Iragarkia

36. ALDIZKARIA - 2019ko otsailaren 21a

1. NAFARROAKO FORU KOMUNITATEA

1.4. DIRU-LAGUNTZAK, LAGUNTZAK ETA BEKAK

76/2019 EBAZPENA, urtarrilaren 29koa, Landa Garapeneko, Nekazaritzako eta Abeltzaintzako zuzendari nagusiak emana, zeinaren bidez onesten baitira mahastiak berregituratu eta birmoldatzeko laguntzak emateko deialdia eta oinarri arautzaileak 2019-2020 kanpainarako.

Honako hauek dira mahastiak berregituratzeari eta birmoldatzeari buruzko xedapenak arautzen dituztenak, mahastizaintzako ekoizleen lehiakortasuna handitzeko neurri gisa: Nekazaritzako merkatuen antolamendu bateratua sortu eta 922/72 (EEE), 234/79 (EEE), 1037/2001 (EE) eta 1234/2007 (EE) erregelamenduak indarrik gabe uzten dituen Europako Parlamentuaren eta Kontseiluaren 2013ko abenduaren 17ko 1308/2013 (EB) Erregelamenduaren II. kapituluko 4. atala; Batzordearen 2016ko apirilaren 15eko 2016/1149 (EB) Erregelamendu Delegatua, zeinak osatzen baitu 1308/2013 (EB) Erregelamendua mahastizaintzaren eta ardogintzaren sektoreari laguntzeko programa nazionalei dagokienez eta aldatzen baitu Batzordearen 555/2008 (EE) Erregelamendua; eta mahastizaintzaren eta ardogintzaren sektoreari laguntzeko programa nazionalei dagokienez 1308/2013 (EB) Erregelamendua aplikatzeko xedapenak ezartzen dituen Batzordearen apirilaren 15eko 2016/1150 (EB) Exekuzio Erregelamenduaren II. eta IV. kapituluak.

Urtarrilaren 12ko 1363/2018 Errege Dekretuak oinarrizko araudia ezarri du Espainiako mahastizaintza eta ardogintza sektorerako laguntza programaren neurriak aplikatzeko 2019-2023 aldirako. Aipatu errege dekretuaren 2. atalak biltzen du mahastiak berregituratu eta birmoldatzeko aplikatzen ahal den oinarrizko araudia. Dena dela, bertako aurreikuspen batzuk zehazteko, autonomia erkidegoen arau osagarri baten beharra dago.

Adierazitakoarekin bat, eta Nafarroako Foru Komunitateko Administrazioari buruzko abenduaren 3ko 15/2004 Foru Legearen 22. artikuluak eta Landa Garapeneko, Ingurumeneko eta Toki Administrazioko Departamentuaren egitura organikoa onesten duen irailaren 21eko 78/2016 Foru Dekretuak ematen dizkidaten eskudantziak erabiliz,

EBATZI DUT:

1. Mahastiak berregituratu eta birmoldatzeko planetarako laguntzak emateko deialdia onestea 2019-2020 kanpainarako.

2. 2019-2020 kanpainan mahastiak berregituratu eta birmoldatzeko laguntzak arautzen dituzten oinarriak, ebazpen honen I. eranskinean jasoak, onestea eta ebazpen honen II. eranskinetik V.era bitartekoak onestea.

3. 2020ko ekitaldian Nekazaritza Bermatzeko Europako Funtsak (NBEUF) Nafarroako Foru Komunitateari bideratzen dion aurrekontuak aukera ematen duen heinean erantzunen zaie ebazpen honen ondoriozko gastu konpromisoei.

4. Ebazpen hau eta eranskinak Nafarroako Aldizkari Ofizialean argitaratzea.

5. Ebazpen honek ez du administrazio bidea amaitzen, eta interesdunek gora jotzeko errekurtsoa jartzen ahal dute honen kontra, Landa Garapeneko, Ingurumeneko eta Toki Administrazioko kontseilariari zuzendua, argitara eman eta biharamunetik hilabeteko epean.

Iruñean, 2019ko urtarrilaren 29an.–Landa Garapeneko, Nekazaritzako eta Abeltzaintzako zuzendari nagusia, Ignacio Gil Jordán.

I. ERANSKINA

Mahastia berregituratu eta birmoldatzeko laguntzak emateko
deialdiaren oinarri arautzaileak 2019-2020 kanpainarako

Lehena.–Xedea eta aplikazio eremua.

1. Ebazpen honen xedea da Nafarroako Foru Komunitatean mahastia berregituratu eta moldatzeko laguntzen deialdia arautzea, mahastizaintzaren eta ardogintzaren merkatuaren antolakunde bateratuaren barrenean, 2019-2020ko kanpainarako, zeinak barne hartzen baitu 2019ko abuztuaren 1etik 2020ko uztailaren 31rako aldia.

2. Ardoa egiteko mahatsa ekoizten duten mahastiak berregituratu eta birmoldatzeko laguntzetan aplikatzeko izanen dira oinarri hauek, betiere jarduketa horiek Nafarroako Foru Komunitatearen lurraldean dauden amaierako lurzatietan gauzatzen badira, eta “Nafarroa” jatorrizko deituraren babesean, “3 Erribera” adierazpen geografiko babestuan, “Queilesko Erribera” adierazpen geografiko babestuan edo “Errioxa” jatorrizko deitura kalifikatuaren barrenean.

