1. NAFARROAKO FORU KOMUNITATEA
1.1. XEDAPEN OROKORRAK
1.1.3. Foru Aginduak
29/2019 FORU AGINDUA, apirilaren 10ekoa, Kultura, Kirol eta Gazteriako kontseilariak emana, Kultura, Kirol eta Gazteriako kontseilariak azaroaren 23an emandako 38/2015 Foru Agindua aldatzen duena. Foru agindu horren bidez Kultura, Kirol eta Gazteria Departamentuaren eta Nafarroako Kirolaren eta Gazteriaren Institutua erakunde autonomoaren egitura organikoa garatu zen bulego mailan.
Kultura, Kirol eta Gazteriako kontseilariak azaroaren 23an emandako 38/2015 Foru Aginduaren bidez, Kultura, Kirol eta Gazteria Departamentuaren eta Nafarroako Kirolaren eta Gazteriaren Institutua erakunde autonomoaren bulego mailako egitura organikoa garatu zen.
Foru agindu honen xedea da Vianako Printzea Erakundea-Kultura Zuzendaritza Nagusiko bulegoen mailako egitura aldatzea, funtzionamenduaren eragimena eta eraginkortasuna hobetzeko.
Nafarroako Foru Komunitateko Administrazioari eta Foru-sektore publiko instituzionalari buruzko martxoaren 11ko 11/2019 Foru Legeak 34.4 artikuluan ezartzen du ezen, bulegoak eta ataletatik beherako unitateak sortu, aldatu eta kentzeko, unitate horiek zein departamentutan sartuko diren, hango titularraren foru agindua beharko dela.
Horrenbestez, Nafarroako Foru Komunitateko Administrazioari eta Foru-sektore publiko instituzionalari buruzko martxoaren 11ko 11/2019 Foru Legeak ematen dizkidan ahalmenak erabiliz,
AGINTZEN DUT:
Artikulu bakarra. Kultura, Kirol eta Gazteriako kontseilariak azaroaren 23an emandako 38/2015 Foru Aginduaren aldaketa. Haren bidez, Kultura, Kirol eta Gazteria Departamentuaren eta Nafarroako Kirolaren eta Gazteriaren Institutua erakunde autonomoaren egitura organikoa garatu zen bulego mailan.
Bat.–3. artikulua aldatzen da, eta honela idatzita geldituko da:
“3. artikulua. Vianako Printzea Erakundea-Kultura Zuzendaritza Nagusiaren egitura.
Vianako Printzea Erakundea-Kultura Zuzendaritza Nagusiak bulego hauek ditu bere egituran:
a) Ondare Historikoaren Zerbitzuaren menpe:
–Ondare Arkitektonikoa Zaintzeko Bulegoa.
b) Artxiboen eta Dokumentu Ondarearen Zerbitzuaren menpe:
–Dokumentuen eta Artxiboen Kudeaketa Sistema Administratzeko Bulegoa.
c) Museoen Zerbitzuaren menpe:
–Koordinazioaren eta Zerbitzuen Bulegoa.
–Ondare Etnologiko eta Immaterialaren Bulegoa.
d) Liburutegi Zerbitzuaren menpe:
–Ondare Bibliografiko eta Filmografikoaren eta Lege Gordailuaren Bulegoa.
–Jendearentzako Zerbitzuen Bulegoa.
–Informazio Baliabideen Bulegoa.
–Liburutegiak Koordinatzeko Bulegoa.
–Prestakuntza, Sustapen eta Hedapen Bulegoa.
e) Kultur Ekintza Zerbitzuaren menpe:
–Berrikuntza Bulegoa.
f) Baliabideen eta Garapen Estrategikoaren Atalaren menpe:
–Argitalpen Bulegoa.”
Bi.–9 bis artikulu berria gehitzen da. Hona:
“9 bis. artikulua. Ondare Etnologiko eta Immaterialaren Bulegoa.
