoetan, hala nola, mahastietan, olibadietan edo beste fruta-arbola batzuen alorretan, zainzuri, brokoli edo beste barazki batzuen sailetan.

A.2. Babes hodien edo antzeko sistemen kostu materiala, haiek ongi funtzionatzeko behar diren osagai guztiak barne.

A.3. Laboreak babesteko hesi elektrikoen kostu materiala, haiek ongi funtzionatzeko behar diren osagai guztiak barne. Hari kopuruak eta haien arteko tarteak kasu bakoitzerako egokiak izan beharko dute, eta baterien edo korronte elektrikoaren bidez elikatuko dira, halako moduan non haren intentsitatea etxeko abereentzat erabili ohi dena halako bi izan dadin.

A.4. Esperimentazioko kalteak prebenitzeko beste modalitate batzuk, behar bezala justifikatuak eta oinarri zientifikoa dutenak. Proposamenaren oinarri edo argudioen iturri diren aurreko azterlan teknikoak aipatu beharko dira.

Hesi fisikoen ezarpenetik eta mantentze-lanetik sortutako gastu eta jarduketak ez dira diruz lagunduko. Nolanahi ere, hornitutako materialak gutxienez 5 urteko bizitza baliagarria izan beharko du. Lurzati eta nekazari jakin batzuentzako sare motako materialaren eta hodi babeslearen eskaera ezin da berriz egin hurrengo bosturtekoan.

B.–Lur-zerrendak eta ildo-bitarteak nekazaritzako lurzatietan. Izan daitezke:

B.1. Uztatu gabeko labore zerrendak lurzatien ertzean. Gutxienez 2 metrotik 5era arteko zabalera duten zerrenda guztiak, diru-laguntza ematen den egunean, eta gutxienez abuztuaren 15era bitarte, uztatu ez badira eta laboreak dentsitate funtzionala badu, hau da, laboreak eskatzen den azaleraren %80 gutxienez estaltzen badu. Egun horretatik aurrera beren aprobetxamendua baimentzen da, besteak beste bazkatzeko, bai eta hurrengo laborantza ziklorako lur-lantzea ere.

B.2. Landu gabeko lur-zerrendak nekazaritzako lurzatietan. 2 eta 5 metro arteko zabalera duten zerrenda hauek ez dute prestakuntza lanik edo tratamendu fitosanitariorik jaso behar izan, eta belar landaretza naturala mantendu beharko da. Zerrenda hauetan ezin da lur-lantzerik egin irailaren 1era arte, baina bazkatzeko aprobetxamendua abuztuaren 15etik aurrera baimentzen ahal da.

Diru-laguntzaren portzentajea aplikatzeko gehieneko prezioa ondoko taulako balioen araberakoa izanen da. Taula horretan lehorreko lurretako errendimenduaren eta merkatuko prezioaren azken bost urteetako batez besteko balioak agertzen dira, Informazioa Integratzeko eta Ezagutza Sortzeko Ataleko Estatistika Bulegoaren datu ofizialen arabera kalkulatuak:

B.3. Ildo-bitarteak edo ezpondak sortzea: gehienez 4 metroko zabalera eta 25 zentimetrotik gorako batez besteko goragunea dituzten ildo-bitarteak edo ezpondak sortzea sustatuko da. Ildo-bitarte edo ezponda horiek berez bilakatzen uzten ahalko dira, edo erein eginen dira, C.1 modalitateari helduta. Nolanahi ere, ezin izanen dira aldatu edo horien gainean lur-lantzerik egin irailaren 1era arte, baina bazkatzeko aprobetxamendua abuztuaren 15etik aurrera baimentzen ahal da.

Diru-laguntzaren portzentajea aplikatzeko gehieneko prezioa (BEZik gabe) 540 eurokoa izanen da hektareako.

C.–Faunarako ereintzak.

Jarduketa hauen gastuak izanen dira diru-laguntzaren xede:

C.1. Lurra prestatzeko lanak, ereintza eta hazien kostua. Diru-laguntzaren portzentajea aplikatzeko gehieneko prezioa (BEZik gabe) 564 eurokoa izanen da hektareako. Neurri hori bateragarria da B.3 modalitatearekin.