3. Ez da laguntzarik emanen ekintza hauetarako:

a) Berezko ziklo naturala bukatua duten mahastien berritze normala, hots, lurzati bera birlandatzea ardogintzarako mahatsondo barietate berarekin eta landaketa metodo beraren arabera.

b) Azkeneko hamar kanpainetan mahastia berregituratu eta birmoldatzeko laguntzen onuradun izan diren azalerak (salbu eta ontzi itxurako mahatsondotik besora pasatzeko izan bada). Epe hori onuradunak azalera horretarako ordainketa eskatu zuen egunetik hasita kontatuko da, edo, aurrerakina eskatuz gero, saldoaren likidazioa eskatu zuenetik.

c) Batzordearen 2016ko apirilaren 15eko 2016/1149 (EB) Erregelamendu Delegatuaren 14. artikuluan jasotako ekintzen kostuak. Honako hauek sartzen dira horietan: mahastien eguneroko kudeaketa egitea, ehizak, hegaztiek edo txingorrak eragin litzaketen kalteak eragozteko babesa jartzea, haize-babesak eta hormak eraikitzea haizetik babesteko, sarbideak eraikitzea eta jasogailuak jartzea, eta nekazaritzako ibilgailuak erostea.

d) Europako Parlamentuaren eta Kontseiluaren abenduaren 17ko 1308/2013 (EB) Erregelamenduaren 63. eta 64. artikuluaren arabera emandako landaketa berria egiteko baimenarekin landatutako azalerak.

e) Europako Parlamentuaren eta Kontseiluaren abenduaren 17ko 1308/2013 (EB) Erregelamenduaren 68. artikuluaren arabera emandako landaketarako baimenarekin landatutako azalerak, betiere beste ustiategi batetik eskuratutako eskubideen ondoriozkoa bada edo erreserba bategatik emandakoak, edo landaketarako eskubide berrien edo Mahastien Erregistroaren eguneraketan esleitutako eskubideen ondorioz.

f) Lurzatiak berrantolatzeko prozesuan dauden eremuetako lurzatietarako eskaerak, salbu Landa Garapeneko, Ingurumeneko eta Toki Administrazioko Departamentuko Nekazaritzako Azpiegituren Zerbitzuaren baimena duten lurzatietarako, bosgarren oinarriko m) atalean adierazitakoarekin bat.

g) Mahastiekin batera beste labore bat duten amaierako lurzatien azaleretan jarduketak egitea.

Bigarrena.–Onuradunak.

1. Mahastiak berregituratu eta birmoldatzeko laguntzaren onuradun izaten ahalko dira ardoa egiteko mahatsa ekoizteko mahastiak dituzten edo izanen dituzten mahastizainak.

2. Ezin dira laguntza hauen onuradun izan:

a) Mahastien ustiategiko edozein azalerari dagokionez mahastiak landatzeari buruz indarra duen araudiari aurka egiten dioten mahastizainak.

b) 2019-2023 aldirako laguntza programaren esparruan, mahastiak berregituratu eta birmoldatzeko laguntza eskatu eta onartu zaien mahastizainak baldin eta lan horiek gauzatzeari uko egiten badiote edo onetsitako edo aldatutako eskaeran adierazitako ekitaldi finantzarioan hasten ez badituzte. Salbuespena izanen dira ezinbesteko kasuak edo salbuespenezko egoerak, Europako Parlamentuaren eta Kontseiluaren 2013ko abenduaren 17ko 1306/2013 (EB) Erregelamenduaren 2. artikuluaren bigarren puntuan jasotzen den bezala.

Hirugarrena.–Dirulaguntza jaso dezaketen jarduerak.

1. Mahastiak berregituratzeko eta moldatzeko laguntza 2019-2020ko kanpainan ondoko jarduera baterako edo batzuetarako eman daiteke soilik:

a) Mahastiak berrezartzea.

b) Mahats barietatea aldatzea.

c) Mahastiak kudeatzeko teknikak hobetzea, ontzi itxurako mahastitik besorako mahastira aldatzeko.

2. Aurreko atalean aipatutako jarduerei laguntza emateko, honako definizio hauek finkatu dira:

a) “Mahastiak berrezartzea”: lurzati bateko edo batzuetako mahatsondoak beste landaketa baten edo batzuen bidez ordeztea, betiere azalera bera badute. Mahastizaintzako lurzati berean berrezartzen bada, barietate aldaketa edo laborantza metodoaren aldaketa egin dela frogatu beharko da, gidamoduaren sistema edo txertaka aldatu dela ulertuta.

Lurzatiak berrantolatzeko prozesu batean, lurzatiak berrantolatzeko eremuan mahastiak kentzearen ondorioz sortutako baimen guztiak baliozkoak izanen dira mahastia berrezartzeko.

b) “Mahats barietatea aldatzea”: mahasti lurzati bateko barietatea aldatzea, oraingo barietatearen gainetik txertatuz, lurzatiko mahatsondo kopurua handitu gabe. Barietatearen aldaketa 2015-2016 kanpainaren aurretik landatutako lurzatietan baizik ez da egiten ahalko.

c) “Ontzi itxurako mahastitik besorako mahastira aldatzeko jarduera”: gidamodu baxua duen mahastia besorako gidamodura jasotzeko jarduerak, mahastia modu egokian mekanizatu ahal izateko, bereziki inausketarako eta mahats-bilketarako. Transformazioa landare eta osasun egoera onean dauden mahastietan baizik ez da egiten ahalko, betiere 2015-2016 kanpainaren aurretik landatuak baldin badira.

d) Behar diren kontseilu arauemaileek edo agintaritza eskudunak baimendutako barietate guztiek jaso dezakete dirulaguntza.

Laugarrena.–Mahastiak berregituratu eta birmoldatzeko laguntzarako eskaerak.

