1. NAFARROAKO FORU KOMUNITATEA
1.7. BESTELAKOAK
2124/2019 EBAZPENA, urriaren 15ekoa, Nafarroako Unibertsitate Publikoko errektoreak emana. Haren bidez, agintzen da argitaratzeko “Nafarroako Unibertsitate Publikoak ematen dituen Graduko eta Masterreko Ikasketa Ofizialetan Aparteko Sariak emateko Arautegia” onesten duen erabakia, 2019ko urriaren 15eko Gobernu Kontseiluan hartutako erabaki baten bidez onetsia.
2003ko maiatzaren 12ko 110/2003 Foru Dekretuak onetsitako Unibertsitateko Estatutuetako 40. artikuluak ematen dizkidan ahalmenak erabiliz, agintzen dut argitaratzeko 2019ko urriaren 15eko Gobernu Kontseiluak hartutako erabakia, “Nafarroako Unibertsitate Publikoak ematen dituen Graduko eta Masterreko Ikasketa Ofizialetan Aparteko Sariak emateko Arautegia” onesten duena.
ERABAKIA, NAFARROAKO UNIBERTSITATE PUBLIKOKO GRADUKO ETA UNIBERTSITATE MASTERREKO IKASKETA OFIZIALETAN APARTEKO SARIAK EMATEKO ARAUTEGIA ONESTEN DUENA
NUPeko Gobernu Kontseiluak Nafarroako Unibertsitate Publikoko Graduko eta Unibertsitate Masterreko Ikasketa Ofizialetan Aparteko Sariak emateko Arautegia onetsi zuen 2016ko urtarrilaren 27ko bileran.
Orain komeni da, zenbat sari emango diren kalkulatzeko, ikasle tituludunen gutxieneko kopurua eta ikasle kopuruaren araberako tarteak eguneratzea, eta aukera ematea graduko ikasketa-plan ofizial guztiek gutxienez aparteko sari bat izan dezaten. Sariak emateko prozedura ere aldatuko da.
Hau da, Ikasleen Gaietarako, Enpleguko eta Ekintzailetzako errektoreordeak proposaturik, Nafarroako Unibertsitate Publikoko Gobernu Kontseiluak 2019ko urriaren 15ean egindako bileran hartu duen
ERABAKIA:
Lehenbizikoa.–Onestea Nafarroako Unibertsitate Publikoak ematen dituen Graduko Eta Unibertsitate Masterreko Ikasketa Ofizialetan Aparteko Sariak emateko Arautegia. Erabaki honen I. Eranskinean dago.
Bigarrena.–2018-2019 ikasturteko aparteko sarien deialdian aplikatuko da arautegi hau.
Hirugarrena.–Erabaki honen berri ematea Ikasleen Gaietarako, Enpleguko eta Ekintzailetzako Errektoreordetzari, Irakaskuntzako Errektoreordetzari, Fakultate, Eskola eta Sailetako Zuzendaritzei eta Dekanotzei, Irakaskuntza Zerbitzuari eta Sarbidearen, Beken eta Tituluen Atalari.
Laugarrena.–Erabaki hau Nafarroako Aldizkari Ofizialean argitaratzeko agindua ematea.
Iruñean, 2019ko urriaren 15ean.–Errektorea, Ramón Gonzalo García.
ERANSKINA
Nafarroako Unibertsitate Publikoak ematen dituen Graduko eta Masterreko Ikasketa Ofizialetan Aparteko Sariak emateko Arautegia
1. artikulua. Nafarroako Unibertsitate Publikoak Ikasketen Amaierako Aparteko Sarien deialdia antolatzen du bere ikasleentzat, hain zuzen graduko eta unibertsitate masterreko ikasketak deialdian zehaztutako ikasturtean bukatu dituztenentzat.
2. artikulua. Ikasle batek Aparteko Saria jasotzeko aukera izateko, baldintza hauek bete behar ditu: bere titulu ofiziala emateko eskaera aurkeztua izan eta tramitazio hori egiteagatik dagokion prezio publikoa ordaindua eduki, betiere prozedura bukatu baino lehen, 4. artikuluan ezarritakoarekin bat etorriz.
3. artikulua. 1. Aparteko Sari bat emango da graduko ikasketa-plan ofizial bakoitzean, gradu horren aipamenak kontuan hartu gabe, eta gradua ikasturtean bukatu duten ikasleek izango dute saria irabazteko aukera, betiere 8,0 puntuko batez besteko kalifikazioa edo hortik gorakoa izan dutela frogatzen badute. Ikasketa-plan jakin bat 80 ikaslek edo gehiagok bukatzen badute, bigarren sari bat emango da. Era berean, beste 40 ikaslek bukatzen badute gradua, aparteko beste sari bat emango da, eta horrela hurrenez hurren.
Ikasketa-plan batean 8,0 puntuko batez besteko kalifikaziora iristen den izangairik ez badago, sari bakarra emango da, batez besteko kalifikazio handiena duen ikasleari, betiere kalifikazio hori 7,0 puntukoa edo handiagoa bada.