C.2. Lurzatiak alokatu edo errentatzeagatiko kostuak. Diru-laguntzaren portzentajea aplikatzeko gehieneko prezioa (BEZik gabe) 215 eurokoa izanen da hektareako.

Ereintza zurezko laboreen azpian egiten denean (olibondoen, mahatsondoen, arbendolondoen... azpian), baldintza bakarra dago: ereintza dosia 50 kg/ha baino handiagoa izatea eta fauna babesteko dentsitate funtzionala izatea abuztuaren 15era bitarte. Dentsitate funtzionaltzat jotzen da laboreak eskatzen den azaleraren %80 gutxienez estaltzea.

Gainerako lurzatietan ereiteko, baldintza tekniko hauek bete behar dira:

–Ezartzen da gehieneko ereintza azalera diruz lagungarria hektarea batekoa izanen dela lurzatiko.

–Lurzatiak ez dira uztatuko, eta bazkatzeko aprobetxamendua abuztuaren 15etik aurrera baimentzen ahal da.

Ahal dela ez da ongarri mineralik erabiliko, salbu eta justifikatuta badago; hots, tokiko baldintzak direla-eta bermatuta ez badago ereindakoaren nolabaiteko hazkundea. Galarazita dago lurzati horietan produktu fitosanitarioak erabiltzea.

D.–Sastraka garbitzea, fauna-espezieen habitata hobetzeko. Diruz lagunduko dira sastraka garbitzeko lanak, eskuz eginak edo mekanizatuak, ehiza-espezieentzat balio handikoak diren ekotonoak leheneratzeko asmoz. Eremuan dauden zuhaitz handiak eta espezie frutikosoak errespetatu beharko dira.

E.–Zuhaitzak eta/edo zuhaixkak landatzea sailean, lerroan edo han-hemenka. Jarduera hauen gastuak izanen dira diru-laguntzaren xede:

E.1. Lurra prestatzeko lanak, landarearen eta landatzearen kostuak.

E.2. Landaketak lehendabiziko urteetan babesteko sistemen ezarpena eta kostu materiala.

E.3. Udako garbiketak eta mantentzeko ureztaketak 5 urte baino gutxiagoko landaketetan.

E.4. Landaretza sortzea edo hobetzea fauna-espezieentzat interesa duten idoietan. Lehendik dagoen landaretza errespetatuko da. Landaketak eginen dira bertako zuhaixken espezieak erabiliz.

–Ezartzen da gehieneko azalera diruz lagungarria hektarea batekoa izanen dela zuhaiztiko.

–Halaber, jarduketa honetan diruz lagungarritzat joko dira zuhaitz- eta zuhaixka-espezieak –lerro itxurakoak– eta hesiak ere, horiek guztiek inguruneari egokitutako espezie autoktonoak badituzte.

–Horrez gain, diruz lagungarria izanen da lekura egokitutako zuhaitzak edo zuhaixkak sail zabaletan landatzea; mota horretako sailak izanen dira 5 metro koadroko azalera edo handiagoa dutenak edukiera zatiki txikia estalita duten eremuetan.

F.–Fauna-espezieentzako idoi egokiak. Jarduera hauen gastuak izanen dira diru-laguntzaren xede:

F.1. Fauna-espezieentzat interesa duten idoiak sortzea. Diruz lagungarriak izanen dira idoi txikiak egiteko material eta eraikuntza gastuak; idoi txikitzat hartuko dira 400 m³ baino gutxiago bil ditzaketen haiek. Halaber, diruz lagungarriak izanen dira lehendik dauden ildoak konpontzeko edo hobetzeko lanak. Toki estrategikoetan kokatu behar dira, agorraldian haien funtzionaltasuna bermatzeko, eta ezpondaren tarteren batek gehieneko malda 2H/1V duela.

F.2. Fauna-espezieentzat interesa duten idoi txikiak garbitzea. Ezpondetako zati batean ez da kenduko uretako ekosistemei lotutako landare-komunitatea; azalera horrek idoiaren perimetroaren %10 hartuko du gutxienez.

F.3. Fauna-espezieentzat interesa duten idoiak berez birsortzeko itxiturak sortzea. Diruz lagungarriak izanen dira materialaren kostua eta idoien inguruan itxitura partzialak ezartzeko lanak.

