Iragarkia

225. ALDIZKARIA - 2019ko azaroaren 14a

1. NAFARROAKO FORU KOMUNITATEA

1.7. BESTELAKOAK

105/2019 EBAZPENA, urriaren 28koa, Hezkuntzako zuzendari nagusiak emana. Honen bidez ezartzen da 2019-2020 ikasturtean eskolaldi etengabea edo eskolaldi malgua baimenduta duten ikastetxeek 2020-2021 ikasturterako luzapena eskatzeko prozedura.

Hezkuntzako zuzendari nagusiak abenduaren 26an emandako 681/2018 Ebazpenaren bidez baimendu zen 2019-2020 ikasturtean eskolaldi etengabea edo eskolaldi malgua modu esperimentalean baimenduta zuten ikastetxeetan eskolaldia luzatzea 2020-2021 ikasturterako.

681/2018 Ebazpenean ez ziren arautu Hezkuntzako zuzendari nagusiaren otsailaren 6ko 29/2018 Ebazpenaren bitartez 2018-2019 ikasturtean eskolaldi etengabea edo eskolaldi malgua modu esperimentalean ezarri zuten ikastetxeak.

Nolanahi ere, Hezkuntzako zuzendari nagusiaren maiatzaren 17ko 288/2019 Ebazpenaren bidez, eskolaldi etengabearen edo eskolaldi malguaren luzapen automatikoa ezarri zen, 2019-2020 ikasturterako, Hezkuntzako zuzendari nagusiaren otsailaren 6ko 29/2018 Ebazpenaren bidez 2018-2019 ikasturtean eskolaldi mota horietako bat modu esperimentalean ezarri zuten ikastetxeetan.

Ebazpen honetan ezartzen da zer prozedura bete behar duten 681/2018 eta 288/2019 ebazpenetan jasotako ikastetxeek eskatzeko 2020-2021 ikasturterako luza dakiela eskolaldia, modu esperimentalean.

Ebazpen honetan xedatutakoa bete behar izatetik salbuetsita daude Hezkuntzako zuzendari nagusiaren martxoaren 14ko 122/2019 Ebazpenaren bidez 2019-2020 eta 2020-2021 ikasturteetan eskolaldi etengabea edo eskolaldi malgua ezartzeko baimena lortu zuten ikastetxeak.

Ikusirik Antolamenduaren, Orientazioaren eta Aukera Berdintasunaren Zerbitzuko zuzendariak aldeko txostena eman duela, 681/2018 eta 288/2019 ebazpenetan jasotako ikastetxeek eskolaldi etengabearen edo eskolaldi malguaren luzapena, kasua zein den, eskatzeari buruz.

Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 32.1.d) artikuluak ematen dizkidan ahalmenak erabiliz,

EBAZTEN DUT:

1. Ezartzea zer prozedura bete behar duten II. eranskinean adierazitako ikastetxeek eskolaldi etengabea edo eskolaldi malgua 20202021 ikasturterako modu esperimentalean luza dakiela eskatzeko, I. eranskinean xedatutakoaren arabera.

2. Ebazpen honen aurka gora jotzeko errekurtsoa jar daiteke, Hezkuntzako kontseilariari zuzendua, hilabeteko epean, Nafarroako Aldizkari Ofizialean argitaratu eta biharamunetik hasita.

3. Ebazpen hau eta eranskinak igortzea Antolamenduaren, Orientazioaren eta Aukera Berdintasunaren Zerbitzura, Hezkuntzako Ikuskapen Zerbitzura eta Hezkuntzako Azpiegituren Zerbitzura, behar diren ondorioak izan ditzaten.

4. Ebazpen hau eta eranskinak Nafarroako Aldizkari Ofizialean argitaratzea.

Iruñean, 2019ko urriaren 28an.–Hezkuntzako zuzendari nagusia, Gil Sevillano González.

I. ERANSKINA

Eskolaldi etengabearen edo eskolaldi malguaren luzapena, 2020-2021 ikasturterako

1. II. eranskinean jasotako ikastetxeek, kasua zein den, eskolaldi etengabearekin edo malguarekin jarrai dezakete 2020-2021 ikasturtean, aurretik Ikasketak Antolatzeko Atalari eskatuta.

2. Horretarako, ikastetxeek Eskola Kontseiluaren bilkura berezi baterako deia eginen dute, gai-zerrendan honako hauek bilduta, gutxienez:

a) Zuzendariak eskolaldiaren analisia eta balorazioa aurkeztea, zuzendaritza taldeak egin eta 2018-2019 ikasturteko urteko memorian jasota daudenak.

b) Lehendakariak eskolaldiaren ebaluazioa aurkeztea, Eskola Kontseiluak egina, organo horrek ezarritako parametroen arabera.

c) Zuzendariak I. eranskin honetako 9. puntuan aipatzen diren balizko aldaketak aurkeztea.

d) Eskola Kontseiluko kideek eskolaldi motaren luzapena bozkatzea. Bozketaren akta eginen da, baita haren ondorioz Eskola Kontseiluak hartutako erabakiarena ere, III. eranskineko ereduari jarraituz. Akta jendaurrean jarri beharko da, ikastetxean.

3. 2d) puntuan aipatutako bozketa errazteko, aldez aurretik zuzendariak ahalbidetuko du bilerak egin daitezen, eskola komunitatea osatzen dutenek 2a), 2b) eta 2c) puntuetan aipatutako informazioa hartu ahal izateko, eta botoa emateko eskubidea duten Eskola Kontseiluko kideek jakin ahal izateko zein den berek ordezkatutakoen iritzia, eta, beraz, ahalik eta objektibotasun handienaz bozkatu ahal izan dezaten.