1. Mahastiak berregituratzeko eta birmoldatzeko araubidea gauzatuko da mahastiak berregituratzeko eta birmoldatzeko eskaeren bidez. Horietan jasoko dira gauzatu beharreko jarduketak eta horietariko bakoitzaren jardueren xehetasunak. Jarduerak urteka eginen dira.

2. Eskabideak banaka nahiz taldeka aurkezten ahalko dira. Taldeka aurkeztuz gero, ordezkari bakarraren bidez eginen da kasuan kasuko administrazioan.

3. Eskabideak taldeka aurkezteko, gutxienez ere 10 eskatzaile indibidual egon beharko dira.

Bosgarrena.–Mahastiak berregituratzeko eta birmoldatzeko eskabideak aurkeztea.

1. Pertsona juridikoak diren eskatzaileek, mahastiak berregituratzeko eta birmoldatzeko laguntzen onuradun izan nahi badute, dagokion eskabidea aurkeztu beharko dute, Erregistro Orokor Elektronikoaren bidez edo Herri Administrazioen Araubide Juridikoari eta Administrazio Prozedura Erkideari buruzko urriaren 1eko 39/2015 Legearen 16. artikuluan aipatzen diren erregistro edo bitartekoren bat erabiliz. Nafarroako Gobernuaren Interneteko Atariko zerbitzuen katalogoan eskuratzen ahal den eskabide ereduaz baliatu beharko dute.

Eskaerak aurkezteko epea 10 egunekoa izanen da, ebazpen hau argitaratzen denetik hasita.

Orobat, eta urriaren 1eko 39/2015 Legearen 16. artikuluaren 5. apartatuko bigarren paragrafoan aurreikusitakoa aplikatuz, pertsona fisikoak diren eskatzaileek aurreko paragrafoan aurreikusitako moduan eta epean aurkeztuko dituzte beren eskabideak.

2. Dirulaguntzaren xede diren jarduerak egin baino lehen aurkeztu beharko dira eskaerak, eta 2019-2020 kanpainan egin beharreko eragiketei buruzkoak izanen dira.

3. Eskatzaileek, laguntza eskabidearekin batera, informazio eta agiri hauek aurkeztu beharko dituzte:

a) Eskatzailearen identifikazioa eta, kasua bada, ordezkatzen dituen mahastizainena. Horretarako, NANaren edo IFKren fotokopiak aurkeztuko dira.

b) Eskabidean jasotako jarduketa bakoitzaren helburuak.

c) Proposatutako jardueren eta lanen eta diruz lagungarriak diren kostuen deskribapen zehatza.

d) Jarduketa bakoitzak zer azalerari eraginen dion, bai eta lurzatien kokapena eta ezaugarriak ere, hasierakoak zein berregituratu ondorengoak (barietateak, txertakak, eraketa sistemak, landare-tarteak, etab.), eskaera osatzen duten lurzatien Nekazaritzako Lurzatien Informazio Geografikoko Sistemen (hemendik aurrera, SIGPAC) barrutiak identifikatuta.

e) Mahastien Erregistroaren fitxa, non inskribatuta egonen diren eskabidean sartutako hasierako lurzatiak.

f) Barruti partzialak sartzen badira, krokis bat erantsi beharko da, eskabidean berregituratzeko edo moldatzeko sartutako azalera non dagoen jakin ahal izateko.

g) Taldean aurkeztutako eskaeraren ordezkaritzaren kasuan, laguntza hauen esparruan ordezkari gisa baimendutako pertsonaren identifikazioa agertzen duen dokumentua.

h) Ogibide nagusia nekazaritza duenaren kasuan, lehentasunezko ustiategi baten titularra edo titulartasun partekatuko nekazaritzako ustiategi batena denean, bere ustiategia Nafarroako Nekazaritza Ustiategien Erregistroaz besteko erregistro batean inskribatuta badago, horren ziurtagiria, dagokion Nekazaritza Ustiategien Erregistroak luzatua.

i) Elkarteen kasuan, laguntza hauetarako prozesuan elkartearen ordezkari aritzeko baimena duen pertsonaren identifikazioa agertzen duen dokumentazioa.

j) Berregituratu edo birmoldatu beharreko lurzatiak eskatzailearenak baldin badira, lurzati zedula aurkeztuko da, gaurkotua, edo bestela, jabetzaren eskritura publikoa, non eskatutako lurzatien identifikazioa agertuko den. Berriki lurzatien berrantolamendua egin duten udalak izanez gero, berrantolamenduan esleitutako lurren orrialdea aurkeztuko da, eta, lurzatiak berrantolatzeko prozesuan lurzatien jabetzan aldaketak izaten badira gero, organo eskudunak emandako dokumentazioa aurkeztuko da, lurzatiaren titularra nor den jakiteko.

Lurzatiaren jabetza frogatzeko agiriak eskaera aurkezten den eguna baino lehenagoko data izanen du.

k) Berregituratu edo birmoldatu beharreko lurzatiak mahastizainarenak ez badira, jabearen baimena beharko da eta haien azalera erabiltzeko eskubidea modu hauetakoren batean frogatu beharko da:

–Errentamenduko kontratua, eskabidea aurkeztu baino lehenagokoa, Landalurreko Errentamenduen Erregistroan inskribatua edo kasuan kasuko tributuak likidatuak. Haren indarraldia 2030eko uztailaren 31 artekoa izanen da gutxienez.

–Lurzatiaren gaineko gozamenerako eskubide bat eratu dela agiri bidez frogatzea.

–Herrilurrak izanez gero, udalaren ziurtagiria, adierazten dituena adjudikazioduna, adjudikatze data eta adjudikazioaren iraupena.