G.–Ikerketa aplikatuko proiektuak: diruz lagungarriak izanen dira kalteak prebenitzeko edo ehiza-espezieen habitata hobetzeko helburua edo biak dituzten ikerketa aplikatuko proiektuak, baldin eta denboran sekuentziatutako ekintzak biltzen ahal badituzte, aldez aurreko argitalpenetan edo ikerketa zientifikoetan oinarritzen badira, eta arloan erreferentzia diren ikerketa zentroek, unibertsitate zentroek edo bestelako erakunde ofizialek ziurtatzen badituzte, lurrean aplikatutako ekintza horiek eraginkorrak direla egiaztatzen duten saiakuntzak egite aldera. Lan diruz lagungarriek honako alderdi hauetako baten bat bil dezakete: ingurunean lanak egitea, materiala erostea, laboreak lantzeko kontratuak egitea, jarraipena eta monitorizazioa gauzatzea, eta dokumentazio teknikoa lantzea. Ziurtagiriarekin batera, derrigorrezkoa izanen da memoria bat aurkeztea, egindako lanak, gauzatutako jarraipena eta erabilitako adierazleak zehazten dituena.

H.–Dokumentazio teknikoa lantzea: dokumentazio teknikoari eta, hala balegokio, obra zuzendaritzari lotutako diru-laguntza ordaintzeko, ezinbestekoa da Atik Fra arteko ataletan jasotako beste neurriren bat onartua izatea, eskaera telematika bidez aurkeztea zerbitzuen katalogoko fitxa erabilita, eta honako hauek eranstea: alde batetik, II. eranskinaren laburpen fitxa, .xls luzapena duen euskarri digital editagarria edo horrekin bat datorrena agertzen duena; eta, beste aldetik, lanen kokapena adierazten duen kartografia, .shp luzapena duen euskarri digital editagarria edo horrekin bat datorrena agertzen duena eta informazio geoerreferentziatua adierazten duena. A modalitateko ekintzek ez dute kartografia digitalik behar.

6. oinarria.–Diru-laguntzaren zenbatekoa.

6.1. Ehizazainak kontratatzeko laguntzetarako, ehizazain bakoitzeko gehienez emanen den diru-laguntza aipatu aldiari dagokion soldata gordinaren %40 izanen da. Kontratua zerbitzuak ematekoa baldin bada, deialdian ezarritako aldiari dagokion kontratuan agertzen den zenbatekoaren %40 (BEZa kanpo) lagunduko da diruz.

6.2. Habitata hobetzeko eta kalteak prebenitzeko laguntzetarako, honako hau izanen da diru-laguntzaren gehieneko zenbatekoa:

–B eta G modalitateetan eskatzen diren laguntzetarako onartutako kostuaren %80 (BEZa kanpo).

–A, C, D, E eta F modalitateetan eskatzen diren laguntzetarako onartutako kostuaren %60 (BEZa kanpo).

–H modalitatean eskatzen diren laguntzarako, diru-laguntza A, B, C, D, E, F eta G modalitateetarako onartzen den aurrekontuaren %10 izanen da, nahiz eta 400 eurokoa aplikatuko den gehienez A modalitateari dagokion diru-laguntza partzialki kalkulatzeko.

Nolanahi ere, diru-laguntzak emateko, Administrazioak baliabide ekonomikoak izan beharko ditu eta behar adinako kreditua aurrekontuetan, eskaeraren gaineko ebazpen administratiboa emateko unean.

7. oinarria.–Eskaerak eta eskatutako dokumentazioa aurkeztea.

7.1. Eskaerak aurkeztea.

7.1.1. Eskaerak telematika bidez aurkeztu beharko dira, zerbitzuen katalogoko fitxa erabilita, 30 egun naturaleko epean, deialdia Nafarroako Aldizkari Ofizialean argitaratu eta biharamunetik aurrera zenbatuta. Halaber, Administrazio Publikoen Administrazio Prozedura Erkideari buruzko urriaren 1eko 39/2015 Legearen 16.4 artikuluan aipatzen diren lekuetako edozeinetan aurkez daitezke, Ingurune Naturalaren Zerbitzuari zuzendurik.