Ondare Etnologiko eta Immaterialaren Bulegoa Museoen Zerbitzuari zuzenean atxikirik dago, eta eginkizun hauek ditu:
a) Ondare etnologikoa eta kultur ondare immateriala dokumentatu, babestu eta zabaltzera bideratutako estrategia eta ekintza berekiak diseinatu, gauzatu eta ebaluatzea.
b) Erkidego edukitzaileei eta toki entitateei laguntza ematea kultur ondare immateriala babestu eta zabaltzeko.
c) Ondare etnologiko eta immaterialaren arloan lan egiten duten entitateei laguntza ematea.
d) Ondare etnologiko eta immaterialari lotutako entitateek egiten dituzten ekintzei, jarduerei eta programei zabalkundea ematen eta ezagutzera ematen laguntzea, herritarrentzat ikusgarriagoak izan daitezen.
e) Nafarroako ondare etnologiko eta immateriala ezagutu eta hedatzeko ezartzen diren hitzarmen eta deialdiak kudeatzeko.
f) Nafarroako Kultur Ondare Immaterialaren Inbentarioa prestatu eta eguneratzea.
g) “Julio Caro Baroja” Nafarroako Museo Etnologikoa kudeatu eta koordinatzea.
h) Ondare etnologiko eta kultur ondare immaterialaren arloan egiten diren kultur intereseko ondasun eta ondasun inbentariatu deklaratzeko espedienteetan txostena prestatzea.
i) Ondare Etnologiko eta Immaterialaren Bulegoaren urteko memoria erredaktatzea.
j) Indarra duten xedapenek esleitzen dizkioten gainerako eginkizunak, edo bere helburuak egoki betetzeko agintzen zaizkion guztiak.”
Hiru.–15. artikulua aldatzen da, eta honela idatzita geldituko da:
“15. artikulua. Berrikuntza Bulegoa.
Berrikuntza Bulegoak, Kultura Sustapenaren eta Berrikuntzaren Atalari atxikita, eginkizun hauek izanen ditu:
a) Jarduketa-eremua antolatzea Nafarroako kultur eta sormen industrien sektorean, enpresen, profesionalen eta proposamenen azterlanak eta erregistroak finkatuz eta eguneratuz.
b) Urteko sustapen planak garatzea, Nafarroako kultur sektorearen presentzia antolatuz eta ebaluatuz hainbat ekitalditan (feriak, preskriptoreentzako aurkezpenak...).
c) Programa berekietan marken eta irudi grafikoen aplikazioa koordinatzea.
d) Tokiko, eskualdez gaindiko, estatuko edo nazioarteko laguntzen informazioa koordinatzea.
e) Online ingurunerako (web, sare sozial eta datu-baseetarako) edukien sorrera koordinatzea.
f) Offline euskarrien (argitalpenen eta promozio objektuen) sorrera eta kudeaketa koordinatzea.
g) Kultur Ekintza Zerbitzuko ikus-entzunezkoen artxiboa garatu eta kudeatzea.
h) Merkaturatzeko laguntza-tresnak garatzea.
i) Komunikazio kanpainak abiaraztea hainbat hedabide eta euskarritan.
j) Publikoak erakartzeari buruzko jarduketak gauzatzea programa berekietarako eta kultur eta sormen sektoreen jardueretarako, publiko berriak erakartzeko ekintzak barne.
k) Erakundeen arteko barne komunikazioan eta kultur eta sormen sektoreei bideratutako komunikazioan laguntzea.
l) Kultur eta sormen industrietarako laguntzen deialdien diseinuan eta haien ebaluazioan parte hartzea.
m) Arte sorkuntzarako mintegi eta lantegien sarearen proiektua eta kultur berrikuntzako bestelako proiektuak kudeatzea.
n) Indarra duten xedapenek esleitzen dizkioten beste batzuk, edo agintzen zaizkionak.”
XEDAPEN GEHIGARRIA
Xedapen gehigarri bakarra.–Unitate organiko bat kentzea.
Kendu egiten da Kultura Herrikoiaren Bulegoa (Kultur Ekintza Zerbitzukoa).
XEDAPEN INDARGABETZAILEA
Xedapen indargabetzaile bakarra.–Arauak indargabetzea.
Indargabetu egiten dira foru agindu honetan xedatutakoaren kontrakoak diren maila bereko edo apalagoko xedapen guztiak.
AZKEN XEDAPENA
Azken xedapen bakarra.–Indarra hartzea.
Foru agindu honek Nafarroako Aldizkari Ofizialean argitaratzen den egun berean hartuko du indarra.
Iruñean, 2019ko apirilaren 10ean.–Kultura, Kirol eta Gazteriako kontseilaria, Ana Herrera Isasi.
Iragarkiaren kodea: F1905120