2. Aparteko Sari bat emango da masterreko ikasketa-plan ofizial bakoitzean, master horren espezialitateak kontuan hartu gabe, eta masterra dagokion ikasturtean bukatu duten ikasleek izango dute saria irabazteko aukera, betiere 15 ikasle edo gehiago badira eta 8,0 puntuko batez besteko kalifikazioa edo hortik gorakoa izan dutela frogatzen badute. Ikasketa-plan jakin bat 80 ikaslek edo gehiagok bukatzen badute, bigarren sari bat emango da. Era berean, beste 40 ikaslek bukatzen badute gradua, aparteko beste sari bat emango da, eta horrela hurrenez hurren.
Ikasketa-plan batean 8,0 puntuko batez besteko kalifikaziora iristen den izangairik ez badago, sari bakarra emango da, batez besteko kalifikazio handiena duen ikasleari, betiere kalifikazio hori 7,0 puntukoa edo handiagoa bada.
3. Berdinketarik gertatzen bada, curriculum akademikoan ohorezko matrikula gehien dituen ikasleari emango zaio Aparteko Saria, eta, berdinketak bere horretan badirau, bikain gehien dituenari. Irizpide horren arabera ere ez bada berdinketa desegiten, berdindu duten izangai guztiei emango zaie Aparteko Saria, baina sariaren balizko diru kopurua guztien artean banatuko da, parte berdinetan.
4. Ikasleek ez dute Aparteko Sarira aurkezteko aukerarik izango baldin eta espedienteko kredituen %25 edo gehiago beste ikasketa batzuetan egindako irakasgai edo jarduerengatik aitortuak badituzte.
4. artikulua. Ikasturte bakoitzean, Unibertsitateko errektoreak, Nafarroako Aldizkari Ofizialean argitaratuko den ebazpen baten bidez, arautegi honetan aipatutako Aparteko Sarietarako deialdia egingo du, eta prozedura hasteko eta bukatzeko epeak ezarriko ditu. Halaber, berak ezarriko du zein Aparteko Sarik izango duten diru-zuzkidura, sarietarako dagoen finantzabidearen arabera.
5. artikulua. Unibertsitateak, dagokion administrazio zerbitzuaren bidez, ofizioz hautatuko ditu Aparteko Sariak jasotzeko eskakizun akademikoak betetzen dituzten ikasleak, eta Unibertsitatearen iragarki-ohol elektronikoan argitaratuko du Aparteko Saria irabaziko duten izangaien behin-behineko zerrenda. Ikasleek hamar eguneko epea izango dute alegazioak aurkezteko.
6. artikulua. 1. Erreklamazioak egiteko epea bukatu eta gero, ikasleen gaietan eskumena duen errektoreordetzak erreklamazioak aztertu, eta onartu edo atzera botako ditu. Horrez gain, Aparteko Sariak emateko behin betiko proposamena bidaliko dio errektoreari.
2. Aparteko Sariak errektorearen ebazpen baten bidez emango dira. Ebazpenaren edukia Unibertsitatearen iragarki-ohol elektronikoan argitaratuko da.
7. artikulua. 1. 3. artikuluko atalek aipatutako batez besteko kalifikazioa kalkulatzeko, ondorengo formula hau aplikatuz lortzen den batez besteko kalifikazioa emango zaio ikaslearen curriculum akademikoari, eta emaitza hiru dezimalekin adieraziko da:
Σ (kalifikazioa x irakasgaiaren kreditu kopurua) |
–––––––––––---–––––––––––––––––––––––––––––––––––––––––––––––––––––––––––––– |
Σ (kalifikatutako irakasgaia azaltzen den aldi kopurua x irakasgaiaren kreditu kopurua) |
2. Formula hori aplikatzeari dagokionez, ez dira kontuan hartuko gainditu gabeko irakasgaien kredituak, ez eta ikasketa-planetan ez dauden prestakuntza-jarduerengatik edo “Gai”, “Parekatua” edo antzeko kalifikazioak baino ez dituzten beste batzuengatik emandako hautaketa libreko kredituak ere.
3. Ikaslearen curriculum akademikoan zenbakizko kalifikaziorik gabeko kalifikazio kualitatiborik agertzen bada, baliokidetza-taula honen arabera lortuko dira zenbakizko kalifikazioak: Gainditua-5,5; Oso ongi-7,5; Bikain-9,0; Ohorezko matrikula-10.
8. artikulua. Saria jasotzen duten ikasleek sariaren diploma-egiaztagiri bat jasoko dute. Emandako sariaren aipamena gehituko zaio ikaslearen espedienteari, eta hala jasoko da ikasketa-ziurtagirietan, Tituluaren Europako Gehigarrian eta, arautegiak horretarako aukera ematen badu, titulu ofizialean ere.
XEDAPEN INDARGABETZAILEA
Indarrik gabe gelditzen da Nafarroako Unibertsitate Publikoak ematen dituen graduko eta unibertsitate masterreko ikasketa ofizialetan aparteko sariak emateko arautegia, Gobernu Kontseiluak 2016ko urtarrilaren 27ko erabaki baten bidez onetsitakoa.
AZKEN XEDAPENA
Arautegi honek Nafarroako Aldizkari Ofizialean argitaratu eta biharamunean hartuko du indarra.
Iragarkiaren kodea: F1913403
