1. NAFARROAKO FORU KOMUNITATEA
1.7. BESTELAKOAK
2454/2019 EBAZPENA, azaroaren 26koa, Nafarroako Unibertsitate Publikoko errektoreak emana, zeinaren bidez agintzen baita argitaratzeko Gobernu Kontseiluak 2019ko azaroaren 26an onetsitako erabakia, Nafarroako Unibertsitate Publikoko Hauteskunde Arautegiaren aldaketa onesten duena.
Maiatzaren 12ko 110/2003 Foru Dekretuak onetsitako Unibertsitateko Estatutuetako 40. artikuluak ematen dizkidan eskumenak erabiliz, agintzen dut argitaratzeko Gobernu Kontseiluak 2019ko azaroaren 26an hartutako erabakia, zeinaren bidez onetsi baitzen Nafarroako Unibertsitate Publikoko Hauteskunde Arautegiaren aldaketa onesten duen erabakia.
“GOBERNU KONTSEILUAREN ERABAKIA, NAFARROAKO UNIBERTSITATE PUBLIKOKO HAUTESKUNDE ARAUTEGIA ONESTEN DUENA
Unibertsitateei buruzko abenduaren 21eko 6/2001 Lege Organikoak, 4/2007 Lege Organikoak aldatuak (aurrerantzean LOU), unibertsitate publikoetako errektoreen hautaketa arautzen du 20. artikuluan, eta, 3. apartatuan xedatzen duenez, estatutuek ezartzen badute unibertsitateko komunitateak hautatuko duela errektorea, botoa arloaren arabera ponderatuko da. Hauteskunde prozesu bakoitzean, hauteskunde batzordeak edo estatutuetan ezartzen den organoak, botoak zenbatu ondoren, ponderazio koefizienteak zehaztuko ditu. Koefiziente horiek arlo bakoitzean hautagai zerrendei emandako botoari aplikatuko zaizkio, estatutu horietan ezarritako ehunekoen arabera dagokion balioa emateko.
Nafarroako Unibertsitate Publikoak erabaki du Unibertsitateko komunitateak aukeratu dezala errektorea, eta estatutuen 37. artikuluan arautzen du hauteskunde prozesu hori. Artikulu horren 2. apartatuan, hautesleen arlo bakoitzari aplikatu beharreko ehuneko zehatzak ezartzen dira, eta LOUren 20. artikuluan ezarritakoa errepikatzen da.
Bestalde, LOUk 24. artikuluan ezartzen duenez, fakultateko dekanoak eta eskolako zuzendariak Unibertsitatearekin lotura iraunkorra duten irakasleen artean hautatuko dira, estatutuetan ezarritakoaren arabera.
Ildo horretan, Nafarroako Unibertsitate Publikoaren Estatutuek ezartzen dute errektorearen hautaketaren sistema eta prozedura beraren arabera arautuko dela fakultateko dekanoen eta eskolako zuzendarien hautaketa. Horretarako, 44. artikuluko 3. apartatuan, hautesleen arlo bakoitzari aplikatu beharreko ehuneko zehatzak ezartzen dira, eta, artikulu beraren 4. apartatuan, errektorearen hautaketari dagokionez aipatutakoa errepikatzen da.
Bestalde, Unibertsitateko Hauteskunde Arautegiko 42. eta 47. artikuluek ezartzen dutenez, pertsona bakarreko organo horiek hautatzeko, arlo bakoitzaren ponderazio koefizientea honela lortuko da: arloari dagokion ehunekoa zati arloan hautagaitzei ematen zaizkien boto baliodun guztien kopurua. Lau dezimalekin doituko da.
Unibertsitateko komunitateko kideen arteko sufragio unibertsalaren sistema horren bidez errektore izateko lehen hauteskundeak egin zirenetik, agerian geratu zen azkenean lortutako boto ponderatuen banaketaren emaitzak batzuetan ez zuela bat egiten estatutuek arlo bakoitzari esleitutako ponderazio ehunekoarekin, batzuetan handiagoak eta beste batzuetan txikiagoak izaten baitira. Hori, funtsean, lau dezimaleko mugaketaren ondorio izan da, eta hauteskundeen emaitzetan inolako eraginik izan ez badu ere, garrantzi txikia baitu, egokia dirudi aldaketa egiteak, batez ere kalkulu elektronikoko ohiko baliabideen eboluzioa eta zehaztasuna kontuan hartuta.
Horregatik, Unibertsitateko Hauteskunde Batzordeari kontsulta egin ondoren, idazkari nagusiak proposamena egin du Hauteskunde Arautegiaren testu bateginaren 42.3 eta 47.3 artikuluen idazketa aldatzeko.
Azaldutakoagatik, Unibertsitateko idazkari nagusiak proposaturik, honako hau da Gobernu Kontseiluak, bere kideek aurretik eztabaidatu eta gero, 2019ko azaroaren 26an egindako bileran hartu duen,
ERABAKIA:
Lehenbizikoa.–Onestea Nafarroako Unibertsitate Publikoko Hauteskunde Arautegiko 42. eta 47. artikuluen 3. apartatuaren aldaketa. Gobernu Kontseiluaren 2018ko apirilaren 24ko erabaki baten bidez onartutako testu bateginaren idazkia aldatu da (2018ko 83. Nafarroako Aldizkari Ofiziala, maiatzaren 2koa), eta apartatu horiek honela gelditu dira idatzita:
‘Arlo bakoitzeko ponderazio koefizientea lortzeko, arloari dagokion ehunekoa arlo guztietan hautagai zerrendei emandako boto baliodun guztien baturarekin biderkatuko da, eta, emaitza hori, arlo horretan hautagai zerrendei emandako boto baliodun guztien kopuruarekin zatituko’.
Bigarrena.–Erabaki hau Nafarroako Aldizkari Ofizialean argitaratzea.
Hirugarrena.–Erabaki honek Nafarroako Aldizkari Ofizialean argitaratu eta biharamunean hartuko du indarra.
Laugarrena.–Erabaki honen aurka, zilegi da administrazioarekiko auzi-errekurtsoa jartzea Nafarroako Justizia Auzitegi Nagusiko administrazioarekiko auzien epaitegietan, bi hilabeteko epean, erabakia Nafarroako Aldizkari Ofizialean argitaratu eta biharamunetik kontatzen hasita, Administrazioarekiko Auzien Jurisdikzioari buruzko uztailaren 13ko 29/1998 Legearen xedapenetan ezarritakoarekin bat.”
Iruñean, 2019ko azaroaren 26an.–Errektorea, Ramón Gonzalo García.
Iragarkiaren kodea: F1915215