–Zuzenbidearen araberakoa den beste edozein bide frogagarri, egoki diren tributuen dokumentu likidatua aurkeztuta.

l) Landare-ateratzea laguntza eskaera aurkeztu aurretik egiten bada:

1. Europako Parlamentuaren eta Kontseiluaren abenduaren 17ko 1308/2013 (EB) Erregelamenduaren 66. artikuluaren arabera emandako erauzketarako eta/edo landaketa berria egiteko baimenari buruzko ebazpenak.

2. Europako Parlamentuaren eta Kontseiluaren abenduaren 17ko 1308/2013 (EB) Erregelamenduaren 68. artikuluaren arabera emandako birlandaketa eskubideak, landaketarako baimen bihurtu beharrekoak, eta/edo landaketarako baimenak, mahastizain beraren ustiategian egindako erauzketagatik sortuak eta erabili beharrekoak.

m) Lurzatiak berrantolatzeko prozesuan dauden eremuetako lurzatien kasuan, oraindik horri buruzko akordiorik ez badago, Landa Garapeneko, Ingurumeneko eta Toki Administrazioko Departamentuaren Nekazaritzako Azpiegituren Zerbitzuaren baimena, laguntzen eskaeran adierazitako datuekin bat datorrena.

Seigarrena.–Laguntza eskaeren betebeharrak.

1. Mahastiak berregituratzeko eta birmoldatzeko eskaera bakoitzaren esparruan guztira berregituratzen edo birmoldatzen den azalera 0,5 hektareakoa izanen da gutxienez.

2. Mahasti bakoitzaren lurzatiak, behin berregituratuta edo birmoldatuta, gutxienez 0,5 hektarea izan behar du. Dena dela, berregituratze eta birmoldatze lana egin ondoren gelditzen diren lurzatien kopurua hasierako kopuruaren %80 baino txikiagoa baldin bada, muga hori txikiagoa izaten ahalko da. Mahastiak mahastizain beraren beste lurzati batekin egiten badu muga, orduan ere 0,5 hektarea baino txikiagoa izan daiteke.

Ondorio horietarako, hauxe hartuko da mahasti lurzatitzat: mahastizain bakar batek mahatsondoak lantzeko duen azalera etenik gabea, barruti bakar batek edo erreferentzia alfanumeriko bat edo gehiago dituzten barruti puskek osatua, SICPACen grafikoki irudikatua.

Mahats barietatea aldatzeko edo ontzi itxuratik besora aldatzeko lana besterik ez bada, gutxieneko azalera hasierakoa izanen da.

3. Dirulaguntza jasoko duen azalera, gehienez, 15 hektarea izanen da mahastizain bakoitzeko.

4. Landaketa guztietan, ziurtatutako txertakak erabili behar dira nahitaez. Dirulaguntza jasotzeko, baimendutako merkatariaren edo mintegizainaren faktura eta ordainagiria aurkeztu behar dira nahitaez.

5. Mahastia berrezartzeko eskatutako barrutiak ezin izanen ditu SICPACen erabilera hauek: zuhaixka-larreak, larreak edo larre zuhaiztunak edo paisaiaren egiturazko elementuak.

6. Nolanahi ere, berregituratu beharreko azalerei mahastilanerako aproposa den erabilera emanen zaie.

Zazpigarrena.–Eskaerak onestea eta funtsak esleitzea.

1. Batzordearen 2016ko apirilaren 15eko 2016/1150 (EB) Exekuzio Erregelamenduaren 23.1 artikuluarekin bat, eskabideak horretarako ezarritako epean aurkeztu ote diren egiaztatuko da eta onartzekoak diren edo ez ebaluatuko da. Kasua bada, eskatzaileei eskatuko zaie 10 eguneko epean aurkez dezatela zuzendu beharreko informazioa edo agiriak, edo, hala badagokio, gehitu beharrekoa.

2. Batzordearen 2016ko apirilaren 15eko 2016/1150 (EB) Exekuzio Erregelamenduaren 30.2.d) artikuluarekin bat, laguntza ordaintzen denean oinarri harturik onuradunak aurkeztu beharreko frogagiriak, eta bermatzeko ezen egin beharreko lanetarako eta erabili beharreko materialetarako zenbatekoek ez dituztela gainditzen merkatuko prezio arruntak, honela moderatuko dira kostuak:

a) IV. eranskineko lanetarako, erreferentziako gehieneko kostua bai baita, behar diren zenbatekoak balidatuko dira kontuan harturik ez direla gainditzen eranskin horretan ezarritako erreferentziako kostuak.

b) Inausketarako eta hondakinak suntsitzeko lanetan (“Ontzi itxurako mahatsondoa besora aldatzea” ekintzako lanak), fakturekin eta ordainketa frogagiriekin justifikatu behar direnetan, eskatzaileek hiru hornitzaileren eskaintza bana aurkeztu behar dute, zerbitzua eman aurretik, salbu eta, diruz lagungarriak diren gastuen ezaugarrien berezitasuna dela eta, merkatuan hornidura edo zerbitzua emateko behar adina enpresa ez badago Aurkeztutako eskaintzen arteko hautapena efizientzia eta ekonomia irizpideei jarraikiz eginen da, eta memoria batean justifikatuko da espresuki baldin proposamen ekonomiko onuragarriena hautatu ez bada.

III. eranskinean gehieneko zenbateko diruz lagungarriak ezartzen badira ere, horiek ez dute esan nahi ez direnik kostuak moderatu behar aurreko paragrafoekin bat.

