1. NAFARROAKO FORU KOMUNITATEA
1.7. BESTELAKOAK
48/2019 EBAZPENA, otsailaren 12koa, Unibertsitateen eta Hezkuntza Baliabideen zuzendari nagusiak emana, Bonbardinoa eta Kantua espezialitateak Musika eta Dantza Eskolen Berariazko Erregistroan inskribatzen dituena, Altsasuko Udal Musika eta Dantza Eskolak eman ditzakeen ikasketen atalean.
Ikusirik Altsasuko Musika eta Dantzako Patronatuko lehendakari Javier Ollo Martínez jaunak, patronatua Altsasuko Udal Musika eta Dantza Eskolaren entitate titularra den aldetik, eskola horretan Bonbardinoa eta Kantua espezialitateak irakasteko baimena eskatu ondoren tramitatu den espedientea.
Ikusirik, eskatutako espezialitate horiek inskribatzeko, Hezkuntzako Ikuskapen Zerbitzuak egin dituen aldeko txostenak.
Kontuan harturik Musika eta Dantza Eskolen sorrerari eta funtzionamenduari buruzko oinarrizko arauak onesten dituen abenduaren 21eko 421/1992 Foru Dekretuaren 29. artikuluan xedatutakoa.
Nafarroako Foru Komunitateko Administrazioari buruzko abenduaren 3ko 15/2004 Foru Legearen 22.1.d) artikuluak ematen dizkidan ahalmenak erabiliz eta Hezkuntzako Azpiegituren Zerbitzuak hala proposaturik,
EBATZI DUT:
1. Nafarroako Gobernuaren Musika eta Dantza Eskolen Berariazko Erregistroan Bonbardinoa eta Kantua espezialitateak inskribatzea Altsasuko Udal Musika eta Dantza Eskolak ematen dituen ikasketen artean. Inskripzioak 2018ko abenduaren 21etik aurrera izanen ditu ondorioak, egun horretan sartu baitzen Hezkuntza Departamentuan ikastetxe horrek aipatu irakaskuntzak ematen zituela zioen jakinarazpena.
2. Adieraztea une horretatik aurrera eskola horrek emanen dituen irakaskuntzak Hezkuntzari buruzko Lege Organikoaren 48.3 artikuluan ezarritakoak direla; irakasgai hauek, alegia:
1.–Musikako irakaskuntzak:
Oinarrizko eskaintza, abenduaren 21eko 421/1992 Foru Dekretuaren 9. artikuluko 1. apartatuko a), b) eta c) letretan ezarritako antolamenduari jarraikiz:
–Instrumentu-praktika: Akordeoia, Alboka, Baxu Elektrikoa, Bateria, Bonbardinoa, Kantua, Klarinetea, Zeharkako Flauta, Gaita, Gitarra, Pianoa, Saxofoia, Trikitia, Tronboia, Txistua eta Biolina.
–Instrumentu-praktikaren osagarri den musika prestakuntza: Musika Hizkuntza.
–Ahots eta instrumentu jarduerak taldean: Eskolania eta Abesbatza, Instrumentu Taldeak eta Fanfarrea eta Comboak.
2.–Dantzako irakaskuntzak:
–Dantza Herrikoia, abenduaren 21eko 421/1992 Foru Dekretuaren 10. artikuluaren 1. apartatuan lehentasunezko eskaintzan sartua.
3.–Musika eta dantzako irakaskuntzak:
Bestelako gaiak, musikaren oinarrizko eskaintzan (9.2 artikulua) eta dantzaren lehentasunezkoen artean (10.2 artikulua) sartu gabeak: Musika eta Mugimendua, 4 urtetik 8 urte bitarteko ikasleentzat.
3. Gogoraraztea eskolaren osaera aldatuz gero, eta aldaketak 421/1992 Foru Dekretuaren 29. artikuluan araututakoa ukitzen badu, Hezkuntza Departamentuari jakinarazi beharko zaiola.
4. Ohartaraztea eskolaren inskripzioa baliorik gabe uzten ahalko dela foru dekretu horren 31. artikuluan aipatutako kasuetan.
5. Ebazpen hau Nafarroako Aldizkari Ofizialean argitaratzea.
6. Ebazpen hau Altsasuko Musika eta Dantzako Patronatuko lehendakariari jakinaraztea, eta adieraztea administrazioaren ebazpen honen kontra administrazio publiko interesdunak administrazioarekiko auzi-errekurtsoa jartzen ahalko duela, Nafarroako Justizia Auzitegi Nagusiaren Administrazioarekiko Auzien Salari zuzendua, argitaratu eta biharamunetik hasita bi hilabeteko epean, galarazi gabe aldez aurreko errekerimendua egin ahal izatea, Administrazioarekiko Auzien Jurisdikzioa arautzen duen ekainaren 13ko 29/1998 Legearen 44. artikuluan ezarritako moduan eta epeetan.
7. Ebazpen hau igortzea Hezkuntzako Ikuskapen Zerbitzuari, Hezkuntzako Azpiegituren Zerbitzuari, Arte Ikasketen Atalari eta Kontratazioaren, Zerbitzu Osagarrien eta Koordinazio Administratiboaren Atalari.
Iruñean, 2019ko otsailaren 12an.–Unibertsitateen eta Hezkuntza Baliabideen zuzendari nagusia, Nekane Oroz Bretón.
Iragarkiaren kodea: F1902175