4. Kontsultarako galdera hau izanen da:

Indarrean den eskolaldia luzatzearen alde zaude?

BAI 

EZ 

5. 2020-2021 ikasturtean eskolaldi etengabea edo eskolaldi malgua luzatuko da, kasua zein den, baldin eta Eskola Kontseiluko kideen gehiengo osoak baietz erantzuten badio goiko galdera horri. Ez baldin bada gehiengo hori lortzen, ikastetxean eskolaldi zatitua izanen da berriz ere (eskolak, goiz eta arratsaldez) 2020-2021 ikasturtetik aurrera.

6. Zuzendaritza taldeak erabakitzen badu proiektu berri bat aurkeztea eskolaldi etengabea edo malgua ezartzeko hurrengo deialdian, eta ikastetxeko hezkuntza komunitateak proiektu hori onesten ez badu, aurreko puntuaren araberako eskolaldi mota izanen da 2020-2021 ikasturtean.

7. Bozketaren emaitza edozein izanik ere, III. eranskinaren kopia bat bidaliko da, abenduaren 1ean beranduenez, Ikasketak Antolatzeko Atalaren ordenacion.academica@navarra.es helbidera, Hezkuntzako zuzendari nagusiak ebatz dezan.

8. Luzapena onesteak berekin dakar eskolaldia, etengabea nahiz malgua, aurrera eramatea Hezkuntza Departamentuak onartutako proiektuan agertzen diren baldintza beretan.

9. Nolanahi ere, baldin eskolaldi etengabean goizean sartzeko ordutegia eta ateratzeko ordutegia (eskolaz kanpoko jarduerak barne) Hezkuntza Departamentuak onartutako proiektuan aurkeztu ziren berak badira, ikastetxeek, eskolaldia ebaluatutakoan, barne aldaketak egiten ahalko dituzte. Aldaketa horiek 2020-2021 ikasturtean aplikatuko dira, eta izan daitezke:

a) Eskolaz kanpoko jarduera batzuen ordez beste batzuk jartzea. Batez ere ikasleen beharrei eta ezaugarriei begira antolatuko dira jarduerak, ikastetxeen antolakuntza aukeren barruan. Oro har, barne-jarduerak izanen dira, eta ikastetxean bertan eginen dira. Ikastetxetik kanpo egiten direnak –kanpo-jarduerak–, ikastetxearen proiektu barrukoak izaten ahalko dira ikastetxearen ordutegiaren barruan egiten badira. Ikasleen joan-etorria ikastetxearen ardura izanen da, eta ikasleek ikastetxean egon beharko dute ikastetxean bertan egiten diren eskolaz kanpoko jarduerak amaitzen direnerako.

b) Jolasaldien eguneko egitura aldatzea, kontuan harturik 30 minutuko jolasaldi bat izan behar duela, edo 40 minutuko jolasaldi bat, edo bi jolasaldi, 40 minutukoak biak baturik.

c) Curriculum saioen iraupena aldatzea.

Edonola ere, curriculum saioek eta jolasaldiek, biek batera, astean 1550 minutu edo gehiago hartuko dituzte, jolasaldiak 40 minutukoak direnean, eta 1500 minutu edo gehiago, jolasaldiak 30 minutukoak direnean.

10. Eskolaldi etengabea izanez gero, eskolaz kanpoko jarduerak bukatu ondoren aterako da garraioa. Ordutegi hori aurrera daiteke, baldin eta garraiorako ibilgailu bera erabiltzen duten ikasle guztiek horrelakorik adosten badute, eta aldaketa horrek ukitzen ez badu ez garraio bera erabiltzen duten gainerako ikastetxeekiko koordinazioa, ez adjudikaziodunaren plangintza, ezta jantokiaren antolaketa ere. Ordutegi hori aurreratzeko beharrezkoa izanen da ikastetxeak horren berri ematea Hezkuntza Departamentuko Hezkuntzako Azpiegituren Zerbitzuari, 2020ko maiatzaren 1etik 25era, IV. eranskinean ezarri bezala, horrek bere oniritzia eman dezan. Zerbitzuak oniritzia emandakoan, huraxe izanen da ukitutako ibilgailuaren irteera ordua 2020-2021 ikasturtean, ikastetxean ikasle berriak sartu ala ez.

11. Eskolaldi etengabea izanez gero, ikastetxeek aldatu nahi badute goizean sartzeko ordutegia edo ateratzeko ordutegia (eskolaz kanpoko jarduerak barne) Hezkuntza Departamentuak onartutako proiektuan aurkeztu zirenen aldean, beste baimen bat eskatu beharko dute hurrengo deialdian, Hezkuntza Departamentuak erregelamenduari jarraikiz ezartzen duen prozeduraren arabera beste proiektu bat aurkeztuta.

II. ERANSKINA

Eskolaldi etengabea duten ikastetxeen zerrenda

Eskolaldi malgua duten ikastetxeen zerrenda

III. ERANSKINA

Eskola Kontseiluak eskolaldia luzatzearen gainean egindako bilerako bozketaren akta (PDFa).

IV. ERANSKINA

Eskolaldi etengabearen luzapena

Garraioa irteteko ordua aurreratzea (PDFa).

Iragarkiaren kodea: F1913700