3. Eskaerek ez badituzte onartuak izateko 1. ataleko eskakizunak betetzen, eskaerak baztertzeko arrazoiak zein izan diren argituko zaie eskatzaileei.

4. Batzordearen 2016ko apirilaren 15eko 2016/1150 (EB) Exekuzio Erregelamenduaren 23.2 artikuluarekin bat, II. eranskinean ezarritako lehentasun irizpideei dagokien ponderazioa aplikatzean lortutako puntuazioa kontuan hartuz klasifikatuko dira eskaerak.

5. Nafarroako Foru Komunitateak dakienean zer finantzaketa dagoen eskura NBEUF 2020 ekitaldirako, aurkeztutako eskaera onargarriak hautatuko dira, puntuazio handienetik txikienerako ordenan, 4. apartatuan jasotako lehentasun irizpideen ponderazioa aplikatuta, aurrekontua agortu arte.

6. Aurreko 5. apartatuan aipatutako hautaketa oinarri harturik, 2020ko finantza ekitaldian finantzatuko diren eskaeren behin betiko onespena eginen da.

7. Landa Garapeneko, Nekazaritzako eta Abeltzaintzako zuzendari nagusiak eskaeren onespena ebatziko du, eskaerak aurkezteko epea amaitu eta sei hilabeteko epean. Baldin eta sei hilabeteko epea igarotakoan interesdunei ez bazaie inongo ebazpenik jakinarazi, beren eskaera baztertu egin dela ulertu behar dute.

8. 2020ko ekitaldian NBEUFetik Nafarroako Foru Komunitatearen esku utzitako diru kopuruak, lehenik eta behin, NBEUF 2019 ekitaldian edo aurrekoetan ordaindu gabe utzitako ordainketak egiteko erabiliko dira; eta bigarrenik, 2019-2020 kanpainan ebazpen honen arabera aurkeztutako eskaerak asetzeko, NBEUFek Nafarroako Foru Komunitatearen esku utzitako aurrekontuaren zenbatekoa agortu arte.

9. Batzordearen apirilaren 15eko 2016/1149 Erregelamendu Delegatuaren (EB) 53. artikuluko 1. apartatuan ezarritakoaren arabera, eta galarazi gabe aipatutako Erregelamenduaren 53. artikuluko 2. puntuan ezarritakoa, onuradunek eska dezakete aldaketak egin ahal izatea hasiera batean onetsitako lanetan, azken ordainketaren aurretik eta, betiere, ez badira egin azken ordainketaren aurreko tokian tokiko kontrolak. Gauzatu aurretik baimendu beharko dira aldaketa guztiak.

Aldaketa-eskaera bakoitza behar bezala justifikatu beharko da, ez du baldintzatu beharko lanaren helburu orokorra, ez du gorantz aldatuko onetsitako aurrekontua, ez du aldaketarik ekarriko onargarritasunari dagokionez, eta ez du aldatu behar aukeraketarako egindako ponderazioan, baldin horrek berekin badakar azken ponderazioa gelditzea eskaera onartu eta ez onartuen arteko mozketa-puntuazioaren azpitik, eta posta elektronikoz aurkeztuko da Merkatuen Erregulaziorako Atalean, beranduenez 2020ko maiatzaren 15ean.

Nolanahi ere, baimenduko da halakoak aldez aurreko baimenik gabe egitea, baldin ez badute baldintzatzen lanaren helburu orokorra, ez badute onetsitako aurrekontua gorantz aldatzen, ez badute aldaketarik ekartzen onargarritasunean, eta ez badakarte aldaketarik aukeraketarako egindako ponderazioan, baldin horrek berekin badakar azken ponderazioa gelditzea eskaera onartu eta ez onartuen arteko mozketa-puntuazioaren azpitik; orobat, ekintzen aurrekontuen arteko transferentziak baimenduko dira, baldin ekintza bakoitzerako onetsitako aurrekontuaren %20tik beherakoak badira, betiere ekintza guztiak gauzatu badira.

Zortzigarrena.–Laguntzaren kalkulua.

1. Laguntzak kalkulatzeko, ebazpen honen III. eranskinean aipatzen diren jarduerak eta gehieneko kostuak hartuko dira kontuan, honelaxe:

a) Mahastia berrezartzeko laguntzarako, ekintza hauek hartuko dira kontuan: Zaharrak ateratzea (mahatsondoak biltzea barne), lurra prestatzea, desinfekzioa, harriak kentzea, lurra berdintzea, landarea eta landatze-lana, landatzeko momenturako untxien kontrako babes indibiduala (jartzeko lana barne) eta besorako euskarria (jartzeko lana barne).

Ondorio horietarako, lurraren nibelazioa diruz laguntzeko modukoa izanen da, soilik, lurrak mugitzearen helburua denean lurrak denboraldiko ureztaketak uholdeka egiteko mailan uztea.

Ez dira finantzatuko erauzketaren kostuak Europako Parlamentuaren eta Kontseiluaren abenduaren 17ko 1308/2013 (EB) Erregelamenduaren 66. eta 68. artikuluen arabera emandako birlandaketarako baimenak erabiltzen diren azaleretan, ez badira sortu birmoldatzeko lanaren aplikazioan, eta aipatu eragiketaren eskaera egin aurretik atera ez badira.