7.1.2. Eskaera posta-bulego batean aurkezten bada, gutun-azalak irekita egon beharko du, lehen orriko goiko aldean agerrarazteko bulegoaren izena, eguna, tokia eta ordua (minutu eta guzti); datu horiek guztiak gordekinean ere azaldu beharko dira.

7.1.3. Eskaera harturik, oinarri hauetan ezarritako baldintzak betetzen dituen egiaztatuko da. Eskaerak aipatutako baldintzak betetzen ez baditu, interesdunari eskatuko zaio gehienez ere 10 egun balioduneko epean zuzendu dezala, eta ohartaraziko, hala egin ezean, eskaera bertan behera uzten duela ulertuko dela, eta espedientea artxibatzeko ebazpena emanen. Halaxe jakinaraziko zaio.

7.2. Eskatzen den dokumentazioa:

7.2.1. II. eranskineko eskabide-orria, gardentasun betebeharrari buruzko adierazpena biltzen duena. Eskaera telematika bidez aurkezten bada zerbitzuen katalogoko fitxa erabilita, fitxa horretako eremuak bete behar dira.

7.2.2. Eskatzaileak laguntzak lehenbizikoz hartu behar dituenean edo haiek kobratzeko kontua aldatu nahi duenean, transferentzia bidez kobratzeko eskabidea aurkeztu beharko du Foru Ogasuneko Diruzaintzan, behar bezala beterik eta sinaturik.

7.2.3. Ehizazainak kontratatzeko eskaeretarako, kontratua aurkeztu beharko da, haren iraupena eta kontratatutako ordu kopurua zehaztuta, bai eta egin beharreko lanak ere; zehatz-mehatz, kontratuak ehizazainaren honako eginkizun, baldintza eta konpromiso hauek jaso beharko ditu:

–Ehizari buruzko datuen kontrol administratiboa egitea.

–Administrazioaren, ehiztarien eta nekazarien edo abeltzainen arteko lotura.

–Kalteak kudeatzea (prebenitzea eta kontrolatzea).

–Zaintza.

–Ehiza-espezieen populazioen kontrola eta segimendua egitea.

–Harrapakarien kontrola.

–Habitata kudeatzea.

–Seinaleak eta beste azpiegitura batzuk (adibidez, usategiak) mantentzea: garbiketa, kokapenaren kontrola, egoera....

–Administrazioari laguntzea, ehizaren kudeaketa errazteko eskatzen zaionean.

–Nafarroako Foru Komunitateko Administrazio Publikoak ehiza espezialitateko landazainentzat antolatzen dituen prestakuntza ikastaroetara joatea.

Ehiza barruti batzuk elkartzen badira ehizazain bat kontratatzeko, elkarte guztiek bete beharko dituzte baldintza hauek.

7.2.4. Habitatak hobetzeko eta kalteak prebenitzeko eskaeretarako, honako hauek ere aurkeztu beharko dira:

a) “Ehiza-espezieen habitata hobetzeko eta kalteak prebenitzeko lanen laburpena” fitxa (II. eranskina). Eskaera telematika bidez aurkezten bada zerbitzuen katalogoko fitxa erabilita, fitxa horretako eremuak bete behar dira.

b) Hala denean, A, B, C, D, E, F eta G motako ekintzetan proposatzen diren ekintzen kokapena agertzen duen kartografia.

c) F modalitaterako, ikerketa aplikatuko proiektuak: memoria teknikoa, honako hauek bilduko dituena: ekintzen deskribapena, aurreikusitako kronograma, planoak eta aurrekontua, eta proiektua oinarritzen den erreferentzia bibliografikoak, ikerketa zentroen, unibertsitateen eta erakunde ofizialen argitalpenak, ikerketa zientifikoak edo txostenak izan zein ez. Hala denean, aurreikuspenen arabera ekintzak eginen diren lurren titularren baimena eta/edo borondatezko lankideekin lortutako kontratuak edo akordioak.

8. oinarria.–Diru-laguntzak emateko lehentasun irizpideak.

