1. NAFARROAKO FORU KOMUNITATEA
1.7. BESTELAKOAK
2455/2019 EBAZPENA, azaroaren 26koa, Nafarroako Unibertsitate Publikoko errektoreak emana, zeinaren bidez agintzen baita argitaratzeko Gobernu Kontseiluak 2019ko azaroaren 26an onetsitako erabakia, Nafarroako Unibertsitate Publikoko Administrazioko eta Zerbitzuetako langileen prestakuntza eta hobekuntza profesionala arautzen dituen erabakia aldatzen duena.
Maiatzaren 12ko 110/2003 Foru Dekretuak onetsitako Unibertsitateko Estatutuetako 40. artikuluak ematen dizkidan eskumenak erabiliz, agintzen dut argitaratzeko Gobernu Kontseiluak 2019ko azaroaren 26an hartutako erabakia, zeinaren bidez onetsi baitzen Nafarroako Unibertsitate Publikoko Administrazioko eta Zerbitzuetako langileen prestakuntza eta hobekuntza profesionala arautzen dituen erabakia aldatzen duen erabakia.
“NAFARROAKO UNIBERTSITATE PUBLIKOKO GOBERNU KONTSEILUAREN ERABAKIA, NAFARROAKO UNIBERTSITATE PUBLIKOKO ADMINISTRAZIOKO ETA ZERBITZUETAKO LANGILE FUNTZIONARIOEN PRESTAKUNTZA ETA HOBEKUNTZA PROFESIONALA ARAUTZEN DITUEN ERABAKIA ALDATZEN DUENA
Gobernu Kontseiluak, 2014ko azaroaren 25eko erabaki baten bidez, arautu zuen Nafarroako Unibertsitate Publikoko Administrazioko eta Zerbitzuetako langileen prestakuntza eta hobekuntza profesionala. Erabaki horren arabera, prestakuntzarako zerbitzu berezietan dauden langile funtzionarioek lehenago zuten ordainsaria jasoko dute, baita, gainera, titular diren lanpostuaren ordainsaria zerbitzu berezietan betetzen ari diren lanpostuarenarekin parekatzeko beharrezkoa den kopurua ere. Graduari eta antzinatasunari dagozkienez jasotzen dituzten ordainsariek, baina, ez dute inolako aldaketarik izanen.
Urriaren 23ko 4/2019 Foru Lege Dekretuaren bidez, presako neurriak onartu ziren Nafarroako administrazio publikoen zerbitzuko langileen arloan. Neurrietako batek aldatu du Nafarroako Foru Komunitateko Administrazioaren zerbitzuko langileen promozioa eta prestakuntza arautzen dituen araudia, halako moldez non langileek prestakuntzan edo promozioan betetzen duten lanpostuari dagokion mailaren arabera kalkulatuko baita prestakuntzarako zerbitzu berezietan jasotzen duten eta mailaren araberakoa den ordainsaria, egoera horretan dauden bitartean.
Nafarroako Unibertsitate Publikoaren Estatutuen 106. artikulua kontuan hartuta, Nafarroako Foru Komunitateko araudian egindako aldaketara egokitu behar da Nafarroako Unibertsitate Publikoko Administrazioko eta Zerbitzuetako langile funtzionarioen prestakuntza eta hobekuntza profesionalari buruzko araudia.
Proposamena Negoziazio Mahaian aurkeztuta, eta Nafarroako Unibertsitate Publikoan ordezkaritza duten sindikatuekin ados jarri ondoren, hau da kudeatzaileak, 2019ko azaroaren 26an egindako bileran, Gobernu Kontseiluari proposatu dion,
ERABAKIA:
Lehena.–Aldatzea Nafarroako Unibertsitate Publikoko Administrazioko eta Zerbitzuetako langileen prestakuntza eta hobekuntza profesionala arautzen dituen 2014ko azaroaren 25eko erabakia, honela:
Aldatu egin da 11. artikuluaren lehen paragrafoa, eta honela idatzia gelditu da:
‘Egoera honetan deklaratutako enplegatuek zerbitzu berezietako egoera administratiboan benetan betetzen duten lanpostuari dagozkion ordainsariak jasoko dituzte’.
Bigarrena.–Erabaki hau Nafarroako Unibertsitate Publikoaren iragarki-ohol elektronikoan eta Nafarroako Aldizkari Ofizialean argitaratzea.
Hirugarrena.–Erabaki honek Nafarroako Unibertsitate Publikoko iragarki-ohol elektronikoan argitaratzen den egunean hartuko du indarra, eta 2019ko azaroaren 1etik aurrera izanen ditu eragin ekonomikoak.
Laugarrena.–Erabaki hau Kudeatzailetzara eta Giza Baliabideen Zerbitzura helaraztea.”
Iruñean, 2019ko azaroaren 26an.–Errektorea, Ramón Gonzalo García.
Iragarkiaren kodea: F1915214