Erauzketa gastuak diruz lagungarritzat jotzeko, beharrezkoa izanen da 2019-2020 kanpainan hastea horretan.

b) Mahasti barietatea aldatzeko laguntzarako, oraingo barietatearen gainetik txertatzeagatik izandako kostuak hartuko dira kontuan (kostu jakin bat txertaketa unitate bakoitzeko). Mahatsondo batean egiten dena hartzen da txertaketa unitatetzat, edozein delarik ere mahatsondo horretan sartu beharreko zirien kopurua.

c) Ontzi itxurako mahatsondoa besorako bihurtzeko laguntzaren kasuan, ontzi itxurako mahatsondoa besorako bihurtzeko lana hartuko da kontuan, hirugarren oinarriko 2.c) puntuan xedatuarekin bat.

2. Mahasti baten azalera berregituratu eta birmoldatzeagatik mahastizainak jaso dezakeen laguntzaren zenbatekoa zehazteko, berregituratutako edo mahatsondoak kendutako mahastiaren azalera neurtuko da, Batzordearen 2016ko apirilaren 15eko 2016/1150 (EB) Exekuzio Erregelamenduaren 44. artikuluan jasotako metodoari jarraikiz.

3. Nafarroako Foru Komunitateko mahastizainei diru-sarreren galeragatik egin beharreko konpentsazioa puntu honetan jasotako zehaztapenen arabera eginen da, jarraian adierazten den bezala.

a) 2019-2020 kanpainarako onesten diren eskaera berrietan diru-sarreren galera orekatzeko laguntzaren zenbatekoa honako hau izanen da:

• 530,00 euro hektareako, “Nafarroa” jatorrizko deiturarako, “3 Erribera” adierazpen geografiko babesturako eta “Queilesko Erribera” adierazpen geografiko babesturako.

• 1.358,00 euro hektareako, “Errioxa” Jatorrizko Deitura Kalifikaturako.

b) Diru-sarreren galeragatiko laguntza bi kanpainatan emanen da, mahastien berrezartze lanetarako.

c) Ez dute diru-sarrerak galtzeagatiko kalte-ordainik jasotzeko eskubiderik izanen Europako Parlamentuaren eta Kontseiluaren abenduaren 17ko 1308/2013 (EB) Erregelamenduaren 66. eta 68. artikuluen arabera emandako landaketarako baimenarekin berregituratutako azalerek, sortu badira laguntza eskatu aurretik egindako erauzketagatik.

Diru-sarreren galerengatiko konpentsaziorako eskubidea izateko, beharrezkoa izanen da abiaraztea 2019-2020 kanpainan egin izana.

d) Barietateak aldatzeko eta ontzi itxurako mahatsondoko lurzatia besorako mahasti bihurtzeko jarduketetan, kanpaina bakar batean emanen da kalte-ordaina diru-sarreren galeragatik.

4. Harriak kentzeko ekintzak, lurrak desinfektatzekoak eta lurrak berdintzekoak, mahastizainak aldez aurretik eskatu behar ditu eta agintaritza eskudunak onetsi, eta ondoko baldintza hauek bete behar dituzte:

a) Eragiketa horietarako laguntzak jasotzen ahalko dira soilik lan horiek egin 2019-2020 kanpainan egin direla frogatu daitekeen kasuetan. Laguntza emateko ezinbesteko baldintza izanen da tokian bertan kontrol bat egin izana, eta, horretarako, beharrezkoa izanen da lanak hasiko diren egun zehatza komunikatzea, hasi baino 10 egun lehenago gutxienez, Landa Garapeneko, Ingurumeneko eta Toki Administrazioko Departamentuko Ikuskapenen Atalean. Jakinarazpen hori mezu elektroniko bat igorriz eginen da: inspecciones@navarra.es. Epe horretan ez bada egiten aldez aurreko jakinarazpena, eragiketa ezin izanen da aukeratu laguntza ordaintzeko.

b) Lurra desinfektatzeko laguntzak ematen ahalko dira, baldin eta mahastiak berriro landatzen badira 2015eko abuztuaren 1aren ondoren kendu direneko lurzatietan.

5. Mahastia berregituratu eta birmoldatzeko kostuetako parte-hartzea ebazpen honen III. eranskinean bildutako lanetarako baizik ezin izanen da egin. Bakarka ezin izanen da finantzatu lanik, salbu eta gainetik txertatzeko lana edo ontzi itxuratik besora aldatzekoa. Bigarren eskuko materialarekin egindako eragiketengatik ere ezin da laguntzarik jaso.

Ebazpen honen III. eranskinean bildutako gehieneko zenbatekoen %50 da berregituratze eta birmoldatze lan bakoitzari gehienez emanen zaion laguntza. Jasotako diru kopuruak ezin izanen du inola ere gainditu benetan egindako gastu egiaztatuaren gainean portzentaje hori aplikatuta ateratzen den kopurua, onuradunak berak egin ez dituen ekintzen kasuan (gastuak, nahitaez, faktura eta ordainagirien bidez egiaztatuak).

Baldin eta lanak mahastizainak berak egin baditu eta, beraz, ez fakturarik ez ordainagiririk ez badago, honako honen arabera zehaztuko dira diruz laguntzen ahal diren zenbatekoak: batez beste zenbat denbora behar izaten den (ordutan) lan horiek egiteko azalera hautagarrian, norberaren eskulanaz eta makineriaz, bider V. eranskinean adierazitako batez besteko ordainsari tasa. Dena dela, horrela kalkulatutako kopuruek ezin izanen dituzte gainditu III. eranskinean jasotako ekintza bakoitzeko gehieneko zenbatekoak.

Laguntza guztira kalkulatzeko, III. eranskinean finkatutako ekintzako gehieneko kostuak hartuko dira aintzat, egin diren ekintzak justifikatzeko agiriak aurkeztu eta baliozkotzat jo ondoren. Nolanahi ere, fakturatutako zenbatekoa, edo fakturatutako zenbatekoa gehi norberaren eskulanaz eta makineriaz egindako lanen kosturako kalkulatutakoa, txikiagoa bada III. eranskinean ezarritako ekintzako gehieneko zenbatekoa baino, justifikatutako eta baliozkotzat jotako zenbatekoaren arabera likidatuko da laguntza.