8.1. Kalteak konpontzeko eta habitata hobetzeko laguntzak norgehiagokako prozeduraren bidez izapidetuko dira.

Ehizazainak kontratatzeko laguntzei dagokienez, kontuan hartuta kudeaketaren arduradun diren aldetik barrutiek ehiza-zaintzako zerbitzua kontratatzeko betebehar bera dutela, 17/2005 Foru Legearen 51. artikuluaren arabera, bereizkeriarik ez egiteko, eskaerak aurrekontuko eskaintza gainditzen badu, diru-laguntza hainbanatuko da baldintzak betetzen dituzten espediente guztien artean.

8.2. Ehiza-espezieen habitatak hobetzeko eta kalteak prebenitzeko neurriei aplikagarri zaizkien lehentasun irizpideak:

8.2.1. Eskaeren hurrenkera emandako puntuen arabera eginen da, honako balorazio irizpide hauen arabera:

8.2.2. Eskaera batzuek puntuazio bera baldin badute, inbertsio ekonomiko handiagoaren irizpidea aplikatuko da, modalitateen lehentasun-ordena honi jarraikiz: A, G, B, C, D, E eta F.

9. oinarria–Ebaluazio organoa.

Ingurumeneko eta Lurraldearen Antolamenduko Zuzendaritza Nagusiko Ingurune Naturalaren Zerbitzuari dagokio neurri honetan aurreikusitako laguntzak emateko prozeduren instrukzioa.

10. oinarria.–Diru-laguntza esleitzeko prozeduraren instrukzioa.

10.1. Ingurune Naturalaren Zerbitzuak, egindako ebaluazioa ikusita, laguntzak nori eman proposatzen duen txostena eginen du, eta Ingurumeneko eta Lurraldearen Antolamenduko Zuzendaritza Nagusiari igorriko.

10.2. Proposamen txostena egitean, instrukzio organoak egiaztatuko du onuradunak egunean dituela bere zerga betebeharrak eta Gizarte Segurantzarekikoak, eta, halaber, ez dagoela Diru-laguntzei buruzko azaroaren 9ko 11/2005 Foru Legearen 13. artikuluan onuradun izateko ezarritako ezein debeku egoeratan.

10.3. Kontrol horiek egiteko, instrukzio organoak oinarritzat hartuko ditu Foru Komunitatean eta/edo beste administrazio batzuetan dauden erregistro ofizialak edo eskura dauden bestelako informazio iturriak, betiere laguntza eskaera aurkezten den unean dagoen informazioaren arabera.

10.4. Ondoren, eskaerak ofizioz ebaluatuko dira norgehiagokako prozeduraren arabera eta arau hauetan ezarritako balorazio irizpide, modu eta lehentasunen arabera.

10.5. Ebaluazioa ikusirik, ebazpen proposamena eginen da, eta laguntza esleitzeko espedientean jaso beharko da onuradunak laguntza eskuratzeko behar diren baldintza guztiak betetzen dituela.

11. oinarria.–Ebazpena.

11.1. Ebazpen proposamena ikusirik, Ingurumeneko eta Lurraldearen Antolamenduko Zuzendaritza Nagusiak diru-laguntzak esleitzeari buruzko ebazpena emanen du.

11.2. Ebazpena arrazoitua izanen da, eta hartutako ebazpenaren oinarriak frogaturik egonen dira beti.

11.3. Diru-laguntza hartuko duten eskatzaileen zerrenda jaso beharko da ebazpenean, eta espresuki adieraziko da zein eskaera ezetsi diren, halakorik baldin bada.

11.4. Ebazpen proposamenean onartutako eskaerak agertuko dira, kasuan kasuko diru-laguntzak esleiturik, zortzigarren oinarrian ezarritako irizpideak aplikatuz lortutako puntuazioaren araberako hurrenkeran.

11.5. Ebazpenak eskatzaile bakoitzaren ingurumen eta ehiza baimenari buruzko alderdiak jasoko ditu.

11.6. Deialdia ixten den egunetik hiru hilabeteko epean jakinaraziko da ebazpena, eta honako hauek jasoko ditu: esleitutako diru-laguntzaren zenbatekoa justifikatzeko nahikoa den informazioa eta onuradunak bete behar dituen baldintzak eta konpromisoak.

