1. NAFARROAKO FORU KOMUNITATEA
1.7. BESTELAKOAK
338E/2019 EBAZPENA, azaroaren 23koa, Ekonomia Zirkularraren eta Klima Aldaketaren Zerbitzuko zuzendariak emana, zeinaren bidez ofizioz aldatzen baita Tuterako udal-mugartean beira laua egiten duen instalazio baten ingurumen baimen integratua. Instalazioaren titularra Guardian Industries Navarra SL da.
Instalazio honek badu ingurumen baimen integratua, Ingurumenaren zuzendari nagusiak urtarrilaren 13ko 0156/05 Ebazpenaren bidez emana, gero Ingurumenaren eta Uraren zuzendari nagusiaren otsailaren 5eko 46E/2014 Ebazpenaren bidez aldatua.
2019ko azaroaren 17an, titularrak erantzukizunpeko adierazpen bat aurkeztu du (2018ko azaroaren 30ekoa), onartzeko jardueraren ingurumen arriskuen azterketa bat egin duela eta, bere kalkuluen arabera, dagokion finantza-bermea 1.859.291 eurokoa dela, Ingurumen arloko Erantzukizunaren urriaren 23ko 26/2007 Legea partez garatzen duen Erregelamenduaren 33. artikuluan zehaztutako metodologiaren arabera. Aitortzen du, orobat, jarduera UNE-EN-ISO 14001 ingurumen kudeaketarako sistemari atxikita dagoela iraunkorki eta etengabe.
Hortaz, jarduerak betetzen du Ingurumen arloko Erantzukizunaren urriaren 23ko 26/2007 Legearen 28.b) artikuluan ezarritako baldintza, eta, horrenbestez, titularra ez dago behartua finantza-berme bat jartzera. Gauzak horrela, instalazio horren Ingurumen baimen integratuaren V. eranskina aldatu beharra dago, finantza-berme hori jarri beharra kentzeko.
Kasu honetan, ikusi da Ingurumena Babesteko Esku-hartzeari buruzko martxoaren 22ko 4/2005 Foru Legea garatzen duen Erregelamenduaren 27. artikuluko d) letran aurreikusitako inguruabarrak gertatzen direla, eta, horrenbestez, bidezko da ingurumen baimen integratuan ezarritako baldintzak ofizioz aldatzea, Ingurumena Babesteko Esku-hartzeari buruzko martxoaren 22ko 4/2005 Foru Legea garatzen duen Erregelamenduaren 28. artikuluan aurreikusitako administrazio prozedurarekin bat, iritzita aldaketa-espediente hau ez dela jendaurrean jarri behar.
Adierazitakoarekin bat, eta Ingurumeneko zuzendari nagusiaren azaroaren 8ko 107/2019 Ebazpenaren bidez eskuordeturik ditudan eskumenak erabiliz,
EBAZTEN DUT:
Lehenbizikoa.–Ofizioz aldatzea ingurumen baimen integratu bat, Guardian Industries Navarra SLk Tuterako udal-mugartean beira laua egiteko duen instalazioari dagokiona. Hortaz, instalazioak eta jarduerak bete beharko dituzte ingurumen baimen integratuaren administrazio espedienteetan ezarritako baldintzak eta, horiez gainera, baita ebazpen honen eranskinean adierazitako baldintzak ere.
Bigarrena.–Ebazpen honetan jasotzen diren baldintzak ez betetzeak berekin dakar ingurumeneko diziplina-neurriak hartzea, hain zuzen ere, Kutsaduraren Prebentzio eta Kontrol Integratuari buruzko Legearen testu bateginaren (abenduaren 16ko 1/2016 Legegintzako Errege Dekretuaren bidez onetsia) IV. tituluan jasotakoak, ezertan galarazi gabe sektoreko legerian ezarritakoa, aplikagarri izaten segituko baitu, eta, horren osagarri, Ingurumena Babesteko Esku-hartzeari buruzko martxoaren 22ko 4/2005 Foru Legearen VI. tituluan ezarritako zehapen-araubidean jasotakoak.
Hirugarrena.–Ebazpen hau Nafarroako Aldizkari Ofizialean argitaratzea.
Laugarrena.–Ebazpen honek ez du administrazio bidea amaitzen, eta espedientean interesa dutenek, administrazio publikoek izan ezik, gora jotzeko errekurtsoa jar dezakete, Landa Garapeneko eta Ingurumeneko kontseilariari zuzendua, hilabeteko epean. Administrazio publikoek administrazioarekiko auzi-errekurtsoa jartzen ahalko dute, Nafarroako Justizia Auzitegi Nagusiko Administrazioarekiko Auzien Salari zuzendua, bi hilabeteko epean. Horrek ez du galarazten Nafarroako Gobernuari aurretiazko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarritako moduan eta epean. Epeak ebazpen hau jakinarazi eta biharamunetik aurrera kontatuko dira.
Bosgarrena.–Ebazpen hau Guardian Industries Navarra SLri, Tuterako Udalari eta Babes Zibileko eta Larrialdietako Zerbitzuari igortzea, behar diren ondorioak izan ditzan.
Iruñean, 2019ko azaroaren 23an.–Ekonomia Zirkularraren eta Klima Aldaketaren Zerbitzuko zuzendaria, Pedro Zuazo Onagoitia.
Oharra: Ebazpen honetan aipatzen diren eranskinak interesdunen eskura egonen dira Ingurumeneko Zuzendaritza Nagusiaren bulegoetan (González Tablas kalea 9, behea, Iruña), Ekonomia Zirkularraren eta Uraren Zerbitzuan, eta Nafarroako Gobernuaren webgune honetan: http://www.navarra.es/home_es/Temas/Medio+Ambiente/Evaluacion+ambiental/Autorizaciones+ambientales/.
Iragarkiaren kodea: F1915064