6. Bestalde, 2016/1149 (EB) Erregelamendu Delegatuaren 45.3.a) artikuluan ezarritakoarekin bat, egiaztatuko da ezen mahastizainak berak egiten dituen lanen kostuak dituzten eragiketetarako kalkulatutako laguntza ez dela handiagoa guztirako kostu diruz lagungarriak baino, kenduta mahastizainak berak egindako lanen kostua.

7. Eskaera onesteak sortutako eskubide eta betebeharrak subrogatzen ahal zaizkio mahastizain berri bati, baldin eta horrek bere gain hartzen baditu subrogatutako lurzatietan eskaera onetsi zitzaion mahastizainak hartutako konpromisoak.

8. Europako Parlamentuaren eta Kontseiluaren 2013ko abenduaren 17ko 1306/2013 (EB) Erregelamenduaren 2. artikuluaren 2. puntuan aipatutako ezinbesteko kasuetan edo salbuespenezko egoeretan edo desjabetzeetan izan ezik, laguntzan sartzen diren azalerek gutxienez hamar urtez egon beharko dute landaturik ordainketa eskatu eta hurrengo kanpainatik hasita.

Lurzatian nekazaritzako azpiegituretarako jarduerak egin behar izateagatik edo interes orokorreko herri lanen exekuzio batengatik laguntza hauek jaso dituen onuradunak ezin badio eutsi hartutako konpromisoari, erauzketa egin baino lehen, espresuki eskatu beharko dio organo kudeatzaileari hartutako konpromisotik salbuesteko, hori justifikatzen duen dokumentazioa aurkeztuta. Dokumentazio hori azterturik ezintasun hori ondorioztatzen bada, onuraduna salbuetsia egonen da. Beraz, konpromisoa bukatutzat jo, eta ez da exijituko jasotako laguntza itzultzea.

Laguntzetan sarturiko azalerak gutxienez ere hamar kanpainatan landatuta eduki beharra betetzen ez bada, jasotako laguntza gehi legez dagozkion interesak itzuli beharko ditu onuradunak.

9. Egiaztatzen bada onuradunak, mahastia berregituratu eta birmoldatzeagatik lehen laguntza jaso den urte naturalaren hurrengo urteko urtarrilaren 1etik hurrengo hiru urtean, ez dituela errespetatu bere ustiaketan kudeaketarako legezko betekizunak eta nekazaritzarako zein ingurumenerako baldintza egokiak, Europako Parlamentuaren eta Kontseiluaren 2013ko abenduaren 17ko 1306/2013 (EE) Erregelamenduaren 91., 92., 93., 94. eta 95. artikuluetan aipatuak, onuradunari zuzenean leporatzen ahal zaion ekintza edo omisioagatik bete ez bada, laguntzaren zenbatekoa hein batean edo erabat murriztuko edo deuseztatuko da, zein den hutsegitearen larritasuna, hedadura, iraupena eta errepikapena, eta onuradunak, bidezkoa bada, itzuli egin beharko du, aipatu xedapenen arabera. Baldintza horiek betetzen direla kontrolatzeko, informazio eguneratua izan beharko da, onuradunaren ustiategiaren parte diren lurzati guztien SIGPACeko erreferentzia alfazenbakikoei buruz.

Bederatzigarrena.–Aurrerakinak.

1. Hamargarren oinarrian xedatua gorabehera, eskatzaileek aurrerakina eskatzen ahalko dute, hasieran onetsitako laguntzaren zenbatekoaren %60ra bitarte, aurrerakinaren zenbateko bera duen berme bat eratuta dutenean. 2020ko maiatzaren 20an bukatuko da hori eskatzeko epea.

2. Aurrerakinak ematen direnean, beharrezkoa izanen da jarduketa egitea, eta emandako aurrerakinaren zenbateko guztia gastatu beharko da dena delako jarduketa egiteko lanetan. Jarduketa amaitu dela eta jarduketa egiteko lanetan egindako gastuaren justifikazioa idatziz komunikatuko da, 2020ko ekainaren 30a bitarte. Baldin eta ez bada emandako aurrerakinaren zenbateko guztia gastatu jarduketa egiteko lanetan eta ezarritako epeetan, bermea betearazi eginen da.

3. Baldin eta dena delako azalerak agintari eskudunek onartutako hondamendi natural bat jasan duen eremu batean baldin badaude edo aurreikusitako jarduketak ezin badira gauzatu erakunde baimendu batek egiaztatuta dituen arazo fitosanitarioen ondorioz, aurrerakin gisa emandako zenbatekoa gastatzeko epea egokitzen ahalko da.

4. Organo eskudunak zehazten badu aurrerakinaren zenbatekoak gainditu egiten duela dena direlako jarduketak egiteko Europar Batasunak egiten duen ekarpenari dagozkion gastu errealen zenbatekoa, bermea askatzen ahalko da.

Betiere, bermea ez da itzuliko ordainketa egin aurretik, edo, behar denean, laguntzaren saldoa itzuli aurretik.

Hamargarrena.–Laguntza onuradunei ordaintzea.