11.7. Eskaera ezetsi egin dela ulertuko da baldin eta diru-laguntzaren oinarri arautzaile hauetan prozedura ebazteko ezarritako epea bukatutakoan berariazko ebazpenik eman ez bada. Aurkeztutako eskaeraren berariazko edo ustezko ezespenaren aurka interesdunek, administrazio publikoak izan ezik, gora jotzeko errekurtsoa jartzen ahalko dute, Landa Garapeneko, Ingurumeneko eta Toki Administrazioko kontseilariari zuzendua, administrazio prozedura erkideari buruzko legeriari jarraikiz.

12. oinarria.–Eskaerak aldatzea.

Ez da aldaketarik onartuko aurkeztutako eskaeretan.

13. oinarria.–Ordainketa eskaera: Egindako gastuen eta ordainketen justifikazioa.

Frogagiriak aurkezteko azken eguna 2019ko urriaren 11 izanen da. Frogagiri horiek telematika bidez edo Administrazio Publikoen Administrazio Prozedura Erkideari buruzko urriaren 1eko 39/2015 Legearen 16.4 artikuluan aipatzen diren tokietako edozeinetan aurkeztu beharko dira bideetako edozein erabiliz, Ingurune Naturalaren Zerbitzuari zuzendurik.

13.1. Ehizazainen kontrataziorako, agiri hauek aurkeztu beharko dira:

–Lan kontratua eginez gero, 2018ko urriaren 1etik 2019ko irailaren 30era bitarteko nomina guztien fotokopia, edo soldata gordinaren zenbatekoa kobratu izana justifikatzen duten beste agiri ofizial batzuena.

–Zerbitzu prestazioa izanez gero, 2018ko urriaren 1etik 2019ko irailaren 30era bitarteko jatorrizko fakturak edo horien fotokopia. Egindako gastua ordaindu dela frogatzearren, bankuetako frogagiriak erantsi beharko zaizkie ordainagiriei.

13.2. Habitata hobetzeko eta kalteak prebenitzeko, honako agiri hauek aurkeztu beharko dira:

–Egindako lanen egiaztagiriak, III. eranskineko ereduari jarraikiz. “Kalteen prebentzioa” izeneko A modalitateko ekintzen kasuan, hesi elektrikoetarako izan ezik, dagokion zutabea bete beharko da, materiala jasotzen duten nekazarien zerrenda eta nekazari horien sinadura barne. “Ikerketa aplikatuko proiektuak” izeneko G modalitateko ekintzen kasuan, derrigorrezkoa izanen da memoria bat aurkeztea, egindako lanak, gauzatutako jarraipena eta erabilitako adierazleak zehazten dituena.

–Egindako gastuen fakturak, edo, hala bada, kontratua eta ordainagiriak, jatorrizkoak edo fotokopiak izan, betiere onuradunaren izenean, eta ordainketa horiek frogatzen dituzten bankuko egiaztagiriak. 600 eurotik beherako fakturen kasuan, eskudiruzko ordainketa onartzen da, behar bezala egiaztatzen bada.–B eta C modalitateen kasuan (“Lur-zerrendak eta ildo-bitarteak nekazaritzako lurzatietan” eta “Faunarako ereintzak”, hurrenez hurren), nahikoa izanen da ordainagiria aurkeztea.

14. oinarria.–Diru-laguntza ordaintzea.

Egiaztagiriak azterturik, Ingurune Naturalaren Zerbitzuak ordaintzeko ebazpenaren proposamena igorriko dio Ingurumeneko eta Lurraldearen Antolamenduko Zuzendaritza Nagusiari. Horrekin batera, onuradunek diru-laguntza kobratzeko eskubidea sortzen duten eginbeharrak betetzen dituztela frogatzen duen memoria aurkeztuko da.

Ordainketa bakarrean pagatuko da.

15. oinarria.–Onuradunen betebeharrak, murrizketak eta ordainketa ez gauzatzeko arrazoiak.

15.1. Onuradunek Diru-laguntzei buruzko Foru Legearen 9. artikuluan ezarritako betebehar orokorrak bete beharko dituzte.

15.2. Lagundutako jarduerak finantzatzeko lortutako beste diru-laguntza edo laguntza batzuen berri eman beharko zaio organo emaileari.

