1. NAFARROAKO FORU KOMUNITATEA
1.1. XEDAPEN OROKORRAK
1.1.1. Foru legeak eta legegintzako foru dekretuak
32/2019 FORU LEGEA, abenduaren 23koa, zeinaren bidez indargabetzen baita Nafarroako Gobernuko kideen eta Nafarroako Foru Komunitatearen administrazioko goi karguen bateraezintasunei buruzko azaroaren 4ko 19/1996 Foru Legearen 3. bis artikuluko 5. apartatua
NAFARROAKO FORU KOMUNITATEKO LEHENDAKARIA NAIZEN HONEK.
Aditzera ematen dut Nafarroako Parlamentuak onetsi duela honako:
FORU LEGEA, ZEINAREN BIDEZ INDARGABETZEN BAITA NAFARROAKO GOBERNUKO KIDEEN ETA NAFARROAKO FORU KOMUNITATEAREN ADMINISTRAZIOKO GOI KARGUEN BATERAEZINTASUNEI BURUZKO AZAROAREN 4KO 19/1996 FORU LEGEAREN 3. BIS ARTIKULUKO 5. APARTATUA
HITZAURREA
Nafarroako Gobernuko kideen eta Nafarroako Foru Komunitatearen Administrazioko goi karguen bateraezintasunei buruzko azaroaren 4ko 19/1996 Foru Legea aldatzen duen apirilaren 4ko 10/2007 Foru Legeak 3. bis artikulua sartu zuen aldatutako foru lege horretan, Hona testua: “Foru Komunitateko administrazioaren eta haren erakunde publikoen funtzionarioek artikulu honetako 2. eta 3. idatz-zatietan aipatzen diren karguetako batean bi urtetik gora aritzen badira jarraian edo hiru urtez etenak eginda, osagarri pertsonal bat jasoko dute jardunera itzultzen diren unetik aurrera, dagokion mailako lansarien 100eko 25ekoa. Osagarri hori urtero gaurkotuko da, oinarrizko lansari pertsonalak gaurkotzen diren portzentaje berean, eta zuzendaritza edo burutzako edozein lanpostu betetzeari dagokion lansariek xurgatuko dute. Apartatu honetan aurreikusitako osagarri pertsonalaren esleipena behin baizik ez da aplikatuko funtzionarioaren ibilbide profesional osoan”.
Halatan, osagarri hori atzeraeginez jasotzeko, izaera pertsonaleko osagarri bat edo ordainsari ekonomiko bat sartu zen 19/1996 Foru Legean, izendapen libreko konfiantzazko kargu batean jardun duen Nafarroako Foru Komunitatearen Administrazioko funtzionarioarentzat; osagarri hori, ordea, ez zegoen jasota Nafarroako Administrazio Publikoen Zerbitzuko Langileen Estatutuan.
Nafarroako administrazio publikoen zerbitzuko langileen arloan presako zenbait neurri hartzeari buruzko ekainaren 21eko 13/2012 Foru Legearen 8. artikuluaren 4. apartatuak honako hau dio: “2012. urterako, Nafarroako Gobernuko kideen eta Nafarroako Foru Komunitatearen Administrazioko goi-karguen bateraezintasunei buruzko azaroaren 4ko 19/1996 Foru Legean ezarritako osagarri pertsonala, 3. bis artikuluaren 5. idatz-zatian hain zuzen, funtzionarioaren mailaren hasierako soldataren 100eko 10era murrizten da”.
Osagarriaren zenbatekoaren % 10eko jaitsiera hori luzatu egin zen abenduaren 26ko 25/2012 Foru Legearen, 1/2013 Foru Lege-dekretuaren, 10/2016 Foru Legearen, 24/2016 Foru Legearen, eta 20/2017 Foru Legearen bidez. 27/2018 Foru Legearen 8. artikuluan, ordea, ez zen luzapen hori aipatzen; beraz, langile horiek % 25eko osagarria jasotzen ari dira 2019ko urtarrilaren 1etik aitzina.
Artikulu bakarra.–Indarrik gabe uzten da Nafarroako Gobernuko kideen eta Nafarroako Foru Komunitatearen Administrazioko goi karguen bateraezintasunei buruzko azaroaren 4ko 19/1996 Foru Legearen 3. bis artikuluaren 5. apartatua. Hortaz, foru lege hau indarrean sartzen denetik aitzina, 5. apartatu horretan ezartzen den osagarri pertsonal hori jasotzeari utziko diote osagarria jasotzen ari diren Foru Komunitatearen Administrazioko funtzionario guztiek.
Azken xedapenetako lehenbizikoa.–Indarra hartzea.
Foru lege honek Nafarroako Aldizkari Ofizialean argitara eman eta biharamunean hartuko du indarra.
Nik, Nafarroako Foru Eraentza Berrezarri eta Hobetzeari buruzko Lege Organikoaren 22. artikuluan xedatutakoa bete dadin, foru lege hau B.M. Erregearen izenean aldarrikatzen dut, Nafarroako Aldizkari Ofizialean berehala argitara eta “Estatuko Aldizkari Ofizialera” igor dadila agintzen dut eta herritar eta agintariei bete eta betearaz dezatela manatzen diet.
Iruñean, 2019ko abenduaren 23an.–Nafarroako Foru Komunitateko lehendakaria, María Chivite Navascués.
Iragarkiaren kodea: F1916543