1. Behin jarduketak bukatutakoan, onuradunak jarduketaren amaiera eta laguntza ordaintzeko eskaera jakinarazteko agiria aurkeztu behar du. Jakinarazpen hori idatziz egin behar da 2020ko maiatzaren 20a bitarte. Bederatzigarren oinarrian zehazten den laguntzaren aurrerakina eskatuz gero, 2020ko ekainaren 30a bitarte egiten ahalko da bukatu izanaren komunikazioa.

a) Bukatu izanaren komunikazioarekin eta ordainketa eskaerarekin batera, onuradunak aurkeztu beharko ditu egin dituen ordainketen fakturen eta frogagirien kopia, baita, behar denean, mahastia landatu izana komunikatu izanaren agirien kopia ere. Mahastizaintzaren eta ardogintzaren sektoreari laguntzeko programa nazionalen aplikaziorako zuzentarauekin bat, dirutan ordaindutako gastuak ez dira diruz lagungarriak izanen.

Baldin eta zenbait jarduketa mahastizainak berak egin baditu, berariaz hori hala izan dela aipatu behar da jarduketaren amaiera eta laguntza ordaintzeko eskaera jakinarazteko agirian, eta horrez gain, orduen parte bat ere gehitu behar da datu hauekin: mahastizaina nor den, zein den erabili duen bere makineria, egindako lan bakoitzaren deskribapen xehea eta emandako denbora, horretarako prestatutako ereduarekin bat.

b) Faktura guztietan, zehaztu beharko dira lan bakoitzari edo material mota bakoitzari dagokion zenbatekoa, eta, behar denean, zer azalerari dagokion.

c) Laguntza ordaintzea eskatzen duen onuradunaren izenean prestatu behar dira faktura guztiak.

Landareen fakturetan, zer landare material erosi den adierazi behar da, hau da, txertaka eta barietatea.

2. Eragiketa guztiz egin dela eta onetsitako edo, hala badagokio, aldatutako eskaerari lotzen zaiola frogatutakoan ordainduko dira laguntzak, zortzigarren oinarrian ezarritako kalkuluaren arabera. Hau da, ez da laguntza ordainduko baldin ez bada egiaztatzen ez direla egin onetsitako laguntza eskaeran aurreikusitako ekintza indibidual guztiak, edo baimendutako aldaketekin, 2016/1149 (EB) Erregelamendu Delegatuaren 54. artikuluarekin bat.

3. Baldin mahastizainak eragiketa osorik gauzatzen badu baina ez laguntzan zehaztutako azalera osoan, planean onetsitako edo aldatutako azaleraren eta benetan landutako azaleraren arteko aldea kalkulatuko da. Tokian bertan egindako kontrolen bidez zehaztuko da jarduketa benetan zer azaleratan egin den. Alde hori ez bada %20 baino handiagoa, tokian bertan egindako kontrolek zehaztutako azalera hartuko da kontuan laguntza kalkulatzeko. Aldea %20 baino handiagoa bada, baina %50 baino txikiagoa edo berdina, laguntza kalkulatzeko tokian bertan egindako kontrolek zehaztutako azalera hartuko da kontuan, baina, egiaztatutako aldearen bikoitza zenbat den, ehuneko hori murriztuta. Azaleren arteko aldea %50 baino gehiago bada, ordea, ez da laguntza jasotzeko eskubiderik izanen.

4. Baldin eta onuradunak behin betiko laguntza baino aurrerakin handiagoa jaso badu, aldea itzuli beharko du. Behin betiko laguntza jasotako aurrerakina baino handiagoa bada, aldiz, aldea kobratzeko eskubidea izanen du. Dena dela, laguntza, guztira, ezin da hasieran onetsi edo aldatu zena baino handiagoa izan.

5. Landa Garapeneko, Nekazaritzako eta Abeltzaintzako zuzendari nagusiak emanen du laguntzak eman eta ordaintzeko ebazpena. Eragiketa gauzatu zen ekitaldiaren barnean ahal bezain azkar ordainduko zaio laguntza onuradunari, edo gehienez ere, hamabi hilabeteko epean, laguntza ordaintzeko eskaera baliozkoa osorik aurkeztu zuen datatik zenbatzen hasita.

Hamaikagarrena.–Publizitaterako eta datuen babeserako araudia.

1. Onuradunei emandako dirulaguntzak argitaratu egingo dira Nekazaritza Politika Erkidearen finantzaketari, kudeaketari eta jarraipenari buruzko Europako Parlamentuaren eta Kontseiluaren 2013ko abenduaren 17ko 1306/2013 (EB) Erregelamenduaren 111. artikuluari jarraikiz. Batzordeko eta Estatuetako auditoretza eta ikerketa organismoek tratatu ditzakete horien datuak, Batasunaren finantza interesak babestearren.

2. 95/46/EE Zuzentarauaren betebeharrekin bat, datu pertsonalak direnean, estatu kideek beren eskubideak jakinaraziko dizkiete onuradunei, datuen babeserako arauekin bat eta eskubide horiek erabiltzeko aplikagarriak diren prozedurekin bat, edo hala ez bada, Europako Parlamentuaren eta Kontseiluaren 2016ko apirilaren 27ko 2016/679 Erregelamenduarekin bat. Aipatu erregelamenduaren bidez, pertsona fisikoen babesa arautu zen datu pertsonalen tratamenduari eta datu horien zirkulazio askeari dagokienez (Datuen babeserako erregelamendu orokorra).

II. ERANSKINA

Lehentasun eta ponderazio irizpideak

III. ERANSKINA

Mahastia berregituratu eta birmoldatzeko gehieneko kostuak

IV. ERANSKINA

Erreferentziako kostuak

V. ERANSKINA

Norberaren baliabideez mahastia berregituratu
eta birmoldatzeko gehieneko kostuak

Iragarkiaren kodea: F1901417