15.3. Diru-laguntza emateko ebazpenetan, oinarri arautzaile hauetan edo Diru-laguntzei buruzko Foru Legean ezarritako betebeharren bat bete ezean, esleitutako diru-laguntza kobratzeko eskubidea galduko da, eta, bidezkoa bada, diru hori itzuli egin beharko da, foru lege horren 35. artikuluan xedatutakoari jarraikiz.

15.4. Halaber, aurreko betebeharretako bat hein batean betetzen ez bada, emandako diru-laguntzaren zenbatekoa berriro ere zehazten ahalko da, proportzionaltasun printzipioari jarraikiz, edo, zein den kasua, dagokion zenbatekoa itzuli beharko da.

15.5. Nafarroako Aurrekontu Orokorren kargurako diru-laguntzen entitate onuradunen gardentasunerako betebeharrak arautzen dituen irailaren 11ko 59/2013 Foru Dekretuaren 3. artikuluan ezarritako inguruabarretan dauden onuradunek foru dekretu horren 4. artikuluan aipatutako informazioa jakinarazi beharko dute hilabeteko epean, laguntza emateko ebazpena jakinarazten denetik hasita, Nafarroako Gobernuaren Erregistro Orokor Elektronikoaren bidez. Betebehar hori bete ezean, onartutako diru-laguntza kobratzeko eskubidea galduko da edo diru hori itzuli egin beharko da.

16. oinarria.–Diru-laguntzaren bateragarritasuna/bateraezintasuna.

16.1. Deialdi honen diru-laguntzak bateragarriak dira Foru Komunitateko Administrazioak, beste administrazio publiko batzuek, beste erakunde publiko nahiz pribatuek edo Espainiako nahiz atzerriko partikularrek emandako beste laguntza batzuekin.

16.2. Kasu horretan, jarduera bererako emandako diru-laguntzen zenbatekoak, bakarrik edo denak baturik, ezin izanen du gainditu onuradunak egin beharreko jardueraren kostua. Aurreko lerroaldean ezarritako ondorioetarako, onuradunak helburu horrexetarako beste diru-laguntzaren bat jasotzen baldin badu, Ingurune Naturalaren Zerbitzuari jakinarazi beharko dio, Diru-laguntzei buruzko azaroaren 9ko 11/2005 Foru Legearen 9. d) artikuluan xedaturikoarekin bat.

16.3. Kokaleku jakin batzuetako lanek ezin izanen dute diru-laguntzarik jaso, baldin eta kontzeptu berak (zehazki, lekadun haziez ereindakoak edo landu gabeko lur-zerrendak) “Estepako nekazaritza habitatak hobetzea” izeneko laguntza (Landa Garapeneko 2015-2021 Programan jasoa) duten nekazarien konpromisoen parte badira.

17. oinarria.–Emandako diru-laguntzen publizitatea.

Diru-laguntzei buruzko Foru Legearen 15. artikuluan xedatutakoarekin bat, Ingurune Naturalaren Zerbitzuak Nafarroako Gobernuak Interneten duen atarian,www.nafarroa.eusjarriko ditu ikusgai emandako diru-laguntzak, honako datu hauekin: deialdia, laguntza zein programari eta zein aurrekontu kredituri egozten zaion, onuraduna, emandako diru kopurua eta diru-laguntzaren helburua.

Diru-laguntzei buruzko 15.2 artikuluari jarraikiz, onuradunek, publizitate egokiaren bidez, aditzera eman behar dute diru-laguntzaren xede diren programek, jarduerek, inbertsioek eta edozein motatako ekintzek finantzaketa publikoa dutela.

II. ERANSKINA

Eskaera ereduak eta laburpen fitxa

2019. urtean ehizazainak kontratatzeko laguntzarako eskaera.

Ehiza-espezieen habitata hobetzeko eta kalteak prebenitzeko 2019ko laguntzarako eskaera.

Ehiza-espezieen habitata hobetzeko eta kalteak prebenitzeko lanen laburpen fitxa.

III. ERANSKINA

Egindako gastu eta ordainketak egiaztatzeko eta justifikatzeko eredua

Ehiza-espezieen habitata hobetzeko eta kalteak prebenitzeko egindako lanen egiaztapena.

Deskargatu beharreko artxiboak PDF formatuan daude.

Iragarkiaren kodea: F1815834